رواية الوجه الاخر للرحمة الفصل الثامن عشر18 بقلم عبير ادريس
_ ترة اعرف انت جوا كالولي الموظفين افتح الباب اريد احاجيك ..
ياطلابة الطلابة شلون ورطة هاي ، طلعت الموبايل كتبتله هم مارد ، رحت للباب نسيت الكمامة رجعت لبستها ووكفت كبال المرايا فتحت البوري اخذت مي ولزكت شعري مثل يوسف وفتحت الباب اتثاوب باوعتلها خطيبته فرح ، يااااابه شلون كبسة هاي ، شلون تنحل ؟
دفعتني وفاتت ، خرب ان باوعت على جتفي لزمة يد واضحة وصريحة عليها ضربة جزاء هاي ، ادردم وي نفسي احسن ما اطك من القهر..
رجعت مددت على القنفة كلت اسوي روحي مريض ونعسان ولا صاحي وندمان ، خليت راسي على المخدة وغمضت عيوني
فرح : بس كولي تليفونك وين ؟ ليش اتصل ما ترد ؟
شهم : يمكن ناسيه بالبيت
فرح : شلون ناسيه بلة ؟
شهم : شلون ناسيه شنو ؟ نسيته وسبحان الما ينسى
فرح : شبيه صوتك اشو بالكوة تحجي وخانك روحك بالكمامة انزعها منو يمك وخايف عليه؟
مدت ايدها رادت تجرها جلبت بيها مثل البنية من تجلب بحجابها ، اذا نزعتها حي على الصلاة تكشفني ، مركزة بوجه يوسف اكثر من تركيزها بصلاتها ..
ومن رحنا خطبناها عرفني عليها شافتني ضلت تباوع بوجهي التفتت ليوسف وكلتله صح اكو شبه فضيع بينكم بس اللي يركز يكدر يفرق ..
شهم : عوفيها لابسها حتى ما اعديج
فرح : شنو بيك ؟
شهم : كولي شنو مابية
فرح : ليش صاير شي وياك ؟
شهم : لا سلامتج
فرح : اذا ما صاير وياك شي ليش ماترد علية ؟ اتصلت عليك هواي ابو الخط ما اجاني وكلت تمرلي بطريقك
شهم : صارت بعد واخذتني النومة وموبايلي ناسيه بالبيت ويمكن ضايع واصلاً انه بايت هنا
فرح : هسه اتصل عليه اذا دك ومحد يجاوب معناها بالبيت واذا انغلق معناها مبيوك
شهم : واحتمال خلص شحن
فرح :بيها وجهة نظر ، خليني اتصل
اتصلت ، من كالت الو سحبته منها خفت تحاجي يوسف وننفضح
شهم : الو حبيبي بلا زحمة تليفوني وكعته من جيبي البارحة اي اللي عندك هذا
يوسف : شنو فرح يمك ؟
شهم : اي موبايلي هذا
يوسف : تدري نسيت اخذتني نومة ومن كعدت صافن فاصل عن الدنيا بحيث من اتصلت فرح جاوبتها وانه ناسي موضوع روحتك للمستشفى
شهم : اي خلف الله عليك لو ضايع جان تورطت ورطة ما منها مخرج
يوسف : لا يمعود كول ياالله
شهم : كايل ياالله ، هسه شنو تجيبه لو انه اجيك آخذه ؟
يوسف : فايت اسبح وقريب ما اوصل ابلغك تطلع وتجيني يم الفلكة حتى نتبادل السيارات
شهم : ها اي اندليت المكان كلش قريب علية رحم الله والديك على الأمانة بس كولي البزونة شلون اشحتها
يوسف : يا بزونة ؟
شهم : اللي باللعبة
ضحك وكال
يوسف : ها عاملها ببرود متزاعلين لا تاخذ ولا تنطي وياها هواي ، اجي وانه اتصرف
شهم : اي حبيبي هواي تحجي انت يلة روح شوية واجيك مع السلامة
مدلها الموبايل وكال
شهم :ابن حلال بس لزكة
فرح : وين مضيعة ؟
شهم : شمدريني يمكن بالبانزين خانة من رحت افول
تركتها ورجعت مددت غمضت عيوني شو هاي تقربت مني وهمست
فرح : سويلي مجال اكعد
يابه شصار بية ما جنت متخيل اصير بهيج موقف وفوكاها وي خطيبة اخوي
شهم : ابعدي لا تتمرضين وين لازكة روحج
رجعت غمضت عاكد حاجبي ، رجعت تحجي وانه استغفر بداخلي شلون طلابة هاي
فرح : يوسف حبيبي يوسف
شهم : هممم
سويت روحي نايم
فرح : تحبني ؟
شهم : مادري
فرح : شنو ما ادري صارلك كم يوم زعلان علية مو كافي؟
شهم : لا مو كافي زعلي ثكيل تدرين بية
فجأة ماحس بيها الإ ودنكت باستني من خدي وهمست تبجي
فرح : والله مو قصدي اضوجك واني اصلاً ما ادري بيهم من غيروا اوقات العلاج ، مشيت حسب الجدول
شهم : هسه لا تحجين ولا تبررين خليني انام ومن اكعد نحجي بالي مو يمج
فرح : وين بالك ؟
شهم : بجهنم يم اخوية الغبي اللي ورطني بهيج ورطة سودة
فرح : منو شهم لو كميل ؟
شهم : شهم شهم الأثول اللي ما حسبها صح ومشى ورا گلبه من الصبح ليهسه الف مرة ردت انجلط عليه يطبب روحه بمطبات غبية لأبعد حد
فرح : عوفك منه ، بحة صوتك تموت صايرة لا يكلك المرض
شهم : ذكريني بين يوم ويوم اتمرض حتى تبقى وتعجبج
فرح : شلون هيج صار؟
شهم : شنو هو ؟
فرح : صوتك شبيك ؟
شهم : جنت بحفلة وغنيت بيها لحبيب علي و راح صوتي اي غير مريض شبيج تحقيق هو خوما تحقيق ؟
فرح : والله مو بس صوتك حتى وجهك من يم اللحية اكو تغيير بس مداعرفه ، حباب انزع الكمامة شبيك مجلب بيها ؟
شهم : انه اكولج شنو التغيير بدون ما تنزعيني ، ماخذ خيط ارتاحيتي ؟
فرح : شبيك اليوم حتى اسلوبك مو طبيعي عبالك شارب شي
شهم : فرح تعبان ما نايم ارحميني
فرح : يلة نام نام طالعة
دك الموبايل باوع يوسف ، كام من مكانه راح ورا المكتب وفتح خط
شهم : تجيب التليفون لو اسويها ظلمة عليك
يوسف : ها شبيك سالمين مسافة الطريق واكون يمك
باوعلها طلعت وسدت الباب رجع يحجي وياه
شهم : يمعود لزكتلي فد لزكة ، تعال الإ تنزع الكمامة تريد تشوفك شلون محدد لحيتك
ضحك وكال
يوسف : اي انزعها خل تشوف الحلاق شلون شاطر ورتبك
شهم : اي يوسف الحلاق ، حلقت لحيتي من وراك
يوسف : تطول تطول المهم جان نزعتها وبردت گلبها
شهم : غير تعرفني
يوسف : ما تميز
شهم : يا متميز غير شايفتني
يوسف : يمعود لحكت تنسى
شهم : عيني لا اشوفها ولا تشوفني عوف سوالفك هاي وتعال لا تورطني أكثر
يوسف : اطلعلي راح اوصل
شهم : يلة اجيتك
سديته منه واخذت السويج وطلعت قفلت الباب ، صار بوجهي مدير المستشفى سلمت عليه ودنكت راسي عبرته صاح
عدنان : دكتور وين ؟
وكفت بمكاني ناطيه ظهري
شهم : رايح للبيت اغير ملابسي واجي
عدنان : مو صاير تداوم هواي ؟ اللي اعرفه عندك عيادة ومرتبط بناس مرضى ، مدا اشوفك تداوم هناك ؟
التفت عليه عاكد حاجبه وكال
شهم : وين المشكلة ؟ المرضى هنا محتاجيني أكثر
عدنان : اي بس مو لدرجة تبات كل يوم ؟ لعد المقيمين شنو شغلهم ؟ وليش مسويلهم جدول ؟ انت استشاري تراقب وضع الحالات وتكتبلهم علاج وتنطي نظام للكادر يمشون عليه الداتسويه كله مو شغلك
شهم : واذا الكادر ما ماشي على هذا النظام ؟ وماكو توجيه صحيح ؟ اضطر ابقى فوك راسهم
عدنان : اللي فهمته من كلامك مطول بالمبيت ؟
شهم : شعندي رجال عزابي لا وراية ولا كدامي بس انت والمرضى
عدنان : شتقصد دكتور ؟ هاي الأيام صاير تلمح هواي
شهم :ما قصدي شي ، بس حبيت اصيرلك عين ثالثة داخل المستشفى واسد عنك النقص ان وجد ، ركز ان وجد حتى لا تكول يلمح
هز راسه ساكت عفته وطلعت صعدت السيارة واجيتك
يوسف : مرعوب من فكرة وجودي ليش كلتلك داوم بدالي ما اريد انطيهم فرصة يتحركون بمزاجهم وبراحتهم
شهم : اي واضح عليه خايف ، المهم انه رايح لدوامي وانت دير بالك على نفسك
يوسف : شوكت تروح لأهل تقى ؟
شهم : اليوم من اطلع من دوامي اروحلهم
يوسف : ذيب
شهم : منو اخوي ؟
ضحكوا وتبادولوا السيارات وكلمن راح لدوامه ..
يوسف قبل لا ينزل من السيارة لبس كمامة حتى يكمل المشهد من بعد شهم ، دخل لغرفته ، لبس اللابكوت واخذ الدفتر والقلم حطه بجيبه وطلع متوجه لغرف المرضى ، افتر عليهم اطلع على حالاتهم واحد واحد ، وكتبلهم لستة بالعلاجات تكفي لمدة اسبوع وبلغهم يمشون على هذا النظام وممنوع يغيروه ..
جانت اباله فكرة يهرب ريحانة خلال هذا الاسبوع وحتى لا يقصر وياهم سوة هيج ..
توجه لغرفة ريحانة دك الباب ودخل ، جانت توها كاعدة من النوم ، ابتسم
يوسف : صباح الخير صايرين كسولين
ريحانة : صباح النور ، شلون صرت ؟ بعدك مريض ؟
يوسف : اي بعدني
ريحانة : بس صوتك احسن من البارحة
يوسف : مو شربت سوائل دافية فادتني وآخذت علاج ..
ريحانة : بيها العافية ان شاءالله
يوسف : الله يعافيج ، شلونه وضعج اليوم احسن ؟
ريحانة : احسن بس ضجت كلش وخايفة
يوسف : ضجتي من شنو ؟
ريحانة : اريد اطلع منا
سد الباب سحب الكرسي وكعد منها قريب وكاموا يحجون همس
يوسف : ليش تريدين تطلعين ؟ ومن شنو خايفة ؟
ريحانة : اذا ما طلعتي انت هم راح يطلعوني
يوسف : ما يكدرون انه موجود
ريحانة : ما تكدر تمنعهم
يوسف : منعتهم سابقاً وامنعهم مرة ثانية وثالثة ورابعة
ريحانة : يكيدولك لا عبالك سهلين وتستهان بيهم
يوسف : منو تقصدين ؟ قسور وعدنان ؟ احجيلي كلشي حتى اطلعج منا بأسرع وقت
ريحانة : وعد اذا طلعتني وأمنتني راح احجيلك كلشي
صفن عليها يفكر دنك على الدفتر بعدها رفع راسه باوعلها و كال
يوسف : اليوم
ريحانة : شنو اليوم ؟
يوسف : اطلعج
صفنت عليه بهتت ، وضحكت فرحانة
ريحانة : معقولة ؟ بهاي السرعة ؟
يوسف : اي رايد نسبقهم بخطوة
ريحانة : وشلون تطلعني ؟ ماراح يوافق عدنان على طلعتي حتى لو كتبت تقرير بيه سلامتي
يوسف : ومنو كال طلعتج تكون اصولية ؟
ريحانة : شلون لعد ؟
يوسف : نهرب
ريحانة : نهرب ؟ اشو تحجيها بشكل جماعي ؟ منو يهرب ؟ اني وانت ؟
يوسف : اي
ريحانة : بهيج حالة راح يعرفون انت طلعتني وتتورط
يوسف : لا اكو ابالي خطة لا تخافين
ريحانة : وهي ؟
يوسف : ما عليج المهم اللي اكوله تنفذيه بحذافيره
ريحانة : وشنو المطلوب مني ؟
يوسف : بالليل ابلغج بالتفاصيل بس ارتبها
ريحانة : تمام انتظرك
يوسف : اكلتي ؟
ريحانة : كعدوني قبل ساعة واكلت شوية
يوسف : كلش زين ، آخذي علاجج وانتظري مني خبر
هزت راسها وآخذت العلاج
طلع منها رجع لغرفته ، كعد شوية وراها آخذ موبايله وطلع كعد بالسيارة ، اتصل على شهم
شهم : الو ها حجي ؟ خوما انكشفنا احضر نفسي للحساب ؟
يوسف : لامو بالحيف ننكشف ، جهزلي نفسك لغير شي
شهم : غرد اسمعك
يوسف : شكد باقيلك وتخلص دوام ؟
شهم : نص ساعة
يوسف : وين تروح وراها ؟
شهم : ارجع للبيت اتغدا وي ضحى واشوفها ظل بالها علية وبقت تحقق على ها خفارة مفاجأة وما حاجيلي عبالها بايت يم وحدة ما تدري بايت وي المخابيل مال يوسف
يوسف : اسمهم مرضى مو مخابيل ما اسمحلك
شهم : شلون ما تلوزها المعنى واحد
يوسف : المهم ورا الغدا شنو خططك ؟
شهم : اروح لأهل تقى اجيب اخوها العار
يوسف : آجل موضوعهم لباجر نروح انه وياك
شهم : شعجب آجلته مو جنت مستعجل ؟
يوسف : اليوم بالليل نهرب ريحانة من المستشفى
شهم : تحجي صدك انت ؟
يوسف : اي
شهم : شنو اللي استجد ؟
يوسف : هي تريد تطلع
شهم : لا يكون خطة منهم حتى يتخلصون منك ؟
يوسف : لا واثق بيها
شهم : تسلم لحيتك لمرة ؟ وفوكاها شاخطة ، وين عقلك وتمشي وراها ما تكولي
يوسف : احسن ما تختفي وابقى عايش بالندم طول حياتي على الأقل اكول جربت وسويت العلية
شهم : والله ما ادري سالفتك مكيسة
يوسف : انت وياي لو شنو ؟ تكمل لو تعوفني وحدي ؟
شهم : نكمل يابه نكمل شلون اعوفك ؟ احجيلي اكو ابالك خطة معينة ؟
يوسف : اي اسمع
حجاله الخطة بالتفصيل واتفقوا ساعة وحدة بالليل ينفذوها ..
اول شي سواه يوسف راح اشترة عباية وشال لريحانة ورجع صف السيارة كبال المستشفى نزل منها فتح البنيد كطع واير التشغيل وبعد وايرات ثانية من المكينة ، رجع شغلها ما تشتغل ، تركها ونزل ، دخل للمستشفى ، راح لغرفته ، قبل لا ينتهي الدوام بربع ساعة انفتح الباب دخلت فرح
فرح : مساء الخير
يوسف : مساء النور
فرح : توصلني للبيت ابو الخط ما يكدر ييجيني
يوسف : يلة اوصلج
ابتسمت وكالت
فرح : اجيب جنطتي واجي
يوسف : منتظرج
راحت ورجعت جان منتظرها باب غرفته ابتسمتله وهمست
فرح : يلة نروح ؟
يوسف : يلة
طلعوا من المستشفى صعدوا بالسيارة شغلها ما تشتغل
يوسف : استغفر الله ربي بس لا رجعت تعطل
فرح : ترة قديمة وطبيعي تعطل شوكت تبدلها ؟
يوسف : ابدلها ابدلها ليش لا بس مو هسه
نزل فتح البنيد يشوف الخلل وين ، سده وباوعلها من الجامة الأمامية رفع اكتافه بلا حيلة تقرب من جامتها وكال
يوسف : تحتاج مصلح
فرح : اهووو يعني ماراح توصلني ؟
يوسف : آخذلج تكسي ماكو حل ثاني
فرح : وعادي عندك اروح تكسي وحدي ؟
يوسف : شلون اجيتي الصبح ؟ مو بتكسي ؟
هزت راسها وكالت
فرح : اي
يوسف : ارجعي بتكسي سهليها تسهل
مشى وكف تكسي نطاه العنوان وحاسبه ، رجع للسيارة فتحلها الباب وطلب منها تنزل ، نزلت وهي تأفأف ، فتح باب التكسي صعدت ، سده وتقرب من جامة السايق
يوسف : بأمانتك كابتن
_ بعيوني تدلل
ضرب على السيارة وكال
يوسف : توكل بالسلامة ، من توصلين طمنيني
هزت راسها وما ردت .. رجع للمستشفى فات لغرفة عدنان جانوا الموطفين ملتمين سلم عليهم وحاجاه كدامهم حتى يكون عنده اكثر من شاهد على كلامه في حال صار اللي مخططله ..
وهذا الحديث جان من ضمن الخطة
يوسف : دكتور اليوم بالليل اطلع اريد اشوف الأهل الوالدة شوية تعبانة وتريد تشوفني
لمعت عينه وكال
عدنان : اي شكو بيها انت تعبت هواي بالفترة الأخيرة وتحتاج ترتاح
يوسف : اضطريت يادكتور واحنا حجينا بهذا الموضوع الصبح وبلغتك ماعندي شي بس اجاني اتصال مفاجئ شسوي ؟
عدنان : لا شتسوي من حقك ترتاح روح وسلامي للوالدة
يوسف : يوصل ، راجع لغرفتي اكمل شغلي واحطلك التقارير على الميز مال اسبوع في حال تأخرت اطلب منك اجازة
عدنان : اعتبرني موافق عليها تستاهل تآخذ ريست من العمل وتفصل شوية
يوسف : اذا ما محتاج شي اروح
عدنان : لا مامحتاج الله وياك
تركه ورجع لغرفته اتصل على شهم واتفقوا على باقي التفاصيل من الخطة
طلع يوسف من غرفته وتوجه على الجدول الموجود بالوحة المثبته على الحائط وكف كبالها وايده بجيوبه ، قرأ اسماء المقيمين المتواجدين هاي الليلة ، رجع لغرفته آخذ كم شغلة وراح لغرفة ريحانة
دخل باوعتله ضحكت
ريحانة : راح نطلع ؟
يوسف : بعد مو هسه
ريحانة : ان شاءالله تضبط ويانا ، بس خايفة كلش
يوسف : لا تخافين ثقي بية
ريحانة : واثقة والله بس ما يمنع اخاف
يوسف : الخوف بهيج حالة شعور طبيعي بس ان شاءالله تضبط ويانا وما آخذلج
ريحانة : ان شاءالله
طلع العباية وحطها على السرير وياها شال وكمامة ، نزلت عينها عليهن وسألته
ريحانة : شنو هاي ؟
يوسف : من ابلغج ألبسيهن لفي الشال ونزليه على عينج ولبسي الكمامة وراها لفي نفسج بالعباية ما اريد يبين منج شي
ريحانة : ليش ؟
يوسف : علمود موضوع الكامرات خاف ما نسيطر على وضعهن
ريحانة : تمام
بعدها طلع علبة من جيب اللابكوت فتحها، باوع على الكلادة البيها وحجى مبتسم
يوسف : هاي جدتي نطتها الية كالت اهديها لوحدة تستاهلها بيها آيات قرآنية للحفظ البسيها ، وان شاءالله تحفظج والحفظ من الله سبحانه
آخذتها منه مبتسمة باوعتله وهمست
ريحانة : هاي ذهب ؟
يوسف : اي
ريحانة : وليش تنطينياها ؟
يوسف : كلتلج للحفظ ، البسيها ولا تنزعيها آبد
هزت راسها ولبستها
يوسف : هذني ضميهن وية ملابسج في حال احد دخل وراية ما يشوفهن
ريحانة : تمام
طلع منها واتصل على شهم
يوسف : شنو الوضع ؟ كلشي تمام ؟
شهم : لك جماعتي هتلية كالوا نسويها بس تغدينا
يوسف : اغديهم احسن واطيب غدة بس كون تضبط
شهم : لا من هاي الناحية حط ايدك بمي بارد
يوسف : وشنو فهمتهم ؟ شلون وافقوا ؟
شهم : كلتلهم اخوي مهدديه وانه اريد ابعده عن المستشفى فترة ونبلغ بأختفاءه وراها نشوف شنو الوضع ونرجعه
يوسف : وصدكوا بالقصة ؟
شهم : اكيد يصدكون البلد تايه وشرحتلهم الوضع كالوا صحيح الشريف ما يعيش بنصهم
يوسف : متأكد منهم مالي ايدك ؟
شهم : شنو السالفة يوسف ترة جماعتي مو حي الله ناس عادية منتقيهم انتقاء
ضحك يوسف وكال
يوسف : خرب بعقلك المهم غطوا وجوهكم زين ما اريدكم تنعرفون اكيد راح تصوركم الكامرات
شهم : انت شنو غرضك من هذا الشي ما كلتلي ؟
يوسف : في حال اختفيت يراجعون الكاميرات يشوفني دا انخطف ومحد يحاسبني بالعكس موقفي اقوة راح يكون
شهم : وشلون تطلع من المستشفى بعدها ؟
يوسف : من الباب الخلفي
شهم : ماكو كامرات ؟
يوسف : اكو بس انت راح تصعد تطفيهن
شهم : زين في حال واحد شافنا من خطفناك وبعدها ترجع تدخل و الحظ يسويها ويشوفك شلون بهيج حالة ؟ هاي ما فكرت بيها ؟
يوسف : فكرت طبعاً ، اول شغلة من تاخذوني محد يشوفنا فقط الكامرات تسجل
شهم : شلون محد يشوفك الحرس وين ؟
يوسف : هو بس واحد موجود وبهذا الوقت يكون بغرفته ونادراً يطلع منها لا تخاف انلهيه قبلها
شهم : ماشي فهمت ، دليني على مكان الكامرات
يوسف : بالطابق الفوك اكو غرفة على اليسار بيها ولد يكعد اسمه مهند يحبني وعلاقتي بيه طيبة ، اطلب منه يسويلك جاي ، دائماً اروح اشرب يمه ..
من يطلع من الغرفة انت طفي كامرات الطابق الأول وكامرات الحديقة الخلفية وراها انزل واطلع من البناية، روح لغرفتي آخذ جنطتي واطلع من الباب وجماعتك يكملون الباقي
شهم : يعني انه اللي انخطف ابدالك ؟
يوسف : اي وانه اطلع ريحانة
شهم : وانه اكل الكتلة
يوسف : وصيهم يبسطوك على كيف
شهم : يوسف ما اتفقنا هيج
يوسف : شهم هي كتلة ورايحة شنو السالفة ؟ جلدك يتحمل كتل
شهم : الله يرضاها آكل الكتلة بدالك ؟
يوسف : بس مرة وتعدي
شهم : يولي جماعتي ايدهم ثكيلة وعايشين الدور متحلفيلك
يوسف : وصيهم يداروني دخيل بختك
شهم : يا يداروك ؟ غير كلتلهم ضربوه بالاخمس حتى يبين المشهد واقعي
يوسف : تلكى اعمالك حبيبي
شهم : هسه شنو ؟
يوسف : شنو ؟
شهم : انه الراح انكتل مو ؟
يوسف : اي ولا تنسى تلبس كمامتك
شهم : ماشي ماشي
يوسف : مرلي للبيت قبل لا نسوي اي شي
شهم :ليش تودعني ؟
يوسف : لا نلبس لبس موحد
شهم : حتى هاي مفكر بيها ؟
يوسف : شلون لعد ؟
شهم : روح كدامي وانه اجي وراك
يوسف : يلة رايح
رجع للبيت لبس قميص وبنطرون باللون الاسود ، وطلع لشهم ملابس نفس اللون ، لبس ونزل جوا اتصل على شهم
شهم : بالباب انه افتحلي
يوسف : يلة اجيت
دخل تسالموا وصعدوا فوك ، شهم غير ملابسه وراها وكفوا كبال المرايا ، باوعله يوسف مبتسم
يوسف : احسن شي ابوك سواه من خلفنا نتشابه
شهم : وانه دوم واكع بمشاكلك واركع وراك شنو مستفاد من هذا الشبه؟
يوسف : خوة هي لو شنو ؟
شهم : خوة خوة ، يلة نبلش ؟
يوسف : نبلش
شهم صعد سيارته وتوجه للمستشفى ويوسف آخذ تكسي ، وصل حاسبه ونزل ، اتصل على شهم
يوسف : شنو الوضع جماعتك اجو ؟
شهم : كلشي تمام منتظرين اشارة منك
يوسف : فايت اشوف الوضع وابلغك
شهم : تمام
دخل للمستشفى افتر بيها هدوء ماكو احد ، دخل غرفته لبس الكمامة وطلع منها راح لغرفة ريحانة وبلغها تحضر نفسها
يوسف : ربع ساعة الكاج جاهزة
ريحانة : تمام
يوسف : رايح ارتب الوضع وراجعلج
ريحانة : انتظرك
طلع منها وراح للحارس نعمان سلم عليه والثاني رحب بيه
نعمان : خير دكتور محتاج شي ؟
يوسف : اي والله رايد منك شغلة
نعمان : كول وتدلل
يوسف : رايد اروح للأهل وسيارتي من الصبح ما تشتغل ما تجي وياي بلكت تدفعها خاف تحتاج دفع
نعمان : يلة اجيت
مشوا للسيارة صعد يوسف شغلها ما اشتغلت باوعله جان واكف برا
يوسف : ما تشتغل
نعمان : افتح البنيد اشوف . .
فتح البنيد ونزل وكف بصفه ، فتح ضوا الموبايل وجهه على المكينة
نعمان : دكتور انه ما افتهم بالسيارات
يوسف :شلون هسه ؟ ضروري اصلحها اريد اطلع بيها
نعمان : والله ما اعرف
يوسف : شوفلي مصلح
نعمان : بهيج وقت ما اتصور مفتحين
يوسف : لا اكو انطيك عنوان واحد وروحله هذا يبقى مفتح لوقت متأخر
نعمان : وشلون اعوف المستشفى ما اكدر
يوسف : انه موجود
نعمان : دكتور والله اتحاسب اذا صار شي وانه ما موجود ؟
يوسف : يمي اكولهم انه دزيته
تنهد سحب نفس وكال
نعمان : يلة انطيني عنوانه
طلع ورقة صغيرة من السيارة وكتب عليها العنوان ونطاه فلوس تكسي
نعمان : لا دكتور شنو السالفة ؟
نعمان : آخذها حبيبي فوك ما مكلفك تدفع كروتك
آخذها ، وكف تكسي وراح ، مشى بسرعة للمستشفى دخل بمكان واتصل على شهم
يوسف : ابو الأشهام
وتنذب بركبتي وتصير ذمة
واضيع بنص درب وبعيوني لمة
احسب خطاي خطوة خطوة
وادري الجرح ما ينسى ذمة
شهم : اذا انذبت بركبتي خلها خلها
يا محلاة الخل من ايطيح اعله خله
الله شذكرك بيها هاي ؟
يوسف : اجت ابالي ، يلة حبيبي نبلش ؟
شهم : نبلش حاضرين
يوسف : تعال اصعد لغرفة الكامرات حتى افوت لريحانة براحتي
شهم : تم بس خليك وياي على الخط لا تسده
يوسف : تمام
شهم : مكانك بيه كامرات ؟
يوسف : لا
شهم : زين هسه ادخل بملابسي لو بالدشداشة والشماغ ؟
يوسف : لا البس الدشداشة ولف وجهك بالشماغ وفوت لان انه دخلت قبلك وصورتني الكامرات شلون تدخل مرة ثانية ؟ راح يعرفون اكو خلل بالموضوع
شهم : زين منا منا ماكو واحد يمنعني افوت ؟
يوسف : ماكو بس موظف الاستعلامات وهذا مطفي على الآخير انطي خمسة يفوتك لغرفة المدير
شهم : شنة هذا الفساد ؟ راج اتخبل
يوسف : شعبالك محد بحال هاي الناس
شهم : يلة لبست راح اجي
يوسف : منتطرك تعال ورا الاستعلامات اكو درج هذا ما بيه كامرات
شهم : تمام
دخل مدنك راسه وبالفعل محد سأله وين رايح ومنين جاي مجرد طلع خمسة من جيبه دخله ، مشى للدرج شاف يوسف صعد اول بايتين وتحاضنوا بقوة ..
شهم : دير بالك على نفسك ما اوصيك ؟
يوسف : وانت هم
شهم : انه صاعد اطفي الكامرات وراها اطلع
يوسف : اي وانزع هنا ملابسك خليهن على الدرج من تطلع اخذهن وياك
شهم : تمام
يوسف : بحفظ الله
صعد لغرفة الكامرات ثبت الكمامة ودك الباب بعدها دخل
شهم : السلام عليك شلونك هنودي
التفت باوعله ضحك ومدله ايده
مهند : حبيبي دكتور كل الهله تفضل تفضل
شهم : شلونك ؟
مهند : بخير وانت ؟
شهم : الصراحة راسي يوجعني ومشتهي جاي من ايدك الطيبة بلكت اشربه ويتعدل
مهند : صار بعيوني هسه اسويلك اطيب جاي
طلع من الغرفة وفات لغرفة مقابيلها صغيرة كلش بيها طباخ صغير وبلش يسوي الجاي ، عافه شهم ورجع لغرفة الكامرات ، اتصل على يوسف ...
شهم : كلها وايرات ياهو اطفيها ؟
يوسف : مكتوب على كل واير رقم الطابق
شهم : انت تريد الاول كلتلي ؟
يوسف : اي والحديقة الخلفية
شهم : تمام ، وهاي فصلتهن اتوكل وانتبه على نفسك
يوسف : دقيقتين وانت اطلع من المستشفى ونفذوا الخطة انه راح انزل من الدرج
شهم : تمام و هاي ساعتي دقيقتين ونازل ، الجاي شكد يطول بيه؟
يوسف : ربع ساعة
شهم : تلحك بيها ؟
يوسف : ان شاءالله
شهم : يلة توكل يابطل
طلعت من غرفة الكامرات ورحت لمهند وكفت بالباب احاجيه
شهم : ماعندك جرك كعك ناكلهن وية الجاي ؟
التفتله مبتسم
مهند : لا والله دكتور تحب اجيبلك ؟
شهم : اكون ممتن كلش جوعان ما متعشي
مهند : لا بسيطة عبالي تريد شي يمعود
شهم : امشي انه وياك نروح
مهند : لا دكتور شنو السالفة ؟
شهم : اي والله شبيك
طفى الطباخ وطلعوا سوا من المبنى مهند التفت عليه
مهند : دكتور والله ما تجي ازعل عليك
شهم : مو ما يصير المحل بعيد عليك اخذك بسيارتي...
مهند : ابد والله اتمشى
شهم : يلة منتظرك هنا بالباب
راح وشهم دز مسج لجماعته بلغهم يتحركون وبعدها دز ليوسف
شهم : يوسف الشغلة يمي تمت
يوسف : عاشت ايدك احنا شوية ونطلع
رجع دزلهم مسج ، كوا........اللي يأذيني اموته وعلي
واحد منهم دزله على الكروب
_يمي يمي ما عليك
وكف كبال المستشفى ينتظرهم دقايق وطبكت سيارة كباله نزلوا منها اربع ملثمين ، حاول ينهزم ضربوه بالاخمس على راسه وكع بين ايديهم وسحلوه للسيارة
شهم : ولد الكلب ما اتفقنا هيج
واحد منهم صاح
_ انجب سد حلكك
ومشوا بيه بالسيارة ...
من جهة ثانية يوسف دخل لغرفته غير ملابسه بملابس ثانية تختلف عن لبس شهم واخذهن بجيس وياه ، بعدها طلع من غرفته وقفل الباب جان يتحرك بحذر ، مشى بالممر اظلم بس الضوا الاصفر يضوي من بعيد
الممرات هادئة بهيج وقت ، جانت الساعة وحدة ونص بالليل ، مد ايده يفتح باب ريحانة وفجأة يسمع صراخ قوي وضرب على باب حديد ، جمد بمكانه ، ركز صوت واحد من المرضى بالطابق الثاني ..
آخذ نفس قوي يهدأ نفسه ، دخل للغرفة سد الباب ريحانة شافته عاطت
نزع اللثام من وجهه تقرب منها وهمس
يوسف : اش اش انه يوسف
ريحانة : شمدريني راح تتلثم
يوسف : جاهزة ؟
ريحانة : اي
يوسف : يلة نطلع ، بسرعة ما عندنا وقت
ريحانة : يارب يارب بس شلون
تحجي وترجف ، ماتكدر توكف على حيلها تقرب منها يحاجيها ويهدأها
يوسف : لا تخافين الممر فارغ نطلع منه للحديقة الخلفية بس نعبرها يجينا الباب الخلفي نطلع نلكى سيارة شهم واكفة نصعدها ونروح شوفي شكد سهلة بس لا تخافين وتخربين كلشي
تنفست سريع وتهمس
ريحانة : تمام تمام جاهزة
لزم كف ايدها فتح الباب مد راسه باوع منا ومنا ماكو احد
يوسف : يلة بسرعة
صعد اللثام على وجهها ، بس عيونه طالعة وتأكد من ريحانة ما مبين شي منها غير عيونها
مشوا من يم غرف المرضى ، وحدة من الغرف المريض ضرب الباب بقوة ، ريحانة عاطت كتم نفسها بإيده ، مالت عليه كام يجر بيها ويمشي ، فجأة والمريض الجان يدفر بالباب كام يصيح ويفتح بمقبض الباب ويسده ، ريحانة جلبت بإيده تتوسله
ريحانة : خلينا نرجع بطلت ما اريد اطلع
يوسف : ريحانة ما باقي غير خطوة بس لا تخذليني
ريحانة : ما اكدر والله ما اكدر
يوسف : يعني شنو يريد يصير نموت ؟ احسن ما عيشتج هنا مرعوبة منهم بأي لحظة يغدرون بيج
كعدت بالكاع كامت تبجي وهو يتلفت منا ومنا ، دنك يريد يشيلها ما يكدر جسمه تعبان ونفسه صار اسرع
هم يحجون والمريض مستمر بالصراخ ، صارت حركة بالممر كام وسحلها وصل للباب فتحها ودنك نهضها سند طولها وطلعوا
يوسف : تعبتيني خرب ببليس
ريحانة : يوسف نسيت المشط الخشب
يوسف : بحال مشط هسه دمشي اجيبلج غيره
ريحانة : معلية والله ما اطلع اذا ما جبتلي المشط
يوسف : ريحانة تحجين صدك ؟ ترة احنا داننهزم مو رايحين برحلة حتى بكيفنا نطب ونطلع
سحبها ومشى للحديقة عبروها بسرعة وصلوا للباب فتحه مقفول ، لعن الحظ شلون ما حسبلها
يوسف : مقفول مقفول
يحجي ويهز بالباب بقوة ، شد الجيس مال الملابس وشمره من الحايط على الشارع حتى تخف حركته..
همست
ريحانة : شنو ماعندك مفتاح ؟
يوسف : ماعندي ماعندي نسيت سالفته نسيت شلون راحت من بالي شلون ؟
انطفى الأمل بعيون ريحانة وتبدل لخوف
حاول يسحبه ما يفتح
يوسف : مستحيل الغباء العندي شلون فاتتني ونسيت امرها ؟
ريحانة : خلينا نرجع وباجر نضبطها اكثر ونطلع
يوسف : ما ترهم لو اليوم لو ما نكدر اصبري اشوف تعالي
ريحانة : وين ؟
اخذها ومشوا لغرفة نعمان فتح الباب ودخل يدور على المفتاح
الغرفة صغيرة ، على صفحة جاي بارد ونفاضة جكاير على الطبلة ، و ليغاد كرسي بلاستك مكلوب ، تلفزيون قديم وسرير حديد متآكل من الصدأ وعليه فراش خفيف وسخ ، وكنتور خشب قديم
يوسف : خرب وينه دافنه وين ؟
هو يدور وخايف لا ينكشفون وريحانة تبجي وتولول متنكسة من المكان تخبل بالزايد ، باوعلها واكفة ترجف
يوسف : اكعدي هنا ارتاحي بس اشوف الغضب وين حاطه
ريحانة : وين اكعد ما تشوف القذارة مالية المكان ؟
يوسف : سبحانك ربي كلمن حاير بظيمه
ريحانة : شتقصد ؟
يوسف : انه وين وانتِ وين خليني ادور اسكتي نفسج ما اسمعه
فتح المجرات يدوره ، بعدها رفع الفراش دور جواه ، راح للكنتور فتحه يدور بخبال لهناك ودك موبايله طلعه من جيبه باوع للشاشة وكال
يوسف : وين حاطهن يا جلب وين؟
ريحانة : رد يمكن اتصال مهم
باوعلها ورجع غلق الجهاز حطه بجيبه
يوسف : مو مهم نعمان اتصل
ريحانة : ليش ما رديت ؟
يوسف : لأن مخطوف
ريحانة : فكاهي وكتك تتلاطف؟
يوسف : شبيج والله مخطوف ما متلاطف
عافها ورجع يدور ، لكى مجموعة مفاتيح آخذها والتفت عليها
يوسف : ابقي هنا افتح الباب واجي آخذج
ريحانة : معلية اجي وياك رجلي على رجلك
يوسف : وين اسحول بيج ابقي كلت
خزرها وحاجاها بلهجة أمر
طلع وهي ضلت بالغرفة ، راح للباب يجرب بالمفاتيح وايده ترجف من التعب ، جربهن كلهن لا واحد رهم ، رجع للغرفة
يوسف : خرب وين ضامه وين ؟
ريحانة : ما رهمن ؟
يوسف : ولا واحد رهم ، والوكت دايمشي مو من صالحنا
رجع يدور من جديد ، وريحانة تولول
ريحانة : شلون يوسف ؟ خلينا نرجع
التفت عليها ضاغط على اسنانه
يوسف : لو بس تبطلين تنكين براسي انه بخير
طلع موبايله الخاص واتصل على شهم وتليفونه الثاني اللي يعرفوه المستشفى مغلق
شهم : الو ها تمت ؟
يوسف : لا الباب الخلفي مقفول ومفتاحه ماكو
شهم : تحجي صدك ؟
يوسف : اي والله
شهم : والحل شنو ؟ هسه مهند لحك يرجع والحارس واكف كبال سيارتك هو والمصلح احتمال شوية ويخلصون
يوسف : انتبه لا يشوفوك
شهم : لا تخاف متلثم وواكف بالجهة الثانية
يوسف : هسه شنو اسوي انطيني حل
شهم : ارجع ونطلعها غير مرة
يوسف : ما اكدر
شهم : ليش ؟
طلع برا الغرفة حجى وياه حتى ما تسمعه ريحانة ، تلفت على باب الغرفة ودار ظهره عليها وهمس
يوسف : لان تركت ورقة بيها تخويل خروج ريحانة من المصح وعليها ختم وتوقيعي ، كاتب بيها تقرير كامل عن حالتها ومراحل شفاءها
شهم : ليش هيج سويت ؟
يوسف : كلت اسبقهم بخطوة من يكتشفون أمر خروجها وبعدها ارجع للمستشفى احتمال يتهموني ، بهاي الحالة احاججهم بالنسخة الثانية العندي واطلع منها
شهم : سهلة ناخذها من غرفته
يوسف : قافلها ما نكدر ، انطيني حل بسرعة ماعندي وكت ...
شهم : انتظرني راح افتر وراية البناية واشوفلك الوضع
يوسف : لا تجي ابقى راقب نعمان
شهم : مو مال اراقبه ماكو وكت ، والمصلح مبين مطول فرش و مدد جوا سيارتك
يوسف : يلة استعجل
صعد سيارته ومشى للجهة الخلفية صف السيارة ونزل
شهم : وصلت ، هاي الباب بس مقفولة بقفل وزنجيل من برا
يوسف : لا بربك ؟
شهم : اي والله
يوسف : افتر شوف بلكت اكو باب ثانية
افتر داير البناية وحجى ...
شهم : يوسف اكو بالجهة الثانية سياج حديد نعبرها من عليه ؟
يوسف : من ياجهة ؟
شهم : اليمنى
يوسف : وهذا السياج نكدر نعبرها منه ؟
شهم : شوفه اول وبعدين نقرر
ترك ريحانة بالغرفة ومشى للجهة الثانية باوع للسياج وكال
يوسف : من عقلك تحجي انت ؟
شهم : اي من عقلي ماكو طريقة ثانية
يوسف : سياج طوله مترين شلون اعبرها منه ؟ لعبة هي واشمرها ؟
سكت بعدها كال
يوسف : هاي اكو باب بس وين تودي ما ادري
شهم : شوفها بسرعة
يوسف : اجيب ريحانة ونروح سوة خاف يرجع نعمان وتصير مشكلة
يمشي سريع ويحجي
شهم : ليش هي وين ؟
يوسف : بغرفته
شهم : طلعها يمعود طلعها
يوسف : هو هسه
طب للغرفة سحبها من ايدها ومشوا للباب اللي شافه قبل شوية ...
ثواني تمر ثكيلة ، انفاسهم تتصاعد بخوف وتعب ، مد ايده لمقبض الباب انفتح ، تنهد وهمس
يوسف : واخيراً
دفع الباب قوية وصريرها اقوا من حديد ، ريحانة سدت اذنها ، مشوا ممر طويل نهايته باب ثانية عبارة عن حدايد رفيعة مثل السجن
يوسف : هاي باب حديد بس جنها باب سجن
شهم : وراها شنو ؟
يوسف : حديقة
شهم : تكدر تفتحها ؟
يوسف : شفتح منها ؟ بظهرها حاويات زبالة وجياسة والريحة تكتل
شهم : هسه اطلعوا بعدين سبحوا هي مال اتكيت
حاول يدفعها ما تندفع
يوسف : اتوقع هم مقفولة المشكلة ما اكدر اشوف زين من كمية القذارة الموجودة بالمكان ..
شهم : هسه شلون والحل ؟
يوسف : ارجع شوفلي نعمان بعده برا ؟
شهم : يلة رايح
صعد سيارته ومشى للجهة الرئيسية من البناية باوع وحجى وية يوسف
شهم : الحارس والفيتر ماكو اتوقع مخلصين
يوسف : انلاصت وهسه احتمال جبير الكامرات رجعت اشتغلت
شهم : اسمع كلامي وارجعوا
يوسف : ما ارجع ما ارجع
شهم : وشلون منين راح تطلع ماعندك غير الباب الرئيسي واذا سويتها مستقبلك ينتهي
يوسف : ما ادري دايخ خليني افكر بيها
شهم : اكو باب طوارئ ؟
يوسف : اكيد اكو بس وين ما ادري
شهم : دور بالطابق الأرضي قريب الاستعلامات او غرفة الأدارة تلكاها هناك
يوسف : بس شلون اطلعها مناك ما سوينا شي خو اطلعها من الباب الرئيسي
شهم : ماعندك حل ثاني
يوسف : آخر طريقة اجربها وان شاءالله ما تفشل
شهم : ان شاءالله ، فوت واخوك بظهرك ، اي شي يصير اطب اصلخهم
يوسف : ارحمنا جاكي شان
التفت لريحانة وكال
يوسف : لفي نفسج زين واي صوت وتأخير ما اريد وعيونج لا ترفعيها على الكامرات
هزت راسها بأي وجسمها يرجف ، مشوا بالممر طلعوا منه للحديقة الخلفية مروا من يم غرفة الحارس ، يوسف تلفت تقرب من الغرفة باوع بعده ما جاي رجع لريحانة آخذها ودخلوا للممر البيه غرف المرضى
كل خطوة محسوبة ، النفس ثكيل الدقائق بدأت تنفذ وكل تفكيرهم شوكت ينكشفون
شهم : ها بشر
يوسف : ما اكدر احجي اصبر
مشوا من يم غرفة الممرضين ، صوت ممرضة تحجي تليفون ، عبروا الغرفة بسرعة
مروا من غرفة مريض بعده كاعد يباوعلهم من الشباك ويضحك ، مشوا خطوتين وصاح
_ها كوا.....وين ؟
سحبها ومشوا بخطوات اسرع تتعثر وهو يسحل بيها
فجأة يطلع مريض من غرفته بوجههم ريحانة تعيط
ريحانة : بسم الله الرحمن الرحيم بسم الله بسم الله
عصر ايدها حتى تسكت ، باوعله يوسف وهمس بصوت خافت
يوسف : ارجع لغرفتك هسه يجيك الممرض
كام يهلهل ويصفك
_ ها ها وين وين ترارارا
ريحانة تتلفت عليه وترجع تمشي
يوسف : لا تتلفتين باوعي لطريقج
ريحانة : هاي شبيهم ؟
يوسف : دا يزفونا غير
شهم يضحك يوسف رزله سكت ويرجع يضحك ، استفزه غلق المكالمة وحط الموبايل بجيبه ومشوا يدورون على باب الطوارئ
ريحانة : يوسف يوسف
يوسف : ها
ريحانة : هاي لوحة بيها سهم مكتوب عليها مخرج طوارئ
همس يوسف
يوسف : صارت زحمة لو مكبريها شوية ، لو ما شايفتها ولا اشوفها
سمعوا صوت عربة معدنية بيها ادوية ، التفت شاف ممرض مدنك راسه بالموبايل ويدفع بيها...
سحبها وفتح الباب اللي تاخذهم لمخرج الطوارئ ، لزكوا ظهرهم بالحايط انتظروه يروح خطواته ابتعدت يوسف شغل ضوا الموبايل ومشوا ، الممر اظلم بية ريحة رطوبة مميتة سدوا خشمهم وقرب حلكه من اذنها وهمس
يوسف : حاولي تكتمين النفس لا تستنشقين من هذا الهوا هواي
ريحانة : اي
مشوا بسرعة كملوا الممر وصلوا لمفترق ممرين ، وكف يباوع منا ومنا
يوسف : هسه منين ؟
حجاها وتخصر
ريحانة باوعت منا ومنا وحجت تأشر
ريحانة : هذيج لوحة مكتوب عليها اتجاهات..
باوع وين ما اشرتله ومشوا للممر اللي يوصلهم لمخرج الطوارئ
وصلوا للباب دفعها ما تنفتح قوية ، رجع ليورا وتقدم يدفع بكتفه سمع صوت احتكاك قوي بالكاع ، انفتح قليل بحجم الاصبع ، باوع انصدم
ريحانة : ها شكو ؟
يوسف : زبايل ؟
ريحانة : واذا نطلع
يوسف : ما نكدر
ريحانة : ليش ؟
يوسف : لأن اكو كراتين على خشب قديم كراسي مكسرة الواح حديد يعني لو صار شي لا سامح الله نموت كلنا وما نكدر نطلع منا
ردت بصوت مكسور
ريحانة : يعني ماكو أمل
هز راسه بلا واتصل على شهم
شهم : هاي وينك حركت الموبايل عليك من خرب بضميرك اذا عندك ضمير وينكم ؟ طلعتوا بعد ؟ خلصتها افتر داير مداير المستشفى ادورك..
يوسف : ما طلعنا
شهم : ما رحتوا لباب الطوارئ ؟
يوسف : هو احنا كبالها هسه
شهم : مفتوحه ؟
يوسف : اي
يحجي بتعب ومرتاج على الحايط وصافن على الباب بعدها كعد بالكاع والموبايل على اذنه منتظر جواب شهم..
شهم : كلش زين دطلعوا عليمن باقين بعد
يوسف : شنطلع جبل زبالة وراها
شهم : لا بربك تحجي صدك ؟
يوسف : تحسهم متعمدين يموتون الناس بكل طريقة
نزع اللثام عن وجهه وريحانة نزعت الكمامة
والعباية وكعت من على كتفها بدون ما تحس
شهم : يوسف حاول تدفع الباب بقوة بلكت تنفتح على كد طلعتكم
يوسف : ما ترهم هواي غراض
شهم : جرب
يوسف : تعبان مابية طاقتي خلصت
شهم : كوم بداعتي وانه اشوف طريقة افوتلكم بيها اذا ما رهمت
يوسف : يلة كايم..
سد الموبايل وكام من مكانه مشى للباب بتعب ، حاول يدفع بيها ما تندفع رجع خطوتين ليورا وصافن يباوع عليها وعلى الوضع المزري بهذا المكان ، رجع يحاول تعب ، دنك لزم راسه دايخ تقربت ريحانة منه تريد تسأله شبيه ، وفجأة يسمعون صوت شخص وراهم جمد الدم بعروقهم وهو يكول ...
_ها دكتور وين ؟