رواية العروس في الثوب الاسود الفصل السابع عشر 17 بقلم عبير ادريس

 رواية العروس في الثوب الاسود الفصل السابع عشر 17 بقلم عبير ادريس 

ألتفتنا على مروان واكف بباب الشقة

فركت وجهي اريد اصحصح من الكلمة اللي سمعتها، معقولة ايهم يحبني؟ زين ليش هيج فرحت من گالها ليش عبالك جنت منتظرته يحجيها، ليش كأنما اول مرة اسمعها مع العلم سامعتها قبل من حسام بس ما حسيت بهيج احساس بيوم اللي اعترفلي ليش كلشي اختلف وية ايهم ؟ بوسط التساؤولات وفززني صوته..

مروان: وين بالج؟ صارلي ساعة ارطن

اباوعله على وكفته عاكد حاجبه

رسيل: ها اسفة ما سمعتك ، ألتفتت على ايهم، يمسد لحيته بقلق عين علية وعين على اخوه موقف ما ننحسد عليه ومنو لزمنا بيه مروان

مروان: امشي ولي لغرفتج يلااا 

استغربت هدوءه كلت هسه يكسرني تكسر مشيت وصلت يمه اريد اعبر الباب كفحني على راسي يحجي ويقلد على صوتي

مروان: كلمن يشوف الناس بعين طبعه ، وعيب تفكر بهيج شغلات مروان ، قبل الله علويه جنتوا تصلون مو ؟ 

باوعتله ردت اضحك بس مو وكتها خفت انعلس ، ما تنعرف ردات فعله شنو هسه هو عصبي ،  كاعد يتشاقى لو يحجي صدك  لا مو شقه وجهه مكلوب

رسيل: صدك مو اللي ببالك اني بس ردت اشكره على....

ردت اكله لان راح ارجع للدوام، جان اسمع صوت ايهم حجى وسكتني

ايهم: لان جبتلها ملابس حبت تشكرني وانفعلت شوية 

حجاها بضحكة وحك جبينه

مروان: شكو منها مثل اخته وحبت تشكره ، مو ايهم ؟ 

حجاها بصيغة تأكيد ، ألتفتت على ايهم اشوف ردة فعله شنو ؟ وشنو يجاوبه باوعلي دنك وكال 

تيهم: اي اكيييد

تفاجأت ليش هيج كال ؟ هسه اعترفلي وسمعت كلمة احبج ترس اذاني لو اني سمعت غلط ؟ عكدت حاجبي انتبه علية ورجع باوع على مروان

ايهم: محتاج شي فوت ليش واكف بالباب ؟ 

مروان: نازل يم الحجي عود تعال نصفي الحسابات من سافرت صارت خربطة  والقوائم الي يمك جيبها وتعال بعدها ألتفت علية وحجى بصوت ناصي بس اني سمعته

مروان: حركات المياعة جوزي منها وانتبهي على لبسج وتصرفاتج ترى واصله لهنا منج

حجاها وأشر على خشمه عفته ومشيت لغرفتي ، كلش انقهرت من ايهم، ليش سكت من كال مروان مثل اختك معقولة يخاف منه !! لا لا مو شغلة يخاف زين شنو السبب  راسي راح ينفجر  ، كمت لفيت شعري ونزلت اساعد نور خطية وحدها ، شفتهم كاعدين بالهول وكدامهم طبلة عليها اوراق ويكتبون ما انتبهوا علية من نزلت 

رحت للمطبخ جانت شيماء ويمها شوق كاعدات على الميز باوعولي وداروا وجوهم ، شوق من النوع ما تاخذ حقها بالكلام لو عركات لا بشغلات اكبر تضمها للواحد حتى لو تمر سنة تطلعها بشغلة تنهي بيها حياة الواحد ، يعني اللي الله يحبه ما يسلط عليه نموذج مثل شوق

نور: هاج رسيل كملي البانية علما انظف الكرش

رسيل: كرش مال شنو ؟ 

شيماء: بنت بغداد ماتعرف شنو الكرش ؟  بس تعرف تلعب على الزلم

جريت نفس قوي ، الله يصبرني بس  اخذت من ايد نور البانية وكعدت اقلم بيها سويت الثوم ، وكمت غسلتها 

رسيل: نورة اني اطبخها انتِ كملي البيدج

شيماء: نور انتِ طبخيها ما ناكل من ايد ياهو الجان

كلت بقلبي طبج مرض اني علمود نور اريد اساعدها ماريدها تتعب اشرتلي نور ، تقربت يمها حجت بصوت ناصي

نور: رسيل اصعدي لا تكب هوسة 

رسيل: ليش شمسوية قابل ؟ 

نور: ما مسوية بس اصعدي

رسيل : براحتج نزلت اساعدج

نور : مشكورة اكدر اسوي شغلي بس المهم مشاكل ما تصير 

هزيت راسي وصعدت فوك مددت ، شسوي ضوجة كمت شغلت التلفزيون اكلب ماكو شي حلو ، رحت طلعت الاقراص اللي جابهم ايهم ، كلت اشغل فيلم واتابعه 

فتحت الحاسبة وكعدت، خليت القرص شغلته بدا الفيلم وصل تقريباً للنص ، اجتني اشعارات بالشريط الجوة مال شاشة فتحتهم  ايهم كاتبلي 

رسيل اريد احجي وياج اذا موجودة راسليني 

رسيل 

رسيل

رسيل 

ادري بيج فاتحة الايميل ليش ماتردين ؟ 

كتبلته : ما يعجبني 

_ليش؟

_اسأل نفسك

_ من موقف اليوم ؟ ما سيطرت على نفسي وكلتلج احبج آسف اذا تسرعت وضوجتج ؟ 

اكتب وامسح هسه شنو اكوله؟   ضجت منك لان كلت لمروان اني مثل اختك ؟ هسه شيكول ماصدكت حجيتها 

سكتت ما جاوبت

_ بعدج تحبين حسام مو؟

يلا بله هذا وين كام يروح تفكيره شجاوبه هسه ...

_ما يخصك 

_  هيج صارت رسيل؟؟؟؟؟؟؟

_  اي هيج وكلمن بمكانه افضل لأن يصيرلك حجي والي هم.

_  انه ما خايف من احد حتى لو حجوا تعرفيني كلش زين اكدر اوكف بوجه اكبر واحد وما يهمني النتيجة شنو..

_ ها ما يهمك اليوم كدام مروان ليش كلتله مثل اختي ؟ 

_ مممممممم هذا الموضوجج؟ 

_ عوف علامات الاستفاهم لتدزهن نرفزتني..

_ ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

هيج زين 

_  راح انام 

لحظه لحظه شبيج اليوم ؟ تعالي صدك انتِ يابرج كل شوية بحال؟ 

_  برج الثور برج العقرب برج الحية شعليك بالبرج مالتي 

_ زين ماكو فيل زرافة جمعتي الحيوانات كلها ادري ابراج لو حديقة حيوانات هههههه 

_ هسه شنو ؟ 

_  شنو؟

_ سالفة دوامي من شوكت مفكر بيها ؟ 

_ من اول يوم اجيتي بيه للبيت بس الظروف حكمت هيج

_ وليش تريدني اكمل انتم مو ماعندكم بنية تدرس وتطب وتطلع؟ 

لا تجمعين انه ما افكر هيج؟ احتمال غيري 

_ وشلون اذا صارت مشاكل ورفضوا اداوم؟ 

_ مالج شغل انه ارتبها 

_ ليش سكتتني من ردت احجي كدام مروان؟ 

_ انتِ ليش ما تضمين سر شغلة بيني وبينج شدخل مروان بالنص ما تعرفينه اذا عرف يخربها

_ اول تالي يعرف 

_  يعرف بوكتها وينحط امام امر الواقع ولا هسه وتصير دك مشاكل مالها داعي

_ الله يستر  زين اوراقي منين راح تجيبهم و مستمسكاتي؟ 

_ انه اروح واجيبهم من خالج مالج شغل.

_  ما اعرف شلون اشكرك ايهم 

_ شكرتيني ماكو داعي بعد

_  شوكت ؟ 

_  قبل ساعة 

_ مممم ترى عفوية جانت 

_  بس انه ردي مو عفوي واللي سويتيه ردلي روحي هذا القرب جنت منتظره بفارغ الصبر وهسه زادني لهفة 

سكتت ما جاوبته 

_ رسيل؟

_  نعم 

_ انه من كلت اي مثل اختي خايف عليج لا طش الخبر  يخربونها  والوضع هسه مو مال اعلن عن هيج خبر قوي  كملي السنة الاولى دوام ونفاجأهم بعدها ..

_  بس اني ما نطيت رأيي بالموضوع  لحد الآن حتى تحجي بيه كدامهم و انتظر خبر من حسام هو اللي يحسم كلشي..

سكت ورا عشر دقايق دز 

_  تحبيه ؟

_  احنا  شبه مخطوبين يعني قارين فاتحتنا 

_ لا تلفين وتدورين جاوبيني تحبيه لو لا

_ خليها لوقتها ايهم 

_ شلون يعني ما فهمتج ؟ 

_ يعني كلشي بوكته حلو عوفها للأيام 

_ معناها ما تحبيه ؟

_ ما كلت هيج 

_  ولا كلتي احبه 

_  تعبانة اريد انام من رخصتك

_ نامي نامي 

راح سديت الحاسبة كمت اضرب على جبيني بقوة  شنو اريد اني شنو ؟ رسيل حسام حبج وتعب عليج ومن اخذوج ذب روحه بنص الموت علمودج وتصوب والله يعلم بحاله هسه شنو ، تجين تخونيه ؟ لا لا حسام ما يستاهل مني الغدر ، زين وايهم ؟  ايهم شنو بالنسبة الية ما اعرف راح اتخبل، دخت ونمت اريد اوكف تفكير بهذا الموضوع

مرت الايام علاقتي بأيهم توترت جان متوقع مني اقبل عرض الحب اللي قدمه بس تفاجئ من ما بادلته الشعور ، ثكل وجه وياية على كد السلام وهاهي،  وجدو صار زين الحمدلله وكالو لازم نسوي ذبايح  على سلامته  وهم علمود حمل نور وتكون فرصة تتصالح بيها العوائل وتهدي النفوس عمو علي راد يسويها قبل سفرة ايهم ، بس جدو كال مو وقتها يرجع واني ارتاح بلكت اكوم على حيلي حتى نستقبل الناس

بيوم العزيمة جنت كاعدة بغرفتي كلت انعزل لا ارى القرد ولا القرد يراني ما انزل لو اموت ، سمعت صوت بنية تحجي وتدك باب وحدة من الشقق فتحت الباب على كيفي غيداء واكفة بباب ايهم ، انتظرت اشوف شنو راح يصير انفتحت الباب وفاتت سدتها وراها  تخبلت كمت اكل بأظافري اروح وارجع بالغرفة اريد اشوف شنو كاعد يصير  ما اتحمل بعد طلعت على كيفي وكفت كبال الباب احتاريت ادكها لو لا مترددة ، زين شنو الحجة اللي اجيت بيها اذا فتحلي الباب شنو اكله ؟ واني صارلي شهرين ما واصلة باب شقته ولا هو اجى لغرفتي

واكفة بمكاني متبسمرة وجان تنفتح الباب ، طلع وطلعت وراه غيداء 

باوعلي ورا شوية غمزلي بضحكة خبيثة

ايهم: مضيعة شي يمي؟

اباوع عليه ردت ابجي وحتى الكلام طار من راسي

رسيل: اجيت اصيحك علمود الغداء صار 

ايهم: ادري غيداء بلغتني 

رسيل : اي زين انداريت اريد اروح لغرفتي، صاح علية

ايهم: وانتِ ما تتغدين ؟؟

رسيل: جاية اتغدا ليش ما اتغدا يعني قابل ابقى جوعانة اكل راح اكل هواي هم 

ايهم : هاي شبيج ؟ 

التفتت عليه

رسيل : شبية ؟ مبين علية شي ؟ 

هز راسه ومشوا كدامي مشيت وراهم نزلنا جوا  السفرة ممدودة للنسوان بالهول والرياجيل كالعادة بالمضيف 

فات ايهم للمطبخ فتت وراه

ازهار: زين من بينتي لو شميتي ريحة الغدا واجيتي على الحاظر

صخنت مو من حجايتها لا لان عرف ايهم كذبتي ورايحة مو حتى اصيحه

سكتت ما جاوبتها هو هم غلس وطلع من المطبخ بقيت متوترة اباوع على غيداء بودي اكلها اكل من قهرتي جانت

تسولف وتضحك طايرة  شنو اللي صار بينهم فوك ياربي ، يحبها معقولة ؟  هو مو كال ما اريدها وما الي نفس بيها 

ليش فاتت شقته وسدوا الباب  عليهم صافنة افكر فزيت على صوت مواعين تتكسر بالكاع رفعت راسي اشوف انتصار

مخنزرة علية ..

انتصار: عمية ما تشوفين شايله صواني وامشي شبيج الطختي بية 

رسيل: اني وين اجيت عليج واكفة بمكاني منو طخج اصلاً 

ازهار: ههههه شلون ثول 

وحده ترفع الثانية تكبس تالي عفتهم ورحت كعدت بالهول فض النفاق اقصد العزيمة فضت ، اشيل  هم من يكولون باجر عزيمة  كمت غسلنا المواعين اني ونور ورغد، وكل شوية حبيبي مروان جابلي فلان شي من فلان دولة وحبيبي هيج يحب ثبرتنا ثبر بحبيها 

نور: ترى مو لسواد عيونا تساعد حتى تسمعج .

رسيل: مبينة حبيبتي عاد شلون حبيب عندها فدوة لله

نور: شبيج يباوع على حلكها  بين يوم ويوم يمها مجودر من غير التليفونات نوبات يجي ياسر ضايج ، يكول كل شوية تتصل ، واكوله مروان كوللها عندنا شغل، يكولي ما مأثرة عليك لا تتدخل تخيلي ..

رسيل: حيرة هذا مروان ما ينعرف شيريد

نور: صارلي سنين وياهم ، عن الله اعرف شيحب وشنو يكره من الاكل عبن انه اطبخ الهم غيرها كفيلج الله ما ادري عنه

رسيل: همزين تعرفين شي عنه  كملي يمعودة خلي نخلص ونصعد نرتاح شعلينا بيهم

نور: على كولتج 

نظفنا كلشي فاتت غيداء للمطبخ وطلعت للطرمة 

نور: وين عيونج طايرة؟ 

رسيل: غيداء 

نور: شبيها ؟ 

رسيل: ما بيها بس لاحظت تركض ورا ايهم وين ما يروح

نور: وشنو الغريب يعني محجوزين واحد للثاني ..

تخبلت كمت ارجف رفعت عيوني على الشباك شفتها واكفة يمه وتسولف وياه ويضحكون ما تحملت منظرهم سوية نزلت دموعي تقربت نور  لزمت كتفي

نور: لج فد لا يكون ؟ وخلت ايديها على حلگها وشهكت

عفتها وصعدت اركض فتت للغرفة بجيت بجي ما صاير  ليش علقني بيه؟  ليش اهتم بية هالكد اذا هو يعرف حاجزيله غيداء وليش استغرب !  مو جديدة على ايهم مثلما علق زمن بيه وعافها اني هم عادي يكسر قلبي  الضاهر شورهم بيد اهلهم ومالهم كلمة هنا ، ظليت ابجي لحدما عيوني ورمت ونمت...

نور كامت كل يوم  تسألني عندج مشاعر لايهم ، اجاوبها بلا الى ان ملت بس حسيتها ما صدكتني وماخذتني على كد عقلي ..

مرت الايام والاسابيع والشهور خلص الشتاء واجى الصيف وقرب على نهايته وراح تودعنا سنه ٢٠٠٧

الاشهر مرت بهدوء صح بيها عواصف ترابية لكن بدون اعاصير 

اكيد ما تخلوا من المشاحنات بيني وبين مروان اللي واكفلي عظمة بالزور..

صارت السنة مال بابا سووا قراية جابوا ملاية وهيجت جروحي كلها رادت نور انزع الاسود ما قبلت ابد ، كلتلها اني انزعه بعدين مو هسه

علاقتي بأيهم ساءت ما تحسنت من بعد ما شفت غيداء وياه حتى السلام كطعته و ما اخليه يشوفني ابد ، شكد ما هو مثكل عود ضايج مني اني ثكلت اضعاف منه ، كم مرة تصدف نتشاوف لو اكون طالعة من الحمام لو من الغرفة يباوعلي ويجر نفس بحسرة ويفوت ، وبيوم طكت روحي كمت دكيت الباب على مروان 

ماكو ما يجاوب رجعت دكيتها ، طلع ايهم يباوع متعجب وعلامات استفهام على وجهها  معناها شعندج هنا 

ألتفتت واستمريت ادك الى ان فتحها والنوم بعيونه

مروان: شكو شكو ثبرتي الدنيا، من شفتيني ما فتحت ليش تلحين.

رسيل: لو الشي مو ضروري ما جان اجيت عليك ولحيت بهيج طريقة

كتف ايده وارتجى على على الباب بجتفه

مروان: وشنو العندج ضروري احجي بلة اسمعج 

رسيل: اني لشوكت ابقى هيج ؟ 

مروان: شلون يعني ؟ 

رسيل: وضعي ما عاجبني

مروان: شبيه وضعج ؟  منو مثلج ؟ شو مدلليج دلال 

رسيل : واني ما رايده هذا الدلال اريد ارجع لبيت خالو.

مروان: انت بيج جني بين فترة وفترة يفز ويصيح اريد خالو.

رسيل: مروان لا تقلد كلتلك اختنكت صارلي سنة هنا وما تعودت اريد ارجع لبغداد كافي عاد 

مروان: هممممم ، الذابحة روحج عليه تراه تزوج 

صفنت بوجهه هذا شكاعد يحجي

رسيل: منو قصدك؟ 

مروان: اللي ببالج  عافج وتزوج

رسيل: حسام ؟؟ 

مروان: هو بعينه 

رسيل: كذاب منو يكول ؟ وليش اصدك بيك اصلاً 

مروان: براحتج لا تصدكين ليش جاية لبابي وتسأليني اذا تعرفين بية واحد جذاب ؟

فات راد يسد الباب ، دفعت الباب وفتت ، اجى ايهم فات وراية الضاهر سمع الحجي كله

رسيل: لا تشمر حجاية وتفوت تعال فهمني اللي صار 

مروان: ليش عصبية هههه، الولد تزوج ما باك

رسيل: مروان عوف التصنيف واحجي صدك الله يخليك

لزم الموبايل بيده واتصل على منو ما اعرف ضربت رجلي بالكاع حيل وحجيت بنترة..

رسيل: احجي لا تخبلني مو وقت تليفونات 

فتح الحاكية وكعد على القنفة وبيده الثانية لزم ريمونت التلفزيون يقلب بيه 

مروان: هاي شنو ولا قناة بيها حظ !! 

انفتح الخط واسمع صوت مو غريب علية سامعته قبل  ركزت هاي عمه زهرة 

زهرة: الو مروان الو

مروان: شلونج ام حسام ! 

زهرة: بخير الحمدلله انت شلونك الاهل ؟ 

ألتفتت على ايهم اباوع عليه وعلى مروان بأستغراب شنو كاعد يصير بالدنيا عمة زهرة ومروان يتسالمون عادي شلون هيج ؟  حتى ما سألته علية ولا كالت شلونها رسيل غريب ..

مروان: بخير دامج بخير  عيوني ام حسام سؤال

زهرة: تفضل ؟

مروان: بنت صادق تريدج بجلمة 

زهرة: اي وينها ؟ 

اخذت منه التليفون بأيد ترجف  عبالك كاعد احلم 

رسيل: الو هلو عمه 

زهرة: هله حبيبتي شلونج مشتاقتلج 

رسيل: اني اكثر عمه سؤال 

زهرة : اخوتج بخير لا يضل بالج

رسيل: مو اخوتي حسام 

زهرة: زين وبخير مخابرة تباركيله مو ؟ 

رفعت عيوني على مروان مبتسم 

رسيل: ليش شنو تزوج ؟ 

زهرة: اي شفتله بنت حلال ما اخيرها عليج وتزوجها صارله فترة 

رسيل: وهو وافق عليها بسرعة؟ 

زهرة: وليش ما يوافق ؟  اني هم تعبانة واريد عون وياية بالبيت تعرفين بوضعنا ما يحتاج احجيلج ..

كلت بقلبي دومج تريدين عون وتالي ابوية راح من وراج و ورا اللي جبتيها 

رسيل: ها زين 

زهرة: يمه عوفيه مرتاح ومستقر لا تحومين عليه وتخربيله حياته وهو اصلاً سافر يم ابو احمد

اختنكت منها عبالك وحدة ثانية كاعد تحجي ، شمرت الموبايل على مروان وطلعت اركض لغرفتي ما سديت الباب كبل نمت على السرير كمت ابجي

لحد ما حسيت واحد كعد يمي رفعت راسي واشوف ايهم 

ايهم: يستاهل البجي ؟  يستاهل مقاطعتني اشهر علموده ؟هاج دار وجهها وتزوج 

رسيل: جذب ما اصدك 

ايهم: وليش ما تصدكين يعرف احنا ما نرجعج كال بدال ما تخلص حياتي انتظرها اتزوج واكون عائلة والحياة ما توكف على واحد

رسيل: ما تعرف حسام بكدي، يحبني ويخاف علية من احنا صغار 

اختنكت من حجيتها وبجيت بالزايد 

ايهم: مو بس هو يحبج  اكو غيره هم ، بس انتِ ما ملاحظة لو يمكن ملاحظة و تغلسين 

رسيل: ايهم مو وكته هذا الحجي 

ايهم: شوكت وكته ؟  الف مرة اجيتج وسألتج تحبيه لو لا ما تجاوبين كولي احبه حتى اسحب نفسي ليش تعلقيني بيج ؟ اذا بقلبج واحد ثاني 

رسيل: ما معلقتك ولا ناطيتك وعد ولا كايلتلك احبك انت بكيفك تحجي

ايهم: بس تصرفاتج تكول  مو شرط تحجين.

رسيل: يا تصرفات بله ذكرني ؟  والله ياربي

ايهم: هواي  بس اذكرج بشغلتين 

الاولى من شفتي غيداء بشقتي ردتي تموتين بمكانج وتتراجفين وكلتي جيت اصيحك على الغداء وطلع كذب جاية بس حتى تشوفين شجاي نسوي 

الموقف الثاني من انه وهي بالحديقة ليش صاعدة تبجين شنو معنى تصرفاتج هاي ؟ عندج علم  افعالج اقوة من كلمة احبك 

رسيل: هاي نور كالتلك ؟  تكذب ماكو هيج شي 

ايهم: كالتلي مو بقصد فتنة  بس انتِ  حيرتيني غفل وقفلتي على نفسج لا تسلمين لا تحجين تشوفيني وتنهزمين  رحت سألتها وحلفتها حجتلي ونور  اكثر وحدة بالبيت اصدك بحجيها لان ما تكذب وعلى نياتها ماعندها سوالف دغش 

رسيل: ما انكر غرت صح بس مو معناها احبك لا تتوهم 

ايهم: وليش تغارين علية اذا ما تحبيني؟  هذا مو مروان خاطب، ياسر مو متزوج ليش ما تغارين عليهم  معناها تحبيني ويجي يوم وتجيني برجليج تعترفيلي ولا تبجين عليه ما يستاهلج ، هذا يستاهلج

حجاها ويأشر على قلبه مبتسم

طلع بقيت بمكاني شنو اسوي هسه صرت وحدة عبارة عن كتلة تناقضات بداخلي ...

بقيت على هذا الحال ايام بعد فترة  بشهر العاشر تحدد عرس مروان ورغد وبيوم اجتي نور كالت..

نور: تعالي رسيل جابوا الفساتين 

رسيل:اجيتج 

رحت لشقة نور شفت ستاند بيه فساتين ألوان ومن ظمنهم لون اسود كيبور يجننن اكثر واحد عجبني من دون ألالوان اخذ قلبي  شلته وشفت القياس  قياسي ألتفتت على نور بضحكة كلت..

رسيل: نورة راح آخذ هذا 

نور: ليش  هذا يعني كومة ألوان ألا  الاسود خرب ببليسج عرس بابا شوكت تنزعين بعد؟ 

رسيل: مو هسه 

نور: وان شاءالله هيج تريدين تحظرين الحنة ؟ 

رسيل: شنو قصدج 

نور: راح تجي الحفافة وحفي وجهج وسوي حاجبج خيل ثخين ..

رسيل: ابد ما ألعب بحواجبي احبهن واصلاً وجهي مابيه شعر ليش اخربه؟ 

نور: اعرف بس تطلعين  احلى ..

رسيل: ما ادري انتِ شتكولين؟ 

نور: والله رأيي سوي تغير 

ظلينا نسولف الى ان اجتي الحفافة سوت وجهي عفتهم وطلعت رحت سبحت وسشورت شعري  كلش طولان صار فترة هواي ما كاصه منه عفته على طوله خليت مكياج رسمت عيوني سموكي ، وخليت حمرة بيج ، صارلي فترة اشوف فديوهات مكياج باليوتيوب واتعلم منهم طلعت كلش حلوة وراقية لبست حذاء اسود كعب من الي جابهم ايهم ، الحلو بالفستان الايد كيبور طوخ والصدر هم يعني ما يبين مني شي اكدر انزل بيه جوة واكون مرتاحة

وكفت كبال المرايا اباوع على روحي صرت وحدة ثانية تختلف تماماً عن رسيل القديمة  ، هاي شنو والله اخبل ليش دافنة نفسي ، اندكت الباب وانفتحت قبل لا اجاوب 

ايهم: رسيل بس الدش......

صفن علية مصدوم 

رسيل: بس شنو احجي ؟ 

ايهم: ها 

رسيل: بس شنو ايهم اكويلك الدشداشة تريد ؟ 

تيهم: لاااا كاويها 

اباوع عليه طالع يخبل دشداشة وغترة والعطر يفوح منه 

ايهم: اجيت اكولج حلوة هاي لو ألبس غيرها؟ بس لا موحلوة 

رسيل: ليش بالعكس حلوة وطالع كلش حلو بيها 

فات للغرفة تقرب على الميز اخذ عطر من العطور الموجودة اللي هو جابهم الي فتح القبغ تقرب مني 

رسيل: شنو ؟ 

ايهم: اشششش ولا نفس 

رسيل : ايهم 

همس 

ايهم : اريد اشمه بيج 

رسيل: شبيك اليوم انت مو طبيعي

ايهم: وانتِ خليتي عقل براسي والله طيرتيه ، رشه وحدة بس طلعيها من نفسي..

تقرب مني رش على رقبتي وتقرب بهدوء شمني منها  جر نفس وصاح 

ايهم:لج اخ يا ريحتج موتيني ..

حاوط خصري بإيده وحضني بقوة حسيت عظامي تكسرت 

رسيل: ايهم ، ايهم فدوة مو هيج وخر هسه يفوتون علينا 

ايهم:  اش اسكتي 

رسيل : وخر عني ايهم لا تتخبل 

ايهم : خليهم يفوتون عادي اخذج وانهزم 

رسيل: الله عليك وخر مو هيج 

تقرب وبدا يطبع قبلات نهاية رقبتي وخدي تقرب على شفايفي وخرت وجهي ودفعته فلتت من ايديه بصعوبة 

ايهم: وخرت وخرت 

صفن علية وكال

ايهم : رسيل 

بصعوبة جاوبته قلبي جان يدك سريع واحس نفسي انقطع تفاديت عيونه ونظراته ..

رسيل : نعم 

ايهم : اعشكج 

فتحت عيوني كلها وطلبت منه يطلع ويتركني تقرب باسني من راسي ودفنه بصدره وكال..

ايهم : انتِ لمحبوبج مستحيل احد يتقربلج غيري خليها ببالج...

بعدها عافني وطلع ، جنت كتلة من المشاعر المتخبطة فرحانة خايفة مستغربة مصدومة من جرأته لو من تقبل للموضوع كمت احس نفسي زوجته ومسؤوله منه

بدأت الحفله نزلت جوا الصالة مليانة نسوان والديجي صوته عالي مغطي على اصواتهم  والكل فرحان و يركص رحت اخذت زاويا كعدت بيها، ما اريد احجي وية اي احد ويطير الموقف الصار بيني وبين ايهم كل شوية اتذكر وابتسم لهناك نزل مروان لابس دشداشة وغترة للأمانة طالع حلو ابن اللذين  بس المشكلة ما ينحب

كامن النسوان داير مدايرة يركصون ويهوسوله..

امشوا خل نتبارك لام هلاوين المعرس ابنها وكرت العين 

تعاي تباركي يامن تحبين اعبر يا هلا وي المجبلين

مبارك عرسك يا الهيبة

عرس مروان هيل وطش بالولاية 

ودبج دبج حسيت الكاع تفلشت جواهن 

هو فرحان وجان يضحك من قلبه..

نزل الحب مالتي مبدل الدشداشة مو نفسها الشفته بيها

شافنه وهوسنله

يوم الالك هيومي يوم الك هيومي 

عيوني كبل اجتي على غيداء ما اعرف ليش جانت فاتحة حلكها  متر عفتها ورجعت اباوع عليهم شلون حلوين حتى بركصهم هيبة، ثكال شخصياتهم جذابة..

دعيت من كل قلبي الله يحفظهم ويديم خوتهم ويبعد عنهم المشاكل

اجتي نور كعدت يمي 

رسيل: وين جنتي ؟ 

نور: علاوي توه نام موتني 

رسيل:فدوة لخديداته 

نور جابت ولد سمته علاوي على اسم عمي ، رحت للمطبخ باوعت الحديقة  انترست زلم انگلبت الدنيا عليهم عرس جبيرهم اليوم مو عرس عادي، وكل شوية واحد من جماعته جايب مزايق ، عدا الذبايح كل شوية ذابحين  ذبيحة ..

رجعت لمكاني ورا ساعة اكثر كمت وكفت جرتني بنت عمي جابر تصير اختها لنور خواتها كلهن حبابات وحتى اخوانها وامهم ناس مسالمين ما عليهم بالقال والقيل ،جرتني وكالت تعالي الا تركصين يمعودة اخجل ماكو تركصين  ويانه كمت وكفت اصفك بيدي و اهز خفيف واني بودي اردح على الاغاني كلها ساجدة عبيد ودبكات بس اخجل منهم ..

ألتفتت ناحية مروان جان واكف يحجي ويه امه وعيونه ما شالهم مني اجتي نور همست بأذني..

نور: رسيل فدوة شوفيلي علاوي اخاف كعد ما اكدر اصعد راح نصب العشاء واني لازم وياهم..

رسيل : ماشي 

صعدت الدرج فتت لشقة ياسر شفت علاوي نايم مابيه شي وكفت كدام المرايا عدلت شعري و كمت حتى اطلع من الغرفة سمعت صوت باب الشقة  مديت راسي اشووف منو طلع مروان هذا شجابه ؟ ابتسمت ورحت اتجاها

رسيل: الف مبروووك شايف كل الخير 

مروان: الله يبارك بيج يوم الج 

رسيل: تسلم بعد وقت 

مروان: تدرين شكد طالعة حلوة اليوم

رسيل: انت هم طالع حلو

باوع على فستاني وعلى شعري ما فاتته اي تفصيله تخصني ...

مروان:حلو عليج 

رسيل: شنو؟ 

مروان:الفستان اول ما شفته كلت هذا لرسيل

رسيل: انت جايبه يعني ؟ 

مروان: جبت للكل مو فد الج 

رسيل: ها شكراً 

مروان: بس هيج ؟ 

رسيل: ما فهمت ؟

مروان: بس شكراً وهذا هو!! 

رسيل: شسوي لعد 

فتح ايده واشرلي معناها يريد حضن ..

رسيل: شبيك مروان ! شنو هالتصرفات؟ 

مروان: ، هاي طريقتج من واحد يجيبلج شي هيج تشركيه مو صح ؟ 

حجاها وضحك عرفت قصده على يوم اللي شافني بحضن ايهم ..

رسيل: مروان وين تريد توصل ؟ 

مروان: الج 

رسيل : ما فهمتك !!

مروان : اريدج ميت اني 

رسيل: يعني ؟ 

تقرب ورجع خصلة من شعري جانت نازلة ،  درت وجهي لزمت ايده

رسيل: ايدك مروان 

مروان: انه افهمج ،  رسيل بنت عمي صادق عاجبتني ، هسه تمام ؟؟ 

رسيل: مروان شكاعد دتخربط انت ؟  

مروان: اعرف الجاي احجيه كلش زين وما مخربط 

رسيل: مروان سكران مو؟ 

تقرب علية اكثر 

مروان: شميني وتأكدي 

تنفس بوجهي 

رسيل: وبعدين شنو نهاية سوالفك هاي ؟  ترى زودتها كل مرة اشوف سوالف واغلس بس هالمرة ما راح اسكت اريدك تفهمني معنى اللي كاعد تسويه؟ باوعتله خزرته 

رسيل : عيب عليك والله عيب

مروان:  شنو شفتي ؟ شمسوي من سوالف انه وبعدين ليش عيب شنو الي يمنع ، حسام وتزوج وماكو احد بحياتج ليش ما ترضين بية ؟ 

ما اكدر اكوله احب ايهم لان هو محذرني احجي، الكل بالبيت يعرف علاقتنا من باب خوف وحرص علية لا اكثر، نحجي خصوصياتنا برسائل حتى كعداتنا قللناها حتى نبعد العين ونسد الحجي من عندنا ...

رسيل: سوالفك كلها لو نايم بفراشي لو تشم بملابسي لو تدخل سكران تخيط وتخربط بالحجي مثل هسه

واللي يمنعني منك ويخليني ارفضك انت عريس واليوم زواجك 

مروان: حجاية منج هسة الغي كلشي وحك الله حجاية بس اخذج من ايدج واعقد عليج

باوعت عليه درت وجهي هذا شبيه

رسيل: مروان انت سكران اكيد سكران لان حجيك مو منطقي ومو مال واحد صاحي 

مروان: صح انه سكران بس مو سكر عادي سكران بيج انتِ ..

ألتفتت لزمت راسي اخ ياالهي الصبر منك الصبر

رسيل : مروان عوفني ما اريدك ولا اريد غيرك ولا راح اتزوج بيوم ارتاحيت هسه ؟ 

صافن عليه نظراته موتتني جريئة وحادة وتحجي كلشي شفت حب بعيونه وامنيات واستعطاف مو طبيعي ..

رسيل: مروان الحنة راحت عليك والناس تنتظرك جوة ومو حلو يعرفون انت هنا يمي واحنا وحدنا 

مروان: يولون مستعد اضل وياج هنا للصبح بس كلمة منج تحيني يارسيل لج انه ميت ..

كعدت على القنفة وكمت ابجي واضرب على رجلي 

رسيل: انفضحت والله انفضحت.

مروان: وشصار حتى انفضحتي ؟ 

يحجي وعاكد حواجبه

رسيل: مروان شنو معنى اثنينا سوية هنا والدنيا مگلوبة جوا واليوم عرسك مروان افهم اللي كاعد تسويه غلط 

مروان: شحدة اللي يمسج بجلمة وانه موجود ما بقيله اثر ، واذا استمر زواجي وانه

  سكت 

رسيل: وانت شنو انت شنو ؟ 

اندكت الباب ارتبكت هسه يشوفونا  ويفضحوني 

رسيل: عزة بعيني هسه شلون؟ 

مروان: شبيج خفتي ؟ 

رسيل: شيكولون علينا اذا شافوك هنا؟ 

ضحك وكال..

مروان : لا يا جبانة 

راح مشى بثكل وثقة مسيطر فتح الباب فاتت نور 

نور : مروان وينك گلبوا الدنيا عليك وتالي الكاك هنا؟ 

مروان: دخت من الهوسة واجيت مددتت يم علاوي توني غفيت اجتي رسيل وكفت فوك راسي

نور: وكت نوم ياخوية وعرسك اليوم

مروان: هاي بعد ما احب الهوسة ما بيدي تدرين بية 

نور: انزل خوية ترى اكلوا راسي وصعدت اشوفنك فتت لشقتك ماكو جيت اشوف علاوي ولكيت بابنا مسدوده كلت احتمال الكاك هنا ولكيتك..

مروان: يلا نازل انه

صفنت عليه شلون رتب الحجي بسرعة من وين  اجتك هاي الفكرة  شلون عبرتها على نور ؟ ولو هاي فطيرة كلشي تصدك على نياتها 

نور: انه هم جايه فد اشوف علي .

طلع فاتت شافتني كاعدة 

نور: هاي لساتج هنا وليش باجية وجهج مكلوب 

رسيل: مابية 

نور: مروان حاجاج على لبسج لو شي وضجتي ؟ 

رسيل: لا اختنكت شوية 

نور: احد غثج جوا 

رسيل: لا لا رايحة ابدل ملابسي خنكني هذا الثوب 

نور: عدلي وجهج صاير خرابيط

هزيت راسي وطلعت ، الف حسبة وحسبة اجت ببالي شنو يقصد من يكولي اريدج  يعني علاقة لو شنو هذا هيج شايفني بعين الصغيرة ،بس كال اعقد عليج شلون يعقد وهو اليوم الحنة مالته يريدني زوجة ثانية فتت للغرفة  فتحت السحاب نزل الفستان بالكاع دست عليه ورحت للكنتور كرهته خنكني حسيته مو ثوب عبالك صندوك واني بداخله.

فتحت الكنتور ادور على شي البسه باوعت على زي كردي جريته لونه اسود وذهبي كلش حلو ايهم جابه الية  مرة جنا كاعدين نسولف على ايامي قبل ببيت اهلي اني وياه وجبنا سيرة السفر والمواقف اللي تصير فذكرت اول يوم من رحنا للفندق والرجال يحجي وبابا وحسام كلشي ماكو ما يفتهمون عليه   سألني ايهم شلون دبرتوها كلتله اني اعرف احجي مفردات ولزكتها شلون ما جان ،هالمرة تعالي الا تحجين بالكردي وضل كل شوية هذا شنو معنى ومن اريد هيج شي شنو اكول كلتله وانت ليش تريد تعرف لهجتهم ، كال مرات يصير عندنا شغل ونروح تفيدني

مرة راح وجابلي مناك زي كردي كلش فرحت بيه وضميته لان جنت لابسة اسود على بابا ...

وخرت التعلاكة ولبسته ضبطت الحزام ورحت غسلت وجهي ورجعت للغرفة رتبت المكياج وشعري ورشيت عطر وطلعت اول ما نزلت باوعت باقين بس الكرايب توهم مكملين عشاء ، والغربة رايحين يعني الكل كاعد سوية ولد عمامي و ولد بنات عمو علي ، وبناتهم  يعني اخوة واخوات وهم اصلاً مزروعين ببيت جدهم ابو بابا 

يعني لمتهم هاي طبيعية رحت كعدت ، وبدأ التصنيف علية

صبرية : ياااا دادة هاي شنو لابسة عوع ، مخلكنه روحج 

ردتها انتصار: شبسرعة اتبرت من اصلها ؟ وصارت كردية 

ازهار : شجابها على الاكراد وينها وين جمالهم

وحدة ترفع الثانية تكبس ، كالعادة 

نور سوت شغلة موتتهن بيها  كومي وشغلي اغنية كردية وارفعي الصوت على آ خر شي اشتغل الحماس و الكل يهز بمكانه جان تجي علية 

نور: كومي لج موتيهن راح ينفجرن من جمالج طلعتي بعد احلا من هذاك الفستان

كمت وياهم اريد اغثهم وهم اريد اثبت للكل اني ما اهتم لحجي واحد بيهم 

لزمتني من جهة واجتي هديل اخت نور لزمتي من الجهة الثانية وبدينا بالدبكة الكردية وشوية شوية توسعت الدائرة  الى ان صارت كبيرة الكل يخربط بس اني ضابطتها لان بالحفلات مال المدرسة جانت صديقتي واختها كرديات يركصون واني بنصهم تعلمت منهم 

ورا شوية انسحبت ايد نور من ايدي لزمني  ايهم وكف بصفي بالدبكة صرنا كتف بكتف كمت اضحك

رسيل: تعرف لو تفشلنا ؟ 

ايهم: اتخسى انه افشلج بس شوفي ؟ 

والله وجابها وياية ضبط بعدها  انسحبوا وضلينا اني وياه نسيت الكل نسيت اكو احد موجود انطلقت كأنما  بس اني وياه بهذا العالم  الى ان خلصت الدبكة يلا رجعت للواقع.

ايهم: عشتي بنت عمي توب التوب 

رسيل: والله انت التوب فاجأتني 

ايهم: الجاي اكثر

حجاها  ويغمز 

اجتي عيوني على مروان صافن علينا من نزلت ما شفته ، سوالي حركة بوجهها وايده 

معناها شنو سالفتج ؟؟؟ 

درت وجهي ورحت كعدت يم البنات  كالوا يلا تحضروا نروح نحني رغد الكل انثبر وراحوا يجيبون العبي مالتهم توني اريد اصعد الدرج جان اسمعه يكول 

مروان: ذاك احلا عليج 

ألتفتت عليه ابتسم وراح طلع 

رحنا لبيت عمي ،ركص وهلاهل، رغد حلوة  طالعة  نازكة مكياجها وبدلتها، جنت صافنة عليهم هو مو يحبها ليش هيج حجة وياية ؟ شنو معنى تصرفاته حتى من حناها يضحك وكل شوية يشاورها ويضحكون ويحضن بيها  ويبوس  حرت بيه وبحركاته لو يريد يورطني بشي لو  واحد ملعب وراح يتعبني  صارت ساعة عشرة طلعنا حتى نرجع للبيت واكفين بالطرمة طلعت  غيداء 

غيداء: عمة  مروان يكول خلي واحد من الولد يوصلكم اني باقي هنا 

شيماء:اي يمه على راحته هسه اشوف منو من الولد يوصلنا

علية : هسا انه اصيحن حازم يوصلكم 

علية تصير مرة عمو جواد ( عنده رغد، وغيداء ، ونوران ) 

والولد( حازم ، كرار، سيف، وسام) 

اني من كالت حازم قلبي وجعني تذكرت شلون ضرب حسام بدم بارد

من اجينه للحنة صعدنا وية مروان والسيارات البقية كلمن ماخذ اهله  لهذا صاحوا على حازم يوصلنا

اجى يمشي من بعيد طرمتهم جبيرة  عمامي كلهم بيوتهم كبار بس مو بكد بيت جدي  ، مبين جان نايم ، سلم على الكل، من وصل يمي كال 

حازم: ها ام لسان شلونج ؟ 

ما جاوبته درت وجهي ومشيت 

طلعنا شغل السيارة وصعدنا  رجعنا للبيت 

الولد كاعدين يلعبون طاولي ، ايهم، ياسر ، (وقسور ، وسرمد ،و لؤي) ولد عمو جابر اخوان نور .

عمي جابر و ولده وبناته تعبان عليهم كلش متربين وعندهم نخوة حلوة ، اذا ردت الثوب اللي عليهم ينطوه وما يستحسفون عليه ونور خير مثال لهذا الشي 

ايهم: هله هله منو جابكم ؟ 

نور: حازم 

ياسر: ليش ما خابرتيني انه اجي

نور: ناسية الموبايل هنا 

ايهم: زين ما تنسن رواحتجن ملتهيات ، حمرتي زادت وله نكصت  

يحجي بضحك 

ياسر: عمي عوفهن يلبخن ، شذنب العالم تخترع ، احنا وتورطنا بيهن ، مجبورين نشوف اشكال فضائية من الصبح 

نور: اذا اشكال فضائية بعد لا تجي للشقة ضل هنا يم اخوك اشبع بيه

ايهم: شفايتلي والليل كله نلعب طاولي ونسهر على فيلم مرتب ، وين يومية حده ل ١٢ وتاخذينا وتطيرين فوك 

نور: خله على گلبك منا وغاد  

ايهم: سويلنا عشاء من ايدج الحلوة ام علاوي.

نور: هسه صرت ام علاوي قبل دقيقة جنت  كائن فضائي.

ايهم: انه ما كايل هذا حجي رجلج لا تكوليني شي ما كايله

نور: منو تعشا المغرب  شبساع جعتوا راح تخبلوني..

ياسر: جعنا شلون يعني سويلنا فدوة لايديناتج 

رسيل: كملتوا مشاحنات حتى اسلم 

قسور : والله نسونا حتى السلام شلونج خيتي عساج بخير وعافية 

رسيل: الحمدلله زينة انت شلونك ، لؤي شلونك 

قسور: زين يم الله 

لؤي: هله رسيل 

حجاها وابتسم 

جان واحد يحجي ما مبين الزرع مغطي عليه.

سرمد: وانه مالي سلام ابن البطة  السودة.

رسيل:  هاي وين خاتل ما شفتك 

سرمد: ما خاتل بس انتن النسوان ما تشوفن

رسيل: يلا اعتبرني توني فتت هلو سرمد شلونك

سرمد: هله هله بنت العم

ايهم ضربة على رجله، كافي جلبت 

سرمد: اسلم يابة بنت عمي سنين ماشايفها ، وتوني اتعرفت عليها شلون تريدني اسلم.

ايهم: وصل سلامك يلا ارجع العب 

باوعت على ايهم بدت الغيرة  حيل مو بس اني اغار عليك من غيداء ضوك شوية انت هم ..

ايهم: شبلاج واكفة فوتي جوا بدلي غسلي الجص اللي بوجهج ونامي مو تأخرتي على النوم.

باوعتله ضحكت وفتت جوا صعدت فوك  لغرفتي اخذت منشفة والبرنص وحضرت ملابس حتى ابدل 

سبحت وطلعت ، بدلت لبست شال ، حتى ما اترزل من احد ، طلعت من غرفتي شفت نور  توها تريد تنزل ركضت عليها نزلنا سوا ..

رسيل: انطيني علوش ، مديت ايدي اخذته 

ابوس بيه شلون خدود تخبل ، ابوس واصيح افيش.

وصلنا للمطبخ 

نور: اكلج ضل اكل نحميه لو نسوي جديد؟ 

رسيل: اذا نظيف نحميه بيج حيل جديد ، واصلاً هم هواي ما شاءالله خمسة شتردين تسوين بهذا الليل.

نور: خلي احمي ونطلع سوا

رسيل: ماشي 

ضليت العب وية علاوي لحدما صاحت نور يلا

طلعنا رحنا يمهم كعدنا ، منظر الحديقة والكعدة اللي بيها ما تنمل احلى شي ببيت جدو حديقته..

ايهم: سلاماً قولاً من رب رحيم.

رسيل: ههههههه

نور: ها شفت العشاء جهز كمت تتنمر 

ايهم: لا ما متنمر بس كلت نمتن هجعتن ، طلعتن كاعدات

نور: ومنو يسوي الاكل اذا نمنا

ياسر : عمي خليهن ما غيرهن يحلن الكعدة هسه عشاء شوية لاخ نراكيل وبعدها جايات ، شتكولين ام علاوي؟ 

نور: تتدلل كم ابو علي عندي

سرمد: مايصير هذا الغزل جدامنا حسوا بينا ترانه عزب

ياسر: ضل هيج حر نفسك يول خلصان من النك.

رسيل: لا لا ابو علي لهنا وبس نورة نسمه وينها وين النك؟ 

ياسر: طبعاً تدافعيلها تكها بعد 

وزعت نور قواطي وعبرت ياسر

ياسر: وانه تراني موجود كل هالضخامة و ماشفتيني ؟ 

نور: لا ما شفتك

ايهم: اهووو زعلت ام علاوي صايرة مو حمل شقة 

نور: لا وليش ازعل  انه جيت وتزوجته لو هو جاني ودك بابي شجابه على الهم والكائنات الفضائية..

قسور: احنا عندج ام علاوي اللي يحجي وياج نكسر ظهره بس ياسر يتشاقى مو ياسر؟ 

انتبهت على ياسر ضاج 

ياسر: لا هي ماصدكت حجيت بشقة وطلع السم البقلبها 

نور: اي انه سمانية بعد بعد طلع شعندك؟ 

ايهم: يمعودين صلوا على النبي(ص)  كله ضحك ، ليش كلبتوها عزة وهذا الطاولي ضلوا بالمناكر 

طبكه حيل  

راحت نور صعدت وضلينا احنا كاعدين الكل ساكت ورا شوية ياسر انسحب و صعد،  شوية شويو رجعوا يسولفون على الحنو وتفاصيلها 

انفتحت باب الكراج تقريباً ساعة بالوحدة فات مروان بسيارته نزل راد يدخل جوة ما شافنه

سرمد: يالمعرس هنا هنا تعال وين مهزوم ؟ 

التفت بأتجاهنا ابتسم و صاح جاي جاي فد اغير هدومي 

سرمد : براحتك منتظريك 

فات ورا نصف ساعة اجى سابح ولابس تراكسود كاموا بوسوه وباركوله ، وكعدوا

لؤي: بيك حيل نغسلك بداس ؟ 

مروان: تعبااان ولا كادر اشيل ايدي لوما صايحيني انه نايم 

ايهم: الله يساعدك تعبان 

يغمزله ويضحك مروان هم ضحك وكال..

مروان: يابه متعشين وانه على لحم بطني تراني ما ماحاط لكمة بحلجي من الصبح لسه

سرمد: ادري انت العروس وما تاكل ؟ 

ايهم: من الفرحة ما ماكل صارله سنة وشوية خاطب مامصدك عوفوه 

ضلوا يحششون على مروان

مروان: ها توليتوني بسيطة ما تزوجون قابل كله دين ويرجعلكم ..

التفت علية وكال

مروان: تراني ما متعشي 

رسيل: شنو اسويلك يعني ؟ 

مروان: انتِ شرايج واحد جوعان وما ماكل ؟ شنو يسووله اكل طبعاً 

رسيل: ماشي

مشيت و افور بداخلي ولا عبالك صاير موقف بيناتنا وتجاوز حدة وياية مشاها عادي وتعالي سويلي اكل وصلت قريب المطبخ  جان يصيح 

مروان: جاي وياج لا راسي يصدع 

ألتفتت عليه وجهه عليهم وظهره علية ويحجي 

يعني لو اروح اخنكه احد يكولي ليش  

رحت للمطبخ اباوع الاكل كله نور محميته وماسحيه الولد مسح ردت ابجي يعني لازم اوكف اسوي من جديد

وكفت سويت كبة وبتيتة وطماطة حضرت الصمون وخدرت الجاي صبيته شايلة الصينية بيدي توني اريد اطلع للحديقة شفته جاي وكفت بمكاني 

اخذ الاستكان مال جاي وفات 

رسيل: هاي وين مو هذا اكلك سويته

بدون ما يلتفت عليه كال

مروان: تأخرتي  

رسيل : شنو ؟؟

تخبلت هذا شبيه مو صاحي احلف عليه

طلعت واشوفهم كلهم رايحين وحتى ايهم ماكو يمكن طلع وياهم راح لبيت عمي جابر ، نور تكول قبل جانوا لو هم هنا يباتون لو ايهم وياسر يروحون هناك

كمت اكمز شنو  معناها كومني اسوي اكل وما اكل الأ اروح اسأله لو اركع الصينية بالكاع واعيط من الاعصاب اللي بيها

صعدت شفته يحجي وية ياسر على باجر وبيده استكان الجاي انتظرته خلص حجي فات ياسر رحت عليه

رسيل: شنو معنى السويته ؟ 

مروان: شمسوي ؟ 

رسيل: لا تغشم روحك مو ردت اكل ليش خليتني اسوي وما اكلت ؟ 

مروان: كلتلج تأخرتي 

رسيل: بس الجوعان صدك ياكل حتى لو أتأخر بس عيب هيج تسوي تضحك علية 

عفته وفتحت باب غرفتي طبيت توني اريد اسدها حط رجله وفات 

مروان: السويته انه مو عيب لكن كعدتج بنص شباب عزب توالي الليل وقبلها ركصج بنصهم  هذا عين العيب ، لو رايد اعلمج العيب سنين ما اخلص ، لان ماتعرفينه 

رسيل: لا انت تعرفه اليوم شسويت ؟ 

مروان: ماسويت انتِ سويتي 

رسيل: لا تخلبني شمسوية اني شسموية؟ 

مروان: صوتج لا تعلينه لا اهفج بكف اطير وجهج ، وامشي نامي يلا بلا لغوهة زايدة طفه ضوء  الغرفة سد الباب وطلع ، كمت املخ بروحي هذا شنو هذا شنو راح اتخبل والله بعد ما اتحمل تصرفاته 

طلعت روحي يلا نمت ، ثاني يوم هوسه من الصبح صوتهم فوك عالي و اغاني وهوسات لمروان

ما طلعت ، ومحد انتبه اني بغرفتي لو نازله كلها ملتهية بنفسها  بس نور وايهم يلاحظون وجودي وهسه اكيد مشغولين.

للعصر اندكت باب غرفتي 

رسيل: فوت 

فتح الباب ايهم ، هذا شطالع شهكت من شفنه  

ايهم: هاي شنو شو ما لابسه ؟ 

رسيل: والله طالع حلو قاط وكذا كلك حركات

ايهم:  عوفج مني ليش عود ما مبدله راح نطلع 

رسيل: تعبانة مال البارحة ومالي واهس اروح 

ايهم: هذا حجي بله شنو معنى سوالفج هاي  احد ضوجج لو سمعج كلمة ؟ 

رسيل: لا بس اني ما يعجبني اروح

ايهم: شلون تبقين وحدج كومي اونسج انتِ ما شايفة اعراسنا تخبل ..

رسيل: دايخة عفية عوفني براحتي

ابهم: قفلت بعد ضوجتيني عبالي تجين وياية وبس انه وياج ما اصعد احد.

رسيل: غير مرة اجي

ايهم: غصب عنج تجين لان انتِ العروس ويغمزلي 

رسيل: ههههه يلا روح وطفي الضوء اريد انام 

ايهم: لهد كومي قفلي بابج حتى لا يضل بالي وانه احاول ارجع من وقت.

رسيل: اخذ راحتك ما علية شي 

ايهم: لا تخلين بالي رسيل

رسيل: لا يضل بالك

راح ورا نصة ساعة عم الهدوء بالبيت عرفت راحوا كمت طلعت من غرفتي كمت افتر فوك اخذني الفضول اشوف شقة مروان شنو مغير بيها لان دخلوا عمال قبل فترة وغيروا الاثاث. فتحت الباب وفتتت  برودة وعطر بيها يجنن كمت اتبع المكان اللي يجي منه العطر اشوف منين جاي وصلت لكيته ( معطر جو كهربائي ) والله حلو اول مرة اشوف هيج شي 

اباوع الاستقبال مبدل التخم لونه نيلي وكوشات ماروني والبردات نيلي وتول ابيض ، رحت للمطبخ مغير الكاونتر  لون ابيض ،فتت للغرفة اخشاب ضخمة غير الي شفتها من فتت المرة السابقة جان اكو بس سرير ورفوف وزرع ، هسه حتى الزرع شايليه 

فتحت الكنتور شنو هاي شو بس ملابسها ، بعدين تذكرت هو عنده غرفته الخاصة ، يعني هاي بس لرغد 

عطور ومكياج مبين شي توب مو هيج حتى ذوقها بالملابس حلو مو معيدية 

طلعت على كيفي وسديت الباب نزلت للمطبخ سويت اكل متت جوع للعصر اني كلشي ما ماكله 

سويت لفة وكعدت اكل رحت للهول شغلت التلفزيون وضليت اتفرج الى ان سمعت صوت مزايق كمت ركض لشقة ايهم اريد اشوف ، اموت على صوت المزايق 

اطلعت للبالكون طبوا شايلين مروان وهذاك الركص اللي يخبل ذبوا لحم

خوش هز يهزون ورا شوية طلع مروان

دخل بسيارته للبيت ، شو كلشي ماكو لا شريط لا نفاخة بس غاسلها حتى بهاي تختلف عن الناس يامروان

فرغت الطرمة من النسوان دخلن جوا بقت بس الزلم ومروان شوية وفات ورا نصف ساعة انفتحت باب شقة ايهم فتت للهول سديت باب البلكون

ايهم: ها مو كلتلج تعالي فاتتج 

رسيل: ما احب الهوسة

ايهم: قابل هي يومية 

رسيل: ايهم شعجب هنا زفيتوهم مو بفندق؟ 

ايهم: ما نروح فنادق ثاني يوم نطير 

رسيل: يعني شنو شهر عسل ؟ 

ايهم: اي بس اليوم  باقي هنا وباجر يسافر 

ردت اسأل وين بعدين كلت شعلية اني وين ما يروح يروح

اجى ثاني يوم كعدت ساعة عشرة نزلت جوا صادفت نور .

نور: ها ليش ماجيتي البارحة ؟ 

رسيل: صباح الخير

نور: صباح الانوار لا صدك ليش ما اجيتي ؟ 

سكتت شجاوبها من ورا مروان وسوالفه 

مروان زواجه صار ١٠/١٨ 

بيوم ١٠/٢٥  ساعه ستة الصبح اندكت باب غرفتي 

كمت والنعاس بعيوني لان صايرة اسهر اصلي الفجر يلا انام

رسيل : منو ؟ 

_ اني

فتحت الباب 

رسيل : هاي حلمان بية من الصبح احجي وفاتحة نص عين.

ايهم: مال حلمان يومية احلم واتمنى  بس جاي على شي ثاني 

رسيل: شنو ؟ 

ايهم: بدلي  حتى نروح نسجلج بالمعهد 

كمزت من الفرحة وصفكت بإيدي 

رسيل: واخيراً 

ايهم: هاي شنو عبالي احصل شي على هاي البشارة شو بس تكمزين ؟ 

سديت الباب بوجهه هو ويحجي 

رسيل: ابدل واجيك صاير وكح 

احجي واضحك طلعت ملابسي  قميص وتنورة  وحجاب رحت للحمام فرشت اسناني وغسلت ورجعت بدلت كملت رحت دكيت الباب على ايهم طلع

ايهم: كملتي ؟ 

بفرحة جاوبته

رسيل:  اي 

ايهم : يلا امشي

طلعنا صعدت ليكدام بالسيارة وصلنا للمعهد سجلت وكالو يوم ١١/١ الدوام رجعنا وانتظرت هذا اليوم بفارغ الصبر كمت احلم شنو ألبس شنو اسوي شلون راح يمتلئ يومي بالاحداث والاشياء الحلوة حلمت بهواي امور تتمناها كل بنية شابة وصغيرة ..

واجى هذا اليوم السعيد 

جنا واكفين بالسيارة كبال المعهد اباوع مكتوب المعهد الطبي ..

انقبلت قسم صيدلة ، كلش فرحت ، وهذا الفضل يعود لحسام هو سوا الانسيابية بوقتها طلعلي بغداد وهسه وحولت بصرة

ايهم: ديري بالج لا تخلين بالي عليج ومن اجي الكاج بنفس هذا المكان تمام

رسيل: ايهم شلون راح تبدي المشاكل شفت عمي وامك شسووا الصبح؟ 

ايهم: ما عليج طلعنا لو لا ؟ داومتي لو لا؟ مشت كلمتنا واللي نريده صار لو لا ؟  وهذا الاهم الباقي يهوون كم يوم تطبين وتطلعين كدام عيونهم راح يتعودون.

رسيل: انت شنو ملاك الله دزك الية مرات افكر شنو مسوية من عمل خير وربي جازاني بيك

ايهم: نفس الاحساس انه هم اكوم واكعد اشكر ربي عوضني بيج 

اخذ ايدي باس باطن كفي 

رسيل : شنو معناها هاي البوسة الغريبة ؟ 

ايهم : معناها انه فد الج وما اصير لغيرج 

سحبت ايدي ضحكت ونزلت من السيارة  فتح الجامة وصاحني 

ايهم : رسيل 

دنكت  وباوعتله ..

رسيل: نسيت شي ؟ 

نزل النظارة وكال

ايهم :  رسيل مال من ؟ 

رسيل: هههه مال ايهم 

ايهم : رسيل مال من ؟ 

ايهم : مالتك لا تخاف عيوني ما تشوف غيرك..

ايهم: هسه تمام الله وياج 

رسيل : باي 

شخط السيارة وراح لطريق كله يحجي وينصح ويحذر ما عليج بأحد لاتختلطين زايد حتى وية البنات لا تسولفين عن نفسج عليج بمحاظراتج ،  وبس اتصل عليج تطلعيلي ، جابلي موبايل ، جان اسمه دب بوقتها يخبل سمين يشبه علاوي ابن ياسر 

حاولت اتصل على بيت خالو الارضي يطلعلي كله مشغول ، وماعندي ارقام تليفوناتهم ، على الاقل ينطوني رقم اتصل بريناد وآران هاي صار سنة وشوية ما سامعه صوتهم، حسرة بقلبي عليهم لو طلعتها تحرك البصرة حرك 

مشت الايام عادية دوام وشوية حجي بالبيت  بس ايهم يخرسهم محد يفك حلكه وياية مرات من نرجع من الدوام نروح ناكل بمطعم لو ياخذني اشتري ملابس بفترة جيتي للبصرة كلها لا عم كال شتحتاجين ما تحتاجين عندج لبس ماعندج ولا جدي ولا اي احد عدا ايهم ، من يوم اللي جيت لحد الان هو اللي يصرف علية وكله من الزين يجيبه مو شلون ما جان

بفترة دوامي تعلقت  حيل بأيهم صار كلشي بحياتي جزء ما يتجزء مني نساني الدنيا كلها يفز قلبي من اسمع صوته لو اشوفه جنت مرتاحة بشكل وسعيدة وطايرة بأيهم حبيبي وبدوامي..

بس للأسف متدوم اجى اليوم اللي بدأت بيه المشاكل الصدك والازمة الحقيقة 

جنت راجعة من المعهد ساعه ٢ ونصف الظهر يوم ١١/٢٠ وياية ايهم

ايهم: انزلي اطبك واجي وراج 

رسيل: ماشي 

نزلت مثل كل يوم وفتت للمطبخ 

رسيل: هلو نورة 

جاوبتني بضوجة .

نور: هلو رسيل 

رسيل: شكو شبيج؟ 

نور: يمعودة كامت الدنيا ما كعدت اليوم 

رسيل: شكو ليش ؟ 

فات ايهم 

ايهم :نورة غدة ميت من جوع

نور: صار 

دخلنا للهول وانصدم بمروان راجع 

يتبع .......

بارت الثامن عشر 

باوعت عليه كاعد هو ورغد وعمي وشيماء مبين شاحنيه كلش زين ولو هو ما يحتاج بس النار من ينصب عليها بانزين تشتعل اكثر 

التفتت علية ايهم حجى بصوت مسموع لان عرف الوضع ما راح يمر سلامات 

ايهم: رسيل بوجهج فوك بسرعة 

مشيت صعدت اول بايو جان اسمعه يعيط بصوت عالي..

مروان: اوووووووكفيييييي.

من الهبطة كعدت على الدرج خفت اكمل  هذا هو راح تصيرلي مصيبة ويتأذى ايهم بسببي 

مروان: من شوكت تداومين ؟ 

ايهم: عوفها واحجي وياي

مروان: جاوبي من شوكت تداومييييين ؟ 

ايهم: كاعد اكولك احجي وياي ما عليك برسيل..

جانت اكو طبلة كدام مروان بيها استكاين جاي وقوري وشكر من ايهم حجى مروان قلب الطبلة وكام بأتجاهه لزمه من ياخته 

مروان: أنه سألتها الها وهي عندها لسان تجاوبني اما انت حسابك بعدين 

ايهم: لاتاخذنا بصوتك وعربدتك ، دومك ما تتفاهم، على شنو هاي الاعصاب شلك دخل بيها ان داومت او لا ، انت تزوجت وعندك عائلتك حط عينك عليها ما ألك شغل بغيرك 

مروان نزل ايده  من تشيرت ايهم ورتبه بطريقة استهزاء 

مروان: صح مالي شغل بغيري 

التفت علينا بعدين ضرب ايهم كله على خشمه خلاه يفقد التوازن ويرجع ليورا 

كام يصيح اخذنا بصوته من الخوف جمدت بمكاني لا بية اكوم لأيهم خشمه ينزف ولا بية اعوفه واصعد فوك كمت ابجي ماعندي وسيلة غير البجي

ألتفت علية جان يكول 

مروان: ظميهن تحتاجيهن بعدين

( يقصد على دموعي)

هو ومندار علية كام ايهم وضربه بوكس من ورا التفت مروان وتلازموا هاي ثاني مرة يتعاركون بسببي 

صار صياح وعياط وحجي هواي انتهى بكلمة من مروان ...

مروان: اذا رسيل عتبت باب البيت  طلقة براسها والله والله والله اخذها بمكان الجني الازرك ما يندله واريد اشوف شلون تمشي كلامك علية  وتسجلها غصب عني 

عافنا وصعد فوك ، ركضت على ايهم جبتله خاولي جان معلك يم المغسلة، اخذه مني وخلاه على خشمه 

رسيل: تأذيت ؟ 

ايهم: ماكو شي روحي بدلي وتغدي لا يضل بالج ، نوررررر نور  وينج؟ 

نور: ها عيني هياتني 

ايهم: بلا امر عليج غداء رسيل صعديه 

نور: تتدلل ..

شيماء ورغد  اتخذوا موقف المتفرج حجاية ما حجوا لان يعرفون ايهم وخبالاته ما تفرق عن مروان 

صعدت الدرج خايفة من الراح ييجي    انهارت اعصابي شكد جنا مرتاحين والبيت هدوء بس اجى قلب البيت رأساً على عقب..

نزعت الشال وكعدت ، جسمي كله يرجف اريد اهدأ ما اكدر الي صار بين ايهم ومروان شي كلش جبير شلون راح ينحل هالمرة  ما اعرف ، المشكلة صارت شغلة عناد ومنو اللي تمشي كلمته 

اووووف اندفعت باب غرفتي فاتت نور جايبتلي الاكل 

رسيل: ليش جبتيه منو عنده نفس ياكل بعد ؟ 

نور: محد بس ايهم ترجاني بعد ما اكدر

رسيل: شوكت اجى؟ 

نور: ساعة ١٠ الصبح 

رسيل: شلون عرف اني بالدوام 

نور: شوق

رسيل: شوق ؟

نور: اي شوق 

رسيل: احجيلي الصار من البداية 

نور: اجوي الصبح طلعنا تحمدنالهم على السلامة ودخلنا الجنط وياهم كعدنا بالهول وبعدها ردت اصعد الجنط وية رغد لان هواي  بهذه الاثناء نزلت شوق سلمت وكعدت ، مروان كال هاي الجنطة عوفوها، تنغصتلكم  كم شغلة بيها ..

نور: تسلم خوية الله يحفظك النا 

صعدنا الجنط اني ورغد فوك 

رغد: تعبتج نورة

نور: تعبج راحة بنت عمي نور البيت 

رغد: حبيبتي راح اسبح وانزل ، كولي لمروان اذا سأل علية 

نور: ماشي 

توني انزل الدرج واسمعهم يحجون وكفت بمكاني اتنسط ..

مروان: وين رسيل ؟

شيماء: الله يشيلها كون واخلص جبتها عله على قلبي ..

مروان: ليش شصاير شمسوية جديد؟ 

شوق: كول شنو ما مسوية  ابونا راح يموت من وراها

مروان: غير يحجون ، فضوني بلا لف ودوران 

شوق: بنت عمك طابة طالعة يا وي ياسر يا وي ايهم 

مروان: ليش وين تروح ؟ لج رسيل صيحوها 

 حجاها بأعصاب كلت رحتي بيها

رسيل: كملي 

نور: عاد شوق كالتله،ما موجودة طالعة سألها وين كالتله اخوك السبع نقلها للبصرة وداومت هو تخبل ما صدك اللي سمعه..

مروان: شنو عيدي ما سمعتج زين 

شوق: رسيل داومت واللي سجلها ايهم 

مروان: حلووو، ابوي وينة عنهم ؟ 

شيماء: ليش يكدرله لاخوك ، واكفلنا سجينة خاصرة يومية تطب وتطلع مفرعة لا ستر لا حياء العالم اكلت وجه ابوك يسألونه منو هاي البنت العندكم  يوم وي ياسر يوم وي ايهم 

نزلت واباوعلج مروان دمارت وجها تريد تطك من الاعصاب ، بس سكت ما حجى شي بعد 

صار الغداء كعدن تغدن رغد وعمه وشوق وهو كاعد يشرب بالجكاير وحدة ورة الثانية ..

شيماء: تغدا يمه عوف الجكاير موزين عليك.

 اذا خايفة عليه ليش هيج حركتي اعصابه اول مافات بعدها كملنا الغداء جان يصيح نور جاي راسي 

نور: تدلل خوية 

سويت الجاي وفات عمي علي 

علي: ها يالعرسان حمد لله على السلامة 

كام مروان تسالموا 

مروان: هله حجي 

علي: شلونها روحتكم سولفلي 

مروان: انت سولفلي شجاي يصير بالبيت؟ 

علي: كل خير بوية كل خير

مروان: وينه الخير وابنك يمشي جلمته عليك وعلي ويدوسنا ويعدي..

علي: ايهم متخبل ماجاي اسيطر عليه تمرد علينا كلش.

شيماء: من يوم ما اجتي بنت سوسن وهو صار طنطل علينا وكف ضد امه وابوه واخوه علمودها ، وهذاك ابن عمتك اعصاب رجليه تلفت بسببه ، وصبرية تناشغ وتبجي يومية ، وهاي شوق جدامك حطمها، حابسة نفسها فوك ما تنزل بسببهم 

علي: هدي الوضع يا مرة لا فد نوب تهيجينه

شيماء: ما داعي اهيجنه الموضوع جبير من كاعه

عافهم مروان وطلع للحديقة ورا شوية فات وانتم دخلتوا وراه يمكن سمع صوت السيارة وصار اللي صار

رسيل:شنو من بشر اريد افهم عقلي راح يوكف شنو يريدون مني ما كافي الصارلي بسببهم ؟ 

نور: رسيل اسألج بصراحة وتجاوبيني بدون كذب 

رسيل: كولي شنو

نور: تحبينه ؟ 

رسيل: احبه ؟ قصدج ايهم ؟ 

نور : اي 

رسيل : قليلة هاي الكلمة بحقه 

نور: عرفتج شكد سألتج ونكرتي 

رسيل: هو ما يقبل احجي

نور: حقه ، راح تنفتح جبهة من نار عليكم اذا عرفوا

جاوبتها بأستغراب 

رسيل: ليش يعني؟ 

نور: ليش ما تدرين غيداء محجوزة لأيهم، ومحد يتكرب يخطبها لانها بأسمه ولساها مامتزوجة متانيته 

اذكر من اجا ايهم راد يخطبوله بنت وياه حباها ، انكلبت الدنيا وماكعدت ، حاربوه كلهم الى ان عافها 

رسيل: قلبي كام يوجعني شلون نور دبريني 

نور: ما فكرتي من حبيتيه ياعيني؟ 

رسيل: ليش هو بيدي غصب عني حبيته ، ومخبله اذا ما احب واحد مثله نسيتي شنو سوه علمودي؟ 

نور: انه اكثر وحدة اتمناكم تنجمعون سوية بس جدي شلون تقنعونا ؟ 

رسيل: بلكت كبر وتغير تفكيره

نور: جدي يتغير انه اطلب من الله ما يشوفج وجهه الثاني تكرهين نفسج صدكيني و لو ابوج جان عايش الله يرحمه اكيد راح يحجيلج عنه ، ابنه من صلبه وقاطعه سنين وما رفله جفن عليه ، عاد انتِ راح يكولج اكسر بنت جواد واخذج ؟ الا بحالة وحدة وهاي مستحيلة، بس احتمال ايهم يسويها يكدر

رسيل: شنو كولي عفية ؟ 

نور: ياخذج ضرة عليها 

رسيل: تتشاقين مو ؟ 

نور: طبعاً لا احجي صدك

رسيل: كل عقلج اتحمل وحدة تشاركني بأيهم اموت احسن..

نور: لعد موتي من هسه

رسيل: نور لا تحركين قلبي 

نور: ما حاركته انه انتِ حركتيه ، وانه ما اكدر اجاملج واعيشج حلم وردي وتاليتج تكعين على راسج 

رسيل: وهيج ايهم ماعنده رأيي ويسمع كلامهم للمرة الثانية ويضيع حبه من ايده مستحيل يوافق 

نور: الا لو تبرا من هله وهم يتبرون منه ومنج 

رسيل: اهم شي عندي ايهم خليهم يتبرون مني طز بحالهم اني 

نور: الله يستر عليكم بس 

مر اسبوع على المشكلة لا شفت ايهم ولا هو اجاني حتى جوة مانزلت بقيت بغرفتي اراسل ايهم يقرا رسائلي وما يجاوب اخابر يرفضه، شبيه قلقني كلش 

وبيوم الجمعه الكل يجتمع على الغداء ، جدو دز علية حتى اتغدا وياهم ، نزلت سلمت بست جدو وبيبي وكعدت 

تغدينا اباوع على ايهم اريده بس ينتبه اني اجيت ماكو مدنك على الاكل وياكل ما رفع راسه ابد خلص الغدا صبوا الجاي وكعدنا ورا ساعة تقريباً جدو ألتفت ناحيتي وكال..

الجد: رسيل 

رسيل: نعم جدو 

الجد: عاجبج تكملين علامج ؟ 

تفاجأت من سألني جنت مأيسة من الموضوع 

رفعت عيني على ايهم  يأشر براسه يعني كولي اي ألتفتت على جدو هزيت راسي وكلت

رسيل: جدو ياريت 

الجد: هذا هو من باجر السبت تداومين 

مروان: جدي بس ....

قاطعه جدو رفع ايده وكال

الجد: لا تناقش تكمل علام يعني تكمل ، انه فايت انام لا صارت صلاة المغرب ندهوني.

كام جدو باوعت على مروان صار كتله من النار ، بس واحد يلزمها تحركه رغد جابت كلاص مي واجتي عود خايفة عليه 

رغد : هاك اشرب لا يصير بيك شي منو يستاهل؟

ضرب ايدها وكام طلع برا الكزاز كله تطشر وهي صارت بكد النملة من الفشلة

صعدت فوك تركض 

نور: ناس تتعارك وتكسر وتعالي ينور نظفي بوراهم والله بودي اهج واخلص من هذا البيت 

خطية تحجي بضوجة ملت روحها باليل اندكت باب غرفتي فتحتها ايهم 

رسيل: روح زعلانة عليك 

ايهم: واهون عليج ؟ 

رسيل: مثلما هنت عليك اسبوع كامل بساعاته ولياليه و لك رسالة وحدة تعب نفسك واكتبها شنو راح تأثر عليك اذا دزيتها ؟ 

ايهم: ما ردت احجي وياج الا وانتِ رادة لدوامج 

رسيل: صدك شلون قنعته لجدو ؟ 

ايهم: بطريقتي  لا تدوخين روحج المهم باجر نطلع الصبح للدوام حظري امورج كلها 

رسيل: تستاهل مني  بوسة 

حجيتها وضحكت

ايهم: بوية 

تقربت عليه رفعت نفسي حتى اوصل لوجناته بسته من خده ورجعت وكفت عدل..

رسيل : هاي شطولك انزلي شوية شصار عليك جامد بمكانك ؟ 

ايهم: انزل بشرط كون منا 

حجاها يأشر على شفايفه ويضحك

ضربته على كتفه

رسيل : طالعة عيونك وصاير ما تستحي

ايهم: هاي انه ؟ 

رسيل: لا انه 

ايهم: اوكفي اوكفي ياهو اللي تحارش بالاول ؟ 

رسيل: انه 

ضحك تقرب حظني

ايهم: ما بقى شي وتصيرين الية ان شاءالله..

انخمط قلبي من كال هاي الحجاية ما اعرف ليش حجي نور خوفني حس بية ضجت  ابتعد عني وباوعلي 

ايهم : شبلاج ؟ 

جريت حسرة قوية وهمست 

رسيل : راح يقبلون ؟ 

ايهم: احاول وياهم مرة وعشرة والف الى ان يقبلون

رسيل: واذا رفضوا

ايهم: اشوف منا لساعتها شسوي احتمال انهبج وانهزم 

رسيل: ياربي تعدي على خير 

ايهم: تعدي بس انتِ اوكفي وياي شنو يحجون ويهددوون اريدج صلبة ما تنهزين ماشي 

رسيل: ماشي يا قلب رسيل ودكاته

ايهم:  يابه والله مو حمل هالكلام تراني ضعيف جدامج 

رسيل: اموت عليك من تحجي هيج 

ايهم: وانه اموت عليج بكل حالاتج ياروح ايهم ونبضاته

ثاني يوم الصبح كمت فرحانة وكلي نشاط رحت سبحت جان نهاية شهر ال ١١ باردة ثلج بس ما اعرف الا اسبح يلا اصحصح 

طلعت من الحمام بدلت ولفيت شالي خليت كحل وماسكارة ممنوع اخلي شي ثاني تيهم ما يقبل بالكوة قنعته برتوش بسيطة شلت اللفكس مالتي ارتب بالمحاظرات اخاف اكون ناسية شي اندكت الباب صحت

رسيل : فوت ايهم 

ايهم: صباحج عسل يانحلة 

ضحكت 

رسيل: صباحك كل شي حلو بالدنيا 

ايهم: كملتي ننزل ؟ 

رسيل: بس ارتب محاضراتي واجي وراك 

ايهم: مو كلتلج باليل خلصي شغلج كله حتى الصبح نطلع من وقت

رسيل: نسيتهن  هسه ما اتأخر خمس دقائق

ايهم: رايح اشغل السيارة علما تجين خليها تحمه شوية 

رسيل: ماشي

 نزل ورا خمس دقائق كملت وطلعت من الغرفة مبتسمة شفت مروان اختفت الابتسامة من على وجهي..

مروان: هاي هيج تروحين ؟ 

رسيل: ليش ملابسي بيهن شي ؟ 

مروان: انتِ شنو تشوفين ؟ 

عاقج وجهه عفية وجه ماشفته يضحك بس بالخباثة ..

رسيل: عاديات يومية اداوم بيهن وحتى ايهم 

قاطعني  ردت اكوله حتى ايهم شافني بيهن وما حجى لو بيهن شي ما يخليني اطلع بس سكتني

مروان: مالي شغل بقناا.....

 غلط على ايهم كرهته بالزايد فوك كرهي أله..

مروان : عندج شي ثاني لبسيه ماعندج ماكو دوام ووجهج تجلفينه كبالي يلا تطلعين.

رسيل: مروان ماعندي غير شي كلهن تنانير شتريدني البس ؟ 

مروان: لبسي جبة واطلعي 

رسيل: لو اموت والله ما البسها 

مروان: وانه اريد بنية تعدي عتبة الباب بهذا اللبس 

رسيل: مابيها شي ليش تعاند ؟ 

مروان: لو تبدلينهن لو ارجعي كملي نومتج وراي شغل لا تدوخيني راح اتأخر

اعرف ما يطلع بهيج وقت  ساعة ٩ الصبح يلا يروحون عندهم عمال تفتح بدالهم كاعد علمود يضوجني بس 

رسيل: اداوم اليوم ومن ارجع اخلي ايهم ياخذني واشتري جبب ، زين هسه راضي ؟ 

 اشر بحواجبه يعني لا ،ضربت بيدي على اللفكس حيل وكع القلم مني دنك ، عبالي راح يجيبه كلت صاير حباب  وعنده اتكيت انصدمت من صوت الشك مال تنورة ،  شكها واني لابستها ..

مروان: يلا داومي

 عافني ونزل بقيت بمكاني صافنة كمت اضرب على وجهي من الاعصاب يعني شسوي واكدر اتعايش وياه راح يخبلني بقيت واكفة بمكاني من الصدمة صعد ايهم صاح 

ايهم : وينج يمعودة 

من شافني بهت 

ايهم: هاي شبيج ليش تبجين ؟ 

شاف تنورتي ، تقرب علية

ايهم : شلون انشكت وكعتي ؟ 

يباوعلي بقلق ويحجي 

هزيت راسي بمعنى اي ، لان اذا اكوله مروان هسه ينزل يتعارك ويتضاربون ويتأزم الموقف 

ايهم : تأذيتي شو شوفيني ؟ 

دنك على رجلي عباله اكو دم طالع لو بيها شي 

رسيل: مابية شي راح ارجع انام انت روح لشغلك 

ايهم: ودوامج شلون ؟ 

رسيل: باجر اداوم 

ايهم: يلا ارتاحي وباجر الله كريم 

رجعت فتت للغرفة اباوع بالمراية شلون شاككها بس زين بيها بطانة جوة الركبة مابين مني شي ، بدلت ومددت اريد انام ما اكدر  طارت النومة ضليت اقارن بين شخصية ايهم ومروان، مابينهم مقارنة من الاساس شتان ما بينهم  

جبلين واحد من جليد وصلب  والثاني بيه مي وزرع وشلالات ، واحد عصبي نار وما يسيطر على اعصابه وانفعالاته غامض ما ينحزر انفعالي  بنفس الوقت اشوفه حنين على اهله وصاحب غيرة ونخوة 

اما الثاني  هادئ ويتدارك المواقف بهدوء ورزانة عقل نادراً ما يصير عصبي بس بوقت الظلم يفقد اعصابه  واضح وضوح الشمس ، حنين طيب محب عطوف ويعطي بلا حدود وبدون مقابل واني وكعت بين الجبلين 

صار العصر  اجتني رسالة على جهازي فتحتها رقم غريب مكتوب 

💬الجبب راح توصلج طلعة وية ايهم وغيره وفراره بالسوك ماكو، لبسيهن عليج بالعافية

ضحكت هذا مخبل والله يعني بكيفي تلبسيهن وهم متختارين انتِ اللي دزيته هو اللي ينلبس وبعدين من وين جاب رقمي ولك مروان شسويت بية من وين طلعتلي باليانصيب

سكتت كلت البسهن وهذا هو؛ بس ما جنت اتصور راح تصيرلي مشكله اكبر بسببهن 

جابت نور الجبب وياهن حجابات 

نور: هاج عيني هذا سايق عمي جابهن كال انطوهن لرسيل ، شنو موصيه الولد انتي؟

رسيل: اي اني وصيت لان العندي كاعد اتضايق منهن وهم هناك كلهم جبب وبس اني لبسي يختلف كلت ألبس مثلهم احسن.

نور: زين تسوين بالعافية عليج حبيبتي 

رسيل: الله يعافيج

راحت نور ضميت الملابس بالكنتور 

ثاني يوم ، لبست وحدة من الجبب  حلوة ومبينة راقية وموديلها جديد لبست ونزلت ايهم جان منتظرني بالسيارة مثل كل مرة 

فتحت الباب ألتفتلي مستغرب ،

ايهم: هاي منيلج ؟ 

رسيل: صباح الخير

ايهم: منيلج كلت

رسيل: مروان جابهن 

ايهم: تتشاقين؟ 

رسيل: والله هو جابهن 

سكت وباوع ليكدام بعدها  ألتفتت علية 

ايهم: شنو المناسبة؟ 

رسيل: بدون مناسبة اني قبل فترة صارتلي مضايقات بالدوام و.....

شفته عصبي وجهه انكلب صار واحد ثاني...

ايهم: الغي ليش سكتي ؟ 

رسيل: على كيفك لا تصير عصبي 

 صح بصوت عالي زرف اذني

ايهم: من مضايقج وليش ما كلتيلي وشوكت طلبتي منه يجيبلج ؟

رسيل: من فترة صارتلي مضايقات وخفت اكولك لاتبطلني والبارحة شفت مروان وطلبت منه يجيبلي

ياريتني ما حجيت انكلبت الدنيا وماكعدت

ايهم: مقصر وياج انه وتروحين تطلبين منه عفتي الكل ورحتيله انتِ مو تعرفين انه مكاطعه بسببج وعاركته بسببج  وبعدين تخافين تحجيلي لا ابطلج ؟ ليش انه هيج همجي بنظرج من خليتج تداومين ما اعرف راح تتعرضين لمضايقات شنو ما مداوم جامعة قبل ؟ ولج عاركتهم كلهم لاجل دوامج عندج علم شسويت يلا جدي وافق كلشي جربت وياه ورفض الا شاف جوازي بيدي والتذكرة كلتله اذا كلمة مروان مشت انه اهج وما تشوفوني تالي اجي ابطلج لو كلتيلي احد مضايقج واريد اغير لبسي ؟ لج انه صديقج  قبل لا اكون حبيبج ،فاتحلج قلبي ومحتويج  كل عقلج أأذيج لو احرمج من شي تحبينه ؟ 

رسيل: اسفة ما تتكرر والله اسفة لا تزعل مني 

ايهم: وانه اسفج ما يمشي عندي ولا يشفعلج ..

وصلني للمعهد بالكوة خلصت اليوم بطلاع  الروح وكفت نفس المكان اللي يومية اوكف بيه انتظره اخابر ماكو يطلع مشغول ما كدرت احصله ابد ورا ربع ساعه طبكت سيارة يمي باوعت ياسر  دكلي هورن صعدت 

رسيل : هلو  شعجب انت اجيتني ؟ 

ياسر: ايهم عنده شغل وماكدر يجيج ودزني اخذج انه..

رسيل: هاا زين

عرفت كذب يريد يعاقبني على السويته ، بس ايهم عقابك قاسي ، شهر ال ١٢ كله ياسر يوديني ويرجعني ، وجه ايهم صار حلم اشوفه ، ادز رسائل اتوسل اريد يحجي وياية اعتذرت هواي حتى كلتله ابوس ايدك بس جاوبني ماكو قافل مني ومن افوت عبالك خيال كدامه يعبرني ويمشي ولا عبالك بشر واكف 

وبيوم الصبح طلعت من الغرفة شفت باب شقته مفتوح ، فتت سديت الباب ، مشيت على كيفي لكيته بالمطبخ داير وجهه على الطباخ

ايهم: اطلعي 

فزيت شلون عرفني 

رسيل: ايهم بس احجي وياك مو كافي عاقبتني وعرفت غلطتي وبعد ما تتكرر.

طفى الطباخ اخذ سترته من الهول وطلع

ياربي الصبر شلون بية انطفت فرحتي حتى دوامي كرهته 

بيوم ٣٠/ ١٢ جنت واكفة انتظر ياسر  لهناك وطبك ايهم معقولة هذا هو لو كاعد يتهيألي لان مشتاقتله دك هورن فززني فتحت الباب وصعدت 

رسيل : هلووو 

ما جاوبني ساق سريع وطبك يم محلات ملابس 

ايهم : يلا انزلي 

نزل نزلت وراه 

تيهم: فوتي اشتري وذني تحركيهن ما اريد اشوفهن عليج لو احركج انتِ ولابستهن 

ابتسمت هاي علامة صلح 

رسيل: ماشي احركهن واحرك الجابهن واحركني وياهن بس سامحني 

ايهم: يلا منتظرج هنا

فتت للمحل شكد اكو حلوات بس اخاف اختار من ورا مروان ظليت حايرة الى ان فات ايهم 

ايهم: ما عجبج شي نروح لمكان ثاني ؟ 

رسيل: بالعكس حلوات 

ايهم: اللي جبتهن انه احلى خصوصاً مال تركيا ومرتبات ليش غيرتي لبسج 

رسيل: احسن هيج ارتاحيت اكثر  وديني محل مال جبب حباب.

ايهم: ماشي يلا

رحنا لمحل مال جبب ، نزلت اخذت كم وحدة واكو فساتين هم اخذت وياهن..

دفع الفلوس وطلعنا صعدنا بالسيارة  وكف يم محل مال كيك 

ايهم: شوية واجيج 

رسيل: تمام 

راح واجى جايب كارتونة كبيرة مبين كيكة 

رسيل: هاي شنو ؟

ايهم : كيكة

رسيل: المن ؟

تيهم: بعدين تعرفين 

رجعنا للبيت ومشى اليوم طبيعي 

باليل صاحتني نور كالت تعالي طلعت للهول كدام غرفتي شفت كيك وعصاير وشموع على الطبلة الوسطية وكاعدين ايهم وياسر ونور وجهالهم 

رسيل: ضحكت هاي شنو ؟جمعة خير يارب

ياسر: راس السنه وايهم الا يحتفل  اكوله مو النا لأخوانه المسيح مايقتنع ..

ضحكت وكعدت شكد حلو بيت خالو ابد ما جنا نحتفل بعيد رأس السنة ما اعرف ليش يمي على القنفة ايهم كاعد  فاتحين التلفزيون على قناة  جانت ناقلة الاحتفالات اللي بالدول 

صارت ساعه  ١٢ الا دقائق وبدأ العد التنازلي لتوديع سنه ٢٠٠٧ واستقبال السنة الجديدة ٢٠٠٨ 

من وصلوا للعشرة طفينا الشموع واشتغلت الشعالات بالشارع نسمع بس الاصوات ألتفت ايهم علية  وكال بصوت

ناصي 

ايهم: حبيت ابدي وياج السنة الجديدة حتى نحتفل كل سنة ان شاءالله بحبنا بوسط اهلنا واحبابنا وهاي السنة تكون احلى سنة مرت بحياتي وحياتج  لان راح تجمعنا ..

بجيت ما تحملت كلامه لو بيدي احضنه بس جانوا  كاعدين آخر فترة كمت اضعف كدام ايهم بشكل مو طبيعي حبيته حب جنوني  ما اتخيل بيوم احب واحد بكد حبي أله..

قطعت الكيك ووزعته بديت آكل بالقطعة مالتي صعدوا مروان ورغد مبين جانوا طالعين لان لبسهم مال طلعة 

مروان: كل سنة وانتم بخير وسلامة تنعاد عليكم بالصحة والعافية وراحة البال..

ياسر: وانت بخير ضلعي وتاج راسي 

كام باسه ورجع كعد ألتفت لأيهم

مروان: وانت تبدي سنة جديدة ومكاطع اخوك؟ 

كام ايهم تباوسوا وهنوا بعض وكعدوا  يمنه  نور قدمت الهم كيك وعصاير سوالفهم جانت بس مجاملات لا اكثر

مرت الايام بخير وسلام وهادئة نوعاً ما 

اجى الخبر الصعقه مثل ما يكولون 

أمجد خاطبيله نوران بنت عمي جواد  

شوق دك ولطم وعمة شيماء تخبلت  يابه ليش مو جان يريد شوق  سمعت من نور على اساس كايل جزت نفسي منها من سامع سنين واكعات منها وشعرها جان ولادي و طول شوية والصدمة الاكبر عمي وافق ينطيه نوران لان يحبون عمه صبرية ويعزوها ، من بعد هذا الخبر صارت مشاحنات بالبيت بين عمه شيماء وايهم على من وراك وانت سكطت الولد وكسرت بخت اختك بس ما نعرف لحد الان شوق ضامتها بقلبها 

 ايهم ما يحجي وية شوق  شكد حاولوا يصالحوهم يرفض مر عيدين يخلوها توكع عليه وتبجي وتتوسل وهو ابد ما يريدها حجاية نور كمت اصدك بيها من  كالت اذا قفلوا على واحد وتأذوا منه انتهت واني جربتها شلون قاطعني وحاربي شهر ، خلاني لا ليلي ليل ولا نهاري نهار.

وبيوم كاعدة اقرأ العصر عندي امتحان والملازم داير مدايري ، اباوع  ملزمة نقص شلون وهاي كلش مهمة كمزت للموبايل دكيت على ايهم

ايهم: ها حبيبي 

رسيل: حياتي فدوه تكدر تجيني ؟ 

ايهم: ليش صاير شي؟ 

رسيل: عندي امتحان باجر وملزمتي ماكو 

ايهم: اي وشنو هسه ؟ 

رسيل: اريد اروح لصديقتي اخذها منها استنسخها وارجعها الها  عفية كلش ضرورية 

ايهم: بس انه ما اكدر اجي كاعد ينزلون اثاث وعيني عليهم بس اعوفهم يفلشونه

رسيل: حباب شلون والله مهمة

ايهم: شوفي مروان بالبيت بلكت ياخذج 

جريت حسرة عليمن شمرني على مروان 

رسيل : ماشي الله وياك 

ايهم: هله 

كمت اريد اروح وبنفس الوقت اخاف يفشلني ، كلت اطلع لو بالهدف لو بالنجف اجرب حظي  من وكفت صارت عيوني على المرايا وذيج الكفشة الزينة مال امتحانات رحت دكيت باب شقته 

رغد فتحتها 

رغد: خير؟ 

رسيل: مروان هنا ؟

رغد : نايم شرايده منه 

جان اسمع صوته 

مروان: تعالي رسيل فوتي 

باوعتلها صفح ابتسمت ابتسامة خبيثة وفتتت( بس لكل  فعل من عندنا يقابله ردة  فعل اكبر منه ومرات نندم لان عادينه هيج نوع من الاشخاص) 

فتت لكيته كاعد يشرب جاي وبأيده الثانية جكارة عفية جكايرك ما تخلص 

رسيل: مروان فدوة لعيونك الله يخليك اريد منك شغلة ولا تكول لا لأن محتاجتها ضروري 

مروان: شبيج راح تبجين احجي شنو الشغلة ؟ 

رسيل: اريدك تاخذني لبيت صديقتي اجيب منها ملزمة استنسخها وارجعها الها والله مهمة كلش لو مو مهمة ما اطلب منك تاخذني 

رغد: والله خوش صديقتي امشي اطلعي عيني ما عليج برجلي ما يطلع وياج 

مروان: رسيل بدلي نازل قبلج 

كام خزرها وفات،  دكت طبول بصدري لان قبل وما خجلني وهم لان فشلها وردها عني ، لبست عباية اسلامية وشال وطلعت اركض صعدت يمه ، حرك السيارة ومشينا

مروان: تندليها ؟

رسيل: لا

مروان: شلون نروح الها نضل نسأل ياعرب ماشفتوا صخلة ؟ 

رسيل: هههه لا بس عندي رقمها اخابرها شتكول ؟ 

مروان: شمتانية ما تخابرينها 

اتصلت وصفتلي المكان وكلتله لمروان 

مروان: اندليته سديه 

سديته وكفنا ببابهم 

مروان: خابريها تطلع 

رسيل : تمام ، كالت جاية 

انفتحت بابهم طلع رجال كبير يمكن ابوها نزل مروان سلم عليه ورا شوية طلعت بنية صغيرة  اختها بيدها الملزمة اخذها مروان واجى صعد ، رحنا لأبو الاستنساخ  نزل استنسخها ورجعناها للبنية 

مروان : عاجبج تروحين لمكان ؟ 

رسيل : لا عندي دراسة وما الحك بعد 

مروان : ماشي 

رجعنا للبيت ألتفتت عليه مبتمسة

رسيل : شكراً تعبتك 

مروان : ماكو تعب .

نزلت فتت للبيت صعدت لغرفتي اول ما فتت دخلت رغد موجهه اصابع الاتهام وتهدد

رغد: ولج عوفي رجلي ولعبي بعيد عنه احسنلج لا تشوفيني ساكتة ترة اسوي بيج شي بعمرج ماشايفته زين ياحلوة 

حجت اللي حجته وطلعت

يتبع....

لقراءه باقي الفصول من هنا