رواية قدر مخفي الفصل الرابع4بقلم مريومة
كان سمير بيتخانق ف واحد خبط العربية
خرجت من العربية ونا بهدي سمير
"اهدى بقا يسمير
فهمني اي الي حصل"
"البني آدم دا خبط العربية كسر الاكصدام"
قال الشاب الي خبط العربية ب انفعال
"مش انت الي واقف ف نص الطريق"
على سمير صوته
"تقوم تخبط العربية كدا
ليي معندكش عيون
مش شايف إني برا العربية و موقفها عشان كنت بفك زنقتي"
ضحكت على كلمته ف هو بصلي ب عصبية
"اي مش بتفك زنقتك انت كمان"
طبطبت على كتف الشاب
"حصل خير يرجولة
بس يعني مشوفتش العربية وهي واقفة"
" والله يصحبي معرفتش أتحكم ف الفرامل
وعمال افهم ف صحبك دا وهو مصمم اني دخلت ف العربية عمد"
" حقك عليا انا"
قربله سمير
"مش هتمشي غير اما تدفع حق الاكصدام الي اتكسر دا"
طلع الشاب شوية فلوس وادهاني
"انا عملت حساب للراجل الجدع دا بس"
سمير كان هيزعق بس انا هديته وقربت للشاب
" خليهم ي صحبي
كفاية ذوقك معانا"
" معلش خدهم مني اعتذار"
" يعم اعتذارك مقبول من غير فلوس
الاكصدام مش أزمة يعني
اتكل ع الله ربنا يسهل طريقك"
هز راسه ورجع ل عربيته ومشي
بصلي سمير ب عصبية
" مخدتش الفلوس لي"
" انت متنرفز لي"
بصلي ومردش عليا ودخل العربية ورزع الباب وراه
دخلت وراه وقعدت جمبه وهو اتحرك بالعربية
"متعصب من اي يعم سمير
منت متقنعنيش ان الهمجية والعصبية الي انت فيها دي بسبب إنه خبط العربية لا وكمان بالغلط"
"اسكت ي آسر واتقي شري الساعة دي"
ابتسمت اوي لما مراته رنت وهو كنسل ف عرفت إنه متخانق فيها
"رد عليها وصالحها رد"
بصلي وقال بنرفزة
"مش هرد عليها ولا هكلمها
قلتلها مليون مرة اوعي تروحي عند خالتك طلما انا مش معاكي وهي مصممة تستفزني
الزفت ابن خالتها كان بيحبها قبل م نتجوز
وحذرتها من مرواحها هناك ورغم كدا خالفت امري"
"طب استفهم منها راحت لي
هي هتروح عشان تعاندك يعني"
"مهما كان السبب
لو خالتها بتموت
متروحش غير ونا معاها"
"خلاص يعم حصل خير كلمها واعرف منها راحت ليه وأخزي الشيطان"
"قولت مش هكلمها"
"طب اقف هنا"
بصلي وهو بيسوق
" لي"
" يعم أقف بس"
وقف وبصلي ب استغراب
" وقفت
هتفك زنقة؟"
ضحكت
" لا انزل يالا كلمها"
" آسر قولت مش هكلمها"
جاي يتحرك بالعربية تاني وقفته
"عشان خاطر آدم انزل كلمها"
بص لآدم الي نايم ف حضن امي ورجع بصلي وخد موبايله ونزل
فضل تلت ساعة برا بيتكلم معاها
طلعت راسي من الشباك
"مش معنى اني اديتك فرصة تصالحها تقوم تلطعنا هنا نص ساعة
دا كلها ساعتين وهتروح يبق حب فيها براحتك"
"اما أجيلك يبق نكمل كلامنا عشان البهيـ.ـمة دا مش هيسكت"
قرب مني والانبساط كان باين عليه
"الي يغير مننا يعمل زينا"
-------------------------
مر تلت ايام
يمكن عيدت حساباتي ١٠٠ مرة ف الايام دي
بس كانت النتيجة اني اكمل مع البنت دي
كنت قاعد بليل سهران دخلت امي عليا وقعدت جمبي
فوقت من شرودي على أيديها الي بتمررها على شعري
"آسر"
بصيتلها
"اؤمري يست الكل"
"إسمعني كويس
لو مش عايز البنت دي وحاسس نفسك مغصوب بلاها يبني
انا يهمني راحتك مع انسانة انت عايزها
اما حالتك دي مش عاجباني
رن على ابوها وقوله كل شئ قسمة ونصيب وهو راجل محترم وهيتفهمك"
عدلت قعدتي بحيث ابق قصادها ومسكت أيديها
"ماما
الرجالة مش بيرجعو ف كلامهم
ونا دخلت البيت وطلبت بنته على سنة الله ورسوله
عايزاني اطلع عيل قدامهم ومش قد كلمتي لمجرد ان البنت انتي الي مختاراها مش انا
واثق ف اختيارك ي امي
وصدقيني مبسوط بالبنت وارتاحتلها
وبعدين عايزاني انا اختار ؟!
منا اختارت واديكي شوفتي اي الي حصل من ورا اختياري
اتكسر قلبي واتوجعت
اما انتي واثق انك مختارالي زينة البنات"
باست جبيني وطبطبت عليا
" صدقني ي آسر ربنا هيعوضك
وهيعوض قلبك الي زي البافتة البيضة دا
بكرا لما تشوف اختيارات ربنا
هتحمده مليون مرة انو مسابش زمام الامور ف أيدك انت"
خرجت امي ونا ريحت ضهري
ولاول مرة ابق تايه كدا
مش عارف أعمل اي
والي بعمله دا صح ول غلط
كأن في دوامة ف عقلي لا هي بتهدى
ولا بتهديلي بالي
مر أسبوع ونا حابس افكاري
وحابس نفسي ف اوضتي
يدوب بروح شغلي وبس
حتى الجيم الي كنت بروحه يوميا
مخطيتهوش الاسبوع دا
وف يوم جرس بيتنا رن وامي فتحت
"إزيك يبني
انت مين"
"انا تامر الكوتش الي بيمرن آسر ف الجيم
هو موجود؟"
"ايوا موجود أتفضل هناديلك عليه"
دخل تامر وقعد ف اوضة الضيوف ودخلت عليا امي وكنت لسة هروح ف النوم
"آسر"
لفيت ليها
"اي ي امي"
"في واحد برة بيقول إنه إسمه تامر الكوتش الي بتاع الجيم"
قومت بلهفة
" هو جه لحد هنا
قلتله متتعبش نفسك"
" فيه الخير
قومله متسيبهوش قاعد لوحده عقبال م اعملو حاجة يشربها"
قومت روحتله وهو اول م شافني وقف وحضني
"اي الغيبة دي يعم
الجيم وحش من غيرك"
قعدت جمبه ونا بتنهد
"الظروف"
" ظروف؟!
د انت كنت بتقول لو الحروب قامت والدنيا ولعت
هتسيب كل حاجة وتروح الجيم
اي الي حصل "
"والله ي تامر نفسيتي مش متظبطة نهائي يعني
في قرارات خدتها ف حياتي خلتني مشوش اوي"
"لو مش هتطفل يعني احكيلي يمكن أساعدك"
" احكي اي ول اي ي تامر
اول مرة اتحط ف موقف صعب كدا"
حكيتله كل حاجة حتى وجهة نظر سمير
"بص ي آسر
لو هتبص للموضوع من منظور الاصول
ف انت لازم تكمل مع البنت دي
وحتى لو مكملتش محدش هيلومك
بس انت هتحس انك صغير قدام نفسك اوي
وانك مش قد القرارات الي بتاخدها
اما لو بصيت من منظور المشاعر
ف انت تراجع نفسك مليون مرة
شوف نفسك بتميل لاي
بترتاح لاي
عايز مين من جواك
مش من براك
فتش ف قلبك ي آسر
شوف نفسك حاسس ب اي
دور على نفسك جواك
وانسي اي حد
انسى الاخلاق وانسى الاصول وانسى كل حاجة"
" ولو قلتلك مش عارف
مش عارف عايز اي
وهرتاح لاي
متلغبط
مش فاهم حاجة ف حياتي نهائي"
" طب بص
عندي فكرة
انت هتكمل مع البنت دي
وتمسح لينك صارحنى عشان البنت متعرفش تبعتلك تاني
وقتها هتفهم كل حاجة
البنت لو كانت عادية ف حياتك ف خلاص هي ذات نفسها هتنسى الموضوع
ونت هتكون بتكمل مع البنت دي وبدأت تفهم نفسك عايز اي
حتى لو مرتاحتش
هيكون مر ع الاقل شهور ف علاقتك معاها
وهتبق معقولة شوية لو فسخت
مش زي م تفسخ ونت لسة حتى مقرأتش فاتحة"
هزيت راسي ب اقتناع بكلامه
" معاك حق"
طلعت موبايلي وحذفت لينك صارحنى نهائي حتى الايميل الي كنت عامله ع التطبيق حذفته
" اهو حذفته
ع الله بق تختفي من حياتي عشان هي السبب ف كل دا"
بصلي تامر شوية
"لي شغلاك كدا"
بصيتله شوية
" مش عارف ي تامر
كلامها لغبطني
علقتني بكلامها
لدرجة اني كنت بستنى رسايلها"
"طب نسمي دا اي"
"تخلف"
ضحك تامر
"مش بهزر على فكرة"
"ولا انا
اني أتعلق بواحدة معرفش حتى اسمها
يبق دا قمة التخلف كمان"
"بص ي آسر
تعلقك دا طبيعي
لانك كنت بتتمنى الكلام دا من نورهان
ف لما نورهان مشيت حسيت إنك خسرتها وخسرت نفسك
ولما البنت بعتت الكلام دا اتعلقت بيه لان ف مخيلتك
كنت شايف نورهان هي الي بتقولو"
" يعم قلتلك نسيت نورهان"
" بس منستش حلمك
بص يمعلم
الانسان مننا لما بيخسر حاجة مهمة بنسبالو
بيبق عنده امل الحاجة الي خسرها ترجع
ونت كنت متأمل ان نورهان ترجع قبل م تيجي الجيم صح"
هزيت راسي
وهو كمل
"بس حصل عكس توقعاتك
انت مش بس خسرت نورهان
خسرت نفسك ومشاعرك استنزفت
ونت عشان تحاول تجمع الي اتكسر منك
مسكت ف رسايل البنت دي زي طوق النجاة
وتخيلت نورهان هي الي بتقولو
عشان متحسش نفسك اتكسرت"
------------------------------
مر ع المقابلة دي اسبوعين
بعد كلام تامر ليا
حسيت ان كل حاجة بدأت توضح
فوقت من الوهم الي كنت عايش فيه وبدأت ابص للواقع
بدأت افوق واركز اني دخلت انسانة حياتي
يبق لازم اركز معاها هي
لازم هي تبق كل أولوياتي
جه معاد قراية فتحتي وخطوبتي
اتفقنا نعمل كل حاجة بين الاهل بس
روحت مكان اشتري منه الطقم الي هلبسه
وهي كانت معايا ع الواتساب
مش هكدب عليكو انا الي بعتلها
عشان نتكلم ونفهم بعض اكتر
كنت بوريها كذا حاجة ف هي قالت
"البيج عليك تحفة
خليك ف البيج"
بدأت الذاكرة ترجعلي
دا نفس الكلام الي البنت بعتته بالملي
طبعا شوفت الرسالة ومردتش من ذهولي
ف هي بعتت
"مش بترد لي
مش عاجبك ذوقي
طب اختار الي يعجبك انا بس كنت بقول وجهة نظري بما إنك يعني بتاخد رأيي"
بعتلها ريكورد
"ابدا والله بس كنت بشوف كذا حاجة تانية عشان كدا مردتش
بس اختيار موفق هجيب البيج طالما عاجبك"
"وهات بنطلون ابيض كلاسيك عليه"
"عيوني"
عملتلي لاف ونا حاسبت وروحت
جهزت نفسي وامي جهزت وكلنا جهزنا
وقفت جمب العربية ورنيت على سمير الي هيجيب اجلي بسبب التأخير دا
" يبني هو انا موعود بيك
مس بتتأخر غير ف أوقاتي المهمة"
" المودام بتظبط الطرحة
عايزني أطلعها يعني شعرها باين"
" طب أنجز ي سمير ونبي"
كلنا جهزنا واخيرا سي سمير شرف هو والمودام
ركبنا العربية وكنا واخدين عربيتين
توكلنا على الله واتحركنا
طبعا امي طول الطريق تسقف وتزغرط وشغلو اغاني ف العربية وكنا مفضوحين ع الطريق
وعم سمير قعد يموج بالعربية ويزمر
قولتله بزعيق
"يعم اي الي بتعمله دا
عايزين نوصل للعروسة مش نوصل للتراب"
"اسكت انت خليك ماسك ف الشباك واسكت"
مرت ساعات السفر ونا طول الطريق بتشاهد بسبب سمير الي بياكل المطبات وبيطلع ع الرصيف
كنا هناخد مخالفة كدا مرة بس ربنا ستر
وصلنا البلد الحمدلله بعد معاناه
خالي كان مستنينا واستقبلتني مرات خالي وخالاتي بالزغاريط
سلمت عليهم كلهم وباركولي
اتحركنا عند بيت العروسة
للعلم بيت العروسة كان بعد بيت خالو بشارع ف مكانش ليه لزوم نركب مواصلة
مشيو عيلتي ورايا بالزغاريط والأغاني وكنت مبسوط بالأجواء دي جدا
وصلنا بيت العروسة وكلهم بردو استقبلوني بالزغاريط
اي حكايتكو انتو
دخلنا الصالة وكانو عاملين ديكور لطيف مكتوب عليه
بسم رب الخير نبدأ
كلهم قعدو ونا قعدت ع الكنبة بتاع الديكور ومفيش ثواني واخو العروسة دخل جابها
اول م شوفتها انبهرت لجمالها
مش حاطة ميكب كتير زي متوقعت
تكاد تكون حاطة اصلا
فستانها نفس لون قميصي
مجرد م لاحظت دا ابتسمت تلقائي
اول م قربت مني
سلمت على أخوها
وقعدنا انا وهي جمب بعض
بصتلها
"خلتيني اجيب قميص بيج عشان نبق زي بعض ي خبيثة"
بصتلي وضحكت
"ماتشي ماتشيي"
ضحكت معاها
"إطلالتك مختلفة
تخطف القلب"
ابتسمت بخجل
"ونت كمان"
"ونا كمان اي"
اتنهدت بحرج
"ونت كمان ي آسر
إطلالتك جميلة
جنتل اوي"
رفعت حاجبي
"جنتل ؟!"
هزت راسها ب ابتسامة احراج
ملحقناش نكمل كلامنا لان ماما دخلت علينا بالبوس والاحضان والعياط
أستاذة عيوطة معانا
بصيت جمبي لقيت ليان كمان بتعيط مع ماما
اي البني ادمين دي
اي المشاعر دي
"اي كمية العياط دي
هو انا داخل على جواز ولا داخل السجن"
قرب مني سمير
"داخل السجن يحبيب قلبي"
ضحكت ف هو حضني
"مليون مبروك ي قلب أخوك عقبال م تبق عريس يحبيبي"
"الله يبارك فيك يحبيبي"
قرب مني تامر وحضني وباركلي
"متنسانيش ها
خدني ف ديلك"
"بص حواليك هتلاقي العرايس على قفا من يشيل"
ضحك وطبطب عليا
" ربنا يتملك على خير يحبيبي"
بدأو يعلو صوت الاغاني ويرقصو وسمير شدني ورقصت معاه
وماما دخلت وسطنا رقصت معايا وكانت الفرحة لا توصف
ماما شدت ليان ترقص معايا بس رفضت رفض تام وكانت بتسقف بس
لمست خجلها وحبيته اوي
بعد م تعبنا من الرقص قعدنا نقرأ الفاتحة
قرآنا الفاتحة وبدأنا نلبس الدبل
"صباعك صغير جدا
مكلفتنيش ف الدهب"
ضحكت وقالت
"عد الجمايل"
لبسنا الدهب وكلهم زغرطو وقعدو يرقصو والفرحة باينة ف عين كل واحد كان موجود
بدأنا فقرة الصور وكلهم جم يتصورو معانا
سمير جه هو ومراته وآدم
شيلت أدم منه
وسمير خد مراته جمبه وحضنها
حبيت غيرته دي اوي وابتسمت واتصورنا
آدم مسك ف ليان ومرضاش يسيبها
" لوستي"
كانت كلمة آدم الي محدش فهمها
"ترجم ي عم سمير"
"خطيبتك بتتشقط ي آسر"
"بتتشقط ازاي يعني"
"آدم بيقلها عروستي
يعني اتكل انت على الله"
ليان ضحكت ونا بصيت ل آدم ب عصبية مزيفة
"عروستك اي يلا
دي عروستي انا"
قال آدم بتزمجر
"لاا
لوستي تاعتي"
بصيت لليان الي كان عاجبها الوضع
"متقولي حاجة ي لوستو"
ضحكت
" دا جميل خالص ي آسر"
"انتي الي جميلة يختي
ولاا انزل يالا"
رفض آدم رفض تام وللحظة حسيت بغيرة منه
هتقولولي دا طفل
هقولكو معرفش لي حسيت بالغيرة دي
سمير خد آدم من ليان بعد معاناه ومشيو وفضلنا لوحدنا
"قال لوستي قال"
ليان ضحكت جامد
بصتلها بنرفزة
"بتضحكي على اي آنتي كمان"
" شكلك حلو اوي ونت متعصب"
" دا وقت معاكسة دا"
مر الوقت وكان من اجمل أيام حياتي
خالي جالي
"متيالا ي آسر
ولا هتكمل قعدتك"
داست ليان على ايدي وعيونها اتعلقت بيا
ف بصيتلها وفهمت انها مش عايزاني امشي
"طب اسبقوني انتو ونا هلحقكو"
جت امي باستني وباستها
" ربنا يهنيكو ببعض يحبايب قلبي يارب
متأخرش ي آسر عشان يدوب هنتحرك"
"حاضر ي امي"
كلهم مشيو حتى المعازيم ومفضلش غيري انا وهي وعيلتها
قعدنا مع بعض قاعدة لطيفة وسابونا شوية
"هتيجي امتة تاني"
"هو انا لحقت امشي عشان اجي تاني"
" اقصد بعد م تسافر"
اتنهدت
" والله معارف ي ليان
بس هروح بق أشوف دنيتي واجهز الشقة ونتي عارفة بق"
هزت راسها بزعل
"اي التكشير دا بقا
هتودعيني بالتكشير دا"
دمعة نزلت منها
"ايدا بتعيطي
طب لي طيب
انا مش همشي للابد يعني
انا هروح أجهز المكان الي هتبقي معايا فيه علطول"
مسحت دمعتها وقالت بضحك
"متشغلش بالك انا انسانة ذو مشاعر فياضة"
ابتسمت
" خلاص بقا متزعليش
هقول لوالدك نكتب الكتاب علطول
عشان تسافري معايا تجهزي شقتك"
قالت بفرحة
" بجد "
" بجدين كمان"
خلصنا كلامنا وودعتها وهي عيطتت
" يووه
يعني عايزة اخر صورة ف عيني ليكي قبل م امشي تبق دموعك"
مسحت دموعها
" خلاص بس متعوقش عليا
وخد بالك من نفسك"
" هعمل كدا فعلا لو شوفت ضحكتك"
ضحكت وودعتها ومشيت
اول م مشيت حسيت اني سايب حاجة غالية تخصني وقلبي وجعني
افتكرت وجع قلبي ونا رايح اتقدملها وضحكت
سبحان من مغير الاحوال فعلا
لما كنت رايح اتقدملها قلبي كان واجعني اني رايحلها
وحاليا قلبي وجعني عشان سايبها
اما نت غريب ي آسر
وصلت بيت خالي وودعناهم
"مش كنت بيت الليلة ي آسر"
"ف كتب الكتاب بق ي خالي عشان والله مش عامل حساب حاجة خالص"
هز راسه وودعنا واتحركنا بالعربية
كلمتها ف العربية وطمنتها عليا
وصلنا وكل واحد رجع بيته
صور الخطوبة وصلتلي
ونزلت بوست اني خطبت
ناس كتير دخلت تبارك
مر اسبوع على خطوبتي
وكنت راجع من الشغل سمعت صوت ورايا بينادي على اسمي
الصوت دا انا عارفه مش غريب عليا
لفيت
ومكانش غير الصوت الي ف بالي