رواية خطايا واجتثات الفصل العاشر 10 بقلم نور علي البصري

ميلن لا تنگطن كحل فوگ الدم... 

ميلن وردة الخزامة تنگط سم... 

مظفر النواب... 

ــــــــ،،،،،،، ــــــ، 

درت اني وفســتاني المنفوش من صدمتي اخذوا حسن.. لصدمتي خالي رحيم.. واكع بالكاع و بنص كصته معدوم...  

وراه خوالي مكتلين بالكاع وكعت يم خالي واني بس اشهك بصرختي ورجفة اخذتني..

اخاف المس خالي بيدي اخاف ما احس بي نفس 

يا نفس ولج وبكصته عادميه ملامحه محتفضه بذله توسله بيهم يعوفون حسن..

ااخ خالي خذو خذو وليدك وانت قتلوك هنا شمرت روحي عليه التجأ بسده.

ـ خاللللللييييي... تكتلت كل وادمنا يخالي حسن راح يخالي..

ليش و شنو السبب ليش ما مكتوب نفرح خالي لاااا خالي عرس الاسود علي يمة وينج تكتلت خوالي.. 

بعيوني ادور بين جثثهم يبووووي قطعت الصرخه نغزة بگلبي وجعتني كلش .. 

المكان صار فارغ الا منا الجوارين كلمن كرص ببيته و والي من الشبابيك بس تتفرج والخوف غطى على شارعنا

ادك الطم واني اكول

ـ ردلي يـ، حسن  هلك ما نطوك بسهوله رد يالشهم رد يا ازلمتي يا عريس رد... هلك زفوك بدمهم رد ولك.. رد ولك رد

احجي واني وكفت واكمز بمكاني واصيح ولك رد هستريا انهيار مو رقص ولا دبكات ولا هو ردح جنوبي

هذا جرحي الي نزف وافز من وجعي اكمز بمكاني الالم اقوى داخلي يترجمه لفعل جنوني وهستري يبوووو.

ظليت بمكاني اكمز هستريا ما احس شحجي شسوي اكمز واني اجر بشعري لو افتر بين عزوتي الخولة رحت الوذ بأمي..

ولج يمة شنووو راحت خلاني خوالي راحو يمة يمه حسن.. خذوه يمه راحت روحي وياهم وي حسن.. و خالي رحيم وخوالي كلهم... 

انشغ واجر النفس اشهك واغص بالبجي

ـ ولج يمااااه ما نطوا حسن.. بسهوله نطوا اعمارهم يا الله خذوه ازلام النظام.. 

 اشوف امي مكابلة اخوانها و الزيج مدروع هي وبيبي و رجيوة لطم هن ونسوان خوالي وبناتهم.. 

بدل صفگه وهلاهل صريخ ولطم والوجوه تدمت من لطمهن وهن يخرطن وجوهن بأصابيعهن

بخدودهن 

الدم يصب وي ملوحه الدمع يتحاضن  وي دم المغدورين يواسن صياحهن يوجع وضعهن مدوهن مصدومات مثلي 

خطية احنا الفقرة خطية احنا بلا ذنب مكسورين بزلمنا خطيه احنا الفقرة..

رديت اصرخ وياهن واثغب 

ـ يبوووي... يبوووي راحت ازلامنا وويلادنا تكتلت كل ازلامنا عرس الاگشر علينا... 

ظليت افتر عليهم واني اشوف بلكت بيهم عايش بي نفس بس حتى النفس مكطوع منك يالفقير..

شفت حركه من جهة حسين.. الواكع على وجهة تحرك وهو شبه يزحف ويريد ينهض..

ـ عبالي اعتقلوك عبالي قتلوك 

ركضتله اريد اسنده لهفه لكيت واحد عايش اضحك وابجي ما اعرف وقتها شنو حالتي يسموها جنون اللحظه.. 

 اسمعه يشهك بجي نحيب و كامرتة باقية بحزامها بركبته ماكو رد فعل بس عيون واسعة و دموع تصب وبيده اليمنى  لازم ايده الثانية المتصوبة

 

ثواني مرت وصرخ يدك على راسه بيد وحدة وهو يشوف اهاليته تعدموا دون سبب معقولة اخوه اعتقل لجهة مجهولة.. 

دقايق واني وحسين.. نفتر بين الجثث جان مثل الحمامه التنوح بجنح مكسور يجس نبض هذا و يصيبه يأس يروح للثاني ويصرخ 

ـ يارب راحوا هلي.. 

ايس من عمامه وابوه رجع لابوه حضنه وهو يشم بي 

ـ بوية اكعد بوية ابو حسين اكعد بوية المن بقوني ليش ما چتلوني وياكم اكعدو هلي موش حلوة نومتكم... 

بوية ولك عمي ابو داود عمي ابو  الخ 

ويعدد وهو بيده يوميء مثل طير مذبوح... 

صوت سيارة وراها شحطه بريك وكفت سيارة بيها ابن خالي سوادي و ابن خالي محمد.. 

وهم مصدومين صاح واحد منهم 

ـ ولك حسين.. شنهي هنانه..  

و كلمن ركض لأبوه وهو ما فاهم شنو

لمن رجيوة تدك و تلطم تنعي موتاها وحسن.. الراح.. 

اويلي بوية.. 

 

كام ابن خالي محمد لزم حسين.. وهز ايده الي نترها من ايد محمد بساع وجعته

ـ حسين.. ولك حسين.. شنهو صاير كافي تثغب ثغب الحريم تحجى منهو كتل ازلامنا تفرهدنا.... 

ـ  الحكومه صفت اهلنا يخوي وخذوا حسن.. اعتقلوه

ظلوا محتارين بين اليصارخن وبين حسن.. لازم نشوف وين اخذوه  

افترت الدنيا بحياتي وفرتني فد فرة من حلم وردي لكابوس اسود بعد شتريد الدنيا مني 

وكفتني نفس الوكفة ببدلة منفوشة  بس مال اطفال و نظرتي لتابوت ابوي

واليوم نظرتي لحسن.. وعيونا التلاكت وراها عصبوهن عيونه الحلوات ماعاد اشوفهن منعوني حتى اشبع من نظرته الي.. 

شهكت بأعلى صوتي محسيت بدنيتي الا واني بالمستشفى و المغذي بيدي

يمكن 

امي مبدلتلي ثوب العرس عبالي كابوس وفزيت واني ادور بعيوني عروس اني والعروس شلون تنعاف بليلتها

همست : حسن.. 

بس الواقع حسن.. راح و ريحه الديتول و هوسة العاملات تنظف الردهة مع حركه الاطباء و الممرضات 

ما جان كابوس جان واقع حقيقة حسن.. راح شهكت ابجي بصوت ناصي لأمي وهي بالكاع تنوح

قربت ايدي يم خشمي عطره لسة بصابيعي مدري يتخيلي عطره بعدج سؤدد.. 

ساعات من خذوه و عطره بقى اثر جرح كلما اشمه ينفتك بعدها لزمته ما فاركت خيالي ومن جروه كوة من بين صابيعي حسيت بفراغ..  

لو ادري ما تعلقت بيك حسن.. وينك هسة هم ترجعلي هم بعد اشوفك هواي اسمع الياخذوهم ما يرجعون

ـ يمة.. آخ يمة.. اخذوا حسن.. وراحت خوالي يمة 

شهكت امي وهي تهمس

ـ  يمة صوتج..  

غريب امرنا قبل نخاف من الحيطان لا بيها صدى و تعكس اصواتنا تنسمع و نموت غريب امرنا قبل ينعدم منا زلم واحنا ممنونين..

 وفوكها لازم ما نبين غيضنا ولا غضب ولا رد فعل نخاف لا البقوا هم يلحكون المشوا. .

فوك ظيمنا لازم نبين ولدنا تستاهل الموت و نهوس للريس ونصفك ولدنا خونه ونتبرى منهم.. 

وكفت امي يمي وهي محودبة من دنكت لمحت وجهها كد ما داكه ولاطمته صاير ازرك.. 

ـ خذوا حسن يمة.. 

شهكت و امي ساكته 

ـ ما تهنيت يمة.. يمة انتظر لهذا اليوم يمة ليش ما تمت فرحتي يمة ليش سوى بينا هيج 

والله يمة هو سواها والله.. اقسم بالله العظيم هو وراها سكت من سالفة الكتاب وضمها النا بفرحتنا يريد يقهرنا 

امي بس مدنكه وساكته شوي دخلت مناوبة ممرضة لزمت ايدي جريتها 

لا هنا اثر صابيعه هنا اثر عطره ما اعرف عقلي مخدر شنو بلا وعي  أحجي يطلع للوعي ظليت اضرب بوجهي وبعيوني منهارة 

ـ عمت عيوني عليك حسن.. عمت عيني عليك ولا شفت راحة بحياتك حتى الفرحه حرمونا منها شلون يعاملوك دفرات 

صعدوك عيونك اخر نظرة الي شكالتلي هاي هي يالحبيبة رحلتي وداع يبووووي سودة بوجهج سؤدد

ظليت ادك والطم.. 

ـ عمت عيني عليك شلون تباوعلي مضيع نفسك يا بعد كَلبي كبل لا يشدون عصابة على عيونك..  

كامت امي تريد تحدد ايدي 

ـ عيونج كافي دك على روحج كافي ولج يمه

وشهكت تبجي.  

ـ ولج سؤدد.. يمه ما بيه والله الجرى كافي موش انت هم تزودينها علي

ـ يمة خوالي راحوا يمة بعد منو النا منو يجي يشوف شمحتاجين.   

رديت نمت مكاني بس اشهك حيل محترك گلبي مستسلمة للممرضة تحقني بالكانولا مسكنات.. 

خليت جفي جوة خدي  وبس اشهك واني حال گلبي يلاجي و ينوح جا هسة اني مرته و بحضنه 

شهكت واني اندعي رب العالمين يطلعه الي مكدرت انام رغم المهدأت الي نطوني ياها.. 

ليل كعدت امي ماكو بس لفه فلافل بعلاكه وعصير اباوعلهن حسن.. يحب اللفات يحب الفلافل..

 ما اكدر ابلع اللكمه اغص بيها رجعت اللفه بالعلاكه حسن.. جوعان ما ينطوه اكل شلون اكل واستلذ بلكمتي. 

تركت العصير وأخذت الماي اشرب و اكول هم رويحتي عطشان  ريجه يابس 

وظليت على هذا الحال لمن باوعت لساعة ايدي ب 8 ليل دخلت امي و بيبي حتى حق النوح والبجي مسلوباته اعرف يخافن بنظر الحكومه صرنا عائلة خونه... 

ـ حبوبة لحكي علي حبوبة حسن.. راح  

دنكت علي تحضني وهي تشمني وتنوح بصوت هامس.. 

كوة تمشي و تنهت و ترجف ولدها كلهم راحوا و حسن.. منعرف مصيره بس اجتني تسحل بروحها مبينه صار بعقلها حتى ما جاوبتني ظالة بس تنوح وبس تردد اسامي ولدها وحسن.. 

ـ يمة المن جبتيها 

ـ رجيوة و نسوان خوالج راحن هن والجنايز للسلف اخذوهن رافد و رائد ولد خالج سوادي ومحمد وابن خالج رحيم حسين ما قبل يروح ودع ابوه هنا وبقى يطارد بين دوائر الامن على مود حسن.. وكال ما ارجع لو ابات  مكابل الدائرة بلكت اعرف عن اخبار حسن.. وين خذوه وشنهي تهمته

والله ما خلا مكان وباس قنادرهم حشاج محد ينطيه خبر.... 

سكتت تجر نفس وعينها على امها حبوبتي حيل مكسورة سودة بوجهي..

امي : عدمن اخليها نساوين اخواني موش بحال بيبيتج و اخافن عليها والبيت فارغ منهو يبقى يمها

ـ لو مأمنتها عند الجيران

نزلت دموع امي و كالت 

ـ يا جيران يمة كلمن يكول يا روح ما بعدج روح وحقها الوادم تخاف.. 

 

ما جاوبت ياريت امي تركت هاي المحافظه من استشهد ابوي وردت لديارها و ردت لأهلها يمكن ما صار الصار..

من جبت سيرة ابوي ردت الغصة الرافقتني من طفولتي وكفتي ذيج بالشارع كدام سيارة وتابوت ابوي الملفوف بالعلم العراقي. 

صدى صوت ابوي يعاتبني من جديد

سؤدد خليج قوية لا تبجين...  

بس بجيت دوم اكول انفذ وصيه ابوي بس مكدر الدمعه تنزل غصب. 

ثاني يوم سوتلي امي خروجية ورديت بيتنا اول ما وكفت السيارة نزلت واجت عيني على آثار دم خوالي باقي بالشارع ذبيت حسرة ودرت وجهي عيني راحت للجهة الخذوا منها حسن..

لزمتني امي لا اوكع من دخت و دفعت اجرة السايق بيدها الثانيه 

ـ تفضل خوية..  

 دخلنا بيتنا وحشة البيت بكل زاوية من زواياه ابتسامه لحسن.. وكل عتبه بي صوت مشيته...  

باقي كله بذاكرتي محفوظ بنص گلبي غصتي بحسن.. ماتنوصف هنا تخنكني

بلعت الغصة واختنكت خليت ايدي على صدري اريد اجرع الالم بس صعب لزمت بالحيطان و رجلي خذتني لغرفته.. 

بوياااي احس ريحته و نفسه ووجوده هنا انهاريت على ركبي بباب غرفته اباوع لبقاياه كتبه ملابسه سترته المشمورة عالجرباية هنا قررنا نعيش سنين دراستنا قبل لا نتخرج و ننتقل نعيش بديرته. 

امي : اني جبت سترته هنا..

همست : نزعها خلاها على الكرسي فرحان جان تزوجنا ويهمس يغازلني كولش متلهف ننجمع بسكف غرفتنا ويعد الثواني يمه بس خذوه وظل حسرة بنفسي وظليت بنفسه هلحظات الي ما جمعتنا سكف غرفة..

 حضنت السترة و شبكتها  اشم عطره  سلوتي من بعده ااااااااااخ اويلي ربي غصة كتلتني كتل عطره حرماني منه غصتي.. 

امي كعدت مكابلة كتبه تكلب بيهن تبوسهن وتشم بيهن طلعت من كنتور ملابس الجامعه 

ـ خايبة سؤدد.. شحلاتها ريحته بيهن عطره.. 

دكت و لطمت على العزيز ابن اخوها 

وهي تنوح

ـ يمه يالعزيز يمه تعال شوف شجرا ولك راح ابوك وعمامك فرد مرة ولك تعال ليه يحسن.. يعمة.. 

تعال شوف مريتك وجهها فاهي بلياك حسن.. يمه شسويت بينا حسن.. يمه الحك علي ولك يمه تعال ليه

تركتها تعاتب حسن.. و اني تمددت بحضن سترته و غمضت عيوني اشم بقايا عطره

ـ يمه نسى سترته و الجو بعده بيه بروده هسه يستبرد وخاف ما ينطوه غطى.. 

اشوف امي تمددت مهدودة الحيل وحضنتني وثنينا غفينا فزيت على اذان المغرب واني مفزوعه ندهت امي و طفرت 

ـ اجونا الرفاق

ابجي اريد احجي ما اكدر

ـ لا يمة.. 

كعدت وهي تلف شيلتها 

ـ اذن صار غروب نذكر الله هو ارحم بينا كومي صلي يمه وذكري ربج

ذكرت كلام حسن.. عن قاطع الصلاة ومن يومها قررت التزم ردت امي تباوعلي كاتمة بجيتي و اشهك.. 

ـ يمة لطمنا ودرعنا ثيابنا شحصلنا ردوا لا يمه ما يردون كومي صلي واندعيله بلكت الله يفك اسره يلة حبيبة البجي ما يفيد.. 

ـ حلمت بي يمه وفزيت يأذن..  

 

ـ يمة اسم الله عليج و عليه كومي صلي و نعلي الشيطان (لعني) 

اخذت نصيحتها و اني البس محرم.  واصلي اندعيت الله يفك اسر حسن.. ويبرد گلوبنا بلي خسرناهم.. ماظل عدنا كلها راحت من خوالي ما بقالنا بس خالي جلال.. عايش وي امه بغداد 

بقينا ايام يمر حسين..كد الدقايق ويرد يفتر يدور لوين اخذوا حسن ومعاملة شكبرها وماكو نتيجه

حتى امي راحت تتوسل بسهيل..تكوله  مرايدين شي بس نعرف عايش ميت وين مكانه بس تعذر منا وكال ما اعرف والله مو صلاحيتي  

نزلت دموعي وامي تسندني واحنا نرجع بيتنا مهضومين حسين.. ينتظرنا مقبلت امي يروح ويانه عصبي و خافت يجفص وي حزبي و اذا جنا بواحد نصير بأثنين

ـ ها عمة بشري... 

هزت راسها ب لا

ـ مامش عنده خبر عن حسن.. يكول احتمال  ترحل للوحدة الخامسة ما بقوه هنانه

ـ يعني اسأل هناك تزهبن اخذجن لديرتنا اخافن موش امان هنانه عليجن.. 

امي ايدته 

: كم يوم ونرد ما اريدن سؤدد.. تخسر سنة خلي تلتهي تدرس وحسن يريدها تتفوق

سكتت رحنا للديرة كم يوم بس امي ما كدرت تبقى رجعنا وراها ايام و الفجر  اندك الباب

جان حسين.. ايده بعدها  مضمده وضعه تعبان.. 

ـ جبت ريوك بطريجي من الكراج اكيد قاطعات الاكل

لحيته رغم الأيام المرت قليلة بس عبالك شهر ممزين حاجته امي

ـ منهو يشتهي

ـ لازم نأكل ونعيش الله ارحم بينا وبحسن.. 

حجاها ودمعته نزلت مسحها بساع وامي نهرته على لحيته.. 

ـ يمة منطقتنا اغلبها حزبين وانت لحيتك طويلة زينها يمه

هز راسة اي وسكت وهو مجتف ايد بيد ورفع راسة للسكف

ـ حتى قرايب النا حزبي وسطته يشوفون وين خذوا حسن.. و بلكت يسولنا زيارة اله و شنهي تهمته بالضبط تحاكم لو لا شو ما بلغونه

بس الولد خابر امس الي كال محد ينطي معلومات عنه. 

رديت : حسين اخوك  شنو سوى ما مسوي شي ترى ما يضم علي مرة وحدة جاب الكتاب وبعد ما جاب وتركهم هو بحاله وما مسوي شي 

خلا عينه بعيني دنكت و ظل ساكت هو ذب حسرة وهمس

ـ ضحيت اله بكلشي حتى يعيش سعيد بس حتى تضحيتي ما سعدته راح ومندري مصيره 

تذكرت الحلم و ضميته داخلي يكولون نسولف بي يتحقق 

ـ زين امك كالت هناك بديرتنا دزوا عليها وعليك

ـ خذوا اقوالنا ووقعونا براءة ذمة لو يعتقلوني امي جلبت بيه وقع ما اكدر اخسر اثنين

تدرين سؤدد.. شنو حسيت مثل الي يخيرونه بين اولاده يهو يعيش يهو نذبحه انذبحت يا سؤدد.. من جريت حبر القلم ووقعت 

حجاها وشهك يبجي وامي بصوت ناصي و ايدين ترجف لطمت خدها.. 

ـ تبريت من اخوك يبن خيي جا هسه يكتلونه عبن هسة دمه مطلوب مهدور صرت يا حسن.. يمه... 

دنك وهو جتافاته مهدله.. 

ـ اجينا لعرسه كلنا ابوي وعمامي  منخليه يتزوج وحيد وهم من يجي للديرة كال ابوي اذبح فجران دم و اعزم كل اهل السلف.   

الصار لا حسن.. عرس ولا نعرف عايش ميت ولا نطوني مكانه وين خذوه ولا ابوي وعموميتي تسندني كلهم راحوا و تبريت منه حتى احمي شرف خواتي وامي 

هنا حجيت 

ـ تدري خاف وقعوك هدر دمه يعني تبريت من دمه يعني خاف يقتلوه 

ـ كولي الله ارحم بيه ويطلعه من اسره ويفك اسره مثل ما فك اسر النبي يونس من الحوت اقري ادعية سؤدد.. اقري قران و ادعي الله الواحد الاحد يطلع من شدته

بجيت وتركت حسين.. وانعزلت اندعي ربي بس يمكن الدعاء تأخر الاستجابة 

مرت الايام و اني وحيدة تبرت منا العالم وصرنا بيت عليه علامه❌

حتى امي شغلها انتهى.. 

للأسف محد يطلب تطبخله ولا تخبز 

وظلينا على راتب الشهيد مال ابوي.. 

و نخاف لا يكطعوه..  

و رجعت ادور شغل بس منو يشغل وحدة رجلها يعتبروه خائن دولة عذرت كلمن تركني وحدي اعاني خاصة صاحباتي الناس تخاف.. 

اروح للمدرسة وارجع وحدي 

 مريم.. تتعمد تمشي موازي وياي بس بينا مسافة بعيدة و تحاجيني من بعيد دون ما تلتفت تباوعلي.. 

ـ منعوني عون.. وامي يكولون خاف الحكومه تعتقلنا يخافون عذريهم

ـ محجيت ولا عاتبت لو مكانكم اني اموت لأجلجن ولا اتركجن بس هم عاذرتجن لو اني اسبقج لو انت بعد ما ترهم حتى هاي الحد فاصل الخليتية بينا مااريده انتهت.. 

كلتها وركضت لازمه جنطتي واني اتمنى افتح باب بيتنا يتلكاني حسن.. 

بس ابد...

 مـــــــــــــــــــــريم  

منعتني امي اواصل سؤدد.. سمعت شصاير بيها وآخر شي كالوا راحن لديرة حسن.. 

حتى ماجدة.. كالت كل فكرها بسؤدد.. لا بس ما تكدر تواصلها تخاف من امها ورجل امها 

باوعت للساعة اليوم عون.. ولا طلع اريد اخابر نصير.. ظليت افتر بالبيت 

و اشتغل ورى شوي صاحني 

رحتله : ها خوية 

رفع عيونه الي و باوعلي بنظرة 

ـ اخوج؟ 

سكتت هز ايده و طلع من جيبة مصرف تعود ينطيني ياه وبدل ما يخليه بيدي مثل كل مرة خلاه عالطاولة 

ـ تفضلي اختي مصرفج

تعمد يركز بكلمة اختي وهز ايده و طلع صفنت بالفلوس نصير.. ما يقبل  عون.. يصرف علي هسة شلون ارجعهن هسة نصير.. شمدريه دخل اخذهن يفيدني.. 

ـ شكراً خوية.. 

دار وهو حيل ضايج 

ـ اني مو اخوج اني زوج المستقبل 

سكتت مكدر احجي جدو وعمي حيل نبهوا علي رجع يلح 

ـ اكلج اختي بلة فهميني النبرة الجديدة هاي اني من يمتى اخوج من كرصت بيج ذاك اليوم مثلاً بحضني لو بوساتي والله انت تغنين موال جديد.

نصيحة لوجه الله مريم.. لتمشين ورى الفلوس.. ترى تتندمين باجر الحياة مو بس فلوس 

واني صح فقير و على كد الحال بس احبج يعني اعيشج ملكة الغبية الي تتزوج زواج مصلحة عبالج ما يعرف بيج طمعانه بفلوسة والله ليذلج باجر ذلة وتذكريني وقتها وكولي كال عون..   

جر حسرة وكال 

ـ استهدي بالله و فكري زين 

غيرت الموضوع 

ـ عون.. 

دار بفرح تجاهي 

ـ عيونه.. 

ـ بخصوص سؤدد.. هي شعليها هو خطيبها واخذوه ليش ما تقبلون اروحلهم

ـ السالفه حارة بعدها وهسة تلكين بيتهم مراقب ليش تجيبين الشبهة النا يا بعد روح عون..

حجاها و ابتسم وراح باوعتله طلع بساع اخذت التلفون لغرفتي فريت القرص و گلبي حيل ينبض هذا رقم شغل نصير.. نطاني رقم مكتبه بهيج وقت هو مو بالبيت. 

ـ الو.. هلو نصير.. ضايجه والله تجي نطلع

صوته مبين نعسان

ـ لا اليوم ما اكدر هواي شغل عندي ويا الله اوصل للبيت وانام 

دنكت واني اضغط السماعة على اذني

ـ ها يلة باي

ـ اوكفي هم حجيتي وي عون.. وهم كعدتم وحدكم 

ـ ترى احنا بيت واحد يعني تصدف

فجاة صيح علي 

ـ تصدف شنو ولج ترى اكسر راسج هسة اجيكم من هسة تعلمي ما اقبل تحاجينه لازم جدي يشوف حل ونتزوج بالعطلة يعني امج شتكدر تسوي مرتي انت.. 

حجاها واني ليش عود ما رديته شو انهد بيه حيل ضجت من كمل مني سداه من غير ما يسلم اكيد معصب بس حيل ضجت وانه الي انتظر عون.. يطلع ونتخابر.. 

شوي ورجع عمي نوري وهو دشداشته هدل وزيج مدروع و مبين مكتول 

تلكته امي طبعا تعودنا مكمنا نسأل شبيك ولا نقلق نفس الاسطوانه 

بس كلتلة : ها نوري هم طلايب

ـ هاي بدل ما تتلكيني و تشوفين شبية ما بية بس اني الهم كتلهم الا اكاومكم

متحملت طلعت قهرتي بعمو

ـ ترى حتى عشيرتك ملت منك تورطوا انت ابنهم شنو.. 

هد علي يريد يضربني ركضت واني ادردم

ـ والله حتى جدي كال تعبنا يومية فصول و عرايك عيشتك عالفصول الا ابلغ الفرقة ياخذوك

وسع عيونه من تهديدي و باوع لأمي و دفعها

ـ ولج بتج شو طولان لسانها تهددني 

ما اهتميت امي تعض شفه تريد تسكتني

ـ عمو شعجب ما كسروا ايد الك خوش عاد تفصلهم مبلغ

ـ لا وبعد تفاولني بنت الجايفين

ـ شفاول غير هاي الحقيقة كم مرة تجي مكسر على مود الفصول تعيل بالوادم و من تنكتل تصيح اريد فصل 

صاح بأمي 

ـ سكتيها لا اكص لسانها اني الج شوفي ترجعيها لأهلها ما اريدها بعد ببيتي مليون مرة كتلج ما فاتح ملجأ ايتام من جانت على ايدج طفلة واني منبه عليج شوفي حل كلتي بس تكبر ارجعها لأهلها وهاي كبرت وانت مغلسة..

ظل يلح نصير.. انعزل عن عون.. و كم مرة عارك جدي هي مرتي شكو بعد باقيه عدهم اريد اتزوج اضطر جدي يدز على نوري و طمعه بالفلوس يمنع امي تصرف

وهنا بيوم الجمعه اجة جدي ياخذني

جان عون. كاعد 

ـ شنوو وين تاخذوها بعدها بحضانه امها

ـ شوف بوية انت خوش ولد واحبك بس ما ترهم لبتنا انت تشرب

ـ تاركه من وعدتك ابطل منه وتنطيني مريم.. 

ـ ترجعله مدام توبتك لأجل تاخذ مريم.. مو لأجل ربك يرضى عنك بعدين يا بوية البنية ما ترغبلك

باوعلي عون.. بصدمه و رجع لجدي

اما امي بلسانها ظلت تخرط حتى نست روحها وحجت كردي

ـ بنتي واشتكي عليكم

ـ بعمر مخير نكدر نطلب تختار منو يا ام مريم.. و صراحه اني اريد مصلحة اليتيمه زوجتها لنصير.. 

هنا هبت امي دك تلطم.. 

ـ شنوو مو بكيفكم اشتكي عليكم والله

عون.. وكف كدامي

ـ ابن امه الي ياخذها.. 

على الصايح دخلوا عمامي و نصير.. وولد عمي البقية ينتظرون اشارة من جدي

ـ شوفي ام مريم.. بنتنا وناخذها و هي بذمة رجال خاف المحكمه متقبل اذا اختارت جدها فهسة هي متزوجه و بحكم رجلها.. 

التفت عون.. الي و ضربني راشدي

ـ تعقدين دون علمنا ليش مو اني رايدج تعوفيني واختاريتي فلوسه

واشر على نصير.. الي هد على عون. والله بوكسيات و اشر لاخوانه يحددوا عون.. 

امي جرتني لغرفتي تريد تقفلها علي لا يأخذوني بس نوري جرها و حددها ودفعني

ـ روحي لأهلج.. 

ما حسيت الا جدي سحبني برى بيت.. للسيارة دموعي تصب ياترى سوايتي صح حيل انقهرت ما اعرف ليش امي صوتها وهي تصرخ.. 

اشتكي عليكم اخلي الحزب يشيلوكم.. 

وحجي هواي عون.. ما اعرف شنو حاله من طلعوا ولد عمي وعمامي 

جان نصير.. يمسح دم عن شفته ويدردم

ـ ولا جنه اقصر مني س خوش عفيه بخوي قصي.. برد گلبي من ضربته بالبوري براسه 

خليت ايدي على حلكي 

: عون مات

على حجايتي لزكني نصير.. راشدي

ـ تنجبين لا اطلع قهري كلة بيج شنو بينكم وهيج خايفة عليه 

ـ ربينا سوى مثل اخوي.. 

ـ مرحبا اخوج اشوفه كتل روحه عليج.. 

كعد يمي وصرت بين جدي و نصير ..

و ابن عمي قصي يسوق و بصفه عمي

ورانا سيارة ثانية لعمامي وولدهم 

الطريق كلة احس ما مرتاحه بس لا غلطت شو هذا من عقد علي تعاملة وياي كولش مبالغ

يومية عون.. يجي و ينطرد وسمعت نوري حابس امي لمن يتم الزواج حتى تسكت و تأيس بعد و بيوم اجت امي و عون.. وجايبة الشرطة..  

ـ البنت قاصر وبحضانتي مو كيفكم تزوجوها.. 

جرتني تريد تاخذني وقتها محتارة بين رغبتي بنصير.. وبين امي و نظرة عون.. التعبانه..  

ـ بيش قصرت و هيج تجازيني وين جانوا عمامج من مات ابوج لا جد سأل و لا عم كفل لمن تزوجت ابوي من مالكت الها سند.. 

هنا انتفضت

ـ  وعاد ابوك خوش سند دخليها سكته. 

ـ بس اني صرت سند و كفيل الج اشتغل بيدي ذن و اجيبلج واحرم نفسي اني ذكي شاطر لو ما اترك دروسي واشتغل بكلشي بس حتى حضرتج ما تصيرين اقل من ماجدة.. 

نتيجتها حتى مستقبلي ضاع عود طلعت معهد معلمين كلت يهون اهم شي انت ليش املتيني بيج ورسمتيلي حلم وردي

نصير.. الجان يتفاهم مع الشرطه دار لعون.. و راد يتلازم وياه

ـ كاعد تتغزل و تعاتب مرتي احترم نفسك.. 

بس الشرطة لزمته واخذوه و ابوه و جدي تبعوهم وهم معصبين من امي غير الشتايم..

ركبت بالسيارة يم امي لازم نروح على مود المحضر والبلاغ الي قدمته امي..

بالمركز... 

انسجن نصير..و رجعوني لأمي لأن الها الحضانه رفضت امي تتنازل عن البلاغ

و شرطت على جدي نصير.. يفسخ العقد يا الله تتنازل.. 

طلعنا للبيت جاي اروح لجدي لزمني عون.. و دفعني لأمي 

ـ اخذيها للبيت اخذن تكسي وروحن

ـ شناوي تسوي الولد و بالتوقيف.. 

ـ ما اسوي شي روحن يلة. 

  

واشر لتكسي وحاسبه مقدماً رجعنا للبيت تالي اجه عون.. ونوري عون.. وجهة مورم مبين مضروب ونوري يهادد

ـ انت ما تكعد راحة عبالكم بسوايتكم هاي خلصت الحجي عندة عرف و هسة يطلع ابنه ويبدي الحساب وياك يا عون.. 

انت لعبت بالنار عبالك الحجي يحبك ترى كل قرابته هو عمي يعني اخو جدك.. 

تريده يوكف وياك ينطيك حفيدته ومينطيها لابن عمها الي من لحمتها... 

يفضلك يعني على نصير شو انت**** 

شوف ترد البنت لأهلها ولج ام مريم.. من اول ما تزوجتج شارط البنت لأهلها كلتي اكبرها اردها وهياتها تصخمت وانت مجلبة بيها... 

ما اريد مشاكل وي بيت عمي باجر ينعال علي واحتاج يوكفولي عشائرياً

انتفض عون

ـ انت ما تستحي انت مو اب حاشة الله انت واحد عار ومتحمله لا تخليني عاق وياك بوية كافي تتحارش بالعالم تسوي طلايب حتى تنطك و تاخذ فصل ترى صرت معروف بهاي الشغلة كافي العالم تعيرني بيك 

غم كصته و طلع وهو يصيح

ـ ولكم عيشتيش اهج منكم وحدة رايحة دور بأبن عمها فلوسه تبيع روحها حتى تلبس فستان غالي و تصرف.. 

محبيت كلمة تبيع روحها شنو شايفني

لكيته بالمطبخ يشرب ماي وهو عصبي 

صحت بي

ـ انت الما تستحي احترم نفسك شنو قصدك ابيع روحي عيب عليك انت ورى امي مو؟ امي ما تواجه بكل قوة اذا مو انت وراها..  

ظل ساكت وهو يباوعلي كملت

ـ عون.. خلاص عوفني اشوف حياتي اريد اعيش مثل البنات عوفني عون.. وهم ترتاح من مصاريفي مو قسمتك اني.. 

عيونه لمعت دموع بمواجهتي اله ايده على صدره يفرك بگلبه

ـ دمرتيني.. 

بس هاي همسها وطلع من باب المطبخ للحديقه.. 

مشى بعيد ورى البيت تبعته بسكته

اسمعه يشهك يبجي اول مرة اشوف عون.. هيج وضعه اول مرة اشوفه ضعيف.. 

دنكت و رجعلي شعور ما اعرف شريد نوع من شعور ذنب تجاه عون.. لدرجة مدري شلون طلعت مني حجايتي 

ـ لا تبجي راح اخابر جدو افسخ وازوجك.. 

رفع راسه و ابتسامه حزن..  

(شَايِف مِن يچن كلهن ؟ لا بيك التگوملهن ، ولا بيك التِرتبَهن

حِزنك ، خُوفك ، والضَياع الـ بيك

گلي شلون متحَملهن ؟) 

لسان حال عون 

ـ من اكول طفلة وبعد وقت تتزوج  تحتاج وقت تنضج و تقرر جدج يكول كبرت و البنت للزواج همج اهلج و راح يدمروج جنت اني مستعد انتظرج تتخرجين عقلج يكون تام و قرارج دون ندم بس اخ روحي من يمي اني بوضع ارتكب بيج جريمة شرف..

وسعت عيني ما اعرف شنو يعني يقتلتي غسل عار بس ممسوية عار اني

ـ ليش تقتلني ترى ابن عمي عقد علي مسويت عار والله ما لازمني.  

وسع عينه و رجع غمضهن..  

ـ غبية والا فهمتي شقصد روحي كتلج لا هسة اسحلج بالحرام مرة الي

هم ما ربطت شنو بالحرام وشلون مرة اله

ـ بس عاقدة ما يصير تعقد علي

صاح بيه

ـ روحي من يمي كفيلج الله متحمل عليج لو جدج يفتهم ما يزوجج وانت طفلة اذا نواياي معرفتي قصدي شلون تديري بيت وحياة... 

رحت واني اريد افهم شنو قصده امي ضغطها اخذت علاج و نامت نوري جان يخابر

ـ شوف اذا ما بهذلتك انه الك حضر عمامك بينا عشاير الا اطكك فصل مربع.. 

سد التلفون باوعلي من فوك لجوة بأحتقار

ـ رجعتي الي شيقلعج من بيتي اكرهج  لو وراج فايده جان كلت شوفي ما عليج بعون.. هذا ابني ما يفيدج اخذي نصير.. وخلصينا حتى جية لا تجينا لو عرستي.. 

حجاها وطلع يدردم غميت مكفاه شكد نذل گبر طماع

كعدت بالكلدور و اني اتصل بماجدة.. 

سولفتلها حجي عون.. و اني اسألها 

ـوشو يخربط ما اعرف شيريد وكلما اكولة شي يكولي مفهمتي نواياي. 

ـ اني فهمت قصده اولا يقصد يسجن نصير.. وثانياً تتزوجون انت وعون... و عزموني عالعرس

ـ يا كبر لفج ولج غير اني عاقدة حتى لو انسجن نصير.. الا يفسخ يا الله اكدر اعقد والله عون..صاير ما ينحرز

ـ هو ليش ما تزوجين عون.. ترى يموت عليج ولا عاجبني نصير.. احسة مغرور و متكبر

ـ انجبي لا تغلطين على نصير.. صوجي خابرت لو سؤدد.. اكدر اواصلها جان فهمتني شنو الحزورة الكالها عون.. 

رجفت ايدي ورادت توكع السماعه من رفعت عيني و عون.. واكف صفح منتجي على جانب جتفه الايسر و مكتف ايديه على صدره و بوجهة نظرة حقد و خبث سديت السماعة بساع 

ـ عون.. بيك شي جاي تخوفني.. 

 

اجه صوبي و لزم ايدي وكال 

ـ اموت ولا نصير.. يستولي عليج انت ملكي خليها ترجية بأذانج لو ما الغبي عاقد عليج الي تصرف والله لتعدى بي حدود الاخلاق.. 

ردت اوكع من الرعبة والرجفه اخذتني لدرجة احس نبضي ينسمع لزمني لا اوكع

ـ فسخي لا باجر تندمين انت تحبين عون.. 

رديت انكر

ـ شهلثقه العندك. واذا ما افسخ 

جر حجابي

ـ هذا اول تعدي انتهك حجابج و جربي لا تفسخي وراها انتهكج كولج انت كولج فاهمة لو تستغبين.. 

حسيتة مو طبيعي هذا شبي شناوي.. 

ردت اختنك من كد الخوف 

ـ يماااااااا لحكي علي.....

الفصل الحادي عشر من هنا