رواية العروس في الثوب الاسود الفصل الخامس عشر 15 بقلم عبير ادريس
مشى وطلع شايلني دفر باب شقته برجله ودخل لغرفة النوم نزلني على السرير وشغل الاضاءة وكف فوك راسي مخصر ايده يباوعلي بقلق.
ايهم: هسه انه شسوي ، فهميني شسوي شطيب منج حتى اطيب؟
باوعت عليه وكمت ابجي بحرقة عافني وطلع سمعته يصيح بصوت عالي على نور
ايهم : نور نور وينج
نور: بلي خوية هياتني قريبة منك
ايهم: جيبي ملابس رسيل وجيبي عصارات الحرك اكو بيهن لو خلصن جيكيهن حتى اذا خلصانات اروح اجيب غيرهم
نور: هسه اشوف واجيك
ايهم: بسرعة لاتتأخرين
نور: صار
طلعت من الشقة وهو رجع يمي واكف فوك راسي تنهد و كام يروح ويرجع بالغرفة مد ايده لشعره رجعه ليورا سمع صوت نور وراح الها
نور: هاي باقي بيها قليل
ايهم: يفيدنها مؤقت بينما اطلع اجيبلها غيرهن..
فات يمي وكعد مضيق عيونه..
ايهم: ارفعي راسج
رفعت راسي باوع على مكان الحرك والتفت لنور
ايهم: نور جيبي من المطبخ تعقيم وشاش وبلاستر ، تلكهين بالصيدلية معلكات..
نور: صار
راحت ورا دقيقتين اجتي
ايهم: شووو وخري شعرج
وخرته على كيفي شعراية لاحت مكان الجوية شاغت روحي عطت بصوت وطلعت آه مني
ايهم: شو خليني اعقمها لاتتحركين راح تأذيج شوية تحملي
هزيت راسي بمعنى اي
اخذ قطنة وفتح علبة التعقيم ، حط منها شوية ونطاها لنور سدتها..
تقرب مني وبدأ يعقم بالمكان براحة ايده وكل شوية انز وابتعد ايده عني مكانها كلش حساس ورقيق بحيث تأذيت.
ايهم: خلصت لاتخافين تحملي شوية
التفت لنور جيبي العصارة ، عصري على اصبعي
دهن رقبتي بيها وحط فوكاها شاش ولزكهم بالبلاستر التفت على نور حجه وياها بصيغة امر..
ايهم: هسه مهمتج شنو ؟
نور: شنو؟
ايهم: تغسليلها وتبدليلها وتكعدين يمها لو ابوج يحترك ما تطلعين وتعوفيها والباب تنقفل ورايا لو يكسروها ما تفتحين
نور : صار صار
ايهم: رايح بشغلة صغيرة اكملها واجيكم
نور: الله وياك
ايهم : رسيل بنصف عيونج تخليها نور
نور : كلتلك هاهي تطمن لا يظل بالك
طلع اجتي كعدت يم راسي باستني وكالت
نور: شفتي شفتي ظلمهم ليش انه خايفة عليج لان اعرف دماراتهم ، اعرف لأي مدى ممكن يوصل ظلمهم
رسيل: نور جسمي يوجعني
نور: شبيدي عليج خية شبيدي ، كومي اغيرلج ملابسج بيهن زفرة مال دم.
رادت تكومني عطت
رسيل: لا تلزميني عفية جسمي يوجعني.
نور: فد ابدلج ما أأذيج والله.
لزمت التيشيرت نزعته وشهكت
رسيل: شكو يمعودة ؟
كامت تبجي وخلت ايديها على وجهها
باوعت على جسمي كله ازرك طبع الحزام واكو اماكن طالع منها دم مال قوبجة الحديد لان ضربني بيها
نور: الله لا يوفقه تنكسر ايده كون
لبستني ملابسي مدتت وبديت أون ياجهة انقلب عليها توجعني ، كمت اريد اوكف ما كدرت
رسيل: نورة جيبلي مسكن آلام جسمي يموتني
نور: بعيني هسه اشوف ايهم عنده لان مايرضى افتح الباب
طلعت ثواني ورجعت
نور: رسوله ماكو انتظري ييجي ايهم واروح اجيبه الج.
رسيل: ماشي.
ضلينا على هذا الحال اربع ساعات وايهم مابين
رسيل: نور كومي جيبيلي بعد ما اتحمل راح اتخبل جسمي كله يوجعني والوجع يدك بقلبي
نور: اخافن والله لا مروان يصير بوجهي ويدخل ويقفل الباب ومنو يخلصج منه وايهم مأمن عليج يمي.
نفخت بنفاذ صبر، وبس ادعي عليهم واتحسب
صبرية ، شيماء ، شوق ،ازهار، رعد، مروان،امجد ، منو بعد من العصابة ؟ ياوجه جديد يطلعلي
سمعنا هوووسة جوا راحت نور تتنسط من ورا الباب ورجعتلي تركض
نور: حبيبة هوسة زلم كومي اقفلي بابج عليج بينما اجي فدوة لعيونج فد لا يتذابحون
رسيل: روحي روحي
راحت كمت قفلت الباب ، سمعت هوسة بس الصوت بعيد كلشي ما افتهم منه
مرت عشرة دقائق واسمع الصوت يقترب فوك عياط شيماء تلطم على صدرها ،
ولك عوفها كله من ورة هاي الكح.....هيج تسوي
مفهمت على منو تقصد.الى ان اختفت الهوسة وراح الصوت ورا نصف ساعة اجتني نور دكت الباب كمت فتحته الها.
رسيل: هاي شكو ؟
نور: اسكتي خية اسكتي ايهم سوا سوالف ما تتسولف فد يستاهلون حيل بيهم
رسيل: شسوا يمعودة غير نفتهم ..
نور : سمعي انه مو نزلت اركض واشوفلج ايهم وياسر وعمي يتصايحون
علي: وين جنت ؟
ايهم: رحت ربيت الكلب واجيت
علي: ادري شوداك عليه شلون تكسر اصابع رجليه تخبلت ، ماخذ الجاكوج وهاد على بيت عمتك وخليتهم يتراجفون مربي عصابجي انه..
ايهم: اويلي صدكت انت بيهم ليش شايفلك بربو** تخاف.
علي: لاتغلط احترم نفسك اختي هاي ما ارضى تتجاوز عليها.
ايهم: اختك انت مو انه ، لو عندي تكها لا ادفنها حية وحك هو علي ابن ابي طالب.
ياسر: انت شحارك حمامك شبيك ترجف عليها وعاديت الكل من وراها
يحجي بصياح
ايهم: والله باوعت داير ما دايري ماشفت زلمة راح حاسبة لو دافع على البنية كلت ماكو غيري انه
علي: أيهم ، شو ما تستحي شقصدك احنا نسوان ؟
ايهم: اللي فهمته هو الصح
عمي لزمه من ملابسه راد يضربه لزم ايهم صد ايده نتر بيه
ايهم: ايدك ، وين جنت من هذاك الكووا.... خلص على بنت اخوك وينك من حلفان مرتك الباطل وين دورك بالبيت، كأب وينك شو ماجاي اشوفك ، هيج مروان لغى دورك ومحى شخصيتك؟
عمي دفعه حيل وانضرب ظهر ايهم بالدرج .
عاط بصوت منهار
ايهم: والله والله اللي يوصل لرسيل ويضربها بوردة ارشى بدم ، بعد لا يوكف بعيني اب ولا ام ولا اي واحد تربطني بيه صلة دم ، وحجاية وحدة منكم اخذها واسافر واريد واحد يوكفني روح اكدر على بنتك المي جاي يمشي من جواك وانت ما تدري
حجاها وصعد الدرج كل اربع بايات سوية صعدنا وراه انه وعمه وياسر شفناه فات للحمام عبالنا يسبح لو يغسل ردنا ننزل شفنا بيده مكينة حلاقة وفات بيها لغرفة شوق وقفل الباب عليهم
ياسر: ايهم لا تتخبل افتح الباب شبيكم اليوم وية البوب ياهو الجاي يقفل..
شيماء تلطم وتصيح
شيماء : راح يموتها راحت من ايدي راحت ، وتصفك بيديها الاثنين والله اذا صار على شوق شي لا اموتها لبنت سوسن ، اجتج للغرفة رادت تفوت وياسر لزمها
رسيل: وتالي شنو صار ؟
نور: تالي سمعنا عياطها وهو يضرب بيها ويكوللها هاي لضربة رسيل ، وهاي لبجيها، وشغل المكينة كامت تصرخ بصوت عالي
شوق : لا عفية شعري لج يمة لحكيلي لج يمة شعري راح ، لك شعررررري كلب عوفني الله لا يوفقك يمة شعري راح تعالي وينج
ايهم: وهاي بمكان جوية رسيل .
بعدها فتح الباب وطلع انصدمنا بالمنظر ، التفتت شفته نزل الدرج سريع مدري وين يريد يروح و ياسر لحكه يركض
دخلت واشوفلج شوق كرعة ولا شعراية براسها لازمة شعرها وتبجي
شوق: لج يمة شعري راح
تلزم براسها وترجع تلزم شعرها الواكع بالكاع
شيماء: هين لا اشوفها شي بعمرها ماشافته لا احرك گلبها مثل ما حركت قلبي ببزرتي وكاموا يتذابحون بسببها
نور: من سمعتها هيج تحجي عفتها واجيت
رسيل: زين ما عرفتي شنو دخل شوق ليش هيج سوا بيها ايهم
نور: ما اعرف ما حجى شي حبيبة اسويلج لكمة تاكليها ؟
رسيل: رحتلج فدوة اريد مسكن حتى انام
نور: ويصير بدون اكل تاخذيها ؟
رسيل : يصير يصير بس جيبيلي
نور : كومي اقفلي الباب اجيبه واجي
رسيل : ماشي
راحت قفلت الباب وضليت واكفة انتظرها اجتي اخذته منها جابتلي مي شربته ومددت ..
نور: مو مزين على معدتج فارغة
رسيل: ما يصير شي لا تخافين طفي الضوء فدوة اريد انام
نور: انه بالهول فد تردين شي صيحيني
رسيل: ماشي
تغطيت ونمت جان الجو بارد بداية شهر ال ١٢
فزيت على صوت عالي واحد يحجي برا الشقة ويدك بالباب
فتحت عيوني واشوف ايهم ونور كاعدين على السرير يمي من الجهة الثانية ايهم مرتاج ونور كاعده بنهايتها
ايهم: سكران الكلب،اكوم ادميه
نور: دخيل محمد عوفه ما عليك بيه هسه يمل ويروح ينام
اسمعه يصيح
مروان : لج رسيل حقيرة تخونيني تسوين علاقات من وراية ؟ شنو سويتلج وهيج تعاقبيني رسييييييل
ايهم: لا هذا اكيد تخبل
كام سريع، وكفت نور بوجهها ، دفعها وطلع ، كمت على كيفي طلعت وراهم ، باب الشقة مفتوح واباوع مروان صاير فيلم بالكوة واكف وياسر سانده
ياسر: ايهم ابقى بمكانك ولا تتقرب
ا يهم: ما جاي تسمعه شجاي يرطن
ياسر: مو بوعيه يابه ماحاسس جبته من الشوارع ، خابروني من تليفونه لاكيه نايم وماخذين كل فلوسه
ايهم: يستاهل لو ضاربيه حتى يتأدب
مروان: انه بوعيي واحجي ال ال صح ما كاذب ، هي خانتني وي امجد هي صدكوني ، انه حلفولي خانتني
يحجي والحجي بالكوة ينفهم
اخذه ايهم ودخله للحمام
ايهم : ياسر تعال يمه خليه يصحى لو انه اصحيه
ياسر : عوفه ما عليك بيه
راح ياسر للحمام ورا شوية سمعنه صوت مروان يتقيء
ايع لعد شكد شارب هذا ، اباوع على ايهم يفور صاير دم ،طلع من الحمام شبه صاحي لازم راسه و يصيح
مروان : راسي راح ينفجر
نتر بيه ايهم
ايهم: بدل ماتشرب السم جان حاسبت ابن عمتك واختك
جان ينشف براسه بالخاولي نزله وباوع على ايهم ضيق عيونه وكال
مروان: ياهي بيهن ؟
ايهم: شوق الكلبة
مروان: وشعليها شوق باللي صار ؟؟
ايهم: انه اكولك ست شوق عندها علاقة بأمجد صارلهة فترة وهي وعمتك المصون وابنها والوالدة اتفقوا على هاي المكيدة ، مقابل امك تزوج شوق لأمجد
مروان: حلووووو وهاي منين عرفت كل هذا ؟
ايهم: من امجد الكلب كسرتله جم اصبع برجليه واعترف عليهن
هز راسه مروان متحلف حسيته بركان وانفجر بالبيت ركض لغرفة شوق لكاها ماكو نزل يركض لاكيها بغرفة امها نايمة بحضنها تواسيها، جرها مروان من حضنها وكتلها كسر اسنانها الامامية وبالكوة خلصوها من ايديه..
طبعاً نور حجتلي لان اني ما نزلت
ورا نصف ساعة ساد الهدوء بالبيت صعد ايهم ونور يمي ، ايهم مبين عليه التعب همس
ايهم: شلون صرتي؟
ضحكت
رسيل:احسن
ايهم: خير ان شاءالله
راح مدد على القنفة بالهول ونور اجتي نامت يمي
رسيل: شو هنا ؟
نور: احسن ما اريد اشوفه
رسيل: ليش ياسر شعليه باللي صار حتى زعلانة منه ؟
كامت كعدت على السرير
نور: لا أله ونص ليش ما منع اخوه منج شنو فرقه عن ايهم ليش ايهم دافعلج وهو لا ، ما احاجيه لو يموت
رسيل: هو صار بيناتنا ما شفتيه بس مروان منو يكدر عليه
نور: خليه اسبوع ما احاجيه حتى يعرف نفسه غلطان ويراجعها
رسيل: براحتج تصبحين على خير اني كلش تعبت ونعست
نور: وانتِ من اهله حبيبة
نمت حسيت بنفسي ارجف واهذي بصوت ، فتحت عيوني نور حاطة ايديها على جبيني تباوعلي بقلق ، بعدها طلعت من الغرفة صاحت ايهم واجوي
ايهم: شبيها؟
نور: ما اعرف نايمين وحسيت على صوتها تحجي كعدت لزمت راسها صايرة نار احجي وياها ما تجاوب
جنت اسمعهم بس لساني ثكيل ما اكدر اجاوب
ايهم: نور جيبي المحرار وطاسة مي بارد خلي بيها ثلج وخاولي صغير نسويلها كمادات
نور: صار
قاس حرارتي
ايهم : لج هاي صاعدة كلش
نور: شكد
ايهم: ٣٨
نور: شنسوي هسه ؟
ايهم: والله ما ادري ، جيبي براسيتول وانه اسويلها كمادات
كعد بصفي يسويلي كمادات ويتنهد
نور : هاك هذا الكبسول وماي
حجى بصوت تعبان
ايهم: خليه على الكومدي
ورا شوية رفعني و شربني براسيتول اثنين ؛ اهتماهم وخوفهم علية بالضبط مثل ماما وبابا من جنت اتمرض ، اخاف جنت احبهم هسه صرت اتنفسهم ويمكن افديهم بروحي ، وكفاتهم وخوفهم علية وحبهم ما ينسي ابد
ورا شوية انشمر غطاء ثاني علية فوك الجنت متغطية بيه بعدها نمت ما حسيت بشي ، كعدت الصبح عركانة صايرة مي ألتفتت على جهة نور اريد اكوم اغسل شفت ايهم متمدد بصفي وصافن علية ..
رسيل: هاي شوكت كعدت؟
ايهم: ما نمت اصلاً
رسيل: ليش؟
ايهم: سهران عليج خاف يصير بيج شي
رسيل: بس نور جانت يمي
ايهم: تعبت وراحت نامت
رسيل : تعبتكم وياية اسفة
ايهم : تعبج راحه لا تحجين هيج
رسيل: بس فهمني شلون اجازيكم شلون ارد جمايلكم علية صارن هواي ايهم
ايهم: ديري بالج على نفسج وبس ما نريد منج شي
رسيل: خجلانة منكم والله
ايهم: عوفج من هالحجي اذا بيج حيل امشي ناكل ميت جوع وانتِ هم ما ماكله شي مو؟
رسيل: اي بس اريد اسبح اول فدوة
ايهم: هسه اصيحلج نور
كام صاحها واجوي
نور: ها دادة شونج هسه وكعتي قلوبنا عليج
رسيل: فدوى لقلبكم صرت زينة لايضل بالكم
نور : خير ان شاءالله
كومتني وفتت اسبح
نور: عوفي باب الحمام انه واكفه خاف توكعين
رسيل: ماشي
فتت سبحت جسمي كله يحركني ما خليت صابون بس مي ألم فضيع حسيت كأنما ملح وينزل على جروحي مو مي
كملت طلعت لكيت نور واكفة بس مبين التعب عليها خطية
نور: نعيماً
رسيل: شكراً نورة شو وجهج اصفر مو مثل كل يوم ليش؟
نور: تعب هذا خية لا تخلين ببالج
رسيل: شلون ما يضل بالي والله خايفة عليج.
نور : لا تخافين ما بية شي
بعدها تريكنا نور مسويه الاكل وايهم صب الجاي
ايهم: نور انه اعرف اصب جاي مو ؟
نور: وليش ما تعرف قابل صغير
ايهم: لا قصدي ما اخلي موالح
رسيل: ها كول من الاول بسمار هذا
ايهم: من سولفلي ياسر انتهيت هاي سالفة تسوينها بالله عليج
رسيل: كل طباخة ماهرة توكع بأغلاط مو بس اني
ايهم: اه يعني تعرفين تطبخين ؟
رسيل: كلشي اعرف عيني
ايهم: نورة سمعتي منا وجاي شيلي ايديج من الطبخ خليها هي تطبخ
نور تخوط بالجاي ومدنكة كالت
نور: خلي تكوم وترجع عافيتها عود تسوي
ايهم: شبيج ليش ضايجة ؟
تنهدت وكالت
نور: من ياسر
عقج حاجبة وكال
ايهم شبيه ؟
نور: ليش هيج وكف وية مروان ضد بنت عمه
ايهم : ياسر مندفع مايعرف شلون يتصرف بهيج امور يمشي ورا الهوسة
نور: صح بس انه تعبت منه
ايهم: بعدين عاتبيه على كيفج المهم عيني انه طالع اتسوك واجيب كم شغلة نسهر عليها باليل واي شي تحتاجون خابروني وها ممنوع وحدة بيكم توصل الباب لو ابوي اجه ما تفتحونها
نور: هاهي الله وياك
كام طلع ضلينا اني ونور نسولف بالمطبخ
رسيل: ماتخافين تصيرلج مشكلة اذا ما نزلتي جوة
نور: ما طايقة احد ولا اريد اشوفنهم نفسي لعبانة حيل.
رسيل: اخاف يأذوج
نور: وين ما توصل توصل انه هم تعبانة منهم لا عبالج فد علمودج اريد ارتاح
رسيل:ياحبيبتي الله يساعدج ، نور سؤال؟ ليش شيماء تكرهني عبالك تشوفني شيطان كبالها.
نور: تكرهج على كره امج
رسيل: ماما شجابها عليها وين شايفتها ليش؟
نور: شيماء بنت اخو جدي يعني هي وعمي علي ولد عم، وابوه لجدي جان رايد اخت شيماء لعمي صادق وعمي ما رضى ياخذها ، جان دوم يكول انه ما اخذ كرايب ، انه اريد غريبة ، هدده ابوه اللي هو جدي اذا راح وتزوج امج يتبرون منه ويطلع من العشيرة ، عاند ابوج واخذ جنطته وسافر لبغداد، ورا وين سمعنا من ناس لناس ابوج تزوج مضيفة طيران ، وهنا كامت الدنيا ما كعدت ،صارت كعدة زلم وهوسة وروح وتعال ومرة اجتمعوا حتى يفصلون عمي من العشيرة لكن جدي حميد وكع دخيل دم لابوه يسامح صادق ، كاله ما افصله بشرط ، بحياته ما يطب البصرة ، ومرة اجى ابوج وجنا كلنا ملتمين جان عيد اتذكر جنت كلش صغيرة فد شكلهم ببالي دخل ابوج لازم سوسن جانت حامل بيج ، كام جدي هان عمي صادق بوسط الكل وتفل عليه وطرده ومن يومها انكطعت اخبار عمي كلها الى ان توفت سوسن وجانا الخبر ، عاد دزهم جدي لعمي صادق حتى يرد لهنا
رسيل: يا الله شنو من عقول متحجرة يعني واحد ما يحب وحدة غصب يتزوجها ، زين شيماء شكو محروك قلبها قابل بابا عافها الها وهيج حاقدة
نور: اختها جانت تحب ابوج حيل ، وجان طاش سيطها مخطوبة لصادق من عمي عافها وشرد ، كالوا لعد هاي معيوبة ما دام ابن عمها عافها والناس اكلت وجوهم كومي واحركي روحج.
رسيل: ماتت؟؟؟
نور: لعد تضل طيبة حركت روحها بوسط الزرع واخذتها النار نصف بستان ابوها تلف
رسيل:الله يرحمها
نور: يرحم الجميع انه اكوم انظف بين مايجيب المسواك حتى اسوي الغداء
رسيل: تمام
كامت تشيل بالمواعين واني كمت رحت للغرفة مشطت ورجعت على نور
رسيل: نورتي
نور: بلي
رسيل: اريد السشوار من غرفتي شلون؟
نور: رايحة اجيبه واجي اصبري
راحت ورا شويه فاتت تبجي ،رحت عليها
رسيل: ها ليش تبجين ؟؟
نور: شفت ياسر وكالي ماطولج بتي برا الغرفة ما تصيريلي مرة بعد
رسيل: جذاب لان عصبي هيج حجى يومين ويتندم يجيج يتوسل هسه تشوفين
نور: حقج ما تعرفينهم زين لو زعلوا تطلع نخلة براسج وما يصالحونج
رسيل: منو منهم هيج ؟
نور: ثلاثتهم بيهم هالطبع النكس لا ضاجوا من احد ما يصالحونه لو عيونه تعمه يضلوون وين شوكت ما تفكهم الضوجة يحجون وياج وهاي شنو بعد ما توكعين الهم توسل وتنزلين نفسج يلا يحنون
رسيل: اوووي وطز اذا صالحوا واذا لا لاتديرين بال
ما جاوبتني ضلت تبجي ورا ساعة اجى ايهم جايب المسواك فوته للمطبخ و
شاف نور كاعدة على الكرسي وحاطه راسها على الميز وايديها جواه مثل الطفل من ينام على الرحلة التفت سألني
ايهم: شبيها نور؟
رسيل: ياسر كايللها ماطول بتي برا غرفتنا ماريدج بعد
ايهم: خلي يولي يكدرون بلياها خليها تضل يمي اسبوع وشوفيهم شلون يتبهذلون كلها تتسطر كبال الباب حتى تنزل شايلة بيتهم ومنظفة جيفتهم
سكتت ما جاوبته اخذت منه المسواك خليته على صفحة ورجعت مددت جسمي كله يوجعني ما اكدر اتحرك ، غفيت وكعدتني على الغداء ، رحت للمطبخ لكيت ايهم كاعد يتغدا شافني كال..
ايهم : خوش نومه
كعدت على الكرسي وجاوبته
رسيل : تعبانة جسمي كله مكسر واخذت مسكن يلا كدرت انام وهذا ينعس
نفخ بضوجة ورجع ياكل ، اعرف بيه ينقهر علية بس يحس مابيده شي يسويه اكثر من اللي سواه.
مرت يومين واحنا نفس وضعنا اني ونور ما نطلع باب الشقة حتى اية بنت نور يمهم ما يخلوها تجي يم امها خطية كل شوية تبجي على بنتها بس هاي سوالف شيماء تريد تعاقبها ببنتها
رسيل : شنو هذا العياط ودك ولطم ياستار شكو ؟
نور : ما ادري كومي نشوف
من نتقرب على الباب صوت قريب فوك ، دك التليفون شالته نور
نور: ها ، اي زين شجابهن، لا ما نطلع لا يضل بالك صار الله وياك
سدته والتفتت علية
رسيل: شكو ؟
نور: ايهم يكول خواته جوا خاف يصعدن ولا وحدة تطلعلهن.
رسيل: وايهم وينه ليش؟
نور: بالباب يريد يروح وشافهن طبن
رسيل: الله يستر
اندكت الباب تفلشت علينا وبدا العد والصف عبالك بنات شوارع غلط ومسبة اشكال علية وعلى بابا وماما الله يرحمهم
_لج كلبة انه اختي تتسكط وبعدها بعز شبابها و لج هاي شوق مدللة ابوها وصغيرة البيت تنضرب بسببج والله والله يابت سوسن اذا مارديتها الج اضعاف انه مو بنت ابوي ولاتنسيني ابد ها لاتنسين ..
التفتت على نور..
رسيل : اكلج هاي منو بيهن ؟
نور: انتصار
رسيل: وحدة اتعس من الثانية ايع
انتصار : شوووفي امي انهانت بسببج واختي انضربت والاخوان تضاربوا والبيت انهجم هذاك اليوم ازهار انضربت وابنها هم ، باعي شايفة ذول العددتهم الج انه اخذ حكهم منج وكولي انتصار ما كالت تذكري اسمي زين لا تنسينا بنت سوسن ال_______
رسيل: يلا بله اني شلون وياهن؟
نور: والله لو بيدي انهزم واخلص وحتى لو طلعت ابوي يرجعني على ها ماعندنا بنت تزعل والله ياالله
رسيل: اووووف اوووف
مر وقت واحنا نسولف بعدها اجتي صبرية عبالك مقام كل شوية وحدة زايرتنا
صبرية: لج اطلعي ، انتِ تحركين قلبي على وحيدي لج ساق***
رسيل: شنو بس هالعار عندها
نور: اي والباقي بنات
رسيل: وبس هذا وماعرفت تربيه ؟
نور: اي وفوكاها طلع يحب شوق وهي هم تحبه
رسيل: اوع شلون زوج لايكين واحد للثاني
نور ضحكت وصبرية مستمرة
فشرت وعيطت وبجت وراحت مثلما اجت..
رسيل : راحت خلصنا يارب محد يجي وراها تعبنا
حجيتها وضحكت
لليل اجى ايهم شايل بيده اغراض دفع الباب برجله وفات رحت تلكيته بأبتسامة عريضة ..
رسيل: اشيل وياك
ايهم : لا
فات وسدة الباب
ايهم : تعالي شوفي شنو جبت!!
رسيل: شنو ؟
ايهم: وين نور اول ؟
رسيل: من اجوي السعالوا اخذوا امك وشوق وراحوا لبيت صبرية يباتن هناك تعرف اجتماع مغلق يخص رسيل ، نور من شافت البيت فرغ راحت تغسل ملابس ياسر وكالت انظف الشقة واسبح أيه واجيبها واجي
أيهم: شفتي شلون مهمة انتِ
رسيل: لا شلون يعني ؟
ايهم: شاغلة بلد بأكمله والامم المتحدة احتركت دك اجتماعات
رسيل: لا حرامات هيج تسميهن افكرلهن بأسم ثاني.
ايهم:تعالي شوفي ذني الكتب وعوفج منهن
كعدت يمه وكمت اكلب بيهن
رسيل : المن ذني؟
ايهم: جبتهن الج
رسيل: ليش كلفت نفسك؟
تيهم: انه ما احب هاي الكلمة لاتعيديها بعد
رسيل: ماشي
ايهم: شنو عندنا اكل ترى جوعان
رسيل: اسويلك؟
أيهم: اذا بيج حيل ياريت بينما اسبح
رسيل: تمام من عيوني
فات للحمام واني رحت للمطبخ احضر العشاء ، حرت اسوي جاي لو لا ، خليني اسأل ايهم ، رحت وصلت قريب الحمام واسمعه يدندن ويغني عجبني اوكف اسمع صوته
عايل يالأسمــر عايــل
صبح ضعنهم شايـــــل
صبح ضعنهم شايل
ما أگدر على ثمنهم تسعين ناكة وحايـــل
ماغير هذي السمرة الخلت بگلبي الحسرة
لك من زاخو ولحد البصرة والگلب صاعد نازل
ياعين غيمي وصبي ونزلي الدمع لاتخبي
ليش عايش ياگلبي ومحبووبك انت راحل
عايل يالأسمــر عايــــل
صبح ضعنهم شايــــــل
ما أگدر على ثمنهم تسعين ناگة وحايـــــل
راحت ريمة الجزيرة الـ على حديثاتنا أميرة
خلت الروح بحيرة وگطعت حتى الرسايل
عايل الأسمـــر
سمعتها ما اعرف ليشش غرت حسيته يغني لحبيبته زين اني شعلية واذا تذكرها ، رسيل هاي شبيج رجعت للمطبخ حتى ما سألته يريد جاي لو لا بس شو قلبي يدك سريع كمت اروح واجي وافرك بأيدي ، رحت غسلت وجهي على السنك اريد الضوجة تروح مني وارجع طبيعية ماكدرت اختنكت بالزايد استغفرالله ربي واتوب اليك اعوذ بالله من الشيطان الرجيم
طلع ايهم من الحمام فات لغرفته كمت طلعت الصمون وحميته اريد ألتهي حتى ما ينتبه علية صاح
ايهم: رسوله كمل الاكل ؟
رسيل: ها اي هذا كمل
اجى وكف باوعلي
ايهم: شبيج ؟
رسيل: ها لا مابية
ايهم: توني عفتج تسولفين ، شكو ؟
رسيل: ماكو هيج
ايهم : زين لعد
كعدنا ناكل حتى نسيت اروح اصيح على نور ، انتبه علية ماكاعد اكل كال
ايهم: ما تاكلين
رسيل: زمن من زاخو كردية؟
عكد حاجبه لم شفته ،عاف الصمونة من ايده همس
ايهم: وشذكرج بيها ؟
رسيل: مجرد سؤال
ايهم: ليش يومية جايبة سيرتها كلتلج تزوجت وراحت الله يسعدها
رسيل: بيضة لو سمرة ؟
ضحك وكال
ايهم: شوف شوف شنو تحقيق شبيج حلمانة بيها اليوم؟
رسيل: بس جاوبني وهاهي
ايهم: سمرة ارتاحيتي
من كال هيج دمعت عيوني وكلت هاهي الاغنية عليها وحتى لا ينتبه علية كمت رحت للغرفة اجى وراية فتح الباب ونتر
ايهم: ليش بجيتي كلت شي غلط وما ادري بروحي !!
رسيل: لا بس ضايجة واريد انام
ايهم : متأكدة مو شي ثاني ؟
رسيل : اي متأكدة
حجيتها ودرت وجهي عنه
عافني وطلع ورا تقريباً نصف ساعة فتح الباب سويت روحي نايمة ، اجى وكعد بصفي على السرير من الجهة الثانية
ايهم: سوي روحج نايمة ، لو تدرين بيدي شلون رواية تجنن توها نازلة
ما جاوبته سويت روحي غاطة بالنوم
ايهم: انه راح اقرأ بصوت عالي اذا عجبتج كوليلي مو تغلسين
ايهم : ايييي يابه اسم الرواية ( بين السكون والعاصفة) مضمونها
طكيتها بضحكة
ايهم: ها ملعونة مو نايمة عود وليش تضحكين حاجي نكتة انه ؟
كمت كعدت عدل .
رسيل : لا مو نكتة بس العنوان ضحكني ..
ايهم : ليش!! سأل بتعجب
رسيل: ذكرني بيك وبمروان
ايهم: شلون يعني ما فهمت؟
رسيل: انت السكون وهو العاصفة واني بنصكم تاخذني العاصفة ويرجعني السكون
سكت ما حجه بعد واني هم سكتت ، ورا شويه شمر الرواية يمي وطلع
ما اجى بعد بقيت بمكاني متمددة فاتت نور نامت بصفي وتبجي عبالها نايمة لان الغرفة ظلمة
اسمع صوت شهكاتها ضلت الليل كله تون وتبجي، ما كدرت انام خايفة عليها وبنفس الوقت مقهورة ، اكيد ياسر أذاها بالحجي ما سألتها خفت تستحي وتكتم بداخلها تبجي احسن تفرغ اللي بقلبها
مشى اول اسبوع واحنا عازلين شكد حلو مثل الجنة من تعزل من عيالها ، انطلقنا اني ونور تنظيف ونسوي اكل وحلويات ويجي ايهم باليل نشوف افلام على مسرحيات ونلعب طاولي ودومنه وحتى ورق جابلنا نلعب ونضحك ضحكنا جان يوصل جوا يمهم
ايهم : رسيل لا تزاغلين
رسيل : شنو والله انت تزاغل
ايهم : نور الله عليج هاي الورقة وين جانت؟
نور : لا تحلفني انه بالورق ماعرف وماجنت منتبهة عليكم..
ايهم : جيبي الورق احسبه انتِ تزاغلين..
خليته ورا ظهري
رسيل : ما والله ما انطي
تقرب مد ايده راد ياخذة مني درت وجهي ، بحركة ماعرف شلون صارت بس اللي حسيته شفايفي طخت بطرف شفته ، حسيته ارتبك تحمحم وكام وكف
ايهم : مرة ثانية لا تزاغلين
سكتت شمر الورق وراح لغرفته سد الباب وراه
حسيت بشي غريب ما اعرف شنو نظراته تحجي شي غير عن افعاله ، افعاله تدل على اني مثل اخته ويعاملني بحنية بس عيونه تحجي غير شي تحجي شكد يحبني بل يعشقني ويتمنى قربي منه وبديت احس بشعور اتجاها غريب ، مشت الايام مر اسبوعين ضبط وبيوم ردت اروح لغرفتي
رسيل: نورة
نور: بلي
رسيل: راح اروح لغرفتي اجيب كم شغلة بينما تكملين البيدج
نور: نتريك ونروح انه وياج
رسيل: هسه بينما تكلين اجي على السريع
نور: يلا بسرعة لا تتأخرين
رسيل: ماشي
طلعت اباوع يمنى يسرى عبالك راح اطلع لمكان العدو ههههه مشيت بسرعة وصلت غرفتي وسديت الباب شغلت الضوء واتفاجئ بمروان نايم على جربايتي وحاظن مخدتي دافن وجهه بيها...
هذا شجابه وليش نايم هنا ، فتحت الباب على كيف وسديتها طلعت اركض رجعت للشقة
نور: ها جبتي اغراضج ؟
رسيل: لا سمعت صوت واحد صاعد على الدرج واجيت
نور: زين تسوين تانيني اكمل ونروح سوية
رسيل: ماشي
بقيت افكر ليش نايم بمكاني وعايف شقته شكبرها دخت حسبة توديني والثانية تجيبني .
ثاني يوم باليل نور تغسل ملابس بالحمام وايهم طالع ، رحت عليها
رسيل: نور سويت شلون كهوة تعالي نكعد برا
نور: لج باردة وين طالعة؟
رسيل: نلبس ونطلع قابل جهال احنا
نور: روحي كدامي اكمل البيدي واجيج
فتحت البالكون مال شقة ايهم مسوي كعدة بيها تجنن شققهم كلها بيهن بالكونات وطلتها على الحديقة تكون
خليت الصينية وفتت جبت وشاح حياكة تلفلفت بيه وكفت على السياج واباوع على الحديقة منظرها يجنن من فوك التفتت للجهة الثانية شفت مروان صافن علية ، يباوعلي بنظرات ما عرفت افسرها اعتذار لو ندم ما اعرف درت وجهي وكمت اباوع ليكدام اخذت فنجاني وبديت اشرب كل شوية التفت اشوفه نفس صفنته ، ورا عشرة دقائق التفتت شفته ماكو وين راح هذا تسائلت وية نفسي ردت افوت جوة ، شفته رجع لمكانه و بيده بطل وكاس