رواية اهواك الفصل الثالث عشر13بقلم رحاب القاضي

​"أغارُ عليكِ من ماضٍ يطاردنا، ومن حاضرٍ يشاركني فيكِ، ومن غضبٍ يجعلني أحرق الأخضر واليابسَ كي تبقي لي وحدي.. ولو رغماً عنك."

_كانت قاااعده جنه قداام هاني في القسم بعد ما راحت تزوره من غير فؤاد ما يعرف وقالتله بضيق.. 

جنه 

اديني جيتلك اهو يا هاني عايز مني ايه؟ 

هاني 

عايز اخرج من هنا 

جنه 

وانا اعملها ازاي دي؟ 

هاني

ما اعرفش بس لو خااايفه علي حبيب القلب خليه يطلعني زي ما ورطني هنا بدل ما كلنا نخسر 

جنه بصتله بخووف وقالت 

اوعي تعمل حاجه في فؤااد انت فااهم 

هاني بغيظ 

يبقي خليه يطلعني احسنلك.. 

وقفت جنه وقالت 

جيبتني علي الفاضي مش هقدر افيدك في الموضوع ده.. 

هاني 

هتقدري والا هتخسري فؤاد 

جنه ابتسمت بسخريه وقالت 

وانت تيجي ايه دلوقتي جنب فؤاد، ده باشاره واحده منه يمحيك من علي وش الدنيا وانت عارف كده كويس، انا كان ضميري واجعني عليك شويه بس كويس وخلتني اجي واقابلك عشان اقول الحمد لله ان فؤاد عمل اللي عملو فيك ده... 

_جات تمشي بس قاام هاني ومسك ايدها بكل قوته وقال.. 

هاني

تمام وانا والله ما هخليكم تتهنو ببعض يا جنه وافتكري كلامي ده كويس.. 

سحبت ايدها من ايده وقالت 

انا ما بقتش اخااف منك زي زمان، وبقولك اهو اللي عندك اعمله يا هاني.. 

_قالت كلامها وساابته وخرجت من عنده، وكان سعيد قاااعد مستنيها بره واول ما شاافها قال بقلق.. 

سعيد 

كان عايز منك ايه؟ 

جنه بضيق

بيهددني لو فؤاااد ما خرجهوش من هنا هيأذيه 

سعيد

اوعي تخاافي منه ده ما يقدرش يعمل حاجه اصلا؟ 

جنه 

انا مش خايفه منه دلوقتي، مدام فؤاد موجود انا عمري ما هخااف من حد. 

ابتسم سعيد وقال 

يا سيدي يا سيدي ربنا يتمملكم بخير، تعالي بقي اروحك.. 

جنه

سعيد بالله عليك فؤاد ما يعرفش اني جيت عند هاني، هو اصلا اليومين دول عصبي لوحده وانا مش نااقصه ما صدقت الامور اتصلحت ما بينا 

سعيد

ما تخااافيش مش هقوله حاجه وربنا يستر وهو ما يعرفش لوحده.. 

_قال كلامه واخدها وخرجو من القسم وفي الوقت ده كان جيدا لسه واقفه بعربيتها قداام القسم بس الناحيه التانيه وقبل ما تنزل شاافت سعيد وهو خاارج مع جنه وابتسمت بخبث وقالت.. 

جيدا 

يا سلام يا سعيد وقعت تحت ايدي.. 

_واستنتهم لحد ما مشيو نزلت هي من عربيتها، وبعد. شويه كانت قاااعده هي وهاني لوحدهم وقالها هاني بهدوء.. 

هاني 

انتي مين وطلبتي تشوفيني ليه؟ 

جيدا 

جيدا العربي مرات فؤاد اللي خطف منك مراتك 

هاني بصلها بعدم فهم وقال 

هوو... الواد فؤاد متجوز؟! 

جيدا بهدوء

ومن ورا جنه كمان ايه رئيك في الخبر ده.. 

هاني 

وانا هستفاااد ايه بالخبر ده وانا هنا بين اربع حيطان 

جيدا 

واللي يخليك تستفااد من الخبر ده وانت بره؟ 

هاني قرب منها وقال بصوت واطي

مصلحتك ايه؟ 

جيدا 

بقولك انا مرااته... اكيد مصلحتي ان جنه تختفي من حياتي خالص وانت تاخد حقك منها.. 

هاني 

بمعني؟ 

جيدا 

هقولك اللي عايزاااه بطريقتي مش هينفع هنا، المهم اتفقنا؟ 

هاني 

وانا ايه يثبتلي ان كلامك صح، وانك مش طعم جديد بيرميه ليا الواد فؤاد. 

جيدا 

مش هنتفق علي حاجه غير وانت بره السجن، لما تخرج هقولك تعمل ايه وتعمله وصدقني معايا مش هتخسر، انا اللي ساعدت فؤاد يدخلك هنا وفي ايدي اخرجك من هنا وارجع لشغلك زي ما كنت بالظبط 

هاني بجمود

ما يهمنيش شغلي ولا تهمني اي حاجه غير اني اخد. حقي من جنه وانتقم منها 

ابتسمت جيدا بحماس وقالت 

كده اتفقنا قريب اووي هنتقابل بره القسم ونتكلم براحتنا يا حج هاني، بعد اذنك.. 

ـــــــــــــــــ #بقلم_الكاتبه_رحاب_القاضي ــــــــــــــــــ

_وفي بيت فؤاااد بعد شويه كانت قاااعده جنه هي وعايده اللي قالتلها بقلق.. 

عايده 

وانتي خوفتي منه ولا ايه؟ 

جنه 

مش خوفت منه... انا قلقت علي فؤاد هاني برضو شرااني. 

عايده 

مدام مقبوض عليه يبقي مش هيقدر يعمل حاجه، ما تخااافيش انتي بس ورتبي بقي لفرحك 

جنه 

يا خالتي لسه بدري فاضل شهر 

عايده 

يومين وهتلاقي رمضان خلص، المهم اعملي اللي نفسك فيه المره دي وكانك اول مره هتتجوزي.. 

جنه ابتسمت بهدوء وقالت 

انتي بتقولي فيها يعني، انا حاسه فعلا اني اول مره اتجوز.. 

عايده 

ربنا يسعدك ويتمملكم بخير، هرووح اشووف الشغالين دول عملو الفطار ولا لا.. 

جنه 

هو فؤااد مش هيفطر معانا النهارده؟ 

عايده 

قال عنده شغل وهيفطر في الشغل.. 

جنه 

مااشي ربنا معاه. 

_وفي الشركه بتاعت فؤاد كان قااعد علي مكتبه ودخلت عنده جيدا وقالت.. 

جيدا 

يلا بينا بقي؟ 

فؤاد. 

لا لا انا مش فاضي عندي شغل كتير وبعدين لسه شويه علي المغرب.. 

جيدا 

طيب انا هسبقك علي بيتنا هعملك الفطار وهستناااك.. 

فؤاد

تمام يا جيدا.. 

جيدا بخبث 

قبل ما امشي صح كنت عايزه اسألك هي جنه كويسه؟ 

فؤاد بصلها بهدوء وقال 

ايوه.. بتسألي عليها ليه؟ 

جيدا 

مش عارفه النهارده المحامي بتاعنا راح للقسم يتابع القضيه بتاعت اللي اسمه هاني ده عشان نعرف التفاصيل وبيقولي انه شااف سعيد هناك ومعاه جنه والمحامي يعرف جنه لانه شاافها في الحفله بتاعت الاوتيل.. 

اتحولت ملامح فؤاد للغضب وقال 

انتي متأكده من كلامك ده؟ 

جيدا 

مش عارفه انا بسألك اهو، بس هو المحامي اكيد. مش هيكدب عليا.. 

_ما ردش عليها فؤااد وقااام وهو متعصب ورااااح لمكتب سعيد واول ما دخل عنده قاله بحده ونبره غاضبه.. 

فؤاد

انت اخدت جنه تشوووف هاني النهارده؟ 

سعيد بقلق

انت مين قالك؟! 

فؤاد بعصبيه 

يعني بجد هي راحتله؟.. 

سعيد رااح قفل الباب وقال 

اهدي طيب بالله عليك وانا هفهمك، هي طلبت مني وانا اا.. 

فؤاد 

وانت المفروض كنت تيجي تقولي ده لو بتحترم الصدااقه اللي بينا مش تاخد خطيبتي والبنت اللي هتبقي مراتي وتوديها لطليقها انت اتجننت يالا نسيت نفسك... 

سعيد 

لا ما نستش نفسي يا صااحبي انا كنت ممكن اطلع نفسي من الموضوع بس خوفت تروحله لوحده وانا كنت معاها خطوه بخطوه.. 

فؤاد 

بطل تحوير وانا هحااسبك كويس يا سعيد علي الغلطه دي 

سعيد. 

في ايه يا عمم انت هتعمل عليا مدير ولا ايه، يا عم الله الغني عنك وعن شغلك ولو شووفت وشي تاني هنا ابقي وقتها زعق وانفخ نفسك براحتك.. 

_قال سعيد كلامه ومشي وهو مدااايق جدا وكانت جيدا واقفه بره المكتب واول ما شاافته خارج من عند فؤاد ابتسمت بشماته وقالتله.. 

جيدا 

فرصه سعيده يا سعيد اتمني تبقي قد كلامك.. 

_ما ردش عليها سعيد وسااب الشركه كلها ومشي، وخرج بعده فؤاااد وهو متعصب جدا وجيدا قالتله.. 

جيدا 

يا حبيبي اهدي وفهمني بس ايه الحكايه.. 

فؤاد. 

انا ماشي ولو اتأخرت ما تستننيش علي الفطار.. 

_ورااح اخد حاجته من مكتبه وراح لبيته وهو في قمة غضبه وكل ما يفتكر ان جنه شاافت هاني من ورااه بيتعصب اكتر، واول ما وصل البيت رااح بسرعه لاوضة جنه، واول ما دخل لقاها بتصلي فبصلها بغيظ وقال.. 

فؤاد

ماااشي صلي براحتك انا قااعدلك اهو. 

_وقعد فعلا علي الكنبه جنبيها وهو بيبصلها بنظرات كلها عصبيه، وبعد ما خلصت صلاه بصتله بحده وقالت.. 

جنه 

هو انا مش مليون مىه اقولك تخبط قبل ما تدخل وقااعد تتفرج عليا انا وبصلي ليه؟ 

فؤاد بجمود

خلصتي؟!.. روحتي لهاني ليه؟ 

اتوترت جدا وقاامت وقفت قدامه وقالت 

انا كنت هقولك بس.. 

فؤاد بحده

بس ايه انا مش قولت ما تروحيش، بقيتي شااطره دلوقتي وبتكلمي سعيد وبتعملي حوارات من ورا ضهري

جنه بقلق 

ما انا لو كنت قولتلك ما كنتش هتوافق.. 

فؤاد 

وانتي تروحيله ليه للدرجه دي قلبك واجعك عليه، صعبان عليكي؟.. 

جنه بضيق 

تمام مدام بتزعق ومش راضي تسمعني يبقي افهم اللي تفهمه مش هبررلك حاجه.. 

مسكها من دراعها جامد وقال 

ما تستفزنيش يا جنه اللي عملتيه ده مش هعديه ليكي.. 

جنه 

سيب ايدي وانا اعمل اللي عايزاااه، موضوع زي ده ما يخصكش اصلا انك تقرر فيه حاجه.. 

فؤاد

لا يخصني مدام يخصك يبقي يخصني احنا مخطوبين وقريب اووي هتبقي مراتي وما ينفعش اصلا تفكري في اي حد غيري.. 

جنه

انت شايف اني لسه بفكر فيه، ماااشي انا بقي مش هتجوزك ما انا لسه متعلقه بـ اللي كان جوزي.. 

ضغط بايده علي درااعها اكتر وقال بغيظ

اتكلمي كويس يا جنه، وهنتجوز بمزاجك غصب عنك هنتجوز ومدام بتعملي حوارات من ورايا من النهارده ما فيش خروووج تاني مش هتشوووفي الشارع ولا كليه بقي ولا غيره.. 

اتملت عيونها دموع وقالت 

انا حره انت مش هتمشي كلامك عليا وسيب ايدي.. 

قرب منها اكتر وقال

ده انا الوحيد دلوقتي اللي من حقي امشي كلامي عليكي يا جنه.. 

دخلت في الوقت ده عايده وقالت

في ايه سيبها يا فؤاد.. 

_ساابها فؤاد بس نظراته لسه غاضبه وعايده قالتله بحده.. 

عايده 

جاااي تزعق ومتعصب ليه، في ايه اللي حصل؟ 

فؤاد 

الهانم راحت لهاني وانا قولتلها لا، والمفروض تقدرني وتسمع كلامي ولما اجي اتكلم معاها والومها زعلانه وبتقاوح.. 

عايده بصت لجنه بقلق وقالت 

خلاص يا فؤاد ما حصلش حاجه اهي راااحت وجات وسعيد كان معاها والله.. 

فؤاد

يعني انتي كمان كنتي عارفه يا امي، هو انا كلامي ما بيتسمعش ليه؟ 

جنه 

قولتلك الموضوع ده يخصني انا وبس، انت مالكش دعوه باللي كان بيني وبين هاني.. 

_‌اتعصب اكتر وفي لحظة غضب ضربها بالقلم بكل قوته وقال بصوت عالي وحده. 

فؤاد 

انتي تخرسي خالص وسيرته ما تتجاابش تاني علي لساانك قداامي.. 

_بصتله جنه بصدمه ودموع وهي حاطه ايكها علي خدها بألم، وعايده زعقت فيه وقالت بعصبيه.. 

عايده 

انت اتجننت بتمد ايدك عليها ليه يا جاتك كسر ايدك، امشي غور اطلع بره مالكش دعوه بيها تاني.. 

فؤاد 

مالهاش خرووج من البيت تاني والا المره الجايه هكسرلك رجلك.. 

عايده 

طيب اتكل علي الله ومالكش دعوه بيها تاني، امشي يلا من وشي قال تمد ايدك عليها قداامي ماشي يا فؤاد.. 

_ساابهم فؤاااد ومشي من البيت كله، وعايده اخدت جنه في حضنها وفضلت تطبطب عليها وقالتلها.. 

عايده 

حقك عليا يا قلب خالتك، والله لاربيه علي اللي عملو ده.. 

_ما ردتش عليها جنه ودموعها كانت بتنزل بحزن وهي مصدوومه لانه لاول مره في حياته يمد ايده عليها.. 

ـــــــــــــــــ #بقلم_الكاتبه_رحاب_القاضي ــــــــــــــــــ

_وبالليل في شقة جيدا كان نااايم فؤااد علي السرير، وبص جنبيه لجيدا اللي كانت في ساابع نومه واتنهد بضيق وقااام وقف في البلكونه وهو مدايق من نفسه لانه مد ايده علي جنه، وفي نفس الوقت بيخدعها وبيكدب عليها بسبب جوازه من جيدا.. 

_رجع دخل الاوضه تاني وبدأ يغير هدووومه، وفي الوقت ده قااامت جيدا وقالت.. 

جيدا 

انت ماااشي ولا ايه؟ 

فؤاد

ايوه.. 

جيدا. 

انت مش قولت هتبااات هنا النهارده، انا شويه وكنت هقوم اجهزلنا السحور

فؤاد

ابقي هاتي حد يطبخلك يا جيدا انا ما بحبش الاكل الجاهز 

جيدا قربت منه وقالت 

من عينيا حاضر ده انا كمان هتعلم اطبخلك بنفسي بعد كده، بس خليك هنا ما تمشيش.. 

بعد عنها فؤاد وقال 

معلش عندي شغل ولازم اخلصه في المكتب في البيت. 

حست جيدا بأحرااج اول ما بعد. عنها وقالتله

تمام يا فؤااد اللي يربحك اعمله... 

_كمل لبسه وسااابها ومشي، واول ما وصل البيت رااح علي طول لاوضة جنه وخبط علي الباب اكتر من مره وما ردتش عليه.. 

فؤااد

جنه... افتحي يا جنه خلينا نتكلم.. 

_قامت جنه من علي السرير وكانت لسه هتفتح الباب، بس رجعت في كلامها وقفلت الباب بالمفتاح وراااحت نامت.. 

فؤاد

برضو... طيب انا كنت جااي اقولك حقك عليا ما تزعليش.. 

_ما ردتش عليه ودموعها نزلت بحزن، وهو رااح لاوضة امه اللي كانت قااعده علي سريرها وحاطه ايدها علي خدها واول ما شافته قالت بنبره كلها لوووم.. 

عايده 

زمان لما كنت اجي اضربها كنت بتزعق فيا وتقولي ما حدش يمد ايده عليها مهما عملت، فتقوم انت دلوقتي تمد ايدك عليها وتكسرها انت كمان، مش كفايه اللي شافته من الدنيا بدل ما تعوضها جاي تعمل نفس اللي كان بيعملو هاني.. 

فؤاد قعد جنبيها وقال بحزن 

يعني هي عادي تقولي اللي بينها وبينه انا ما اتدخلش فيه، انا لو عليا امسح هاني من دمااغها خالص، جنه ليا لوحدي يا امي ما ينفعش حتي تفكيرها حد. يشاركني فيه. 

عايده 

انت مش عارف تتقبل حقيقة انها كانت مرااته وانها اتجوزت غيرك يا فؤاااد، لازم تبقي عارف انها عمرها ما هتنسي هاني ومش معني كده انها بتحبه لا هي ما بتحبش غيرك بس البني ادم ما بينسااش وجعه يا فؤاد واللي بينها هي وهاني مش قليل دي سنين كتير..

اتنهد فؤاد. بضيق وقال 

طيب كلميها وقوليلها اني اتعصبت من غيرتي عليها مش اكتر، وعمري ما همد. ايدي عليها تاني 

عايده 

لا مش هقول حاجه يا ضنايا اهي عندك لما تبقي ترضي عليك قولها اللي تقوله.. 

فؤاد 

انا ابنك علي فكره هيرضيكي يعني يتنكد عليا.. 

عايده 

لكل فعل رد فعل مش بيقولو كده برضو.. 

فؤاد. بغيظ 

جايه تتثقف عليا دي كمان... 

عايده 

دي كمان في عينك قووم من عندي خليني انام.. 

فؤاد 

طيب مش هتتسحرو.. 

عايده 

اكلنا انا وجنه من شويه، بالعافيه اكلتها لقمتين تلاته انت عارفها بتتلكك اصلا عشاان ما تاكلش.. 

قاام فؤاد وقال 

تصبحي علي خير يا امي.. 

_واح اوضته وعدي الليل حزين علي ابطالنا،  وتاني يووم الصبح خرج فؤاااد من اوضته وراااح لاوضة جنه وخبط علي الباب وقال.. 

فؤاد

يا جنه... عندك كورس لغه كمان شويه السواااق هيستنااكي يوصلك ويرجعك.. 

ما ردتش عليه برضو وهو قال 

برضو مش هتردي تمام مش هتفضلي حابسه نفسك جوه كتير مسيرك تطلعي.. 

_قال كلامه ومشي راااح شغله وكان قااعد علي مكتبه ودخلت عنده جيدا وقالت.. 

جيدا 

هو سعيد ما جاش ليه النهارده، واتخانقت ليه معاه امبارح.. 

فؤاد. 

ما فيش حاجه انا هروحله النهارده بعد الفطار وهشووفه وبكره هيرجع شغله.. 

جيدا بضيق

امم طيب كنت عايزه اقولك ان بابي وصل وو. 

_وقبل ما تكمل كلامها اتجاهلها، ورد علي موبيله اللي كان بيرن وقال.. 

فؤاد 

ايوه يا بهجت ما خرجتش يعني، خلاص تمام بس خليك موجود اول ما تخرج تبقي معاها خطوه بخطوه.. 

قفل مع السواق وجيدا قعدت قدااامه وقالت 

بتتكلم عن جنه؟ 

فؤاد 

اممم ثواني يا جيدا.. ايوه يا امي هي جنه ما راحتش الكورس بتاعها ليه؟ 

بصتله جيدا بغيظ وعايده ردت علي فؤاد وقالت

اسكت ده انت داخل علي اياام بيضه، هي حالفه لا ترووح الدروس دي ولا حتي هتروح الكليه والتقيله بقي انها كمان مش هتتجوزك.. 

فؤاد 

انتي فرحانه ليه يا امي؟ 

عايده 

تربيتي بنتي حبيبتي لازم تربيك علي القلم اللي ضربته ليها.. 

فؤاد 

مااشي يا امي اقفلي.. 

عايده 

هتفطر معانا ولا لا؟ 

فؤاد 

ايوه جااي علي الفطار بس ما تقوليش لجنه انا عابز اتكلم معاها وهي طول ما انا في البيت بتهرب متي وحابسه نفسها في اوضتها، فقوليلها اني مش جااي والنبي.. 

عايده 

حاااضر... اعملك ايه علي الفطار؟ 

فؤاد 

اي حاجه... ولا اقولك انا هبعت الفطار جنه بتحب الكفته هبعتلكم اكلة كفته حلوه النهارده 

عايده 

لا لا هعملها انا ما تجيبش اكل من بره، كمل شغلك بقي مش هعطلك... 

فؤاد 

ماشي يا ست الكل مع السلامه.. 

وقفل مع امه وقال لجيدا 

نعم يا جيدا في ايه؟ 

جيدا بسخريه

نفسي افهم بتعمل ايه جنه يخليك تهتم بيها كده. 

فؤاد 

هنبدأ بقي جو الغيره من دلوقتي انتي دماغك اكبر من كده يا جيدا.. 

جيدا 

معاك حق، المهم بابي وصل مصر وعايز يتعرف علي اهلك 

فؤاد 

ليه؟ 

جيدا 

ما تقلقش انا هفهمه الوضع كويس عشان ما يقولش قدااام جنه اننا  رجعنا لبعض.. 

فؤاد 

تمام هبقي اعزمه عندنا واعرفه علي امي وجنه وسعيد.. 

جيدا 

وسعيد؟! 

فؤاد 

جيدا... سعيد ده مش صااحبي وبس لا ده اخويا كمان فأتعودي عليه في حياتنا.. 

جيدا 

تمام هرووح انا اكمل شغلي، وايوه صح كريم. مندور عامل افطار خاص برجال اللعمال وعائلاتهم وكلمني وبعتلك دعوه انت وجنه 

اتنهد فؤاد بضيق وقال 

هنروح انا وانتي، جنه مش هتروووح عند الراجل ده خالص.. 

جيدا 

تمام نروح مع بعض انا وانت.. 

وسااابته جيدا وخرجت وفؤاد قال لنفسه بقلق

اصالحك ازاي بس يا جنه؟؟.... 

ـــــــــــــــــ #بقلم_الكاتبه_رحاب_القاضي ــــــــــــــــــ

_وبعد شويه وصل فؤاااد البيت واول ما دخل وقت آذان المغرب شاااف مامته قااعده لوحدها بتفطر.. 

فؤاد. 

هي ما نزلتش تفطر برضو؟! 

عايده 

لا نزلت بس لما سمعت صوت عربيتك بره طلعت تاني اوضتها من غير حتى ما تكسر صياامها....

اتنهد فؤاد بضيق وقال 

ماااشي انا طالعلها.. 

عايده 

رايح فين سيبها براحتها خلاص

فؤاد 

ما هو انا مش مرتاح وهي زعلانه مني لا عارف اركز في شغل ولا ليا نفس لاي حاجه.. 

عايده 

وكان عليك ايه من الاول، بس تستاهل عشان بعد كده ما تبقاش تمد. ايدك عليها تاني.. 

ما ردش عليها فؤاد وجه بمشي بس هي قالتله

عشان خاطري ما تزعلهاش هي طيبه وغلباانه وعلي قد عشمها فيك زعلانه منك.. 

فؤاد

ما تقلقيش يا امي مش هزعلها تاني والله.. 

_قال كلامه وطلع فوووق ووقف قداام اوضة جنه وخبط علي الباب وبرضو ما ردتش عليه، فقال بنبره غاضبه.. 

فؤاد

افتحي يا جنه مش هنفضل يعني علي الحال ده كتير.. 

_ما ردتش عليه فجه يدخل لقاها قاافله علي نفسها بالمفتاح فزعق فيها وقال.. 

فؤاد

علي اساس اني كده مش هعرف ادخل، في نسخه تانيه معايا لمفاتيح الاوض كلها بتاعت البيت فافتحي احسنلك...

_في الوقت ده كانت جنه واقفه ورا الباب واول ما زعق وصووته بقي عالي، خااافت منه وفتحت الباب وملامحها كلها حزن، وقبل ما يتكلم ولا تسمع منه حاجه ساابته وراحت قعدت علي طرف السرير، اتنهد بضيق وراااح قعد جنبيها وبصلها بهدوء وقال.. 

فؤاد 

انا ما عصبنيش غير انك تقوليلي اللي بينك وبينه انا ماليش دعوه بيه، هو ايه اللي بينك وبينه اصلا، مش بسببه انتي كنتي رافصه تتجوزيني، وبسببه فضلتي سنين بتتعذبي واتحرمتي من تعليمك وانك تعيشي كويس اصلا.. 

_اتملت عيونها دموع وبصت للناحيه التانبه من غير ما ترد عليه، وهو كمل كلامه وقال بجديه ونبره هاديه.. 

فؤاد

وبعدين انا اصلا ما كنتش عايزك تشوفيه عشان بغير عليكي يا جنه، مش عايزه يشووفك تاني اصلا ولو عليا ما يبقااااش ليكي تعامل مع اي راااجل تاني غيري، بس ازاي انتي روحتي كلمتي سعيد من ورايا وروحتي لشووقي ليه كل ده، شوقي يستاااهل انك تكدبي عليا عشااانه.. 

_نزلت دموعها ومسحتها بسرعه وهي برضو مش راضيه تبص عليه ولا ترد علي كلامه، فأتدايق من تاهلها ليه وقال.. 

فؤاد 

انا مش بكلم نفسي يا جنه ردي عليا.. 

ما ردتش برضو عليه، فمسك ايدها غصب عنها وقال

اهدي... وانا اسف والله مش هتتكرر تاني مهما حصل.. 

_سحبت ايدها من ايده بقوه اتتهدت بضيق وما ردتش عليه، فبصلها بغيظ وقال.. 

فؤاد 

طيب اعمل ايه هفضل متعاقب لحد امتي منك؟ 

_ما ردتش عليه، فبحركه سريعه قرب منها جدا، خلاها ترجع بضهرها لورا وجسمها اتنفض بخوووف وهو زاد من قربه منها وقال بحده.. 

فؤاد

من زمان لما بتتعاملي معايا كده وتتجاهليني، مش بس بتخليني اندم اني زعلتك، انتي بتخليني اندم اني جيت علي وش الدنيا اصلا.. 

_كانت خلاص هتضحك من كلامه وعصبيته لكنها بثعزبه مثلت اللامبالاه وهو قال بغيظ.. 

فؤاد 

برضو مش هتردي عليا، تمام خليكي ساكته براحتك بس تاني يوم العيد فرحنا ساكته بقي اتكلمتي جوازي منك مش هيتلغي ولا حتي هيتأجل، تمام يا قلب فؤاااد.. 

_عرف هو كمان يستفزها ونظراتها اتحولت للعصبيه وزقته بعيد عنها جاامد وجات تقووم من جنبيه، بس هو مسك ايدها وقربها منه جداً، لدرجة انها كانت شبه في حضنه، فشهقت بخجل وجسمها كله اتنفض ووشها قلب احمر، فضحك هو بتسليه وقال بهدووء.. 

فؤاد 

لو عايزك تتكلمي هخليكي تتكلمي علي فكره، بس اتقلي واتدلعي عليا براحتك، انا بحبك اكتر وانتي عنيده وشرسه كده.. 

حاولت تبعد عن حضنه بس هو كان مقيد حركتها بايديه الاتنين وقرب بوشه منها وباااسها من خدها اللي ضربها عليه وبصلها بهدوء ونظره عاشقه وقال. 

فؤاد

حقك عليا عديها المره دي وانا والله ما هكررها تاني.. 

غمضت عيونها من شدة خجلها وقالت بنبره هامسه 

سيبني يا فؤاد...

ابتسم بأنتصار وقال 

طيب قولي انك مش زعلانه مني.. 

فتحت عينيها وضربته بايدها جامد علي كتفه وقالت 

بقولك سيبني.. عيب كده اصلا.. 

فؤاد قربها ليه اكتر وقال 

مش هبعد غير لما تقوليلي انك مش زعلانه؟!.. 

جنه بتوتر وخجل 

صالح سعيد الاول وخليه يرجع الشغل.. 

اتحولت ملامحه تاني للغضب وقال

وحيااة امك، وانتي مالك ومال سعيد؟.. 

ردت عليه وهي بتحاول تبعد عنه 

هو قالي انك اتخانقت معاه وساب الشغل  ، انا السبب في الموضوع ده، لما تصالح سعيد وتخليه يرجع الشغل انا مش هبقي زعلانه.. 

فؤاد بغيظ. 

دوري علي ادخن حيطه في البيت ده واخبطي دماغك فيها. 

_وبعد عنها ووقف قدامها وقال بعصبيه وغيره واضحه.. 

فؤاد

بقي انا جااي اصالح واراضي فيكي وانتي في الاخر تقوليلي سعيد ياللي ما عندك. دم... 

جنه بحزن 

اصلا والله العظيم ما كنت ناويه اتكلم معاك تاني ابدا، خليت ايه انت لهاني وانت عملت زيه ومديت ايدك عليا.. 

فؤاد 

خلصنا يا جنه خلاص موضوع وانتهي انسي.. 

جنه بسخريه 

كل حاجه بتقولي انسي انسي كأنه زرار مجرد ما هضغط عليه هنسي كل حاجه، وبعدين سعيد ذنبه ليه تخليه يخسر شغله وتكركبله حيااته وانت عارف انه بيجهز لفرحه هو ولبني، انا مش عايزه ابقي سبب في زعله ولا تحصل مشكله بينه وبين الشيخ ابراهيم بسببي.. 

فؤاد 

اصلا من غير ما تقولي كنت هروح واصالحه، وبعد كده ما تعمليش حاجه تاني من ورايا 

جنه بضيق 

طيب.. 

فؤاد 

وتنزلي تفطري وترووحي الكورساات بتاعتك فاضل اربع خمس شهور وتبدأي الدرااااسه في الجامعه.. 

جنه بسخريه 

اممم دلوقتي بتحمسني وتقولي رووحي ولما تدايق تزلني وتحرمني من تعليمي، انا مس عايزه اروووح تاني. 

فؤاد 

انتي ليه بوومه كده يا جنه، ما قولنا خلاص مش هتتكرر تاني.. 

جنه 

طيب امشي دلوقتي انا ماليش نفس اصلا اكل حاجه، كمان شويه هبقي اكل.. 

فؤاد 

لو ما اكلتيش مش هاكل انا كمان؟!.. 

جنه بجمود 

براحتك.. 

فؤاد بضيق 

لا براحتك انتي يا ست جنه.. 

_قال كلامه وسااابها وخرج من الاوضه ورزع الباب وراااه، وهي بصتله بحزن ورجعت قعدت علي السرير وافتكرت قربه منها من شويه وابتسمت بخجل وقالت لنفسها.. 

جنه 

والله مش متربي وقليل الادب.. 

ـــــــــــــــــ #بقلم_الكاتبه_رحاب_القاضي ــــــــــــــــــ

_وفي الوقت ده في بيت كبير وراااقي جدا كانت قاااعده جيدا مع باباها بيفكرو وقالها.. 

رشااد

فؤاد عرف اني جيت مصر؟ 

جيدا 

ايوه عرف.. حتي اني  قولتله ان حضرتك هترتب عشان تعزمه هو وبنت خالته ومامته وتتعرف عليهم 

رشااد

بنت خالته اللي هيتجوزها عليكي، انتي ازاي موافقه علي العبث اللي بيعمله معاكي ده، انا لو اتدخلت هوقفه عند حده كويس.. 

جيدا 

مش هيسيبها مهما عملت، وفؤااد ما بيجيش بالعند وانت عارف كده كويس.. 

رشااد بغيظ 

الله يرحم ده كان شغال تحت امري انا وانا اللي عملته وكبرته هو ايوه سااعدني لانه ذكي بس هو بدأ يخرج بره الدايره اللي انا رسمتهاله وبدل ما هو دلوقتي شريكي بطريقته دي فيما بعد هيبقي مناافس ليا.. 

جيدا 

فؤاد جدع واصيل مش هينسي وقفتك جنبيه ما تقلقش، المهم لما تبقي مامته وجنه يجو بلاش تقول قدااامهم اني رجعت لفؤاد. 

رشاد بعصبيه 

انتي بتعملي في نفسك ليه كده ما تسبيه يتجوزها وارجعي لحيااتك القديمه 

جيدا بحزن 

مش عايزه ارجع لحياااتي القديمه، سبب تمسكي بفؤااد هو اني اتعودت علي وجوده في حيااتي ما اقدرش اعيش من غيره، وابقي عبيطه لو سيبتها تاخده مني انا لازم احاافظ علي جوزي يا بابي. 

رشااد 

فعشااان تحاافظي عليه هتخليه يتجوز عليكي، انتي كده ما عندكيش كراامه يا جيدا. 

جيدا

انا مش هخليه يتجوزها، انا بخطط لكل حاجه كويس بس ارجوك اسمع كلامي. 

رشااد 

فؤااد ناويه علي ايه في مصر، ايه المشاريع اللي ناوي يعملها 

جيدا 

عادي يعني ما فيش حاجه هتضرك في شغلك ولا حتي ناويه يلغي شراكته معاك، كل الحكايه انه حابب اسمه يكبر في مصر هنا زي ما كبر في امريكا.. 

رشااد 

ما قبلش ليه نبقي شركاااء هنا كمان؟! 

جيدا بتوتر

مش عارفه سيبه براحته يا بابي ارجوووك 

رشااد 

تمام انا عايز كل تفاااصيل شغله تكون عندي يا جيدا من غير ما هو يعرف، لازم ابقي عارف عنه كل حاجه عشان افهم دماغه، وابقي انا المسيطر عليه وعلي سغله ديما

اتنهدت جيدا بضيق وقالت 

اوكي يا بابي حااضر.. 

ـــــــــــــــــ #بقلم_الكاتبه_رحاب_القاضي ــــــــــــــــــ

_وعدي يوووم في التاني والتعامل بين جنه وفؤاااد بحدود جدا، وكانت رافضه تسمع منه اي حاااجه وديما بتتهرب منه، وفي يوووم كانت قاااعده جنه في اوضتها بتذاااكر وموبيلها رن برقم فؤاااد  ، فاتجاهلت مكالماته اكتر من مره وبعدين ردت وقالت.. 

جنه 

نعمم.. 

فؤاد

تلاتين الف مره عشاااان تردي؟! 

جنه 

مش فاضيه بذااكر.. 

فؤاد 

انزلي طيب عايزك.

جنه 

عايز ايه؟ 

فؤاد

يا ستي انزلي وهتشووفي عايزك في ايه؟ 

جنه 

طيب هو عادي انزل بالبجاامه، مكسله اغير هدومي.. 

ابتسم فؤاد وقال 

معلش مش هينفع تنزلي بالبجاامه 

جنه 

انا مش واخده منك غير التعب اصلا اقفل.. 

فؤاد 

يلا يا كسوله مستنيكي اهو.. 

_قفل معاها وهي قاامت غيرت هدومها ولبست بنطلون وبلوزه شكلهم لطيف عليها، ونزلت تحت لقيته قااعد في الجنينه وهو مااسك التابلت بتاعه وجنبيه الحااارس بتاعه.. 

جنه 

نعمم؟ 

فؤاد 

امي فين؟ 

جنه 

نايمه شويه في حاجه ولا ايه. 

_حط التابلت علي الترابيزه واخدها ورااح وقف ناحية الجرااش بتاع عربيااته وكانت في عربيه جديده وشكلها حلو جدا لونها احمر.. 

جنه 

احنا رايحين فين؟ 

فؤاد 

قوليلي الاول ايه رئيك في العربيه دي؟ 

جنه 

حلوه.. بس مش اللون ده حريمي شوويه عليك.. 

فؤاد ابتسم وقال 

ما هو ده مش ليا انا، مش انا قولتلك قبل كده هجيبلك عربيه، اهي دي عربيتك لو مش عجبااكي هغيرهالك.. 

جنه ابتسمت بعدم تصديق وقالت 

انت بتهزر صح.. يعني انا دلوقتي معايا عربيه؟! 

فؤاد

ايوه وهتبقي بأسمك كمان واول ما تتعلمي السوااقه هطلعلك رخصه علي طول.. 

جنه 

يا فؤاد كده كتير والله ما كانتش لازمه المصاريف اللي علي الفاضي دي، في عربيات كتير هنا.. 

فؤاد 

لا دول بتوعي ما تطمعيش فيهم، لكن دي بتاعتك لوحدك وبعدين مصاريف ايه انا معايا فلوس كتير اووي وكلها ملكك انتي تؤمري واللي تؤمري بيه يبقي تحت رجليكي يا جنه هانم.. 

جنه 

لو كنت سالتني نفسي في ايه كان هيبقي احسن من العربيه الغاليه دي.. 

فؤاد اتنهد بضيق وقال 

حتي رد فعلك عكس اللي توقعته تماما، ماشي نفسك في ايه يا جنه؟ 

جنه 

دبله يبقي مكتوب عليها اسمك، اصلا ده اللي كان نفسي فيه من زمان اننا لما نتخطب البس دبله عليها اسمك، انت كل اللي همك نتجوز وخلاص ونسيت اللي كنا بنحلم بيه زمان.. 

فؤاد ابتسم بهدوء وقال 

تمام هبقي اجيبلك دبله، المهم تعالي عشان اعرفك علي البنت اللي هتعلمك السواااقه وبعدين ارووح شغلي.. 

جنه 

مين دي اللي هتعلمني؟ 

فؤاد. 

بنت كويسه جدا هتديكي درووس سوااقه هتخليكي شاطره جدا وتعتمدي علي نفسك. 

جنه 

درووس تاني مش كفايه الهم اللي انا فيه انا كده مش هبقي فاضيه لاي حاجه خالص 

فؤاد 

ما ده المطلوب اني اشغلك علي قد ما اقدر، واخصص وقت في انشغالك ليا لما نبقي انا وانتي فاضيين، عشاان ما تفكريش في حد غيري ولا تفضي لاي حاجه غيري.. 

جنه 

قول كده بقي، طيب انا مش عايزه اتعلم السواقه ولا اي حاجه وبعد كده اللي انا عايزاااه هعمله واللي مش عايزاااه مش هعمله.. 

جات تمشي بس هو مسك ايدها وقال 

كنتي زمان بتقوليلي لما هتتجوزيني هتبقي معايا زي امي ما كانت بتعامل ابويا، امي بقي عمرها ما عصت لابويا كلمه.. 

جنه 

بس ابوك الله يرحمه كان طيب وعمرها ما زعلها ولا مد ايده عليها ولا اتخلي عنها، كان يستاهل انها تسمع كلامه وتنفذه.. 

فؤاد. 

وانا بحبك وبعشقك وبموت فيكي وو.. 

جنه بخجل 

وانت صايم اتلم بقي.. 

ضحك فؤاد بهدوء وقال 

مااشي هسكت بس اسمعي الكلام ويلا بينا نرووح نقاابل البنت، في واحدة تكره انها تتعلم السواقه وتبقي معاها عربيه.. 

اتنهدت بضيق وقالت 

مااشي يا فؤاااد اللي انت عايزه.. 

ـــــــــــــــــ #بقلم_الكاتبه_رحاب_القاضي ــــــــــــــــــ

_وبعد شويه في النادي كان قااعد فؤااد هو وجنه لوحدهم وقالتله بضيق.. 

جنه 

فين البنت اللي قولت عليها دي هو انا فضيالك.. 

فؤاد وهو ماااسك موبيله 

زمانها جااايه اصبري.. 

جنه 

هي النااس اللي بتاكل وبتشرب دول كلهم مش مسلمين؟ 

فؤاد. 

الله واعلم بس الناس هنا بتهتم برمضان زينا 

جنه 

عشان مش مسلمين يعني؟ 

فؤاد 

لا هما مسلمين بس عادي يعني 

جنه بسخريه 

هو ايه اللي عادي، صياام رمضان فرض علي كل مسلم والصيام ليه اجر كبير.. 

فؤاد 

 واحنا مالنا خليكي في حالك زي ما كل واحد في حاله.. 

جنه بضيق 

عشان كده مش حابه الجو هنا، الناس هنا اغلبهم مش شبهي انا وخالتي، واللي شبهنا شويه بيبقو زيك كده باردين.. 

فؤاد 

انا بارد يا... 

_قبل ما يكمل كلامه رن موبيله برقم جيدا، فبص لجنه بغيظ ورد علي جيدا وقال.. 

فؤاد 

نعم يا جيدا؟ 

جيدا 

انت فين ما جيتش ليه لحد دلوقتي؟ 

فؤاد. 

سااعه وجااي في حاجه ولا ايه؟ 

جيدا 

لا بس قلقت عليك، انت كويس؟ 

فؤاد 

ايوه كويس سلام دلوقتي وشويه وجااي.. 

اتنهدت جنه بضيق وجيدا قالت بسرعه 

استني طيب هو سعيد خلاص مش هيجي الشركه تاني؟ 

فؤاد 

لا جاااي هو بس بيجهز لفرحه ومش فااضي.. 

جيدا 

اوكي ما تتأخرش بقي وتعالي انا مستنيااك.. 

فؤاد

تمام.. 

قفل معاها وجنه قالت بغيظ. 

تكلم طليقتك وتبقي في وشك اليوم كله عادي، وانا اروووح اقابل هاني كعمل انساني تقلب عليا الدنيا.. 

فؤاد 

اللي بيني وبين جيدا شغل، وبعدين جيدا بنت مثقفه وعاقله وانا حاطط بيني وبينها حدود، ما تقارنيش علاقتي بيها بعلاقتك بزفت الطين.. 

جنه 

مش معاك غير تبرر لنفسك وبس، اكتر انساان في الدنيا يطلع نفسه برئ.. 

_قبل ما يرد عليها جات بنت شكلها جميل ووقفت جنبيهم وقالت.. 

_مساء الخير يا فؤااد. بيه، انا ماري نعيم اللي اتواصلت مع حضرتك عشاان درووس السوااقه 

فؤاد 

اهلا وسهلا اتفضلي. 

قعدت ماري معاهم وقال فؤاد. بجديه. 

اعرفك جنه تبقي خطيبتي وهي اللي هتتعلم السواقه 

ابتسمت ماري لجنه وقالت 

طيب كويس انا كنت فااكره حضرتك اللي هتتعلم السوااقه، بس كويس وطلعت الانسه.. 

فؤاد

اشمعنا؟! 

ماري بتوتر

اصل بصرااحه اتعرضت لحاجات مش لطيفه خالص مع الرجاله اللي كنت بعلمهم السواقه، بس قبلت بحضرتك لان طريقة كلامك معايا كانت محترمه وكمان طلعت رلجل مشهور وليك سمعتك... 

فؤاد. 

تمام هسيبكم تتعرفو علي بعض وتتفقو علي المواعيد وانا هرد علي الفون وجااي، ولو جنه ارتاحت معاكي واتفقتو مش هنختلف في الباقي اللي هتطلبيه هتاخديه وزيااده.. 

_قال كلامه وساابهم ومشي من غير ما حتي يسمع ردها عليه، فابتسمت ماري لجنه بأحراااج وقالت.. 

ماري 

احممم واضح ان. خطيبك مستعجل شويه ومشغول.. 

جنه 

معلش هو فعلا مشاغله كتير.. 

ماري

مش مشكله، قوليلي يا انسه جنه هو انتي جربتي تتعلمي السواقه قبل كده ولا دي اول مره.. 

جنه 

لا دي اول مره وياريت تقوليلي جنه علي طول.. 

ماري

احسن برضو وانا ماري بس من غير اي القااب برضو.. 

ابتسمت جنه وماري قالت 

شكلك لطيفه اووي وهنتفق مع بعض.. 

جنه 

ان شاء الله، لو حاابه تشربي حااجه اتفضلي مش مشكله.. 

ماري

لا لا انتي صايمه اكيد ومش هينفع اشرب حاجه قدامك. 

جنه 

ما فيش مشكله والله.. 

ماري

انا مش هقدر اعمل كده خلاص، المهم قوليلي بقي علي مواعيدك وامتي هتكوني فاضيه عشان نتفق علي يومين او تلاته في الاسبوع نتقابل فيهم.. 

_قبل ما ترد عليها جنه وقف جنبيهم فارس مندور وقال بنبره خبيثه.. 

فارس

مش معقول كل ما اقرر اجي الناادي اشوووفك.. 

وقعد معاهم مكان فؤاد. وقال 

اكيد دي مش صدفه وبعدين هنبقي زملا في كليه واحده ومش عيب اننا نتعرف ولا ايه؟ 

جنه بضيق 

لو سمحت قووم من هنا.. 

فارس 

لا مش هقوم، فكريني بس انتي قولتيلي قبل كده اسمك. ايه؟ 

وقف فؤااد وراااه في الوقت ده وقال 

قالتلك امتي بقي اسمها يا رووح امك.؟.. 

_بصتله جنه بخووف و؟؟.