رواية هنا يسكن شيخي الجزء الثاني2الفصل السادس6والاخيربقلم هدير اسامة
انا قلبي اتقبض أول ما لقيتهم باصين لبعض كده وكل واحد فيهم عارف التاني ، يا ترى ايه حكايتك انت كمان يا فريد !!!
فجأه لقيتهم بياخدوا بعض بالحضن وكلام كتير اوي
ودخل هو وفريد وقعدوا في الصالون وعاملين يضحكوا كتير
انا كنت مش طايق عريس اختي يا جدع علشان الكروته دي بس طالما انت العريس دا انت خدها وانت ماشي يا معلم
حبيبي يا فريد واحشني فينك من زمان يابني ، انت شكلك متغيرش خالص ، يارب تكون الدقن دي سنة يا فريد
لأ دي موضه الصراحه يا حوده ، ادعيلنا يا شيييييخ ربنا يهدينا
حبيبي ربنا يهديك ويهديني يارب احسن عبادته اللهم آمين
كل دا وأنا واقفه في ذهول
ايه الحوار يا فريد انت ومحمود أنا مش فاهمه حاجه ، انتم تعرفوا بعض منين ؟
فريد: كنا بناخد درس كيمياء عند مدرس واحد ، بس هو كان الدفعه اللي أصغر مني وكنت برخم عليه دايما والأستاذ
أما كان يتأخر كان يبعتني أحل مع المجموعه دي على ما هو يجي واتصاحبنا بقا بس اما دخلت الكلية مشوفناش بعض تاني .
محمود: واهو الصدف جمعتنا تاني يا هندسه الحمد لله .
فريد : انت دخلت ايه صحيح؟
طب بيطري
ليه يابني دا انت كنت أشطر واحد في دفعتك ، مدخلتش بشري ليه ؟
لأ الحمد لله جبت مجموع بشري بس كنت عاوز أدخل بيطري لأسباب كتير بعدين أقولهالك
بجد والله مبسوط ومش هلاقي لأختي أحسن منك يا محمود
حبيبي يا فريد أنا اللي مبسوط والله .
ـــــــــــ
انبسطت أوي إن فريد ومحمود طلعوا صحاب ، كنت حاطه ايدي على قلبي والله أول ما قابلوا بعض ، بس الحمد لله ربنا ستر ، كفايه عليا أمي مش هتصدم في أخويا كمان .
مر الأسبوع بسرعه وجه يوم الفرح ، عائشة طول النهار كانت معايا مسابتنيش ، كنت فرحانه أوي رغم إني كنت مخضوضة شويه ، لبست فستاني الابيض كان واسع وجميل ولبست الخمار والحمد لله من غير ميكب .
بعد شوية باب الأوضة خبط ودخل بابا وفريد
بابا خدني في حضنه جامد
أنا مش مستوعب يا حفصة إنك ماشيه خلاص ، أنا مكنتش عارف إن اليوم دا هيجي بالسرعة دي ، أنا لسه مشبعتش منك والله يا نور عيني
وخدني في حضنه جامد وفضل يعيط وانا مقدرتش أمسك نفسي من العياط ،
فريد : ايه يا جماعه في ايه والله دا فرح ، كفايه أحضان يا حاج دي مبقتش تبعنا خلاص
وهو بيتلفت لقى عائشة
راح وقف جنبها واستغل إن أنا مشغوله مع بابا
ومد ايده يسلم عليها ، عائشة اتكسفت : آسفة مش بسلم على رجاله .
فريد : ما أنا مش هاخد حته من إيدك أكيد
عائشة : النبي صلى الله عليه وسلم قال " «لأن يُطْعَنَ في رأس أحدكم بِمِخْيَطٍ من حديد خير له من أن يَمَسَّ امرأة لا تَحِلُّ له».
فريد : يا ستي معلش مكنش قصدي ، آسف أومال لو قولتلك انك حلوة هتعملي ايه ؟
عائشة بغضب : ستدفع الثمن غاليا
وسابت الأوضه ومشيت
فريد بتعجب : سأدفع الثمن غاليا !! يعني ايه ؟! طب تبا لكِ بقا.
فريد خرج من الأوضه هو وبابا وفجأه لقيت ماما داخله
أنا اتخضيت أما شوفتها وقلبي فضل يدب ، أول ما شافتني عروسة قدامها فضلت بصالي كتير وساكته
ماما انتي كويسه؟
بقيتي شبه يقين أوي ، كإني ربيتك فعلا ليها ، حتى نفس الحجاب ونفس الشكل من غير ميكب ونفس فستانها يعتبر ، أنا كنت داخله علشان أديلك حاجه كده تحطيها لمحمود تحت مخدته ، بس للأسف أما شوفتك حسيت مبقاش ينفع ، بقيتي عروسه زي القمر يا حفصة ، ربنا يسعدك يا بنتي ، أنا آسفة ،آسفة لو كنت حسستك بعدم وجودي طول عمرك دا ، وعاوزه أقولك حاجه كمان ، الشيخ بدر عمره ما بصلي أصلا ولا كان خطيبي ولا حاجه ، أنا بس كنت عاوزه أكرهك فيهم ، حتى يقين ، طول عمرها أحسن مني وطول عمري بغير منها ، هي تستاهل اللي هي فيه ، وتستاهل تاخدك مني يا بنتي ، هي أولى ..
وفجأه الدموع بدأت تنزل من عنيها
جريت عليها وخدتها بالحضن : انتي مش وحشه يا ماما ، انتي جميله أوي وناجحه جدا ، وانتي ربتيني أحسن من كل الناس ،عارفه الشيخ بدر قالي عنك ايه ؟ قالي أمك كويسه وانتي معدنك طيب
إسراء : بجد قالك كده ؟
والله يا ماما قالي كده
بس أنا مش كده للأسف
انسي يقين وانسي أي حاجه ، بابا بيحبك واحنا كمان ، حاولي تفكري فينا احنا وتعيشي لينا مش لحد تاني .
أوعدك هحاول ، المهم إنك طالعه زي القمر
ـــــــــــــــــــــــــ
كان أسعد يوم في حياتي بجد ، كفايه إن قلبي ارتاح ، وكمان هكون مع أكتر إنسان كان نفسي يكون هو بطل روايتي وبطل كل رواية
بعد شويه بابا دخل الأوضه خدني من إيدي :
يلا يا عروسة العريس جه
طلعت من أوضتي وأنا مكسوفة لقيتهم مزينين البيت كله ببلالين وورد وعاملين ديكور بلالين وكرسيين لينا أنا ومحمود ، أنا مكنتش أعرف إن الفرح هيتعمل في بيتنا ، كنت فاكره فرح إسلامي في قاعة وكده .
محمود أول ما خرجنا جه خدني من إيدي وباس راسي : زي القمر يا حفصة ما شاء الله
بجد حلوه؟
بقولك زي القمر
بس أنا مش حاطه ميكب
وليه تتنكري يا حفصة ما انتي كده زي الفل أوي
محمود انت رخم جدا
وبحبك جدا يا حفصة
محمود انت معملتليش فرح ليه ؟
هنتخانق هنا يا حفصة؟
لأ أما نروح بيتنا حاضر
بس احنا هنروح بيتنا بعد شهر بإذن الله
شهر !! ليه
الأسئلة الكتير دي مش هتخلينا نلحق الطيارة
طيارة !! محمود متهزرش ، احنا هنروح بيت الله ؟
هنروح بيت الله أنا وزوجي المصون
الدموع مبقتش عارفه أسيطر عليها وأنا بضحك ، أنا بقالي فتره بقول يارب ابعتلي أزورك ، يارب أنا عاوزه أجي ، مكنتش عارفه إنها بالسرعة دي
انا مش هقول الغرفة لا تسع أجنحتي ، أنا هقول الدنيا لا تسع أجنحتي بجد 🥹
الله يرزق كل بنوته بزوج صالح تقي نقي يحافظ عليها ويعينها على القرب من الله ...
تمت