رواية بينهما الفصل الثاني والعشرون 22 والاخير بقلم ال زهراء
قال ليهو مظفر مودة أمانة في رقبتك وتاني شهدوهو ومات،بعدها أعمامي قال الا يتزوجها!!!، انا عاينت ليهو وهو طوالي قال موافق وانا بقييت اصرخ صحييت مخلوعة شديد من الحلم دة ولقيت نفسي مرقدة في الطواري، قولت اخر مرة متذكراها اني مشيت المستشفى، مودة جات وقالت لي الف سلامة عليك جاتك حمة لمن دوختك وبقتك تهلوسي وطلعت عندك ملاريا!!، قومت وعاينت ليها وقولت ليها وانا خجلانة ما يكون صوتي كان واضح، قالت لي لا بس كانك كنتي قاعدة تحلمي بحاجة مزعجاك لانك بتئني ،قولت ليها اي والله انزعجت ما اكذب، قولت لروحي خاصة منك انتي المسكينة الما حصل فتحت خشمها مع زول بحرف ولا كمان بقيت علي المدير وهو علي في أميركا بولدو ويا حليل ابو مودة القتلتو، قولت ليها وريني اخبار ابوك شنو ؟؟!، قالت لي الحمة دي لسه فيك، ضحكت وقولت ليها لا بس عايزة اعرف اخبار عمو، قالت لي الحمد لله بصحة وعافية! قال السعودية راحات جد، قولت ليها تاني ما بجي،ضحكت، قولت في نفسي كدة ارتحت!!، قالت لي اخدي راحة اسي انا كلمت ليك رماز وحا تجي عشان تسوقك!، قولت ليها تمام بس اقعدي جنبي عندي معاك موضوع، قالت لي شنو؟؟!، قولت ليها اتكلمتي مع مزمل، خجلت وقالت لي ما عايزة اتكلم الا يوم العقد، قولت ليها طيب هو قال دقيقة ما فارقة، قالت لي معليش بس ما بقدر الا يوم يعقد علي، قولت ليها طيب تمام، طبعاً انا رشحت ليهو مودة! بت مافيها كلمة! لطيفة ومتدينة ومسكينة وبتنفع مع مزمل متأكدة بس هو مصر تتكلم معاهو وهي قالت ما حا تتكلم معاهو وهي عايزني اقنعها دي كانت آخر محادثة بيني وبينو وانا ماشة المستشفى وانا قولت ليهو فيها لو ما مقتنع خلي الخطبة بكرة يعرسها ود عمها ،قال لي منو؟؟ على حد علمي متزوجين ولا قصدك مظفر. قولت ليهو ماف غيرو متأكد، قال لي اي بس انا اصلا ما عندي نية اخليها لاي زول وتاني مرة ما تقولي لي كلام فارغ زي دة +منتظر منك اقناعها وحا ارجع ليك بعدين واشوف الحصل، ققل الخط في وشي وانا بقيت راسي جايط وبسببو الهالاويس دي جاتني ما حا اسامحوا، مودي الحلوة اللطيفة ضربتني كف في حلمي ،وانا عملت أحقر عملة مع مظفر! ياخ انا مستحيل ما اعالج زول حتى لو ما كان عندو اورنيك.
اتصل بي مزمل رديت طوالي قولت ليهو متصل لي بشنو عارف قبييل....، قاطعني وقال لي ما فاضي لكلامك الكتير اختصري ووريني قالت ليك شنو ، قولت ليهو ما اتكلمت معاها، قال لي لشنو؟؟!، قولت ليهو بهظر هي رفضت،قال لي جهزي نفسك الأسبوع الجاي حا يكون في عقد!، قولت ليهو بالسرعة دي موش قولنا بعد 6 شهور، قال لي انا بحترم رايها وبحترم ثباتها على مبادئها وعايزها لي ،قولت ليهو ومنذر رايو شنو ،قال لي ما بعرف اساليهو لو عايز يعقد ،قولت ليهو هاله ما اظن توافق بس بشوفها لكن متأكدة انو مودة ما حا يكون عندها مشكلة ،قال لي ايوا دي اختي البعرفها حا ارجع...، قولت ليهو ما ترجع لي نهاي مع السلامه انا برجع ليك هو قايل ساهلة المواضيع دي خليني ارتب أفكاري اول، قال لي تمام.
جات رماز وقالت لي ورح البيت ،قولت ليها اخر درب ونمشي، اتصلت بي نرجس رديت قالت لي كيفك؟؟!، قولت ليها تمام الحمد لله ،قالت لي حسك تعبان ما تكوني بكيتي بعد مشيتي مننا انا شاعرة بالذنب ما مفروض اجيبك، قولت ليها ابكي لشنو انا عيانة بس قالت لي يا ساتر مالك؟!، قولت ليها حبيبتي الملاريا، قالت لي ابلعي فيتامينات كترت عليك، قولت ليها الا كدة اها مع السلامه ،قالت لي دقيقة دقيقة صوت الجوطة دي وين ؟؟!، قولت ليها انا في الطواري وقعت وحمتي كانت مرتفعة واسي باقي لي درب وامشي البيت طوالي، قالت لي حا نجيك، قولت ليها والله بس يكمل الدرب دا ماشين ماف اي حاجة مقعداني، قالت لي نحن قريبين حا نجي.
جات ومعاها مظفر وكان باين انو مقلق علي، قال لي بقيتي كيف؟!، قولت ليهو كويسة الحمد لله ،قال لي انتي مرهقة نفسك زيادة على اللزوم، قولت ليهو جسمي اتعود ،قال لي عشان كدة كل يومين مرضانة، بعدها اتكلم واتكلم واداني محاضرات طويلة عريضة! وانا كنت ساكتة، نرجس قالت ليهو كفاية!، سكت وقعد! بعد انتهى الدرب وصلوني لبيتي ،كان عايز يتكلم بس تاني أتراجع وركب العربية ،نرجس قالت لي ابلعي حبوبك في وقتهن واهتمي بنفسك مع السلامة، قولت ليها الله يسلمك.
بعد اسبوع بقيت كويسة وكان عقد مزمل على مودة! مزمل كان مبسوط وفرحان والله مرات بشك انو دة اخوي، بتذكر اول يوم كان معترض على حكاية الترشيح دي بس تاني وافق انو يعمل النظرة الشرعية وتاني بعد حصلت بقى معلق فيها وقال يتمو الخطوبة! ،وبعدها ياهو كان بنق فيني بس عشان يتكلم معاها بس بعد رفضت قرر يعقد مرة واحدة، قولت ليهو مزمل الواحد ما مصدق انك الكنت ما داير ترشيح كلو كلو ،قال لي ما حا القى زيها في النظرة الشرعية انا انبهرت بمقدار فهمها ورزانتها +كلامها كان كلو في محلو وشروطها كانت بسيطة بس كانت كفيله تخليني معلق فيها وما داير غيرها، قولت ليهو شروطها كانت شنو ؟!، قال لي الصلاة و الاستقامة والأخلاق الحسنة ،قولت ليهو كويس شديد.
لمن انتهو العقد مشيت اشوف مودة كانت جميلة شديييد!، قولت ليها اخوي لو شافك اسي بقول الا يتم العرس، ضحكت وقالت لي ما للدرجة دي.
طلعت برة وبقييت اتنفس جاني مظفر وقال لي بقيتي كيف؟؟!، قولت ليهو الحمد لله وبقيت اعاين في تلفوني، قال لي ممكن تخلي التلفون دة دقيقة خليتو قال لي وُد انا بكرة مسافر مفروض اسافر لي زمن بس الطيب دة خرب حسابات الصيدلية، قولت ليهو ايواا انت عارف بسبب الحاجة دي حلمت حلم بشع خلاص فكرت انو مشكلة مع زول ومشيت ضربتو وهو ضربك!! ،ضحك وقال لي متين؟؟!، قولت ليهو زمان وما بس دة انا الفت سيناريو كامل متكامل!! لدرجة اني حسيت نفسي في فيلم هندي عديل!!، ضحك ضحك شديد وقال لي احكي لي، حكييت ليهو!! الجزئية حقتو بس طبعا خجلت من حقت مودة!، قال لي والله في الحلم قاسية، ضحكت وقولت ليهو اتخيل كمان انو شكيت في انك شغال شغل غير الصيدليه، ضحك وقال لي يعني حا اشتغل شنو ؟؟!، ضحكت ضحك وقولت ليهو ما بعرف! دي الملاريا ما انا نهاي، قال لي اهااا وتاني حصل شنو ؟ ،قولت ليهو صحيت بس وانبسطت انو طلع حلم ،قال لي والله ياخ ما نصيحة نهاي ضرب خياطة من غير بنج اورنيك، قولت ليهو دا حلم واكيد ما واقعي والظريفة في الموضوع انو مودة المسكينة جات وادتني كف قال لي لشنو؟! قولت ليهو عشان انا صرخت فيك ،قال لي اها وتاني ،قولت ليهو فجاءة كدة جاء مشهد انو عمي مرقد بتليف كبد ، قال لي لا عليك الله دي جاتك كيف في النص ،قولت ليهو احتمال عشان قبل ما يغمى علي كنت مراقبة واحد بتاع تليف كبد المهم خليني اتابع قال لي اها تابعي قولت ليهو دخلنا جوة ولقيت كل اعمامك وبعدها ابو مودة الكان داير يموت قال ليك البت دي أمانة عندك واعمامك طوالي قالو تتزوجها!! ،وانت لانك طول عمرك خاين طوالي وافقت ،في اللحظة دي ضحكاتو بقت عالية، قولت ليهو تضحك لشنو دة بثبت انك حتى في هلواساتي خاين! ،قال لي دة شعور جواك بس عشان كدة حتى في أحلامك بنعكس! ،ما رديت وقومت وقولت ليهو لحدي هنا وكفاية ضحكتك وغيرت ليك جو اعتبرها هدية وداع! عشان المرة الفاتت ما ودعتك، قال لي انتظري دقيقة!، قولت ليهو في شنو؟!، قال لي في زول في حياتك، قولت ليهو ما تعمل لي الحركات دي انت نرجس اكيد مكلماك باي حاجة بتخصني، ضحك وقال لي بت لسانها أطول منها ، قولت ليهو انت غبي عشان كدة دة الرد المناسب ليك بقيت ماشة وقف قدامي وقال لي حا اندم لو ما قولت الكلام دة وُد انا ما قادر أتقدم في حياتي من غيرك وما حاس باي طعم ولا معنى ليها من غير وجودك كل انجازاتي الانجزتها بالنسبه لي صفر وانتي ما جنبي، ما كنت عايز اتكلم وافتح الموضوع دة تاني وكنت بس عايز اعيش على ماضيني معاك عشان يكون دا عقابي بس ما قادر اتحمل اكتر ممكن ترجعي لي؟؟، بوعدك انو ما ازعلك ولا في يوم افكر اعاين لغيرك ولو خيروني بينك وبين ميه مرة حا اختارك في كل مرة وما حا اخلي اي زول يكون طرف تالت بينا ،قولت ليهو خليني افكر، بحلق عيونو فيني وقال لي حا اديك كل وقتك، قولت ليهو بنبرة حادة للوقت داك حا تقعد هنا في السودان، قال لي ما عندك اي مشكلة.
بعد كم يوم وانا شغاله في محاضرة الباب دق دخل الدكتور فتحتو جاء مظفر الدكتور قال انا ما قولت ليك حا اجيب ليك الزول العمل دواء جديد لمرضى التهاب الكبد الفيروسي نوع b وطور فيهو ،يلا رحبو معاي بدكتور مظفر الهادي احمد خريج جامعة الخرطوم صيدلية، اشتغل في شركة....، وقدر يصنع النموذج الأولي من العقار وحاز على براعة اختراع وتاني سافر السعودية وطورو مع شركة هناك لمن بقى اسم معروف!.
مظفر بقى يتكلم انو كيف بدا من الصفر وكم مرة فشل في الحاجة دي لمن قدر ينجح ، واتكلم عن الناس الوقفو معاهو واحد واحد لمن قدر ينجز وذكر اسمي من ضمنهم،قولت في نفسي يبقى ديل الإنجازات السافر عشانهن.
بعد انتهى كلام جاء وقعد في بينش الاولاد وحضر معانا المحاضرة لمن انتهت قال للدكتور ممكن اسالهم ؟! ،انا طبعا كنت مطمنة شديد لأنو لو عايز يكسبني مستحيل يقومني بس خيب امالي لمن قال وُد مبارك قومي، بقى يسال فيني ؟!وانا اجاوب في النهاية سالني اخر سوال، قولت ليهو ما عارفة، قال لي المرة الجاية تعرفي اقعدي ،قعدت وانا مستاءة.
بعد طلعنا برة هو لحقني ،قولت ليهو ما تلحقني، قال لي كنت عايز اختبرك بس ،قولت ليهو كدة لكن!! قال لي اعرفك كيف فاهمة ولا لا، قولت ليهو ياخ بكرة الأسئلة بتوتر عديل ،ضحك وبقينا ماشين مع بعض، فكرت انو انا ما مفروض اضغط عليهو عشان يقعد في السودان فقولت ليهو مظفر ارجع السعودية انا كنت أنانية في اني قولت ليك اقعد انت هناك عملت مكانة، قال لي انا ما بحب اعيد كلامي بس حا اعيدو عشان ما اظن فهمتي من اول مرة انا مكانتي ديك ولا حاجة مقارنة بانو اكون معاك، قولت ليهو حا تخلي شعلك وكل أحلامك عشاني ،قال لي اي ماف حاجة اهم منك ولو خيروني بين اي حاجة في الدنيا دي حا اختارك انتي، قولت ليهو طيب تمام بس انا ما حا اخليك تقع في الخيار دة شغ...، قاطعني وقال لي ما ترفضي، قولت ليهو خليني انتهي من كلامي، قال لي ما عارف كلامك دة حا يوصلنا لنفس النقطة ،قولت ليهو مظفر اصبر عليك الله وخليني اتكلم ،قال لي تمام، قولت ليهو انت شغلك هناك عشان كدة لازم تسافر بس المرة دي ما حا تكون براك انا معاك ورجلي في رجلك ولو بس فكرت تعاين لمرة تانية غيري ما برحمك، قال لي وجامعتك، قولت ليهو عندي فرع هناك وانا مبسوطة انك مقدم مصلحتي على مصلحتك ،ما اتكلم وشرد فيني مسافة، وتاني قال لي ما اكون اانا المرة دي الحلمان، ضحكت وقولت ليهو لا دة ما حلم، وتاني قولت ليهو على سيرة الحلم في حاجة داساها منك، كلمتو انو نبدتو شديد في حلمي وقررت نهاي ما ارجع ليهو، ضحك وقال لي يبقى الأحلام بحصل عكسها يا ريت لو من زمان حلمتي بي كان اسي ما بعدنا عن بعض، قولت ليهو مظفر احسن ما نفتح الماضي لانك الوحيد الخسران فيهو ،ضحك وقال لي تمام.
بعد اسبوعين كان العرس كنت بعاين لوشي في المراية وتاني قررت اعيد ليهو حكاية زمان فاتصلت بيهو وقولت ليهو مظفر!!، قال لي وُد عايزة حاجة انا ما فاضي ،قولت ليهو ما عايزة اتزوجك!!، ضحك وقال لي خلاص اتسمكتي معاي ماف رجوع تاني وقفل، لمن جاء بقى يعاين لي وقرب مني وحضني عليهو مسافة طويلة قولت ليهو ما كلمتك في التلفون ما عايزاك!!، قال لي اها انا عايزك، قولت ليهو طيب ما حا اشتغل بيك ولا انت تشتغل بي واي زول يعيش حياتو، ضحك وقال لي دفانة انتي ،ضحكت وقولت ليهو عايزة ارجع الذكريات بس ،قال لي طيب البسك الدبلة عشان تستعدي الذكريات اكتر ولا أحميك الصالة ،قولت ليهو لازم تقلبها جد بهظر انا ،قال لي وانا ما عندي اي هظار كان عايز يتصل!، قولت ليهو مظفر ياخ بطل، همس لي وقال لي المقابل شنو ؟؟!، بوستو في خدو وقولت ليهو بحبك ،فصل مسافة وتاني بقى يتبسم براهو.
بعد مرور 3 سنين!:
العميله بتاعت وُد نجحت الحمد لله ونرجس جابت ليها ولد تاني وسمتو مازن، وانا جبت ولد وسميتو سهل ،سهل كان بشبه ابوهو باي شي حركاتو وحتى صرة وشو ههه.
صحيت من شرودي بصوت بكاءهو مشيت ليهو وشلتو قولت ليهو مالك الأيام دي بقيت بكأي كدة ولا مشتاق لابوك!، بقيت لافة بيهو كل الشقة لمن سكت، مظفر طبعا رجع السودان يجيب خالتو تقعد هنا، كل اخوات اتزوجن وهي بقت عايشة مع نرجس ومحتكراها لنفسها هي وهمام وما رضو نهاي بس نحن قومنا حرب عالمية حتن رضو يودوها زيارة.
باقي لي سنة واحدة واتخرج وامي الله يديها العافية قاعدة عشان تربي معاي سهل بس حاليا في الطائف مع رماز للولادة.
بعد يومين جابها هي طوالي استلمت سهل لأنها ما شافتو نهاي يا حلليها ودخلت الغرفة بيهو ،مظفر طوالي استغل الفرصة وجاء حضني عليهو وقال لي مشتاقين يا بت، قولت ليهو انا نهاي ما مشتاقة ليك لانو عندي نسخة هنا زيك ،ضحك وقال لي بديت اغيير، ضحكت وقولت ليهو بكرة اجيب ليك كدة بت عشان تبقى في صفك، قال لي ايوا دة الكلام !!!، دفنت راسي وانا خجلانة وقولت ليهو جات مع صيغة الكلام ما تفكر... ، قال لي لا انتي وعدتيني عايز بت ماف تغير رايي، قولت ليهو طيب طيب.
الاذان اذن صلينا وتاني صلينا النوافل قولت ليهو مداوم على التحصين صاح، قال لي اي الحمد لله ،قولت ليهو الحمد لله ماف حاجة بتجينا ونحن بنتحصن زمان كل الأمور الحصلت لينا بسبب عدم التحصين، قال لي اي والله عشان كدة لازم نعلم أولادنا من صغار الحاجة دي ،قولت ليهو اكيد يا مظفر اكيد.
قومت ومشيت شلت تلفوني لقييت مكالمات كتيرة من نرجس رديت قالت لي باركي لي اخيرا مركز الرقية اكتمل ،قولت ليها الف مبروك يا حبيبتي، قالت لي الله يبارك فيك وبالمناسبة المجموعة بتاعت التوعية من مخاطر السحر نفعت وشايفة في رسالة كتيرة جاتني وكلها عن التوبة منو وحتى اي زول فيهم قال حا يبطل السحر ،قولت ليها الحمد لله رب العالمين.
________________________
بلسان نرجس
بعد قفلت منها بقيت اتامل في أولادي وفي بيتي انا قبل 7سنين كنت وحيدة وشخصية مهزوزة مدفونة بالم الماضي والم الاغتضاب ومكبوتة ،واسي بفضل ربنا العالمين اولا وتانيا همام رجعت لنفسي وبقيت أقوى وبقييت فرفوشة وشخصيتي الزمان الضعيفة اتمحت الحمد لله.
وقفة همام معاي ودتني للنور لانو طول عمري كنت عايشة في ظلام دامس.
خالو وخالتي وولدهم دمروني بس همام انتشلني من الدمار دة ورمرم روحي وبشكر ربنا عليهو بالرغم من انو هو كان مختوت بيني وبين وفاق وكان صعب يختار بين حبو وبين مسؤوليتي اتجاهي فمرة يبعد مني ومرة يقرب لحدي ما اخد قرار انو يختارني حتى لو هي زعلت منو ومن الوقت داك ما زعلني.
وانا بفكر كدة جات وُد جارية وادست وراي وقالت لي ابوي عايز ياكلني!،جاء وكان لابس قناع حق وحش وقولت ليهو ما جادي نهاي، قومت وقولت ليها اجري منو انا بشغلو، جرت وقفت قدامو وقولت ليهو همو دا شنو كل يوم جاي بقصة جديدة ،ضحك وقال لي عليك الله رايك فيهو شنو؟؟!، زحيتو وقولت ليهو حلو بس مازن نايم، قال لي حا نوطي صوتنا انا ما صدقت انو الدكتور قال ممكن تتحرك وتجري عادي عايز اسمع صوت ضحكتها في كل البيت دة يا نرجس، وعايز اعوضها عن كل لحظة بتسألني فيها ليه ما بقدر العب مع صاحباتي واجري معاهن ،ضميتو وقولت ليهو حنين يا همام انا زاتي عايزة العب معاكم!!، بقينا نجري منو وهو جاري ورانا ونضحك قولت في نفسي بتمنى ضحكاتنا ما تفارق البيت دة نهاي.
تمت..... 🧡
______________________
*هنعوز إيه من الدنيا غير رفيق حنين!*
يَعرف كيف يجعلني أطمئن بِجواره
كأنني لم أعرف معنى الخوف أبدًا
أن لا يَهونَ عليه حُزني،
يُصبح الوَنس لِقلبي بعد سنوات من الوِحدة
أن يكون شخصًا استطيع أن أقول عنه
لقد وجدتُ ما كُنتَ أبحث عنه دائمًا🫂.
تمت بحمد الله