رواية العروس في الثوب الاسود الفصل التاسع 9 بقلم عبير ادريس

 رواية العروس في الثوب الاسود الفصل التاسع 9 بقلم عبير ادريس

انباع البيت وخالو حول الفلوس لبابا ، اشترى بيهن شقة هناك وفتح شغل ، واستقروا نوعاً ما ،

كملت فترة المراجعة وبلشت الامتحانات 

اليوم عندي امتحان اسلامية واكفة كبال المدرسة انتظر يفتحون الباب حتى ندخل .

حسام: تعالي اكعدي لاتدوخين ..

رسيل: لا خليني واكفة هسه شوية وندخل 

حسام: هسه ليش هالرجيف ترى امتحان عادي حاله حال السنين الراحت.

رسيل: ما اعرف ليش هيج خايفة حتى بطني كامت تأذيني

حسام: اقرأي ايات وبلشي وهاج هاي الورقة بيها دعاء اقريه قبل ما تتوزع الدفاتر .

رسيل: اخاف عبالهم برشومة ويطردوني ..

حسام: شوفيها الهم اول ماتدخلين يقروها وينطوياج .

رسيل: ماشي 

اخذتها منه وخليتها بالمحفظة ، ما بقت ايه حافظتها ماقريتها .

حسام: انفتحت الباب ...

رسيل : صدك ؟

حجيتها و مشيت سريع اجى وراية

حسام: لحظة رسيل ..

رسيل: ها ...

حسام: انتظري يدخلون اول وبعدين فوتي شوفي شلون صار تدافع،و باعي على كيفج دوري اسمج تلكيه بقوائم على الباب واكتبي اسمج على الدفتر لاتنسين قبل ما تبدأين تحلين اي سؤال اكتبيه

رسيل: ماشي بس ادعيلي حسام الله عليك ، والله راح اتخربط 

حسام: ماكو شي سباعية انتِ يلا عيني فوتي .

رسيل: باي 

حسام: الله يسهلج 

دخلت للمدرسة دورت اسمي اول قاعة ماكو ولا الثانية لكيته بثالث قاعة واخيراً تنفست الصعداء، اجاني صوت من داخل القاعة..

طلعوا الجنط والكتب برا بسرعة ، فقط قلم الرصاص والجاف والمساحة والمقطاطة اي شي ثاني ما اريد بس اشوفه اعتبره غش .

طلعت شغلاتي من المحفظة وشفت الورقة قريتها ورجعتها ، دخلت دورت اسمي على الرحلات ، لكيته وكعدت .

ياربي سهلها علية لخاطر بابا اريد افرحه .

توزعت الدفاتر ، وعلمونا شلون نكتب الاسم وشنسوي ..رفعت المدرسة الدفتر وحجت بصوت عالي..

بنات انتباه ، هاي الورقة الاولى هنا ينكتب الاسم والمرحلة والمدرسة الحقول الجوة اتركوها هاي للمصحح تمام ؟ 

_ تمام 

حجينا بصوت واحد

صارت الساعة ثمانية ونصف توزعت الاسئلة ، زاد وجع بطني ،كمت احجي وية نفسي حتى اهدأ رسيل اهدأي على كيفج ، سهلة ان شاءالله ، راح تجاوبين .

_انتِ صوتج ويامن كاعد تحجين ، التفتت على الوراية 

_انتِ انتِ 

حجتها وتأشر علية

رسيل: اني ست ؟ 

_اي صوتج عالي 

اشرت براسي اي و سكتت .

وصلت الي ورقة الاسئلة وبلشت احل عفت سؤال الاحكام آخر شي حتى اجيب بيه درجة كاملة ، حليت الاسئلة الحمدلله اغلبها اعرفها بس فراغين ماعرفت حلهم كتبت بكيفي اهم شي ما اتركه فارغ.

وصلت لسؤال الاحكام حليته وكملت ، بديت اراجع 

وسديت الدفتر ، كعدت شوية ارتاحيت فتحت بطل المي شربته شوية ورجعت سديته ايدي ترجف مدري شبية، صارت ساعة عشرة الا ربع بدوا يستلمون الدفاتر ، سلمت دفتري وطلعت اخذت المحفظة ، كلشي ما جايبة غيرها لا كتاب ولا جنطة .اني من النوع ما اراجع قبل الامتحان ابد لان احس كلشي ناسية

طلعت واشوف حسام صاير طماطة من الشمس خطية منتظرني بباب المدرسة .

رسيل: ليش مارحت ورجعت مو حارة عليك موزين توكف بالشمس 

حسام: معليج مني شلونج بالامتحان بشري

رسيل: الحمدلله بس عندي فراغين ماعرفتهن .

حسام: يعني ٩٥ ان شاءالله؟

رسيل: ان شاءالله ..

حسام : ان شاء الله يلا اصعدي..

صعدت وضلينا نسولف على امتحان ثاني يوم ،رجعت تغديت وبلشت عربي وهيج مرت الامتحانات وطبعاً ما انسى فضل حسام علية شكد تعب وياية ودرسني بهاي الفترة ..

خلصت اليوم آخر يوم وهم اطلع والكى حسام كاعد رحتله ابتسمت وكتله...

رسيل: بيش اجازيك كولي ؟

ضحك وكال...

حسام: من تطلعين معدل عالي ...

رسيل: الله يحفظك يوم تعينك وزواجك وافرح بيك ..

حسام: نفرح سوية ان شاءالله ..

رسيل: ان شاءالله ...

رجعنا للبيت تلكتني عمة زهرة بالهلاهل خطية شكد دارتني صاعدة نازلة علية جايبتلي عصير لو فواكه لو حليب وما اطلع اذا ما تريكني حتى اذا ما اشتهي اكل غصب عني تكولي الريوك اهم وجبة ولازم قبل الامتحان العقل يتنشط ، تضحكني من تكول السيارة تمشي بلا بانزين لا ما تمشي العقل نفس الشي ما يشتغل اذا متاكلين ، حسيتها امي شكد تمنيت ماما موجودة وارجع احضنها وتشاركني فرحتي راحت وتركت فراغ بداخلنا كلش جبير مستحيل احد يسد مكانها ، رحت للتليفون خابرت على بابا بسرعة رد علية مثل كل يوم حبيبي ينتظرني اطمنه ..

رسيل: هلو بابا حبيبي

صادق: هله بگلبي بشريني شلونج اليوم سهلة ان شاءالله ...

رسيل: مو سهلة بابا بس جاوبت ..

صادق: يعني بالتسعين لو اقل ؟

رسيل: ما اعرف ردت أأجل بس كلت اخاف تجي اصعب وامتحنت .

صادق: زين تسوين ما أجلتي حتى اجي اخذج بعد ما اتحمل.

رسيل: بابا ترى الوضع موزين يمنا وصار اسوء مو مال تجي

صادق: منو يدري اني اجيت اجي اخذج ونرجع ..

جريت نفس .

رسيل : ماشي ، آران بعده متعبك مايقبل يروح للمدرسة ؟

صادق: لا زين احسن ريناد متكفلة بيه .

رسيل: عاشت ايديها رنودة سلملي عليهم وبوسهم الي 

صادق: تدللي يوصل 

مرت الايام عادية ورا شهر من هذا الاتصال جنا كاعدين العصر اني وعمة زهرة بغرفة بيبي ونسمع جرس الباب يرن..

زهرة: افتح لو انتِ تفتحين ؟ 

رسيل: لا اني رايحة ..

رحت بسرعو صحت منو من ورا الباب اجاني احلى صوت هز گلبي هز ، فتحت الباب وركضت حضنته قبل لايدخل ..

رسيل : بابا حبيبي شنو هاي شو ماكلت النا راح تجي؟ 

صادق: حبيت اسويلج مفاجأة 

ضليت حاضنته بقوة وابوس بيه...

صادق:خلي ندخل يابابا ولج منا العالم ..

دخلنا ودخلت الجنطة مالته جايبها صغيرو على الكتف يعني ملابس مال كم يوم هيج على كد ياخذني ويرجع 

صحت بصوت عالي

رسيل : عمة عمة تعالي شوفي منو اجى ونور الدنيا

طلعت عمة تلف بشيلتها

زهرة: خير منو ؟ ابو رسيل ياهله هسه نور البيت حمدلله على سلامتك .

صادق: الله يسلمج يابة شلونكم الحجية شلونها ؟ 

زهرة: تعال ادخل ارتاح وبعدين نحجي كلنا زينين مثلما عفتنا 

صادق: الله يجعلكم ...

دخلنا للبيت و كبل راح لغرفة بيبي ، رحت وراه..

صادق: السلام عليكم شلونج سهاد ..

سهاد: هله هله ابو رسيل شلونك عيني زارتنا البركة ..

صادق: الله يبارك بيج ويسلمج..

سهاد: والله مفاجئة حلوة، ليش ماعندنا خبر بجيتك .

صادق: ردت افاجئ رسوله ، واجيت طاير حتى اشوف ردة فعلها شتسوي من تشوفيني ،فتحت الباب وضلت مصدومة مثلما توقعت 

جان يحجي ويضحك الدنيا ما سايعته..

رسيل: والله بابا احلى مفاجئة بالدنيا يمكن ما تجي مثلها بعد

صادق : حبيبه ابوها ونبض گلبه..

كام بابا باس بيبي براسها واجى كعد ، للأسف بيبي ما تحس بأي احد وما تعرفنا اصلاً ..

ضلينا نسولف وعمه سوتله اكل فات سبح وطلع اكل باليل اجوي خالو وحسام وثائر طاروا من الفرح من شافوا بابا جاي.

محمد: شنو هاي صاير مثل المسلسلات تخابر الصبح تجي بليل 

حجاها وضحك..

صادق: احب الاكشن مو بيدي 

حسام: عمو لايكلك السفر وحليان

رسيل: يمه اسم الله من عينك لا تحسد بابا ..

حسام: فوك ما اجامله يعني؟ 

رسيل: ما يحتاج اصلاً يجنن بس انت ما عندك نظر وتغار منه

حسام: حرت وياج اكول حلو تكولين تحسد اكول محلو تكولين اغار.

صادق: هاي رحت ورجعت بعدكم نفس المداهر ما تكبرون انتوا؟ 

زهرة: انت شنو شايف منهم الله يساعد گلبي موتوني بالنكرة مالتهم والعناد والمداهر.

محمد: مونسينا لو مو صوتهم جان طكينا..

رسيل: احم احم بينل فائدة هم زين يلا اريد راتب ...

حسام: انتِ على كلشي رايدة راتب .

صادق: عوفكم هسه و خلونا بالمهم حسام طلعت النتيجة مالتك؟ 

حسام: اي عمي ونجحت الحمدلله 

صادق: اي على الخير حبيبي يوم تعينك وزواجك 

حسام: ركز على الثانية بداعتي ولح عليها..

ضحك بابا وكال..

صادق: يلا يوم زواجك وزواجك ..

حسام: هسه تمام 

بين السوالف والضحك صارت ساعة ١١

محمد: شنو حلت الكم الكعدة وين العشاء مو عصافير بطني كامت تعيط مو توصوص.

زهرة: فرحتنا بأبو رسيل نستني حتى الاكل ...

صادق: الله يفرح گلبج دووم ياالغالية 

زهرة : الله يسلمك ويفرحك بالبنات..

رحنا اني وعمة للمطبخ وحضرنا العشاء

جان الاكل بوجود بابا طعمه غير اكلت بنفس مفتوحة..

مر اسبوع من رجوع بابا واعلنوا النتائج .

رحت للمدرسة اني وياه وخالو ، شنو الخوف البگلبي ما ينوصف 

رسيل: بابا انتظرك هنا شوفها وتعال ما اكدر ادخل 

صادق: لاتخافين بطلة انتِ ، انتظري هسه استلمها واجيج وياربي خير .

راح بابا اكو صبة بالساحة كعدت عليها انتظر واكل بأظافري من التوتر واهز برجلي هاي العادة السيئة اللي ما اجوز منها من اتوتر..

ورا ربع ساعة اجى بابا يبتسم بيني وبينه مسافة ١٥ متر تقريباً بس عبالك ١٥ كيلو اشرتله بيدي يعني بسرعة تعال .

اجة وكال...

صادق: شنو تنطيني اذا كلتلج شكد معدلج ؟ 

رسيل: بابا احجي عفية گلبي راح يوكف ...

صادق: ٩٠ 

رسيل: لا عفية تتشاقة ؟

صادق: هاج شوفي 

باوعت على المعدل انصدمت جنت متوقعة اعلى من هيج ، كمت ابجي ، اجى كعد يمي حضني ويسكت بية..

صادق: هاي شنو اني مو كلت ماريد اشوفج تبجين وبعدين شبيها التسعين ، ارقى كلية تطلعلج.

رسيل: بس مو طبية ...

صادق: انتِ تؤمنين بالرزق والنصيب لو لا ؟

رسيل: اي ...

صادق: المعدل والقبول هو نصيبج من الدنيا لو شنو تسوين ما تاخذين غير المكتوبلج .

اني ابجي وهو مستمر يحجي وياية ، لحد ما هدأت شوية .

صادق: يلا نروح لخالج خطية هسه ضربتة الشمس .

طلعنا شافنه خالو نزل من السيارة واجى يمشي بأتجاهنا ..

صاح....

محمد: ها بشروا ؟ 

صادق: طلعت ٩٠ ..

محمد:ياحبيبتي مبروك تعالي ابوسج ...

حضنت خالو وكمت ابجي ..

محمد: ليش ليش هاي الدموع معدلج يخبل ...

رسيل: بس مو مجموعه طبية

محمد: هسه نروح للبيت ونسأل حسام شنو يقبلج لا تبجين حبيبة خالج .

رجعنا للبيت دخلت للمطبخ شفت حسام وعمة كاعدين شافوني اجوي علية 

حسام: ها بشري ؟ سألني بقلق ...

زهرة: يلا فرحينا حتى اهلهل ...

رسيل: طلعت تسعين 

حجيتها وبجيت،عمة كامت تهلهل واباوع على حسام فرحان ..

حسام: الف مبروك ولج معدل توب ...

رسيل: بس مو كد تعبي ...

زهرة: الحمدلله حبيبتي انتِ ما قصرتي درستي زين وتعبتي هاي بعد شتسوين ما يفيدج البجي افرحي واتذكري اهم شي خلصتي من السادس .

رسيل: هو شنو القاهرني اني غير التعب اللي تعبته

حسام: اليوم العصر اكو مفاجئة لا تضلين تبجين وعيونج تورم يلا روحي غسلي وارتاحي 

رسيل: تمام 

حجيتها بدون نفس وصعدت بدلت ملابسي ونزلت غسلت وجهي كعدت بالهول كلش ضايجة وروحي بخشمي وبس اتأفأف اجى حسام كعد بصفي ..

حسام: كافي رسوله لا تضوجين ، هسه اني مو كدامج جبت عمري كله اعفاء وصلت للسادس بنجرت اول سنة راحتلج فدوة والثانية شكد تعبت بيها وتالي ماطلعت معدلج اللي ماعاجبج ومتبطرة عليه

رسيل: بس اني ما بنجرت كلش شاطرة وحريصة ليش هيج انظلمت ليش .

حسام: ترى تنقبلين تقنية طبية لو معهد طبي واذا تريدين رأيي روحي معهد طبي قسم صيدلة وصيري سباعية اقري واطلعي من العشرة الاوائل وروحي صيدلة كملي .

رسيل: هو هم هيج بس راح تصير سبع سنوات بدال خمسة 

حسام: كلشي مكتوب نشوفة وكلشي ربج ينطينياه بيه صالح .

رسيل: ونعم بالله ...

صار العصر عمة اصرت ابدل كالت اكو مفاجئة الج..

صعدت لبست فستان قصير لونه ابيض وبيه ورد ناعم شلت شعري بالماشات منا ومنا ونزلت .

ورا ربع ساعة اجى بابا وخالو وحسام وثائر وكلمن شايل بيدة هدية ومغلفيهن بجلاد كلش حلوو وكلهن لون واحد .

جابوا ميز الطعام من المطبخ وخلوه بالهول وخلوا فوكاه الهدايا وجايبين كيك وببسي وحلويات ، مكتوب على الكيكة مبروك النجاح دكتورتنا ، فرحت وبجيت بنفس الوقت ، جنت اتمنى احقق حلم بابا واصير دكتورة بس اللي صار صار مابيدي شي ، احتفلنا قطعت الكيكة ، وكلمن نطاني هديته وباركلي مرة ثانية ، نظفنا الهوسة الصارت ورجعنا كلشي بمكانه وكعدنا بالهول .

هدوء والكل ساكت حجى خالو محمد وكسر حاجز الصمت ..

محمد: صادق ماكتلي شعجب اجيت بهذا الوقت وبدون ماتنطيه خبر ؟ 

صادق: كتلك علمود رسوله اجيت وهم اشوفكم ..

محمد: بس انت كلت شغلي سويته بالجديد واقل شي تحتاج شهر يلا تكدر تجي للعراق شنو الصار وخلاك تجي غفل ومنو لزم شغلك بالفترة الراح تبقى بيها هنا..

صادق:اضطريت ارجع لأن قبل اسبوع اجوني مروان وايهم ماخذين رقم علاء منكم وعلى اساس عندهم شغل بالاردن شحن اثاث وهيج شي ،استقبلناهم احسن استقبال وضلوا يومين يمي ، مروان لاحظ غياب رسيل وبدا تحقيق وين وليش كلتله سادس وحرامات تضيع عليها السنة .

محمد: شجابهم عليك ، وشعليهم برسيل يمنه مو يمنه شلهم دخل ، وبعدين جيتهم الك مو صدفة يشمشمون اخبار ، يشوفون الوضع ، شافونا مانطيناهم مجال ولا اي شي يخص سفرتك اخذوا العنوان من علاء واجوك والله ولد اخوك مو هينين.

صادق: كول ياالله كلتلك عندهم شغل هناك وسمعت اتصالاتهم وية الوكلاء وحتى الوصولات شفتها بعيني 

محمد: وانت جيت لهنا خايف منهم مو؟

صادق: لا خايف ولا ابد بس ابوية خابر على بيت علاء اكثر من مرة طلب يحجي وياية واني متأكد علمود رسيل لهذا اجيت اخذها ومن يطلع القبول مالتها ارجعها .

محمد: حسام شكتلك مو كلت رجوع عمك من ورا اهله عرفت والله ، زين هم مو يدرون الوضعية مو زينة هنا وخطرة رجعتك ماخافوا عليك .

صادق: يمعود محد طلب مني ارجع اني رجعت حتى اخذ رسيل وياية 

محمد: عوفك هسه من كل هذا الحجي رايدك بطلب واتمنى ماتردني.

صادق: عيوني اشلعها الك بس كول .

محمد : اريد رسيل لحسام

عم الهدوء دخلنا بحالة صدمة اني وبابا ورا شوية بابا حجى 

صادق: فاجأتني والله ..

محمد: اللي تريدة يجرالك بس اقبل..

صادق: مابيناتنا هيج سوالف، لو علية انطيها لحسام بهدومها ، بس رسيل بعدها صغيرة وراها دراسة ،واني ما اريد شي يشغلها عن دراستها، يعني طريقها طويل ، لو انت الك رأيي ثاني ابو حسام ؟ 

محمد: منو كالك هسه يتزوجون ، اني ما اقبل

صادق: لعد شنو ، ترى كلش مو وكتها ياخوية 

محمد: شوف بس خطوبة بدون كطع مهر ولا شي نحجزها لحسام حتى نضمن محد يخطبها ،ولا تنطيها لغير واحد 

صادق: ليش هو بكيفي غير البنية اخذ رأيها يجوز ماتقبل، انت واكعلي دخيل ، ونسيتها .

محمد: رسوله متأكد تقبل لان ربت يمنه وتعرف حسام شنو واخلاقه شنو ، واني اصيرلها اب وزهرة ام .

صادق: والنعم منكم وعلى راسي طلبك بس لازم اخذ رأيها مو بابا رسيل .

دنكت وجهي صار احمر دم ، يعني المفروض مايحجون كدامي ، بس خالو بعد عنده كلشي عادي ، سكتت وصعدت فوك ثاني يوم نزلت الوضع عادي والكل تعامل وياية بشكل طبيعي ، مشيت الامور ماسألت ولا استفسرت ، ورا يومين جنت توني طالعة من الحمام واكفة امشط شعري واندكت باب غرفتي صحت

رسيل: منو 

اجاني صوته ابو الحنية

صادق: اني بابا 

رسيل: فوت بابا ليش تدك الباب ؟

فتح الباب وفات

صادق: كلت اخاف مشغولة لو نايمة 

رسيل: لا حبيبي ماعندي شي ، وحتى لو عندي افضالك ماكو اغلى منك حتى انشغل بيه..

ابتسم كرص خدي وكال

صادق: ام لسان العسل هو شنو مخبلني عليجن غير لسانجن انتِ واختج .

رسيل: الله بابا شكد مشتاقة لريناد احس بفراغ جبير جنا ننام سوى ونكعد سوى وشقانا وعركاتنا ،اووف من ايام حلوة خو آران ميتة عليه حبيبي 

صادق: ما بقى غير ايام ونسافر وتلتقين بيهم واشبعي عركات وياها وتبالشي وية آران 

رسيل : متحمسة كلش..

صادق : ان شاءالله هانت عوفج منهم هسه عندي شغلة وياج.

عرفت شنو يريد يحجي وياية عدلت كعدتي وخليت شعري ورا اذني بحركة لا ارادية توحي للقلق او خجل من اللي راح اسمعه...

رسيل: كول حبيبي اسمعك

صادق: سمعتي خالج اول البارحة طلبج مني ؟ 

رسيل: اي

صادق: شنو رأيج ؟

رسيل: بابا اني بعدني صغيرة واريد اكمل دراستي وبعدني ما مستعدة لهيج موضوع جبير الزواج مسؤولية و واجبات واطفال اكيد ما راح ادبرها هسه

صادق: الرجال كال مو هسه بعد من تكمل حاليا خطوبة فقط ، اني هذا كله مايهمني خليه على جهة المهم عندي انتِ شنو احساسج اتجاه حسام تتقبليه كزوج الج ؟

رسيل: هو حسام من يوم يومة بحسبة وحزام ظهري وما فد يوم بجاني لو خلاني انام زعلانة غير كم مرة واني هم جنت السبب بالمشكلة ، بس كزوج ما اعرف مامفكرة بيه من هاي الناحية.

صادق: حسام وردة واني اتمنى تصيرين اله وصدكي ما تلكين شخص مثله يحبج ويخاف الله بيج .

رسيل: بابا اعرف اني ماكايلة غير كلام بس خليها لوقتها من اتخرج يلا ما اعرف منا لسنتين شنو يصير ليش اربط نفسي من هسه ، وصراحة ما اريد احد يحاسبني على الرايحة والجاية اريد اكمل دوامي براحتي بدون ما احد يقيدني .

صادق، يعني حتى كلام ما تقبلين ؟

رسيل: لا بابا لاتنطي كلمة هسه 

صادق: براحتج بنيتي 

نزل بابا ورا ساعة نزلت جوة شفت عمة زهرة وجها ثكيل، يمكن وصل الهم جوابي ، ماحجيت شي هي شوية وتفك الطنكورة مالتها متعلمة عليها.

رسيل: عمة اسوي الخضروات ؟ 

ساكتة ما تحجي .

رسيل : عمتو عماتي ..

زهرة: لكطيهن 

حجتها بنترة ، رحت حضنتها وبستها 

رسيل : زعلان الحلو اليوم ما يتحاجه؟ 

زهرة: وخري وخري زعلت عليج..

رسيل: ليش ترى هسه احرك روحي حجيتها بضحك

زهرة: اضحكي اضحكي وهذاك محترك حرك..

رسيل: عمة اني مارفضت بس اجلت الموضوع ..

زهرة : وليش اجلتيه ؟ 

رسيل: مو بابا فهمكم بعد شكو...

سكتت واني هم سكتت 

ورا ربع ساعة دخل حسام مبين ضايج وروحه طافرة صاح 

حسام: رسيل تعالي احاجيج .

رسيل: اجيت بس اغسل ايدي 

حسام : شو تعالي عوفيها هسه 

جرني من ايدي وطلعنا للحديقه .

رسيل: بس على كيفك اني امشي

وصلنا للمرجوحة كعدت هو كعد كبالي .

حسام: اي ست رسيل احجي ليش رفضتيني ؟ 

رسيل: يوو شبيكم انت وعمة ليش ما تفتهمون كلامي، اني مارفضت اجلت .

حسام، وليش اجلتي ، كلتي اخليه سبير واذا اجاني احسن منه اقبل ما اجاني حسام القشمر موجود مو هيج؟ 

رسيل: ابداً مو هيج، وهذا تفكيرك ناتج عن عدم ثقتك بية ولهذا السبب اني ما وافقت اجلت الموضوع .

حسام : لا تحجين شي اني ماحاجيه ماكلت ماعندي ثقة بيج لو ماعندي ما اخطبج من الاساس

رسيل:حسام فالنفرض وافقت راح تغار ويومية تجي لدوامي وهذا ليش باوع وهذا ليش حجه وتتمالخ وية الرايح والجاي .

حسام: سواء خطبتج او لا قبلتي او لا اني يومية مداوم وياج .

رسيل: هاك استلم ، مو حقي من ما وافقت اعرف تفكيرك شنو وشراح تسوي بية 

حسام: رسيل وافقي احسلج ترى والله اخبلج ، وعلى اقل شي اسويلج عركة

رسيل: اي هنا الحجي واني اكول حسام متغير وما يتعارك كلت كبر وعقل اثاري هاي تمهيد للخطوبة على شوفيني كيوت واخبل.

حسام: من الأخير لا ادوخج ولا تدوخيني ، انتِ الية واليوم عمي يجي ونقرا الفاتحة

رسيل: بكيفك والله ابن زهرة 

حسام: موافقة مو ؟ 

لزم راسي بيده وهزة بمعنى موافقة..

حسام : شوفي انتِ كلتي هاهي اخذت جوابي الف مبروك

رسيل: هههه والله مو صاحي ، اقبل بس بشرط 

حسام: مرفوض .

رسيل: لعد ما اقبل وبابا مستحيل يوافق اذا كلت لا.

حسام: احجي فضيها 

رسيل: لا خطوبة ولازواج ولا اي شي لحد ما بابا يرجع لهنا ونستقر .

حسام: ليش عود، منين طلعتيلي بهاي السالفة؟

رسيل: بابا كال نرجع لهنا بس بغير منطقة

حسام: شوكت يرجع ؟

رسيل : اول ما يبدأ دوامي 

حسام: وهاي شعليها بالخطوبة ابقي هنا يمنه..

رسيل: لا صعب ابقى بعد لان بابا ما يقبل ولا اني اخذ راحتي.

حسام: ام راحة ، قابل اكلج اذا بقيتي لو اجاوز حدودي وياج انتم شلون تفكرون.

رسيل: حسام يجيك الصافي لا تدوخ روحك .

حسام: اليوم نقرأ الفاتحة رسيل لخاطري لاتكولين لا 

رسيل : وتالي حسام؟ وتالي ؟ 

حسام : ما اكدر بعد اصبر اكثر من هيج ارحميني

رسيل : ماشي نقراها اليوم..

ضحك وكال

حسام: احبج احبج احبج لج رسيل احبج بكل جوارحي

رسيل: هسه الي يسمعك شيكول بلة ؟ 

حسام: شيكولون يكولون عادي اهم شي حجيتها جانت خانكتني.

رسيل: من شوكت حبيتني بلة؟ 

حسام: من ابوج اخذج من ايد الجدة وكالتله مبروك .

رسيل: ههههه شكد جذاب جنت صغير وين تتذكر .

حسام: والله اتذكر شنو جان عمري ست سنوات ، بس الصدك حبيتج من امج توفت وصرتي مسؤوليتي حسيتج مالتي ولازم ادير بالي عليج ، ماتشوفين شلون تخبلت من اجوي ولد عمامج ردت اكتل واحد من وراج، وجنت حاير وين اضمج من عيونهم.

يحجي واني صافنة عليه ، جنت افسر تصرفاته حقد عليه لو يريد يتحكم بية او يفرض رأيه وشخصيته ، ابد ماجنت افسر تصرفاته حب .

رسيل: يعني بالكلية من رحنا جنت حاجيلهم علية مو ؟

حسام: لا ، بس جانن عندي معجبات هواي يتحارشن بية وجنت اصدهن بكلمة وحدة ، احب وحدة ومرتبط .

رسيل: مرتبط ابو الجذب ، زين ما فيل وكع على راسك انت وتحجي .

حسام: هو انتِ مال رومانسية انتِ مال تشريب وثريد تتربعين عليه وتاكلين بثنين اديج .

رسيل: كاتلك كتل التشريب اللي يكول اكل بحلكك واديك .

حسام: شفايتلي .

رسيل: شنو كلت..

حسام: لا هيج اكول امشي نتعشى نشوف الحجية كملت لا.

رسيل: ياحجية؟

حسام : امي شبيج

رسيل: ههههه شخط الولد ..

دخلنا للمطبخ هو فات جوه واني ساعدت عمة 

حضرنا العشاء اني وياها وحسام كل شوية جاي على شغلة ورايح التفتت عمة علية..

زهرة: شوفي بحجاية منج غيرتيه خليتيه اسعد انسان وبحجاية منج تكسرين گلبه ، اريدج تراعيه وتخافين الله بيه.

رسيل: عمة هذا ماينخاف عليه ، خافي علية منه لاتشوفيه هيج يتمسكن كدامج ترى كل البلة جوة راسه

زهرة: لا هاهي ابني ارتاح مبين عود كاعد اوصيها عليه شوف شتجاوبني 

حسام: حجية مايحتاج اخذ حقي بيدي 

زهرة: شنو هاي حجية النوب ؟ 

حسام: حتصيرين بيبي طلابة ؟ 

واحد يرفع والثاني يكبس واني صافنة عليهم واضحك، اجى بابا وخالو تعشينا، بعد العشاء حسام فتح الموضوع وية بابا وصار حجي هوواي انتهى بالموافقة و الكل رفع ايده وانقرت فاتحتي 

كام حسام باس بابا وبابا اجى علية باسني من راسي .

صادق: الله يسعدكم ويديمكم سوى طول العمر يا اغلى الغالين.

حسام: الله يحفظك عمي ويبارك بعمرك وينطيك الصحة والعافية، دنك على ايد بابا باسها ، وباس راسه .

رسيل: حبيبي بابا الله يخليك الي يا احلى شي بالدنيا.

حضنته بقوة وراها سلمت على خالو وعمة زهرة وخالة سهاد وثائر .

سهرنا لساعة ٢ باليل...

صادق: يلا يابة كوموا اريد انام كافي عاد .

محمد: شعندك مو كاعدين .

صادق: اريد انام فرغولي الهول بلا مطرود ، عندي كعدة من الصبح اروح اجدد الاجازة راح تخلص .

محمد: منو يكول يقبلون يجددوها الك ؟

صادق: اقدم طلب قبلوا كان بها ما قبلوا اقدم استقالتي واذا عمري يسمح للتقاعد اقدم ، بلكت تصير .

محمد: ان شاءالله على التقاعد لان عندك خدمة هواي .

حسام: عمي انتوا مو راح ترجعون عليمن تطلع تقاعد حرامات.

صادق: تريد الصدك تعبت اريد ارتاح ، السفر تعبني والالتزام ، واذا على الشغل افتحلي محل وربك الرزاق.

حسام: اذا هيج شكو بيها سوي اللي يريحك 

صادق: ان شاءالله ، يلا كوموا ، رسوله بابا فرشيلي نعست كلش.

رسيل: من عيوني بابا .

رحت اجيب الفراش خاليه بغرفة حسام دخلت جريت الفراش ، وانحضنت من ورا ، فزيت هي فزة وهي عيطة 

خلى ايده على حلكي وهمس

حسام: اش اش وثول فضحتينا

رسيل: انت شبيك تخبلت ليش هيج تسوي حركات لو يدخل واحد شيكول علينا؟

حسام: مرتي قابل بايك؟ 

حجاها ورفع تك حاجب..

رسيل: لا مرتك ولا ابد بعدنا بسم الله ...

حسام: ياربي حتى مقبلات ماكو منشفتها فد مرة ...

رسيل: حسام كافي وخر ، اريد افرش لبابا 

حسام : ما تفوتين لازمج اني 

رسيل: اي ساد طريقي 

حسام : يلا فوتي 

مشيت رجع جرني حضني وشمني

رسيل : حسام كافي عاد ترى ضوجتني.

حسام : لج والله ما اصبر بعد 

رسيل : لا تخليني اندم لان وافقت

حسام : يلا روحي 

رسيل:بس وخر ايدك شلون اروح ..

حسام : ها اي يلا..

اول ما فلتني طلعت اركض .

شافني بابا عكد حاجبه...

صادق : شبيج تركضين ؟ 

ارتبكت ..

رسيل: ها لا هيج مو اريد انام 

بابا ذكي شك بالسالفة 

صادق: رسيل فرشيلي فوك يمج .

رسيل: اي بابا صار..

اخذت الفراش وصعدت على السريع من الفشلة فرشت لبابا نمت بفراشي وغطيت حتى راسي.

سمعته دخل للغرفة طفى الضوء وتمدد 

صار الصبح ، كعدت نزلت جوة ، بابا طالع وماكو احد بس خالة سهاد بالبيت..

رسيل: صباح الخير خالة 

سهاد: صباح النور عروستنا

ابتسمت 

رسيل: لعد وين عمة؟

سهاد: راحت للسوك تجيب كم شغلة وتجي .

رسيل: شنو الشغلة شعندها رايحة مو البارحة جانت بالسوك تموت على التعب 

سهاد: ما ادري تجي ونسألها ..

رسيل: تريكتي ؟

سهاد: لا بعدني قبل شوية كعدت..

رسيل: اسوي واجيج نتريك سوى ؟

سهاد: كيفج حبيبتي 

رحت سويت ريوك ورجعت يم خالة تريكنا اني وياها ، كملنا شلت الصينية وديتها للمطبخ ، اندكت الباب فتحتها 

رسيل: شوداج للسوك بهذا الحر مو كلشي موجود بالثلاجة ؟ 

زهرة : حسام ثبرني الا تروحين 

رسيل: ليش ؟

زهرة: وصاني اجيب كم شغلة الج ، هاج شوفيهن قياسج ؟ 

طلعتهن واشوف تراكات اثنين ودشداشة وحذاء عالي مال مناسبات، ومكياج و عطور اثنين

رسيل: هاي شنو عمة ؟ 

زهرة: الج جبتهن 

رسيل: ادري الي بس شسوي بيهن عندي كومة وبعدهن جدد حتى ما لابستهن 

زهرة: اعرف عندج بس هو تنغصلج ، اخذيهن ولا تكسرين بخاطرة

رسيل: بس عمة ؟ 

زهرة: لخاطري كومي حبيبتي 

اخذتهن منها وصعدتهن لغرفتي كلت انظف واصعد اكدرهن ، نزلت نظفت البيت وية عمة وغسلت الكراج ، تبللت ملابسي طبيت سبحت ، اذن الظهر صليت ، رحت للمطبخ اجهز الغداء 

زهرة: خلصت ماعندي شي روحي ارتاحي

رسيل: شعندي قابل وارتاح خليني اساعدج...

زهرة: براحتج 

اندفع الباب الخارجي ودخلوا حسام وثائر .

_السلام عليكم 

جاوبنه بصوت واحد

_عليكم السلام 

حسام:رسيل تعالي دقيقة 

رسيل: شنو ؟ 

حسام : امشي

طلع من المطبخ فات لغرفته فتت وراه.

رسيل: ها شنو؟

حسام: هاج هذا كدريه اريد اشوفه عليج .

طلع من العلاكة فستان سهرة يجنن كلش راقي وانيق.

رسيل: هذا مال حفلات ؟ شسوي بيه ؟

حسام: اي اعرف اليوم العصر راح نسوي كعدة بسيطة يجون بيها اهل امي وبيت اخت بيبي واريدج تلبسيه، ودزيتلج كم شغلة بيد امي.

رسيل: اي شفتهم، بس ترى ماله داعي المشترى والحفلة ، حسام قابل هو مهر؟ 

حط الفستان على السرير ولزم ايدي .

حسام: الله عليج فرحان لا تكسرين فرحتي 

رسيل: بس حسام؟ 

قاطعني..

حسام : بروح امج الغالية بس هالمرة..

رسيل: استحي والله شبيك ..

حسام: منو غريب وتستحين منه كلهم اقاربنا ، اي احد ماتريديه يحضر ما اعزمة ...

رسيل: يعني شنو راح يصير اليوم؟ 

حسام: تصير كعدة رياجيل ونعلن الخطبة حتى الكل يعرف رسيل لحسام وهاهي..

رسيل: نعلن بدون حفلة ومن يرجعون اهلي ، ذاك الوكت نسوي حفلة ونعقد .

حسام: ميخالف ما اصبر خليها اليوم .

رسيل: من جنت اكولك مو صاحي تزعل هاي سوالفك مال واحد عقله موجود هنا ؟ 

احجي وأأشر بيدي على راسه 

حسام: اي ماكو اخذتيه مني مابقالي لا عقل لا گلب لا جلاوي لامعلاك .

رسيل: هههههه شمزوجة واحد تفصيخ .

حسام: هاهي بعد براسج براسج .

سمعنا صوت عمة تصيح 

زهرة : وينكم تعالوا نقلوا الغداء وياية

طلعنا نضحك ونشوف خالو كاعد ...

محمد: ها عصافير الحب شلون الوضع ؟ 

حجاها وغمز لحسام 

حسام: كلش زين بس لا تخلي عينك 

محمد: لا ياجلب هو منو سواها الكم غيري قبل كم يوم جنت تبجي وتتوسل بية حتى بس احجيلك وية عمك هسه صرت احسد؟ بابا رسيل بطلي حسام ما يفيدج .

حسام: حجي على كيفك ، صاير ما تتحمل شقى بسرعة تبيع.

محمد: حتى توب تحجي على ابوك مرة ثانية

حسام: هو شعندي غيرك بالدنيا انت الخير والبركة حجي.

طبت عمة شايلة المواعين

زهرة : اصبغ اصبغ بينا اليوم الصبح اني الخير والبركة وهسه ابوك لو ندري عندك هيج لسان حلو من زمان نخطبلك ..

حسام : ها حجية ها بدينا ؟ 

انقل مواعين واضحك على سوالفهم بيت خالو لمتهم تجنن وابد ماعندهم نفاق لو يحجون على احد ، الحلو بيهم اذا ما يعجبهم شي يحجوه بالوجه وهذا الشي اللي مريحني من ناحيتهم.

رسيل: خالو بابا مو تأخر ؟ 

محمد: معاملة تطول تعرفين يمنا كلشي يمشي بسهولة ، هاي اذا كمل اليوم جوز يأجلوه بعد.

رسيل: خطية والله .

تونا كعدنا ناكل ونسمع صوت طلق بس مو كلش قريب 

محمد: ياستار ياربي كمنا نسمع صوت الطلق اكثر من هورن السيارة

ورا دقايق اندكت باب بيتنا بصورة مرعبة، وكفنا على حيلنا طلع خالو وحسام يتراكضون واسمع صوت هوسة بالطرمة ، گلبي لزمني اريد اروح اشوف شكو بس رجلي احسها وكفت ما تعيني بعد ، اباوع وحدي بالهول ، طلعت اجر برجلي احسها شثكلها ، وصلت للطرمة والكى خالو مشكك ملابسه ويلطم على راسه ، وعمة مكطعة شعرها وتصيح راح اخوية راح العزيز راح ، اجيت كعدت كبالها اريد اسألها منو واخاف ، اخاف شكوكي تطلع بمحلها وصار اللي افكر بيه .

عاط خالو بصوت مليان حززن

محمد: رسيل راح ابوج راح 

ابوية راح يعني شنو خلصت الدنيا ؟ كلشي حلو انتهى ؟ مصدر الامان راح الطيبة راحت الحنية الضحكة النسمة الباردة من يمرر ايده على راس يتيماته كلها راحت ؟ رجع يكرر اللي حجاها اني شلون واحد نايم وكعدوه 

صرخت صرخة هزت البيت هز وطلعت اركض بالشارع حافية والناس تركض وراية يريدون يلزموني ، 

ما اعرف منو لزمني بحيث حاوطني حتى ما كدرت اركض ، ادفع بيهم واصيح 

رسيل : وخروا عني وخروا ، اريد بابا جذب ماميت جذابين هو كالي راح ياخذني وياه راح نسافر سوية بابا ما يغدر بية لالا مستحيل ما يعوفني ولا مجذب علية بيوم حتى هسه يجذب ويروح..

حسام: اش اش كافي امشي ارجعج للبيت

يحجي ويبجي ،انداريت عليه ولزمته من قميصة حيل...

رسيل : ولك يا بيت هذا يا بيت اللي يلمنا بعد كعب عيونه لك وينه؟ اريد اشوفة وينه فهمني وين وديتوه لك احجي مو راح اموت احجي ابوس ايدك

ملخته لحسام شككت ملابسه بيدي وجهه كله خراميش مال اظافري

يباوعلي وعيونه مليانة خوف علية وحزن على بابا..

حسام: اخذوا للمستشفى بلكت بيه روح ...

لطمت على صدري بقوة..

رسيل : اخ گلبي اخ ياربي كون عايش ياربي لا تفجعني بيه لا تكسرني ربي لا تكسرني.

رجعني حسام للبيت وراح هو وخالوا ، واني افرفح كل شوية وحدة مغسلتلي ، نسوان الطرف كلها التمت يمنا..

ورا تقريباً سبعة ساعات ويمكن اكثر، طبت مرة تلطم وياها نسوان وتصيح يمه ابني يمه راح مني ، اللي عرفته بعدين هاي بيبي ام بابا وذني النسوان خواته ونسوان اخوه ، ما اعرفهن ولا شايفتهن اجني بوسني واخذن من خاطري وكعدن ،يبجن حالهن حال النسوان .

ورا ساعتين سمعنا صوت رمي بالجو كلش قوي ، كالوا جابوا النعش طلعت اركض، دخلوا للطرمة يمكن عمامي ذولة وخالو محمد وياهم جان، خلوه بالطرمة وطلعوا وسدوا الباب لان الشارع مليان زلم 

شفت التابوت مصدومة فقدت حضنته وابجي حجيت بصوت ضعيف لان حيل مابية بعد 

رسيل : مستحيل تنام هنا هذا مو مكانك كوم بابا كوم ما تلوكلك النومة ، بعدك صغير، بعدنا ماصحينا من كسرة ماما وتكسرنا انت هم ، لج يوم اخذتيه، يمج ،هيج مشتاقتله واخذتيه بساع هو يحبج وروحه بيج ، اجاج وعافنا اجاج تلكيه يا حبيبة ، ديري بالج عليه ابونا الغالي

لقراءه باقي الفصول من هنا