رواية جنان في جنان الفصل الاول1بقلم سحر حسين
الام :
قومي بقي يا بنتي كل ده نوم عندك شغل
ترد البنت و هي نايمه علي السرير و تقول
حاضر حاضر قايمه اهو
الام :
انتي حره بقي انا زهقت و مش هصحيكي تاني يكش تترفدي من شغلك يا خايبه
البنت :
حاضر حاضر صحيت اهو و بعدين يا ماما انا مش خايبه انا دكتوره
تتكلم الام و تقول
دكتوره بلا نيله ده انتي دكتوره مجانين يا مجنونه
اتكلمت البنت و بتقول
ماما لو سمحت انا دكتوره نفسيه مش مجانين
اتكلمت الام و قالت
نفس المجال يا اختي اتوكسي
اتكلمت البنت و قالت
طيب بعد ازنك بقي يا ماما عشان الحق البس و نزل المستشفي
و يادوب خلصت من ماما جتلي تيته و هي للاسف بتسمع الكلام اللي علي مزاجها بس وبقيت الكلام مش بتسمعه يعني سماعها تقيل واول ما جت قالت
مستشفي مستشفى ايه يا بت مين فيكوا تعبان
اتكلمت و قولت
لا يا تيته انا دكتوره و شغاله في مستشفى
اتكلمت تيته و قالت
طيب يا حبيبتي ربنا يشفي
و بعد كده سابتني تيته و خرجت و كملت لبس عادي و بقيت علي سنجه عشره و اول ما خرجت من الاوضه لقيت ماما و تيته و اخويا قاعدين علي السفره بيفطروا و قفت عملت سندوتش علي السريع عشان متأخرة و قولت لماما
معلش يا حبيبتي ممكن تشوفيلي معاكي فلوس لحد القبض بس
اتكلمت ماما وهي بتاكل و قالت
وانتي مش معاكي فلوس
قولتلها
لا معايا يا ماما بس عايزه بزياده مش اكتر
قالتلي
مش معايا فلوس اخر فلوس خدتها ستك يا اختي
لفيت وشي لتيته و قولتلها
تيته حبيبتي عايزه فلوس
اتكلمت تيته و قالت
لبوس! لبوس ايه ده يا بت اللي عايزه مني هو انا بتاعت لبوس
اتكلمت و قولت
لبوس اه دلوقتي سمعك راح مش كده انا عارفه اني مش هعرف اخد منكوا حاجه انا ماشيه و مش عايزه حاجه منكوا
المهم سبتهم و نزل اجري و ماسكه في ايدي سندوتش و الايدي الثانيه ماسكه كتابين و لبسه شنطه علي كتفي المهم نزلت الشارع و حولت اخد اي مواصلات من قدام البيت بس معرفتش المهم و قفت تكسي و اول ما ركبت لقيت واحد فاتح الباب التاني و بيركب معايا بصيت عليه و قولتله
نعم
قالي
نعمله عليكي انا اللي مواقف التكسي انتي اللي نعم
قولت
نعم لا بقولك ايه انا مش نقصاك خلاص علي الصبح انا فيا اللي مكفيني
قالي
انا مالي انا باللي بتقوليه ده انا مستعجل جدا و مش هينفع اتاخر
قولت
وانا كمان متاخره جدا وده تاني يوم ليا و مستحيل انزل من العربيه
اتكلم السواق و قال
خلاص يا جماعه انا هوصلكوا انتو الاتنين و بقوا اقسموا الاجره مع بعضكوا انتوا نازلين فين
وافقنا و بعد كده كل واحد فينا قال هو نازل فين و بعدين اتكلم السواق و قال
طيب يا استاذه كده الاستاذ هو الأقرب
قولت
يعني ايه
قالي
يعني هنوصل الاستاذ الاول و بعد كده هوصل حضرتك
اتكلمت وانا بنفخ و قولت
هو يوم باين من أوله طيب بسرعه بعد اذنك
سكت و فضلت باصه من الشباك و اتحركت العربيه و هو اتكلم و قال
حامد
بصتله باستغراب و قولت
نعم
اتكلم و هو عامل ايده علي اساس أنه بيسلم و قالي
اسمي حامد
بصتله بقرف و من غير ما اسلم عليه و قولتله
اهلا و سهلا
لم ايده و قالي
وانتي اسمك ايه
قولتله
وانت مالك
قالي
عادي يعني مش انا قولتلك علي اسمي
قولتله
هو انا اللي سالتك ولا انت اللي قولت من نفسك
لقيته بصلي بقرف و قالي
انا غلطان اني اتكلمت معاكي اصلا
قولتله
ايوه انت فعلا غلطان خليك في حالك بقي
و بعد كده كل واحد بص من شباكه و فضلنا ساكتين لحد ما وصلنا للمكان اللي مفروض هنزل فيه و قال السواق
انا هنزل هنا يا سطا بعد ازنك
و لما السواق وقف قاله
الله يكون في عونك
و بعد كده فتح باب العربيه و نزل و انا كملت مشواري و قبل ما انزل طلعت نص الاجره عشان ادفعها زي ما اتفقنا لقيت السواق بيقولي
انا اسف يا استاذه بس انا عايز فلوس كلها
قولت
نعم هو مش احنا اتفقنا أن كل واحد هيدفع نص الاجره و بس
قالي
مهو يا فندم الاستاذ نزل و مدفعش حاجه
قولت
طيب وانا مالي انا
قالي
طيب انا ذنبي ايه يا استاذه
قولت
انت ملكش ذنب هو يوم منيل من أوله اتفضل يا اسطا
دفعتله الفلوس و نزلت و فعلا انا كنت مخنوقه و علي أخري وربنا بس هعمل ايه بقي ما علينا
طيب تعالوا بقي اقولكم انا مين و ايه حكايتي بالظبط بصوا بقي انا اسمي "رقيه" بس دلعي روكا و بحب اسم الدلع جدا و لسه طالبه في طب طب نفسي و ركزوا في نفسي دي مش عقلي المهم انا والدي متوفي و عايشه مع ماما و اخويا و تيته اهو الناس كلها كوم و تيته دي كوم تاني خالص محدش عرف لها حاجه مره تعبانه و مره لا مره عندها زهايمر و مره لا مره بتسمع كويس و مره لا المهم اخويا اسمه احمد وهو فاشل ايوه فاشل مش نافع في أي حاجه لا دراسه ولا حتي شغل هو في أولي جامعه تجاره بس يعتبر مش بيروح اصلا و كل ما يروح شغل يتخانق فيه و يمشي و هو دلوع امي جدا و ستي كمان المهم انا بقي نازله تدريب في مستشفي امراض نفسيه و عقليه و الدكتور بتاعي عاملي حاجه كده زي القبض اه هو رمزي جدا و مش بيكفي حتي لنص الشهر بس ما علينا و اكتر كلمه الدكاتره بيقولها لي و هي اني فشله و مش عارفه ليه يمكن عشان باجي متأخر مش عارفه المهم اني كنت مستعجله و نسيت اجيب البالطو الابيض و طبعا ما ينفعش دكتور من غير البالطو الابيض ودي اول حاجه من فشلي و اول ما دخلت مكتب الدكتور عشان اعرفه اني حضرت و لما شافني قالي
روكا اتفضلي بره و متجيش تاني من غير البالطو بتاعك يا دكتوره وانا هعتبرك مجتيش انهارده
رديت و انا باخد نفسي من الجري ما انا طبعا داخله المستشفى بجري ما علينا المهم اتكلمت و قولت
معلش يا دكتور انا بس عشان نزله مستعجله نسيت البالطو انا اسفه و اوعد حضرتك مش ها تتقرر تاني
رد عليا الدكتور و هو باصص لدفتر قدامه علي المكتب و قالي
بره يا روكا
كنت لسه هتكلم راح خابط بايده علي المكتب و اتكلم بعصبية و قالي
بره و مش عايز اسمع منك حاجه
بصراحه كده خوفت اتكلم تاني يحدفني باي حاجه في ايده عشان كده خرجت من المكتب و من غير ما اقول اي كلمه و طبعا كنت مضايقه جدا فا قولت أخرج اقعد في الجنينه بتاعت المستشفى شويه اشم هواه و بعد ما قعدت بدقائق لقيت الكل بيجري اتجاه مبنى كبير و سامعه ناس بتصوت قومت جريت انا كمان و روحت اشوف ايه اللي بيحصل و لما روحت و بصيت لفوق شوفت واحد واقف في اخر دور و عايز يرمي نفسه من فوق و كل الدكاتره و الناس اللي واقفين حوليا بيقوله
ارجع يا مجنون انت
و فجأة لقيت نفسي دخلت المبني ده بجري و لحد ما طلعت عنده و انا واقفه وراه قولتله
ممكن تهدي شويه
لقيته بصلي و قالي
انتي طلعتي ليه انا كده كده هرمي نفسي انا مش عايزه اعيش في الدنيا دي
اتكلمت و قولت
طيب اهدي بس و قولي انا عايز ترمي نفسك ليه و كاره الدنيا ليه بس
قالي
و انا هحب ايه في الدنيا الناس كلها بتقولي يا مجنون وانا هفضل مجنون لحد امته انا خلاص كرهت من ناس دي
ضحكت و قولته
انت عايز تنتحر عشان ناس بتقول عليك مجنون امال لو ناس بتقول عليك انك فاشل هتعمل ايه
لقيته سكت كده شويه و بعدين اتكلم و هو بيضحك و بيقول
هنتحر بردو
سكت شويه و قولته
خلاص مدام كده هتنتحر و كده هتنتحر بيقي استني انتحر معاك انا كمان
قالي
انتي بتقولي ايه انتي مجنونه
ضحكت و قولته
لا فاشله و كده كده الدكتور بتاعي مش هيحسب لي اليوم النهارده
بصلي باستغراب و قالي
انا مش فاهم حاجه
قولته
مش مهم المهم دلوقتي انك لقيت حد هنتحر معاك
و بعد كده قربت منه و طلعت وقفت جانبه علي السور و بصيت لتحت وانا كنت مرعوبه المنظر كان صعب جدا بس حولت أتمالك اعصابي و طبعا ما بينش الخوف عليا و فجأة و بدون مقدمات حصلت حاجه مش متوقعه منه و هي