رواية المتمرد علي قوانين الحب الفصل الرابع4 بقلم منة الله الجزار
عند جمال كان صحي ودخل الحمام يتوضي عشان يصلي بعد شويه خرج وراح صلي ولبس نادي علي جميلة عشان تعمل ليه فطار قبل ماينزل علي الشغل.
جمال.. جميلة حبيبتي جهزي الفطار عشان انا اتأخرت.
مسمعش صوتها كان واقف قدام المرايا واستغرب ليه مردتش عليه راح ناحيه الباب ولسه بيفتح لقا بسمه في وشه.
بسمه.. صباح الخير يا ابيه كنت بتنادي علي جميلة؟
جمال بهدوء..صباح الورد اه هي فين؟
بسمه.. شكلها عند ابله زينب عشان مش موجوده في البيت.
جمال بضيق.. بس طنط زينب زمانها في الشغل وعمو عبد المحسن مش بيبقي موجود دلوقتي مفيش الا زياد اللى بيبقي في البيت.
بسمه بتوتر وبتفرك في ايدها.. لا مانا سمعت ابله زينب بتنادي عليها يمكن عشان كدا راحت.
جمال بغموض.. وانتي مالك متوتره كدا ليه؟
بسمه بتوتر اكبر.. اتوتر ليه يا ابيه بس الجو حر عشان كدا بس.
جمال.. طيب روحي ناديها.
بسمه.. حاضر وجريت من قدامه اكنها كانت في سجن وخلاص افرجو عنها فيه.
راحت وفتحت الباب وهي بتمتم.. احيه عليكي وعلي اليوم اللى جيتي فيه لو جمال عرف اني كدبت عليه وان زياد لوحده في البيت.
قفلت الباب ومشيت ناحيه شقة زياد وخبطتت.
❤❤❤❤
عند جميلة بصتله بزعر.. وهو بصلها ببلاهه
زياد.. انجزي خدي الكوبايه بتاعتكم وامشي لاني عاوز انام.
جميلة ثواني معدوده وهي مصدومه فكرت هيعمل فيها حاجة بس لا ده بيتكلم عادي.
زياد بضيق.. هتفضلي متنحه كدا انجزي خديها.
ودخل الاوضه وفتحتها ودخل اترمي علي السرير وحط المخده علي دماغه ونام.
جميلة دخلت وراه بتردد وكانت خايفه بس لما شافته نام وبصت علي الكوبايه بغيظ.. حتي مش عارف تغسلها يا منتن.
اتكلم من تخت المخده.. ببرود.. جميلة انجزي عاوز اتخمد وبعدين اه انا منتن خدي الكوبايه وخدي الباب في ايدك وانتي ماشيه.
جميلة بغيظ.. كانت هترد عليه بس سمعت خبط الباب خافت لحد يكون من اهلها او من الجيران يشوفها عندهم ويفكروا فيها وحش لان الكل بيبقي عارف ان زياد لوحده في البيت ومينفعش تكون بنت مع عازب ومقفول عليهم باب ولوحدهم وهما في منطقه شعبية والف لسان هيتكلم مش هيتكلمو عليه هو لكن هيلسنو عليها هي.
صحت زياد تاني... زياد بأففه.. قام وشال المخده من علي راسه.. عاوزه ايه تاني؟
جميلة بخوف.. الباب بيخبط.
زياد برفع حاجب.. متنيلي تفتحي.
جميلة بغيظ.. زياد ده باب شقتكم انتم وبعدين افرض حد من اهلي او من الجيران.
زياد ببرود وهو علي وشه اثر النوم.. مش فاهم يعني اعمل ايه؟ ماهما عارفينك عادي؟
جميلة بغيظ.. ماهو انا عارفه انهم متنيلين عارفني بس الكل عارف انك لوحدك وانا بنت وبخاف علي سمعتي وانت عارف الجيران.
اخد نفس وطلعو بهدوء.. ماشي يا جميله خليكي هنا لحد ما اشوف مين في اليوم المنيل ده.
زياد قام من علي السرير وراح ناحيه الباب.. وهو بيقول.. جاي اهدي يلا بتخبط.
جميلة فضلت في الاوضه وكانت بتبص عليها وشافت الطفايه فيها سجاير كتير بصتلها بزعل.. يا ما نفسي ترجع زياد القديم اللى حبيته بجد.
راح فتح لقاها بسمه اتكلم بهدوء.. خير يا بسمه حد بيخبط كدا؟
بسمه برعب.. فين جميلة؟
زياد كان هيتكلم ويقول انها مش موجوده هنا بس بسمه قاطعته.. عارفه انها هنا قولها تخرج جمال بينادي عليها وهيكسر دماغنا لو عرف انها معاك لوحدكم.
زياد وسع ليها وشاور ليها بايده انها تدخل.. اختك جوه.
بسمه دخلت ونادت عليها براحه عشان جمال ميسمعهمش.. جميلة انتي فين يا زفته؟
جميلة خرجت من الاوضه وهي بتتلفت.. بسمه.
بسمه برعب وغيظ.. ده كله بتجيبي الكوبايه اللى تتكسر علي دماغك انتي وهو جمال بينادي عليكي وانا كدبت عليه وقولت ان ابله زينب هي اللى ناديتك وان زياد مش لوحده امه كمان معاكم في البيت انجزي.
كل ده وزياد واقف علي الباب وبيتاوب.. جمال فتح الباب لما استغرب هما اتاخروا ليه وكان كمان نازل عشان شغله وفي نفس الوقت ده كانت طالعه زينب علي السلم جميلة وبسمه وزياد بصو لبعض بخوف.
جميلة حطت ايدها علي خدها برعب.. احييييه.
بسمه فضل جسمها يترعش ومكنتش قادره تتنفس وحاسه ان خلاص اخرتها علي ايد اخوها انهارده وزياد كان خايف عليهم هما برضو بيعتبرهم اخواته البنات وكمان مش عاوز جمال يفهم الموضوع غلط.
جمال بستغراب.. طنط هو حضرتك مش جوه وبص ناحيتهم بغضب.
زياد.. بسرعه.. ماما لسه نازله دلوقتي والدكتور قال ليها اطلعي وانزلي اكام مره عشان رجليكي تفك وقرب من امه واخدها في حضنه وزينب مكنتش فاهمه حاجة قال بيساعدها تطلع.
جمال.. الف سلامه عليكي يا طنط.
زينب.. حست ان في مصيبه ابنها عاملها عشان كدا كدب وبصت ناحية باب شقتهم لقت جميلة وبسمه مسكين في بعض بخوف كدبت مع ابنها.. الله يسلمك ياحبيبي معلش يابني السن بقا.
جمال باس راسها.. ربنا يديكي الصحه يارب ويطول في عمرك.
زياد.. يلا يا ماما انتي تعبتي اوي انهارده وشكرا يا جميله انك ساعدتي ماما في البيت.
جميلة ابتسمت بتوتر.. اخدمها بعيوني.
زينب بحب.. تسلمي ياقلبي ويفرحني بيكي يارب ويهدي العاصي.
زياد.. بعد اذنكم يا جماعه. واخد امه ودخل وقفل الباب.
جميلة.. اسفه يا ابيه بس طنط نادت عليا كانت تعبانه.
جمال.. تمام ادخلي.
دخلو جوه وهو نزل شغله.
جميلة دخلت الكوبايه المطبخ وغسلتها وحطتها في المطبقيه.
بسمه مسكتها من دراعها ودخلتها الاوضه بسرعه.. واتكلمت بغضب.. تعرفي اننا كنا هنقابل وجه كريم انهارده بسببك.
جميلة بهدوء.. عارفه بس ولله غصب عني.
بسمه بصوت واطي وغيظ.. غصب عنك ازاي يا روح امك بت ايه خلكي دخلتي ما كان جابها ليكي من علي الباب وخلاص.
جميلة بهدوء.. اقعدي وانا هحكيلك اللي حصل كله......
❤❤❤❤
عند زياد
زينب بصتله بهدوء.. تعال كدا اقعد واحكيلي اللى حصل كله.
زياد قعد جانبها وحكا ليها كل حاجة.. انه كان واقف امبارح في البلكونه وكان عاوز شاي وهي كانت واقفه ومكنش عاوز يصحي امه وهي عملت ليه ونسيت الكوبايه عنده وجات تاخدها و بسمه كانت قايله لجمال انك انتي اللى ناديتي عليها عشان جمال ميزعقش ليها وبس.
محكاش تفاصيل.
زينب.. بشك.. بس.
زياد.. ببرود.. اه بس.
زينب.. تعرف ان انهارده هيجي العريس يشوفها تاني ويقعدوا لوحدهم.
زياد بضيق وهو مش عارف ليه.. مش هو كان عندهم امبارح جاي انهارده ليه تاني؟
زينب.. عادي يقعدوا مره واتنين وتلاته مع بعض عشان ده يابني جواز ولازم يبقي فيه راحه.. انا وابوك شوفنا بعض اكتر من مره لحد ما خلاص قولت موافقه وبعدين جميلة بنت عسوله وطيوبه و غلبانه والولد شكله ابن ناس برضو يابني ربنا يسعدها ويوافقها يارب ويهديك يا زياد يابن زينب يارب ويبعد عنك كل ابليس علي هيئة انسان ويردك لعقلك يارب.
زياد بصلها بضيق.. ليه شايفني مجنون.
زينب بحنيه حطت ايدها علي راسه.. لا انت ابو العقل كله يابني بس عقلك غايب عن الوعي وبدعي انه يرجع لوعيه من تاني يابني يارب.
زياد.. انا هقوم انام.
زينب بصتله بفقدان امل منه وقررت انها تربيه من اول وجديد وبصت عليه بمكر