رواية في قبضة الفهد الجزء الثالث3 بقلم جنات
رواية في قبضة الفهد الجزء الثالث3 الفصل السابع والعشرون27 بقلم جنات
جاد خرج من الڤيلا وركب عربيته وراح على قسم كبير لشرطه فى ايطاليا وفيه عدد كبير من المساجين .
جاد نزل وقرب من الحارس اللى واقف على الباب: كل شئ جاهز ؟!!
الحارس:تم يا فندم ... اتفضل .
الحارس دخل ووراه جاد ... ودخل على اوضه صغيرة فيها تربيزة صغيرة وكرسين .
جاد قعد على كرسي فيهم .
الحارس خرج من الاوضه .
وبعد كام دقيقه باب الاوضه اتفتح ودخلت ست كبيرة فى السن وعينيها اللى بتعكس فرحتها على جاد .
الست قربت وقعدت على الكرسي اللى قدام جاد .
جاد رجع بضهره على الكرسي:اهلا صوفيااا هانم ..... ولا اقول يا ماما .
صوفيا اللى بان عليها العجز والتعب من السنين اللى قضيتها فى السجن وعينيها اللى كلها حزن من برود ابنها ومعاملته القاسيه اللى دايما بيعاملها بيها .
جاد:زعلانه ليه ... مش كان نفسك اجى وازورك وادينى جيتلك وقاعد قصادك .
صوفيا بحزن وكسرة باينه فى صوتها:لسه فاكر ان ليك ام يا جاد !
جاد:ابن .... وابنك ده انتى كنتى تعرفيه ولا بتسالى عنه اصلا زمان ... كان اهم حاجه عندك اخوكى وشغلك .... فاكرة شغلك يا صوفيا هانم .
صوفيا دموعها نزلت من كلامه .
جاد:تؤ تؤ بلاش الدموع دى .... وفريها لوقت تانى ... لما اخلصلك على حبيب القلب .
صوفيا باستغراب:قصدك ايه ؟
جاد:قصدى الفهد يا صوفيا هانم ... معقول نسيتى حبيبك القديم اللى كنتى بتجرى وراه فى كل مكان وهو ولا كان بيعبرك ولا بيبصلك اصلاا ... الفهد اللى سبتى جوزك وابنك وعيلتك كلها عشان خاطره ... وفى الاخر عمل ايه سابك وراح اتجوز غيرك .... ماهو بردو كان معاه حق .
صوفيا بصتله ومش فاهمه معنى كلامه .
جاد:عايزة تعرفى معاه حق ليه ؟ .... ماهو اكيد مش هيختار اللى مرخصه نفسها وبتجرى وراه ... هو اختار صح اختار تمارا فكراها .
صوفيا معالم وشها كلها بقت الغضب لما سمعت اسم تمارا وهى نفس البنت اللى اخدت منها الفهد اللى كانت بتعشقه .
جاد:انا جاى هنا مش عشان اشوفك ولا اطمن عليكى ... جاى اقولك انى هقتل الفهد ... مش عشانك بردو .... عشان عمى اللى ربانى وكبرنى
صوفيا:عمك اللى كان السبب اللى خلاك تكرهنى كدا .
جاد:بالعكس ورانى حقيقتك يا صوفيا هانم .
صوفيا:بلاش تقرب من الفهد وعيلته يا جاد .... الفهد مش سهل ولو عرف نيتك هيخلص عليك .... انسي اللى عمله فيا وفى عمك وابعد عنه .
جاد ضحك بصوته كله:خلينى اوضحلك بس .... انا هاخد حق عمى اللى الفهد قتله مش حقك انتى .... انتى تستاهلى اللى حصل فيكى لانك كنتى بتسمعى كلام اخوكى الملك فى كل حاجه وفى الاخر دخلتى السجن وهتموتى فيه .
صوفيا عيطت اكتر:يعنى انا استاهل اللى حصل فيا لكن عمك لأ !
جاد بصلها ومردش عليها .
صوفيا بعصبيه ممزوجه بدموع:فرانكو كان يستاهل يموت الموته دى يا جاد .... لانه كان رايح وناوى يقتل الفهد عشان كدا قتله ... هو اللى عينه كانت على تمارا مرات الفهد وكان بيحاول يخطفها باى طريقه وفكل مرة الفهد كان ينقذها منه .... عمك فرانكو ده كان شيطان عايش على الارض فهمت .... وبعدين انت عايز تاخد حقه ليه انت مصدق انه عمك .... ده ابوك ذات نفسه بيكره .
جاد:ايوا مصدق انه عمى .... انا مش عبيط وعارف انه اخو بابا مش من نفس الام بس اسمه اخوه وعمى وكان معايا فى الوقت اللى انتى مكنتيش موجوده وعلمنى كل حاجه فى حياتى .
صوفيا عيطت اكتر:حرام عليك هضيع نفسك عشان تنتقم لواحد كان شيطان .
جاد قام وقف:وقتك خلص يا صوفيا هانم .... دى تقريبا تانى او تالت مرة اجيلك من وقت ما اتسجنتى .... وهتكون اخر مرة انا بوعدك .... سلام يا صوفيا هانم .
جاد خلص كلامه وخرج من الاوضه وصوفيا انهارت وجه عسكرى واخدها عشان يرجعها السجن .
بقلم الكاتبة جنات
ــــــــــــــــ★ــــــــــــــ
صباح تانى يوم فى اسكندريه .
فى مطعم على البحر .
كانت حياه قاعده بتستنى ديالا اللى كلمتها وقالتها انها عايزة تشوفها ضرورى .
حياه ابتسمت لما شافت ديالا داخله المطعم .
ديالا قربت منها وسلمت عليها وقعدت على الكرسي قدامها .
حياه:مالك يا ديالا انتى كويسه ؟ .... صوتك لما كلمتينى كان تعبان اوى .
ديالا كانت بتفرك صوابعها بتوتر:حياه فى حاجه عايزة اقولك عليها .
حياه:طب اهدى كدا خلينا نطلب حاجه نشربها وبعدها نتكلم تمام .
ديالا هزت راسها باه .
حياه:نطلب عصير لمون ايه رايك ؟
ديالا:حاضر .
حياه نادت على الشاب وطلبت منه ٢ عصير لمون .
حياه:مالك يا ديالا حساكى خايفه ومتوترة .
ديالا:انا عرفت حاجه مهمه وجاد قالى انك عارفه بس انا مش مصدقاه .
حياه بلعت ريقها بخوف لما جت سيرة جاد:حاجه ايه ؟!
ديالا:حياه الشخص اللى بيبعتلك المسدجات اللى انتى قولتيلى عليه هو نفسه جاد .
حياه:انتى عرفتى ازاى ؟!
ديالا:يعنى انتى عارفه!
حياه:للاسف اه .... هو اللى قالى بنفسه وكل يوم بيهددنى عشان ابعد عن فهد بس انا مستحيل اعمل كدا .
ديالا:انا مش مصدقه ان جاد ممكن يعمل حاجه زى دى يا حياه انا هتجنن من وقت ما عرفت .
حياه:هو اللى قالك ؟
ديالا:انا عرفت قبل ما هو يقولى .
حياة:ازاى !
ديالا بدات تحكيلها على الاوضه اللى كلها صور ليها وعن كلام جاد .
حياه:انا مش مصدقه بجد .... ده شخص مريض ومش طبيعى ...... بس هو لو عرف انك قوليتلى ... افرض اذاكى !
ديالا الدموع اتجمعت فى عينيها:مافيش أذى اكتر من اللى سببه ليا .... انا موجوعه اوى يا حياه .... كنت دايما اسمع عن كسرة القلب بس اول مرة احس بيها .
حياه:اهدى يا ديالا انتى طيبه وتستاهلى خير .... صدقينى جاد ميستهلش حبك ابدااا .
ديالا مسحت دموعها:صح انتى معاكى حق .... انا لازم انساه واشيله من قلبى .... تفتكرى هقدر ؟!
حياه:الموضوع مش سهل لو احنا بنحب الشخص ده بجد ..... بس لما القلب بيتوجع من نفس الشخص صدقينى بيكون راحه ليه انه ينساه .
الشاب جاب العصير وحطه قدامهم على التربيزة .
حياه:اشربي واهدى يا ديالا .
ديالا مسحت كوبايه العصير وشربت منه شويا .
حياه:تعرفى يا ديالا حالتك دى فكرتنى بمين ؟!
ديالا:مين؟!
حياه:مامتى .
ديالا:طنط زينه ... ليه ؟
حياه:ماما كانت مرة حكتلى انا وديما انها كانت بتحب حد زمان وكانو مخطوبين لبعض .... بس الحد ده كان اذاها جدااا لدرجه انه خطفها وبعدت عنه وعرفت بحب بابا ليها اللى كان محتفظ بيه جوا قلبه .... ووقتها عرفت انها ماكنتش بتحب الشخص ده ابدااا وعرفت يعنى ايه الحب الحقيقي مع بابا .
ديالا:يعنى حبي لجاد ممكن ميبقاش حب !
حياه:ممكن حب تعود ... لانك قولتى انك اتربيتى معاه من صغرك ... اتعودتى انه قدامك ومتعرفيش غيره .
ديالا:يمكن .
حياه:يلا اشربي العصير حلو اوى .
ديالا وحياه بداو يشربو العصير ويتكلمو فى مواضيع كتير وبعدها حياه راحت على شركه الفهد وديالا على شركه جاد .
بقلم الكاتبة جنات
ــــــــــــــــ★ــــــــــــــ
جاد رجع على الڤيلا بتاعه والده اللى كان قاعد فى انتظاره .
جاد دخل الڤيلا وراح ناحيه السلم من غير ما يكلم والده او حتى يبصله .
فريد:كنت فين طول الليل ؟!
جاد مردتش عليه .
فريد:روحتلها !
جاد وقف ولف لوالده:اكيد عرفت من رجالتك اللى ماشين ورايا .
فريد قام وقرب منه:جرحتها اكيد .
جاد:انت لسه خايف عليها بعد اللى عملته معاك .... دى طلبت الطلاق منك عشان واحد بتحبه وفى الاخر رماها واتجوز غيرها .
فريد:حتى لو .... اسمها كانت مراتى فى يوم من الايام .... بلاش الغل اللى زرعه عمك جوا قلبك اتجاه والدتك وانا .
جاد:عمى عمره زرع غل جوايا ناحيتك يا بابا .... بالعكس كان دايما بيقولى عمرك ما هتلاقى حد يحبك زى ابوك .
فريد:تعرف اكتر حاجه ندمان عليها لما سافرت فرنسا وسيبتك عنده .... ده الغلط اللى عملته ومش قادر اغفر لنفسي ابدااا .
جاد:عشان عرفنى حقيقه امى مش كدا .
فريد:والدتك كانت ضحيه اخوها هو اللى اخدها معاه فى شغله .... زى ما انت كمان ضحيه .
جاد:وانا ضحيه لايه بقااا ؟!
فريد:الغل اللى زرعه عمك جواك عشان تنتقم من الفهد وعيلته .... صدقنى هيجى يوم وتندم على اللى بتعمله ده .... لانك وقتها هتخسر حاجات كتير اوى يا بنى .
جاد:وايه الحاجات اللى هخسرها لما انتقم لعمى من اللى قتله ؟!
فريد:هتخسرنى ... وهتخسر البنت اللى حبيتك بجد .... وهتخسر حياتك لانك يا هتموت يا هتتحبس بسبب عمايلك دى .
جاد بصله ومردش عليه .
فريد: شركه الفهد اللى فى فرنسا اخدت المناقصه وكل الصفقات من شركتنا .... والشركه تقريباا وقعت يا جاد باشا وده اول الطريق ولسه الخساير جايه كتير .
فريد سابه وطلع على اوضته .
وجاد كان متعصب وطلع اوضته وكلم حازم اللى رد عليه .
جاد:نفذ اللى اتفقنا عليه قبل ما اسافر يا حازم .
حازم:متقلقش يا باشا كل حاجه هتكون زى ما حضرتك عايز .
جاد قفل مع حازم:انا اللى هكتب نهايتك يا فهد باشا .
بقلم الكاتبة جنات
ــــــــــــــــ★ــــــــــــــ
بليل فى قصر الفهد .
تمارا قاعده مع الفهد فى بلكونه اوضتهم .
تمارا:فهد احنا بقالنا فترة مخرجناش سوا ... ماتيجى نخرج .
الفهد:عايزة تروحى فين يا تمارا ؟!
تمارا:نتعشا سوا وبعدنا نتمشي على البحر وناكل درة مشويا .
الفهد:طب يلا قومى اجهزى .
تمارا:بجد وافقت ؟!
الفهد:ماينفعش نبض قلبي يبقي نفسها فى حاجه والفهد ميحققهاش .
تمارا قامت تلبس والفهد كمان .
بعد شويا وقت الفهد وتمارا نزلو وقالو للعيله انهم خارجين .
راحو على مطعم واتعشو سوا واتكلمو كتير وتمارا كانت مبسوطه جداا .
وبعدها خرجو من المطعم وراحو يتمشو على البحر والفهد جبلها درة مشويا وقعدو على البحر .
بقلم الكاتبة جنات
ــــــــــــــــ★ـــــــــــــ
فى بيت مدحت .
مى قاعده مع باباها بيتعشو .
مدحت اللى صحته فى النازل بسبب زعله من بنته هنا واللى عملته .
مدحت:اختك مرنتش عليكى يا مى ؟!
مى:لا يا بابا .
مدحت:اوعى تكون بتكلمك وانتى بتخبى عنى .
مى:والله ابدا يا بابا .... هى اكيد هتبقي عارفه ان الشرطه مراقبين ارقامنا .... بس انا خايفه عليها اوى يا بابا ياترى هى فين بتاكل وبتشرب ازاى .
مدحت:هى اللى اختارت يا بنتى .... وبعدين ماهى اكيد هتعيش من الفلوس اللى اخدتهم لما وقعت الدكتورة .... ربنا يسامحها بقااا .
مى:ويهديها يارب .... يلا كل يا حبيبي انت اليومين دول صحتك مش عجبانى ... وانت مش راضى تخلينى اكلم الدكتورة ديما .
مدحت: باى عين نكلمها يا بنتى دانا مكسوف منها وراسي فى الارض بسبب عمايل اختك .
مى:يا حبيبي الدكتورة ديما قالت انها مش هتاخدنا بذنب هنا لانها عارفانا كويس .... ياما كانت هتسيبهم يحبسونى على ما يقبضو على هنا .
مدحت:ربنا يصلح حالها هى بنت اصول .
مى:يارب يا حبيبي .... ممكن ناكل بقااا .
مدحت:يلا يا بنتى .
بقلم الكاتبة جنات
ــــــــــــــــ★ــــــــــــــ
عند الفهد وتمارا .
اللى لسه قاعدين على البحر .
تمارا:الجو حلو اوى يا فهد .
الفهد:مش احلى من نبض قلبي .
تمارا ضحكت:شكراا على اليوم الحلو ده .
الفهد:طب مش كفايه كدا ويلا نروح .
تمارا:مع انى مش عايزة امشي ابدااا ... بس يلا لانى عارفه انك تعبان طول اليوم فى الشركه .
الفهد قام وقف ومسك ايد تمارا اللى وقفت ومشو سوا لحد ما وصلو عند العربيه .
الفهد فتح الباب لتمارا اللى ركبت العربيه ولف هو وركب مكانه واتحرك بالعربيه فى اتجاههم للقصر .
فى نص الطريق فجأه عربيه وقفت قدام عربيه الفهد اللى وقف العربيه بشكل مفاجأ واصدر عنها صوت عالى جدااا نتيجه احتكاكها بالارض .
الفهد بص لتمارا:انتى كويسه يا تمارا .
تمارا هزت راسها باه .
والفهد بص على اللى نزلو من العربيه اللى وقفت قدامهم وكانو ملثمين .
تمارا:فهد خلينا نمشي بسرعه .
الفهد:اهدى يا تمارا وبعدين متعودتش انى اهرب .
الفهد فتح الباب وبص للملثمين:خير !!
واحد منهم:احنا جايين ومعانا هديه ليك يا فهد باشا .
الفهد:وهديه ايه دى ؟؟
المثلم بص لواحد واقف جمبه وباشارة منه فهم هو عايز ايه وبعد عنه شويا وطلع فونه واتكلم بهمس:باشا مراته معاه ... نتعامل ازاى؟؟ ... تمام يا باشا سلام .
قرب من الملثم تانى واتكلم بهمس:مالناش دعوة بمراته .
الفهد:احنا هنفضل واقفين الوقفه دى كتير !
الملثم رفع ايده ناحيه الفهد وكان ماسك مسدس .
تمارا خافت على فهد:فهد خلينا نمشي .
الفهد:اياكى تنزلى يا تمارا فاهمه .
الملثم:دى هديه من حبيبك يا فهد باشا .
الملثم داس على المسدس اللى خرج منه رصاصه اللى عارفه طريقها وهو قلب الفهد اللى اخد الرصاصه ووقع فى الارض .
تمارا صرخت باعلى صوت .
الملثم طلع فونه وصور الفهد وهو واقع فى الارض وركبو العربيه واتحركو بسرعه .
تمارا نزلت من العربيه وجرت على الفهد وكانت منهارة .
تمارا:فهد رد عليا ابوس ايدك فهد ... فــــــــهـــــــــد .
ودى كانت صرخه تمارا باعلى صوت باسم فهد .....