رواية العروس في الثوب الاسود الفصل الثالث عشر 13 بقلم عبير ادريس
السلام عليكم
كل عام وانتم بالف خير
تأخرت عليكم ادري بس بلغت بالانستا والفيس واغلبكم متابعيني وعرفتوا جنت ادرس ماجستير والحمدلله خلصت
بس بعدني تعبانة كلش وعيوني ما اكدر هواي اركز على الموبايل ، اذا تريدون نرجع نكتب اكتبلكم بعيوني بس ما اكدر اضغط على نفسي هواي لان والله كلش تعبانة من الدراسة والسهر دمرني واحتاج انااااام هوووواي وارتاح بس ما يهون علية اعوفكم ، اعرف اغلبكم متفهمين وحاسين بية وباللي اكوله اما اللي تتجاوز وتسب ما اعرف شبيكم شوكت تتثقفون شوكت تتغيرون ما ادري هذا التهجم ليش ؟
متابعة ممتعة حبايبي
________________
انا مابـيّة اضوگ الموت مـرتين
وحچـاية الشـامٰت مو حمـلها
_________
مر اسبوع كامل على المشكلة اللي صارت بهذه الفترة بقيت بغرفتي لا طلعت ولانزلت جوا على كد افوت للحمام وارجع وحتى نور تغيرت علاقتها بية على كد تجيبلي الاكل وتروح ، عفتها على راحتها احتمال تخاف منهم و احتمال كبير تصيرلها مشاكل بسببي ،
ايهم ومروان كذلك ما شفتهم
وبيوم طكت روحي ضجت قررت انزل جوا ونزلت ماكو احد بالبيت فتحت باب المطبخ بهدوء طلعت للحديقة اكو كراسي وميز حبيت اكعد شوية استنشق هواء نظيف اختنكت من الحبسة فوك مرت ساعة كاملة كاعدة اتأمل بالمكان كلش حلو والهواء يجنن بداية شهر العاشر
بوخة الصيف خفت شوية بالبصرة
اول مرة انتبه على الحديقة شكد حلوة والزرع مرتب و مبلل اعشق ريحته من ينسقي بالمي واحب ريحة التراب خصوصاً من تمطر واكو شغلة هم احبها بل اعشقها من تمطر الدنيا واكو شمس خفيفة طالعة..
جنت ابقى امشي جوا المطر لحدما اتبلل
اخذتني الافكار ساعة ارجع لبيت اهلي ساعة افكر بأخواني صافنة بوضعهم منو يداريهم ويدير باله عليهم ؟
بيبي حبيبتي مشتاقتلها واهلي كلهم مشتاقة اشوفهم، عيوني دمعت
جريت نفس عميق رجعت راسي للخلف على الكرسي وصعدت رجلي على الطبلة مددت وبقيت اباوع على السماء واحجي بصوت مسموع
رسيل : بابا تسمعني ؟ متأكدة تشوفني احس بيك قريب مني، مشتاقتلك ، وماما شفتها ؟ رويت عطشك بشوفتها ؟ سلمتلي عليها ؟ آران وريناد شلونهم ؟ اكيد تعرف اخبارهم وما عفتهم ؟
احجي من كل عقلي حسيت بابا واكف كدامي، خليت اصابعي على عيوني فركتهم بقوة اريدهم يبطلون بجي تعبت
سمعت صوت وراية التفتت
ايهم: يسمعج احجي وياه ويشوفج هم
عدلت كعدتي ، باوعتله واشحت بوجهي بعيد عنه
ايهم: شلونج ان شاءالله احسن ؟
رسيل: الحمدلله ماشي الحال
ايهم: هواي تصفنين صايرة ؟
رسيل: هذا حال الدنيا
ايهم : مافهمت ؟
رسيل : انسى
ايهم : لا ما انسى احجيلي
حجاها وكعد التفتت علية وفتحت عيوني كمت ارمش بيها ومسحت دموعي بحركة عصبية
رسيل : اللي صارلي لو صايرلك شنو يكون موقفك ؟
ايهم: من اي ناحية قصدج ؟ على وفاة عمي لو شنو ؟
باوعتله جريت نفس وهمست
رسيل : من كل النواحي مو بس وفاة بابا ، يعني تخيل نفسك عايش هنا سنوات طويلة ومتعلم على اهلك وعلى شغلك وعلى حياتك ونظام ماشي عليه واجي بدون سابق انذار و ببرود اسحب كلشي من ايديك واجبرك تعيش حياة مو حياتك وتعيش وية ناس ما طايقة تباوع بوجهك ، دراستك اللي صارلك سنوات تدرس وتتعب حتى تحصل معدل زين وبالموت تطلع الدرجة وتالي اجي احرمك من كل هذا ،ياترى راح تحبني؟ راح تتقبلني بحياتك ؟ تحترمني ؟
لو تصير شخص عدواني وتحرك كل اللي اذوك وحرموك من كلشي تحبه واضافة لكل هذا ابوك ماصارله هواي متوفي.
يا گلب اللي يتحمل !ويا عقل يستوعب الصار ؟، اذا انت تكولي عادي؟ اني اقبل ،و مستعدة انسى كلشي واعيش حياتي وياكم، بس تنطيني حل شلون اكملها و من وين ابدي؟ تدري اريد ارتبها ما كاعد تترتب !!!
حياتي عبارة عن خيوط جانت عدلة وتخربطت شلون ارتبها بعد؟ الا تتكطع
بقى ساكت وصافن علية بعدها اخذ نفس طويل وكال..
ايهم: كل الحجيتيه صح وانه تعرفين موقفي من البداية ما راضي على اللي صار فد ما باليد حيلة يا رسيل يا بنت عمي لازم نتقبل ونعيش هاي الحياة يوم الك يوم عليك ضروري تتأقلمين حتى تعيشين بسلام
رسيل: الله موجود لابد يجي يوم وينصرني وياخذ حقي من كل واحد خصوصاً مروان
ايهم: مروان گلبه طيب وحباب صدكيني اللي ما يتقرب منه ما يأذيه
رسيل : اي صدكت هذا طيب ؟
ايهم : طيب بس بنفس الوقت اخذي حذرج منه اكو ايام يجي للبيت مو بوعيه ، يعني لو جاي هسه وشايفج هيج كاعدة وماخذة راحتج لا حجاب ولا شي يمكن يكصلج شعرج ويحركه كدام عيونج..
رسيل: شلون يعني مو بوعيه مافهمت؟
ايهم: شوفي هو يسهر مرات ها مرات مو عبالج دائماً ويشرب
ضحكت مستهزئة
رسيل: كلشي اتوقع منه الصراحة ما استغربت
ايهم: انه من كاعد اسولفلج ما كاعد اذمه لا بالعكس رجال وما عليه عتب وما مأذي احد،حجيتلج حتى تاخذين احتياطج
رسيل: تمام
جريت نفس قوي ردت اكوم كال..
ايهم: ها وين ؟
رسيل: اروح انام
ايهم: بعد وكت
رسيل: خاف يشوفوك وياية وتصيرلك مشكلة
صفن بوجهي وضحك
ايهم: شنو ؟ منو يسويلي مشكلة مصخنة انتِ ؟ شو تعالي اجيسج
رسيل:صارلك اسبوع مهزوم شنو معناها ؟
عكد حاجبه وكال
ايهم: ياهو هذا المهزوم ؟
رسيل: انت ونور ليش ماتحجون وياية من يوم السالفة الصارت.
ايهم: وانتِ من كل عقلج مقارنتني بنور؟ وبعدين ليش انهزم؟ و من شنو ؟
رسيل: اسأل نفسك رحت وبعد ما شفتك لا انت ولا نور مرات تجي تجيبلي الاكل وتطلع تركض عبالك راح اكلها
ايهم:عذريها ياسر صعب واهلي من يفقلون عليها يأذونها
رسيل: من تعرف اهلك هيج ليش صدكت بيهم واني احلفلك ما وكعتها وصيحت علية كدامهم واسبوع ماتحجي وياية ؟
خليت ايدي على وجهي وبجيت تقرب مني سحب ايدي وهمس
ايهم: اوكفي اوكفي اجيج وحدة وحدة اول شي انه ما مهزوم ولا ما رايد شوفتج ولا زعلان، كلما في الامر جنت ببغداد عندي شغل واضطريت ابقى اسبوع اما بالنسبة للمشكلة انه اعرف هاي تدابير شوق وما صدكتها وماجان يحتاج تحلفين حتى اصدكج
رسيل: لعد ليش مادافعتلي ؟
ايهم : انه لا ذميتج ولا وكفت وياج بقيت ساكت وكلتلج اصعدي وبس ، بعدين كلها شهدت ضدج وحتى نور ما حجت من جانبج انه اوكف وياج ضدهن على اي اساس؟
رسيل: على اساس اني على حق وهم على باطل
ايهم: ولشوكت نبقى هيج عركات بوية اسمعي منا وفوتي منا الله ليش ناطينا اذنين لحتى نسمع بوحدة ونطلع الما عاجبنا من الثانية تراج تموتين قبل وكتج اذا بقيتي هيج
رسيل: ونور ليش هيج سوت ؟
ايهم: ما يحتاجلها تفكير اكيد تخاف ، وثاني شي هي اجتني وكالتلي بالسالفة و ما صار مجال احاجيج ، عفتج ترتاحين وكلت برجعتي احجي وياج
رسيل: ماشي
كمت وكلتله تصبح على خير
همس
ايهم: شعرج كلش حلو
سويت روحي ما سمعت التفتت وطلبت منه يعيد كلامه
رسيل: شنو؟
ايهم: لا اكلج الزرع كلش حلو
رسيل: اعرف
ضحكت بداخلي وفتت للمطبخ اجى وراية
ايهم : رسيل رسيل لحظة
رسيل : هاا
ايهم : متعشية ؟
رسيل : لا
ايهم : ليش؟
رسيل : ما اشتهي
ايهم : زين ابقي يمي نسوي اكل سوية ونتعشى
رسيل : ما اريد صدكني تعبانة واريد انام
جر نفس وكال
ايهم : براحتج..
عفته و صعدت ما اعرف ليش حسيت براحة لان عرفت بيه صدكني وما زعلان مني، فتت لغرفتي طفيت الضوء حتى انام ، اندكت الباب كمت فتحتها، ايهم
باوعتله وضحكت
رسيل: هااا نسيت تكولي شي على الزرع ؟
ايهم: اي والله شكد حلو ولونه يخبل منا وجاي ما اقبل احد يكصه
رسيل: ها زين لعد روح كابله واكعد ليش جيتني ؟
ايهم: هاج هاي مجموعة كتب جنت قبل اقراهم شوية راح تطلعج من المود اللي بيه وتدعيلي
رسيل: ولو ما احب اقرأ كتب بس احاول.
ايهم: اهم شي عندي المحاولة حاولي تجربين كلشي جديد ما مجربته بحياتج
رسيل: ماشي تسلم
اخذت منه الكتب سديت الباب خليتهم بصفي على الكومدي رجع دكها فتحتها
رسيل : ها ايهم ؟ شتريد ؟
ايهم : جوعان
رسيل : وشنو اسوي يعني ؟
ايهم : ما مشتهي اكل وحدي تعالي وياية بروح عمي لاترجعيني
صفنت عليه اول مرة واحد يحلفني بروح بابا جريت نفس وهمست
رسيل : ماشي
ايهم : غيري ملابسج وتعالي
رسيل : ليش ؟
ايهم : اكو محل هنا ابن كلب اكله خرافي ويبقى لحد ساعة ٢
رسيل : وشلون نطلع وحدنا والوقت متأخر
ايهم : كلهم نايمين امشي وماعليج منهم
رسيل : ماشي انتظرني ألبس واجي
دخلت لبست عباية على الكتف وشمرت شال على راسي وطلعت لكيته ماكو ثواني وطلع من الشقة مالته مغير البنطرون بشورت قصير شافني ابتسم واشر براسه بمعنى يلا
نزلنا بهدوء وطلعنا برا صعدنا بالسيارة وانطلقنا فتح الجام والهواء صار يلعب بالسيارة التفتت عليه مبتسمة باوعلي نظرة جانبية ورجع يباوع على الطريق
ايهم : شنو بخاطرج؟
رسيل : ماكو شي بس حبيت التفاتك
ايهم : هاي اللي هسه باوعتلج بيها ؟
رسيل : طبعاً لا قصدي لانه داريت مشاعري وخليتني افتح گلبي واحجي ورجعت جبتلي الكتب وبعدين اصريت اتعشى وطلعتني ..
ايهم :ما مسوي شي بنت العم انتِ من دمي ولحمي وهذا واجبي ما مصخر
رسيل : مشكور على كلشي
ايهم : دعوفي المثاليات شوية وكوني استغلالية
رسيل : شلون يعني ما فهمت ؟
حجيتها وضحكت
ايهم : يعني من افوت اطلبي مني صينية مشاوي ، يفوت مروان طلبي منه نساتل وعصائر ، يفوت ياسر طلبي منه يطلعج وية نور والجهال استغلينا ابشع استغلال ابقى اعلم بيج انه.
رسيل : كلكم ممكن اطلب منكم الا مروان
ايهم : وهذا احن واحد بينا لو تطلبين گلبه مستعد ينطيه الج بس هو صعب وراسه يابسه ما يجي بالعناد
ماعجبني اجاوب الفقرة الاخيرة بخصوص مروان بقيت ساكتة وهو نزل يوصي اكل رجع مد راسه من الجامة مبتسم
ايهم : تحبين ناخذ سفري لو نتربع هنا على الرصيف ؟
رسيل : فكرة حلوة نكعد هنا ليش لا ؟
نزلت وكعدنا على الرصيف خلينا الاكل بيناتنا وكمنا ناكل ، اكلت بأريحية جان كلش طيب بحيث ما حسيت على نفسي شهكت باللگمة كحيت رفعت عيوني لكيته يباوعلي ومبتسم فتح بطل المي وخلاه بيدي اخذته شربت شوية وخليته بصفي قفله
ايهم : صحة صحة على كيفج يابة ما جاي اتسابق وياج
مسحت حلكي وباوعتله
ايهم : اكلي شو بطلتي ؟
رسيل : كاعد تحسب اللقم اللي آكلها ؟
ايهم : لا يابة الف عافية على گليبج اصلاً انه متعشي بس من عرفت بيج ما ماكلة تحايلت عليج وجبتج لهنا
رسيل : تحجي صدك ؟
ايهم : وعيونج ، يلا كملي حتى نرجع
رسيل : شبعت
ايهم : وهذا منو ياكله ؟
رسيل : انت
ايهم : اگولها متعشي تگولي اكل
رسيل : اذا اكلت اكل وياك
ايهم : هاهي متفقين
اخذ قطعة لحم حطها بحلكه ورجع نطاني قطعة اخذتها منه اكلتها لحدما خلص الصحن اخذ بطل المي صبلي على ايدي غسلت وهو هم غسل ايده ورجعنا للسيارة وصلنا للبيت باوعلي وكال
ايهم : هسه اكدر اكولج تصبحين على خير
رسيل : ليش انت وين رايح ؟
ايهم : ما رايح اريد اصف السيارة وانتِ فوتي قبلي
رسيل : ماشي وانت من اهل الخير
ردت انزل التفتت عليه باوعلي ابتسم
رسيل : شكراً
رفع اكتافه وكال
ايهم : ماسويت شي
ابتسمت ونزلت فتت للبيت وايدي على گلبي اخاف اصادف واحد منهم ، صعدت للحمام فرشت اسناني ودخلت لغرفتي شغلت ضوء التيبلام ومددت بعدما غيرت ملابسي بملابس نوم مريحة اخذت الكتب اللي جابهن ايهم وخليتهم بصفي بديت اقرأ بالعناوين روايتين و ثلاث كتب ، بلشت برواية ...
قريت اول صفحة شدتني اقرأ البعدها وهيج مشيت ما احس الا وصلت لنصف الكتاب وفعلاً استمتعت بيها، بس اللي لفت انتباهي بين ورقة والثانية حرف z و A وقلب بينهم
ضحكت هذا هم يحب مبين واكع وكعة من هاي الزينة
اخذت الكتب اريد اشوف شنو كاتب بيهن بديت اقرأ
اغلب اللي كاتبه بالكتب ابوذيات وحدة منهن
غرامك اثر بالعشك وداره
هجرت الي تعب وياك وداره
سمعت بقيس عاف اهله وداره؟
حملت الضيم وهمومك سوية
كلبت الورقة الثانية مكتوب بيها
صرت دفتر عشگ صبحك ورّقاني
وطبگ ليلك جلد فرحي و ارقاني
شتظن بية صخر! خايب ورقة اني
ويطبگني الهجر ألفين طية
هذا واكع بالحب مو شلون ما جان ، بس ليش كله عن الفراق ، شلون فضول ؟ حتى عيب اسأله خاف يفشلني ويكول شعليج سديتهن ونمت ما اعرف بيش الساعة فزيت كابوس مزعج ياربي خير ان شاءالله ، كمت اريد انزل اشرب مي ، وصلت لغرفة شوق واسمعها تحجي همس وتضحك كلت بداخلي بلكت يلكفوج بس من يمي استاذ مروان فاتح عيونه ويحاسب
ادردم نزلت سريع والطخ بواحد طب ونوكع بس همزين آخر بايات ، باوعت هذا ياسر
رسيل: اسفة والله مو قصدي
حجيتها وكمت اضحك، بهيج مواقف ينزل الضحك علية وهالمرة اضحك بصوت عالي اريد اسكت ما اكدر هو هم ضحك ارتاحيت يعني ما راح اترزل منه
ياسر: ادري شبيج يا حظي ايدج مكسورة ومحركة وهالمرة عمية
رسيل: والله مو قصدي
ياسر: ديري بالج ترى بعدلج شغلة وحدة ونشدلج راتب مال رعاية
رسيل: رعاية شنو ؟
ياسر: شبيج ما سامعة بذوي الاحتياجات الخاصة عندهم رواتب انتِ هم تسكطتي لهذا راح اسجل اسمج ، نروح باجر شتكولين؟
رسيل: ياريت والله اريد اطلع
ضحك وكال
ياسر: استغفر الله كومي نامي كومي لا تكعدلج جدة
رسيل: كايمة تصبح على خير
ياسر: وانتِ من اهله
ارتاحيت كلش لان ياسر هم تغير ولو شوية من جيت لحد الآن سلام ما يسلم علية مرات تصدف انزل هو يصعد لو بالعكس و بوجهي ما يباوع
شربت مي وصعدت مددت براحة
كعدت ثاني يوم فتت للحمام غسلت وكلت انزل يم بيبي ونور هم اساعدها وهم اشوف شبيها ليش تنهزم مني؟
نزلت عمه شيماء واكفة تثرم بصل ونور تغسل بالدجاج وبيبي كاعدتلهن على الكرسي تراقب بيهن
رسيل: صباح الخير
الجدة: يا صباح العافية ما تكولين عندي جدة اروح اشوفها اشمها شمالج هيج گلبج صخر.
رسيل: بيبي نفسيتي تعبانة مو قصدي ما انزل
شيماء: عوفيها عمة ماتشوفين مرتاحين صار اسبوع عبنها خاتلة وخلصانين من مصايبها، هسه فد تكعد، تصير مصيبة
باوعت على بيبي باوعتلي وحجت
الجدة: رسيلة نسمة اجت وجابت كل الخير وياها فد ياويلي من الدناسة من جوه ليجوه تشتغل.
شيماء: مشكورة عمة هاي بنت اليومين تفضليها علينا؟
الجدة: طبعاً افضلها عليج وعلى اصلج هاي من دمي ولحمي موش غريبة
نور: عمة كملي الغداء صاعدة انظف الفوك
شيماء: جيبي جيبي وما اوصيج لمعي غرفتها هم ، اعرفج بلا كرامة
باوعت على نور حسيتها ضاجت راحت اخذت سطلة وماسحة ورشاش مال مي و وصل للأغراض و صعدت ، صعدت وراها ، بدت تنظف شقة مروان دخلت وراها وسديت الباب
رسيل: نورة حبيبتي نورة، ليش تزعلين مني غفل ، عاتبيني، اذا غلطانة بحقج اصحح غلطي بس مو تديرين وجهج وتفوتين وتخليني حايرة واحسب شبيج
شمرت السطلة والاغراض من ايدها وركضت علية حضنتني وكامت تبجي
رسيل: ليش حبيبتي البجي ، نورة راح تبجيني اني هم.
نور: عذريني انه اذيتج
رسيل: لا ما أذيتيني بالعكس ليش هيج تحجين ؟
نور: انه ما كدرت اشهد بجانبج ، لان يأذوني ، لهذا مالي عين اباوع بعيونج
رسيل: عاذرتج واعرف كلش زين نيتج شنو وشكد داخلج نظيف ، وحقج اني لو بدالج هم ما ادخل نفسي وافضل السكوت، وصدكيني ما زعلانة منج، انتِ اختي مثل ريناد وحتى تعرفين اني ما زعلانة منج بعد منا وهيج نتقاسم الشغل وما اقبل ترفضين.
نور: ايدج لسه ما طابت وكلتلج تطيب وبلشي ماعندي اشكال
رسيل: زين انطيني امسح الاغراض وهاهي لا بيهن تعب ولا اشيل ثكل.
نور: ماشي هاج من وين تبلشين ؟ بلشي بالصالة كملي اغراضها وبعدها غرفة النوم
رسيل : تمام.
رحت امسح الاغراض كملت الاستقبال ودخلت لغرفة النوم، شنو من غرفة دزاين يخبل عبارة عن سرير وكم سندانة زرع ورفوف عليها كتب واقراص وتحفيات بسيطة
بس اللي لفت انتباهي مكان الكنتور وين؟
اخذني الفضول وبديت ادور باوعت اكو باب بداخل الغرفة فتحتها وفتت
لكيت غرفة ثانية بيها كنتور وميز تواليت وكومدي عالي بيه مجارير فتحت باب الكنتور جذبني عطر بالملابس يجننن
والملابس مرتبات حسب تدرجات الألوان فتحت الباب الثاني بيه قوط والثالث اربطة واحزمة والاخير دشاديش وغتر ، و ملابس بيت وباب جان مفتوح بيه بدلات عسكرية
والله هذا مهتم بروحه ، عجبني اشوف نوعية العطر اللي يستعمله ، رحت للمجرات فتحتهن اول مجر بيه عطور اخذت كم واحد رشيت منهن لا مو نفسه اللي شميته ، ضليت اطلع واحد ورا الثاني الى ان لكيته و الغرفة صارت ريحتها عطور خبط
رشيت منه غمضت عيوني وشميت العطر
مروان: ها عجبج ؟
التفتت واشوف مروان هذا شجابه ؟وكع العطر من ايدي وتكسر، صار كم يوم ماكو على حظي اليوم اجى نزلت للكاع حتى اشيل الكزاز ما حجيت شي ولا باوعت عليه بس احس بيه كاعد يراقبني
مروان: ما كلتيلي عجبج ؟
جنت الم بالكزاز ذبيته من ايدي وكمت وكفت باوعتله
رسيل: لا بس جنت دااا
ارتبكت قاطعني
مروان: على كيفج دكات گلبج وصلت يمي شكالولج ماكل بشر قبل ؟
رسيل: لا بس مو اللي ببالك اني جنت انظف وووو
قاطعني
مروان:ليش شنو البالي ؟
استغفر الله هذا شبيه
رسيل: اسفة مو قصدي واذا على العطر اجيبلك جديد
مروان: وانه مارايد العطر يفداج
يحجي ويباوعلي من فوك ليجوه ويضحك مشيت وصلت يمه حتى اطلع واكف بالباب، اروح منا يجي منا اروح منا يجي منا
كفوف ايديه بجيوبه و لابس زي عسكري ، ما انكر طالع هيبة وكلش حلو بس لان اكرهه اشوفه بنظرة كره على حقد ماشوف بيه شي حلو.
رسيل: اريد اطلع بلا زحمة عليك سويلي مجال
مروان: ليش دخلتي ؟
رسيل: كلتلك جنت انظف ووو.
مروان: واخذج الفضول وكمتي تفتشين باغراضي الخاصة ؟
رسيل: مو قصدي افتش بس ردت انظف وخلص
مروان: انه حاط نفس العطر ، خوفي لا انسطرتي!
حجيت بنفاذ صبر
رسيل : استغفر الله يا ابن الناس افهم اني جيت انظف وبس غير افكار طلعها من بالك واذا عندك شغلات حاب تسويها عندك رغد ماشاءالله توب بهيج سوالف
رفع حاجبه باوعلي بمكر
مروان: ياسوالف ماجاي افهم ؟
اعرف كلش زين يفهم شنو كاعد احجي بس يسوي روحه غشيم
رسيل: لا تفهم احسن خابر رغد تفهمك
مروان: هيج البوسة طابعة براسج لحد الآن؟
رسيل: بابا انت واحد مريض وعقلك يصورلك اشياء ما صايرة واذا سمحت وخر اريد اطلع لان اختنكت وراح اصيح
مروان: مو بصالحج تصيحين وانتِ بداخل شقتي عيب اهلي شيكولون توكعين من نظرهم.
يحجي ويضحك عيونه تلمع ..
رسيل: تضحك على شنو انت ها ؟ وخر كاعد اكولك لا تلح زايد وساعة السودة اللي فكرت بيها انظف وية نور
مروان: لازم بزر النستلة جان مايحبج ؟
رسيل: شنو قصدك ؟
مروان: يعني كلشي ماكو الضاهر لا بوسة لا حضن ومن شفتينا انحفرت هنا بحيث ورا اسبوعين حجيتيها بوجهي ما تحملتي
يحجي ويأشر على راسي باصبعه
رسيل: الضاهر انت فارغ وعندك وقت للسوالف واني اريد اروح تعبانة
طلع العطر من جنطته العسكرية وشمرها بالكاع فتح القبغ ورش منه على رقبته ورجع رش علية رجعت ليورا وتغيرت ملامح وجهي بينت لعبانة نفسي منه ومن عطره تقرب وهمس
مروان : شميني
رسيل : انت صدك ما تستحي بس العتب علية مو عليك وخر خليني افوت
مروان: فوتي ست و بعد لا تعيديها اليوم عدت سلامات مرة ثانية ما اضمنلج نفسي
وخر على جهة وطلعت اركض لغرفتي ، شمرت روحي على السرير غطيت راسي باللحاف من الفشلة احس راسي راح يطك ثولة ثولة غبية احجي بصوت واضرب على راسي ، شوداج لغرفته شوداج الا تشوفين شكو الا من امداج يارسيل الغبية
مايحتاج كل هالاعصاب ؟
وخرت الغطا من راسي ، وشفته واكف كعدت بحركة سريعة جريت الغطا علية..
رسيل: شجابك ؟
ضحك وكال
مروان: حبيت اشوف ردة فعلج شنو وجنت متوقعها
رسيل: اكو شي اسمه خصوصية ولازم واحد يدك الباب يلا يفوت
مروان: هم صح كلامج بيه وجهة نظر لكن منو الاول اخترق هاي الخصوصية انه لو انتِ ؟
رسيل: ياخصوصية اللي اخترقتها الله يخليك هو عطر ورشيت منه وهاهي
مروان: وانه هم ما مخترق خصوصيتج فتحت الباب وهاهي
رسيل: مروان طلعني من راسك وعوفني بحالي ؟
فات وسد الباب
مروان : شمسوي انه عليش كارهتني ؟
رسيل : تعرف بنفسك شمسوي وليش كارهتك ما يحتاج احجيلك
رفع تك حاجب وكال
مروان : لا ما اعرف انتِ احجيلي
رسيل : تصدك صارلي كم يوم مرتاحة لأن انت ماكو
وجهه انگلب وحسيته ضاج كلش
مروان: مممممم مرتاحة مو ؟ يصير خير رسيل
طلع سد الباب وراح
استغفر الله شنو هذا من بشر ؟
اجى نصف ساعة گلب احوالي كلها خبلني ، كمت افرك بوجهي بقوة
فتحت الكنتور وبلشت ارتب بالملابس مالتي هن اصلاً مرتبات بس خربتهن وعدت ترتيبهن من جديد اريد انسى الصار ألهي نفسي رتبتهن وكملت التفتت لباقي الغرفة عدت ترتيب الاغراض عمي وايهم جابولي هواي شغلات وما شفت شنو كبل خليتهن بالمجرات
صار وكت الغداء صاحتلي نور من جوا اسمع صوتها بس بعيد كمت اركض اكيد مابيها حيل تصعد جاوبتها من فوك
رسيل: ها نورة
نور: تعالي تغدي
رسيل : اي اجيت
اووو يعني وياهم الغداء صرت اتأفأف
دخلت للحمام غسلت ورجعت للغرفة شلت شعري بالكيتر مثل الكباية ليفوك نزل شعر منا ومنا بالكوة سويتها لان تك ايد لهذا ما ضبطت عدل
نزلت كلهم موجودين بس ايهم ما موجود
كعدت على السفرة وياهم
شيماء: والله الخطار يوم يومين اربعة بالزايد ماشايفة خطار هيج ثكيل لا يشارك بلكمته اللي ياكلها ولا ينظف وراه
علي: مجاي تشوفين البنية ايديها مجبسة شجاج يامرة ؟
شيماء : والله اللي يريد يسوي شي مايهمه ايده مكسورة لو لا فد الوسخة وسخة
توني اريد اكوم ياسر جر ايدي جان كاعد بصفي بس بينا مسافة
همس
ياسر: اكعدي كملي غداج
رسيل: ما اشتهي
علي: اذا كمتي كلنا نكوم تغدي وخلي الغداء يمر بسلام يابنيتي
كعدت اخذت خاشوكة وبديت اكل ورا دقايق فات ايهم
ايهم: السلام عليكم هاي خيانة تتغدون وانه ماكو
مروان: تعال على اولها .
ايهم: الله يساعدك عضيدي .
دنك باسه من راسه .
مروان: ويساعدك.
مبين متصالحين اكلنه بهدوء الكل ساكت بس صوت الملاعق تنسمع
خلص الغداء وكمت اشيل ماعون ماعون لان ما اكدر ، اجه ياسر اخذهن مني .
ياسر: روحي اكعدي معليج ..
رسيل: بس ..
أيهم: كالج اكعدي يعني اكعدي انتِ مو ايدج وينج وين الشغل.
شيماء: والله خوش ولدي جبتهم وكبرتهم حتى يدافعولج ويوكفون ضدي.
ايهم: منو مدافع شعندنا عركة كلما في الموضوع البنت مريضة من تصير زينة تشتغل
شيماء : شوكت تصير زينة صارلها كم يوم والله ياالله..
ايهم : ما تشوفين الجبس بيديها شثكله شلون تشتغل فهميني ؟
شيماء : اسكت اسكت انت صاير محامي لهاي الشكولات..
عفتهم وما سمعت شنو جاوبها رحت كعدت يم نور بالمطبخ تغسل مواعين ونسولف اني وياها ؛ تقربت يمها وحاجيتها همس.
رسيل: نورة شعجب ياسر متغير وياية.
نور: خيه من البداية كلتلج محد كارهج الج كارهين تصرفاتج
رسيل: هااا ، زين
نطتني الجاي حتى اصبه خليت شكر بالاستكاين وصبيته ، اخذه ياسر وراح .
ورا شوية كبت العيطة الكل تصيح
ايع هذا ملح هاي منو صب الجاي نور
نور: عزة بعينج حاطه ملح بدل الشكر؟
رسيل: لا شكر اقري شنو مكتوب.
نور: انه شعلية بالمكتوب غير تضوكينه
رسيل: ما ادري اروح اجيبهن واصب من جديد.
نور: عوفج منهن اصعدي لغرفتج وانه اصب جديد
عفتها ورحت صعدت شفت أيهم اباب غرفته يعلك لوحة ، بيها مرايا وسبع عيون...
رسيل: حلوة هاي
أيهم: اي كلش احبها هداها الي شخص حيل عزيز علية وجانت ضايعة وبالصدفة لكيتها
رسيل: نفسها ام حرفz ؟
جان يدك بالبسمار عافه ونزل ايده التفتلي
ايهم : شمدريج بيها ياهو حجالج عنها؟
رسيل: على كيفك ليش ضجت محد حجالي بس شفت حرف وية حرفك بالكتب اللي نطيتهن الي وعرفت تحب وحدة
اكو بين الغرف مثل الهول كبير وبيه تلفزيون راح كعد على القنفة وطلب مني اجي اكعد يمه رحت كعدت وهمست
رسيل: تحبها ؟
جر حسرة وكال
أيهم: جنت
رسيل: وهسه ؟
ايهم: احب ايامنا من جنا سوى
رسيل: ليش بطلت تحبها ؟
أيهم: لان صارت مو مالتي
رسيل: ليش وين راحت ؟
أيهم: عافتني وتزوجت
رسيل: لعد هاي ما تحبك مادام عافتك وتزوجت غيرك ماتسوه حتى تنقهر عليها.
أيهم: بسببي تزوجت.
عقجت حاجبي والتفتت عليه..
رسيل: شلون بسببك؟
أيهم: انه كلتلها ما افيدج شوفي دربج .
رسيل: يوووو كلكم هيج تعلقون البنية بيكم وبعدين امي تريدلي بنت اختها وتفلتون..
ضحك وكال..
أيهم: لا اعكسيها
رسيل: شلون اعكسها
أيهم: ابوي رادلي بنت اخوه
رسيل: هو شنو غصب اذا ما تحبها، جان خطبتها والله احارب الدنيا واخذها .
أيهم: هاي مو عندنا ، جدي من احنا وصغار وزعنا هذا لهاي وهاي لهذا ، ومن كبرنا ياسر تزوج نور ، هم جان رايد وحدة وجدي ماخلاه ياخذها ، وانه هم راحت من ايدي، فد مروان قبل لان رغد تعشقه وهو متقبلها عادي
رسيل: اي ناس تلوك لناس، وانت منو من البنات رادوها الك
أيهم: اخت رغد الصغيرة ، غيداء
رسيل: كلهن بحرف الغين
أيهم: يابه تنسيقات شعبالج
ضلينا نسولف لحدما صعد مروان باوعلنا وكال..
مروان: اي يابه الله يثخن لبنكم .
أيهم: لا لبن ولا روبة كاعد احجيلها على زمن.
مروان: هاا شكو بيها صارت بيها اسرار.
رسيل: ايهم اروح انام بعدين نكمل
مروان: لازم ازعجنا جنابج ست
أيهم: شبيك ما تكلي خال بالك وياها...
مروان: بحالها انه ، رايح انام ما نايم صارلي يومين، هاي اجازتي يمكن اكضيها نوم بنوم
أيهم: ارتاح شعندك حتى للشغل لا تنزل.
مروان: لا ما انزل اضل نايم
أيهم: نوم العافية
مروان: الله يعافيك
دخل لغرفته وسد الباب اني هم رحت لغرفتي نمت صار المغرب ، فزيت على صوت الاذان الجامع قريب علينا كعدت رحت توضيت وصليت المغرب نزلت جوه البيت هدوء ماكو احد ، ورا ربع ساعة دخل ياسر شايل بيده اكياس
ياسر: رسيل سويلنا صينية توب هاي جبت حبشكلات حتى نسهر اليوم ، فد اصلي واصيحهم ، وها عشا لاتسوون انه اجيب وينها نور
رسيل: فوك نايمة
ياسر: خطية نفسها تلعب ما ادري شبيها
رسيل : راح اصعد اشوفها.
ياسر : صيحيها بدربج.
رسيل : تمام..
عفت كلشي من ايدي وصعدت الها، دكيت الباب وفتت
الشقه باردة ثلج وظلمة ، نعست شفتها نايمة اجيت مددت بصفها صافنة على وجها نمت اني هم بدون ما احس على نفسي...
كعدت على صوت ضحك ، فتحت عيوني التفتت واشوف ياسر ونور خربانين ضحك
رسيل: ضحكوني وياكم ، شنو باجر عيد ، ضمولكم ضحكة
ياسر: انه وين دزيتج؟
رسيل: اكعد نور غير
ياسر: وانتِ شنو سويتي
رسيل : نمت
ياسر: دازج تكعديها لو تنامين يمها يلا كومي أيهم جوة خسرته بالطاولي اريدكم تشجعوني لخاطر المشترة الجبته الكم ..
كمزت.
رسيل : يلا اني اشجعك
نور: واني هم
نزلنا نركض اني ونور وطلعنها بالحديقة اول مرة اعيش جو عائلي وافرح بعد ما اجيت لهنا..
رسيل: الله الله شنو هاي الاجواء بس المخربها دخان النراكيل.
ياسر: اكعدي لج صايرة نازكة ومن تتعاركين يطلع جبار البداخلج
نور: وهو منو من يتعارك ماعنده جبار كل احنا هيج .
أيهم: زين تعترفون
نور : اي
أيهم: يلا صيروا فريقين وحدة تشجعني والثانية تشجع ياسر.
نور : انه اشجع ياسر
رسيل: وانه اشجع ياسر
ياسر: بداية حلوة .ويغمز لايهم.
ايهم : يابه بدت تحجي مثلنا
رسيل: لا احب بس كلمة انه
أيهم: تعالي ليش تشجعين ياسر مو انه
رسيل: هو تسوك النا انت شجبت بلة ؟
أيهم: يعني بعتيني بنستلة رسيل ؟ بسيطة جنت محضرلج مفاجئة بس طلعتي ما تستاهلين..
رسيل: لا انه اشجع ايهم
أيهم: حجي يفيدج راحت عليج
رسيل: شبيك ما تتحمل شقة
أيهم: حسب تشجيعج اقرر اذا بحماس باجر هديتج توصل اشوفج خاملة انسيها .
رسيل: هاهي والله هيييي
حجيتها وضحكت من قلبي
ياسر: والله ما تتأمنن كل النسوان مكارات جبتلج كوم نساتل شجيب بعد ويوكف بعينج
رسيل: مو اريد اعرف المفاجئة شنو هسه يلا بلشوا حتى نبدي نشجع .
لزمت الدفتر والقلم وقسمت الورقة بالنص وكتبت ايهم وياسر
بلشوا يلعبون واحنا نشجع واللي يفوز نصفكله بس اني ما اكدر اصفك اكتفي بكلمه هيي وبس .
مرت نصف ساعة واجى مروان فتح باب الكراج دخل بسيارته طبكها ونزل رفع ايده وصاح ..
مروان: الله بالخير...
أيهم: هله بجبيرنا تعال على اولها
مروان: والله مشتاق اغسلك
أيهم : يلا نشوف منو يغسل منو اريد افعال مو فد حجي
كعد مروان اول ما لزم الزار ، كمت ، ايهم وياسر رفعوا راسهم و صاحوا هاي وين ؟
رسيل: اريد امدد تعبت الجبس ثكيل وتأذت ايدي.
حجة مروان مستهزء...
مروان: اذا حضرت الشياطين ذهبت الملائكة
حجاها وشمر الزار بقوة..
رسيل: انت اعرف
راد يكوم علية لزمه ياسر
ياسر: اكعد العب لا تخربها
مروان: انه لو هي الادبسز ما تشوف شتكول..
ايهم: شعليك بيها الراحت والبقت
مروان: كومة صارلي واكف بالباب اسمع الضحك والتكهكه مالها رحت بشغلة ورجعت وباقية بنفس الضحك والهوسة من انه جيت تسوي روحها تعبت العيارة
نور: خوية هدي وارتاح السالفة تافهة ما تسوة ..
عفتهم وطبيت ، سمعت الحجي كله لان الطرمة كبيرة وصلت جوة و هو بعده يدردم صعدت اخذت ملابس وفتت للحمام سبحت بس ايدي مطلعتها خارج الدوش لفيت جيس نايلون عليها حتى ما تتبلل
كملت ودخلت لغرفتي مشطت شعري ونشفته بالسشوار
مددت وفتحت الرواية اسمها ( لو كنت حبيبي)
مضمون الروايه يحجي عن رجل اعمال زنكين عنده زوجة تحبه كلش كلما تريد تقدم حبها يقابلها بالرفض ويصدها وعبارته المشهورة بهاي الرواية ( أتمنى لو أستطيع أن أخنقكِ بيدي")
اخر شي الكاتبة كاتبة عبارة
( فهل يستطيع حبها ان يقاوم هذا الحقد؟ وماذا ينفعها كل عطائها لرجل ليس عنده ما يعطيها اياه ألا تذكرة سفر كي ترحل عنه الى الأبد؟
حبيت البطله وقوة شخصيتها وشكد تحملت من البطل
وصبرت عليه وتالي رجع لأحضانها
نمت واني اتخيل هاي القصة عبالك فيلم كدامي، نستني الواقع اللي عايشة بيه ولو ساعات ، وقررت اكمل الكتب البقية واطلب من ايهم ينطيني كتب غيرهم
ثاني يوم نزلت ونفس الروتين العادي، بهذه الفترة شوق ماكو مرتاحة منها بغرفتها وقافله الباب من النوع انعزالية بس اذا نزلت تگلب البيت وتصعد عندها قابلية عجيبة والدموع التنزل بوري وينفتح..
صار العصر فات ايهم شايل كارتونة كبيرة وياسر بيده علاكة صعدوا فوك ورا ربع ساعة صاحني ايهم
ايهم: رسيل ، رسيل
رسيل: هاا
ايهم: تعالي فوك
رسيل: تمام اجيت
صعدت صحت
رسيل: ايهم وينك
ايهم: هنا هنا
الصوت جاي من غرفتي فتت لكيتن كاعد يم الميز ، عندي ميز صغير ابيض عليه تحفيات موخرهن ، وحاط شاشة كمبيوتر وكيبورد.
رسيل: هاي شنو؟ المن ؟
أيهم: جبتلج كمبيوتر
بداخلي فرحت كلش بس كلت ثكلي عيب ..
رسيل : ليش كلفت نفسك شسوي بيه عندي تلفزيون كافي.
أيهم: كلنا عندنا فد انتٍ
ِ ماعندج وجبتلج واحد، راح اضبطلج الانترنت واشتغلي بيه
جان توه الانترنيت منتشر بالعراق: صح نزل ٢٠٠٤ بس مو كل الناس واصل الها وتعرفه ومن ضمن هاي الناس احنا و بيت خالو جان ماعندنا..
رسيل: بس كلشي ما اعرفله لا الكمبيوتر ولا الانترنت
أيهم: انه اعلمج ، ياسر هم يعرف وشوق لا شوق انتِ وياها حرب لا تروح تخليه براسج النوب ...
رسيل: شكرا الك من كل گلبي
أيهم: اول مرة اسمع شكراً من كل گلبج قبل جانت من نص گلبج لو من ربعه ؟
رسيل: انت ثكيل والله ما يلوكلك تحشش .
ايهم: صدك انه ثكيل ما اعرف ليش يمج اخف تصوري انه مستغرب روحي فد اريد اضحكج وبس
رسيل: احتمال تنقهر علية وتستعطفني.
كام صار قريب يمي باوعلي بنظرة كلها حنية وكال..
ايهم: لا وروح عمي ما جاي استعطفج ولا شي ، ما اعرف اكو احساس بداخلي يخليني اريد اطلعج من الانتِ بيه وافكر شلون ارجعلج ضحكتج .
رسيل: لو مو انت ونور جان اني شسويت فهمني...
ياسر كام يصفك ..
ياسر : الله الله شنو هاي المشاعر صارلي ساعة واكف واباوع عليكم تصلحون ممثلين بفلم البؤساء
ايهم شال الكارتونه وشمرها عليه ، عافنا وطلع .
رسيل : صدك احنا بؤساء
حجيتها وضحكت
ايهم: كولي لنفسج انه مالي شغل بيج .
رسيل: اي وزمن ..
ايهم: مممممم جلبتي بيها انه صوجي نطيتج كتبي
رسيل : صدك كملت الرواية تجنن عاشت ايدك...
أيهم: ياهو بيهن...
حجاها وكعد على الميز وعينه علية
رسيل: اللي بيها حرفك وحرفها
أيهم: شمعنى بديتي بهاي .
رسيل: جذبني العنوان والمشهد وقريتها.
ايهم : تحبي؟؟؟
رسيل: نعم
ايهم : خطيبج تحبيه ؟
رسيل: قصدك حسام
ايهم: اي
رسيل: وليش تسأل
ايهم: هيج فضول
حجاها ورفع اكتافه
رسيل: ما احب احجي خصوصياتي لاحد
ايهم: حتى انه ؟
رسيل: مو قصة انت او غيرك ، الوحيدة اللي احجيلها عن نفسي ماما ومن راحت تحفظت على حياتي صارت مثل الكتاب سديته ما اسمح لأي احد يتصفح بيه غيري اني.
ايهم: و انه عجبني عنوان الكتاب وحاب اتصفح شلون؟
رسيل: هذا الكتاب ما يفيدك كله قهر بقهر يتعبك..
ايهم: وياهو الكالج اتعب ، انه عاجبني اقراه
رسيل: يجي يوم واسولفلك بس مو هسه شكراً جزيلاً على الهدية ويوم افرح بزواجك يارب
ايهم: ماكو دعوة ثانية فد هاي
رسيل: شعندك غير شي متخرج وعندك شغلك الخاص سيارة عندك وصحة وعافية ما بقى غير بس الزواج.
ايهم: دكي خشب والله لو صار بية شي انتِ السبب واجي عليج.
رسيل: لا تخاف ما احسد ، ويلا ننزل لان عمة شيماء راح تنفجر
أيهم: اي والله صدك امشي ..
نزلنا اول ما شافتنا كالت..
شيماء : صايرين حماميل لبنت سوسن يا شايليها يا جايبين غراض الها اي ياشيماء ربي وذبي بالشط .
ردت احجي ايهم لزم ايدي حيل وخلاني ورا ظهره معناها اسكتي
ايهم: لان صحتج تعبانة ما راح اردلج الحجي عيب علية ارد امي فد لو غيرج وحدة حاجية وياية هيج ماهدها اذا ما مكسر اسنانها بحلگها.
شيماء: تغلط على امك هاي جزاتي امداني آخر عمري ينغلط علية
كامت تلطم
ايهم: حشا انه ما غالط عليج ولا هاي اخلاقي كلتلج لان امي سكتت لو غيرج وحدة ما ارضا منها الاهانة ..
شيماء : امشي من وجهي اطلع لا بارك الله بالبطن الجابتك.
اشرلي اصعد فوك صعدت وهو طلع ..
ثاني يوم كعدت رحت للحمام غسلت وجهي وايدي وفرشت اسناني وطلعت شفت نورة .
رسيل: صباح الخير ..
نور: صباح الورد اليوم الكل هنا حسبي حسابج
رسيل: شعجب؟
نور: سووا ثواب على روح عمي صادق
وعلى سلامة جدي ..
ما جاوبتها اختنكت.
اوووف بابا رحت وكاموا يسوولك ثوابات دمعت عيوني، رحت لغرفتي بدلت لبست دشداشة ولفيت شال خاف احد يجي ، نزلت لكيت هواي شباب بس صغار يمكن ولد انتصار وازهار ، يطلعون بكصتي الولد وبناتهن اصغر
رحت للمطبخ كلت اساعدهم على الاكدر عليه
صاحتني ازهار
ازهار : رسيل تعالي
رسيل: اجيت
ازهار: هاج هذا الجدر صعديه للمخزن وتعالي .
رسيل: بس ايدي ما اكدر ..
ازهار : خفيف شوفيه
اخذته منها صح خفيف بس ليش اختارتني من دون الكل ، بدون تعليق صعدت ورحت للمخزن طابق ثالث فتت واشوف شاب صغير يطلع بكد ريناد لابس شورت وكاعد
رسيل: شعندك هنا ؟
اريد افوت واكف كبالي
رسيل : وخر هاي شبيك
جر الشال من راسي خزرته .
سمعت عيطة التفتت اشوف ازهار ومروان وراية
كامت تصيح
ازهار : هاي تاليتج وية ابني ؟؟؟
يتبع ....