رواية العروس في الثوب الاسود الفصل السادس عشر 16 بقلم عبير ادريس
جان يشرب بطريقة جنونية
بطريقة الخسران كلشي
التاركته حبيبته
الفاقد اهل
عزوة
ظليت اباوع عليه من باب فضول اقرأ شخصيته شديد قوي وضعيف ضايع شنو هذا التناقض ما اعرف ، دخلت وسديت باب البالكون وعقلي بيومها شارد بوضعية مروان وضياعه بعدها نفضت الافكار من راسي ورجعت لوضعي الطبيعي ...
مرت ثلاثة اسابيع واحنا عازلين، ايهم مقاطع الكل ما يحجي وياهم ابد حتى السلام تقريباً انقطع ، تعلمنا على هاي الراحة وجنا نتمنى نبقى هيج بس يعوفونا اكيد لا؟
بيوم الصبح جنا بالمطبخ نسوي ريوك اني ونورة نسولف ونضحك على بعض المواقف..
رسيل: نورة بشرفج حمصي الطماطة
مد راسه ايهم من باب المطبخ وصاح
ايهم: لاجعة لاجعة ام أيه
نور: تدللوا يمعودين هسه احركها الكم ..
رسيل: لا مو هيج عاد
نور: البيض تاكلوه عيون لو طرك ؟
رسيل: لا تسوين بيض راح اطلع اجبان
جنت فاتحة باب الثلاجة واصيح بصوت شبه عالي ..
رسيل : ايهم تاكل بيض لو بس جبن ؟
اجاني صوتها القبيح وكفت وسديت باب الثلاجة التفتت على نور أأشر بعيوني يعني شجابها هاي؟
شيماء: اخاف صدكتي روحج ام بيت وكاعد تدارين ابني، والله خوش كوااا.....علني صايرة
رسيل : ليش شمسوية ؟
شيماء : لا يابوه شمسوية ؟ بس كاعدة بشقة اعزب ومتختخة عبالج اعوفه الج ويصفالج الجو؟ لا حبيبتي لا تحلمين
رجعت ألتفتت على نور ونطتها نصيبها
شيماء : لج انتِ شكد قليلة اصل ومايغزر بيج الزاد ؟ ولج عايشة ويانا سنين تاكلين وتشربين وتنامين كله بخيرنا وتالي ما تالي تعضين ايدينا وتروحين ويه حزب بنت سوسن ، ما كلتي هذا رجلي تعبان اروحن يمه ، بنتي ، مارف گلبج عليها ؟
اني ونور ساكتين يعني بس اجتي كلبت مزاجنا من البرتقالي للأسود.
فات ايهم ما اعرف وين جان شايل بيده علاليك ما يدري امه هنا فوك.
صاح
ايهم: جبتلكم شلون كاهي وكيمر ،اويلي يابه طيرت نصف الكاهي بالطريق .
شاف امه انقلبت خلقته نتر
ايهم: خير؟
شيماء: اكو واحد هيج يحجي وي امه اللي صارله ثلاث اسابيع ما مباوع بوجهها ؟ ما شايفها شلونها ما لونها هيج قلبك كاصي علية وانه ما ادري ؟
فات للمطبخ وحط العلاليك على الميز وبدأ يطلع بالكاهي ويخلي بالمواعين ولا كأنما اكو شخص يحجي وياه
شيماء: اهونن عليك؟ بلة متت من قهري وما صبح علية صبح؟ ما تنقهر وتاكل بنفسك عبن مزعلني؟
ايهم: ماعليج شي لا تخافين ، الظالم سالم
شيماء: لك هاي ويه منو هيج تحجي ؟ وصلت بيك المواصيل تهين امك كدام الكح......!!!
ايهم: من أيدج كل اللي صار والجاي يصير من أيدج، كلشي اللي نشوفه بحياتنا من تدبير البشر، واللي صارلج تدبير ايدج
شيماء: انه ندمانة وجيت استسمحك
ايهم: مو مني اعتذري من الغلطتي بحقها
شيماء: انه اعتذر من هاي ؟؟
حجتها واشرت علية بطريقة حقيرة كلش..
ايهم: وشبيها هاي؟ مو بشر مو حالها من حالج مثلما خططتي وردتي تضيعينها بشربة مي، اعتذري منها لو الكيد سهل والاعتذار صعب يلا هو الاعتذار من شيم الكرام، وانتِ بعيدة كل البعد عن الكرم
شيماء: انه بخيلة قصدك؟ جا هسه منو ياكل بخيري ونايم ببيتي ؟
ايهم: الكرم مو بالاكل والشرب ،الكرم، اكرام الضيف العفو عند الخطأ الاحسان للمقابل ، كله هذا كرم و للأسف انتِ ماعندج ولا يمكن سامعه عنه
رزلها بنزاكة مثل ما يكولون ، من فشلتها طلعت تركض التفت علينا ونتر
ايهم: وين الجاي؟ اصب انه ! كل السفرة حضرتها هاي مسويات فد الطماطة ..
رسيل: ليش عصبي ؟ هسه اني اصب
ايهم: ما اريد
نتر بية وطلع ركع باب الشقة بقوة وراح ما رجع غير ساعة وحدة بالليل جنا نايمين اني ونور وهو فات سمعت باب الشقة انقفلت ، ردت اكوم اروح علية بس كلت احتمال بعده ضايج خليه وحده يفكر افضل بعدها سمعت صوت الدوش فات يسبح بس شلون ملابسه هنا، كمت طلعت تراكسود وملابس داخلية وخليتهم على القنفة بالهول وفتت مددت
ورا نصف ساعة انفتحت باب الغرفة همس
ايهم: رسيل كاعدة ؟
رسيل: اي
ايهم: اكو اكل لو انام ؟
رسيل: لحظة اجيتك
كمت طلعت شفته كاعد على القنفة يدخن ، تقربت كعدت يمه..
رسيل: اول مرة اشوفك تدخن؟
ايهم: من اضوج اشربلي كم وحدة
رسيل: ليش ضايج احجيلي اذا تحب يعني
جر نفس صدره ارتفع وهبط
ايهم: عبالج هينة علية امي تجي لهنا واصدها تشوفيني اضحك فد بداخلي اتكطع اريد اروح احضنها وابوس راسها ،فد من اتذكر سوالفها اضوج حيل منها واشمئز من تصرفاتها ليش هيج تسوي مرات اكول معقولة هاي امي زين ليش وين تريد توصل تعبت يارسيل حيل تعبت ..
رسيل: حقك امك بعد الله يصفي قلوبكم ويهدي سركم، اروح اسويلك اكل
ايهم: باعي اي شي موجود جيبي لا تعبين نفسج
رسيل: ماشي
كمت سويو كباب جان باقي عجين من العشاء وطلعت زلاطة وطرشي وسويت لفتين وطلعت قوطية بيبسي
ايهم: رسيل جاي فدوة راسي راح ينفجر .
رسيل: اي هسه اسوي بينما تخلص عشاك
سويت الجاي خليته على نار هادئة خليت الاكل كدامه كعد ياكل، من كمل شلتهن اوديهن للمطبخ كال...
ايهم: رسيل بدربج بطانية وطفيلي الضوء راسي يريد ينفجر
رسيل: اي صار بس اشرب جاي اول واخذ كبسول وراها نام..
ايهم : اي من رحت فدوة لايدج
ابتسمت ورحت صبيتله الجاي خليته بالصينية وخليت شريط الكبوسل وكلاص مي خليتهم كباله وفتت للغرفة جبتله بطانية جان متمدد وايده على عيونه ...
رسيل : اشرب جايك راح يبرد
ايهم : اي عاشت ايدج
كعدت يمه جان يشرب جاي وشارد صفنة توديه والثانية ترجعه خلص ورجع مدد لزم راسه وغطى عيونه
غطيته وهمست
رسيل: ايهم
ايهم : همممم
رسيل : جان اول ما وجعك راسك ماخذ براسيتول ليش تبقى تتحمل اذية
ايهم: ماخذ من العصر لحد الان نصف شريط عبالك شارب جص ولا يأثر.
رسيل: فعلاً العلاج صاير ما يأثر الله يساعدك محتاج مني شي لو افوت انام ؟
ايهم: سلامتج
رسيل: تصبح على خير
ايهم: هله يابه.
ضليت مخنوكة لان ضايج وتعبان حسيته هذا الشي كله بسببي وهو فعلا. بسببي مو مجرد احساس، حاولت انام ما كدرت بس اتكلب واستغفر ربي وين يلا كدرت اغفى فزبت الصبح على صوت نور تتقيء ، تخبلت ركضت عليها للحمام سادة الباب ، دكيته وصحت
رسيل: نورة حبيبتي شبيج ؟
ما تجاوبني وحسيت حالتها سيئة شنو اسوي هسه اني؟ رحت على ايهم طالع شعجب اليوم من وكت استغربت ركضت على شقة ياسر جانت الساعة سته دكيت الباب حيل اجاني صوته، جيت جيت طلع فاتح نصف عين باوعلي وكال
ياسر: خير خوماكو شي ؟
رسيل: نور عفية
ياسر: شبيها؟
رسيل: بالحمام بس تتقيء وما كاعد تفتحلي الباب
راح كدامي لشقة ايهم رحت وراه جانت نور توها طالعة من الحمام وكاعدة بالكاع ، بيديها خاولي وجهها احمر كلش خفت عليها دنك ياسر وحجى وياها
ياسر: شبيج ؟
نور: ما ادري صارلي يومين معدتي تموتني
ياسر: سلامتج جهزي نفسج العصر نروح للدكتورة
نور: ماشي
اخذها وراحوا لشقتهم
ضليت وحدي بالشقة افتر ، صار الظهر وايهم ماكو ما بين ، تعلمت اشوفه اسمع صوته ، زين شنو هاي الاحاسيس العندي، معقولة ؟ لا لا لا رسيل تخبلتي شنو نسيتي حسام شنو سوة علمودج ! زين وايهم؟ اذا رجعت لبيت خالو اتحمل ما اشوفه ما احجي وياه مرة ثانية ؟
ياربي شسوي راسي يريد ينفجر من التفكير والملامة وعذاب الضمير ..
صار العصر اجتي نور كالت راح اروح للدكتورة وطلعت ، طلعت بالبالكون ، ردت ابجي اختنكت ، شسوي ليش هالكد گلبي مخنوك ، لا مابية شي مجرد اتعودت عليهم اي مو بس هو حتى نور هم تعلمت عليها ، متأكدة رسيل من شعورج، اوووف جريت حسرة حركتني حرك.
مر الوقت بسرعة صار المغرب بردت الدنيا ردت افوت شفت سيارة مروان فاتت للكراج نزل نزلت وياه رغد
فاتوا للبيت ، رجعت دخلت للشقة ، توضيت صليت المغرب وقريت قرآن كملت الختمة الاولى هديتها على روح بابا وكلت باجر ابدي اقرأ لروح ماما
بعدها بلشت احضر بالعشاء وبعدني مخنوكة متتتت شبية شبية ليش هيج متأذية اليوم ؟ شنو كاعد يصيرلي عفت كلشي من ايدي ورحت كعدت بالهول روحي تلوب كمت امشي اروح منا اجي منا سمعت صوت ضحك عرفت رغودة صعدت فوك اللي محيرني شنو مخطوبين ؟ كاطعين مهر ؟ لو شنو سالفتهم ! شعجب نور ما حاجيتلي ، مرت ربع ساعة سمعت صوت هلاهل ، طلعت من الشقة اسمعهم يباركون لياسر، فرحت يمكن نور حامل، بلحظة نسيت المشكلة ونسيت شنو صاير نزلت اركض جوة والكى نور تبجي من الفرحة ركضت عليها حضنتها وبوستها
رسيل: حبيبتي حبيبتي واختي الف الف مبارك عليج كلش فرحتلج ابوس بيها واوخر اباوع لوجهها وارجع احضنها اووووي فدوة، خليت ايدي على بطنها، اريده ولد حتى يحامي لخالته
شيماء: ليش قليل الي يحامون الج حتى منتظرة الزعوط يجي يحاميلج ؟
ألتفتت عليها تذكرت يووو اني شجاني ونزلت ، ياسر راد يكسر التوتر كال بضحكة ..
ياسر: لج عوفي مرتي انه رجلها ومو مثلج بوستها
ابتسمت وانداريت اصعد جان يفوت عمو علي يدفع بجدو على عربانة وراهم بيبي ، بعد ما كدرت اصعد ، رحت سلمت عليهم وبوستهم
الجدة: هله بالهزامة ماتكولين اشوف جدة وين ماوين؟
رسيل: بيبي انتم ماموجودين ببيت عمو جنتوا
الجد: وماعرفتي تكولين لوحد من الولد يجيبج يمنا ؟
رسيل: حقك علية جدو والله
بعدني احجي وية جدو مدنكة عليه لان كاعد بالعربانة
نزل مروان و وراه رغد ....
مروان: هله بجدي هله توها الدار نورت
راح باسه براسه ونزل باس ايده
الجد: منورة بأهلها شلونك هزام
مروان: وين هزام شو بين يوم ويوم انه يمك
الجد: عبن تجي لخطيبتك مو لسواد عيوني ليش من جنت ببيت جابر ما مريتني غير مرة لو مرتين؟
مروان: جدي دومك ظالمني انه اكثر واحد يمرلك ويحبك ويسأل عليك
الجدة: هاي نضل نعاتب مو متنا عطش خلي نبلل ريجنا بميه جم حديثة كاعدة ما عرفتن تجيبن جكة نشرب ماي.
التفتت على نور
رسيل : لج شنو جكه
نور: دولكة لو سراحية ، شتسمونها انتم؟
رسيل: سراحية
رحنا للمطبخ واضحك على سوالف بيبي تخبل والله جابت نور المي واني رحت وراها كعدت
رغد لازكة بمروان وهو حاط ايده وراها حاضنها
الجدة: على خير يسوري يارب الوليد الصالح.
ياسر: شكراً جدة تسلمين
علي: باجر اذبح واعزم الكل هم تهدأ النفوس وهم فرحة بحمل ام أية
الجد: شني جا ( اجه) الوليد وجاي تحتفل بيه؟
علي: يابه انه على الخبر وبنفس الوقت اريد اصالح الكل كافي زعل
بنصف سوالفهم سمعت صوت سيارة دخلت للكراج قلبي كام يدك سريع ما اعرف ليش حسيته هذا ايهم وفعلاً طلع هو
فات صاح
ايهم : السلام عليكم هله جدة
بوسها وراح على جدو هم بوسه ألتفت شافني تفاجئ عكد حاجبه وخزرني
ايهم: انتِ شنزلج ؟
رسيل: موو
عمو قاطعني
علي: شنو تحاسبها واذا نزلت بيت جدها
ايهم: لا ما محاسبها فد انت تعرف ليش ما اريدها تنزل جوا
الجد: ليش شصاير خلافي ( ورايه)
علي: كل خير حجي كل خير
صك اسنانه وحجى
ايهم: تعالي احجي وياج
رسيل: اجيت
طلع للحديقة طلعت وراه جان مندار وخال ايديه بجيوبه
رسيل: وين جنت اليوم؟ ليش ما اجيت على الغداء ؟
ألتفتلي
ايهم: شنزلج وشعندج كاعدة ما تشوفينه كاعد وياهم ؟
رسيل: منو ؟
أيهم: مروان منو يعني
رسيل: شسويله قابل ليوين ابقى محبوسة فوك
ايهم: محبوسة ولا تختلطين بيهم، مو جنا مرتاحين وماكو مشاكل، ليش رجعتي العلاقات؟
رسيل: ايهم ياعلاقات ما تكولي ترى علمود نور نزلت جوة
ايهم : اي عود ما اوصيج ارجعي احجي وياه وسولفي عادي مثلما كسر ايدج وراها رجعتوا تحجون ولا كأنما صاير شي بينكم
رسيل: وين مسولفة وياه ، اصلاً ما ننجمع بمكان واحد وبعدين انت
وين جنت اليوم ضل بالي عليك كلش
ايهم : هسه نصعد واسولفلج
رسيل: ماشي
دخلنا للبيت وبدأت فقرة العشاء وكفنا اني ونور نسوي
نور: والله الزعل حلو جنا مرتاحين
رسيل: ولا يهمج هسه اروح اتعارك وية مروان ويكسرلي ايد رجل ونرجع لشقة ايهم وانتِ ازعلي وتعالي داريني
ضحكت وكالت
نور: تعلمتي على التكسير صارت عندج زلاطة
رسيل: شعبالج بابا اني أمرأة من حديد
ايهم: وياهو الحابس روحه صارله ثلاث اسابيع ويداري بيج ام الحديد
ألتفتنا عليه اني ونور وضحكنا
نور: اي والله ما حجيت الا الحق تتكسر وتعالوا داروني وحيروا بية
رسيل: زعلت عليكم فوك ما رايدتلكم الراحة والخير
ايهم: يا راحة هاي وانه شغلي كله تكوم فوك راسي
رسيل: كلتلك لاتشتغل وبعدين مو تطلع وترجع قابل ما كابلني وكاعد؟
ايهم: لا يابو المعرض مال اثاث فرغ وانه ما رايح اجيب بضاعة جديدة وكم سفرة انلغت من وراج ست
نور: تتعوض خوية تتعوض
ايهم: هو انه باجر مسافر
جنت اسوي بالزلاطة وباوعتله بقهر
رسيل: وين ؟
ايهم: لتركيا
رسيل: تتأخر ؟
ايهم: حسبه سبوعين هيج احتمال اكثر
طفرت الدمعة بعيوني يعني راح يروح واضل وحدي منو يدافعلي بعد ؟
ايهم: شبيج انكلبت خلقتج؟ تجين وياي فد جوازج شلون !!
بهاي الحجاية دخل مروان كال
مروان: حلو صرنا اتراك نسافر بلا زواج وكلش عادي
حجاها وضحك
ايهم:وانت عليش مغثوث
مروان: ما مغثوث ، انت ما ملاحظ نفسك زودتها بالفترة الاخيرة ؟
ايهم: شلون زودتها فهمني بله !
كتف ايده خازر مروان
اللي يكتلني بهيج نقاشات مروان ابرد من الثلج عنده قابلية يحرك المقابيل حرك وهو عادي كأنما يسولف سالفة عادية
مروان: يعني سوالفك كلها عوجة وما تعجب
ايهم: ياسالفة بيهن العوجة نبهني اخاف نايم وما ادري كعدني انت
مروان: ما حاجه انبهك انت جبير وتعرف معنى بنيو تضل بشقتك كل هاي المدة وانت معادي الكل علمودها حتى امك وابوك
ايهم: اول شي ما بقت وحدها يمها نور والشغلة الثانية والاهم انه قاطعتكم لان باطلين
مروان: هم ما ينطيك الحق تبيت بنية صغيرة يمك وتعرف انت الشيطان وسوالفه
كمز ايهم على مروان راد يضربة صارت رغد بوسطهم..
رغد: استهدوا بالرحمن صدك جذب انتم الروح بالروح هيج يصير بينكم تنسوون عشرتكم وخوتكم علمود ناس ماتسوى ؟
خزرها ايهم..
ايهم: ثمني كلامج رسيل تسواج وتسوة الاكبر منج هم
مروان: لا يا ادبسز
ايهم: لا تتجاوز فهمت يلا رسيل امشي نصعد
اسمعه يكول اخذها اخذها اشبع بيها..
صعدنت فوك ايهم عصبي صاير نار
رسيل: ليش ترادده عوفه هو يريد يسوي مشكلة
اشرلي بيده بمعنى اسكتي ، فات للشقة فتت وراه
ايهم: رايح اسبح
رسيل: تمام
فات سبح ورا نصف ساعة طلع اجى كعد يمي
ايهم: انه باجر مسافر واتأخر احتمال شهر اقل اكثر ما اعرف اللي اريده منج شغلة وحدة بس ماتختلطين باي احد وما تنزلين والباب تنقفل عليج ، وفد نور تفوتلج لان راح يستغلون عدم وجودي ويأذونج بأي طريقة وصدكي لو بيدي فلا اروح فد الشغل تكوم فوكه فوكه.
جريت حسرة همست
رسيل : ماشي
ايهم: رسيل مو ماشي والكاج متكسرة من ارجع
رسيل : لا والله شبيك
ايهم: امشي لغرفتج
رسيل: ليش ؟
ايهم: تعالي وافهمج
فتحنا الباب ودخلنا شغل الضوء وكعد على ميز الكومبيوتر
ايهم: راح اسويلج ايميل نتراسل انه وياج خاف خطوط ما احصل ، وهم مالحكت اجيبلج موبايل من ارجع ان شاءالله اشتريلج واحد.
رسيل: اوك
ايهم: راح اسمي face of the moon
رسيل: الله حلو وجه القمر
ايهم: اي ومن تراسليني مرات ارد بسرعة ومرات ايام ما اكدر لان مشغول فد انتِ اكتبيلي على طول طمنيني عنج وعن الوضع وانه شوكت ما افرغ اقرأ رسائلج
شلع الوايرات من الكهرباء وشاله
رسيل: هاي شنو ليش شلته منا؟
ايهم: اخليهم بشقتي حتى تراسليني منه بينما ارجع
رسيل: ايهم ابقى هنا شكو علية وما اطلع ابد صدكني
ايهم: ما تحتاجين حمام ؟ ما تجوعين ؟ انتِ ماحاسه بخطورة الوضع بعدج ، عندج علم شوق هسه عبارة عن قنبلة وعلى ساعة تنفجر وخوفي لا تنفجر عليج وانه ما موجود
رسيل: عفية خوفتني
ايهم: انه اريد اخوفج لان اللي وياج كارهينج ومابيهم واحد هين كلهم عبارة عن شر.
هزيت براسي وسكتت دخلنا للشقة رتب الكومبيوتر وعلمني عليه ، كعدت جربت كدامه شلون اشغله وشلون اراسل وشلون اطفيه ضليت بالنصف ساعة
ايهم : ها تمام هسه ؟
رسيل : اي عاشت ايدك
ايهم : ما محتاجة شي لو عاجبج شي اجيبه وياي؟
رسيل : سلامتك
ايهم : زين اكو عشاء لا ؟
رسيل : هسه اسويلك
رحت سويت اكل كعدنا ناكل ساكتين وراها حضرنا جنطة السفر مالته اخذها و راح للهول طفى الضوء ونام دخلت نظفت المطبخ ورحت للغرفة
نمت والصبح من كعدت لكيته مسافر مالحكت عليه كلش انقهرت
كمت فتت للحمام طلعت رحت للمطبخ خليت القوري على النار وجبت كوب اريد اخلي شكر لكيت ورقة فتحتها مكتوب
(لا تخلين ملح وبالعافية مقدماً )
ضحكت ايهم عليه سوالف اخذت الورقة وضميتها بالكاونتر حتى ما تتبللل شربت جاي ما اشتهيت اتريك
ورا ساعتين حسيت بجوع كمت اسوي لفة او اي شي واكله مالي واهس ، فتحت الثلاجة لكيت ورقة مكتوب بيها
(انسة رسيل تسوگتلج كلشي مخضر ولحم كون من اجي الكاج مكملته )
اخذت الورقة وكعدت على صفحة بجيت اني شنو احس تجاها ليش هيج قلبي كاعد يوجعني ليش دك طبول من قرأ حروفه الكاتبها ؟ ليش ليش بقيت ساعة على هذا الحال بعدها كمت ضميتها وية الورقو الثانية وكمت طلعت لحم سويت مخلمة لخاطره اكلت كلش زين ورحت على الحاسبة حتى اكتبله ، اول ماكعدت عليها لكيت ورقة ثالثة
( رسيل، ابد لا تطلعين ولا تخلين بالي وعلى طول راسليني مو تنسين)
اخذت الورقة خليتها على قلبي فرحت كلش احب خوفه وحرصه واهتمامه بية حسسني بحنية بابا الله يرحمه..
ومرت الايام عادية يوم يشبه اللي قبله ونور مرات تجي يمي مرات لا ما الها خلك بس تكمل شغل تروح تنام، اتمنى اروح اساعدها اخفف عنها بس ما اكدر اطلع
وبيوم باليل احتاجيت ملابس كلت اروح اجيب من الغرفة مالتي لان بردت كلش واللي عندي خفيفات ، فتحت الباب على كيفي باوعت ماكو احد طلعت فتت لغرفتي شغلت الضوء وطلعت كم شغلة تاخرت تقريباً ربع ساعة ورجعت للشقة
سديت الباب لكيت مروان واكف وحاط ايديه الاثنين بالبنطرون عاكد حاجبه وجهها مكلوب ما يتفسر..
رسيل: بسم الله هاي شجابك
مروان: دستي على الجني وصحتي بسم الله شبلاج مخروعة
كمت ارجف حتى الهدوم رادت وكعت من ايدي نترت بيه بصوت يرجف
رسيل: شتريد
مروان: سلامتج
رسيل: شعندك هنا ؟
مروان: ابن عمج وجاي يمج شكو منها لو علية حرام وعلى غيري حلال !!
رسيل: شنو تقصد ؟
حجيتها وشلت الملابس من الكاع شمرتهن على القنفة
مروان: شمسوية لأيهم لدرجة مستقتل عليج ويعارك الدنيا علمودج؟
رسيل : شنو قصدك؟
مروان : شمسويتله سؤالي واضح وصريح
رسيل: مامسويو شي
مروان: هممم ، يعني هسه انه تبات يمي بنية حلوة وصغيره وتتدلع وتلبس اشكال جدامي وانه معصوم ابقى اصلي واصوم وياها للفجر مو؟
رسيل: هذا انت مو ايهم وكلمن يشوف الناس بعين طبعه مروان
مروان: علميني طبع اخوي بما ان انه الغريب وانتِ عايشة وياه ٣٦ سنة
رسيل: مروان صير صريح واحجي اللي بقلبك بلا لف ودوران ..
تقدم بخطواته اتجاهي بديت ارجع ليورا لحدما وصلت باب الشقة ظهري صار عليها تقرب مني حيل وعيونه نزلت على شفايفي همس
مروان: ليش هو مو انه؟
رسيل: شنو؟ شبيك وخر سكران انت ؟
درت وجهي ونترت
رسيل : ايع ريحتك تلعب النفس
مروان : ليش هو ليش ، ليش مو مروان ؟ شنو شفتي بيه ما شفتيه بية
رسيل : عوفني اترجاك الي كاعد تسويه غلط
مروان : واللي تسووه كل يوم صح ؟
رسيل : ما مسوين شي وخر عني كلتلك
دفعته حيل لزم ايدي بكل قوته وصار يهز بية
مروان : عديمة الاحساس انتِ ، حقيرة تتقصدين بأذيتي ..
رسيل :وخر عني كلتلك عوفني سكران وكاعد تخربط ماتعرف شنو تحجي وشنو تسوي
دفعته بكل قوتي وفتت للغرفة قفلت الباب علية ودكات قلبي سريعة لدرجة تنسمع...
بقيت انتظره يطلع صار هدوء ماكو صوت أله شلون ياربي هذا وين راح؟ بس لا ضل بالشقة ، صار الفجر واني ما نايمة اريد اصلي شلون بية ؟ ، فتحت الباب على كيفي ماكو احد فتت للهول واشوفه نايم فوك ملابسي حاضن بلوزي وحاطه على وجهها..
ضليت واكفة بمكاني اباوعله شنو معنى تصرفاته هاي ؟ مروان حيرني ليش هيج كاعد يسوي ، معقولة يحبني ؟ لا ثول شيحب منج وهو خاطب وكاطع مهر ما تشوفين يشوف دم اسنانه وما يشوفج وبعدين اللي يحب هيج يضرب و يصدك الحجي الموزين عن اللي يحبه؟ ، زين شنو معنى تصرفاته هاي ؟ راح يجنني مروان لغز جبير ومحد يعرف يحله ، بس هو ، خبلني خلاني احجي وية روحي رحت للحمام على السريع توضيت ، ورجعت لغرفتي صليت بعدها مددت والف فكرة براسي الى ان غفيت
فزيت الصبح راسي يموتني ، دمارته تدك بقوة كمت وطلعت لكيته على نومته، حرت اكعده ماطول صار النهار لو اعوفه نايم واتجفى شره؟ لا اكعده و اي شي يسوي اطلع اركض
رسيل: مروان مروان ، استغفر الله هذا شراح يكعده هسه
مديت ايده نغيته
رسيل : مرووووان
باوعلي بنصف عين نتر
مروان: شجابج ؟
ضحكت
رسيل : اني لو انت ؟
مروان: شعندج جاية لغرفتي من الصبح وشكو تكعديني ما تشوفين نايم وتعبان ادبسز
رسيل: بس شوف داير مدايرك انت وين وبعدين اغلط
فتح عيونه كلها
مروان : هاي شجابني هنا ؟
كتفت ايدي وكلتله...
رسيل: رجليك جابتك
مروان: لا صدك شجابني
رسيل: والله انت اجيت
مروان: وشسويت ؟
رسيل: كل خير اجيت ونمت كبل
مروان : متأكدة ؟
رسيل: اي
مشيت اروح للمطبخ صاح..
مروان: جوعان اكلتي انتِ؟
رسيل: لا بعدني ما متريكة
مروان: سويلي وياج اذا متصير زحمة يعني..
شنو هذا الادب صفنت عليه بعدين همست..
رسيل: ماشي
جريت نفس قوي وكلت اسايسه احسن الي واجرب اكسبه بلكت يجوز مني سويت الاكل وهو كاعد على الميز
رسيل: مروان اسألك سؤال الله عليك جاوبني
عكد حاجبه وخنزر
رسيل: شبيك هو سؤال مو عركة
مروان: كولي ؟
رسيل: بيت خالو شخبارهم ما تعرف عنهم شي ؟
سوه حركة بحواجبه بمعنى لا
خليت الاكل وكعدنا ناكل كال
مروان: مايفيدج
رسيل: منو ؟
مروان: اللي ببالج
مدنك ياكل ويحجي
رسيل: محد ببالي بس اريد اعرف اخبارهم واريد اتصل رقم خالو ماعندي بس الارضي وجوا ما اكدر انزل اخابر منه
مروان: اساسآ انه من يوم مخابرتج شلته وكطعت الخط
رسيل: ليش هيج تسوي ؟
مروان: ما مسوي انتٍ الي تسوين
رسيل: ليش ما تخليني اتواصل وياهم يعني اني اكدر اطلب من ايهم ترى
مروان: ههههههه
رسيل: ليش تضحك ؟
مروان: وما طلبتي منه عليش جاية علية ؟
رسيل: ما اعرف لان انت الوحيد اللي جان يتصل بخالو اكيد ايهم ماعنده رقمهم.
مروان: صارلج شهر يمه ماعرفتي تسألينه عن بيت خالج وعنده رقمهم لو لا ؟
رسيل: مروان ليش تلمح لشغلات مو حلوة ترى عيب عليك
مروان: ما ملمح انه لو اعرف هاي الشغلات صايرة بينكم كل عقلج اعوفج تتنفسين يوم واحد ، انه لان نور يمكم تاركم من يرجع ايهم اكسر رجليج لو وصلتي ليجاي، سواء جان بسبب او بدون
رسيل: انت مو اوفر هواي وتكبر الشغلات وتتخيل سوالف وتنتج افلام ؟
مروان: انه خيالي واسع والغلط ما ارضى بيه يعجبج يعجبج ما يعجبج غصب عنج يعجبج هم
رسيل: لا اله الا الله
كام وراح طلع ، ضليت كاعدة بمكاني هذا شبيه راح اتخبل ياربي عقلي راح يوكف من وراه ...
مرت الايام ، ورجع ايهم رجعت لغرفتي وجان جايب اشكال ملابس الي افتح بيهن وبعد حتى عطور جايب بس شنو ولا قطعة ملابس لون اسود كلها ألوان وكلشي جايبلي هدوم بيت وطلعه وحتى تراكات مال نوم شلون جهاز العروس نفسه بالضبط ، وجايب لنور وبنتها ولشوق وامه هم واخواته ما ناسي احد بس اقل مني جايبلهم على حاجة حاجتين
اللي لفت نظري اغلب القمصان مال طلعه لونهم ابيض زين ليش مركز على هذا اللون معقولة يحبه ؟
كمت اخذت قميص ورحت دكيت باب الشقة عليه ، اجاني صوته تعالي ..
فتت وعفت الباب مفتوح كلت بسرعة اطلع
رسيل : ايهم ايهم
ايهم : ها ها ها رسيل شكو ؟
حجاها وضحك
رسيل: ليش جايبلي قمصان لون ابيض هوواي ؟
ايهم: همممم عندي مفاجأه الج
رسيل: احجي الله عليك !!
ايهم: بعدين
رسيل: لا فدوة ما اتحمل والله
ايهم: ممممم تمام هاي السنة راحت عليج والسنو الجايه راح اسويلج نقل وتداومين هنا
رسيل : تحجي صدك ؟
من فرحتي ركضت حضنته حيل ما مصدكه راح ارجع اداوم ويخلوني هو تفاجئ و انصدم بتصرفي رفع ايده وحضني وخرت راسي وبعدني بحضنه مد ايديه تلمس بشرتي ونزلت عيونه على شفايفي سافر بملامحي واني نفس الشي اول مرة نتقرب من بعض لهذا الحد
همسلي
ايهم: احبج..
وجان اسمع صوته الحنين
مروان: لج رسيييل
يتبع .......