رواية في قبضة الفهد الجزء الثالث3 الفصل الثامن عشر18 بقلم جنات
بعد مرور اكتر من شهر .
يوم جديد فى شركه الفهد .
البنات قاعدين كلهم سوا فى مكتب حياه اللى حاسه بدوخه بسيطه .
حنين:والله انا قلبي كان حاسس انك بتحبيه .
ديالا:جاد حب طفولتى بس للاسف هو مش شايفنى غير اخت ليه وبس .
سيلا:يمكن لانك كنتى تحت مسؤليته من وانتو صغيرين فعشان كدا بيحس الاحساس ده .
حنين:صح يمكن لو قربتو من بعض اكتر احساسه يتغير ناحيتك .
ديالا:انا وجاد مع بعض تقريبااا من صغرنا حتى لو كبرت واتخرجت بقيت بشتغل معاه فى الشركه .
حياه بتعب:سبيها على ربنا يا حبيبتى لو هو من نصيبك اكيد هتكونو لبعض .
سيلا:باذن الله .
حنين:بقولكو ايه انا جعانه وموت ماتيجو نروح ناكل .
حياه بتعب:روحو انتو .
ديالا:مالك يا حياه شكلك تعبانه !!
حياه:انا بصراحه حاسه النهارده بشويا تعب وبفكر اروح ارتاح .
سيلا بخوف:مالك يا حياه .
حياه:شويا هبوط بس .... مش انا اللى هقولك على الحمل بقااا .
حنين:مش يمكن لان حضرتك من الصبح وانت بشتغلى ومفكرتيش تاكلى اى حاجه اصلا .
حياه ضحكت:يا بنتى انتى عايزانا ناكل وخلاص ... وبعدين ماما ماسبتنيش اخرج الصبح من غير فطار .
فون سيلا رن وكان مراد اللى ردت عليه:انا عند حياه فى مكتبها ... تمام هاجى حالا .
سيلا قفلت:انا هروح لمراد تقريبا فى حاجه فى الحسابات .
حنين:تمام روحى .
سيلا:حياه اياكى تمشي لوحدك وانتى تعبانه جدااا .
حياه:متخافيش يا حبيبتى انا هروح لفهد عشان يوصلنى
سيلا:تمام .
سيلا خرجت من المكتب .
حنين:احيه دانا نسيت خالص انا لسه مخلصتش التصميم بتاع الشاليه لجدو دانا شكلى هتعلق على باب الشركه .
حياه وديالا ضحكو على حنين اللى قامت تجرى وخرجت من المكتب .
ديالا:انتى هتمشي الوقت يا حياه ؟
حياه:بصراحه مش قادرة خالص ونفسي انام هروح اشوف فهد لو فاضي يوصلنى .
ديالا:تحبي اوصلك انا ؟
حياه:لا يا دودو انا بخير والله وبعدين الدكتورة قالتلى ان الهبوط ده عادى متقلقيش .
ديالا:ماشي يا روحى انا هروح اساعد حنين فى التصميم بدل ما تتعلق على باب الشركه .
حياه ضحكت وديالا خرجت من المكتب .
حياه اخدت شنطتها وخرجت من المكتب وكانت حاسه بدوخه ووصلت قدام مكتب فهد والسكرتيرة ماكنتش موجوده ... خبطت على الباب ودخلت .
فهد كان قاعد ومعاه جاد بيتكلمو فى شويا تفاصيل فى الشركه اللى تقريبا خلصت وجاد بيجهز لحفله افتتاحها .
فهد بص على الباب لما اتفتح وشاف حياه اللى باين على وشها التعب وقام بسرعه من مكانه وقرب منها وضمها لحضنه وحياه حطت راسها على صدر فهد .
فهد:مالك يا حياتى ؟!
حياه:دايخه اوى يا فهد .
فهد اتحرك وهى معاه وقعدها على الكنبه وقعد جمبها:انتى ماكلتيش حاجه من الصبح اكيد !
حياه هزت راسها باه .
فهد:ليه كدا يا حياه .. ثوانى هطلبلك عصير عشان تفوقى على ما نرجع القصر .
فهد قام فتح الباب والسكرتيرة مش موجوده وده عصبه جدااا وراح يشوف اى حد يجبله عصير .
جاد كان قاعد مكانه مش بيتحرك وعينه بتابع كل اللى بيحصل قدامه وحاسس بنار جواه لو طلعت هتحرق فهد والشركه باللى فيها .
عينه على حياه اللى قاعده ودافنه وشها بين ايديها ومش اخده بالها من اللى معاها فى المكتب اصلا .
جاد قام وقف واتحرك ببطئ ناحيه حياه بس فهد وصل ومعاه عصير وقعد جمب حياه:اشربي يا حبيبتى .
فهد بص لجاد اللى واقف:انا اسف يا جاد هنأجل كلامنا .
حياه رفعت عينيها وبصت على جاد واستغربت وجوده لانها ماحسيتش بيه خالص .
جاد:اكيد يا فهد .... الف سلامه عليكى يا باشمهندسه حياه .
حياه هزت راسها بتعب وبصت لفهد:فهد لو فاضي ممكن توصلنى .
فهد:اكيد يا حياتى بس اشربي العصير الاول .
حياه:مش قادرة والله .
فهد قام جاب مفاتيحه وفونه وشال حياه اللى اتحرجت من وجود جاد .
حياه بهمس:نزلنى يا فهد احنا فى الشركه .
فهد:وحتى لو فى الشارع عادى انتى مراتى يا حياه .
حياه ابتسمت وحطت راسها على صدر فهد اللى بص لجاد:انا لازم امشي يا جاد .
جاد هز راسها بهدوء وفهد خرج بحياه من المكتب والشركه كلها .
جاد كان واقف مكانه زى ما هو
والمشهد اللى حصل من بدايه دخول حياه بيتعاد قدام عينيه وحاسس انه مبقاش قادر يسيطر على عصبيته وخرج من الشركه كلها عشان مايتكشفش امره .
جاد ركب عربيته وفاق من عصبيته على صوت فونه بيرن برقم حازم .
جاد:عملت ايه ؟؟
حازم:الكاميرا اتعطلت فجأة يا باشا .
جاد:اتعطلت لوحدها يعنى !!
حازم:اه والله يا باشا .
جاد قفل فى وشه وبقا يفكر ازاى اتعطلت فجأة واتحرك بالعربيه .
بقلم الكاتبة جنات
ــــــــــــــــ★ــــــــــــــ
فى المستشفى .
ديما خرجت من اوضه العمليات بعد ما خلصت عمليه لسيده وقربت من اهلها .
ديما:العمليه الحمدلله نحجت بفضل ربنا وشويا هتتنقل على اوضه عاديه وتقدرو تطمنو عليها ... حمدلله على سلامتها .
اهل المريضه فضلو يدعو كتير لديما اللى مشت وراحت على اوضه الخاصه بمدحت اللى كان قاعد على السرير وكانت بنته مى بتجهز شنطته عشان هيخرج من المستشفى .
ديما:والله هتوحشنى قاعدتى مع حضرتك يا عمو مدحت .
مدحت ومى ابتسمو بحب لدكتورة اللى كانت السبب الاول فى تحسن حاله مدحت واللى كانت دايما معاهم ومش بتسيبهم ابدااا .
مدحت:دانا ابقي اعمل عيان واجيلك مخصوص يا بنتى .
ديما:بعد الشر عليك يا عمو ربنا يبارك فى صحتك يارب .
مى:انا بجد لو فضلت اشكرك عمرى كله مش هوافيكى حقك .
ديما:حبيبتى يا مى وبعدين تشكرينى على ايه ده شغلى وانا بصراحه حبيتكو اوى وهتوحشونى .
كلهم لفو على صوت هنا اللى دخلت الاوضه:مانتى كمان لما توحشينا هنبقي نكلمك يا دكتورة اكيد .
مى ومدحت بصو لبعض مستغربين طريقه هنا اللى بتتكلم بكل حب وود مع ديما رغم انها ماكنتش بطيقها .
حتى ديما كانت مستغربه طريقتها بس ابتسمت:اكيد يا هنا .
هنا:مش يلا ولا ايه يا بابا .
مدحت كان مستغرب جداا طريقه بنته .
مى طبطبت على كتفه:يلا يا حبيبي العربيه وصلت تحت .
ديما ودعت مدحت اللى خرج مع مى وهنا قربت منها:لو سمحتى يا دكتورة عايزة رقمك عشان لو بابا تعب ابقي اكلمك .
ديما:انا رقمى مع مى وعمو مدحت يا هنا .
هنا:يعنى انتى عطايهم رقمك وانا لأ يعنى .
ديما ابتسمت:اكيد لا يا حبيبتى هاتى فونك اسجلك الرقم .
هنا ابتسمت ومدت ايدها بفونها اللى اخدته ديما وكتبت الرقم وسجلته باسم الدكتورة ديما .
ديما:اتفضلى .
هنا:شكراا يا دكتورة .
ديما:العفو .
هنا خرجت من الاوضه وديما كانت مستغرباها جداا:انا مستغربه ليه يمكن ربنا هداها عشان خاطر باباها واختها .
ديما خرجت من الاوضه وراحت على مكتبها .
بقلم الكاتبة جنات
ــــــــــــــــ★ــــــــــــــ
فى قصر الفهد .
فهد دخل وهو شايل حياه اللى نامت فى الطريق .
زينه وتمارا قربو منه بخوف .
تمارا:مالها يا فهد ؟!
فهد:هطلعها الاوضه وانزلكو .
فهد طلع الاوضه ونيم حياه على السرير وفك طرحتها وقلعها الشوز وغطاها كويس ونزل .
كانت زينه وتمارا وجنه اللى خرجت من المطبخ واستغربت وقفتهم .
فهد نزل:متقلقوش يا جماعه هى بس كانت حاسة بدوخه ونامت واحنا فى الطريق .
زينه:طب ما كنا كلمنا دكتورتها احسن .
فهد:يا جماعه متخافوش هى بس طول اليوم بتشتغل وماكلتش حاجه عشان كدا داخت .
تمارا:انا من رايي حياه وحنين بلاش يروحو الشركه فترة الحمل .
جنه:ما احنا قولنا كدا وهما رفضو يا توتا .
فهد:انا قولت لحياه ترتاح اسبوع ولا حاجه لما تبقي كويسه تبقي تنزل براحتها .
تمارا:ان شاء الله يا حبيبي .
فهد:انا هرجع الشركه لان لسه عندى شويا شغل .
جنه:روح يا حبيبي .
فهد خرج من القصر وهما دخلو المطبخ يكملو تجهيز الاكل .
بقلم الكاتبة جنات
ــــــــــــــــ★ــــــــــــــ
فى شركه الفهد وتحديدااا فى مكتبه .
الفهد قاعد ومركز فى التصميم اللى قدامه وواقف قدامه حنين هتموت من الخوف وايان قاعد على الكرسي .
الفهد رفع عينه وبص لحنين:انتى عارفه انك اتاخرتى ساعتين كاملين يا حنين .
حنين:اسفه والله يا جدو ... المهم هو عجبك ولا لأ .
الفهد:الغريبه انه عجبنى يا باشمهندسه .
حنين:طب احلف كدا .
ايان مقدرتش يكتم ضحكته وحنين بصتله بغيظ .
الفهد:بتهزرى يا حنين !!
حنين:ما هو انا كل ما ارسم تصميم مش بيعجب حضرتك عشان كدا مستغربه .
الفهد:انا منكرش ان التصميم فيه شويا اخطاء .
حنين:شويا وعجب حضرتك ازاى !!
الفهد:ايان هيكون معاكى وهيساعدك عشان تعرفى اخطائك عشان متقعيش فيها مرة تانيه .
حنين:حاضر يا جدو .
الفهد:روح معاها يا ايان والتصميم ده عايزه بكرة يكون عندى ويكون برفيكت .
ايان:اكيد يا عمى .
حنين وايان خرجو من المكتب وراحو على مكتب ايان .
ايان:يلا يا حنين .
حنين:لا يلا ايه احنا قبل ما نعمل اى حاجه تجبلى اكل لان انا هموت من الجوع واحتمال اكلك الوقت .
ايان:الصبر من عندك يارب ... وتحبي تاكلى ايه يا اخرة صبرى ؟
حنين:بيتزا يا روح اخر صبرك .
ايان ضحك على جنان حنين وطلب لها الاكل .
وبعد شويا الاكل وصل واكلو سوا .
وبعدها ايان بدأ يقولها على الأخطاء الموجودة في التصميم .
وحنين بدأت تصلح الأخطاء والتصميم بقا جاهز عشان تقدمه للفهد .
حنين بفرحه:انا هروح اسلمه لجدو اكيد مش هيصدق نفسه انى خلصته بسرعه كدا والله خايفه يغمى عليه من الفرحه .
ايان ضحك بصوت عالى وحنين خرجت بسرعه وراحت على مكتب الفهد .
بقلم الكاتبة جنات
ــــــــــــــــ★ــــــــــــــ
فى مكتب سيلا .
سيلا:انا هتجنن يا مراد ازاى حصل كل الاخطاء دى !!
مراد:اهدى يا سيلا خلينا نركز ... هو حد بيشتغل معاكى على الحسابات .
سيلا:لا انا اللى بجهز كل حاجه وده اللى هيجننى .
مراد:طب احنا لازم نعرف الفهد .
سيلا:جدو مش هيسامحنى على الأخطاء دى .
مراد:حبيبتى متخافيش عمى عارف قد ايه انتى بتحبي شغلك وممتازة فيه وعشان كدا عينك مديرة الحسابات وعنده ثقه كبيرة فيكى ... بس هو لازم يعرف ممكن يكون حد متقصده يعمل كدا .
سيلا:تفتكر !!
مراد:اكيد يلا نروحله المكتب .
سيلا خرجت مع مراد وراحو على مكتب الفهد وقابلو حنين وهى خارجه من عنده وكانت فرحانه جداا .
حنين:واخيرا جدو حب تصميمى وكمان امر المهندسين يبداو فى الشغل .
مراد:مبروك يا حنين .
حنين:الله يبارك فيك .
حنين بصت لسيلا اللى باين عليها الزعل:مالك يا سيلا ؟!
مراد:مشكله فى الحسابات بس .
حنين:طب وانتى زعلانه ليه كدا اكيد هتحليها انتى احلى واقوى مديرة حسابات فى الدنيا .
سيلا ابتسمت وحنين مشت وهما خبطو ودخلو وكان زين وحسن قاعدين مع الفهد .
الفهد بصلهم:مالكو فى ايه ؟!
سيلا بصت لمراد اللى هز راسه انه هو اللى هيتكلم .
مراد:عمى انا كنت براجع على حسابات العمارة اللى تبع عيله الصاوى ولقيت اخطاء فى الحسابات .
حسن:اخطاء ازاى .
سيلا:يا جدو الحسابات متغير فيها ارقام كبيرة وده تقريبا خسرنا لحد الوقت فوق ٢ مليون جنيه .
زين:مش انتى اللى مسؤله على الحسابات يا سيلا .
سيلا نزلت راسها ومردتش .
حسن:فين الملف ؟!
مراد مد ايده:اتفضل .
حسن بدأ يركز فى الملف وبص لسيلا بعصبيه:مش معقول الأخطاء دى يا سيلا دى لو واحد لسه مبتدا مش هيغلط كدا .
الفهد:اهدى يا حسن .
حسن بعصبيه:اهدى ازاى يا فهد احنا لو كنا كملنا والهانم مش حاسه بالاخطاء دى كنا خسرنا فوق الـ ٢٠ مليون .
زين:سيلا انتى اكيد راجعتى الملف قبل ما تسلميه .
سيلا بصلتهم وعينها جت على حسن وعينيها دمعت:والله يا جدو انا راجعت الملف اكتر من ٤ مرات وكمان سلمته لجدو فهد وهو شافه وماكنش فى اى اخطاء .
كلهم بصو لفهد .
حسن:ده بجد يا فهد ؟!
الفهد هز رأسه باه:الغلط مش من سيلا .... اكيد حد لعب فى الحسابات ولازم نعرفه .... مش كدا يا مراد .
مراد ابتسم:اكيد يا عمى .
حسن قام وحضن سيلا اللى عيطت:انا اسف يا حبيبتى عشان اتعصبت عليكى .
سيلا:لا يا جدو متتاسفش ده حقك .
زين:خلاص يا سيلا عدت على خير واكيد هنعرف مين اللى ورا اللى حصل .
مراد:انا هكلم ادم واكيد هنعرف مين عملها .
الفهد:قوم انت بالمهمه دى يا مراد ادم مشغول اليومين دول فى حاجه تانيه .
مراد:تمام يا عمى .
بقلم الكاتبة جنات
ــــــــــــــــ★ــــــــــــــ
بليل فى قصر الفهد .
الكل قاعدين سوا .
فهد:يعنى اخيرا عملتيها يا نونا .
حنين:واخيرا يا معلم وهيبقي فى حاجه من منشآت شركه الفهد من تصميمى الخاص .
ايان:ومساعدتى دى ايه هوا !
حنين بصت للفهد:والله ابدا يا جدو ده هو شرحلى وانا صلحت الاخطاء متحلمش ان اسمك يبقي معايا ابدااا .
حياه:مبروك يا احلى نونا .
حنين:اكيد من ورا قلبك مانا بعد كدا انا اللى هصمم كل تصاميم الشركه وانتى هتتركنى على جمب .
كلهم ضحكووو .
تمارا:كان نفسي اشوف رده فعل الفهد يا بت يا نونا .
حنين:وحياتك يا توتا كنت خايفه ليغمى عليه من الفرحه .
كلهم ضحكو من قلبهم .
الفهد:يغمى عليا يا حنين .
حنين:اسفه يا جدو اوعى ترجع فى كلامك .
زين:يا بنتى اعقلى شويا بقااا .
حنين:انا كدا ميت فل وعشرة يا زيزو .
جنة:متحاولش مش هتتغير ابدااا .
مريم:يمكن لما تبقي مامى تعقل .
حنين:لا تقلقوش بكرة هنجننكو انا والبيبي كمان .
ديما قامت وقفت وقربت من اسيل واخدت حور اللى نامت فى حضنها:هاتى اطلعها الاوضه يا سولا .
اسيل:سمى يا حبيبتى .
ديما اخدتها طلعت تنيمها .
سيلا بصت ليزن اللى قاعد يلعب:وحضرتك مش ناوى تنام يا يزن باشا .
يزن:لا .
سيلا:مانا عارفه انه لا على فكرة .
كلهم ضحكو وقضو سوا وقت جميل وبعدها طلعو عشان ينامو .......