رواية حظي الفصل السادس 6 بقلم سلوى إسماعيل
مهاد قالت لي سجمك انتي ماعارفه روحك قاعده مع منو ؟!
قلت ليها عليك الله انتي ماشفتي الظلم والوجع الانا شفتو من البشر لو مياده جن يبقى الشياطين نحن ..
مهاد : ياجود ماتستهتري بالحاجات دي امكن حقيقه ..
قلت ليها يازوله خليني معاها ارحم لي من البشر ..
رجعت الغرفه لقيت الوضع هادي جدا ومياده متبطحه في سريرا قلت برا كلام فارغ اركز في قرايتي ..
اخدت فتره والحمدلله ارتحت من الجاثوم وكنت باكل مع مياده ومرات هي تاكل معاي وبقول بسم الله عادي وهي قاعده ..
قلت ياجماعه يمكن الناس دي بتتخيل ..
مره كنت في باب الغرفه وبزكر في مياده ماتنسي تقفلي الباب في سرقه اليومين دي جو بنتين وبقو يقولو بسم الله الرحمن الرحيم .. اتزكرت كلام مهاد وانو انا بتكلم براي ..
قلت ليهم مالكم ؟!
قالو لي جنيتي بتتكلمي براك ؟!
م رديت عليهم جريت لمياده ميااااااده قومي ارح معاي الغرفه ...
قالت لي مالك الشيطانه المعاك ماتت ؟!
قلت ليها اموت حيلك نضااامه قومي ياخ ارح انا زهجت
قالت لي لالالا الا تخشي انتي اول ..
قلت ليها ماعليك ارح نمشي الغرفه سوا ونشوفا ..
مشينا سوا ومعانا كم وحده طبعا ام خشما خفيف ماخلتم ورتم وساقتم معاها ..
كل م اقرب على الغرفه بحس احساس الزول الح يفقد عزيز عليه فتحنا الباب ودخلنا ..
اذا به القى لا في سرير ولا في لحاف ولا اثر لاي بشر 😳
اتلفت لقيت سريري مفرش وحاجاتي زي ماهي بقيت بنادي مياااده ميااااده ..
مهاد : سكتتني اسكتي يابت انا قلت ليك مامعاك زول ويلا يلا ارح شيلي حاجاتك وارحلي من الغرفه الكئيبه دي
هم بلملمو ومابعرف انا ليه بكيييت حتى لو هي كانت خيال وله جن م بعرف لكن كانت في حالا م حصل اذتني ولا اتكلمت في زول ولا جابت لي سيره لي اي شي خارج الغرفه
كنا بناكل سوا وكانت بتقول لي صلي وبتنصحني ..
بعض البشر اكعب من الشياطين ..
رحلت من الغرفه بس كل م احس نفسي مضايقه بجي الغرفه وبحكي همومي لمياده وبحس كأنها موجوده وبتطبطب علي
يوم لاقيت الحرس وقلت ليه ياعمو انت الغرفه 25 مالا محروقه وفيها شنو ؟!
قال لي دي مش الغرفه الانتي ساكنه فيها ؟!
قلت ليه ااي ساكنين فيها انا ومياده ( قلت كده عشان م يبطبط ويحكي لي )
نطط عيونو وقال لي : اعوذ بالله من الشيطان الرجيم
قبل. 10 سنه كان في استاذ شاب في الجامعه بدرس وكل البنات بدورنو حال الشاب يعني ..
بس هو دار مياده دي وكانت من الولايات مشى لي بلدم وخطبا وعقد عليها بس البنات ماعجبم وكانو دايرين اخوفوها جابو رتينه وفكوها فيها وجرو بس الغرف دي كانت جديده الابواب والشبابيك انطبلو عليها وما++تت محروقه
مع انو نيتم كانت بس يخوفوها بس قت++لوها
زعلت على حالتا ..
وصفت ليو شكلها قال لي بس ياها زاااتا انتي شفتيها وين ؟!
قلت ليه من يوم م انت اديتني المفتاح وهي عايشه معاي كان بشر كان جن المهم انها في حالا وما اذتني بل بالعكس كانت بتنصحني ..
قال لي : سبحان الله نفس حالا وهي عايشه
انا لما اديتك المفتاح كان بالغلط كان مفروض اديك 52 وكانت بعيده والبنات لسع ماجو كلهم خفت عليك تقعدي براك لمن جيتي تاني يوم عاديه قلت خلاص احسنلك قريب من البنات ولما م اشتكيتي زي ماالبنات كانو بشتكو قلت خلاص اقعدي وكده كده قريبه من الناس ..
قلت ليه : والله كنت مرتاحه بس ماخلونا البنات وانتقلت لغرفه تانيه ..
المهم جيت اسالك بس ..
مشيت منو وكان عندنا سمنار كانو بيحضر ه كمية دكاتره الا عمار لانه في اليوم ده مابيجي ..
قررت اشارك وفعلا بدا السمنار بعد دقيقتين بس جا داخل دكتور عمار انا ماعرفت اعمل شنو !!
هل اشارك ؟!
وكده كده م عندي مفر لازم اشارك
طمنت نفسي انو 5 سنه كفيله تنسيهو اي شي مستحيل اتزكر صوتي ولو اتزكر زاتو انا منقبه تشابه اصوات ياخ لو عرفني عدييييل هو ماعارف انا هاربه من اهلي ولو عرف زاتو ماعندو حق اكلمم كل الكلام ده دار في راسي في كسر من الثانيه وخلاااص الكلام الح اقولو طار من راسي ..
وزمن البت القبليني خلص الزملاء بقو ينادوني حتى انتبهت
قمت بجرجر في رجليني بس احساس الزول المودنو لي موتو ..
بديت اتكلم في البدايه اترددت بس تاني واصلت عادي وماركزت معاه بشوفو بعاين لي زيو زي اي دكتور واقف قدامه طالب عايز يقيم اداءه ..
خلصنا وانا استأذنتا طلعت لاني فعلا م كنت قادره اقعد طلعت البنشات بره .. قعدت لحدي خلصو لاني كنت عايزه ادخل اشيل شنطتي خليتا جوه كنت مدنقره راسي وسارحه سمعت زول قال امونه اتلفت عليه لقيت ده عامر اتلفت راجعه م وصلني قال لي صدفه جميله زيك ..
قلبي بقى بضرب شدييييييد وقلت هووي يابت انعدلي وفوقي ده شعر انتي ماعندك ليهو رقبه قمت من غير اتلفت مشيت طويل على القاعه وشلت شنطتي وجيت شايفاه واقف ويديه في جيوبه وبعاين لي وشايفه مهاد مشيت عليها قلت ليها ارح ارح ..
قالت لي ياجود انتي بتعرفي دكتور عامر؟!
قلت ليها اعرفه من وين يابت !!
قالت لي سبحان الله ابوه صاحب ابوي وبجينا زمن كنا صغار لكن كبر وافترى واظن من وفاة امو تاني ماشفتو ..
قلت ليها هو يعني امو ميته سبحان الله ..
وصلنا الغرفه نمت لما صحيت لقيت رسايل من اخواتي ..
ماااالكم !!
قالو لي هببتي شنو انتي ؟!
قلت ليهم خلعتوني ياخ مالكم في شنو !!
قالو لي اتصل عامر لي يسأل عنك
قلت ليهم : ده جن وله شنو انا ماعملت شي والله كان عندنا سمنار وهو كان حاضره وشكله عرفني من صوتي م يكون بس داير يتلايق ويكلم اهلي بس ..
لين : يابت انتي جنيتي عمار ماكده والله
ليان : وعمار مابسأل ساي الا يكون في راسه في حاجه
قلت ليهم دقيييقه انا اصلا كنت عايزه اسألكم يوم عقد امي انا سمعتكم بتقولو انكم خايفين كنتو خايفين منو مالو ؟!
لين : زوجي ده ود عمو وهو عارف علاقتنا كان
ليان : طبعا يا جود ابو عمار ده هو وابوي اصحاب وابوي كان متزوج امي م انفصل عنها قام ارتبط بي صحبتا واتزوجو بالسر هو ماسر يعني لانو اهل صحبة امي كلهم عارفين بس امي واهلا م كانو عارفين والوقت داك امي م ولدتك وامي اختلفت مع ابوي في القرايه ولقاها حيله طلقا وعشان اغيظا اشهر عرسو من صحبتا وهم عندهم اولاد وبنات تاني ..
لين : وشوفي الدنيا دي سدايه ورضايه كيف لف الزمن ودار وامي زاتا اتزوجت صحب ابوي وعشان كده هي رفضت 6 سنه بعد اتدخل عامر حتى وافق هو ولد وااحد عند ابوهو وامو اتوفت بدري وابوهو تاني م اتزوج ..
قلت ليهم سبحان الله صحي سدايه ورضايه
ليان: نحن هسي ساكين موضوع اخوانا ده وانا 15 سنه م شفت بابا بي عيني ..
لين : انتي ياجود م حصل شفتيه ؟
لانك قلتي انتي قريبه من عماتي ..
قلت ليهم بتصدقوني لو قلت ليكم يعميني م شفتو وانا في حله من حلتم بتتمشي بي الرجلين لكن مابلومو لا هو لا امي م كانو عايزني ..
لين : متقولي كده عليك الله نحن كبرنا ياجود ومامحتاجين من الدنيا دي غير لمه حلوة ونفسي اشوف اخواني واخواتي متلمين وهم بخير م محتاجين منهم لاي شي
ليان : اقرب مثال انتي ياجود مالقيتي ولا زول منهم لا ام لا اب لا اخ ولا اخت واديك نجحتي واتفوقتي وشقيتي طريقك ..
قلت ليهم. : تصدقو كلامكم صاح اهم شي اللمه الحلوه دي
وانا اللمه زاتا مابتفرق معاي ..
ليان : ااي ااي عارفاك ياكلبه ممكن تتخلي عننا
لين : انا ماشفت رسالتك دي ومسحتها زاتو
قلت ليهم لا طبعا اكيد م بقصدكم انتو
عملو احببته على رسالتي وماردو
بس انا دموعي جرت مابعرف ليه
قفلت التلفون وجاتني مهاد ياجود قومي امرقاكي مُهيد جاي عازمنا غداء .. قلت ليها امشي براك مع اخوك ..
قالت لي يابنت انتي غبيه هو جاي مخصوص عشانك ..
قلت ليها ياااخي وعرفة متين ؟!
قالت لي والله قال لي عندو موضوع مهم عايزك فيه ..
قلت ليها : عليك الله يامهاد انا مافيني اي حيل وبكره عندي حجز عروس اليوم خميس بخلص المحاضره وبمشي ليها بدري
مهاد : عايني الموضوع ضروري ومافي طريقه الا تجي
لبست وطلعت معاها اطنطن ..
اول ماركبت العربيه جاني اتصال رفعت التلفون ....
جاني الصوت ...