رواية حظي الفصل الثالث 3 بقلم سلوى اسماعيل
جيت من المدرسه سامعه الجوطه من خشم الباب وكلهم بتكلمو سوا ..
جيت لقيت لين سالتها براحه في شنو ؟!
قالت لي امي عايزه تتزوج واهلا رافضين
قلت ليها : وهي مكلماهم ليه ؟!
لين: عشان يعقدو ليها قبل تسافر
قلت ليها : ربنا يتم ليها على خير
ودخلت غيرت ملابسي وجيت اسمع في جوطتم جاء خالي وحسم الفوضى وقال ليهم من حقها تتزوج اصلا هي ماكبيره وكده كده م ضاريهم بي شي زواجا ..
ف حددو العقد متين يكون وكان اليوم يوم جمعه
امي اتمكيجت عند خبيرة تجميل جابتا مخصوص من الخرطوم لي قرى شندي واخواتي حلوين ولبسو احلى م عندهم وجو قالو لي تقومي معانا وتلبسي طلعو لي كم حاجه قلت ليهم لالا والله بطلع معاكم لكن مابلبس منكم
شعري طوييييل طبعا لمن عواره كانو بقصو لي خالاتي وتاني بقوم لكن زهجو منه وخلوه بقى بقعد فيه ..
هم شعرم ماطويل لكن مهتمين بيه ناعم واسود وكوو شعرم كوو لي شعري وبقى طويل زياده وناعم واسود رولو لي وقالو لي تفكيه قلت ليهم لالا بعد سلة روح رضيت اعمله ضنب حصان ولوني نضيف لكن علي كدوب السنين لبست وحده من العبايات الجابتم لي عمتي بشاير ..
مافي علاقه بينا وبين لبسم ..
ورفضت اعمل ميكب لكن التسريحه مغيره شكلي تمااما
جو الضيوف ومشينا نقدم ليهم البلح بعد العقد لفت نظري ولد منهم كأنه هارب من غلاف مجله ولد صلاة النبي طول وعرض واللبس ويحردو ليه القميص الابيض بعاين ليه لما انتبهت لقيتو بعاين لي خجلت رجعت البيت بهناك وبقيت العن في نفسي هسي ده يقول عني شنو ؟!
سمعت اخواتي بتكلمو
لين : م اتوقعت عامر يجي معاهم
ليان : واتخيلي احمد منصور ده ابوه !!
لين : الله يستر م يكون خشمو خفيف ويقول لابوه وله ماما تبقى مصيبه ،،
ليان : لالا م اظن انا سمعت من نسيبه انه ماعندو علاقه مع ابوه
لين: لكن ماما قالت لي هو الاقنعني اتمم زواجي من ابوه
ليان : سجمك بي كده يبقى علاقته مع ماما كويسه شديد
جيتم داخله عاينت ليهم كنت ح ارجع الاثنين نادوني تعالي تعالي ماتمشي
قعدت معاهم وغيرو الموضوع بعدها نادونا للتعارف مشيت مع اخواتي وكل م اعاين لتوتر اخواتي اعاين لي عامر القاه بعاين لي ..
بدت التعارف امي وبقت تقول في اسماء اخواتا وحده وحده وبناتم واتلفتت اخر شي قالت ليهم ديل بناتي وأشرت علينا
قلبي عمل شححححح 💔
قالت ليهم دي لين بنتي الكبيره ودي ليان ودي امونه
عامر كان مركز شديد ..
زوجها ناداني تعالي ي امونه
جيت سلمت عليه قال لي اقعدي وكان قاعد في السرير جمبو عامر مشى نهاية السرير انا قعدت وجسمي كلو عرقان عديل خوف عديل ..
قال لي انتي مابتعرفيني طبعا الامورات ديل انا لاقيتم كتير في المستشفى انا وامك شغالين سوا .. عاينت لامي لقيتا متوتره اظنها خايفه احكي ليه يحليلا ..
قلت ليه اااي انا متعلقه بي حبوبه شديد عشان كده م سافرت مع امي ..
قال لي ياسلاااام حاجه جميله شديد وانتي الان بتدرسي وين ؟!
قلت ليه ممتحنه في الاسبوعين الجايات ديل ان شاءالله
قال لي لالا تمام ح اسجل رقم تلفونك واتواصل معاك ..
قلت ليه تمام وقمت مشيت على اخواتي ..
انتهى اليوم وكان الزمن متأخر خالي قال ليهم تبيتو
وفعلا بيتو المساء عملنا شاي اللبن والزلابيه بعد المغرب طبعا بنات خالاتي كلهم ابواتم مانعم اطلعو بعد المغرب ولا بيت حبوبه ولو مات زول مايمشو الوفاء ..
ف بقينا انا واخواتي الاتنين نوزع في الشاي على الضيوف خلصناهم ومشو بقو بس العريس وولدو واختو وخال العريس وامو ..
امه في عمر حبوبه ..
حبوبه قالت لي شيلي الدهنه دي وقومي امسحي للحريم ديل كرعيهن ( عندنا ده تمومة الكرم ) شلت العلبه وجيت على المره ..
قلت ليها حبوبه كيفك .. قالت لي حبابك انتي امونه مش قلت ليها ااي قالت لي تعالي جيتا وبقت تتونس معاي كانت متبطحه وانا قاعده جمبها في المقعد في الحوش بره
فتحت العلبه وبقيت اونس فيها وامسح ليها في رجلينا ومسحت لي بتها اول شي حلفت لكن قلت ليها دي تمومة الكرم عندنا ..
مشيت منهم لاقيت عامر في خشم الباب قال لي لو سمحتي .. هاك التلفون اديه عمتي كنت بحاول اشيلو من غير المس يدو وكان ح يقع التلفون مسك يدي والتلفون سوا
قال لي بعد تخلص جيبي معاك ووقف عادي م كان بيعاين لي زاتو ..
بس انا كنت زي الهبله نططت عيوني ومشيت سريع اديته لعمتو خلصت وشلتو رجعتو ليه ورجعت لقيت اخواتي واقفين بعاينو لي ..
م سألوني وانا من غير شي متعقده ..
رجعت البرنده ونمت طوالي تاني يوم ودعناهم وطلعو وانا كنت بفكر في الامتحانات بس قلت ده كلو كلام فارغ وباكر يفوتو ويخلوني برااي وارجع اتعود عليهم وابكي ساي
تمو ال 20 يوم بتاعتم وسافرو ..
قبل سفرم بي يوم انا لقيت مفاتيح شنطتي ناقصين واحد ..
قلت امكن وقع لانو انا بختو في جيب شنطة المدرسه والجيب مقدود ربطتو بي حبل وبقيت بغزو في العرش حق الراكوبه عشان م انساه تاني ولا يضيع ..
يوم سفرم انا كالعاده كنت في المدرسه وم عارفاهم زاتو مسافرين جيت من المدرسه بدري شويه لقيتم ماف 💔
انا العبره سدت حلقي ودموعي بقت تجري غصبا عني
وفارقين معاي اخواتي شدييييد 14 سنه وانا م شفتهم بي عيني بس ال 20 يوم دي خلتني احس كأنهم مافارقوني من حنيتم وطيبتم 😭
اليوم داك القعده مسخت لي شدييييد وبقيت شايفه البيت مابتقعد قمت اغير هدومي سامعه حبوبه توري في خالاتي شوفي يختي خلت ليها سلسلا اللابساهو وقالت فيهو 25 جرام جنت هسي الشوم دي بدوها شي ..
قومي ابت لميهو لي في التمنه ( عباره عن علبه بتاعت حديد بيلمو فيها جدودنا الكبار حاجاتم المهمه )
والله يسمها فوقو ماتضوقو انا على زعلي زعلت زياده ومعاهو خاتمين ..
وقررت فكره مجنوووونه بس حلفت انفذا يعني ماممكن اتمسكن زمني ده كلللو واي شي بخصني يشيلوهو
لمتين يعني واريتو لو نافع وله جايب في راسم خبر
ياهو مازالو يضربو فيني ويهينوني ويزلوني ..
بس خلاص بنفذا بنفذا ..
انتظرت الليل جاء وطلعت السراير كعادتي وسويت شاي اللبن جات خالتي جابت لبس شفعا قالت اغسلو
غسلتو رفعتو قالو البناطلين اكووها بي عقاب لينا كويتا رفعتها ليها ..
وده حالي اليومي طبعا في نص البرد البقول انا انا بصحوني اغسل ملابس خالي وعندو بناطلين الجنز التقييبله البتتغسل في السرير ويختو تحت السرير تشط وم بقدر الويها زاتو ..
اقوم اغسل وانوم واصحى اولع مكوة الفحم واكويهو بي عقاب لينو لو نشف م بنكوي ..
غايتو قضيت ايام الحمدلله عليها لكن ويييين تاني مافي مسكنه بتزكر في ايامي السوده دي وانا راجياهم متيييين انومو .. بعد خلاااص الليل سرح اتأكدت منهم كلهم نامو مشيت.. .. ... .....