رواية ضماد جرح الفصل الثالث والعشرون 23 بقلم نوسه حمد
فاتن لمن شافتني انخلعت وقالت لي نوووووسه حبيبتي وجات جاريه علي سلمت علي بشوق وانا من الدهشه م قادره ابادلها نفس الاحساس الولد الجيت معاهو لمن شافا جا جاري علينا وسالها قال ليها بتعرفيها قالت لي نوسه دي اختي الما ولدتها امي قلت ليها فاتن دا منو قالت لي سوري نسيت اعرفك دا مهليم زوجي انا بقيت منططه عيوني يعني فاتن طلعت بت عمي وما اندهشت سمح جات مياده وفديه لمن شافوني ابنسطو شديد قالو لي لينا زمن بنفتش ليك وماعارفين مكانكم الجديد وين وكان نفسنا تحضري معانا عرس فاتن شكلها فاتن عروس قلت ليهم معليش الظروف حكمتني وقالو لي جيتي هنا لشنو مهيلم قاطعهم قال ليهم دي تبع الشغالين في الضيافه مياده قالت ليهو نوسه دي بتي واكتر بت امينه شفتها في حياتي شكلها فاتن مشت كلمت فادي وطبعا فادي بقا ملتزم شديد من بعيد سلم علي وكان متاثر شديد لمن شافني بلبس الشغل افتكر لسه شغاله في البيوت قلت ليهو فادي كيفك قال لي في نعمه ي نوسه انتي كويسه وعمي كيف قلت ليهو تمام الحمد لله نحنا قال لي جيتي هنا لشنو قلت ليهو لشغل يا فادي قال لي نوسه رايك شنو افتح ليك مكان تشتغلي فيهو ولا تجي تشتغلي سكرتيره عندي طوالي مهليم قال ليهو لا لا سكرتيره شنو السكرتيره عاوزه مواصفات دي م بتعرف الا في خدمه البيوت فادي قال ليهو خدمه البيوت مالا طالما شغل شريف ومافيهو غلط تشتغل طوالي قال ليهو م قلنا حاجه بس كيف تقول عاوزه تشغلها معاك بقو اتناقشو وانا مشيت منهم رغم اني جيت عشان اعمل مشاكل واغلغلهم زي م انا متغلغله بس مياده واولادها كسرو مجادفي وانا زمني دا كلو بتهرب من فادي عشان م قادره احكي ليهو الحقيقه بقيت افكر اعمل شنو عشان ترجع حياتي طبيعيه واهلي ينسبوني ليهم واتخلص من العقده الجواي
ودخلت جوه وبقيت قاعده اعاين في الناس البت الشغاله قالت لي انتي جيتي عشان تعايني لينا اشتغلي معانا قلت ليها جيت اعاين م عايزه اشتغل بقت تتناقش معاي قلت ليها اسكتي انتي لو عارفاني انا منو م بتتكلمي انتي هبله ولا شنو اشتغلي شغلك انا لو عايزه اشتغل ما غالبني قالت لي في النهايه خدامه قايله روحك شنو شايفاك سرحتي بي خيالك وصدقتي انو الناس السلمو عليك ديل بحبوك النوعيه دي م بتحب الا نفسنا نحنا عندهم مجرد خدم نخدمهم وانتي م بتعرفي صاحبه البيت دا ممكن هسي لو سمعتنا تجي تطردك قلت ليها تطردني ليه انا عندي في البيت دا زي م هي عندها واحتمال اكتر قعدت تضحك قالت لي يختي انتي م طبيعيه ولو م دخلتي يدك معانا والله اخليهم يطردوك قلت ليها جربي كدي البت قادره بقت تكورك ياخالتو سهام قلت ياربي سهام دي شنو طوالي جات اللهيا امي قالت ليها م تكوركي لي اشتغلي شغلتك قالت ليها البت الشغاله جديد ابت تشتغل قالت ليها ياتا اشرت ليها علي جات وقفت قدامي قالت لي ليه م عايزه تشتغلي انتي عاوزه شنو م رديت عليها بقت تكورك فيني قلت ليها طيب ح اشتغل ان شالله وبقيت اغسل في الكبابي البت قعدت تضحك ضحك قالت لي اتفاصحتي ساي جات ست الشي وهرشتك. قلت ليها انا هسي بشتغل بس عايزاك تتزكري حاجه واحده ح يجي يوم وح اجيك داخله واقول ليك حضري لي كبايه شاي قعدت تضحك قالت لي بتحلمي انا احضر لي خدامه زيي كبايه شاي انتي شكلك موهومه جابوك كيف انا م عارفه وبقت تعاين لي بي استفزاز وشكلها هي شغاله عندهم من سنين معتمدين عليها في كل شي طبعا الولد الاسمو مهيلم اشيل ويحمر لي بقا خايف مني لانو عرفني اني بعرف اسره عمو الانا كذبت عليهو وقلت ليهو دا ابوي وهو م عارف انو انا اختو الغير شرعيه فجاه اتزكرت انو ناس خالتو مياده كانو مسيحين طيب معناتا اهلي زاتهم مسيحين ولو مسيحين ابوي ليه جدعني اكيد م فارقه معاهم بت حلال ولا بت حرام وبقيت اسال في نفسي وجاني فضول اعرف هل هم مسيحين زي ناس خالتو مياده ولا لا واسال منو وكيف اتزكرت فادي ولازم انا اتكلم معاهو وبعد عرفت اهلي وبيتهم بدل اشتغل خدامه احسن اشتغل مع فادي في العياده واعرف عنهم اي شي ولو ادعا الامر ح احكي لي فادي باي شي وبقيت اعاين للناس والعز الفيهو والناس ديل شده م شبعانين م حاسين بالنعمه الهم فيها ابوي حرمني من النعمه دي بس برضو م نفسي اعيش في الجو دا م اظن اكون مرتاحه وانا م جيت عشان اعيش معاهم انا جيت عشان اكون لي اهل الحفله قبل م تنتهي فاتن قالت لي زوجها الا تخلي نسيبه تشتغل معانا انا محتاجه ليها قلت ليها لا يا فاتن انا م عايزه اقعد عند ناس عاوزه اشتغل باليوم لو احتجتيني ح تلقيني اخت ما شغاله وبقت تتونس معاي وتضحك وتحكي لي بمهيلم زوجها شكلها بتحبو شديد وهو زاتو شكلو محترم شديد
مهيلم بقا خايف مني ولحقني جوه المطبخ قال لي شوفي ي نوسه لو فتحتي خشمك بالكلام القلتي لي انا م ح ارحمك انا ندمت اني دخلتك بيتنا ولو كنت عارف عندك معرفه سابقه بي ناس عمي م كان جبتك هنا قلت ليهو م تخاف انا م ح اعمل مشاكل م عشانك عشان انا بحترم فاتن جدا وامها زوله م ساهله وانا م كنت عارفه انو ابوي ابو فاتن مع كلامي دا فادي جا داخل بقا يعاين لي ويعاين لي مهيلم ومهيلم بقا يتمتم وفات خلاهو واقف وانا بقيت ارجف حسيت فادي سمع الكلام وخلاص المعاي كملت فادي ماعارف الحقيقه الانا دسيتا مهيلم طلع فادي قال لي نوسه الكلام السمعتو دا حقيقه قلت ليهو ياتو كلام لا يا فادي انت ما تفهم غلط انا بحكي ليك قال لي انتي اختي معقوله وليه انا م عاينت للشبه انتي تشبهي حبوبتي قلت ليهو فادي وليه م بشبه ياسر فادي دقيقه افهم قال لي افهم شنو افهم انو الحبيتا ورفضت كل البنات عشانا تطلع اختي اختي كيف ي نوسه انا ح اجن وبقا يستغفر قلت ليهو فادي اقسم بالله دي م الحقيقه انا ح احكي ليك الحقيقه بس خليني اطلع من البيت دا قال لي حقيقه شنو انا ح اموت انا كنت بحب اختي وليه م حسيت انك اختي معقوله نوسه استغفر الله انا ح اجن قلت ليهو فادي انا م اختك انا بت ياسر واخت مهيلم ودي الحقيقه الانا م قلتها لي مهيلم عشان اجي داخله البيت دا وقلت اني بت ابوك الانا م عارفه أسمو عشان اصل لي اهلي
فادي انا ح احكي ليك بس ممكن هسي تطلع وما تتكلم بالانا قلتو ليك وساعدني يافادي الله يرضا عليك قال لي طيب ي نوسه انا م ح اقعد وح ارجع البيت ياريت ترجعي لي بتلفون انا حاسي انو راسي ح ينفجر حسيتو منزعج ومضايق مني شديد وطلع انا غلبني البعملو وبقيت ارجف ووقعت العده كلها لمن اتكسرت وجات سهام تكورك فيني وطردتني ولفت نظر كل الناس ولمن طلعت لاقاني ياسر في وشي انخلع شديد قال ليهم موش انا محزركم ما تدخلو شغاله من غير اذني وطردني ولحقني في الشارع قال لي الجابك هنا شنو جيتي عشان توريهم الحقيقه اياك تعملي لي مشاكل مع اسرتي انا مستعد اديك اي مبلغ تطلبيهو بس ابعدي عني وعن بيتي واولادي قلت ليهو انت خايف ليه لو بتخاف م بتغلط بدل الغلطه ميه غلطه ومستعده تغلط الف مره ولسه لا توبتا ولا بتتوب قال لي انتي مجنونه انتي منو عشان تحاسبيني اغلط ولا م اغلط اياك تعتبي البيت دا تاني لو جيتي هنا تاني م ح تعيشي يوم في الدنيا دي قلت ليهو ياريت تكون ريحتني واختصرت علي المشوار قال لي بحزرك للمره الالف انك تعتبي البيت دا تاني وبديك اي مبلغ تطلبي فادي قال ليهو ليه م تعتب البيت تاني خايف من الفضيحه وما راعيت لي اي شي كان تعمل حساب والمستور بنكشف انا بقيت مخلوعه فادي بتكلم عن اني بت ياسر وياسر بتكلم عن مشكلة ميار وحملها منو بقيت محتاره افهمهم كيف الله يستر فادي ح يعرف حقيقه داساها منو وياسر ح يتفاجأ اني بتو ……………..يتبع