رواية العروس في الثوب الاسود الفصل الرابع عشر 14 بقلم عبير ادريس

 رواية العروس في الثوب الاسود الفصل الرابع عشر 14 بقلم عبير ادريس

التفت مروان سد حلكها وجرها للمخزن حجى من بين اسنانه بأعصاب خازرها 

مروان: صوتج نصيه ، شنو الناويه عليه أزهار جبتيني من نص الزلم وعفتهم بوحدهم حتى اشوف رسيل وي ابنج بوضع مخزي!! واووو!! وين المخزي بالموضوع ؟ واكفة بيديها جدرية وابنج السكط واكف يمها شنو الغريب يعني اريد افتهم ؟؟ 

وخرت ايده من حلكها وعيونها مدمعه خافت منه كلش لدرجة حلكها صار يرجف 

أزهار: ياخوي بعيوني شفتها اشرتله وصعدوا فوك.

دفعها حيل على الحايط.

مروان: ازهار كيد النساء جوزي منه انه اكره ما اكره الحيلة وينضحك علي تسدين حلجج والناس جوة ما اريد طير بشر يعرف بالصار هنا وتنزلين تلميلي خواتج بغرفو ابوج وابنج الكلب ما اريده يروح خليه يضل هنا عندي كلام وياه واياني واياج اسمعج هامسه شي يخص الصار ويسوء لسمعه رسيل فاهمتني مو؟ 

شال ايده راد يضربها ، وخرت على صفحة وخلت ايدها على وجهها ..

مروان: ولج هاي بنت عمج شرفها من شرفج اذا طلعت حجاية عليها مو تروح بالرجلين ، ومالنا عين نرفعها بعيون الناس، زين عوفج منها كارهتها احنا ما فكرتي بينا ابوج ماخفتي عليه ؟ جدج قبل جم يوم طالع من المستشفى ما خفتي يصيرله شي ؟ لو هو غباء وبس

ازهار: حقك خوية بكل شي حجيته، اوعدك ماتنعاد، فد هي صلفة وترادد امي هواي.

مروان: تعاي وكوليلي ، افرك حلكها فرك مو تتهمينها هيج تهمة ازهار عندج بنات خافي الله بيهن ويلا ولي جوة لبين ما اجيج .

جرت ابنها وطلعت تركض حتى ما باوعت علية 

التفتلي وكال..

مروان: وانتِ هم احملج مسؤولية الصار.

رسيل: ليش اني شعلية ، قابل خططت وياهن حتى أأذي نفسي؟ 

مروان: لا فد لبسج وجسمج يجيب التايه كم مرة كايلج يا بنت الناس عينج على حجابج ولبسج ، اكو زلم بالبيت هوووواي والعين عليج لأن حلوة ، خلي بالج من الكل حتى انه محد بينا معصوم وانتِ تفترين بنصنا عريانة

ضحكت مصدومة بكلامه..

رسيل: وين العري الله يخليك؟ شو دشداشتي شعرضها وحجاب لابسته بعد شنو؟ 

مروان: انه ما حاجي على هسه ، كل يوم بشنو اشوفج ، تراكسودج لزك والشعر يتطاير وراج عبالك مي والملامح ....

راد يكمل سكت وبقى صافن بعيوني تنهد وفرك وجهها ...

رسيل: والله مو لزك اكبر من قياسي بمرتين جايبيه بعد شنو اسوي

مروان: انه من احجي لجانبج لا كارهج ولا رايدلج الشر افهمي يا بنت العم

رسيل: واني لو اموت ما البس حجاب بالبيت ، شنو سجن هو ؟ وبعدين الحر ما اتحمله..

مروان: هاي مو نور وياج سنين ما لامح شعره منها ، شو ما كالت سجن شمعنى فد انتِ تعاندين حارة عليج وباردة عليها؟ 

رسيل: نور وحد واني وحد ، اريدك كلمة تحفرها هنا 

أشرت على راسي واسترسلت..

(رسيل مو محجبة ومحد يكدر يغيرها ويفرض عليها شي هي مو حابته تمام)

مروان: وانه بعد عندي كلمة واريدج تحفريها هنا ...

كفخني على راسي بقوة وكمل كلامه كاز على اسنانه

مروان : مرووووان ما تمشي مرة 

من اكول حجابج ما ينزع معناها ما ينزع ، وبطلي كعداتج وي أيهم وياسر، وخففي شقاج والضحك الزايد ما حلو ، يقلل من قيمتج حلاوة البنية بثكلها وهسه شنو اريد منج؟ تروحين تغسلين وجهج وتنزلين جوة يم البنات وما اريد تبينين ضايجة من شي وهذا الموضوع لا تحجين بيه حتى وي نفسج لا لنور ولا لأيهم صار معلوم؟ 

رسيل : ماشي

مروان : عكب باجر اخذج افتحلج الجبس مال ايدج، صارله اسبوعين مو ؟ 

رسيل: بس الطبيب كال اقل شي شهر ..

مروان: حتى لو نروح ونشوف شنو يكول وهم اذا يكدر يبدله صاير اسود، شنو تلعبين بالطين وهيج متغير لونه..

رسيل: لا مو العب بالطين بس من 

سكتت دنكت راسي.

مروان: عوفج من السالفة انسيها وانزلي جوة ما وصيج بعد 

رسيل: هاهي

طلع من المخزن هو ويمشي كال..

مروان : حجابج رسيل لا تنسينه.

رسيل: ان شاء الله ...

طلعت وراه فتت للحمام غسلت وجهي صح مروان اخذلي حقي بس خفت كلش وگلبي كام يأذيني يعني وين واصله الحقارة بيهم يفكرولي بمكيدة ويتهموني هيج تهم باطلة شلون كعدن يخططن الله يستر شنو راح اشوف بعد منهم ، صار لازم احجي وية مروان مادام شوية بيه مجال بلكت يقتنع يرجعني لبيت خالو.

لفيت شالي ونزلت لكيت عمات بابا وبناتهن والولد جايين ، وحتى بيت عمامي اللي لفت انتباهي خوات مروان كلهن ماكو ، عيوني تدورهن ، مو حبآ بيهن لا بس اخاف يسوولي شي.

جنا نشتغل بالمطبخ طبت وحدة تبجي التفتت ازهار لابسة عبايتها ولازمة وجهها وامها تركض وراها.

شيماء: يمة زهرة تعالي اخوج هذا تزعلين من مروان جبيركم و اللي دوم وياكم علمود غلطة منه تعوفين بيت ابوج.

ازهار: انه انضرب بهذا عمري كدام اخواتي وابني يوم يهددني يكول لجلال يمنعني من بيت ابوي ، ما انتظر يطردني انه اطلع بكرامتي.

اجى صوته يرعد...

مروان: وطلعتهم طلعتي او بقيتي مايهمني اللي مايحترم المكان الفايته لا يضل بيه ورحم الله من زار وخفف..

طب ايهم عاقج حاجبه وصاح..

ايهم : هاي شكو شصاير ليش ازهار تبجي ؟ 

شيماء: مابيها شي مخنوكة

أيهم: تعالي بعد اخوج 

حضنها وباسها بگلبي اگول والله لو تدري شنو سوت جان دست بمصارينها.

طلعوا من المطبخ ايهم اخذ ازهار دخلها جوة يطيب خاطرها .

نور: اكلج شنوصار ليش هيج ازهار تبجي اول تالي ولج هاي روح مروان واقرب وحدة اله بخواته سرهم سوة دافنينه لكتهم سوة عجيب..

رسيل: علمي علمج هاي العائلة راح تخبلني كوم اسرار بيها 

فات مروان جار ابن ازهار وياه من ياخته وطلعوا بالشارع.

نور: يا يا هذا وين ماخذه ورايح مبين الشغلة جبيرة و الولد اله ايد بالسالفة الصارت بين مروان وازهار.

رسيل: ما اعرف شنو اكلج..

فات ايهم يمشي سريع وراه ازهار

ايهم: وين مروان ما شفتوه؟ 

نور: برا هو ورعد .

طلع يركض وازهار كعدت بباب المطبخ تملخ بوجها وتصيح.

ازهار : صخام الصخمني راح يأذي ابني ، يايمة ابني راح .

شيماء: كومي من الكاع شجاج مروان خاله لو نسيتي و مستحيل يأذيه.

أزهار: لان مروان الخذاه اخاف ، انتِ ما تعرفينه اذا ضاج من واحد شلون يأذيه.

فات ايهم

ايهم: ماكو شبسرعة اختفوا شوكت طلعوا منا ؟ 

نور: قبل خمس دقايق ...

صار الغده صبينا الاكل والكل كعد ياكل ، خلصوا والسفرة انلمت وجابوا المواعين بالمطبخ ، اباوع على نور تريد تبجي صافنة عليهن من وين تبدي.

رسيل: اساعدج؟ 

نور: تعالي ساعديني بتك ايد رسيل كل يوم اعيد واكولج ايدج ما تكدرين فكيها اول وبعدين تبرعي تكومين تتمنين ايدج تنكسر مرة ثانية ولا التعب اللي راح تشوفيه.

رسيل: يمعودة الشغل ما يموت اساعدج وبنفس الوقت نسولف ويخلص كلشي 

نور: كومي صبي جاي وشكري الاستكاين تأكدي منه شكر ضوكينه لا مثل المرة الفاتت تحطين ملح.

ضحكت ..

رسيل : لا راح اضوكه 

فات ياسر صاح

ياسر : جايات يابة بسرعة 

نور: هسه نصبه واخذه انتظر لا تروح .

ياسر: نور شبيها ازهار كاعد تبجي بالحديقة

نور: ما اعرف مروان ضاربها واخذ ابنها وطلع.

ياسر: كالي ايهم ولحد هسه ما اجوا نتصل على مروان كله مغلق يطلع .

نور: مبينة سالفة جبيرة

ياسر: تلكينه لاكفه يدخن لو مصادق وحدة ويريد يأدبه هو هذا مو راحة يوميو جاية عليه شكوة وابوه خطية مل منه ومن سوالفه.

نور: الله يهديه 

رسيل: هاك عيني كملت اخذها للصينية

ياسر: لج هاي شنو ؟ 

رسيل: شنو ؟ 

ياسر: تارسته شكر 

رسيل: وين يمعود هي جيلتين .

نور: ياااا ولج شدعواج شنو عسل خوما عسل رديه للقوري وصبي جديد وتوبة وهاي جريت اذني اذا خليتج تصبين جاي بعد انه صوجي اتوب وما اتوب.

ياسر: يعني هي ام الملح ؟ 

نور: بلي هي هي

ياسر: و ليش كلتي انه ..

نور: خطية عوزها رزالة عمة شيماء تستلمها 

رسيل: والله نور انتِ ماكو منج حتى بهاي تفكرين بية خاف اتأذى

رحت حضنتها نزلت دموعي على حنيتها..

نور: يا طلابة الماتخلص هسة ليش البجي ؟ 

حضنتني وباستني

نور: انتِ اختي الماجابتها امي اموتن عليج .

رسيل: وانه بعد اموتن عليج .

ضحكنا وسرعان ما تلاشت الضحكة على صوت رجال صاح يا اهل الدار..

ياسر: هله ب ابو رعد تعال ماكو احد غريب كلها اهلنا

جلال: السلام عليكم .

ردينا وعليكم السلام .

جلال: ازهار وينها بلكت تصيحوها والبنات هم خل يطلعن حتى نروح رحمة لأهلجن ياسر ماشفت رعد ؟ شو مابين على الغداء 

ياسر: ياخوية طلع هو ومروان ولسه محد بين منهم.

جلال: رعد وي مروان شجمعهم بيوم من دون ميعاد.

ياسر: انه هم مستغرب اكثر منك يجوز اخذه يحجي وياه تعرفه مراهق ومتعب امه 

جلال: اخ مأذينا ومأذي امه ، ما فد يوم مشى عدل وريح گلبي .

ياسر: مراهق خوية اتحمله كلنا مرينا بهاي المرحلة وعدت 

اخذوا الجاي وطلعوا خلصنا شغل المطبخ وبدأت الوفود تروح ضلت ازهار طلبت من زوجها تبات لان لحد الان لا مروان ولا ابنها بين خبر منهم حركوا التليفونات حرك عليه لو ينطيهم مشغول لو يغلقه تخبلوا

عمة صبرية حرامات بيها كلمة عمة ، اجتمعت بغرفة عمو علي وياهن تنهدت وحجيت بصوت مسموع

رسيل: الله يستر لو انجمعن سوى

نور : منو تقصدين ؟ 

رسيل: عمة صبرية وازهار وشوق 

ضحكت نور وكملت مسح 

رسيل: شو تضحكين .

نور: صدك الله يستر منهن عصابة على كولتج .

رسيل: بس ابتهال مبينة حبابة...

نور: ما مجربتها بعد ، هاي الخنوسية ام الخطط.

رسيل: صدك جذب يعني مابيهن حية صالح

نور: ليش انتي سامعه بحيه متأذي ، من اسمها حيه ، ما تشوفيني اسبوع ما وصلت يمج،حصرني بغرفة عمي ، وذاك التهديد اليعجبج لو وصلتلج شراح يسون بية

رسيل: لعد شلون هسه تحجين وياية ما تخافين ..

نور: لا ما اخاف لزمت مروان وبوجود ياسر سولفتله بالصار من شوق وكعت روحها ومن تهمنج زور ومن انه خفت اشهد ضدج ولحد ما لزمني وهددني ، وهو محاجيهن وكايل الهن نور اللي يأذيها العب بيه طوبه ، وعافني بحالي،،فد هم ما أأمن ..

رسيل: وشمدريج مرزلهن؟ 

نور: ياسر سولفلي ..

رسيل: هااا ...

من هاي مروان اليوم ما صدك بيها وعرفها لعب ، اني تفاجأت من يكللها اكره الكيد واللعب كلت شمدريه وهو جان طالع من البيت وحتى هو و ايهم ما يتحاجون شلون عرف

جنت مستبعدة نور تحجيله، والله هاي نور ذهب صافي مابيه كل شوائب .

كملنا شغل وصعدت فوك لليل تذكرت سالفة بيت خالو اگول لمروان لو اخاف يعصب  ويگلب علية والله حيرة، ما تنعرف ردة فعله ابد.

جنت كاعدة كلت خل اشوف الكمبيوتر اشغله احاول بيه بلكت اعرفله  بحوشت  ما يشتغل تأكدت من الكهرباء مشتغلة شبيه هذا  كمت رحت لشقة ايهم ديكت الباب ، اجاني صوته 

فتحت الباب وفتت الشقة ثلج ، جان كاعد بالأ ستقبال مشغل فيلم عربي ضوء خافت وحاط وكرزات مسوي سهرة حلوة.

رسيل: اريد اسألك على الكمبيوتر شو ما يشتغل.

يكرز وعيو نه على التلفزيون 

ايهم : تعالي بشرفج يكمل الفيلم ونروح اكعدي.

رسيل: شنو كاعد تتفرج ؟

ايهم: فيلم لأحمد حلمي اسمه ( جعلتني مجرماً) نازل جديد، مبين حلو

رسيل: كل افلامه حلوة وتضحك ..

ايهم: تعالي  اكعدي شبيج ..

حجاها وطبطب بيده على القنفة 

رحت كعدت وسألته..

رسيل: هاي على اي قناة عارضيه ؟ 

ايهم: مو قناة هذا قرص ، وهذاك السيدي

رسيل: ها تمام 

بدينا نتابع الفيلم ، كل شوية نضحك على موقف، مرات ضحكتي تطلع بصوت عالي لان احمد حلمي ملك الكوميديا كلش يضحكني.

التفت علية مبتسم ..

ايهم: دووم الضحكة يابة ..

رسيل: شكراً والله جنت ضايجة 

صفن بوجهي ،حك شعره بطريقة حسيته ارتبك 

ايهم: عندي اقراص بعد عود اخذيهن وياج شغليهن بالكومبيوتر .

رسيل: يصير ؟ 

ايهم: اي بيه مكان للاقراص.

رسيل: حلووو

رجعنت للفيلم ورجع الضحك هالمرة ايهم ضحكته فضيحة يضحك بصوت عالي .

مرت دقائق مرت على ضحكتنا و باب الشقة تكسر من الدك..

صاح ايهم 

ايهم : هيوووو شكوووو .

وكف الفيلم وكام للباب فتحها مروان واكف وايده على اطار الباب ومخنزر ...

نتر ...

مروان: بعد بعد خوش ضحك واستهتار ماتكولون اكو بشر قنادر يريد ينام شنو هالضحك .

ايهم: هسه ليش تصيح احجي على كيفك وبعدين كاعد نتابع فيلم وضحكنا عليه كفرنه قابل ؟ 

مروان: اي كفرت من يمتى وجاي احنا نطبب بنات عمنا ونقفل ابوب وحدنا ؟ 

كلت بگلبي ومنين طلعت رغد هذاك اليوم ، عليه حلال وعلى غيره حرام .

ايهم: عوفك من هالحجي وكولي وين اختفيت والولد وينه .

مروان: اخذته ادبته وادبت امه ورجعته الها.

ايهم: ليش شنو سوة؟

مروان : مو ضروري تعرف ؟ 

حجاها ومد راسه صاح ، 

مروان : وانتٍ ابوج اليوم الاربعين مالته وباجر طالعين للنجف هذا ضحكج مال وحدة دافنتلها راس بصل مو بشر ، يا ادبسز 

ايهم؛ استغفر الله ربي روح خوية نام الله يهديك

مروان : شنو شفتني مخبل ويهديني شو ماتعرف تسولف انت.

ايهم : مروان كاعدين ومتونسين لا تضوجنا..

مروان : ايههههههههههمممممم ...

ايهم : كافي راح يطكلك عرج.

مروان : متونسين كلتلي مو ؟ حلووو 

راح وايهم سد الباب وفات  كمت ابجي...

ايهم: شبيج يمعودة توج شحلاتج 

رسيل: حجي مروان صحيح اني شلون هيج اضحك واسولف وبابا ماصارله هواي مم متوفي.

ايهم: ما سويتي جريمة اذا ضحكتي شوية وين المشكلة؟

وبعدين دوومج ضايجة واسمعج باليل تبجين والاسود لابسته من فوك ليجوه، بعد شكو، لا تصيرين مهزوزة كلمة تأثر عليج وتگلب حالج گلاب، خلي عندج شخصية من هيج كالج، كوليله انه ما ناسية ابوية و نفسي الها حق علية 

كعد بالكاع كبالي واني على القنفة باوعلي و عيوني مليانة دموع ورا شوية بديت اهدأ مسحت عيوني وكلتله

رسيل : متأذية ايهم ما اعرف شبية گلبي يوجعني على اخواني شلون اوصل الهم بأي طريقة فدوة لعيونك ساعدني راح اموت

ايهم : رسيل عوفي السالفة هسه احسن و لا تخافين ماعليهم شي..

رسيل : اعرف ماعليهم شي بس  محتاجيني بعدهم صغار 

صفن بوجهي ميل راسه وهمس..

ايهم : نيالهم عليج .

ما جاوبته كمت وكفت وهو هم وكف 

ايهم : هااا وين ؟؟

رسيل: اروح انام 

ايهم : بعد وكت خلينا نكمل الفيلم وروحي.

رسيل : ما اكدر تعبت ومالي خلك لأي شي..

ايهم: براحتج راح اطفيه من تصيرين زينة نشغله ونشوفه سوى تمام؟ 

رسيل: تمام تصبح على خير..

ايهم: وانتٍ من اهله .

رحت لغرفتي احتقرت نفسي اني شلون نسيت بابا وضحكت بهيج طريقة وجبت الحجي لنفسي بجيت لحد ما نمت ، حسيت على صوت دكه خفيفة على الباب كمت فتحتها نور.

نور: حبيبتي كومي صلي الفجر و بدلي رايحين للنجف كلها صلت وبدلت ضليتي فد انتِ

رسيل: صباح الخير ، ما ادري اخذتني النومة زين سويتي كعدتيني.

كمت صليت وبدلت لبست عباية اسلامية وشال طلعت من غرفتي شفت نور لابسة عباية رأس وبيديها ايوته تجر بيها جر من النعاس.

رسيل: جيبيها وياية الله عليج ، فدوة النوم بعيونها..

نور: عوفج منها تعالي كوليلي هاي شلون راح تزورين بيها  وماعندج عبا ؟ 

رسيل: ما ادري ؟ 

نور: اخذي الجادر مال الصلاة وياج خليه بعلاكه 

رسيل: ماشي 

رحت اخذت الازار ونزلت لكيت الكل منتظريني عدا الولد ماموجودين صاح عمو علي.

علي: يلا يابه امشونا ، شيماء حظرتي مكان الحجي ترة اليوم ارجعه للبيت بعدما  نرجع من الزيارة..

شيماء: اي حظرته.

من وكع جدي ونام مستشفى راح لبيت عمي جابر ابو نور لان عمي شغله مو متعب و ولده كلهم ماعندهم شغل بوقت طويل مثل ولد عمي علي لهذا بقى هناك حتى يداروه 

فتت للمطبخ اخذت علاكة من المجر خليت بيها الازار وطلعنا ، اشرلي ياسر بيده تعالي رحت شفت سيارة مروان . صاعد بيها هو وايهم ليكدام ، وياسر ونور ليورا واكو مكان فارغ خلوه الي صعدت يمهم كعدت..

وباقي السيارت صعدوا بيها البقية الكل اجى ويانا عدا بيت عمو جابر لان جدو يمهم وبيبي هم راحت يمهم لان صحتها مو مال سفر.

رحنا و الطريق كله ساكته وضايجة  ،  يسولفون بينهم واني اسمع وبس  كلشي ما حجيت ومروان هم ساكت ما شارك بالكلام 

يسوق سريع وكل شوية ساب البقية لان يتأخرون ويخلوه ينتظرهم ، علما يلتمون ويرجع يكمل..

عاط بصوت عالي ..

مروان: بزعوني ولد القنادر انه ليش ما احب اطلع وي الهوسه ، من اكلان الوحل هذا.

ايهم: اعصابك يمعود اذا تعبت نبدل اماكن .

مروان: ماتعبان .

سكت وكملنا قريت لافته مكتوب عليها النجف بعد طول انتظار وصلنا للمقبرة ونزلنا جنت اباوع منا ومنا بلهفة اقرأ بالاسماء وادور.

ايهم: هذا قبر عمي

باوعت قريت الاسم لو متت شلون اثنين صاروا كدام عيوني اعز البشر على گلبي ركضت وحضنت  گبر بابا وابجي بلا صوت احس گلبي تكطع وراها التفتت على كبر ماما بوست كبورهم وبدأت اعاتبهم احجي وياهم على كيفي وابجي ما اريد احد يسمعني ، ورا تقريباً ربع ساعة ايد جرتني من على القبر التفتت نور...

نور: كومي خيه كومي مو حتى الميتين بجيتيهم كافي ادعيلهم واقرأي قرآن اهدي لروحهم كافي حبيبة كثرة البجي مايفيدهم...

كمت من الكاع التفتت الكل يبجي الضاهر سامعيني من احجي وياهم وعلى بجيتي يبجون لان علاقتهم مو قوية ببابا ولا هواي شافوه بالفترة الاخيرة..

اجى ياسر و بيده دبة مي رش بيها القبر اوووف يا بابا انت جنت ترش قبر ماما من جنا نجي هسه احنا نرش قبرك رحت اخذته من ياسر ورشيت الباقي من المي على قبرهم وامسح بيدي مكان اسمهم وادنك ابوسه 

رسيل: ها بابا كمت اني اغسل قبوركم ، هيج هنت عليكم وتخلوني بهيج موقف صعب ليش بابا ليش عفتوني ارجعلي اريد اشمك واشبع عيوني شوف بيك .

جروني كعدت على صفحة قروا الفاتحة على روح بابا شفت مروان شايل بيده دبو مي  غسل القبر مرة ثانية ودنك على القبر يحجي وية بابا ويبجي بس بصوت مامفهوم 

كام ومسح عيونه ولحيته شوية طولانه هو على طول يزينها بسبب وظيفته لان ما يصير بس من توفه عمي طولها صاح يلا ..

الكل كام ورجعنا للسيارات  وصلنا لحضرة الامير علي (عليه السلام ) 

امشي ودموعي تنزل عبالك شلال وصلنا قريب الباب نمدتلي علاكة باوعت ايهم .

ايهم: هاج هاي علاكتج طلعي عباتج ولبسيها .

اخذتها منه  لبست الازار ، ودخلنا للحضرة وكفوا بالصحن حتى يتفقون وين يلتقون  عفتهم ومشيت ، لحكني ايهم كام يمشي بصفي وكفت كبال الباب الداخلي قبل لا افوت بعدني بالصحن بس شفت الضريح بجيت بشهكة وكمت احجي...

رسيل: ياسيدي يا ابو الايتام اني يتيمة وجارت الدنيا علية ومالي غيرك من بعد رب العالمين اجيتك اريدك تحميني من الناس هواي كاعد اتأذى واني بنية وضعيفة لا حول ولاقوة ماعندي شي ادافع بيه عن نفسي بس اللسان، انظلمت هواي بحياتي وماشفت ايام حلوة اجيتك وطالبة حمايتك ، انت مو ابو الايتام ؟ اني ما عندي اب وانت ابوية واريدك تسندني  ياسيدي اول مرة اطلب منك شي الية ، كل مرة دعائي يحفظ بابا النا هسه راح اريدك تحميني من كل واحد يأذيني انت باب من ابواب الرحمة..

أيهم: مو كافي بجي 

التفتت عليه عيونه دم بس مابيها دموع 

ايهم: ادخلي زوري وصلي منتظرج هنا ، لا خاف اتيهين امشي اشوفلج وحدة من البنات حتى تجي وياج.

رسيل: ماكو داعي قابل طفلة واتيه .

ايهم: متأكده تندلين ..

رسيل: متأكدة .

ايهم : منتظرج هنا بنفس المكان..

اشرت براسي اي ، و دخلت ازور لزمت الشباك و بجيت النسوان كلها بجت على بجيتي اجتي وحدة جرتني  وغسلت وجهي كعدتني بصفها كعدت وعيوني على الامام ، ادري بيه يسمعني لان هو مات شهيد والشهيد مكانته جبيرة عند رب العالمين.

وكفت اصلي ، كتفت تك ايد لان ايدي الثانية مجبسيها ما اكدر ، صليت الصلاة الواجبة قصر وبعدين صليت الزيارة وصليت انابة عن والديه وعن المؤمنين ، كملت كعدت اسبح ، واسمع النسوان. فدوة سنية وتزور شكد حلو الثانية تكللها جا هو الامام فد الجن الامام للكل الله لا يوفق السوة هاي التفرقة ، بعدين اجتني بنية بيديها جكليت، نطتني بيدي وكالت

هاج هاي من بيبي  تكول اصيلة والنعم منج درت وجهي عليها ابتسمتلها ردتلي الابتسامة 

ما اعرف ليش هيج مستغربين الناس مع العلم قبل جنا نجي وماما تصلي مثلي محد ينتبه وما صادفتها هيج مواقف ابد

مدري شكد مر وقت اني كاعدة ومرجيه راسي على الحايط برودة تخبل والريحة مال الحضرة رهيبه تشرح الصدر ، لهناك واسمع اسمي بالمكبرات الصوتية

الزائرة: رسيل صادق حميد ذويكم في الانتظار الرجاء التوجه لغرفة الاستعلامات 

ضل يعيد ب اسمي واني شلون الفاقدة ما اريد اروح اجتني افكار شيطانية انهزم وارجع لبغداد ،وكلت ليش ما اسويها ، لفيت الجادر على وجهي دنكت وامشي سريع حتى محد يشوفني افوت من باب اطلع من الثانية وصلت لباب الخروج اي طلعت واخيراً كمت اتلفت وامشي يارب محد يشوفني يارب ، نزعت الجادر شمرته اكو دجه برا خليته عليها ، امشي وافكر شلون اوصل لبغداد منو يساعدني زين هسه صار العصر اخاف ما الحك ارجع وين ابات وشلون اخذ سيارة وحدي والطريق يخوف اذا صار الليل ،زاد خوفي لا بية ارجعلهم ولا بية اكمل البديت بيه ، اني وافكر دايخة بزماني انجريت من ايدي من قوة الجرة حسيت كتفي انخلع. 

التفتت اشوف مروان يرجف من الاعصاب وبصفه رغد تباوعلي مخنزرة . اول ما درت وجهي عليهم ضربني كف على وجهي وجرني مشى وكمت امشي وراه اباوع على ايده دمراتها كلها طالعة ، نمشي وبعد ، لعد شكد ماشية وما ادري بروحي ، وصلنا بمكان متفقين عليه جانوا دفعني بنصهم ردت اوكع الا شوية  ..

مروان: عينكم عليها حسابج بعدين مو هسه

ضليت ارجف من الخوف والكل يفور من الاعصاب ضايجين والخلق مكلوبة جان تجي عمه صبرية من بعيد تمشي يمكن هي هم جانت تدور .

صبرية : هااا منو لكاها.

رغد: انه ومروان .

صبرية : بحضن منو لكيتوها .

نور: عمه عيب هالحجي .

صبرية : تعلميني العيب ، شوفيها وي من متفقة لحتى تشرد وعافها وشرد ضحك عليها ، هاي بنت المضيفة منو امها جانت يوميه بحض واحد وتبات على ابو سفر وتضل اسبوع شهر ،والمكرود صادق نايم على اذانه.

التفتت للامام ،كلتله سيدي هاي كدامك وهيج تحجي بشرفي وشرف امي اريدك انت تردها 

صبرية :  شوف شوف شتدردم ، شنو كاعد ترطنين انتٍ وهم الج عين تحجين بعد الصار.

نور: ليش شنو الصار عمة حجيج كله ماله داعي وحرام عليج هالمرة تحجين على مرة ميتة هاي بدال ماتترحمين عليها .

صبريه: انه ما اترحم لكح..

ما تحملت عطت بيها بصوت عالي

رسيل: كلمن يشوف الناس بعين طبعه لو ما انتِ هيج ما تحجين على ماما شعرفج بيهن لو ما معاشرتهن.

انجريت من حجابي و هي وبناتها ألتمن علية ملخني من راسي تملخ ، اجوي الولد يلا فكوني منهن .

عاط بيهن ايهم

تيهم: ادبسزيات شنو هاي العرامة لجن بالشارع تكتلن بيها والله والله فد اوصل للبيت لا اشلع من لحمجن لحم .

شوق: بعدك تدافع عليها بعد السوته شو نهزمت منكم وتتراجفون عليها 

ركض ايهم عليها ضربها كف يمكن صداه سمع النجف كلها 

اجى مروان يمشي من بعيد وعيونه تجدح نار..

مروان: وين وليتوا گلبت النجف عليكم صارلي دهر ادور.

ياسر: وين ولينه غير ندور عليها حالنا حالك.

مروان: كمل العدد حتى نولي والتوبة اذا طلعت مرة وياي بعد..

صبرية : والله مو كل مرة مرة ، اكو شريفات ميتهزمن ، حاشانه ، ما نوطي روس لا تجمع مروان ..

ايهم: كافي شكبرج تصيرين اللي بعمرج شبعن مي ورد ، بس سم تذبنا على العالم .

صبرية : سم السمك كون، ويومك كبل يومي واكل بفاتحتك هبر على التمن.

شيماء: تف من حلگج ، ليش متفاولة على الولد ماتستحين مو عيب عليج ماضاك حلكج من هيج حجيتي ..

كبت العيطة بينهن  ، ولدهن يسكتون بيهن لا هاي تسكت ولا هاي ..

عاط مروان بيهن يلا كدر يسكتهن مشينا وصلنا للكراج ، وكلمن صعد بسيارته  الكل ساكت وضايجين مني محد حجى وياية  طيلة الطريق وصلنا لبغداد باليل طبك مروان يم سوبر ماركت جاب عصائر دخل العلاكة من الجامو خلاها بحضن ياسر، وصعد  ياسر وزع للكل ونطاني واحد كلتله ما اريد لو ابتليت على عمري، تمنيت شاربة صندوك كامل ولا الرزالة الاكلتها .

رسيل: ما اريد 

مروان: اشررررررررررررربي 

عاط بصوت عالي من الخوف فتحت البطل وشربته مرة وحدة..

مروان: ادبسز هالمرة تنهزم لا يا بربو... على هاي الدكة والله والله الا انسيج حليب امج فد اوصل.

ايهم: كافي مروان لا تضرب واحد انتبه على الطريق.

مروان: لك فريت الصحن عشرين مرة وماخليت مرة ما سألتها عليها فص ملح وذاب بنت الكلب.

يحجي ويضرب على الستيرن بيده 

ايهم: كلنا دورنه قابل فد انت هاهي صارت بعد 

مروان : بسيطة بسيطة لك انه الها 

بقى الطريق كله يدردم ما سكت ابد

وصلنا للبيت نزلنا  فتح ياسر الباب الخارجي وباب المطبخ ، احنا اول سيارة وصلت فتت للهول نزعت الشال خنكني ورحت للمغسلو اريد اغسل فتحت البوري ما لحكت امد ايدي على المي ، انجريت من شعري ، اكلت كف والثاني وجهي كمت ما احس بيه طب ايهم يركض دفعه 

ايهم: شبيك شبيك تخبلت لك تخبلتتتتتتتتت

دفعه مروان من صدره 

مروان: ما الك دخل اريد اربيها

ايهم: ربيها فد موهيج 

مروان: شلون علمني بله ؟ 

ايهم: عوفها لا يصير بيها شي دنيا ليل وين احير بيها..

راد يهجم علية ايهم دفعني ورا ظهره

ايهم: عوفها والعن الشيطان لان اذا مديت ايدك ماراح اسكتلك ، وما اريد اتجاوز 

مروان: لا اتجاوز يلا ، هسه طلقة براسك وراسها فضت راحت 

حجاها ونفض ايده

ايهم: اي اضرب يلا سويها 

لزمني من ايدي وصعدنا التفتت  مروان يريد ينفجر يتنفس سريع وعركان عيونه تخوف ، هذا شنو مخبل والله مو صاحي

وصلنا لغرفتي فتح الباب وكال..

ايهم: مددي ارتاحي ، اذا تكدرين اسبحي، رايح اسبح وابدل واجيج صرت خيسة اقفلي بابج لا يصعدلج..

اشرت براسي اي 

طلع قفلت الباب اباوع على وجهي عبارة عن طبع اصابع لونه احمر على زراك نزعت العباية فتت سبحت على السريع لبست دشداشة عندي قصيرة نص ردن ، شلت اللحاف ومددت نمت من القهر مرات واحد اذا يريد ينهزم من حياته ينام حتى ما يفكر ويتعب ،  حسيت على دكه خفيفه على الباب وصوته يهمس ..

ايهم : رسيل رسيل نمتي ..

ما جاوبته مابية حيل احجي ضليت نايمة بمكاني غمضت رجعت غفيت ما ادري بالدنيا بعد  الصبح اندكت الباب مافتحتها للعصر اجتي نور.

نور: رسوله اروحلج فدوة افتحي الباب فد احاجيج  رسوله اهون عليج رجلية صارت خيوط من الدرج

والله اذا ما فتحتيها ما احجي وياج وقسمت يمين هاا..

كمت على كيفي فتحت الباب طبت شايلة بيديها صينية بيها اكل وعصير 

رجعت مددت بمكاني اجتي كعدت بصفي.

نور: ليش قافلة الباب عليج ، انه شذنبي مكاطعتني، مو دافعتلج ما سكتت الهن .

ما حجيت درت وجهي على الجهة الثانية .

نور: هاج تشربي بروح ابوج اللي البارحة زرتي قبره..

نمت وعفتها تحجي، دخلت بحالة اكتئاب ما اريد احجي وية بشر ولا اريد اكل اريد بس اموت وهاهي اريد اخلص ، مر يومين اني على هذا الحال اشرب بس مي كلشي ما اكل نور خطية تحجي وتقنع بية ما اقبل ابد ، ايهم بس يباوع علية  من الباب ويروح

ثالث يوم اجاني باليل دك الباب وفات جر كرسي وكعد كبالي 

ايهم: وتالي وين تردين توصلين صارلج يومين كاطعة الزاد شو ما متي ؟  لان الله ما كاتبلج تموتين ..

رسيل: ما اشتهي وما اريد اكل عوفوني بحالي.

ايهم: رسيل ترى انتِ الغلطانه هالمرة ولو مروان ما ضاربج جان انه ضربتج على حركة كلوبنا بهذاك اليوم .

رسيل: اي تايهة الك ولمروان لان ماعندي اب هيج تسوون بية 

ايهم: وهاي كل وحدة ماعندها اب تنهزم وتسوي سوايتج، ليش سويتي هيج ، منو بينا قصر وياج ، ردتي شي واشرتي عليه ما جبته الج ؟ ها ؟ هاي نور حاطتج بوسط عينها وتعارك هذا وهذاك علمودج حتى ياسر شكد جان ضايج منج بآخر فترة مايرضى احد يعوج وياج كلنا مو بعينج ؟ محد بينا عنده خاطر يمج وگلتي والله لخاطره مااسوي هيج ؟ 

رسيل: كلشي حجيته صحيح بس مو من حقه يضربني.

ايهم: لا حقه وحقه وانه لو لاگيج بالأول جان اكلتج بسنوني عندج علم شنو صار بية وانه اتانيج مثل المخبل اباع على النسوان حتى ضاجن مني عبالهن مو خوش وجاي اتفرج عليهن، دخلنا بأنذار الكل تدور صرنا فرق كل اثنين بجهة وهذا مروان اللي ماعاجبج انخبص اكثر منا ومن يأس ما لكاج بالصحن راد يبجي وهو زلمة مشورب خليتينا نتراجف عليج وكل هذا تردين تموتين نفسج كولي ما الي عين اباوع بعيونكم وعازلة نفسي اكولج اي حقج فد مال زعلانة ابد مو من حقج .

رسيل: اني غلطت وبعد ما تتكرر..

جر نفس قوي وكال 

ايهم: هسه راح ادزلج نور تصعدلج اكل وكون من تنزل الصينية الكاها ممسوحة  خطية البنت رجليها راحت يا صاعدة عليج يا نازلة ما تخافين الله بيها ؟ 

أشرت براسي بمعنى اي طلع ورا ربع ساعة  اجتي نور جايبة الاكل   ما راحت الا خلصت وكل شوية اكلي بعد وما اكلتي ومن هالحجي كملت يلا نزلت كمت اخذت ملابس فتت للحمام سبحت و طلعت نشفت شعري  وكعدت شنو اسوي ملل قاتل تذكرت الكتب مال ايهم طلعت الرواية وكعدت اقرأ

جذبني اسم الرواية ( الوجه الاخر للذئب)

قريت المقدمة حبيتها سهرت عليها اباوع للساعة صارت بالخمسة حيل حتى الصلاة راح وقتها واني ما ادري

عجبتني الروايه ماحسيت بالوقت مضمونها 

( بنية اسمها (جين) عاشت يم خالتها وما تعرف اي شي عن ابوها غير اللي حجته الها خالتها انو ابوها رجل قاسي واناني وعافها من عمر ١٢ سنة وسافر

فجأة تكتشف جين ان والدها ما متخلي عنها مثلما جانت خالتها تحجيلها  بالعكس جان يراسلها بأستمرار بس اي رسالة ماوصلت الها منه ، غير آخر رسالة بيها دعوة من ابوها الها لزيارته بمكان الجزيرة اللي هو بيها، اسم الجزيرة(سارامنكا) 

جين اخذت كل هدومها وتوجهت للمطار هي وتمشي انتبهت على موقف خلاها توكف بمكانها من الصدمة

شافت رجال ضخم وكاعد يصرخ بوجه امرأة صينية كبيرة بالعمر ، واثنين من المرافقين وية الرجال اخذوها لمكان مجهول .

شاءت الصدفة تلتقي جين بهذا الرجل نفسه بعد وصولها الى الجزيرة، وببيت والدها تتكرر هذه الصدفة واللقاءات بهذا الرجل، وبكل لقاء جانت جين فريسة احاسيس متناقضة تجاه هذا الرجل .

من هو هذا الرجل؟ وما هي حقيقة المرأة الصينيو وما هو الدور الذي يلعبه السيد غرانت؟ في الجزيرة وكيف انتهى الصراع الطويل المرير بين جين والرجل القوي؟ 

هاي رسيل ومروان ، مو جين وغرانت ، بس الفرق اني انصدمت بيه ببيت جدو مو بالمطار ضحكت وطلعت فتت للحمام توضيت وصليت ، اخذت القرآن كعدت اقرأ بيه صارلي هواي ما قارية منه شي.

بدأت اقرأ جريتها للساعة سبعة الصبح باوعت مكملة خمسة اجزاء ، الله شلون شعور حلو وراحة نفسية فعلاً القرآن شفاء للصدر ، حسيته مثل الاسفنجة امتص الألم والغضب اللي بداخلي .

لميت السجادة ومددت والنومة نومة ماحسيت غير نور فوك راسي.

نور: كافي تسخت كومي يلا اليوم ايهم ياخذج تفتحون ايدج بلكت لاحمه

رسيل: وين بعدلي اسبوع اقل شي ..

نور: امشي كومي بدلي يجوز مابيها شي حتى اطلع قهر گلبي بيج راح اخذ اجازة اسبوع واخلي الشغل براسج.

رسيل: هاهي متفقين..

كمت غسلت وتوضيت ورحت صليت الظهر والعصر طبك لان راحت علية بدلت ونزلت لكيت ايهم يشرب جاي هو ومدنك كال

ايهم: روحي اكلي تأخرنا

رسيل: ماشي

رحت صبيت تمن ومركة بامية  مو كلش احبها صبيت بس المي وكعدت آكل ، ورا عشرة دقائق اجى ايهم كال .

ايهم: كملتي؟ 

رسيل: اي بس اغسل 

ايهم: يلا واكفلج بالباب 

طلع غسلت وطلعت وراه اريد اصعد شفت مروان جاي من بعيد يمشي وبصفه الكلب مالته

انتظره ايهم لحدما وصل يمه

مروان: ها وين ؟ 

يحجي ويمسد بيده على الكلب

أيهم: اودي رسيل علمود ايدها .

مروان: هممم 

أيهم: محتاج شي 

مروان: سلامتك 

رفع ايده ومشى اباوع بالمرايا عليه يلعب وية الكلب يرفع ايده ليفوك والكلب يكمزله .

صار بعيد علينا وصلنا للشارع العام ،  ايهم شغل مسجل السيارة طلعت اغنية لهيثم يوسف اسمها

اسأل انا 

خلصت الموسيقي وبدأ ايهم يغني  وياه 

اسال انا ياليل ودتنا دنيانا 

اسال انا ياطير ينطينا جنحانا

جرحك حبيبي كبر طوله وي طول السفر 

تعبت محطات العمر وداعها البجانا

اسأل حبيبي شوكت تجمعنا الولايات

غربة ودموع وسفر خلص عمرنا وفات

كافي يدنيا كافي كافي ألم مو كافي

اتعذبت وتمرمرت خوفي حبيبي من البعد تنساني 

وحدي اظل انتظر وليمتى وليايوم

ايام تقضي وتمر روحك بروحي دوم

ناسي بغيابك حالي .. دومك حبيبي ببالي

ليش رحلت وتغربت خوفي حبيبي من البعد تنساني

صفنت عليه متعجبة

رسيل : هاي شنو؟؟؟

نصى صوت المسجل والتفتلي.

ايهم : شنووو؟ 

رسيل: صوتك 

ايهم: شبيه ؟

رسيل: عفية يجنننننن احلا من هيثم بعد .

ايهم: كلها تكول صوتي حلو مو فد انتِ

رسيل: من شوكت  تغني ؟ 

ايهم: مو دائماً مرات يعجبني اغني وبس هيثم يسويلي واهس..

رسيل: عفية عيدها كلش عجبني صوتك 

ايهم: ولج تعبت من نرجع عندي عود وكمان واعزفلج مو بس اغني.

رسيل: هاي شنو طلع عندك مواهب واني ما ادري ؟ 

ايهم: امكانيات يابة 

مشينا واني اضحك صدك صوته رهيب يعني حتى ما يحتاج لحن .

وصلنا لعيادة الدكتور نفسه اللي جبس ايدي 

بوقتها ايهم اخذ منه عنوان العيادة.

دخلنا للدكتور..

ايهم: السلام عليكم دكتور 

الطبيب: اهلاً 

كام لأيهم وتصافحوا 

_ تفضلوا استريحوا شلونج بابا احسن ان شاءالله 

رسيل: الحمدلله احسن 

ايهم: دكتور الجبس حيل اذاها ماكو بديل تخلص منه ونخلي ابداله

الطبيب: هو اكو بس لازم تاخذ حذرها ضعفين عن هسه .

التفتلي ايهم ..

ايهم : رسوله شتكولين . 

رسيل: اي اريد اخلص منه حتى ايدي تحكني وكلش اتنرفز لان ما اكدر اوصل للمكان.

ضحك الدكتور وكال

_ مادام هيج الا اكصه خلي يولي .

كام جاب مكص وكص الجبس شوية تأذيت من الضغط مال المكص ، فتحها واخيراً اباوع ايدي لونها مختلف وصايرة مدري شلونها تلعب النفس ..

الطبيب: راح نعلك ايديها برقبتها لمدة اسبوع و لازم ما تحركها بالاول تسوون تمارين للأيد علما يتحرك المفصل بصورة طبيبعة يلا تكوم تستعملها مثل السابق

ايهم: والعلاج تعيده لو شنو لان خلص ؟ 

الدكتور: لا ماله داعي هذا مسكن كتبته الها اخاف حركة غفل تتأذى منها تاخذ وحدة بس وما عليها الا العافية..

ايهم: الله يعافيك دكتور تعبناك ويانا..

الدكتور: تعبك راحة اهلاً  وسهلاً 

طلعنا من الدكتور صعدت بالسيارة صعد ايهم سألته.

رسيل: شو ما اخذ فلوس ؟ 

أيهم: شلون مو دفعت للسكرتير قبل لا ندخل ..

رسيل: والله عبالي بلاش ..

ايهم: اكو شي بلاش .

رسيل: ارتاحيت من الجبس  جان هم على گلبي .

ايهم: الحمد لله على سلامتج وما تشوفين شر ان شاءالله ويارب هاي اخر الاحداث 

حجاها وضحك..

رسيل: تسلم .

مشت السياره نمشي وبعد 

رسيل: ايهم وين رايحين .

أيهم: عاجبني اشوفج مكان 

رسيل: حلو ؟ 

ايهم :  تشوفيه وتحكمين 

رسيل : تمام

مشينا صف السيارة وكال.

ايهم : يلا انزلي 

فتحت باب السيارة ونزلت 

رسيل: الله يخبل هذا المكان شنو اسمه ؟ 

ايهم: كورنيش شط العرب 

رسيل: الله شكد حلو

ايهم: تعالي نكعد 

مشينا اكو ميز وكراسي قريب على المي 

كعدنا شلون جو حلو ...

رسيل: الجو يجنن اليوم

ايهم: من يصير الغروب تشوفين منظر عمرج ماراح تنسيه 

رسيل : هاي شنو ؟ 

ايهم : هم مرة كلتلج على شي وطلع معاكس لكلامي 

رسيل : لا 

ايهم : لعد انتظري وشوفيه بعينج

رسيل : ننتظر شنو ورانا

جنا صافنين على المي شلون حلو يتلاطم روجه بروجتها ، همست 

رسيل: شكد حلو ..

ايهم: منو انه ؟ 

رسيل: لا طبعاً 

صار يتلفت منا ومنا 

ايهم: ياهو ولج ؟ 

حجاها بضوجة عكد حاجبه

رسيل : هذاك شبيك 

ايهم : وينه لا تخبليني رسيل وتطلعين الكعدة من خشمي سم

رسيل: المي شبيك 

ايهم: ها  المي الزرع هم حلو 

رسيل: جلبت بالزرع .

ايهم: اكو احله منه ، لونه يجنن وطوله فد شي تكول عباية 

رسيل: عباية  هاي يا شجرة هيج شو ما شايفة منها .

ايهم: انه شايف.

رسيل: هاي بس انت شايف شجرة سودة بلون العباية

ايهم: اي وبيها لون ابيض ثلج .

رسيل: وهذا شنو ؟ 

ايهم: حاطين فوكاها قاصر وخربت العبا

رسيل: ياعيني 

ايهم: ومخيطينها بلون اخضر شلون خضار اويلي ربي.

رسيل: عبايتيش هاي خيطها اخضر 

ايهم: مو بس هيج .

رسيل: اكو بعد ؟ 

أيهم: طول هاي العبا تطلع ١٦٥ هيج شي اكثر بسانتيم اقل حسب تقديري ..

رسيل: زين تعرف وزن العباية شكد ؟ 

باوعلي وكال 

ايهم: اول ما شفتها جان وزنها حلو يعني من تنلبس على الراس ثكيلة تحسيها حرامات حطوها بالشمس وضعفت تعرفين الشمس تحرك .

رسيل: يا عيني هاي العباية شكد تقهر..

ايهم: هسه ما كلتيلي المي حلو ؟ 

رسيل: المي اي حلو مو غير شي 

باوع بعيوني تنهد ودار وجهها بأتجاه المي

صار الغروب بدأت الشمس تروح والجو بدأ يبرد ، كام يدندن .

شيجيب باجر و اصبر شلون

باجر التقي وية اجمل انسان

كل لحظة التمر تسألني العيون

شظل من الوكت؟مو صبري خلصان

.............................

حرت شألبس لباجر اني يا لون

كل لون البسه يكولي خجلان

شلون اوكف كبالة وحالي شيكون

الله بعينه جمع كل الالوان

............................

روحي وكلبي عالساعة ينظرون

ميل الساعة ظل ويانة سهران

بس الشمس تطلع اجة يكولون 

لأن هو وشمسنة توم خوان

............................

حن يا ليل و ارحم حال مجنون 

اول مرة يتواعد و فرحان

روح لخاطري و انه الك ممنون

خلي الصبح يطلع بگلبي نيران

.........

رسيل: الله الله عشت واالله صوتك انتعاش.

ايهم: شكراً بنت العم هذا ذوقج يابة

رسيل : عفية انت شكد حباب..

ضحك وحك راسه..

ايهم : يلا نروح ..

رسيل: بكيفك جريت نفس قوي اريد املي رأتي من هذا الهواء العذب هواء البحر يجننننن.

رجعنا للبيت وكلمن راح لغرفته بعدما تشكرته هوواي وفشلني هواي وضحك علية هذا اسلوبه وياية من يسويلي شي ميقبل اتشكره ابد ولا احسسه هو مسويلي جميل..

ثاني يوم كعدت طلعت من الغرفة صار ايهم بوجهي 

ابتسمت 

رسيل : صباح الخير.

ايهم : صباح النور شو كاعدة من الصبح..

رسيل : هيج ضجت ومليت من النوم عجبني اكعد..

ايهم : تتريكين وياي..

رسيل : بكيفك..

ايهم : تعالي نسوي ريوك سوية شتكولين؟ 

رسيل : يلا ماعندي شي واصلاً كعدت جوعانة ونفسي مفتوحة للأكل.. 

ابتسم ابتسامة تجنن وفات للحمام غسل  انتظرته يم باب الشقة اجى يمسح بوجهه بالخاولي...

ايهم : ما تفوتين شبيج..

رسيل : ها جنت انتظرتك..

ايهم : فوتي يابة شكو قابل..

فات فتت وراه رحنا للمطبخ ..

طلع بيض وجبن عرب وحليب

رسيل : شكل واحد شدعوة هالكد..

التفتلي وكال..

ايهم : مو لازم اكل بيض واشرب حليب هذا نظامي بالحديد.

رسيل : دخلت قاعة ؟ 

ايهم : اي من زمان 

رسيل : كلش حلوو

سكت وبلش يكلي واني سويت الجاي كملنا كعدنا ناكل...

ايهم : تونستي البارحة ؟ 

رسيل : كلش..

ايهم : بعد بين فترة وفترة اخذج لمكان.

رسيل : رجعني ايهم ..

جان ياكل وكف اكل وتنهد..

ايهم : ضجتي من عندنا ؟ 

رسيل : اريد ارجع يم اخواني گلبي نار عليهم ومامرتاحة هنا..

ايهم : عوفي السالفة رسيل وتعايشي وية الوضع صار الف مره كلتلج..

رسيل : بس اني ما عاجبني ابقى تعبت ايهم والله تعبت..

همس..

ايهم : احنا اهلج وين تروحين..

رسيل : بيت جدي اهلي اللي ربوني وتعبوا علية وهم حسام منتظرني شنو ذنبه ما يعرف عني اي شي..

حسيته ضاج ما جاوبني ، ورا شوية عاف الاكل وكام.

ايهم : راح اروح للشغل تأخرت اخذي راحتج اعتبريه بيتج...

طلع كمت لميت المواعين غسلتهم و مسحت الميز وطلعت رجعت لغرفتي.

مرت الايام عادية بهاي الفترة ما شفت مروان بيها ابد ، بنزلته ما اطلع من غرفتي بس من يروح انطلق ، ورا شهر تقريباً من فتحت ايدي ، نزلت وتقاسمنا الشغل اني ونور ، بديت اشتغل وياها ومرت الايام هادئة وارتاحيت نوعاً ما بهذه الفترة محد اجى للبيت بسبب العركة اللي صارت بين عمة صبرية  وشيماء ، والبنات من يوم عركة مروان وازهار كطعن ما اجني بس ؟ راح تدوملي هاي الراحة اكيد لا 

بيوم الولد كلهم بالشغل نزلت اشتغل  كلت ماكو احد لبست برمودة من الجابهن ايهم ونزلت اشتغل مدنكه امسح  ما حسيت الا انصدم بشخص  فزيت وكمزت اشوفه مروان 

اكلني بعيونه اكل ، اريد اوخر ارتبكت  نظراته جريئة وصلفة حيل مبتسم ويباوعلي من فوك ليجوه

عفته وصعدت اركض الدرج بيه لوفة من اصعد اكثر اشوف الجوه ، باوعتله بعده على نظرته ومبتسم .

دخلت لغرفتي تعبانة صعدت سريع و نظراته خوفتني اول مرة واحد هيج يباوعلي ، زين هو مو بالدوام شجابه حظي كعدت احسب ضربت كصتي اخ اليوم نزلته شلون نسيت..

مرت الايام من بعد هذا الموقف كمت ما انزل الا بدشداشة ومرات ألبس الشال مرات انساه 

وبيوم كاعدة بغرفتي اتفرج على التلفزيون طبت نور تملخ بوجهها 

رسيل: خير شكو شبيج منو مات ؟ 

نور: انتِ انتِ وتملخ بروحها

ضحكت شبيج خبلة شنو متت مو هياتني كدامج..

نور: ولج انتِ وكعتي بمصيبة وبس الله يكدر يطلعج منها اتصلت على ايهم ما جاي يرد عباله نريد شغلات للبيت وما يجاوبني..

رسيل: غير افتهم شكو شبيج تكمزين اكعدي وفهميني

نور: امجد الكلب رايح لمروان ولياسر للمحل 

تحجي وترجف 

رسيل: اي كملي بس على كيفج گلبج راح يوكف منو هذا امجد ...

نور: امجد واحد كلب وساقط ابن عمة صبرية رايح لمروان وياسر كايل الهم لزموا بنت عمكم تتحارش بية وكلما ادخل اريد اشوف جدي  تتقصد تنظف كدامي الديوان تنصي وتسوي حركات وانه لخاطركم ساكتلها مرة ثانية افضحها بين السلف.

رسيل: وهذا اني وين شايفته واصلاً اول مرة اسمع باسمه

نور : ما اعرف رسيل شنسوي كوليلي.

رسيل: ومنو كالج هذا الحجي ؟ 

نور: ياسر خابرني وكال صح هذا الكلام كلتله لا وحلفت ايمانات 

رسيل: هذا هو اني هم يسألوني وانكر الصار محد عنده شي يمي

نور: الله اليستر 

اندكت الباب نور فتحتها ،  ياسر يطلع دخان من راسه من الاعصاب صاح

ياسر: رسيل تعالي دقيقة

راح مشيت وراه نزلنا جوة جان مروان كاعد وشيماء وعمو علي وكفت 

علي: تعالي بابا اكعدي هنا 

حجاها ويأشر على المكان اللي بصفه

عاط مروان ما تكعد اسألها بسرعة 

علي: اعصابك بوية انه احجي وياها ،  بنيتي امجد جاي لهنا وحاجية وياه انتِ ؟ 

رسيل: عمو والله اول مرة اسمع بيه واصلاً ماشايفته ولا اعرفه ولا اعرف عمة صبرية عندها ولد اسمه امجد .

اباوع على مروان منصي راسه ويهز برجله 

علي: فد هو يكول انه اجيت وانتِ طابتله للديوان ومنظفه جدامه ومسوية حركات.

ضحكت 

رسيل : ابد مو صح اني لا ماسحة كدامه ولا شايفته .

شيماء حجت من يمها 

شيماء: انه سمعتج بهاي اذني وشفتج شوف عين 

وتأشر على عيونها التفتت الها فتحت حلكي من الصدمة تفاجأت بيها 

الكل انصدم مثلي صار هدوء بعدين مروان حجى..

مروان: يمه احلفي شفتيها 

شيماء : ما تصدك بية ؟ 

نتر..

مروان: يمي احلفي كلتلج 

كام جاب القرآن وجر ايديها خلاها عليه خنزر عليها ويحجي..

مروان : احلفي كولي رسيل بنت صادق سوت هاي الشغلات وي امجد .

باوعتله متفاجأة بتصرفه وترجف..

علي: مروان وخر القرآن الحلف ان كان صادك او كاذب يهجم بيوت ..

مروان: انه رايد ينهجم البيت باللي بيه احلفي لو احرك البيت على روسكم هسه

لازم ايد امه قوي وحاطها على القرآن

شيماء: وحك هذا وترجف بالكوة كالت القرآن ، رسيل بنت صادق غوت امجد.

اخذ القران منها وخلاه على صفحة

مروان : هذا هو 

اجه لزمني من ايدي صعد جرني وراه ركض ياسر صعد وصار كدامه ..

ياسر: عوفها مروان خلي تولي 

عاط عيطة زرف اذني بيها 

مروان: ياسرررررررر وخر من طريقي واللي يوصل فوك اكسره فوكاها

دفع ياسر وصعدنا وصلنا لباب الشقة مالته فتحها ودخل جرني حيل قفل الباب دفعني بالاستقبال وكعت بالكاع.

نزع الحزام وكعد

مروان : يلا سولفي شعندج وياه؟ 

رسيل: بابا ماعندي شي ولا شايفته ولا اعرفه اول مرة اسمع بأسمه

اباوع عليه ايده ترجف ، وجهها يريد يطك.

مروان: انه قبل فترة صبرية خابرتني وكالت لزموا بنتكم وما صدكتها كلت حجي نسوان ، وراها اجتني رغد وكالت شايفتكم سوية تسولفون بالحديقة وحدكم ، وهم ما صدكت كلت رسيل ماتسويها ، فد مال يجيني اليوم امجد  وامي تكول شايفتج وحلفتها حلفت ،  كلهم اجذبهم واصدكج ، انطيني سبب واحد يخليني اصدكج يا رسيل يابنت عمي..

رسيل: شوف تصدك لو لا اني مامسوية هيج شي ولا لابسة لبس مغري ولا مسوية اغراء لأحد .

مروان: متأكدة ، واللي شفته هذاك اليوم شنو تسمينه ؟ 

رسيل: ماجنت ادري نزلتك عبالي عندك دوام .

مروان؛ هممممم وانه شنو كايل ، عجز لساني وطلع بيه شعر حتى تنتبهين على روحج وانتِ ولا يمج نفس الصلافة و نفس العناد 

باوعتله طلع جداحة  ورث جكارة وكام يجر نفس يضيق عيونه ويباوعلي..

رسيل: اني مامأذية احد ولا مسوية هيج وامك وحدة جذابة والله ينتقم منها ان شاءالله .

تخبل شلون احجي على امه نزع الحزام وصار يضرب واصرخ من الوجع

مروان: كلبة ادبسز فوك شينج تغلطين على امي انتِ الجذابة ما غيرج...

يضرب ويصيح واني اصيح الباب تكسرت تكسر دنك صار قريب على وجهي  انتهيت بين ايديه من البجي والتعب ، اخذ نفس من الجكارة وطفاها بركبتي .

صرخت بصوت عالي يمكن سمعوني سابع جار متت من الوجع..

ضليت لازمتها وابجي 

رسيل : الله لا يوفقك كون تموت واخلص منك ياعار يا ابو النسوان تف عليك 

رجع يضربني اكثر وبخبال صاح بصوت عالي تهستر..

مروان: صلفة كلبة ماتصيرلج جارة وهاي الجوية كل ماتريدين تنزلين بلا حجاب تشوفيها وتتذكرين وترجعين تلبسيه 

رسيل: ما البس وحق الله لو تموتني وعناد بيك كلشي اعوج راح اسويه 

كام يضرب بيه بلا وجع گلب الى ان انفتح الباب ودخل ايهم..

وكف  متفاجئ بحالتي مصدوم يباوعلي ويباوع لمروان .

ايهم: لك هاي شمسوي بيها 

اجى قريب مني ونتر بمروان

ايهم : لك هاي مابيها مكان صاحي وخر ايدي من ركبتي وشاف الجوية لو تخبل.

كام بسرعته ودفع مروان اكو ميز مثل القاطع بيه تحفيات دفعه عليه وكع مروان على ظهره ، وصار يضربه بوكسيات 

ايهم : لك كلب انه كوة اريد اطلعها من حالتها  وانت هيج تسوي بيها لك وصل بيك الحال تجويها اطفي الجكارة بعيونك اموتك هسه حتى تحس بالكاعد تسويه..

اباوع يضرب بمروان ومران ما ينطي اي ردة فعل مستسلم لضربات ايهم كام منه واجى علية جانت نور يمي كاعدة بالكاع وحاطة راسي بحضنها وتبجي عاط بيها...

ايهم: وخري شووو

شالني والتفت على مروان وصاح بيه

ايهم: اريدلي كوووا... يمد ايده عليها والله لا اكسرها واخليه يتندم على الساعة اللي فكر بيها يسوي هيج منا وجاي رسيل تخصني واللي يأذيها معناها مأذيني ، كلب نكس...

اخذني وطلع 

يتبع ...

لقراءه باقي الفصول من هنا