رواية في قبضة الفهد الجزء الثالث3 الفصل الثاني والعشرون22 بقلم جنات
محاسن لسه هتقلع ديما طرحتها سمعو خبط جامد على الباب .
محاسن:هى البت دى نست حاجه هنا ولا ايه .
محاسن خرجت تفتح الباب واتصدمت لما شافت رجاله كتير واقفين قدامها .
محاسن:خير يا باشا انتو مين ؟؟
رفعت:بوليس الاداب يا حلوة .
محاسن:يالهوى بوليس اداب ايه يا باشا احنا هنا فى السليم .
رفعت:اسمك ايه يا وليه ؟
محاسن بخوف:محاسن يا باشا .
رفعت:هنشوف اذا كنتو فى السليم ولا لأ .... ادخل يا بنى فتشو البيت ده وهاتو اى حد تلاقيه جوا .
وليد ضابط تانى مع رفعت شايف محاسن اللى عينيها على الاوضه اللى فيها ديما ومرعوبه .
وليد دخل الشقه وبيبص فى كل ركن فيها بتركيز .
العساكر خرجو ومعاهم البنات والرجاله .
رفعت:فين السليم ده يا محاسن هانم !
محاسن:يا باشا دول بناتى ودول رجالتهم يا باشا .
رفعت:لا والله ... خدها يا بنى على البوكس معاهم .
وليد قرب من الاوضه ولسه هيفتح الباب محاسن جرت عليه بسرعه وخوف:الاوضه دى فاضيه يا باشا .
وليد:ولما هى فاضيه خايفه ليه كدا ؟!!
محاسن:لا مش خايفه يا باشا وانا هخاف من ايه .
رفعت:خدها يا بنى على البوكس .
العسكرى قرب من محاسن واخدها ونزلو .
وليد فتح الاوضه اللى فيها ديما وشايف بنت نايمه على السرير ... قرب منها بهدوء واتصدم لما شافها .
رفعت دخل:مالها دى كمان مريحه حبتين ... هات يا بنى كوبايه ميا لما نفوق الهانم دى .
وليد بحده بص لرفعت:لا محدش هيقرب منها .
رفعت:وده ليه ان شاء الله !!
وليد:انت عارف دى مين ؟
رفعت:وانا هعرف الاشكال دى منين انا !
وليد:دى الدكتورة ديما مرات الرائد ادم .
رفعت ضحك بشر:ونبي حلو يبقي ناخد الهانم ونتصل بسياده الرائد يجى يستلمها من القسم .
وليد شده وخرجو من الاوضه وقفل الباب:انت بتستعبط يلا ... مين هيسمحلك تعمل كدا اصلا .... لو مفكر انت بطريقه دى هتقدر تنتقم من ادم تبقي غلطان لانك لو فكرت تعملها هيكون اخر يوم فى عمرك .... وبعدين دى دكتورة محترمه .
رفعت:وهو انا كنت اتبليت عليها ... ولما هى محترمه بتعمل ايه فى شقه زى دى !
وليد:اكيد فى لعبه .... اه لو ناسي تعالى افكرك انها حفيده الفهد .
رفعت بلع ريقه بخوف .
بقلم الكاتبة جنات
ــــــــــــــــ★ــــــــــــــ
عند ديما فى الاوضه اللى بدات تفوق من تأثير المنوم لانها مشربتش كتير من العصير .
ديما مسكت راسها بتعب من الصداع اللى حاسه بيه وبدأت تبص حوليها ومستغربه المكان اللى هى فيه .
ديما قامت قعدت بتعب وافتكرت انها كانت جايه تشوف مدحت .
الباب اتفتح ودخل وليد اللى ديما اتصدمت لما شافته لانها عارفاه كويس لانه صديق ادم ومراد .
وليد:انتى كويسه يا دكتورة ديما ؟؟
ديما:انا حاسه بصداع رهيب ... هو انا فين ؟
وليد لسه هيرد الباب دخل رفعت:الهانم اخيرا فاقت يلا عشان نروح القسم .
ديما اتصدمت وقامت من على السرير بسرعه:قسم ايه !!!
وليد:اهدى يا دكتورة ديما انا هفهمك كل حاجه .
ديما عيطت:انا فين انا مش فاهمه حاجه .
رفعت:انتى فى شقه دعـ***ــارة يا دكتورة .
ديما كان الكلام بالنسبه ليها زى القنبله مش مستوعبه ابدا اللى سمعته .
وليد:دكتورة ديما اهدى عشان نعرف منك كل حاجه وايه اللى جابك هنا .
ديما بخوف:انا عايزة ادم .
وليد:انا كلمته والله وهو جاي فى الطريق متقلقيش كلها ساعه ويكون هنا ... وكل حاجه هتتحل ممكن تهدى بس .... تعالى نخرج برا احسن .
ديما اخدت شنطتها اللى كانت على السرير جمبها ومشت معاهم وهى مش مصدقه اللى بيحصل ولما خرجت وشافت الصاله ... هى دى نفس الصاله اللى كانت قاعده فيها ومعاها هنا ... ازاى تبقي شقه مش مظبوطه .
ديما نزلت معاهم .
وليد:رفعت روح انت مع البوكس وانا هنا هتصرف .
رفعت:تتصرف ازاى يعنى .... هى مش هتيجى معانا .
وليد:امشي يا رفعت احسنلك الوقت
رفعت شاور على البوكس:يلا مع بنات يا دكتورة .
ديما اتصدمت من كلامه وبصت على البنات اللى فى البوكس اللى كلهم جسمهم ملفوف بملايات ودموعها نزلت بقهر .
وليد بحده:رفعت صوتك مش عايز اسمعه .... يلا يا دكتورة حضرتك هتركبي معايا اتفضلى .
ديما اتحركت معاه ودموعها مش بتقف .
بقلم الكاتبة جنات
ــــــــــــــــ★ــــــــــــــ
فى القسم .
ديما قاعده فى مكتب وليد ودموعها نزله زى الشلالات على وشها ورفعت قاعد قدامها .
العسكرى دخل وحط قدامها كوبايه عصير .
وليد:اتفضلى يا دكتورة اشربي عصير اللمون عشان تهدى شويا .
ديما هزت راسها بلا .
وليد:طيب ممكن تشرحيلى حضرتك كنتى بتعملى ايه فى الشقه دى .
ديما مسحت دموعها:كنت راحه اشوف حاله كانت عندى .
وليد:حد تعرفيه يعنى .
ديما هزت راسها باه:كان عندنا فى المستشفى وكنت عملتله عمليه وخرج بس بنته كلمتنى وقالتلى انه تعبان جدا عشان كدا روحت على العنوان اللى هى بعتته ليا فى مسدج .
رفعت بسخريه:وهى كل الحالات بتروحى لحد عندهم البيت يا دكتورة .
ديما بصتله بخوف ورجعت بصت لوليد:انا قولتلها انى هبعتلها اسعاف تجيبه لحد المستشفى بس هى قالتلى انه رافض يسيب بيته ونفسه يموت فى سريره عشان كدا مقدرتش اتاخر وروحتلهم .
وليد:ولما روحتى الشقه ايه اللى حصل ؟
ديما:بنته كانت هناك وهى اللى فتحتلى ولما سالت على اختها الكبيرة وهى عمو مدحت الحاله ... قالتلى ان اختها راحت تجيب علاج وعمو مدحت كان فى الحمام .... قدمتلى عصير على ما يخرج من الحمام وانا شربت شويا منه ومن وقتها وانا مش فاكرة اى حاجه خالص .
ديما عيطت اكتر ومش فاهمه اللى حصل معاها .
وليد:طب ممكن الرقم اللى كلمتك منه بنته .
ديما هزت راسها وطلعت فونها وعطيته لوليد اللى اخده وشاف الرقم والمسدج .
وليد بص لرفعت وعطاه الرقم ورفعت خرج من المكتب .
بعد شويا وديما مش قادرة تبطل عياط ابدااا .
الباب اتفتح بقوة ودخل ادم اللى اول ما شافته ديما جرت عليها وعياطها زاد اكتر .
ادم اخدها فى حضنه:اهدى يا ديما انا معاكى يا حبيبتى اهدى .
ادم بص لوليد اللى بحركه منه بيحاول يطمنه .
ادم بعدها عن حضنه ومسح دموعها:اهدى يا حبيبتى انا هتصرف .
ديما بخوف:انا عايزة امشي ونبي يا ادم انا خايفه اوى .
ادم:هنمشي يا حبيبتى متخافيش .
فون وليد رن برقم رفعت اللى رد عليه:وانت مستنى ايه بدام عرفت هى مين روح هاتها على القسم .
وليد قفل وبص لادم:متقلقش يا ادم كل حاجه هتتحل اتفضلو .
ادم قعد على الكنبه وديما اللى ماسكه فيه بخوف .
وليد:الدكتورة شرحتلى كل حاجه يا ادم ... الظاهر كدا انه كان كمين عشان يوقعو الدكتورة فيه وملحقوش .
ادم بص لديما بخوف ومش عارف مين ممكن يفكر يعمل كدا فى مراته .
الباب خبط واتفتح لما وليد اذن بدخول وكان الفهد واسر .
ديما جرت على حضن ابوها واسر ضمها لحضنه:اهدى يا حبيبتى احنا كلنا معاكى .
الفهد قرب منها واخدها فى حضنه:مش عايز اشوف دموعك ابدا يا ديما سمعانى .
ديما:مش قادرة يا جدو والله .
وليد:ادم انا هسيب الدكتورة تمشي معاك بس اكيد لما نحتاجها هقولك .
ادم:شكرا يا صاحبي بجد .. انا عارف باللى بتعمله ده ممكن تتاذى فى شغلك .
وليد:عيب عليك يا صاحبي ... مراتك دى اختى ومستحيل ارضي ليها باى اذيه .
اسر:تسلم يا وليد طول عمرك جدع .
وليد:تسلم يا اسر باشا وبعدين داحنا تربيه الفهد .
الفهد ابتسمله وخرجو كلهم من المكتب والقسم كله ورجعو على القصر .
بقلم الكاتبة جنات
ــــــــــــــــ★ــــــــــــــ
فى شقه مدحت .
مى دخلت الاوضه:بابا اتفضل العصير بتاعك عشان تاخد الدوا يا حبيبي .
مدحت اخد منها العصير:تسلمى يا بنتى .
مى مدت ايدها بالبرشام:اتفضل يا حبيبي .
مدحت اخد البرشامه منها واخدها وشرب العصير:الحمدلله .
مى:بشفا يا حبيبي .
مدحت:اختك مختفيه فين يا بنتى انا قلقان عليها.
مى:هى خرجت من الصبح راحت الكليه ولسه مرجعتش لحد الوقت .
مدحت:ربنا يهديها يا بنتى مش عارف قلبي مش مطمن ابدااا وكأن فى مصيبه هتحصل .
مى:يا حبيبي ان شاء الله خير .
مدحت لسه هيتكلم قطعه صوت خبط جامد على الباب .
مدحت:مين اللى بيخبط كدا ؟!!
مى:مش عارفه يا بابا ... هروح اشوف مين ؟
مى لبست الاسدال بسرعه وراحت تفتح الباب وشافت شاب واقف وواقف وراه ٢ لابسين لبس شرطه .
مى بخوف:خير فى حاجه ؟؟!
رفعت:عايزين مى مدحت القاضي .
مدحت خرج وقرب منها:فى ايه يا بنتى .
مى:مش عارفه .
مدحت بص لرفعت:حضرتك مين يا افندم ومحتاجين ايه ؟؟
رفعت:زى ما حضرتك شايف احنا شرطه .... وجاين عايزين مى مدحت القاضي هى فين .
مى مسكت ايد باباها بخوف اكبر .
مدحت:هى بنتى عملت ايه يا باشا ؟!
رفعت:لا ما انا مش جاى اتساير معاكو هى فين اللى اسمها مى .
مى بخوف:انا .
رفعت:ولما هى انتى مش بتنطقى ليه ... يلا اتفضلى معانا .
مدحت:طب فهمنى يا باشا بنتى عملت ايه طيب !
رفعت:هتعرفو فى القسم .
مى:طب ممكن اغير هدومى لو سمحت .
رفعت:طب انجزى يلا .
مى دخلت اوضتها وهى مرعوبه ومش عارفه هى عملت ايه ولبست دريس بلون الاسود وطرحه بلون الابيض وخرجت ومدحت نزل معاهم .
رفعت بص لمدحت:لا ما هى مش رحله حضرتك ... هى اللى هتيجى معانا وانت ابقا حصلنا بقااا .
مدحت بص لمى اللى قاعده فى البوكس وعينيها كلها دموع:انا هاجى وراكى يا حبيبتى متخافيش من اى حاجه .
مى هزت راسها والبوكس اتحرك .
مدحت اخد تاكسي وطلب من السواق يمشي ورا البوكس .
بقلم الكاتبة جنات
ــــــــــــــــ★ــــــــــــــ
فى القسم .
وليد قاعد على الكرسي الخاص بيه ورا مكتبه .
ورفعت قاعد على الكرسي جمب المكتب .
وعينيهم على مى اللى واقفه بتترعش من الخوف .
وليد:اتفضلى اتكلمى احنا سمعينك .
مى كانت بتعيط فى صمت ومش بتتكلم وجسمها اتنفض لما رفعت اتكلم بصوت عالى .
رفعت:ما تنطقى يا روح امك احنا هنفضل نتحايل عليكى كتير .
وليد:رفعت .... براحه مش كدا .
وليد بص لمى وهو بيشاور على الكرسي:اتفضلى يا انسه مى ارتاحى عشان نقدر نتكلم .
مى بصت لرفعت بخوف وقعدت على الكرسي اللى قدامه .
وليد:ياريت يا انسه تقوليلنا انتى كلمتى الدكتورة ديما ليه وطلبتى منها تروح على عنوان الشقه دى !
مى بصتله:انا ماكلمتش الدكتورة ديما من وقت ما مشينا من المستشفى .
رفعت:اومال رقمك اللى على تلفونها ده ايه خيال .
مى عيطت اكتر وحطت ايدها على وشها:والله انا ما شوفتها ولا كلمتها والله العظيم ما بكذب .
وليد:الدكتورة قالت انك كلمتيها عشان والدك تعبان وهى طلبت انها تبعتلكو اسعاف وانتى رفضتى وقولتى ان والدك تعبان ومش عايز يسيب بيته ونفسه يموت على سريره .
مى شالت ايدها على وشها وكانت بتسمعه:بعد الشر عليه .... بابا اصلا حالته متحسنه الحمدلله من وقت العمليه وانا والله ما كلمتهااا .... طيب بص كلمها وقولها تيجى ووقتها انا هسالها بنفسي انا والله ماكلمت الدكتورة .
وليد:تمام هنكلمها بس انتى هتفضلى هنا معانا لحد ما الدكتورة تيجى والكلام ده هيكون بكرة باذن الله .
رفعت بص لوليد بصدمه لما عرف ان الدكتورة روحت .
مى:وانا هفضل هنا !
رفعت:اومال يعنى هنروحك انتى كمان يا حلوة .
الباب خبط ودخل العسكرى:والد الانسه برا وعايز يشوفها .
وليد:خليه يدخل .
العسكرى خرج ومدحت دخل ومى جرت على حضنه وعيطت اكتر .
مدحت:اهدى يا حبيبه قلبي .
مدحت بص لوليد:فهمنى يا باشا فى ايه مى بنتى عملت ايه !
رفعت:بنتك يا حاج مشتركه مع ستات شمال عشان يوقعو الدكتورة ديما .
مدحت بصدمه:بنتى مستحيل تعمل كدا يا باشا وبعدين ده الدكتورة ديما بنت الاصول وماشوفناش منها غير كل خير ليه نأذيها بس يا باشا .
وليد:والله يا حاج لسه التحقيقات شغاله وبنتك هتفضل هنا معانا لحد مايخلص كل حاجه ونشوف اذا كانت معاهم ولا لأ .
مدحت:بنتى هتفضل فى السجن هنا يا باشا طب ازاى !
رفعت بصوت عالى:زى الناس واحده متهمه تبقي تترمى فى السجن .
مى عياطها زاد فى حضن ابوها .
وليد بحده:رفعت اهدى .
وليد بص لمدحت:دى إجراءات يا حاج وده شغلنا .
وليد نادى بصوت عالى:يا عسكرى .
العسكرى فتح الباب ودخل:أؤمر يا باشا .
وليد:خد الانسه مى على الحجز الهادى تمام
العسكرى:تمام يا باشا ... امشي معايا يا انسه .
مى بصت لابوها بقهر .
مدحت:متخافيش يا حبيبتى ربنا اكيد هيقف معاكى لانك مظلومه .
مى مشت مع العسكرى وهى منهارة .
بعد ما مى مشت مع العسكرى .
رفعت بص لمدحت:وانت يا حاج هتبات هنا ولا ايه !!! .... احسنلك روح دور لبنتك على محامى يكون كويس عشان يقدر يخرجها .
مدحت خرج من المكتب وهو مش عارف يتصرف ازاى وحاسس انه عاجز .
وليد:ما تهدى يا بنى انت مافيش عندك دم مش شايف الراجل حالته عامله ازاى عشان بنته .
رفعت:وانا كنت ضربتها على ايدها عشان تشترك معاهم .
وليد:ده اللى هيجننى شكل البت محترمه مش شبه البنات اللى كانو فى الشقه .
رفعت:صحيح ... انت مشيت الدكتورة ليه ؟!
وليد:اومال حضرتك كنت عايز ايه !
رفعت:دى واحده جبناها من شقه شمال وانت رايح تسيبها تمشي كدا عادى .
وليد:انت حيوان يلا .... هو احنا جيبنها ملفوفه بملايه ... الدكتورة كانت بكل احترامها حتى طرحتها كانت على شعرها .... وشكلها اخده مخدر ... هو انا اللى هعلمك شغلك يا حضرة الضابط ... احنا كبار وفاهمين كويس كل حاجه .
رفعت:بردو كانت تفضل هنا زيها زى البت اللى لسه جايه مانت بتقول انها كمان شكلها محترمه .
وليد:انا خليت العسكرى يوديها الحجز الهادى وانت عارف اللى هناك ستات كويسه يعنى مش هيأذوها .. انت كنت عايز حفيده الفهد تنام هنا فى الحجز يا رفعت باشا .
رفعت:اوف انا ماشي .
وليد:خدنى معاك اليوم كان طويل يلا ........