رواية لا تراجع ولا استهبال الفصل الاول1 بقلم حنين عادل

اعمل ايه انط ولا ايه بس المية ساقعة دلوقتي ولا اجي انط بالنهار بس هاتكون سخنة برده يعني هاموت غرقان وسقعان او غرقان وحران فااخليني سقعان احسن ..

كان قاعد علي كورنيش النيل وبيبص في المية وهو ناوي ينتحر.....

اتنهد : 

يعني هافضل عايش ليه جبان وخواف ، عاطل ماعنديش شغل ولا هدف فاشل وكل اللي حواليا شايفني فاشل اولهم امي وابويا وبيقارنوني مع ابن خالتي اللي مسافر الإمارات وبيبعت لهم دهب انا مش قادر اتحمل كفاية اوي لحد كده ده اسمي لوحده سبب كافي للانتحار .

وقف وغمض عينيه ورايح ينط واحدة ست عجوزة خبطت علي دراعه لف لها ونزل من احراجه ..

ابتسمت : انت كنت هاتعمل ايه !

_ها لا ولا حاجة ..

قعد وقعدت جمبه :

انا كنت واقفة وسمعت كل اللي قولته الحياة غالية انت هاتفرط فيها بسهولة كده هاتخسر دنيتك واخرتك 

_اني اعيش في ظروفي دي صعب ..

ضحكت وهي بتديله الشيكولاته:

لازم تعافر مش من اول مطبات في حياتك تستلم امسك حلي بوقك واستغفر ربك 

_استغفر الله العظيم ....

فتح الشيكولاتة وكلها وبيرفع عينه:

شكرا انا مش عارف .

مالقاش حد قدامه وقف بخوف:

في ايه بسم الله الرحمن الرحيم ..

طلع يجري وهو بيبلع الشيكولاتة:

ما انا اللي استاهل جاي انتحر في عز الليل ما اخليني في النهار احسن يعني فرقت موت حران ولا سقعان ما كلها موته...

كانت الشوارع فاضية ووصل قدام بيته وهو وشه اصفر قعد جمب قطته 

_بسبس بسبوسة قلبي انتي اللي مهونة عليا كل حاجة 

شالها وبيبص لها...

*انا دكر ارحمني ارحمني يا ابتسام منك لله ..منك لله

رمي القطة من ايده وطلع يجري علي السلم ووقع كذا مرة:

انتم عاوزين مني ايييه حرام عليكم لا تؤذيني ولا ائذيكم...

فتح باب الشقة ودخل يتسحب ...

_انت شرفت يا حيلتها ! 

كانت الدنيا عتمة بص حواليه بخوف :

ميين انا امي وابويا مسافرين عند خالي في الشرقية نهار اسود ومطين انتم احتليتوا الشقة اهئ اهئ

_اومال داخل تتسحب ليه يا أهبل

ابراهيم: عشان متعود علي كده انت مين حرام عليكم

لاحظ حركة غريبة في العصفورين بتوعه قرب منهم وفتح كشاف موبايله..

_من الصبح يا راجل يا ناقص مادوقناش الذات ..

رجل لورا حتي انه وقع...

قعد يضرب نفسه بالقلم:

هو انا العصفور بيكلمني .

*جعانين يا مفتري مش قد المسؤوليات بتخلفونا لييه

_مش مخلفنا يا روحي دا شارينا عديم الاحساس انجر هاتلنا ناكل يا عم

طلع يجري دخل اوضته وفتح النور واستخبي تحت اللحاف..

ابتسام: ههههه دي تهيؤات يا عم تهيؤات تقلت بس انت في العشا بس

_ابتسااااااااام جعانين الله يخرب بيتك 

*يا ساتر عليك الهي ما يحكمك علي ولايا

_انتي كده بتغلطي فيا يا حبيبتي

*فشر دا انت عصفور وسيد العصافير كلهم ..

برق ابتسام وضحك بهيستريا : 

يخرب بيت التهيؤات يا جدع يخربيتها ..

غمض عينيه وهو سامع الاصوات حواليه وكتم ودنه ونام ...

صحي علي ضوء الشمس اللي كان مضايقه...

قعد وهو بيمسح عرقه :

الكارت فصل ولا ايه المروحة اطفت ليه !

قعد علي جنب السرير يتاوب جت دبانة وكل شوية يهشها:

يخربيتك ابعدي عنه

*قوم اغسل وشك يا معفن طول ما انت معمص مش سايباك في حالك ..

لحظات من الصمت وبعدين طلع يجري علي الحمام وقفل الباب: 

دي تهيؤات يا ابتسام ههههه تهيؤات !

شاف صرصار بيجري علي الأرض جري وجاب الشبشب وفعصه ...

الصرصار: منك لله انا عملت لك ايه دا انا مسافر بقالي سنين بكون نفسي عشان اتجوز حبيبتي والنهاردة فرحنا !

ابتسام شاور عليه:

ههههه صرصار بيكون نفسه اخخخخخخ لا وفرحه النهاردة

طلع بره الحمام وهو ماسك دماغه ...

ابتسام: لا انا مش قاعد في البيت فين هدومي ااه انا غسلتهم عالسطح فاتهم نشفوا ..

طلع ابتسام علي السلم....

*يابت هاتي بوسة بقا كفاية تقل لحد كده دا انا بحبك

_بتحبني يا كداب واللي كنت بتعمله مع سوسو ده ايه 

*بس انتي اللي في القلب ياروح الروح خدي بقا الله 

_هيييييييييي

ابتسام برق: 

لأ البيت ده طاهر وهايفضل طول عمره طاهر

*الاهبل وصل ويا ام المطاهر دقي الملح سبع مرات

_هههههه يالهوتي علي دمك الشربات

طلع ابتسام يجري وهو متعصب:

مين اللي اتجرأ واستكرضني وعاوز يركب لي ولا مؤاخذة !

لقا الديك والفرخة واقفين ...

الديك: ايه ياعم دا انا بدادي وبدلع بقالي ساعة يا عديم المفهومية 

الفرخة: معلش يا خويا تتعوض الايام كتير

الديك: سئيل بشكل ...

شد ابتسام القميص وطلع يجري:

انا اتجننت اتجننت خلاص 😢

الديك : ماله ده ! نكمل يا فرختي كنا بنقول ايه !

الفرخة وهي بتجري : 

يوووه يا خويا بس بقا بتكسف....

كان ابتسام واقف ومتخيلهم وهما بيجروا ورا بعض برومانسية وسامع اغنية اليسا شغالة:

عايشة حالة حب معاك واخداني

وصعب انها تتكرر تاني 

وبعيشها لو انت بعيد او قدامي 

واخيرا الأيام راضية عليا اخيرا جه ياحبيبي يوم ليا ارتاح من قسوة ايامي ...

نزل بيضرب كف في كف ولبس هدومه بسرعة ونزل من البيت ...

ابتسام: ازيك يا ام اسماء ..

كانت واحدة قاعدة علي فرشة فجل وجرير...

*ازيك يا ابتسام يا ابني 

ابتسام: بخير يا ام اسماء اسماء عاملة ايه في المدرسة

*وانت مالك يا باااااااارد بأسماء تكونش حاطط عينك عليها انا اجوز بنتي لواحد فاشل يا فااااااشل 

برق ابتسام عينيه ...

*بتبرق لي لييييه يا قليل الادب انت هتصاحبني 

كان مركز معاها انها ما بتتكلمش وكأنها بتفكر ..

طلع يجري من قدامها ....

*ماله ده اتجنن ولا ايه ..

بعد عنها ووقف يتنهد ...

ابتسام: ازيك يا عم شكري

(كان واحد واقف في دكان)

_كويس الحمد لله ....

ابتسام : تستاهل الحمد

_هو انا بعد ما اصطبحت بوشك ده هابيع حاجة يا نحس يا نحس يارب توب عليا من الحارة دي..

كمل ابتسام جري وحواليه اصوات كتير وهو مش فاهم في ايه...

راح قعد علي الكورنيش وفيه اتنين حبيبة جمبه. .

_انتي حب حياتي يا سهيلة 

*وانتي روحي يا مدحت...

ركز ابتسام معاهم وهو مبتسم وهما منسجمين وماسكين ايدين بعض ..

_كله يهون عشان الملايين اللي هاتوريثيهم اهو اي حاجة تطلعني من الفقر اللي انا فيه 

*كله يهون صحيح سحنتك تقطع الخميرة من البيت بس يلا مين المغفل غيرك اللي هيشيل مسؤولية اللي في بطني!...

بدأ ابتسام يعيط :

كده كتير بجد كتير اوي 

بصوله الاتنين :

في ايه يا استاذ انت انت مجنون يا حرام 

ابتسام هز براسه ...

_لا اله الا الله ربنا يديم علينا نعمة العقل ...

قام ابتسام كمل مشي وهو بيحاول يكتم ودنه من كتر الاصوات اللي سامعها

شاف عربية بحمار واقفة .

الحمار: حرام عليكم يابني ادميين ريقي ناشف عطشان ...

قرب منه ابتسام وبص في وشه جامد...

الحمار: مالك ياعم انت اهبل ولا ايه شوف شوف الراجل بيبص لي ازاي امتي نخلص منكم انا بجهز انا وصحابي اعتصام اسمه انا حمار اذا انا موجود وهاننفخكم يا ظلمة ..

ضحك ابتسام وكمل مشي وهو بيكلم نفسه:

يارب لو بحلم اصحي لاني ده لو حقيقي يبقي انا اتجننت فعلا..

خبط في واحد وقع علي الارض من شده الخبطة:

ايه التخلف ده هو انا ناقص..

بيرفع وشه كان هاين عليه يعيط:

جلهوم انا اسف ماكنتش اعرف انه انت

مسكه جلهوم البلطجي ووقفه وطلع الموس من بوقه :

مين التخلف ياض شايف سحنتك اللي مالهاش شكل دي انا هاشرحها..

ابتسام بخوف:

استهدي بالله بس يا جلهوم دا ابن حتتك 

جلهوم :

ماهو ده السبب اللي مخليني عاوز اشرحك !

ابتسام : دا السبب طيب انا واحد غريب عن حتتك؛

جلهوم : ولا انت كذاب ماتطيرليش الچوينت اللي لسه شاربه يلا استعنا بالله

ابتسام بخوف: لاااااااااااااااااااا...

فجأة عينيه اتحولت زرقا وضرب جلهوم بالبونية في وشة وقع علي الارض..

جلهوم برق وقام بيتمطوح: انت بتضربني .

ابتسام بصدمة: لأ مش انا ...

جه جلهوم يضربه مسكه ابتسام ولف دراعه ورا كتفه وضربه بالشلوت وقع تاني..

جلهوم بص له للمرة التانية بعصبية:

انت بتضربني !

ابتسام : انا اسف مش عارف في ايه بجد 

وفجأة حس ابتسام بحاجة غريبة ووطي مسك جلهوم وقعد يديه بالأقلام ...

جلهوم: انت بتضربني 

ابتسام : صدقني مش انا في حاجة غريبة ...

الناس اتلمت وحاولوا يحوشوا ابتسام بعيد عن جلهوم ...

جلهوم بعياط: انت بتضربني يافضحتك ياجلهوم بين البلطجية...

ابتسام بخوف: صدقني مش انا

جلهوم: اومال امك وديني لاجيب رجالتي وافسحك..

مشي جلهوم وابتسام واقف مستغرب وبيبص حواليه :

معقول انا ده انا امتي بقيت بالقوة دي ...

ابتسام عينيه لمعت: 

دا بينها هاتحلو اوي ...

بص علي ايديه :

انا كده ماعتش هاتضرب زي زمان وهايبقي ليا شخصية ومش هاتهزق تاني قلبي انشرح اني مش هابقي مهزق بس 

هو في ايه ياتري انا بحلم ولا ايه .....

مشي وهو مبتسم لحد ما شاف جلهوم جاي تاني ومعاه رجالته ..

ابتسام : نهار اسود اعمل ايييه طب اجري ولا ايه...

جلهوم اجي هو ورجالته...

واحد منهم: 

تحب نعمل معاه ايه يا جلهوم يبرد نارك

جلهوم بضحكة شريرة: 

نعمل معاه الصح ومش اي صح ههههههههههههه

بلع ابتسام ريقه بخوف وجري وجلهوم ورجالته وراه. .

جلهوم: اقف يا جبان

ابتسام: الجري نص الجدعنة مش هانولك اللي في بالك ..

جلهوم: هاجيبك والا شعري يبقي علي مره

ابتسام: انت اقرع اساسا

وقف جلهوم ومسك قلبه :

بيقول اقرع 

رجالته: مايقصدش 

ابتسام:  لأ اقصد...

جلهوم: هاتوه في شوال بسرعة يا كلاب !