رواية وادي الزعيم الفصل الثالث والعشرون 23 بقلم عبير ادريس
غلق الجهاز وساق السيارة بسرعة جنونية تشبثت بمكاني بكل ما اوتيت من قوة ، عبرنا المطبات بدون تخفيف للسرعة ، صرت ماافرق الأصوات اللي طلعت من السيارة لو كسور بعظامي من شدة المطبات...
خيلاء : همام خفف ترة ما يصير هيج اني اخاف
السرعة زادت وبدينا نفوت منعطفات افرع ضيقة وعرة التراب حجب عنا الرؤية ، تجاوزنا الاشارات المرورية خالفنا قوانين الطريق شكلنا خطر مو فقط على حياتنا بل على حياة الآخرين
بيننا وبين الشرطة صارت استراتيجية كل واحد بينا يطمح بالفوز بهاي المطاردة استخدموا ويانا اسلوب الهلع والتهديد محاولين تطويقنا بسياراتهم وارغامنا على الوقوف ، همام كل همه شلون نبتعد ونضيعهم بدأ يستخدم الارصفة والشوارع الجانبية متفادي الشارع العام لأخفاء انفسنا و لغرض تضليلهم والفرار بسرعة ممكنة من قبضة العدالة
خيلاء : همام راح تسبب حوادث تضر حياتنا وحياة الناس حسب حساب ممكن يطلع كدامنا طفل
جنت احجي بطريقة هستيرية خايفة تعبانة اعصابي مشدودة وهو غارق بعالم المطاردة باله بعيد عني واتوقع ما يسمعني
خيلاء : همام دنك راسك راح يرمون همام همام لخاطر الله جاوبني
احجي واهز بيه
اينار : اسكتي كافي لا تربكيني خليني اسوق صوتج بدا يأثر علية
صار طلق على سيارتنا تكسر الجام الخلفي كمت اعيط سحبني من راسي وخلاه بحضنه سد اذني غمضت عيوني وارجف خوف بلعت ريكي ودموعي تنزل ماعندي وسيلة غير الدعاء ، جام السيارة الامامي هم تكسر حسيت الزجاج تجمع فوك وجهي كلت تشوهت عطت بصوت مرعوبة
خيلاء : اخ ، ياالله يارب سترك يارحمن يارحيم ، همام راح نموت بنتي منو ألها تينا بنتي ضاعت
دنك راسه قريب مني وحجى بأذني حتى يصحيني من نوبة الهلع اللي صابتني..
اينار : تأذيتي راح نضيعهم ما ظل شي حبيبتي ما ظل شي صدكيني
حجاها مخبوص ويوخر بالشعر عن وجهي بعدها تركني وطلب مني ارجع لمكاني متظاهر بأبتعادنا عنهم حتى يهدأني لكن حرب المطاردة استمرت ساعات طويلة الى ان عبرنا المحافظة اللي احنا بيها وبديت اقرأ لافتات مكتوب عليها الأنبار صفنت هاي وين احنا شوكت وصلنا لهنا ؟
كسر على منعطف صحراوي فات بيه التفتت باوعت من الجامة الورا ورجعت باوعت لهمام وحجيت
خيلاء : اتوقع ضيعناهم
اينار : ما ضيعناهم هاي المنطقة محظورة ما راح يكدرون يفوتون بيها
خيلاء : ليش ؟
اينار : لأن خلايا داعش بعدها موجودة بيها
خيلاء : بس اللي اعرفه تحررنا منهم
اينار : اعلام بس
خيلاء : وما تخاف جبتنا لهنا ؟
اينار : اهلنا وناسنا هنا يعني ما راح يأذونا
خيلاء : يعني شنو يأذون الجيش بس انت ما يأذوك ؟
اينار : مو هيج القصد انتِ شبيج ؟
خيلاء : غير افتهم تحجي بالأغاز
اينار : اني ابن هاي المحافظة تمام يعني اذا لزموني داعش راح اكول طالع رحلة صيد صخام لطام واطلع منها بس اذا لزموا الجيش ما راح يطلعوهم هاي المناطق بعدها ما منظفيها تماماً
خيلاء : حباب خلينا نروح بوسط المدينة اخاف هنا ابقى خاف صدك يطلعون النا
اينار :بس صبري علية اخذج وحتى اوديج لبيت طفولتي اللي خلصت اجمل ايام بيه واللي امج ونهيل جانوا يتعنون من محافظتكم وعايشين بيه ويبقون يمنا اشهر ويدزولكم راتب ...
قاطعته بحدة..
خيلاء : ليش تحسسني بأهانة من تحجي بماضي اهلي
التفت علية باوعلي وكال
اينار : السوته أمج لو تدرين بيه جان بعمرج ما حطيتي عيونج بعيوني ولا لحظة وتنكسرين ما تبقين هاي خيلاء القوية
خيلاء : اهلي ما استعار منهم مهما بدر و ابقى رافعة راسي بيهم واباوع بعيونك واحجي وياك بنفس طريقة خيلاء القوية..
باوعلي عاكد حاجبه سوه حركة بحلكه مستهزء رجعت باوعت من الجامة تحيطنا الصحراء من كل جانب والدنيا قربت تصير الليل
خيلاء : كمت اخاف خلينا نطلع للمدينة
ماجاوبني رجعت عدت السؤال عليه بعدها كال ...
اينار : ما نكدر اليوم نفوت بداخل المدينة لان اكيد عمموا رقم السيارة واسماءنا للجيش الموجود هنا ننتظر تيام ييجي حتى نترك هاي السيارة ونصعد سيارته وننطلق فهمتي هسه ؟
خيلاء : وهيج مالي ايدك من سمعان ما راح ينطي معلومات عن بيت تيام وتروح الشرطة تلكى تينا وسديل واللعبة تحلو
اينار : كلش هواي خيالج واسع
خيلاء : شنو بعيدة عليهم اصلاً يسوون الاتعس من هيج
اينار : اي صحيح بس منو يسمحلهم لا تخافين سبقناهم بخطوة أمنت على تينا يم امي وقمر وسديل جاية وية تيام
خيلاء : بلكت هاي النهاية ونخلص من القهر ونستقر ما نبقى عايشين بخوف وارجع احضن بنتي وبنهاية اليوم نغمض عيونا براحة..
اينار : نستقر حياتي نستقر بس ينراد صبر
استغربت صار مرتين يكول حياتي ما عرفت اذا قاصدها او هو يحجيها هيج
وصلنا لمكان وكفت السيارة بيه من وحدها
خيلاء : هاي ليش؟
اينار : خلص البانزين
خيلاء : هاي شنو ؟
اينار : اي
خيلاء : وليش يعني ما بيها بانزين ؟ هسه شلون شنو راح نسوي ؟
اينار : هاي السيارة نطلع بيها بس بالمهمات وقبل بيوم نترسها بانزين ونشوف شنو تحتاج من تصليحات بس اليوم هيج صارت طلعتنا بيها فجأة مو زين منها وصلتنا
حجاها ونزل فتح جنطة السيارة الخلفية وطلع منها بساط من الخوص فتحه وفرشه بالكاع والكشن الورا فصخه ما اعرف شلون والتجوة مال الظهر طلعها حطها بالكاع وكال ..
اينار : مددي ناميلج شوية
بقيت اباوع للمكان خايفة خصوصاً من صارت الدنيا ليل وما مبين شي غير ضوء السماء العاكس علينا مبين شوية من ملامحنا ، كعدت وهو بقى واكف يحاول يتصل بتيام ماكو شبكة فصخ الموبايل ورجع ركبه واتصل نفس الشي بعدها طفى خلص شحن باوعلي وكال ..
اينار : كملت السالفة
خيلاء : شنو خلص الشحن ؟
اينار : اي
حجاها وتأفأف صار يسب ويلعن
خيلاء : ماعندك شاحن بالسيارة ؟
اينار : عندي بس شلون اشحن وهي طافية ؟
خيلاء : اي هم صدك
بعدها سكتنا وبقينا ساكتين و شوية نرجع نفكر بخطط بديلة خفنا كلش حتى هو حسيته تضايق وبدأ يحسب لكلشي خصوصاً من صرنا نسمع اصوات سيارات على مقربة منا صار عندي شد عصبي دمي جمد بعروقي كعد على بنيد السيارة استحيت اطلب منه يكعد يمي لأن خايفة وحاسته هو الامان بالفوضى العشتها اليوم ..
سمعت صوت انصتت له وحبست انفاسي حس بية خايفة جان يكول
اينار : لا تخافين هذا صوت ذئب
هو هيج كال لو عبالك الذئب صار بصفي كمزت من مكاني وارتميت بحضنه حضنته بقوة ما حاضنة احد بيها طالبة الأمان الروحي ردت تهويدة نفس
ضمني لصدره وصار يربت على ظهري بأيده صعوداً ونزولاً الى ان هدأت وبديت ارخي عضلات جسمي ردت ابتعد رجع سحبني بقوة اكبر دنك همس بأذني
اينار : اعربي تائه واجيتج بواهس السكران ولكى كاسه انكسر من اعز ناسه اه اه هيج كسرني حبج ورفضج الية ياخيلاء..
بعدت وجهي صارت عيوني بعيونه وبعده حاضني بنفس القوة واللهفة..
خيلاء : ليش تحبني ؟
صفن بوجهي تنهد رفع راسه للسماء ورجع دنك باوع بعيوني وهمس ذايب
اينار : تصدكين اذا كلتلج بيوم الصارت عيونج بعيوني دماغي تحول لضباب انعدمت الرؤيا عندي شكو ضغينة بداخلي اتجاهج واتجاه اهلج تبخرت كرهت نفسي عاندتها عانيت هواي حاربت عقلي كلبي دست عليه بس بالنهاية خسرت ....
بقيت اباوع عليه وساكتة ما كدرت احجي اي استمع بس ، و الغريب كلامه ما اثر بية ولا حرك اي شعور بداخلي كأنما اسمع كلام مهدور لشخص ثاني
اينار : تعرفين اللحظات البسيطة اللي منحتيها الية من حضنتج هسه تسوة عندي سنوات من العلاج يم اشطر الاطباء
بعدت عنه ورجعت لمكاني تربعت وفتحت شعري ورجعت لميته بالقراصة ما اعرف شنو احجي من التوتر الجنت بيه ، كعد كبالي تربع مبتسم بعدها ضحك باوعتله وهمست
خيلاء : شبيك ؟
اينار : تشبهين الخزفية الفخارية هاي اللي تبرد اللبن ويصير طعمه يجنن
خيلاء : غير تشبيه تعبان خو اختصرها وكول وجه الدبة
بقى يضحك بقهقهة اول مرة اشوفه مرتاح ويضحك رغم مطلوبين للعدالة وهربانين بوسط صحراء ما معلوم شوكت ننقتل لو نتأسر لو يفترسنا حيوان
لهنا وتقربت سيارة ما شفنا غير اللايت من بعيد قوي ومسلطيه على عيوننا غطيت عيوني وكمنا وكفنا احتميت بظهر همام خلاني وراه لزم ايدي بقوة مطمني رددت آيات حلكي نشف غمضت عيوني وبديت اتشاهد الى ان وكفت السيارة ونزل واحد منها ما مبين منه شي لايت السيارة حاجب نظرنا عنه بعدها انفتحت الباب الثانية ونزل شخص ثاني ، جانوا مجهولين الملامح
همام عاصر ايدي حتى أأمن اكثر همست بصوت يرجف
خيلاء : راح يقتلونا مو ؟
اينار : لا حياتي صبري شوية هسه يبين منو
لهناك وسمعنا صوت تيام تنفست الصعداء وكعدت بالكاع رجلي ما عادت تحملني وهمام راح يمه يسب ويلعن
تيام : شكو خير ؟ شبيك
اينار : هو اني لو انت حبست انفاسنا
تيام : من شوكت الزعيم يخاف ؟
اينار : موخوف على نفسي خيلاء وياية
تيام : اذا خايف عليها ليش جازفت بيها وببنتها وبية وبسديل وامك وليلى الله يرحمها وصبا كلنا جازفت بحياتنا ما حسبتها صح ولا عندك عقل للأسف حتى تحسب الموضوع بصورة صحيحة
تقرب منه اينار وحجى بنتر مأشر بيده على صدر تيام بضربات خفيفة
اينار : اثنينا نعرف كلش زين ثروان منو ؟ وشنو يكدر يسوي من جرائم
تيام : ما راح يأذي بنته حتى لو يكون بهذا السوء التحجي عنه.
اينار : تيام ما اريد افتح مواضيع واحجي بالعميق البنات هنا بس خلي ببالك بما ان البنات دخلتوهم باللعبة معناها حمايتهم صارت من ضمن مسؤولياتي ومسؤولياتك..
تيام : مو جان كاتلك الانتقام ليش تغيرت ؟ هسه كمت تحجيلي بمسؤولياتي ومسؤولياتك؟
اينار : استجدت اشياء هواي مو ضروري تعرفها
صاح بصوت عالي لدرجة كام يطلع رذاذ من حلكه ..
تيام : بس عادي جداً يا ابن اخوية تهجولني وتبهذلني اني وزوجتي واسماءنا تندرج تحت مسمى المطلوبين للعدالة ؟ عادي عندك مو ؟ طز بينا ما خسران بينا خسارة..
اينار : ها زوجتك من يمي صارت زوجتك وكمت تدور براسي بيت واستقرار دروح بابا دروح..
تيام : شكو سحبت ايدي من الوادي وتركت كلشي ورا ظهري غير قررت اعيش حياة نظيفة يكفي اللي عشته من حزن واللي خسرته مو قليل ، من اريد استقر تجي تخرب استقراري ؟ وتهدمي بيتي ؟
اينار : ما كلتلك ألحكني جان وديت تينا يم امي ونكرت معرفتك بية وكان الله يحب المحسنين
تيام : وبرأيك ثروان من راح يعرف سديل زوجتي يتركنا بحالنا ؟هسه كاعد تحجي عن شيطنته واساليبه القذرة وية الناس
اينار : ماكو شي يثبت سديل زوجتك غير العقد الشرعي تكدر بكل سهولة تتبرأ من الموقف وتكول تشتغل عندك بس للأسف من يمي كل الحيل والاكاذيب تتبخر وتختفي
تيام : ورطتنا بهذا الفعل و انت تطلعنا منه
اينار : خلص اني اتحمل كافة المسؤولية وتبرأتك علية بعد ياعمي وسندي محتاج مني شي ؟
تيام : هسه شنو ناوي تسوي ؟
اينار : اقلع شوكي بأظافري
تيام : باقي هنا لو وين الوجهة ؟
همام بقى ساكت بعدها تيام عاد السؤال عليه بغضب جاوبه بهدوء ..
اينار : باقين بس هاي الليلة علما يهدأ الوضع
تيام : سيارتك بيها بانزين ؟
اينار : لا خلصت
تيام : اكيد أكل ماكو
اينار : لا وصيت سفري هسه راح يجيبولي
تيام : احجي بدون استهزاء
اينار : مو تحجي الاخرس
تيام : رايح اجيب اكل ومي واذا لكيت حطب هم اجيب الجو يذبح برد
اينار : جكاير وياك
تيام : شرب ما تريد ؟
اينار : روح واكفيني شر لسانك
تيام : دير بالك على سديل
اينار : لا تخاف روح سدك أمين
همست سديل مستهزءة
سديل : شكد خايف على سديل كاعد توصي عليها ياحيوان
خيلاء : اش نصي صوتج
سديل : ما انصيه لو تدرين شنو سوة بية وشكد تحملت ضرب واهانات الفترة اللي مضت
خيلاء : شجاه جان حباب
سديل : مامعروف زينهم من شينهم بس الأغلب طابع النذالة مسيطر عليهم
خيلاء : اسكتي هسه بعدين نحجي
راح تيام واينار مدد على الحصيرة حجيت بصوت ناصي
خيلاء : اني بردت كلش عادي نكعد اني وسديل بالسيارة ؟
اينار : اي عادي اخذوا راحتكم واذا تحبين فتحي الكشنات الامامية ومددوا عليهن بينما يجي تيام ونشغل الحطب.
خيلاء : تمام
رحنا للسيارة فتحتها وسويت مثلما وصاني وكعدنا اني وياها التفتت عليها وهمست بصوت ناصي حتى ما يسمعنا
خيلاء : ظل بالي عليج من انسحب منج الموبايل كلت اكيد راح يأذيها
سديل : يأذيني شنو غير زوعني العافية
خيلاء : ياكلب صدك تحجين؟
سديل : الكلب احسن منهم على الاقل وفي وتستفادين منه بالحراسة هذولة ما تعرفين شوكت يغدرون بيج
خيلاء : احجيلي الصار
سديل : سحب الموبايل مني التفتت لكيته خازرني بس رمشت طفت عيوني بعدما شفت شي انهال علية بالضرب حتى كمت ازحف
خيلاء : هذا مريض وحيوان بعيد عن الانسانية
سديل : كل عقلج عندهم انسانية وهذا اينار من كاعد يسوي هيج لو رغبة بيج لو عنده غاية ينتقم بيها من ثروان صدكيني ديري بالج تأمنيله
خيلاء : والحل نبقى هيج خايفين وننتظر شلون تنتهي حياتنا مثل ليلى
سديل : تعبت بعد ما عندي صبر ولا طاقة تحمل ابد
خيلاء : الله كريم لابد تفرج بيوم المهم احجيلي انتِ زينة ما تعانين من شي؟
سديل : شنو الزين بية خيلاء اني جسد بلا روح تحطمت يأست من الحياة كارهة كلشي بيها
خيلاء : حبيبتي شنو نسوي هذا قدرنا ولازم نتحمل وان شاءالله الفرج قريب
سديل : الله يسمع منج
خيلاء : تينايتي شلونها ؟ زينة هم تسأل عني ؟
سديل : اكثر شي تسألني عن ابوها هواي متعلقة بيه لدرجة تبجي مرات من تطلب تشوفه وانطيها موعد مثلاً باجر نروح نشوف بابا او بعده ويجي باجر تسألني وهم اكذب عليها تنهار بالبجي
خيلاء : ما اعرف شنو احجي بنتي هم انظلمت مثل امها وخالاتها
سديل : خالتها اني بس لأن اذا جان قصدج نهيل الله اعلم اذا تتذكرنا او لا نمر على بالها لو ناسيتنا منو يكول انظلمت مثلنا؟
خيلاء : ما نعرف الله يعلم بحالها وان شاءالله تكون احسن حال منا على الاقل وحدة بينا ترتاح
سديل : المهم عوفج منها ليش طلعتوا من الوادي؟
خيلاء : بلغوا ثروان بمكاني وهمام هربني لان اذا انلزمت راح اجرهم واحد واحد وكلها تنداس وانحرم من بنتي طول العمر وتثبت علية تهمة الدعارة
وهاي ثروان يشتريها شراية
سديل : اوف اوف شنو ذنبنا بلة وصلنا لهذا الحال
حجتها ورجعت راسها ليورا غمضت عيونها وبجت بقيت احجي وياها واهدأها
سديل : لو شما تحجين گلبي ما يبرد لو اكو ضوء جان شفتي ملامحي شلون متغيرة واثر الكدمات تارسة وجهي
خيلاء : ياعمري كل من ورا اللي حجيته الية زين صدك سديل خاف انسى اسألج
سديل : شنو كولي ؟
خيلاء : شلون اكتشفتي هاي المعلومات ؟ وشنو عرفتي عن همام كلتي عليه خطير وحذرتيني منه
سديل : من خلال مكالمات وحجي صار بينهم وعتب بعد موت ليلى شلون هسه تعاتبوا وعرفنا معلومة جديدة وهي اثنينهم يعرفون ثروان واحتمال عندهم صلة بيه ومو بعيد يعرفون ثائر هم
خيلاء : شنو سمعتي ؟
سديل : الفترة اللي اجينا بيها اني وياج الوادي جان بدايات تأسيسه والزعيم قبل فترة بسيطة تولى الزعامة و تيام جان مسافر ما يدري من راجع عرف بالموضوع وعلى اساس الزعامة أله لهذا السبب جانوا يختلفون هواي ومشاكل بينهم اما ليش صار تفجير بالصالة فهو انتقام لاخت تيام واللي هي عمته للزعيم
خيلاء : يعني تيام فجر القنبلة بالوادي مستهدف ابن اخوه لأن متأكد هو اللي قتل عمته ؟
سديل : بالضبط بعدما قتل ابوه
خيلاء : وشنو سبب قتله لعمته ؟
سديل : ما اعرف
خيلاء : خاف تصير رجعة وترجعين ونفترق مرة ثانية اتجنبي تيام لحدما نتخلص منهم ونسافر اني وياج لأي محافظة ويضيع خبرنا بس تحملي شوية
سديل : ونعيش باقي عمرنا مشردين ؟
خيلاء : هاي سوالف امج وعمايل ابوج لهنا وصلتنا اخ اخ الحمدلله والشكر
سديل : اني تعبانة اريد انام راسي يوجعني وعيوني هم
خيلاء: ماشي نامي واني يمج حتى اذا نزلت من السيارة راح اكون قريبة منج لا تخافين
سديل : تمام
غمضت عيونها وسرعان ما غفت تنهدت تنهيدة قوية وكتمتها بصدري حتى ما تفز علية ، مرت ساعة وطبكت سيارة تيام ترجلت من السيارة سديت الباب على كيفي ورحت يمهم افرك بيدي من البرد
تيام : بردانة ؟
خيلاء : كلش
حجيتها ونفخت بين كفوفي حركة جنا نسويها من احنا صغار حتى ندفئ
شعلوا النار وبديت اباوع للمساحة اللي ظهرت من اثر ضوءها ، الجو حلو حسيت نفسي برحلة لوما السبب الحقيقي اللي جايين بيه لهنا
تيام : جبت لحم من الكصاب قطعه وشيشه حتى نشوي وناكل لكمة تصبرنا لباجر
اينار : لازم منقلة شلون تشوي هيج؟
تيام : مو طالعين سفرة ، هاي شبيك نشعوطهن بالنار واكلوا اهم شي واحد يسد جوعته
خيلاء : عطشت اكو مي ؟
تيام : بالعلاكة افتحيها جبت بيها هواي اشياء
خيلاء : تمام
توجهت للكيس فتحته طلعت بطل المي لكيته جامد
خيلاء : هذا جامد شلون اشرب منه
التفت عليه باوعلي وكال
تيام : هذا جبته لسديل تخليه على وجهها اخذي غيره
حجاها والتفت نطاني ظهره ردت اضربه براسه بالبطل شلون يحجي ببرود اعصاب ، اخذت البطل شربت مي ورجعت كعدت يمهم تربعت ، تيام يشوي واينار كل شوية يسترق نظرات مني ، بعدها كام من مكانه وكعد بصفي شوية شوية رفع ايده حاوط كتفي بعدها شدني لحضنه واحنا كاعدين ، بعدت ايده وابتعدت عنه مسافة ، باوعلي وبدا يدندن
اينار : جذبته لعناقي فأنثنى خجلاً
وكُللت وجنتاه الحمر بالعرقِ
اوووف اووووف يايابة
وكُللت وجنتاه الحمر بالعرقِ
وقال لي بفتورٍ من لواحظهِ
إن العناقَ حرامُ حرام
إن العناقَ حرامٌ
قلت في عنقي
ياويل ياولاه
آه يبا خيلا خيلا جذبته للعناقِ
انثنى خيلا وتكلل بأحمرار الوجن خيلا بفتور من اللواحظ كال خيلا
العناق حرام كلت الأثم بية
اووف اووف يايابه
تيام : صح لسانك صح لسانك
انبهرت بنبرة صوته شكد حلوة وحنينة وفوكاها اسمي موجود بالموال حيل عجبني وردت اطلب منه يعيده بس ترددت
اينار : تيام
تيام : نعم
اينار : اذا خطفنا دهار شنو نكدر نحصل منه ؟
تيام : اجيت على دهار هذا شيطان ما راح تاخذ منه لا حق ولا باطل انسى
اينار : هو شنو ما اكدر غير عندي اساليب اخليه يكتهن كلهن
تيام : شوف حزب سمعان مشكلين مثل المافيات او هم مافيات تعرف قوانينهم اللي تمشي حتى على سمعان
اينار : اعرف كم شغلة عنهم ما عندي فضول اسمع اكثر بس هسه اريد اسمع لأن عندي تصفية حسابات وياهم وبالاصح اريد اصفيهم
تيام تربع وبيده الشياش يشوي ويحجي بأهتمام
تيام : شوف يابه هذولة من بلشوا يشتغلون بالممنوعات والتزوير وغسيل الاموال وشبكات الدعارة شنو سووا ؟ بلشوا يجيبون ناس ضعفاء يشتغلون وياهم اول شي يختاروهم بأنتقاء مثلاً شخص يعرفوه حق المعرفة محتاج وماعنده عمل وشرط يكون عنده عائلة
هذا يجيبوه ومن اول يوم يشتغل براتب مغري ليش ؟
حتى يضمنون بقاءه اذا مو بالتهديد علمود الراتب هاي اول خطوة الخطوة الثانية شنو يسوون ؟ يبدون يجمعون معلومات على كل نفر من افراد عائلة العاملين والعاملات بعدها يجتمعون بيهم ويسنون قوانين بشكل مُمنهج تلزم جميع الاعضاء بعدم الوشاية بالآخرين مهما يكلف الأمر
خيلاء : شلون يعني ما فهمت ؟
اينار : يقصد اذا واحد منهم دزوه بمهمة ولزمته الشرطة وحجى عنهم وانسجن وبعد فترة وطلع راح يتعرض للتعذيب والقتل هو وعائلته ويصفوهم كدامه واحد واحد جزاء فعله وحتى يكون عبرة للبقية
خيلاء : مثل مرة سمعتكم بالاجتماع تحجون بصيغة مشابهة لهذا الكلام وكلتوا اللي يشتغل وياكم يلتزم بعهد ما يفصح عن عالمكم حتى وان اضطر يدخل السجن ويتحمل تبعات افعالكم ويشيلها كلها وان كلفه الامر الوصول لحبل المشنقة
اينار : صحيح
خيلاء : يعني ماكو فرق بينكم وبين سمعان
اينار : سمعان ينفذ كل اللي يحجيه ويقتل بالفعل الشخص هو وعائلته احنا بس نخليه يشيل القصة وحده وما يحجي شي عنا وبالتالي نعوض اهله معنوياً ومادياً
خيلاء : انتم دمرتوا العراق لعبت نفسي من الاشياء اللي سمعتها شلون عايشين بهيج نفسيات وسخة شلون تنامون الليل وانتم بهاي البشاعة مستحيل تكونون بشر حالكم حالنا
تيام : هاك استلم انفتحت وبعد شيسدها
اينار : المهم عوفك من خيلاء واحجيلي شلون اكدر اوصل لشخص مقرب من سمعان واني افضل دهار
تيام : دهار ما راح تكدر تاخذ منه كلمة وحدة بس اكو طريقة تكدر تلوي ايده بيها
اينار : وهي ؟
تيام : ناخذ ابنه ونخفيه ومن يسوي اللي نريده هذاك الوقت نرجع ابنه وبوسة فوكاه
اينار : ضروري باجر نتحرك بس نأمن البنات
تيام : خيلاء تعمم اسمها على السيطرات بشكل مرعب يعني اذا ما لكوها بعد ساعات راح يلكوها باجر
اينار : بهيج حالة اني راح اتكفل بهاي المهمات وانت عليك حماية البنات
تيام : اهم شي موبايلك يكون مشحون ومفعل GPS ، تدري لوما موبايل خيلاء اللي جانت تحجي بيه وية سديل مفعلتة بيه جان ماكدرت اوصلكم
اينار : واني شلت هم شلون اتواصل وياكم واحنا وحدنا هنا وفوك هذا لا بانزين ولا شحن وماعندي اي معلومة عنكم طلعتوا او لزموكم
تيام : لا طلعنا بس الشبكة تروح وتجي حسب المناطق انشلع گلبي يلا كدرت اوصلكم
خيلاء : انتم حبايب لو اعداء حيرتوا الإسلام مو بس حيرتوني اني..
تيام : شنو يخصج اذا عرفتي احنا اعداء لو حبايب المهم شنو مبين كدامج ؟
خيلاء : ما ادري يوم اعداء وبينكم دم ويوم حبايب واحد يخاف على الثاني
اينار : عمر الأظفر ما يتبرأ من اللحم ومهما صار بيني وبينه من سوء تفاهم يجي يوم ونحله
خيلاء : بس شلون اريد افتهم انتم جنتوا اعداء شوكت تصالحتوا بس هاي اريد اعرفها
اينار : اني جنت مسافر تقريباً اربع سنوات والسبب لأن عمي تيام هدر دمي وما رجعت إلا بكفالات تضمن سلامتي وسلامة عائلتي لأن اكثر من مرة تعرضت لعملية اغتيال ونجيت منها بصعوبة ،
بيوم اللي رجعت بيه ونزلت للصالة دزلي هدية صغيرة انفجرت بالمكان لولا بعض السكيورتي الشطار جان جزء من وجهي راح او ايدي المهم ينبتر مني شي،
بعدها اختفيت وهم عندي كم جروح تعالجت منها ومن رجعت لكيتكم كدامي،
و بالفترة اللي انتم جنتوا بيها احنا ألد الاعداء واحدنا يفكر شلون ينتقم من الثاني الى ان صارت حادثة اخوان سمعان وطلع تيام لاحكني ولوما يحمي ظهري جان اني وانتِ رحنا بيها،
بعدها انقتلت زوجته وكفت وياه رديتله الجميل اللي علية ، الصلح جان بس بيني وبينه وكدام اقرب شخص النا احنا اعداء حتى لا يفكرون شلون يوكعون بيناتنا من جديد هيج هم ضامنين عداوتنا قائمة وهذا كل ما في الأمر يا ست خيلاء ..
خيلاء : تمام فهمت
تيام : كل هذا الحجي اللي حجيته وتالي تجاوبك بتمام وفهمت لو اني منك طلقتين براسها وكلبي ما يبرد
خيلاء : مو تايهتلك اني
تيام : طبعاً تايهتلي وبوسط صحراء ادفنج ومحد يدري
اينار : ورجالها وين راح عنها حتى يسمحلك تسوي بيها هيج ؟
هز راسه ورجع يكمل شوي بعدها طلب مني اجيب كارتونة بسيارته وافرشها حتى نخلي عليها الأكل وهو طلع المشروبات الغازية والخبز وراح لسيارة اينار حتى يكعد سديل،
لأن من سألني عليها كلتله نايمة بالسيارة كال عوفيها وبلش يشوي ، اجتي هي وياه جانت تعبانة من تقربت انصدمت عيونها وحدة منهم ما مبينة من الأزرقاق اللي يحيطها وحتى مورمة ومسدودة اباوعلها وارجع اباوعله بحقد بس ما بيدي شي احجي خاف حجايتي تأثر عليها ويحاسبها بعدين
كعدنا ناكل جانت معاندة تاكل خصوصاً من يقدملها بيده تدفعها وتدير وجهها عنه، ردت اوكلها بيدي بس همام اخذ كم شيش من اللحم وسحبني من ايدي وكال
اينار : كومي نتمشى وخليهم ياخذون راحتهم
خيلاء : يا راحة اللي ياخذوها ماتشوف العداوة البينهم
اينار : اليوم تعاركوا باجر يتصافون معليج بيهم امشي وياية وخليهم يتعاتبون اذا باقي بينهم عتب
خيلاء : ماشي
رحت وراه مشينا ، ابتعدنا عنهم تقريباً عشر امتار مو اكثر وكفنا نباوعلهم من بعيد جان مدنك راسه يمها ويحجي وياها وهي دايرة وجهها عنه الى ان سمعناها تصيح بصوت عالي ردت اروحلهم سحبني همام
خيلاء : كاعد تشوف؟
اينار : اي اتركيهم اذا اشتدت بينهم نتدخل
خيلاء : انتظره يضربها يعني ؟
اينار : لا بس اصبري شوية
اسمعها تكوله بصوت مليان شحرجة وغضب
سديل : هاي آخر مرة اسمحلك تمد ايدك وتضربني بوحشية
تيام : وانتِ شلون تتجرأين و تدخلين بأمور ما تخصج ؟وفوكاها تعلين صوتج سديل تجاوزتي حدودج هواي وصبري نافذ ماعندي صبر خليها ببالج
سديل : لو شما اسوي ما يحقلك هيج تضربني اني مو حيوانة ولا اشتغل خادمة عندك ولا جارية من الجواري بالوادي
تيام : صيري آدمية واحترمي نفسج حتى بعد ما تنضربين
سديل : نقذتني من الوادي ليش مبقيني على ذمتك حررني لا انت طايقني ولا اني طايقة اسمع صوتك
كام من يمها وكف كبالها وحجى مهدد
تيام : للموت ترتبطين ويانا اللي يدخل بينا ما يطلع بسهولة
سديل : اكرهك اموت منك اكرهك
كامت تصرخ بصوت عالي وهو هم بادلها بنفس النبرة العالية حسيت بيه يريد يكسرها هالكد ما عصب ردت اروح وسحبني همام منعني اوصلهم
سديل : الله يموتك ويخلصني منك يا انذل انسان صادفته بحياتي
تيام : صح اني نذل واكبر كلب لو عايفج تفوتين للبنك وبيدج الجنطة جان عفنتي بالسجن سنوات ومحد يدري عنج ، جانت سيادة ناوية تحملج قضايا يابو قضايا بس صوجي اني من ساعدتج وسديت عنج كل الديون رغم رفضت تاخذهم ورادتج انتِ تدفعيهم
مع العلم اني اعرف الفلوس مزورات واكدر اطيح حظها بس ردتها تكُف بلاها عنج وغريتها بالفلوس ، ماسألتي نفسج شلون سيادة فكت ياخة منج وما طالبتج بعد بفلوسها ولا كلفتج بمهام لأن النذل اللي تكرهيه تكفل بكلشي وجان زين وياج، بس من نفسيته تعبت وكل يوم ما ينام اذا ما ياخذ حبوب مهدئة للأعصاب حتى ينسطر ويغفى وتدمره
ثاني يوم صار مو زين وانسان سيء ،
نسيتي من اجيت عقدت عليج وطلعتج من الوادي بوقت جنتوا تعيشون اسوء ايام حياتكم اختج مغتصبيها وانتِ يقامرون بجسمج اني صوجي بنذالتي أمنتج ببيتي وتالي ما تتحملين عصبيتي وتسكتين،
الف كلتلج شغلي معليج بيه حياتي لا تدخلين بيها ولا تحفرين وراية وسري لاتطلعيه مقابل هذا الشي البيت كله الج تسرحين وتمرحين وبنت اختج يمج تلهيج وفوك هذا موفرلج غرفة جديدة وملابس وما ناقصج شي ،
كم مرة طلعتكم انتِ وتينا كم مرة اخذتج اشترينا ملابس واحتياجات الج وألها رغم هذا الشي ممنوع ،واذا جلاب الوادي شموا خبر دمي ينهدر بأعتبارج تعرفين عنهم معلومات اذا انلزمتي كلنا نصير بخطر كل هذا ما حجيتيه لأختج من اتصلت بيج كمتي تفشين اسراري وتحجين على همام رغم هذا الثاني ما يتجازى خسر كلشي علمودكم وبعدين تعرفون اوادمكم زين ....
تركها منهارة ومشى بعيد عنها رحتلها جانت تبجي وتضرب على وجهها اخذتها لحضني امسد على راسها ودمعتي انخبطت وية دموعها جنت منتظرة موقف حتى ابجي بيه وما صدكت سديل بجت حتى ابجي وياها جنت ناقمة الوضع كله بس ما باليد حيلة القاتل هو حامينا يعني اني وسديل بدون تيام وهمام ما نعيش لا قبل هاي اللحظة ولا بعدها لان احنا بوسط بؤرة ما يعلم بيها بس رب العالمين ، تقرب همام وكنبص يمها سحبت نفس وبديت استفسر عن موضوع الجنطة
خيلاء :شنو سالفة الجنطة ؟ والدين وشنو هذا الحجاه تيام ؟ صحيح لو يخربط
اينار : لا صحيح ونقذ سديل من ورطة بس الله يعلم شكم سنة تنحكم واحتمال تروح بيها اعدام
شهكت ولطمت على وجهي مصدومة اتسائل
خيلاء : شنو ليش هاي الجنطة شنو بيها وشنو قصتها ؟
اينار : بوقت اصابتج سيادة استغلت الوضع وضعف سديل حسب ما عرفت بعدين ، قررت تنطي لسديل مبلغ مالي جبير وهذا المبلغ مزور بالاتفاق وية ساهي الذراع الايمن لوساخة سيادة جان دائماً يغطي مكسراتها وهو يتحملها ويكون بوجه المدفع لحد الان ما عرفنا المقابل شنو ؟ فلوس ، يحبها ، لو علاقة سرية بينهم ، المهم اكو مقابل جبير مسكتته بيه وهو راضي ،
من نطتها جنطة الفلوس وياها بطاقة كالتلها تودعين هاي الفلوس بهذا الحساب عن طريق هاي البطاقة ويعتبر هذا شغلكم الجديد انتِ واختج وكلما تشتغلون اكثر كلما زادت فرصتكم حتى تطلعون منا ، وطبعا هاي البطاقة مسجلة بأسم شخص مقتول وسارقين فلوسه والبطاقة
والدولة جانت منتظره اي شخص يستخدم هاي البطاقة حتى يقبضون عليه بالجرم المشهود .
خيلاء : لحظة اريد افتهم لأن عقلي وكف ، المقتول عنده حساب بالبنك وفلوس زين بطاقته ليش عندكم غير عند المفروض عند القاتل ؟
اينار : اي وعمي القاتل يا حياتي
خيلاء : الحجي عواد ؟
اينار : بالضبط عواد هو قتل هذا الشخص لأن قاضي نزيه وعنده ملفات فساد ضد عواد صارت بينهم حرب مهنية نهايتها سلب روحه وكاله بيباي
خيلاء : ورادت تشيل سديل تهمة قتل وتزوير وبلاوي زين منو يصدك غير اكو دليل يثبت ادانة سديل ؟
اينار : مو اكو سلاح بداخل هاي الجنطة وعليه بصمات سديل هسه تكوليلي شلون اكولج اختج تجاوبج شلون جانت توافق تشتغل كلشي ، طالبين منها تروح وتمسح الاسلحة من التراب اللي عليها ومنها بصمات ايدها صارت على كل الاسلحة وبالتالي وضع سديل صار فريسة سهلة لمثل سيادة واشباهها
خيلاء : ولهذا السبب نزلت سديل للصالة وكامت تلعب روليت وانباعت من رحت اني بمكانها ؟
اينار : بالضبط والفضل لتيام جان محاوط سديل وخلصها من كل المطبات اللي ممكن تدخل بيها مستقبلاً لهذا بيوم اللي دزوها جان تيام موجود بالوادي شافها طلعت و وياها ساهي عرف اكو لعبة راقبهم من وصلوا كبال البنك وساهي اختفى عنها حتى يراقب من بعيد تلثم وركض باك الجنطة منها ومنع دخولها للبنك ، ما اريد اكولج احنا زينين بس رغم سوءنا اللي انجبرنا عليه جنا نحميكم ومحاوطيكم بدون ما تدرون
خيلاء : عالمكم غريب وبشع ما اكدر استوعب شلون طلعنا منه بأقل الخسائر بس عندي سؤال ليش تيام جان يساعد سديل
باوع لسديل ورجع باوعلي يعني ما يكدر يحجي انتظرتها تنام خليت راسها على قمصلة همام وكمت اتمشى وياه اريد افهم اكثر
خيلاء : نامت سديل تكدر تحجي
اينار : تيام يحس اتجاهها بالذنب ﻷن اخوه الجبير اعتدى عليها مرتين لهذا حب يساعدها وبس
خيلاء : يعني ما يحبها ؟
اينار : صعب ينخلق حب بوسط هيج جو وبهاي البيئة التعبانة تصدكين يا خيلاء لوما قبل عندي مشاعر الج جان ماكدرت اتقبلج ولا احبج بنفس محبتي هسه لأن حالج حال البنات الموجودات شكم وحدة عقدت عليها لا حبيتها ولا دنت نفسي عليها
خيلاء : وسكرة ؟ وفلانة وفلانة وكمت اعدد له اسماء
اكتفى يباوعلي تركني ورجع يم النار مدد وغمض عيونه
مشت الساعات وبدأت بوادر الفجر تلوح بالسماء ،همام راح لسيارة تيام وبدأوا يتناقشون بينهم على خطة معينة وما خلونا نسمع اي شي بعدها همام صعد بسيارته واني وسديل صعدنا بسيارة تيام حتى ياخذنا لبيتهم القديم حسب ماعرفت فارغ ومابيه احد
انطلق همام بسيارة تيام واحنا بسيارته بعدما عبيناها بانزين من اللي جابه تيام الليلة المضت ،
خطة اينار كالآتي يروح ياخذ ابن دهار من المدرسة وهاي اسهل ماعنده واكبر دليل خطف بنت الرائد ثروان على كولة سمعان (العقيد ثروان ) ما اعرف شلون سواه عقيد بيوم وليلة
راح للمدرسة انتظر طلعة الطلاب ومن صعد ابن دهار للخط همام شهر سلاحه واخذ الولد وطلع بيه متوجه لواحد من رجالهم اللي يثق بيهم ثقة عمياء أمن الولد هناك واخذ موبايل بيه شريحة ما مسجلة واتصل على دهار
اينار : شلونك دهار
دهار : ياهله بالمهزوم هاي وينك يابة عفت الجمل بما حمل
اينار : الهزيمة ثلثين المراجل المهم مو هذا موضوعنا اريد اكولك على الوليد يمي بالحفظ والصون وحلو وحباب وكتكوت اذا تحب تشوفه مرة ثانية ويكبر كدام عيونك نفذ اللي اريده بالحرف الواحد لا والله عكست وياية وسويت اي حركة غلط انساه صح ما اقتله وانت تدري بية ما اقتل نفس بريئة وبدون حق بس بحياتك ما راح تشوفه مرة ثانية اسفره لدولة تتمناه ميت وتزور قبره ولا مخليني اسوي هيج
دهار : ابني شنو يخصه بهاي المواضيع اينار هاي مو من شيم الرجال
اينار : ولا من شيم الرجال تروح تبلغ على امرأة ضعيفة لاحول ولا قوة وتحرم بنتها منها
دهار : تعرف اني ما اسوي شي اذا ما متلقي أوامر
اينار : وهسه اني هم كاعد انطيك أوامر مقابل عزيز كلبك ،هسه منو راح يفيدك سمعان ؟ اعتبر ورقته منتهية اذا انت ما ساعدتني راح الكى عشرة مثل دهار واشتريهم بالفلوس ويتصفى سمعان وحشده خلال ايام ليش تخسر ابنك ﻷجل حرب خسرانة
دهار : شنو المطلوب مني ؟
اينار : عفية هسه الكلام صار حلو وبيه معنى
حجاها ولف ساق على الساق سحب نفس من الجروت ونفخه بالهوا
اينار : شوف اريد كل شاردة و واردة تخص سمعان
دهار : ماعندي اي معلومات صدكني هو كلشي يسوي يخفيه بعدين
اينار : اي وين يخفيه غير افتهم
دهار : مثل شنو تريد ؟
اينار : المستندات ، اوراق الصفقات من تجارة الاعضاء الى شراء اسهم مزورة والبورصة والتزوير وشبكة الدعارة وآخرها غسيل الاموال
دهار : كل عقلك تكدر تحصل كل ذني من خلالي شلون اوصلك ألهن محد يعرف بأماكنهن غير سمعان واخوانه اللي توفوا غيرهم محد يعرف
اينار : اتحرى عن الموضوع عندك اربعة وعشرين ساعة بعدها ابنك يصعد الباخرة
دهار : انطيني وقت اكثر ما الحك بهذا الوقت
اينار : ٢٤ ساعة غيرها ماكو واني اتصل عليك من رقم ثاني انتظرني زين دهوري
غلق الاتصال وطلع الشريحة كسرها وضم الموبايل ، انتظر ال ٢٤ ساعة واتصل على دهار نطاه مكان كل طلب طلبه واغلبهن جانن بالخزنة الكبيرة بالوادي ، هنا همام صعبت عليه المهمة، الخزنة مو بسهولة يوصلها وحتى اذا وصل وتخلص من الكم الهائل من الحرس راح يصطدم بالمفتاح السري مال الخزنة وبهيج ينقتل وما يحصل شي بس بعناده وراسه اليابس قرر يجازف ويدخل الوادي ..
لبس الجنطة على ظهره والكفوف الجلد نزل اللثام على وجهه برزت عيونه فقط ، اخذ سلاح شخصي بكفه ولبس حزام ثبت بيه اكثر من مسدس والمخازن بالجنطة ، وصل للوادي بالضبط بظهر البناية القديمة اللي فجرها سمعان شبه انهجرت لأن من ماتوا البنات محد أله نفس يكعد بيها رغم رمموها وكعدوا بيها بالبداية بس وراها بفترة بسيطة انتركت
عطل الكاميرات لأن جان يندل اماكنهن وحدة وحدة وبدأ يعطل الاقرب عليه وبعدين اتجه للبعيدات وتسهلت عليه مهمتهن لان جان يشرف بنفسه على موضوعهن اكثر شخص مهتم بأن يكونن شغالات بصورة صحيحة واهم شي يسجلن اول بأول وبتواريخ مضبوطة ،
بعدما عطلهن تسلق الجدار وصل لسطح البناية عبر عليه نفض ايده ومشى سمع اصوات البنات وحجيهم وهوستهم عرف الوادي رجع يشتغل والحكومة ما لكت شي
تسلل بخفة حاول يكسر جام الشباك بس صوت البنات قريب راح يسمعون اتجه للباب وطلع ألة حادة خاصة بفتح هيج نوعيات من الابواب فتحها ودخل مشى بتأني بالممر وبدأ ينزل الدرجات وحدة وحدة بهدوء حتى ما يطلع صوت ،
انتظر البنات ينزلون وعبر من غرفتهم للغرفة الثانية ومنها لغرفة سيادة دخل حتى يدور على نسخة من المفاتيح الخاصة بالخزنة متأمل سمعان يثق بيها لدرجة يأمنها على اسرار خزنته وبلش يدور اولها بالكنتور وبعدها بالمجرات انتهاءاً بمخزن السرير ما لكى شي للأسف بس اخذ كم دليل يدين سيادة وضمه بالجنطة ،
طلع من الغرفة وفات بالممر المؤدي لغرفة نوم سمعان هناك الخزنة وكلشي يريده ، بالاصل جانت غرفة الحجي بعدين تنازل عنها لسمعان وحاشيته ماخذين الجناح كله ألهم ،
اول واحد صادفه لف الحبل على رقبته خنكه وكع على الأرض بس اتوقع ما مات بس فقد ، واجه شخص ثاني تلاكموا بينهم لحدما وكع مغمي عليه ،
ربط الكاتم بمسدسه وصار يقتل واحد تلو الآخر الى ان وصل غرفة سمعان ، الوقت اللي دخل بيه جانت اكو حفلة بالصالة وعنده بس ثلاث ساعات ،ساعة ونصف راحت بقت بكدها،
جانت الغرفة ظلمة حرص ما يشغل غير ضوء اللايت اللي بحوزته بلش يدور على مفتاح الخزنة الاغراض اللي ما تفيده يشمرها على الارض للسرعة الى ان توصل للمفتاح بعد جهد طال الساعة والنصف الاضافية،
من فتح الخزنة اخذ كلشي بيها من اوراق ومستندات واختام وحتى مبالغ مالية وطلع،
بطلعته للأسف شافه احد رجال سمعان المخلصين ، بلغ الكل بوجود الزعيم وطلب يحاوطون الوادي بس لأن بعدهم جدد واينار أقدم وأعرف بدواخل هذا المكان عرف شلون يقفل الباب ويطلع من الباب السري الموجود بغرفة الحجي عواد السابقة،
من طلع سيارته جانت بعيدة صار يركض بكل ما عنده من سرعة من وصل للسيارة جان منتشر الخبر وحاوطوا كل مداخل ومخارج الوادي للأسف تحاوط الزعيم اشتغل الرمي بينه وبينهم الى ان انصاب بمكان منعه يسوق السيارة او يقاومهم....