رواية خلف الابواب المغلقه الفصل السادس عشر 16 بقلم مشاعر مبعثره
مشيت غرفة ابو البنات ، لقيتا فاتحه بس هو مافي !! عاينت للباب بتاع الصاله فاتح ، قمت ضويت تلفوني وطلعت ، لقيتو خاتي الطشت وقاعد يغسل قلت له : بتعمل في شنو؟
هو زاتو انخلع كان مضوي بس تلفونو ، قال لي : انتي لسه ما نمتي؟
: نمت لكن صحتني حركتك ، ليه بتغسل براك؟ انا امس ما غسلت كان تطلعهم لي ، جيبهم اغسلهم لك
.
جيت اقعد مكانو ؛ زح مني الطشت وقال لي : لالا خليهم .
: اخليهم كيف يعني؟ وانا فايدتي شنو مدام بتغسل براك؟
: سمر دي ملابس داخليه واصلا قاعد اغسلهم براي ، من بعد المرحومه ، حتى ليان بنتي ما بخليها تغسلهم .
: ما مشكله انا بغسلهم لك .
: لالا مستحيل الحاجات الخاصه دي اي يزول بغسلا براه .
مسكت منو الطشت و قلت له : بس انا ما ذي ليان ! انا زوجتك عادي بغسل لك .
: سمر انتي ما مجبوره تعملي كدا !!
هزيت راسي ، وقلت له : قوم لو سمحت وخليني اقوم بدوري .
ابتسم ومشى ولع لي النور وقعد قلت له : امشي نوم .
: مستحيل اخليك براك ، الدنيا ليل .
: ههههههههه بس انا ما بخاف ابدا .
لمن قلت كدا سكت خلاني ، فجاءة احس لك بحاجه بتجرني من ورا ، صرخت وقلبي قعد يدق ، من اتلفت كدا لقيتو قدامي يضحك قال لي : دا انا 😅
انا طبعا من الخوف جسمي كلو بقى يرجف .
قلت له : حرام عليك ياخ .
: اسف خلاص اهدي ، ما اتوقعتك تخافي كدا .
كنت لسه واقفه قدامو برجف ، قام حضني من غير م احس .
بس بسرعه بعدنا عن بعض ، هو زاتو اتوتر شديد ، انا رجعت اغسل وتاني م اتكلمنا مع بعض لمن خلصت ، ودخلنا اي زول على غرفتو .
انا ما قدرت اتجاوز الحضن دا ، مع انو كان للحظات !! اتمنيتو يتكرر ، وغصبا عني بفكر فيه للصباح🙈
تاني يوم سمعت انو بيت جارتي وقعت فيه دانه والله شدة ما خفت وقلبي دا وجعني لمن قربت ابكي ، وهاني ولدي كان عندو اسئلة كتيره قال لي : ماما بيتنا اتكسر؟؟
: لالا م تقول كدا بيتنا ما جاتو شي ، دا بيت الجيران ، زاتو م اتضرر شديد ، حاجه خفيفه ، كويس انهم طلعو منو كانو مصرين شديد على القعاد عشان الحراميه ما يدخلو يسرقوهم .
: مش قالو بيتنا انسرق؟؟
: والله قالو لقو الباب الفاتح .
: انا خليت عجلتي برا ، ان شاء الحراميه ما يشيلوها ، والايباد بتاعي نسيتو ، والبلايستيشن .
: كل شي بتعوض ، ما مشكله لو العفش انسرق المهم نحن طلعنا بروحنا ، في ناس اتقصفو جوا البيوت ، وناس جاتهم دانات ورصاصات طايشه .
: انا اشتقت لبيتنا شديد يا ماما ، يعني تاني ما ح نشوفو؟؟
: ح نرجع ما تخاف يا ولدي ، دا ابتلاء من ربنا ، ونحن صبرنا عليه ربنا حايعوضنا خير .
لمن قلت كدا البنات عاينو لبعض وسكتو ، واليوم كلو م كانو طبيعين ، ولمن اسألهم بقولو لي مافي شي ، بليل نامو من غير عشاء حيروني زاتو ، وانا اولادي اصلا بشربو لبن بس وبنومو .
بقينا قاعدين انا وابو ليان برانا ، وهو شايل مهيلم ، كان في خشمو كلام وانا لاحظت له قلت له : احكي .
قال لي بصوت مبحوح : انتي معتبره العقد البيننا دا مؤقت؟؟
: ليه بتقول كدا .
: كنتي بتقولي لهاني انكم راجعين و........
: ايواااا فهمت ، يعني عشان كدا البنات زعلو .
: والله لين قبيل جات حكت لي ، وكانت بتبكي! قالت لي : نحن ربنا كاتب لينا نعيش كدا من غير ام العمر كلو؟💔
ختيت يدي في صدري بخضه كدا وقلت له
: معقول انا امشي اخليكم يا ابو ليان؟؟ انتو خلاص بقيتو اسرتي ودا بيتي ، وهم والله زي بناتي ما بحسهم غير كدا ، قلت لهاني الكلام دا بتلقائيه ، عشان كل م نسمع خبر ذي دا انا بثبتهم بنفس العباره ، اما رجوع تاني خلاص ، حتى لو الحرب انتهت !! الا لو معاكم انتو .
حسيتو فرح شديد لمن ارتسمت على وشو ابتسامه قال لي
: يعني يا سمر ناويه تعيشي معاي العمر كلو؟؟
: ما بقيت مرتك خلاص افوتك وين؟
: ربنا يخليك لي يا سمر .
شلت ولدي الكان بتشابى لي ، من غير م اقول شي .
قال لي : لازم تقولي للبنات الكلام دا .
عاوزه اقوم قال لي : لبكرا م اسي .
قلت له : لالا ماشه انوم .
: طوالي كدا؟
: بستحم اول ، خلي الشاب دا معاك عشان لازم اجيب المويه بالجردل .
: ليه بالجردل؟
: الماسورة بتاعة حمامنا خربانه انت نسيت ولا شنو؟
: اخ صح والله .
قلت له بهظار كدا : ما حاتمشي تملاه لي ي ابو البنات؟
: لا طبعا .
كنت فاكراه بهظر ، بس عيني له مشى طفا النور البرا وقفل الباب ، عاينت له باستفهام 🤨
قال لي : استخدمي حمامي بس ، كنت متردده بس لمن لقيتو قاعد مع مهيلم في الصاله مشيت شلت جلبابي ودخلت غرفتو .
الحمام داخلي اول مره ادخلو طبعا اظبط من حقنا😄 استحميت وطلعت بالجلباب ، وقفت قدام المرايه قلت بما انو برا اسرح ، فكيت شعري وقعدت اسرح فيه فجاءة جاء داخل ! هو زاتو انخلع لمن شافني قدام المرايه ، بقيت اكابس للتوب وشكلي خليتو في الحمام طوالي قمت ماشه .
قال لي : لالا خليك اخدي راحتك ، انا مافي تمام؟؟
لمن قال مافي افتكرتو طالع ، لكن مشى رقد وشايل تلفونو حيرني ووترني في نفس الزمن ، غلبني زاتو اسرح عاوزه اقبضو لورا واتخارج قال لي : في كريمات وزيوت في الدرج ، استغربت لمن قال كدا!!
قلت له : كريمات شنو كمان؟ ما تقول لي بتتمسح بهم😅😅
ضحك وقال لي : لالا دي ليان مرات بتخبي حاجاتا هنا من لين وشادن .
قعدت اضحك قلت له : الحركه دي انا ياما عملتا مع اخواتي وحتى اقلامي والواني كنت بخبيهم في غرفة امي ما ياخدوهم لي .
: يلا في الدرج القدامك دا بتلقيهم .
: ههههه يحليلا ليان مخبياهم من البنات لمت فيهم ام البنات . 😅😅😅😅😅
: ما تخافي انا بحفظ سرك .
شلت من الزيت بتاعا عملت شعري وقعدت اتمسح كل شويه اتلفت عليه ما يكون بعاين لي لمن خلصت قمت ماشه .
قال لي : استني
: في شنو؟
: تعالي .
عاينت له ب استنكار قال لي : يلا تعالي هنا .
قمت ماشه عليه وانا متردده ، وهو لسه راقد ب اريحيه ، اشر لي بيدو اقعد جنبو في السرير ، بقيت ما فاهمه شي !! هو عاوز يقول شنو؟؟
قلت له : خير في حاجه ي ابو ليان؟؟
صلح رقدتو وقال لي.......يتبع♥️