رواية خطوبة علي حين غفلة الفصل الثالث3والاخيربقلم حنان احمد ماهر
روحت البيت ولسه هفتح باب الشقه سمعت صوت انا اعرفه جدا من جوه الشقه فتحت الباب وبصيت لقيتها اللي ما تتسمى بنت عمه كانت واقفه و متعصبه وبتقول - يا تديني حقي يا هتربق الدنيا فوق دماغك
كان بيبصلها ببرود ولقيت ماماته واقفه متوتره اتكلمت - في ايه بس يا بنتي اي اللي معصبك كده
- لو سمحتي يا مرات عمي ده موضوع بيني وبين ابنك واحنا هنحلوا مع بعض
دخلت من باب الشقة على آخر جملتها وقفلت الباب اتنبهتلي وِجَت وقفت قدامي واتكلمت بسخرية بينا جداً - أهلاً أهلاً بالسنيوره بصي بقى يا تخلي جوزك المستقبلي ده يديني حقي يا إما مش هيحصل كويس
حقك؟؟!! قلتها باستغراب وانا مش فاهمه حاجه
- اه حقي بصي كان مَاضي على الوصلات دول وقالي هيديني كل حاجه بس لا اتفاجأ انو سافر القاهرة وجاي يتجوز من غير ما يديني ولا مليم بس على مين انا بقولك اهو يا يديني اللي وعدني بيه يا اما هروح اشتكيه وشوفي مين بقى هيطلعوا من السجن
بصيت على الوصلات اللي ادتهملي اتفجأت بيهم مكتوب انو متنازل عن الأملاك والشركة اللي بيدرها ليها النص فيها وكمان ماضي على شيك ب 2 مليون دولار
سمعت صوته وهو بيقرب وقف قدامها وقال بعصبية - انا موعدتكيش بحاجة انتي اللي استغفلتيني وده سبب اللي خلانا ننفصل
كنت عايزه أقوله دي قرطستك مش استغفلتك بس ده مش وقته زرافه من عندي خالص
اتكلمت ببرود - والله سبنا بعض وقلتلي انك هتدهملي بس متدتنيش حاجه وقلتلي أما تجمع الفلوس لكن اتفاجأ بيك جاي تتجوز بيهم لا يا بابا فوق كده يا اما اروح النيابة اتصرف هناك
بصيت على طنط ماماته بجد كانت واقفه متوترة اوي ومش عارفة تقول ايه ولا حد من الواقفين فاهم ايه اللي بيحصل
كان هيتكلم بس انا سبقته ووقفت قدامه وبصيتلها مديت ايدي بالاوصلات وحتطهم في أيدها وربعت ايدي وانا ببصلها بكل برود - اللي عندك روحي اعملي و شوفي مين هيصدقك
بصيتلي باستغراب بصراحة مش هي بس الكل بصلي باستغراب اتكلمت - ايه اللي عندك اعمليه ده انتي مش خايفه انو يتسجن يعني
لا مش خايفه.... قلتها بتسرع بس حسيت انو هيفهما غلط فَ روحت اتكلمت تاني - علشان ده مش توقيعوا اصلا
لقيتها اتوترت بس حاولت تخبي توترها ده - ايه هو اللي مش توقيعوا إذا كان هو معترف بنفسه أن موقع
لفيت بصتلوا على أساس يقول غير كده بس هو هز رأسه وكان في عيونه الندم
رجعت بصيتلها تاني وقلت بثقة معرفش مصدرها منين - هو اه تلاقيه وقع بس مش يمكن يعني الوصلات ضاعت أو اتحرقت أو حصلها حاجة وانتِ زورتي الورق ده
لقيتها اتوترت تاني فَ عرفت أن معايا حق ابتسمت بثقة وقلتلها - بصي يا بنت الناس اللي عندك اعمليه واحنا مبنخافش من حد روحي اشتكي لمين ما تحبي بس أنا متأكدة ميه في الميه أن ده مش توقيعوا وأنك مزورة الورق ده واتفضلي يلا من غير مترود
بصيتلي بغيظ وغضب - هتندمي على اللي قولتي ده
هزيت كتافي بلا مبالاة وهي مشيت لفيت لقيته بيبصلي ومبتسم اتحرجت وجيت أتحرك لقيت ماماته السكر دي بتحضني وبتقول - شكراً يا حبيبتي لولاكي مكناش خلصنا من البلوة دي
طلعت من حضنها وقلت وانا ببصلها بابتسامة - شكراً على ايه بس انا معملتش حاجة
- بس ايه اللي عرفك انو مش توقيعي
ده كان صوته لفيت بصتلوا لقيته بيبصلي بنظرات غريبة ومبتسم اتكسفت ونزلت عيني للأرض وانا بقول اي حاجه ما انا مش هقوله ان انا عارفه عنه كل حاجه من واحنا صغيرين لأ لا سمح الله هخليه يشمت فيا يعني - حسيت أن الشيكات فيها حاجه غلط ومش كله نفس التوقيع فَ استغربت يعني وحسيت أنها متزوره
حسيته مقتنعش بكلامي انا اصلا حاسه ان محدش أقتنع بكلامي
جاله إتصال وانا استاذنت ودخلت عشان اغير هدومي اول ما دخلت الاوضه حطيت ايدي على قلبي وانا بحاول أهدى مش فاهمه إيه الي حصل ولا ايه اصلا اللي يخليه يوقع على الأوراق دي معقول يكون كان بيثق فيها وبيحبها لدرجة دي حاولت أهدى بس جيه بالي صورته وهو بيبصلي ومبتسم ونظاراته الي مفهمتهاش واللي خلتني اتوتر أوي بس استغفرت ربنا وروحت ناحية الدولاب وطلعت هدوم ليا والاسدال علشان اغير واصلي واطلع اتعشى وانام من اليوم المرهق ده
روحت أكلت معاهم وبصراحة عاملين يتكلموا في حاجات ملهاش علاقه خالص بالحصل من شويه انا فضلت ساكته خلصت اكل روحت غسلت أيدي ولسه رايحه علشان ادخل الاوضه بتاعتي علشان انام سمعت صوته - فيروز
لفتله بانتباه
اتكلم - كنت عايز اتكلم معاكي شويه تعالي البلكونة
بصتله باستغراب اتكلم بسرعة - انا قلت لعمي وهو واقف هيبص علينا متقلقيش
بصيت على بابا لقيته فعلا واقف ناحيه البلكونة روحت معاه وقفت قصاده بس عيني في الارض طبعاً سمعت صوته الهادي - شكراً
بصتله باستغراب لأن ملقتوش اتكلم بعدها ف اتكلمت انا - مافيش داعي لشكر جايبني هنا علشان تقول شكراً بس
- لا .....مش علشان كدة بس اكيد دماغك عماله تودي وتجيب وتقول ايه اللي يخلي يمضي على وصلات ايه هو واثق فيها لدرجة
حاولت مابينش ابتسامتي بس على مين اتفضحت برضو وشافها
كمل كلامه - بصي يا فيروزه
- فيروز لو سمحت ...قلتها بضيق
قالي بابتسامة سَمِجة - لا فيروزه انا بحب اناديكي كده عندك مانع
- اه طبعاً عندي مانع ده اسمي وانا مبحبش الاسم ده
- بس انا بحبه
قالها بطريقة خلت قلبي يدق وأنا مش فاهمه ايه اللي بيحصلي زمان كان لما يحب يديقني كان يقولي الاسم ده بس بصراحة لما احم يعني كبرت وأعجبت بيه بقيت احب الاسم ده منه فَ انا معنديش مانع م الاسم انا بس حبيت أفهمه اني يعني نفس البت اللي كانت بتتعصب منه زمان
اتكلمت بلعبكه من نظارته - إياس لو سمحت متكلمنيش كده انا لسه مبقتش حلالك
- ماهو علشان كده انا قلت لعمي انو هيبقى كتب كتاب مش خطوبة بس علشان اخد راحتي معاكي
بصتله بضيق - بس انا قلت لبابا اني لسه مش موافقة على كتب الكتاب ده
- بلاش تُقل يا فيروزه ما احنا عارفين اللي فيها
..استفزني كلامه اوي - ايه بلاش تقل دي وايه اللي فيها مش فاهمه
قرب وبص في عيوني واتكلم بصوته الهادي اللي بيجنني - إنك معجبة بيا زي ما انا معجب بيكي
اتوترت جامد وبعدت عنه واتكلمت بغيظ منه - بقولك ايه ثقتك في نفسك دي تقِل شويه مافيش كلام من اللي بتقوله ده
ابتسم باستفزاز - امال كنتِ واثقه اوي أن ده مش خطي ليه و اوعي تقولي انك شاكه والكلام الفارغ ده علشان محدش صدقه
اتعصبت منه ومن بروده - بقولك ايه كتب كتاب مش هيحصل وأعلى ما في خيلك اركبه
ورحت اتحركت علشان امشي وقفني صوته - هركبه إن شاء الله
اتغظت منه اوي وجيت أتحرك علشان امشي من قدامه راح قالي - استني انا لسه مفهمتكيش
لفيت راسي بعصبية وقلت - مش عايزه افهم حاجه منك و روحت على الاوضه وقفلت الباب وقعدت على السرير بعصبية برودة بيعصبني اوي واصلا يعني ملوش الحق مين قال اني موافقة عليه ...طيب خلاص فاهمين انا موافقه بس يعني مش لدرجة انو يبقى مفكر اني هموت عليه يعني .... خلاص يا جماعة هو استفزني... فردت جسمي على السرير وانا بفكر في كلامه فضلت مسهمه مش مصدقة اللي قاله وجيه في بالي جملته وهو بيقول على اسمي " بس انا بحبه" انا حرفياً لحد الآن مش مصدقه اللي قاله فضلت بصه للسقف وعلى وشي ابتسامة سَمِجة انا فعلاً بحبه اوي بس لسه زعلانه علشان خطب اللي ما تتسمى دي ف مدايقه اوي بس بفضل اقول هو موعدنيش بحاجة انا اللي حبيته يبقى هو ذنبه ايه أخدت قرار إن خلاص بَالَها تُقل وانا مش محتاجه أعرفه اصلا ولا اتعرف عليه وفعلاً كتب الكتاب هيبقى احسن على أقل هناخد راحتنا ونبعد عن الشُبهات علشان في الفترة دي لازم ناخد بالنا من كل كلمة وكل فعل علشان مناخدش عليه ذنب عارفه انو هيشمت فيا بس يلا مش مهم كدا كدا انا عرفت هو بيحس اتجاهي بإيه وده اللي يهمني نمت وانا مبتسمة وعماله أفكر فيه وقد إيه مبسوطه علشان خلاص هنبقى مع بعض
صحيت الصبح جهزت الفطار واكلنا انا بابا وماما ملحوظه يا جماعه جدي ومامات إياس وإياس في الشقه اللي جنبنا لكن اكيد مش قاعدين معانا المهم خلصت الفطار وصليت الظهر وجهزت علشان اروح لنور اتصلت بليلي قالتلي أن هي كمان جهزت ونزله هنتقابل عند بيت نور روحت قلت لماما وكنت نازله على السلم بس وقفني صوته...........يتبع
بقلمي حنان أحمد ماهر
كنت نزله على السلم بس وقفني صوته - فيروز
لفيت بصتله
اتكلم - أنتِ رايحه فين
اتكلمت ببرود علشان أضيقه زي ما ضايقني امبارح أنا اه بحبه بس مش بسيب حقي أبداً - وأنت مالك يهمك في ايه
اتكلم بغيظ - ايه هو ده اللي يهمني في ايه مش هتبقي مراتي ولازم اعرف عنك كل حاجه
- والله لما ابقى مراتك تبقى تعرف دلوقتي لسه ما بقتش فده ما يهمكش في حاجه
ولسه هتحرك علشان انزل لقيت ماما بتناديني بتقول لي - فيروز استني خدي الكيكه دي نسيت اديها لك اديها
لنور قولي لها الف مبروك على العريس
بصيت لماما بغيظ علشان هي كده فهمته انا رايحه فين وانا ما كنتش عايزه اقول له اخذت منها لفيت بصيت له لقيته بيضحك بص لماما واتكلم - هي رايحه عند صاحبتها ولا ايه
- اه يا بني في عريس متقدم لنور وهي هتروحلها ... بقولك ايه ما توصلها
لفيت وبصيت لماما بصدمه من اللي بتقوله لقيته اتكلم - ماعنديش مانع في ده يا مرات عمي والله
- بس انا عندي مانع انا خلاص طلبت اوبر وزمانه على وصول مش محتاجه حد
- ليه شايفاني بقرون علشان اسيبك تركبي اوبر وانا موجود
- انت لسه ما بقتش.....
- ما بقتش ايه بس انتي لسه هتجادلي ولا ايه يلا
لقيته بيسبقني وبينزل على السلم بصيت مكان ما بينزل بغيظ رحت نزلت وراه كنا في الطريق وقاعدين ساكتين هو قطع الصمت ده - أنا مش واثق فيها ولا حاجة من اللي في دماغك دي
لفيت بصتله بانتباه
كمل - هي استغفلتني وحطت الورق ده مع ورق شغل وانا مضيت عليه من غير ما اخد بالي
- طب هو مش لازم ان انت تراجع الورق الاول قبل ما تمضي عليه تمضي على اي حاجه كده وخلاص
- عارف اني غلطت والغلط الاكبر اني خطبتها
بصيت ناحيه الشباك وانا بتكلم بهمس سمعه هو - امال مش كنت بتحبها
- انا ما حبتهاش ولا عمري هحبها
لفيت بصتله باستغراب واتكلمت بسرعة - امال خطبتها ليه
بصلي بابتسامه - بابا اللي كان طالب ده على اساس انها هي بنت عمي وكده وانا اتجبرت اني اعمل كده حتى قلت تبقى خطوبة على أساس انا اخلع اقول ان احنا متفهمناش بس انا عمري ما حبيتها اصلا انا عمري ما هحب غير فيروزه قلبي
اتصدمت اوي من صرحته وازاي قالها انا عماله استوعب هو قال ايه اصلا مش مصدقه فضلت بصاله وانا بحاول استوعب هو قال ايه وشكلي كان يضحك جدا بصلي وضحك - طب هنقول إنك صدقتي إني بحبها مع اني عمري ما قلت كده ......سكت بعدين كمل بصوت أهدى وهو بيبص فَ عيوني - طب ازاي مش مصدقه إني بحبك أنتِ مع أن كل تصرفاتي زمان كانت بتثبت كده
- ازاي وأنت عمرك ما لمحتلي حتى
- أمال مين اللي كان كل ما تيجي افضل أقولك يا هتلعبي معايا يا مش هتلعبي مع حد ولما كبرتي شويه وجيتي مع ابن خالك ده ازاي اتعملت معاه .....كمل بسخرية - ده كان ناقص احرقه عملت فيه اللي مايتعملش علشان قالي بس انو لما يكبر هيتجوزك
- انا ماكنتش اعرف كده ولا كنت عارفه انت عملت فيه كده ليه ولما كنت بتقولي متلعبيش مع حد كنت بفكر عايز تضايقني وخلاص فكرتك بتضايق من فكرة تواجدي هناك واني بلعب مع قرايبك وكده
- هضايق منك ليه كنتِ ضرتي يعني ... كمل بابتسامة و بهدوءه اللي بيجنني - انا كنت بعمل كده علشان كنت غيران عليكي ... علشان بحبك...من اول مره جيتي وانتي طفله صغيرة وانا بحبك وبحب العيون الفيروزية اللي وقعتني في حبها ومقدرتش انساهم وعلشان أنتِ تستاهلي الدنيا كبرت وعملت كل حاجه أقدر عليها علشان بس اليق بيكي واعيشك في مستوى تستاهليِ واول ما بقيت حاجة وجهزت من كل النواحي ومعتمدتش بس على ورث ابويا اشتغلت على نفسي علشان أثبت اني استاهلك ومحدش يقول هو كبر بفلوس أبوه لو حصلت معاه مشكله مش هيقدر لا انا عايزهم يقولوا هو عمل كل اللي يقدر عليه كبر واشتغل هو فعلاً يستهالها جيت واتقدمت وقُلت لجدك احنا نسافر انهارده قبل بكره مش هستنا انا حد يخدها مني انا عايزها ليا انهارده قبل بكره وكنت متفق اعمل كتب الكتاب اول ما اجي على هنا يعني كنت هاجي بالمأذون بس الله يسامحه جدك بقى ما وافقش وقال لي استنى بس لما تستوعب اجي الاقيكِ بتقولي ..... اتكلم وهو بيقلد صوتها - انا موافقة على خطوبة بس كتب كتاب لأ
ضحكت عليه وانا بببصله بحب مش مصدقه يعني كل ده عايشه ومفكره انو مبحبنيش وانو كان مبيحبش وجودي طلع بيعشقني مش بس بيحبني وعمل اللي ميتعملش علشاني هو ليه بيخليني أحبه اكتر ده عايز من قلبي ايه تاني بس..... اتكسفت من نظارته بعدت عيني من عليه استوعبت أن إحنا واقفين قدام بيت نور بصتله بصدمه - إحنا وصلنا ومقولتليش يا نهار ابيض دي ليلي هتعمل مني كفته
قُلت اخر جملتي وانا بنزل من العربية لقيته هو كمان نزل اتكلم - أما تخلصي ابقي رني عليا علشان اجي اخدك
- ملهوش لزوم انا هطلب اوب...
ملحقتش اكمل جملتي - والله العظيم لو قلتي هطلب اوبر دي تاني ل هتكوني زعلانة مني يا بنتي هو أنتِ شايفاني سوسون
ضحكت عليه - أنا شايفاك راجل وراجل اوي كمان وعمر ما عيني شافت ولا هتشوف غيرك يا إياس
جريت من قدامه بعد ما شوفت نظارته وبعد ما استوعبت كلامي أنا ازاي قلت كده انا لساني ده هيوديني في داهيه مره بجد
دخلت العمارة لقيت ليلي واقفه قدام السلم شافتني بصيتلي بغيظ - بقالي ساعه مستنيه سيادتك تنزلي من العربية نفسي أفهم كل ده بترغوا فى ايه
- لحظه بس هو إحنا واقفين بقالنا كتير ...كملت بهمس - امال انا محستش بيهم ليه منك لله يا إياس يا بن ضي على اللي عملته فيا
- أنتِ يا بت أنتِ رحتي فين يلا خلينا نطلع نشوف البت دي هتموتنا
طلعنا وطبعاً نور أضيقت علشان أتأخرنا واللي متتسماش قالت لها إني أنا اللي اخرتها ف اضريت أحكي بالمختصر كده ايه اللي حصل معايا وهما فرحولي جداً إذا كان انا هموت من الفرحة أصلاً العريس جيه واتقدم واحنا طبعاً قيمنا انا وليلي بنتنا مش هتاخد اي حد برضو هو مش بطال برضو عمي وافق وكأن أما صدق أن نور هتتجوز بهزر يا جماعة هو وافق علشان بيحب يونس وعارف أخلاقه طبعاً خلص اليوم وروحت نمت وأنا بتذكر احداث اليوم اللي حصلت معايا وإياس ...إياس اللي واكل عقلي ومش عارفة انام بسببه
بعد أسبوع في العربية
- ممكن افهم بس واخدني على فين
- قلتلك هنقضي اليوم سوا ايه اللي مش مفهوم
- يا بني ما أنا فاهمه بسألك رايحين فين
- يا بني؟!!... انا مش هرد عليكي بجد
وصلنا وكان مطعم هادي جميل ماكنش زحمه بس كان حلو فتحلي الباب ومسك إيدي ونزلت من العربية ياربي عليه كمان جنتل ابن ضي بيخليني أقع في حبه كل يوم من الأول وجديد على اللي بيعملوا معايا
جماعة احنا كتبنا الكتاب خلاص يونس ونور عملوا زينا والمفاجأة بقى أن كريم وليلي برضو كتبوا الكتاب معرفش ايه البزرميط اللي احنا فيه ده بس انا مبسوطه بجد ليهم ومبسوطه إني خلاص بقيت على اسمه دخلنا المطعم وإياس شدلي الكرسي علشان اقعد بدوب يا جماعه بدوب بجد طلب الأكل وبصلي - ممكن تقولي أن الأكله دي هدية شكر ليكي على اللي عملتيه
بصتله وانا بتصنع الغباء - ليه هو انا عملت ايه
- بلاش تواضع يا فيروز انا بتكلم عن سلمى
سلمى دي بنت عمه اللي متتسماش انا بحب اناديها كده علشان مش بطيقها اصلا ومن ساعت اللي عملته وانا مش بطيقها اكتر جت البيت مع البوليس
فلاش باااك
- إحنا جايين بأمر القبض على إياس المرشدي
طنط ضي وقفت مصدومه والدموع اتجمعت في عيونها - ليه هو ابني عمل إيه
دخلت علينا اللي متتسماش - مدنيش حقي
كان لسه هيحطوا الأصفاد في أيده بس أنا اتكلمت - لحظة واحدة
كلهم انتبهوا ليا - دلوقتي الورق اللي معاها ده مش حقيقي الورق الحقيقي كان مع السكرتيره و معايا إثبات يثبت ده طلعت تسجيل من تليفوني كانت سكرتيرة إياس كانت بتقول أن سلمى هي اللي ادتها فلوس علشان تعمل كده وتحط الوصلات مع ورق الشغل بتاع إياس وتخليه يوقع عليه بس بعدين حصلت معاها ظروف وكان أبوها محتاج فلوس يا إما هيترموا في الشارع بسبب صاحب البيت وإياس حل المشكلة دي فَ رجعت هي سرقت الورق منها وحطتلها ورق مَزور
- بنت ال.. وانا أقول راحوا فين ودول جُم ازاي أنا هوريها
- دلوقتي يا حضرة الظابط تقدر تشوف شغلك
دي كانت جملتي واللي كنت اقصد بيها أنهم يعتقلوها هي اخدوها تبات معاهم في الحجز علشان بس تبقى تفكر ولو مجرد تفكير أنها تيجي جمب إياس حبيبي تاني
بااااك
- اللي انا عملته عملته علشان انا...يعني انا ... أنا بحبك يا إياس
قلتها بسرعة وانا مغمضة عيني لما ملقتوش اتكلم فتحت عيني براحه لقيته فتح في نوبة ضحك
بصتله بغيظ - تصدق انا غلطانه إني قلتها أصلاً
اتكلم وهو بيحاول ياخد نفسه من الضحك - ليه بس كده ده حتى محدش قالها بالطريقة اللي قلتيها دي قبل كده
- أنت رخم يا إياس
قلتها بضيق منه وانا بودي وشي الناحية التانية بعيد عنه
مد أيده مسك أيدي - خلاص متزعليش يا قلب إياس
بصتله بضيق - يرضيك كده طب
- لا ميرضنيش وعلشان ميرضنيش لما نروح هعملك الآيس كوفي اللي بتحبيه
بصتله بفرحة - بجد يا إياس
ضحك وقالي- بجد يا قلب إياس
اصل انا بحب الآيس كوفي أوي من ايد إياس بيعملوا بطريقة تجنن
أكلنا وقلنا نتمشى شويه
- تعرف يا إياس انا كنت مفكره إني عمري ما اجتمع بيك تاني كنت كل يوم اقول لو هو من نصيبي قربه ليا يارب ف اقرب وقت
حضني وقال- وانا كنت كل يوم أدعي واقول " اللهم إنك خَلقت حواء من ضلع آدم فَ هي الوحيدة التي أشعر أنها خُلِقت من ضلعي فَ يارب أجعلها من نصيبي وأجعلها زوجه صالحة ليا يارب "
تمت