رواية ما في شي يبعدنا الفصل الخامس عشر15والاخيربقلم بسمه ابو العلا

نايمة على السرير بتحاول تفتح عينيها كذا مرة فتحت عينيها أخيراً  ، و قالت بصعوبة ، و وجع:

_ ماما ... أنا ... أنا فين 

علا مسحت دموعها  ، و قالت بخوف عليها:

_ أنتِ في المستشفى يا حبيبتي 

نغم بوجع ، و عياط:

_ أيدي ، و رجلي بيوجعوني أوي 

قامت علا ، و قالت:

_ هروح انادي الدكتور 

بعد دقايق علا ، و الدكتور دخلوا ، و بدأ يكشف عليها 

علا بقلق:

_ طمني يا دكتور 

الدكتور:

_ متقلقيش ده وجع عادي لأن تأثير البنج راح أنا هديها حقنة تقلل الوجع و تنام 

علا:

_ تمام 

_ أنا هفك الجبس اللي على أيدي ، و رجلي ده امتى 

الدكتور ، و هو بيعبي الحقنة:

_ شهرين أو تلات شهور كده 

نغم بضيق و وجع:

_ لسه هستنى تلات شهور أنا اتخنقت من دلوقتي ل... اه 

ادها الحقنة ، و بدأت تهدى تدريجياً قال الدكتور بابتسامة:

_ ألف سلامة عليها 

علا قعدت جنبها ، و ملست على شعرها ، و قالت:

_ الله يسلمك يا دكتور و شكراً 

أبتسم لها ، و هو بيخرج هدى دخلت 

هدى بصدمة لما شافت نغم:

_ ايه إللي عمل فيها كده  

_ حادثة 

_ إللي حصل 

_ تعالي نقعد طيب  

قامت علا من جنبها ، و راحوا هما الاتنين على الكنبة 

ـــــــــــــــــــــــــــــــــــــــــــــــــــــــــ

اللهم صلِ و سلم وبارك على محمد 

|في بيت عمران| 

نازلي قاعده بتتفرج على التليفزيون ، و يونس قاعد ماسك الكتاب ، و عامل نفسه بيذاكر ، و كل شوية يبص على التليفزيون 

يونس:

_ ليه سيبيه حلو 

نازلي بصت له:

_ هو أنت بتذاكر ولا بتتفرج 

يونس بابتسامة سمجة:

_ الاتنين يا روحي هاتيه بقى 

نازلي بعند:

_ لأ و قوم ذاكر بقى 

تميم جيه و قال ، و هو بيدور بعينه على أمه و أبوه 

تميم:

_ فين ماما و بابا ؟ 

يونس:

_ في المستشفى 

تميم بخوف ، و قلق:

_ ليه حصل ايه 

_ متخافش خالتك أتصلت ، و قالت لبابا و ماما تعالوا المستشفى عشان نغم تعبانة 

_ ماشي أنا طالع أنام 

يونس ضرب نازلي في كتفها ، و قالت :

_ تميم 

وقف تميم من غير ما يبص لها ، و قالها بجمود:

_ عايزه ايه 

نازلي راحت له ، و هي بتدمع ، و وقف قدامه ، و بصت في الأرض ، و قالت:

_ أنا آسفة ماكنش قصدي أعمل كده 

و حكت له نفس اللي حكته لــ عمران 

و قالت بعياط:

_ اضربني أو أعمل اي حاجة بس كلمني أنا آسفة 

تميم ماردش ، و كان بيفكر ، و يونس ضربه في دراعه بخفة ، و قاله بصوت واطي:

_ خلاص يا تميم جت ، و اتأسفت 

تميم فتح أيده و نازلي قربت حضنته 

نازلي بابتسامة:

_ صاف يا لبن

تميم ضحك و قال :

_ حليب يا قشطة 

يونس:

_ ايوا كده 

_ تعالي 

يونس قرب و تميم حضنهم هما الاتنين 

_ أنت متخيلة إني ممكن اضربك يعني انا ماعملتهاش و أنتِ صغيرة هعملها و أنتِ كبيرة 

يونس بهزار:

_ بس أنا ممكن أعملها عادي 

نازلي و تميم ضحكوا 

ـــــــــــــــــــــــــــــــــــــــــــــــــــــــــ 

لا اله إلا الله وحده لا شريك له له الملك وله الحمد وهو على كل شيء قدير 

|بعد مرور أسبوع | في شقة محمد | 

كلهم قاعدين في الاوضة إلي أوليفيا بتنام فيها 

روضة ماسكه هنا الصغيرة و بتلعبها قالت بضحك و حنية:

_ أنتِ بتضحكيلي أنتِ قلبي قلبي كده 

هند بابتسامة:

_ عقبالك يا رورو 

قالت روضة بصوت واطي ماحدش يسمعه:

_ ليه بس الإحراج ده يا هنوده "و بعدين قالت بكسوف" الله يخليكي يا هنوده 

رزق قام و قال :

_ يلا يا روضة 

هنا:

_ رايحين فين 

_ هوصل روضة لــ بيت نغم بنت خالت تميم عشان عاملها حادثة و أنا هروح مع واحد صاحبي مشوار و هرجع اخدها 

هنا:

_ ماشي يا حبيبي توصلوا بالسلامة و بقولك و أنتو نازلين خبطوا على رباب تطلع 

رزق:

_ حاضر يلا السلام عليكم ورحمة الله وبركاته 

الكل:

_ وعليكم السلام 

نزلوا خبطوا على رباب و بعدين ركبوا العربيه 

_ هتطولي 

_ لأ هي ساعة و نص كده 

_ تمام 

بعد من الوقت وصلوا و تميم كان مستنيهم قدام البيت نزلوا و راحوا لعنده و سلموا 

رزق:

_ قبل ما تنزلي رني عليا

_ أنا ممكن أوصلها 

_ لأ لما تنزلوا و مالقيتونيش أقف معاها بس عشان ماتقفش لوحدها 

_ ماشي سلام 

_ سلام

رزق مشي و هما طلعوا و قال تميم و هما على السلم

_ إحنا هنحدد معاد الفرح امتى 

روضة اتفاجئت من السؤال و رديت بعد شوية:

_ يعني شوية كده و بعدين ده مش الوقت المناسب اللي تسأل فيه 

ماردش و كملوا لحد باب الشقة و خبطوا و علا رحبت بيهم جداً 

|في اوضة نغم|

نايمة على السرير متجبسه في كل حته 

روضة:

_ ألف سلامة عليكي يا نغم 

نغم بتعب:

_ الله يسلمك 

علا بابتسامة:

_ بسم الله ماشاء الله ربنا يحميكي يا حبيبتي 

روضة بكسوف:

_ تسلمي يا خالتي

علا أبتسمت و قامت دخلت المطبخ و بعد شوية ناديت تميم 

نغم:

_ روضة 

_ نعم 

نغم بندم حقيقي:

_ أنا آسفة على اللي عملته معاكي أنا بجد كنت مغفلة 

روضة باستغراب:

_ على ايه أنا مش فاهمة حاجة 

نغم بأحراج :

_ أنا اللي كنت ببعتلك الرسايل 

اتصدمت روضة و كملت نغم عينها فيها دموع:

_ أنا اتولدت لقيت تميم قدامي كان اخويا و أبويا كان حنين عليا كان بيعتبرني زي نازلي بظبط و اتعودت إن الحاجة اللي عايزها تبقى بتاعتي مهما كان الحاجة دي ايه أنا أبويا ماكنش عايزني فــ لما لقيت تميم حبيته و عمري ماكنت بعتبره أخ غير دلوقتي أنا آسفة إني كنت هخرب حياتكم أنا كنت مغفلة و غبية تميم على فكرة ماكنش يعرف حاجة أتمنى تسامحيني

روضة مصدومة و قعدت تفكر و بعدين قالت بابتسامة:

_ ربنا بيسامح أنا مش هسامحك يعني و إللي فات خلاص و كويس إنك فوقتي إحنا أخوات يا نغم و كمان هبقى مرات اخوكي ولا اي بقى 

نغم عرفت إنها إنسانة كويسة و تميم يستاهلها  أبتسمت نغم و قالت لها:

_ طبعاً نفسي احضنك بس مش عارفة 

روضة بضحك:

_ هحضنك أنا 

قامت روضة حضنتها براحة عشان ماتتوجعش و نغم ماكنتش عارفة تبادلها الحضن دخل تميم و كان سامع كل حاجة و كان فرحان أنه عرف يختار صح قعدوا شوية و قال تميم:

_ يلا يا روضة عشان متتأخريش 

روضة:

_ ماشي 

علا:

_ خليكوا قاعدين شوية 

تميم:

_ مش هينفع يا خالتي 

قامت روضة و سلمت عليهم و قالت:

_ هجيلكوا تاني 

علا بابتسامة:

_ تنوري يا حبيبتي 

ـــــــــــــــــــــــــــــــــــــــــــــــــــــــــــــ

لا حول ولاقوة إلا بالله العلي العظيم

| بعد مرور يومين| في بيت يعقوب| 

روضة و رويدا و رباب لابسين عشان فرح فريد و شهد 

رباب ، و هي بتلبس الهيلز:

_ حد يتصل بــ رزق إحنا كده هنتأخر 

رويدا:

_ جي في الطريق 

بعد ربع ساعة خرجوا ، و ركبوا العربيه ، و وصلوا الفرح 

روضة بابتسامة:

_ ألف مبروك يا شوشو 

شهد بفرحه:

_ الله يبارك فيكِ عقبالك 

روضة لقت تميم بيسلم على فريد بصوا لبعض ، و أبتسموا ، و نزلت راحت للبنات على الترابيزة لقت رباب بس 

روضة باستغراب:

_ فين رويدا 

_ مع اخوكي يا ختي ، و مالك شكلك مبسوطة 

_ تميم هنا ، و بص لي ، و ابتسم لي 

لسه رباب هترد عليها لقوا حد مادد أيده بــ ورد بصوا لقوا تميم 

روضة بكسوف:

_ اي ده... سوري ليه يعني أو ايه السبب 

تميم بحب:

_ على كل حاجة أنتِ رزق من ربنا أنتِ العوض فعلاً ، و دي أقل حاجة ممكن أقدمه لك . 

روضة كانت مكسوفة ، و قالت بكسوف:

_ شكراً 

رباب كانت فرحانة لــ روضة ، و تميم أبتسم لها 

ـــــــــــــــــــــــــــــــــــــــــــ

سبحان الله وبحمده ، سبحان الله العظيم 

|بعد مرور خمس شهور|

يونس امتحن ، و نجح ، و دخل كلية هندسة ، و نغم خفت ، و هي ، و مامتها علاقتهم بقت أحسن ، و نازلي اتغيرت كتير ، و رزق كل شوية يقول لــ رويدا هنحدد معاد الفرح امتى لحد ما زهق من ردها ، و أحمد بيحب رباب بس مخبي ، و مش عايز يقول لاي حد ، و هند و هنا مغلبين أوليفيا و حمزة ، و روضة و تميم بيتخانقو كل شوية بس حبهم لبعض بيزيد كل يوم 

|في اوضة الأوتيل|

روضة:

_ البتاع ده مش هاحطه على وشي 

رباب بزهق:

_ لما أنتِ مش هتحطي جبتي البنت ليه تعبتيها معاكي ، و تعبتينا إحنا كمان 

_ عشان تظبط لي الطرحة ، و تحط لي زبده كاكاو بس مش أكتر 

بعد شوية من الخناق روضة خلصت ، و أبوها و رزق طلعوا 

يعقوب بفرحة:

_ بسم الله ماشاء الله قمر هتوحشيني أوي يا روضة قلبي و ريحانة عمري 

روضة دمعت ، و حضنت باباها:

_ وأنت كمان هتوحشني أوي ، و الكلمة بتاعتك إللي لسه بتقولها لي 

بعدت عنه ، و رزق قرب منها ، و باس راسها بحنيه ، و حضنها ، و قال :

_ هتوحشيني أوي مش عارف هقعد إزاي من غيرك 

روضة عيطت أكتر و قالت:

_ و أنت كمان يا صاحبي "و كملت بضحك"و هيوحشني خناقنا مع بعض 

ضحكوا كلهم ، و نزلوا 

|علي الترابيزة | 

روضة و تميم و أبوها و أبوه و الشهود و المأذون قاعدين عشان عقد القران 

المأذون:

_"بارك الله لكما وبارك عليكما وجمع بينكما في خير" ألف مبروك 

رويدا و رباب و أوليفيا و رانيا و نازلي و نغم زغرطوا 

تميم باس راس روضة ، و قال بحب:

_ ألف مبروك 

روضة بكسوف:

_ الله يبارك فيك 

تميم بهزار:

_ ايه مش هناخد الرقم نتكلم ولا اي 

ضحكت روضة ، و قالت:

_ و يترى عايز تقولها ايه 

تميم بحب:

بحبك . 

تمت 

ـــــــــــــــــــــــــــــــــــــــــــــــــــــــــ

السلام عليكم ورحمة الله وبركاتة يا حبايب قلب بسومة دي تالت رواية ليا و بصراحة أنا ماكنتش عايزه اكملها بس لقيت في بنات عايزه و كملتها عشان خاطرهم و مع الوقت حبيتها زي ما انتوا حبتوها أنا ماكنتش متوقعة تطلع حلوة بس الحمدلله طلعت حلوة اوي و أجمل من الروايتين اللي عملتهم بشكركم على دعمكم ليا و أشوفكم في رواية جديدة بإذن الله بحبكم في الله 

                        تمت