رواية العروس في الثوب الاسود الفصل الثاني عشر 12 بقلم عبير ادريس
سكتنا وكلها سمعتنا
وبدا يهب النسيم
وينشرح صدري
حچت وبكل حرف حسيت
يرجع عام من عمري
وبلا صوت بس افهم
سواليف الورد ماتنسمع تنشم
وبين الخوف والوهواس
وامانينا وكلام الناس
واهلها الفارغين احساس
واللهفه !
احنا هناك مختلفين وين نروح
للزفة ؟
لزفچ ع الگمر هولج
وخلي الناس تنشد
ياهو التزوج
لحارب دنيا لعيونچ لصيرن بالعشك نازي
لو نام بسرير وياچ لو فوك ايد جنازي
ماحب العنف بس هم جبروني
من اعشك اخلي الموت بعيوني
__________________
التفتت واشوف مروان عيونه براسه تريد تطلع من مكانها وعصبي يرجف عاط عيطة هزت البيت هز.
مروان: لج كلبة بنص بيتي وتحجين علية انتِ وبزر النستلة وتدورين حبجيات ؟
رسيل: اخ شعري هد ايدك اخخخ هاي شبيك صدك كذب..
مروان: صار كم مرة تخابريه نذلة ؟
رسيل: اول مرة
جاوبني بصياح..
مروان : منو يكول ؟
رسيل: شوكت لحكت الزمه اذا كلكم بالبيت متواجدين وبعدين واذا حجيت وياه لا عيب ولا حرام وانت مالك دخل.
شد شعري حيل وصرت كدامه خزرني بعيونه
مروان: حجاية مالك دخل جوزي منها لا اكسر راسج والتليفون اريد مرأة بنت ابوها توصل يمه وحك علي اجنزج تجنز ، طلقة برجليج واكعدج على كرسي والحاجتين جواج.
ما انكر خفت بس تصنعت القوة ، ظاهري قوي وداخلي يرجف خوف ، ورعب لان اعرفه مايتشاقى جربته اكثر من مرة.
رسيل: ما خايفه منك شتسوي سوي ايدك الك.
ضربني كف من قوته كمت ما اشوف
لزمت وجهي بكفوفي ومتت قهر هاي ثاني مرة يضربني واني بعمري محد ماد ايده علية ، رفعت راسي وباوعتله بخزرة
رسيل: ما يضرب المرأة الا المرأة وانت لو رجال صدك ما تضربني على سبب تافه ياحقير.
الكلمة الاخيرة ما نطقتها انهال علية بالضرب والسب واشكال الشتائم سحب ايدي ورا ظهري بقوة لواها عطت من الألم لأن ما يحتمل الى ان سمعت صوت هوسه ما ميزت منو لان صوته ماخذ الدنيا وصوتي من الوجع ، جروه مني اباوع الكاع بيها دم هذا منين دينزل مديت ايدي على وجهي كله دم ، اجتني نور علية تركض ، شافتني شهكت وكامت تبجي...
نور: انكسرت ايدك ان شاءالله هاي شمسوي بيها؟
ايهم: جيبيها غسليلها
نور : كومي حبيبة كومي كلتلج لا تخابرين ، شكد حجيت وياج ما فاد ما تعرفين هنا الف اذن مفتوحة علينا امشي اغسلج
كومتني اكوم واوكع بدون مبالغة الضرب اللي انضربته منه لو رجال يمكن يتكسر ، واحس ايدي بيها شي لان من لزمتني نور عطت منها
رسيل: عفية لا تلزميني من اي مكان عوفيني اني امشي
طلعت اباوع بالهول شوق تباوعلي وتضحك وعمة شيماء مرت عمو علي كاعدة رجل على رجل ولا كأنما اكو بنية كاعد تنضرب ونزفت دم بسبب ابنها ، بس الباقين ماكو لا ايهم ولا عمو ولا ياسر..
رحت وية نور وكفت اغسل اريد ارفع ايدي ما اكدر.
نور: شبيج حبيبة ؟
رسيل: نور ما اكدر ارفع ايدي.
نور: شو حاولي شوية
رفعتها وعطت
رسيل : ما اكدر ما اكدر..
على صوتي اجى ايهم.
ايهم: شبيها ؟
نور: ايديها تكول ما اكدر ارفعها.
أيهم: شو شوفيني بله ؟
تقرب لزم ايدي وعطت
نفخ بنفاذ صبر، جان يكول
ايهم : هذا كاسرها!!
لطمت نور على صدرها.
نور :يايمة سودة علية كسر بيده كون.
شيماء: كسر بيدمن يبت اسراء شو ماتحترمين نفسج؟
نور: من الجبير يحترم نفسه انه احترمه ، شنو فصلية جايبها ؟ وكدرته على المسكينة؟ ، مايخاف الله واذا اتصلت على اهلها تطمأن عليهم ؟
شيماء: يعني تدرين بيها متصلة بيهم؟
نور: اي انه خليتها تتصل لا سوت عيب ولا حرام .
عاط ياسر نور
نور: بلي يابه
جاوبته بصوت يرجف..
ياسر: اصعدي كدامي بسرعة
صعدت كلش انقهرت عليها صارتلها مشكلة بسببي من وجع ايدي حتى ماكدرت احجي وياها لو اعتذر منها على اللي صار
باوعلي ايهم بنظرة ما عرفت افسرها خوف علية؟ لو استعطاف؟ لان ماعندي احد لو مقهور على الصارلي .
همس بأذني
ايهم: هذا دم بوجهج
رسيل: شسويله ، ما اكدر اغسل
أيهم: اذا تقبلين اغسلج انه مثل مدتشوفين ماكو احد غيري هنا
رسيل: عادي ماكو مشكلة
اريد بس اخلص من طعم الدم اللي يدخل بحلكي وحتى بعيوني هم ينزل يمكن من جبيني ، بدا يغسلي براحة ايده انقطع الدم ناوشني خاولي مسحت وجهي بيه باوعت على الخاولي هم اكو بعد باوعتله وهمست
رسيل: هذا بعده!
عكد حاجبه وكال
ايهم : شو شوفيني؟ هاي كصتج مفتوحة ما نتبهت جان شعرج نازل عليها ، خلي الخاولي على الجرح بينما اجيب سويج السيارة واجي
عافني وراح اسمعه يصيح ..
ايهم : شوووق ، شوووق، ثولة وينج مو جاي اصيحج
شوق: جاي اتريك ماتشوف.
ايهم: شنو من نفسية عندج انتِ؟ شوفي لج اذا الج ايد بكتلة رسيل الا ازوعج العافية ، اتركي البنية بحالها وسمج ضميه بقوطية وسديها زين، لا اشربه الج
شوق: شوف شوف ، شبيك هيج محروك على ست الحسن، ام العلاقات
جرها من شعرها وعاط بيها..
ايهم : اسمعيني منا وجاي اللي يضرب رسيل يعتبر نفسه ضاربني واللي يحفر الها معناها حافرلي، ما الكم شغل بيها وهسه تصعدين ركض مثل الحبابة تجيبين عباية وربطة حتى اوديها للمضمد ، يلا يلااا
عاط بيها صعدت تركض.
جابت صاية ، لبستها لفيت الشال وطلعت جان اشوف مروان واكف ويلعب وية الجلب ، التفت شافنا
مروان: وين ماخذها ؟
ايهم: اصلح الكسرته
مروان: عوفها مكسرة حتى من توجعها تتذكر وتتأدب
ايهم: الي حجي وياك بعدين مو هسه...
مروان: كلها خل تغطي شعرها هنا مو بغداد.
باوعله ايهم وجرني من ايدي الثانية
ايهم : امشي رسيل ..
طلعنا فتحلي باب السيارة صعدت سدها ، واندار صعد من الجهة الثانية
ايهم: شنو الصار وهيج تخبل عليج ؟
ما جاوبته
ايهم: مو وياج فهميني لا هو يقبل يحجي وافتهم منه ولا انتِ تفهميني الصار
جاوبت بنتر
رسيل: هو مخبل
ايهم: ما اقبل تتجاوزين على مروان
رسيل: معناها لاتفتح مواضيع تخصه حتى ما اتجاوز عليه، لان هسه لو يخلوه كدامي اشرب من دمه وگلبي ما يبرد.
ايهم : ليش هذا الحقد مو ابن عمج الكاعد تحجين عليه ؟
رسيل: خلي اعترف بعمي اول وبعدين اعترف بيه
ضرب بريك قوي راسي انصرب بجامة السيارة
حجى بصوت حاد ونتر بية
ايهم: صدك ما تحترمين شنوهذا لسانج ؟ يخلي اكبر واحد يفقد عقله ويضربج، ليش هيج عدائية انتِ
رسيل: اكرهكم كلكم وما اريد اشوف واحد بيكم
ايهم: حتى انه ؟
حجاها بهمس
رسيل: ليش شنو فرقك عنهم انت واخوانك و ولد عمك كلكم نفس الطينة.
ايهم: ما امدحلج بنفسي واكلج انه وانه وانفخ روحي لكن الايام تثبتلج شنو ايهم، الزلم بالافعال مو بالكلام.
رسيل: ما اريد تثبتلي ولا اريد تسويلي زين اللي اريده منك ترجعني لبغداد وهذا هو و بس ترجعني اسافر وبعد ما يكدر مروان يوصلني
ايهم: استغفر الله انه لو بيدي هسه اوديج وداعت امي ، لكن حكم القوي
رسيل: انت وديني وكوللهم هي انهزمت .
ضحك ودار وجهه على الجامة ورجع التفتلي
ايهم: شايفة سما الله هاي ؟
حجاها ويأشر من الجامة على البرا
رسيل: شبيها ؟
ايهم: لو صعدتيها مروان يوصلج
رسيل: صدكني اذا وصلت بغداد واسافر ما يكدر الله يخليك ساعدني .
ايهم: مروان ما يصعب عليه شي عنده علاقات بكل مكان والاهم لا تنسين هو ضابط يكدر يجيبج ببلاغ واحد
رسيل: على اي اساس يجيبني هااا؟ على اي اساس ؟ زوجته ؟ اخته ؟ بنته ؟ هو ابن عمي قابل منو ؟
ايهم: وهنا المشكلة الحقيقية.
رسيل: ليش وين المشكلة ما فهمت عليك ؟
ايهم: انه افهمج ، لانج بنت عنه بجلمة وحدة منه يخلي ولا طير يتكربلج
رسيل: هم ما فهمت ! انت ليش تحجي الغاز فهمني ؟
ايهم: ما حاجي الغاز اسمعيني زين لان انتِ بنت عمه ينهي عليج ولا يخليج للسماء ولا للأرض ، افهمج اكثر خاف تكولين يحجي الغاز يعني لا تتزوجين غيره ولا تطلعين عن شوره، ويبقى هو وضميره يتزوجج يعوفج معلكه فهمتي هسه ليش وضعج اصعب اكثر من ما جنتي اخته لو بنته لو زوجته.
غطيت وجهي بيدي اريد استوعب اللي كاعد اسمعه عقلي راح يوكف حسيت شي بيدي باوعت كلها دم ، نسيت حتى الجرح البكصتي من الحجي السمعته ...
انتبه علية كال
ايهم : هذا جرحج هم نزف ، من ورا الحجي نسيتيني.
شغل السيارة ومشينا وصلنا يم محل صغير حاط قطعة مكتوب عليها مضمد جعفر ، نزل وفتحلي الباب نزلت اباوع على ايدي بدات تورم واصابعي تحول لونهم على زراق..
رسيل: ايهم شوف
حجيتها بخوف وصوتي رجف ، جان يمشي كدامي التفتلي
ايهم: ها شنو ؟
رسيل: ايدي
احجي وعيوني انترست دموع عكد حاجبه باوع علية ويرجع يباوع على ايدي مبين الخوف بعيونه حاول يطمأني
ايهم: لاتخافين هسه نشوفها للمضمد واذا تحتاجين مستشفى اخذج .
دخلنا للمضمد
ايهم: السلام عليكم سيدنا
جعفر: هله هله بالزين عسى ماكو شر.
ايهم: شوفلي البنية فدوة
جعفر: شني شبيها البت هذا يا لوري دايسها ؟
ايهم: جبيرنا
باوعلي بقلق وحجى
جعفر : شيوجعج ؟
ايهم: سيد راسها بيه جرح شوفه خاف محتاج خياط وايديها هم ورمت
وخرت الشال من كدام جاب معقم جروح وشاش عقمه وكل شوية ابتعد لأن يحركني.
جعفر: كملت صبر
ايهم: اثبتي ماجاي يسيطر عليج.
جعفر: كملت ماتحتاج خياط خليت الها ضماد ولفيته يومين ما يوصله مي وتشيلوه .
ايهم: وايديها سيد شوفها..
جعفر: اعذرني هاي مو شغلتي بيانها عندها كسر .
ايهم: اخذها للمستشفى ؟
جعفر: ما انصح لان بيها تحقيق وكال وكلت
ايهم :والحل؟
جعفر: اذا سألوها تكول وكعت من الدرج.
ايهم: لا اله الا الله ، الله يهديك يامروان.
جعفر: لو اكدر اسوي شي ماقصر وياكم
ايهم: اعرفك كدها والنعم منك
طلع فلوس ينطيه ما قبل ياخذها ، حاول وياه وهم ما رضى
تسالموا وطلعنا صعدت بالسيارة صعد جر نفس وباوعلي
ايهم: تشتكين عليه ؟
رسيل: نعم
ايهم: تشتكين على مروان اذا رحنا للمستشفى ؟
رسيل: انت شنو رأيك ؟
باوعتله ومتأكدة من الجواب راح يكولي لا تشتكين ويتوسل بية علمود اخوه بس صدمني من كال.
ايهم: اشتكي يستاهل حتى يتوب يأذيج ويصيرله درس مهما يصير بينكم ما يمد ايده عليج.
رسيل: واهلك راح يسكتون عني ؟ راح يخلوني اعيش بسلام ؟
ضحك
ايهم: تريدين الصراحة ؟ امي وجده ما يبيتوج بالبيت
رسيل: خلص عرفت جوابي، امشي وديني راح اموت من الألم
رحنا للمستشفى وصلنا نزل ورا شوية اجاني
ايهم: يلا انزلي خليت خبر يم الدكتور كال جيبها
نزلت والألم صار اضعاف متت طبيت لغرفة الدكتور ابتسملي .
_هاي العيون الحلوة ليش تبجي ؟ باوعتله ودنكت يطلع بكد بابا
اشرلي اكعد ، كعدت اجى يمي
_ طلعي ايدج اشوف
رفعت الردن طلعتها، باوع على ايدي والتفت لأيهم .
_ لازم تاخذلها اشعة وتجيني.
ايهم : ماشي .
طلعنا رحنا لغرفة الاشعة دخلت ، اخذولي اشعة وطلعنا برا انتضرنا ورا دقائق ، راح ايهم جابها ورجعنا للطبيب شاف الاشعة كال..
_ مع الاسف هذا كسر واضح بمفصل الايد ولازم اجبسها الها.
خفت كلش ، ايهم خلى ايده على كتفي وصار يربت عليه
ايهم : لاتخافين بسيطة
حجاها وابتسم
_شلون انكسرت ايدها هيج ؟ يباوع علية وعلى ايهم ويحجي..
ايهم: دكتور
قاطعته وجاوبت
رسيل: وكعت من الدرج
باوعلي الطبيب بنظرات شك ما مصدك اللي حجيته..
_ تمام هسه ارد العظم بمكانه شوية راح تتأذين واجبسها الج خوما تخافين ؟
هزيت راسي بلا وغمضت عيوني
لزم مفصل ايدي وجره بقوة عطت هي عيطة وهية عضة لايد ايهم بكل قوتي عضيته لحدما كمل الدكتور وجبسها لايدي يلا هديت ايده، باوعت عليه لكيته صافن علية فشلت بس جنت ما حاسه بالكاعد اسويه من الوجع
رسيل: اسفة
حجيتها بحيل مهدود باوعلي ضحك ودار وجهه للدكتور حجى وياه وطلعنا صعدنا بالسيارة شغلها ومشينا، التفت علية
ايهم: تدرين عندنا جلب بوليسي بالبيت ؟
رسيل: اي شفته بس يخوف
ايهم: تعرفين صارله كم سنة يمنا مربيه ؟
رسيل: لا شكد؟
ايهم: صارله خمسة سنوات تدرين ما فد يوم عضني ربع عضتج هاي ؟
حجاها وضحك جاوبته بفشلة ..
رسيل : اسفة مو قصدي والله
ايهم: ولايهمج فدوة ، فد خفت لا الكى اسنانج نابتات بيدي شو بله اضحكي اشوف
ضحكت على حجيه..
ايهم: لا كاملات ولله الحمد جان حرت بيج من ابو الكسور لابو الاسنان وياطلابة الما تخلص ، شدوا روسكم ياكرعان.
رسيل: هي عضة شصار قابل؟
ايهم: بنت ال......عمي متوفي جان سبيتج، خاف صدكتي ما تأذيت ؟ هاج شوفي
طلع ايده ، انصدنت غير عضة هاي حتى دم طالع منها
رسيل: شو ما عيطت ؟ شمدريني عبالي ما تأذيت
ايهم: وهاي لان ماعطت تاكلين بلحمي، قابل انه رسيل واضل اخ واوي
رسيل: اني وين هيج كايلة ؟
ايهم: لا يابو اصلاً صوتج نسمه ماينسمع ، منطقتنا سنين ما يعرفون عندنه بنات الا من يتزوجون بيوم الزفة تطلع ويعرفون هاي اول وحدة لبيت حجي حميد طلعت ، فد من اجيتي فرجتي الدنيا علينا يومية مصيبة وبلوة ، ماتتعبين ؟ شنو شادة هنا بزردومج شو شوفيني مثلنا لو يختلف؟
رسيل: ماصدكت سألت سؤال طلعت البگلبك كله شكد حقود انت
ايهم: هاي انه ؟
رسيل: لا انه
ايهم : وتقلدين هم فوكاها ؟
رسيل: سؤال بگلبي اريد اسأله لواحد بيكم انت لو نور
ايهم: اسألي ما دام عمج طيب
حجاها وضحك..
رسيل: شو مرة تحجي وياية بغدادي ومرة بلهجتكم ليش عود ومو بس انت حتى الباقين
ايهم: حلو خوش سؤال ، شوفي جدي اصله من البصرة وجدة من بغداد ، لهذا تشوفينا نحجي هيج وهيج.
رسيل: بس بيبي اكثر وحدة بيكم تحجي بصراوي اصلاً كلشي ما افتهم عليها.
ايهم: جدة تزوجت جدي بعمر ١٣ سنة حبها ومشى عليها واجت لهنا ، تعرفين عيال وعم وعمه وشغل بساتين تعلمت لهجتنا وتطبعت بطبعنا واخذت كلام اهل كبل
رسيل: لعد انتم شلون تعلمتوا ؟
دار وجهه على الشارع حتى يلوف السيارة لان دخلنا للفرع مال البيت.
ايهم: انه ومروان وياسر خريجين جامعات بغداد
رسيل: صدك ؟
ايهم: اي
رسيل: انت شنو مكمل ؟
ايهم: انه خريج هندسة معماري جامعة التكنولوجية ومروان ادارة واقتصاد جامعة بغداد كملها ودخل دورة ضباط، وياسر تقنية طبية
رسيل: متعينين لو لا ؟
ايهم: انه وياسر لازمين شغل الحجي ماعندنا مجال لشغل ثاني وانه على طول سفر ، فد مروان متعين، ويلا انزلي لان صارلي ساعة واكف بالباب
رسيل: هاي شبيك شكد نحس غير اريد اعرف.
ايهم: شتعرفين ؟
رسيل : اعرف عنكم اشياء تحس صورتكم بداخلي
ايهم : اي عندج ايام طويلة واكعد احجيلج لا فوكه فوكه فجي وكع
رسيل: ما اسأل بعد التوبة
ايهم: انزلي يمعودة ماع حديد السيارة من الحر
نزلنا فتح باب الشارع ودخلنا جوا دخلتي هاي مثل اول يوم فتت بيها لهذا البيت نفس شعور الكره والحقد رجعلي فتت من باب المطبخ ، شفت نور واكفة باوعتلي ودارت وجهها ، عيونها مورمة مال بجي بس لا ضاربها ياسر ، شيماء كالبة خلقتها من جيت لحد الآن نفس عكدة الحاجب عوذة منها
دخلت للهول مروان متمدد على القنفة وبيده ريمونت التلفزيون يگلب بالقنوات وجدي وعمي علي وبيبي كاعدين يمه
مروان: تأخرت ؟ كلت رحت لبغداد
ايهم شمر سويج السيارة على الميز وحجى
ايهم: لو بيدي الامر اخذها دقيقة ما اخليها هنا.
مروان : ومن لازمك ؟
ايهم: جدي ما اريده يزعل علية
علي: تعالي بابا شلون صرتي ؟
باوعت عليهم عفتهم وصعدت ، تعالي بابا عبالك متخرمشة ويحجي ببرود اعصاب ولا كأنما ابنه كاسرلي ايد.
دخلت للغرفة مددت بملابسي طبعاً الردن مال صاية كصها الطبيب هسه شوق تتخبل لأن مالتها..
مددت اريد انام ما كدرت ، هذا الجبس ثكيل كلش مرت ساعة ونصف اندفعت باب غرفتي ، عدلت كعدتي ، فاتت نورة شايلة صينية بيديها خلتها بالكاع تريد تطلع لزمتها
رسيل: وين رايحة و عايفتني ؟ صح اني سويت خطأ من خابرت بس ما كلت انتِ سمحتيلي اخابر ، لتسوين هيج نور ماعندي غيرج هنا كلهم ضدي انتِ هم تصيرين وياهم والله ما اتحمل سامحيني وبعد ما اسوي اي شي يضوجج.
نور : انه ما ضايجة منج فد مالي عين اباوع بعيونج
رسيل: ليش شعليج انتِ بالصار بالعكس قدمتيلي خدمة من خليتيني اتصل
نور: لا انه هم الي ذنب بالصارلج
رسيل: شلون يعني ما فهمت ؟ تعالي اكعدي وفهميني ليش واكفة ؟
اجتي كعدت يمي وبدات تحجي
نور : انه اكلج بالصار وراضية بحكمج
هزيت راسي
نور: جنت واكفة اراقبلج الوضع الج خمس دقايق تخابرين وما احسن الا ايد انحطت على حلگي التفتت واشوفن مروان يأشرلي بمعنى لاتحجين جرني من ايدي وصعدنا فوك دخلنا للشقة مالته واشوفلج شوق رافعة سماعة التليفون وكاعد تسمعج اشرلي اكعد كعدت فد شنو گلبي راد يطلع من الخوف عليج ،
اخذ السماعة وبدا يسمع ويهز برجليه سريع آخر شي سده ونزل يركض وانه ضليت اعارك شوق لان عرفت هي فتنت عليج ، من سمعت صراخج اخذت سماعة التليفون وخابرت على عمي وكلتلهم لحكوا مروان راح يموت رسيل
رسيل: اكول منين طلعوا كلهم والتموا علية زين شوق شمدريها مو جانت نايمة ؟
نور: نازلة سامعتنا نحجي وصعدت لغرفة مروان خابرته ، كلها اسمعي شنو تحجي بينما اجي.
رسيل: ذوله شياطين مو بشر وبعدين ليش تحسين بذنب وخجلانة مني انتِ ما سويتي شي ولا كدرتي تنبهيني لان مروان فات بالمضوع واني وانتِ نعرف صعوبته شنو.
نور: انه نبهتج من جيتي كلتلج شوق خلي تحتها الف خط احمر، وكحة ما تنجرع وماعندها مخافة الله ومقهورة حيل لان ماكدرت اسوي شي وخفت منهم..
رسيل: ما اخاف منها وانتِ اللي كدرتي عليه سويتيه لا تلومين بنفسج
نور: ما نبهتج خفت من مروان
رسيل: حقج بعدين تعالي ليش هيج وجهج احمر؟
دنكت وكالت
نور: ياسر ضربني
رسيل: ياحقير ليش ضربج؟
نور: مروان كاله مرتك تخليها تخابر ومنا سمعني ارادد عمة علمودج ضربني ، كلشي ولا واحد يحجي وي امهم يتخبلون.
رسيل: امهم ظالمة مثلهم
نور: لا تحجين فدوة توهم كاسريلج ايد انتِ ما توبين ؟
رسيل: مامسوية غلط على شنو اخاف منهم ؟
نور : اكلي واخذي دواج ولا تحجين شي الحايط اله اذان وانتِ افتهمي
رسيل: ماشي
راحت واني اخذت العلاج بدون اكل اكتفيت بشرب المي لان ايدي توجعني ونفسي مسدودة يعني لا ريوك ولا غداء ونايمة بدون عشاء والله يعلم شنو راح يصير بية بعد
مددت ورا شوية غفيت اتوقع مسكنات ناطيني
كعدت الغرفة ظلمة سمعت هوسة اصوات عالية جوة كمت فتحت الباب على كيفي اسمع صوت سوالف نسوان وعياط جهال ، يمكن خطار توني اريد اسد الباب واسمع صوت وحده تضحك من اركز زين على مكان الصوت ، جاي من غرفة مروان ، كلت شعلية اني ردت اسد الباب وافوت بس الفضول قاتل ردت اعرف منو هاي
ورا تقريباً عشرة دقائق انفتحت الباب شفت بنية طلعت مواصفاتها طويلة وشعرها صابغته شقارات وبيضة يعني حلوة نوعاً ما تباوع على مروان وتأشر على حلكها بحركة يعني امسح حلكك
باوعلها وطلع كلينكس من جيبه مسحه وضحك صفنت عليه يمكن لو يمي سجين اروح اخليها بنص گلبه
عليه حلال وعلى غيره حرام يعني هدم حياتي وخلاني انام بسجن وبالحر وگلبي ممرود على بيت خالو وحسام وكسرلي ايدي وحسام تصوب بسببه وهو عايش حياته طول بعرض سديت الباب حيل وفتحته حتى ينتبه اني شفته تقصدت هيج اسوي باوعلي ضحك يعني عادي ما خايف منج
هي هم باوعتلي ضحكت ونزلت جوه
ورا تقريباً ساعة صعد عمي علي فات للغرفة.
علي: رسوله حبيبتي شلونج ؟
رسيل: هههه شلوني مثل مكاعد تشوف
علي: انه اعتذر نيابة عن ابني واوعدج مايكررها
رسيل: عمو لا تنطي وعد وما تكدر توفي بيه بعدين
علي: مروان عصبي يابنتي اتجنبيه عليش تتشاكسين وياه ؟
رسيل: اني لا جاية يمه ولا واصله هو يبدي بالمشكلة ويصير الحق وياه شلون ما اعرف.
علي: مسحيها بوجهي وانه اوعدج ماتتكرر واخذنا منه عهد ما عليه بيج ابد
رسيل: نشوف
علي: وهسه لخاطري كومي ننزل جوة عماتج اجن يتحمدنلج بالسلامة
رسيل: وشمدريهم مروان كسر ايد رسيل واجوي علية ؟
علي: محد يعرف كلها عبالها واكعة من الدرج ويله كومي لخاطر شيباتي صعدلتج وانه سنين صارلي ما صاعد الدرج.
رسيل: ماشي
علي : هسه ادزلج نور تجيبلج ملابس
رسيل : اوك
ورا شوية طبت نور شايله علاليك هواي فرشتهن بالكاع
رسيل: هاي شنو ؟
نور: ايهم اشتراهن وكالي صعديهن الها.
فتحت العلاليك واشوف كذا دشداشة وتراكات وبرمودات وحتى ملابس داخلية ، خجلت وجهي صار لونه احمر..
رسيل: لج نور هاي منين يعرف قياسي كلشي جايبه نفس القياس ؟
نور: انه واغسل ملابسج الجيتي بيهن قريت القياس وكلتله
رسيل: والله فشلة
نور: لا عادي احنا ما نروح لسوك كله نوصيهم لو عمه تروح، كومي بدلي بسرعة حتى ننزل
كمت لبست دشداشة ورحت غسلت وجهي رتبت شعري ما لبست حجاب عناد بمروان ، منا وجاي الا كلشي اسويه بالعكس والا احرك گلبه
نزلت شفت نسوان هواي نفسهن اللي اجني بفاتحة بابا بس اكو بعد بنات صغار بكدي واصغر واكو اكبر مني بسنة وسنتين ، فرتني نور عليهن هاي عمتج فلانة وهاي فلانة وهاي صبرية، وكملت الباقيات عددهن خمسة ، وهاي مرة عمج جواد وهاي مرة عمج جابر بوستهن ووصلت للبنات هم عرفتي عليهم بوستهن وصلت لهاي الجانت يم مروان من بستها ، شاورتني .
رغد : هذا اللي يعاند جبيرنا هيج يصير بيه
وخرت منها ابتسمت ورجعت همست قريب وجهها
رسيل : جبيرج اني ماعندي جبير غير بس الله
عفتها ورحت كعدت وبدا النفاق الاجتماعي هاي تنفخ بنتها والثانية تمدح باخلاقهن ووووالخ جان تحجي اللي اسمها صبرية
صبرية : والله احنا ربينا ونعم التربية بنات اصول ومتربايات ، عيونهن مايرفعنها بعيون الزلم وعندهن احترام للصغير قبل الكبير ومو فد هيج بنات حمولة وگلبهن يوسع الكل واهم شي ماعندهن علاقات وي زلم ومحاضن ، وتختل بالبيوت.
عرفتها تقصدني ابتسمت كلت لعد الشفته فوك شنو جان يلعبون بيت بيوت
استمرن وحدة ترفع والثانية تكبس وملتهيات بالغيبة والنميمة حتى ماحسوا علية من كمت من يمهم
تسحبت على كيفي ورحت ورا المنور شفت اكو دبة مال نفط اخذتها واخذت شخاطة وطلعت للحديقة
نفسيتي كلش تعبانة من وفاة بابا واللي صارلي شي فوك شي كلت اموت احسن من هاي العيشة اللي كلها قهر بقهر..
شلت دبة النفط فتحتها ودرتها على راسي دخلت قطرات من النفط بخشمي وعيوني ، شمرت الجداحة وضليت اكح واشهك ، سمعت صوت واحد اجى ويحجي ، بس ما كدرت اشوفه منو لان دخل نفط بعيوني
ايهم: هاي منو هنا ؟ هييي ؟ استغفر الله ليش محد يجاوب ؟
اسمعه يحجي والصوت صار قريب علية اكثر
ايهم: رسيل ؟ شنو شبيج ، شنو ريحة النفط هاي ؟
فتحت عيني بالكوة باوعتله ، عين علية وعين على دبة النفط مصدوم دنك اخذ الجداحة وباوعلي
ايهم: هاي شنو تريدين تحركين روحج ؟ لج شبيج تخبلتي ؟
كام يصيح على صوته اجى ياسر وصاح
ياسر: شكو شكو شبيك تصيح؟ ياستار
ايهم: شوف تريد تحرك روحها
حجاها والتفتلي كز على اسنانه
ايهم : امشي كدامي للحمام بسرعة خلي وحدة من البنات تسبحج ، شنو هاي الرعونية ؟ وصل بيج الحال تحركين روحج تريدين تبلينا بيج ؟
رسيل: اريد اخلص منكم بكل الاحوال ما طايقة العيشة هنا ما اريدكم شنو غصب خوما غصب ؟
ايهم : مو بكيفج تعيشين هنا وغصبن عنج وين تروحين ؟ ها ؟ كلتلج فترة تحمليها شلون ما جان علما نشوفلج حل شوية اركدي وصيري ادمية..
يحجي ومنفعل جريت الجداحة من ايده ، وركضت ، ركض وراية ويصيح .
ايهم : رسيل لا فدوة لا تسويها لج رسيل
بركضتي شغلت الجداحة اخذت هدومي، وكفت بمكاني من الصدمة ، مامصدكة اني هيج سويت بنفسي ، ما احس الا هدومي انجرت مني واحد نزعني، وفقدت بعد ما حسيت بشي ، غير مي ينزل على وجهي فتحت عيوني بالكوة تحركني ، اباوع نورة واكفة فوك راسي بيدها شامبو وصابون.
اريد احجي ما اكدر بلاعيمي تحركني كحيت وكلت لنور
رسيل : وين اني ؟ ومنو جابني هنا ؟
نور: خلي اكمل غسل النفط ما جاي يطلع من شعرج ، ادري شبسرعة طلعتي ؟ شوكت لكيتي النفط ؟ شوكت حركتي روحج ؟ ليش هيج تسوين بنفسج ؟ صارت مشكله شكبرها الولد تضاربوا بسببج ، انه مو وصيتج لاتسوين مشاكل بعد ؟ رسيل تعبنا ما صارلج يومين و مصيبة اكبر من الثانية تسوينها
رسيل: تعبانة نور وخايفة من نفسي اني مو رسيل والله مو رسيل
خليت ايدي على وجهي وكمت ابجي
تأذت ايدي من خليتها على وجهي تذكرت الجبس باوعت لونه اسود صاير ، وايدي الثانية بيها حمار بس مو قوي
رفعت راسي باوعت لنور
رسيل: منو طفاني؟
جرت حسرة وجاوبت
رسيل : ايهم
سكتت سبحتني وكومتني باوعت هذا الحمام اول مرة ادخل بيه لبستني تراكسود بس شوية عريض علمود تفوت ايدي بردن التيشيرت ، لفت شعري بالمنشفة وطلعنا صار بوجهي ايهم منتجي على الحايط مقابيل الحمام وكله صخام مال نار وتشيرته مشكك ، جان مكتف ايديه ، باوعلي نزلها وكال.ظ
ايهم: هسه زين ارتاح گلبج ؟ بردتي من حركتي روحج ؟
باوعتله ودنكت فشلانة من نفسي ومنهم ، حتى بالموت ما نجحت ، عفته ومشيت بممر طويل بنهايته اكو مثل الكندور ، ومن عنده كبل صعدت فوك، التفتت لنور..
رسيل: ولج هاي وين منين طلعتيني؟
باوعتلي ونفخت بضجر
نور: والله بطرانة مهبوطين من وراج وصارت مصيبة وتالي تسولفين عادي عبالك ما صاير شي، امشي خية امشي شراح نشوف ايام سودة من وراج
مشينا وصلنا قريب شقة ايهم فتحت الباب
رسيل: هاي وين ؟ اروح بغرفتي انام
نور: ابوس ايدج مرة وحدة لاتعاندين ترى لسه الهبطة بگلبي
خجلت منها هاي شصاير، اريد اسألها اخاف تفشلني، دخلنا للشقة ، كعدت على القنفة بالهول
نور: بروح ابوج اروحن بساع اجيب المرهم واجي لا تسوين شي وتخرعينا
رسيل: روحي والله ما اسوي شي
طلعت واني مددت ، هي نومة وهي عيطة ظهري يحركني هاي ليش كمت رحت لغرفة ايهم ، رفعت التيشيرت باوعت حمار بظهري وببطني كلش قوي بس الجلد بمكانه مامحروك ، ملتهية اباوع على بطني وادور بجسمي اخاف اكو بعد.
ايهم : شنو استفاديتي من هيج سويتي؟ مرتاحة؟ ضميرج مرتاح بالسويتيه؟
التفتت مخروعة واشوف ايهم واكف بباب الغرفة
رسيل: صارلك شكد هنا ؟
ايهم: من هيج تحبين نفسج وتخافين عليها، ليش حركتي روحج ؟
دنكت ما جاوبته
تيهم: شو ساكتة انبلع لسانج ؟
رسيل: اسفة
حجيتها ودنكت راسي
ايهم : على ياهو منهن ؟ على اي وحدة تتأسفين ! على ضربتي لاخوية الجبير ؟ لو وكعة جدي وهسه هو بالمستشفى من سمع حاركة نفسج وكع من طوله على ياهو رسيل اعذرج ؟
ضليت ادير بعيوني بعيد عنا ، استحي اباوع بعيونه وكل هذا الصار بسببي
رسيل: بس اني كلت الهم اول ما اجيت ، كلتلهم اني قنبلة هنا وعلى ساعة انفجر عليكم
صاح بصوت عالي فززني
ايهم: وتالي وتالي بصلافتج هاي ؟ لج ما شايف هيج وحدة والله ما شايف شكد مفتر دنيا وشكد مارات بنات علية بحياتي ما صادفت مثلج لا والله
يحجي ويصفك بايده
رسيل: شجابكم علية لعد ؟ ها فهمني شجابكم رجعوني لأهلي احسن للكل
ايهم: انسي هاي السالفة وشيليها من راسج وعيشي يومج ترى كلها حادة سنونها عليج وبعدين ماعندج اهل غيرنا احنا اهلج افتهمتي؟
رسيل:هههه على اساس جانوا زينين و هسه حدوا سنونهم ، عفية لا تضحكني وانتم مو اهلي من وين صرتوا اهلي ؟ اهل تالي وكت والله ياالله..
ايهم: ما حاجي نكته انه لحتى اضحكج وغصب عنج اهلج وكافي تستهزأين احترمي نفسج رسيل
يحجي وخازرني، مشيت عبرته رحت للهول كعدت ، ورا شوية اجى كعد بصفي على القنفة
ساد الصمت بالمكان هدوء قاتل بس اصوت انفاسنا مسموعه
ايهم: تدرين ؟
رسيل: شنو ؟
ايهم: اول مرة بحياتي اضرب اخوية بعمري ما رافع عيوني بعيونه لو غالط عليه بكلمة وحدة ، رغم هو اكبر مني بسنتين ، فد الاحترام اللي احترمه اله مال ابن لابوه ، وتخيلي اليوم بسببج ضربت ابوية ، اي لا تباوعين هيج مروان ابونا قبل لا يكون اخ النا وبسببج خسرته.
رسيل: بس اني ما طلبت منك تضربه ولا طلبت تتجاوز على اي احد اني ردت اموت واخلص
ايهم : مو تروحين كافرة وكبل للنار شنو انتِ ما تصلين ؟
دنكت راسي وهمست
رسيل : اصلي الحمدلله
ايهم : هاي تصلين وهيج لو ما تصلين شلون ؟
ما جاوبته رجع حجى بصوت تعبان
ايهم : رسيل
باوعتله وكلت هممم
ايهم : انه تعبان ونفسي ضاق جاي احس بشعور غريب اول مرة اتعب
قاطعته بكلمة اسفة ، عصب وزاد غضبه وكام يحجي كلام ما اخذت على خاطري منه لان اعرف بيه حالة عصبية ما اعرف ليش الوحيد من دونهم اتقبل اسمعه ومن يحجي ما ازعل منه
رسيل : على فكرة كلشي حجيته ما يزعلني حتى لو تريد توصل لشي من ورا كلامك هذا ما راح توصل ..
ايهم : ليش ؟ لان مو ايدي والضرب ؟
رسيل : حتى بالضرب ما اجي جان اجيت بيد مروان وصرت مثل المي ؟
راد يجاوبني دخلت نور شايلة بيديها علاكة
نور: ها خوية احضرلك ملابس تسبح ؟
ايهم: انه احضر فد عينج عليها وخلها تنام هنا اليوم بينما اشدلها سبلت بغرفتها
نور: صار صار
الفتت علية وكالت
نور : انزعي
رسيل: عزة شنزع ؟
نور: تيشيرتج ، ادهنلج ظهرج وبطنج بيهن حمار هسه يبطبطن
انداريت واشرت الها على غرفة ايهم يعني شلون انزع وهو هنا.
نور: ايهم خوية استعجل اريد ادهن ظهر البنية
رسيل: عزة بعينج مو عيب هيج تحجين؟
نور: انداري ام العيب دخل شايلج بنصنا وما عليج ملابس
كمزت من مكاني
رسيل : تجذبين ؟
نور : وداعة بنتي.
رسيل : شنو شنو ليش وين ملابسي عزة بعيني
صخنت حسيت الدم صعد براسي
نور: جا ياهو النزعج هدومج من جانن لاهبات بنار؟ غير ايهم يا عيارة
رسيل: وشصار بعدين ؟
ايهم: كل الخير صار سولفتلج انه الباقي
جان يسمعنه كرصت نور
رسيل : هسه الا تحجين كدامه ؟
نور: انه وين حاجية انتِ جاي تستفسرين
رسيل: شمدريني هيج صار ، انتظري يسبح ويطلع يلا خليلي دهن حبابة
نور: ماشي
انتضرنا تقريباً ربع ساعة وبعده ما طالع من الحمام
رسيل: وين صار شو تأخر ؟
نور: ايهم يتأخر بالسبح يضل كاعد بالحوض حتى ترتاح عضامه ضارج بشي ؟
رسيل: ما فهمت ؟
نور:تأخيره بالحمام ضارج ؟ عسما ساعة شرايده منه؟
رسيل: وشبيج هيج ضايجة ؟ تحجين بالكوة قابل مأذيتج اني ، نورة مو احجي وياج ؟
نفخت والتفتت علية
نور: يابنت عمي ، اللي سويتيه اذانا كلنا وراح يهجم بيوت بفعلتج، تعرفين جدي بالمستشفى ؟
دنكت وهزيت راسي بمعنى اي .
نور: تعرفين شراح يصير لو جدي ما كام منها .
باوعتلها بقلق
رسيل : شيصير ؟
نور: هاي الحلوك الجوة كلها تاكلج
رسيل: ليش فدوة تايهتلهم اني، خلي واحد يلزم شعرايه مني ويشوف.
نور: شتسوين يعني ؟ صار عندي فضول اعرف؟
حجتها وضحكت
رسيل : شو تستهزأين ؟
نور: لانج واثقه بنفسج حيل
سكتت من طلع ايهم من الحمام فات للغرفة ورا شوية طلع من الشقة
نور: يلا انزعي راح يبطبط الجرح
عصرت عصارتين بطاسة صغيرة وخبطتهن ، نزعت وبدت تخليلي المرهم
رسيل: نورة حبابة بس هالسؤال ؟
نور: كولي اسمعج
رسيل: يعني بدون ملابس جنت كلشي ماكو ؟
نور: نزعج ثوبج لان اخذته النار
رسيل: منو جان موجود ؟
نور: عباد الله كلها
رسيل: صدك تحجين ؟ شلون فشلة ؟ ماراح اكدر اباوع بوجههم بعد ، زين اكولج
نور: كلتي فد سؤال ...
التفتت عليها
رسيل : نورة شبيج حبابة لا تسوين هيج عود انتِ زعلانة مني وشايلة بگلبج علية
نور: فعلاً زعلانه منج وشايلة منج بخاطري
رسيل: شلون اصالحج وترضين ؟
نور: بوكت ما تديرين بالج على نفسج وتخافين الله بالناس اللي تحبج وكتها ارضى عليج..
رسيل: تحمليني حبابة بس هالسؤال ؟
نور : اعرف سؤالج وعليمن تحوصين ، ليش ايهم ضرب مروان ؟
رسيل: صحيح ليش تضاربوا؟
نور : من حركتي نفسج ايهم تخبل نزعج ثوبج بساع ودخل علينا تفاجأنا جان محاوطج ويمشي سريع ، وصلج للحمام وصاح على وحدة من عماتج حتى تسبحج بوراها رجع شاف مروان واكف ، هم جان مخروع عليج وخايف واحد يحجي الحك
رسيل: بالكت يحس بالذنب السواه ويجوز مني، بلكت هذا سبب يخليه يبتعد عني
نور: شاف ايهم وكال
مروان : هاي خوما متأذية
جان يحجي ويرجف صوته
ايهم : انت شتشوف ؟
سكت مروان وصفن ايهم ما تحمل وكعله بوكسات الكل مصدوم بالصار هاي شنو وشجاي يصير ، كام مروان وضربة بوكس على وجهها وتلازموا وصاروا واحد يضرب بالثاني كلنا مصدومين بالكاعد يصير اول مرة نشهد هيج حادثة بينهم
ايهم صاح بعلو صوته.
ايهم : بسببك حركت نفسها كلتلك لا تجيبها للبيت وتبلينا بيها ما سمعت كلامي ماسمعتني دومك تمشي اللي براسك وعلى هواك، مروان هاي حياة بشر مو شغل واثاث تودي وتجيب بيه من مكان لمكان
مروان: انه اعلمك اذا ما خليتك تزوع دم بسيطة وبعدين بكيفي اسوي اللي يعجبني وحسب مزاجي ورسيل من مسؤوليتي محد اله دخل انت والكل يسمع رسيل من مسؤولياتي هنا
عافنا وطلع ، وانه اجيتج للحمام اخذت الشامبو وكلتلها لعمه انه اسبحج.
رسيل: وين راح ؟
نور: ما اعرف
رسيل: لعد جدو شلون تخربط ؟
نور: جان طالع برا ورجع ، استلمته عمه شيماء تشكيله منج بنت ابنك هيج سوت صخمت وجوهنا وخلت الزلم تتلاطش ، وعمة صبرية هم حجتله على ابو شوف شنو بيها ، وتريد ترجع بساع لبغداد وتتزوج ، ومن ماكدرت كامت وحركت روحها .
لطمت على وجهي حيل.
رسيل: عزة بعينهم ان شاءالله كامو يحجون بشرفي هالمرة.
نور: شعبالج الناس ترحم ؟ عبالج راح يبجون عليج ويكولون خطية حركت روحها من الضغوط العليها لو لان تحب ابوها وراح منها ، حبيبة انتِ بمجتمع المرأة عندهم نار واي شي يبدر منها يحرك عوائل كاملة
سكتت راسي راح ينفجر ، حالتي هسه مثل الراد يكحلها وعماها ، استغفر الله ربي
نور: اروح انه اعشي الفيلق الجوا كلها متانيتني انزل ، وبطيت عليهم
رسيل: اخذي راحتج
مرت ساعة وجابتلي الاكل، كعدت اكل لان ميتة جوع ، كملت كمت غسلت ودخلت لغرفة ايهم باردة جانت مددت ونمت بدا جسمي يون مدري الحرك مدري الكسر ماعرف ياوجع بيهن اتحمله لو وجع گلبي اللي ما هود من يوم مات بابا كمت على كيفي رحت لغرفتي جبت المسكنات ورجعت ، شربت الكبسول ومددت نمت رأسن حتى ما فكرت بأي شي
حسيت باليل باب الغرفة انفتح دخل ضوء خفيف من الهول باوعت هذا ايهم سويت روحي نايمة ، تقرب مد ايده تلمس جبيني ومرر اصابعه على خدي كشت روحي انكلبت على الجهة الثانية هو فز وطلع بسرعة وسد الباب
ضليت افكر واتگلب هذا ليش هيج سوة ؟ وشعنده جاي للغرفة باليل حرت وزادت حيرتي بعد اكثر..
ثاني يوم كعدت على صوت دريل يحفر بالحايط ، كمت طلعت من الغرفة ردت افتح باب الشقة شفته مقفول من برا استغربت هاي شنو ليش قافليه دكيته على كيفي، ودخلت كعدت بالهول ، ورا شوية سمعت صوت القفل مال باب انفتح دخل ولد صغير ما شايفته قبل
_ خالو يكول لا تطلعين اكو عمال ابقي بمكانج
ابتسمت وكلتله
رسيل: انت شسمك؟
_علاوي
رسيل: ابن منو انت حبيبي ؟
علاوي: ابن انتصار
رسيل: فدوة
باوعلي ابتسم وطلع يخبل سمين وعنده خدود اموت على هيج اطفال.
مرت ساعة وساعتين ومحد اجى ضليت افتر بالشقة ، دخلت للمطبخ شفت القوري ، تذكرت اني ما شاربة جاي وهسه راسي يكوم يوجعني، خليته على النار وفتحت الثلاجة لكيت جبن طلعته وطلعت صمونه، خليتهن على الميز ، طلعت ريحة الجاي طفيت النار وصبيت بالاستكان وكعدت اكل ، اجى ببالي من رحت وية حسام بيوم الصورة شكد تونست بيومها تجي الذكريات وابتسم
حسيت واحد واكف رفعت عيني واشوفه ايهم فزيت
ايهم: طكن مو ؟
رسيل: شنو؟
ايهم: فيوزاتج طكن
رسيل: شنو يعني ؟
ايهم: يعني جان باقيلج خيط خبال وراح تخبلتي
باوعتله وتذكرت موقف البارحة خجلت ودنكت راسي اكل.
ايهم: صبيلي جاي بيج حيل ؟
رسيل: هاا اي هسه...
كمت على السريع صبيتله وكعدت اكل
ايهم: ادري غير تجيبيلي صمونة شلون اكل بيدي.
رسيل: ما ادري تريد.
ايهم: كلشي ماماكل من البارحة
كمت جبت صمونة وخليتها كدامه
اخذها وكام علك الطباخ حتى يحميها واجى كعد ياكل صفنت عليه شكد عيب منه وين جان عقلي من هيج سويت بس شمدريني هيج راح يصير، شفته ابتسم .
رسيل: ها طكن ؟
ضحك ضحكة عالية بحيث عيونه دمعت
رسيل: راح تختنك على كيفك
كمت اضحك على ضحكته
رسيل : ليش تضحك ؟
ايهم: جنج ببغاء تحفظين كلامي وتحجيه ورا شوية
رسيل: شفتك تبتسم وحدك ورديتيالك
ايهم: اجتي سالفة ببالي وضحكت وما اضنج تريدين تعرفينها ؟
ضل يضحك خبلني
رسيل: اذا تخصني لاتحجيها
ايهم: بلي تخصج
رسيل: اسكت لعد
دنكت حسيت بتوتر عرفته يقصد موقف البارحة
سكت ورا شوية كال
ايهم: تدرين مصائب قوم عند قوم فوائد
رسيل: شلون يعني ؟
ايهم: لا تفهمين احسن
ضحك وكام ، اندار علية
ايهم : لا تطلعين برا اكو عمال ماشي ؟
رسيل: ماشي
راح صار الظهر ساعة وحدة ونصف فات علاوي
رسيل: ها علوش ؟
علاوي: هاج هاي لفة عمه نور دزتها تكول اكلي واخذي علاجج لان ماتكدر تصعدلج فوك.
اخذتها منه وابتسمت
رسيل : شكراً حبيبي تعبتك وياية وكول لنور رسيل تكول عاشت ايدج.
علاوي: العفو
طلع ، كمت خليت اللفة بماعون وخليته بالفرن ، لان ما اشتهي اكلت قبل شوية رحت للغرفة رفعت التيشيرت الجلد لونه احمر و شوية متيبس ، جبت العصارات وعصرت منهن خبطتهن وخليت على مكان الحمار
رحت غسلت ، وعلكت التلفزيون ضليت اكلب بيه ، طلعتلي روتانا زمان طالعة اغنية لعبد الحليم حافظ يمكن هذا فيلم كامل صعدت الصوت شوية وبديت اسمع...
نار يا حبيبي نار
حبك نار مش عايز اطفيها ولا اخليها
دقيقة تفوتني ما احسش بيهـا
نار يا حبيبي .. نار صحتني .. نار خلتنــي
احب الدنيا واعيش لياليها
نار يا حبيبي نار
يا مذوبني بأحلى عـذاب
بابعثلك بعنيّه جـواب
مش لوم يا حبيبي ولا عتــاب
مش اكثر من كلمـة آه
آه يا حبيبي بحبك
آه لو تعرف اللى انا فيه
والشوق اللى غلبت اداريه
كان قلبك يسهر لياليـه
مع قلبي ويقول له آه
آه يا حبيبي بحبك
سمعتها عيوني دمعت ، اجى ببالي حسام شصار بحاله من سمع عياطي وضرب مروان اليه لان وكعت السماعة من ايدي وما لحكت اسدة
مرت ساعه وساعتين وثلاث وماكو احد بس صوت ولد يحجون وصوت الدريل، ياربي شكاعد يسوون طكت روحي وحتى اذا كملوا قابل راح انزل جوة هو اضل هنا كاعدة ، لا بس على الاقل نورة تجي نسولف شوية يخلص الوقت، احجي وية نفسي بصوت
ايهم: خلصتي تعويذتج ؟
رفعت راسي اخترعت.
رسيل: سلاماً قولاً من رب رحيم هاي انت منين تطلعلي انت ؟ مسلطيك علية لو شنو ؟
ايهم: من المصباح السحري اطلعلج.
رسيل: لا قصدي منين طبيت شو ما سمعت صوت باب انفتح ؟
ايهم: حقج ما تسمعين اذا مدري شتحجين وية نفسج حتى خفت منج بعد ما تفوتين لشقتي، ويلا كومي روحي لغرفتج ، حسي اكو واحد متبهذل وهذا مكانه؟
رسيل: انت ليش هيج؟
عكد حاجبه وكال..
ايهم : شبية ؟
رسيل : كل ساعة شكل ساعة زين وساعة ترزل بية ، وبعدين اني ماردت اجي لهنا بس انت ونور جبرتوني.
ايهم: اهووو شو يلا اريد انام لا تدوخيني.
كمت عفته وطلعت صدك انقهرت منه شفت نور واكفة عفتها ومشيت توها دمعتي تريد تنزل فتحت باب غرفتي واتفاجئ خليت ايدي على حلكي واضحك
رسيل : نورة هاي شنو ؟
نور: شكو عليج جدي انسلك ، مرتاحة ونور اخاف ماعندها شغل تجي ترتب غرفتج وتنظفها
رحت حضنتها بقوة
رسيل: حبيبتي بس تصير ايدي زينة اتقاسم الشغل وياج كلشي نسويه سوى
نور: ان شاءالله هسة طيبي بالاول وبعدين فكري ساعديني .
رسيل: هاي منو سوة الغرفة ؟ شوكت جبتوها ونصبتوها ؟
نور: عيني هذا ايهم هججنا من ساعة ستة الصبح ، جاب ابو السبالت خلى سبلت ..
رسيل: وينة ؟
نور: ذاك شوفيه ، وبعدين اجو العمال مال عمي جابوا الغرفة ونصبوها وراحوا وصاحوا على سندريلا حتى تنظفلج الغرفة
رسيل: منو سندريلا ؟
نور: انه اكو غيري يعني ؟
رسيل: اروح فدوه لايديناتج الحلوة والله اعوضج بس اطيب.
نور: انتِ فد صيري حبابة ولا تلاسنين حتى تطيب ايدج قبل لا تنكسر الثانية
كمت اضحك على سوالفها وافتر بالغرفة لونها ابيض تجننن موديلها حديث وراقي وبردات سود وفرشة سودة
رسيل: نور هاي ذوق منو الغرفة ؟
نور: كلشي ذوق ايهم
رسيل: حتى الفرشة والبردات ؟
نور: كلشي بيها هو جابه
كاعد اتفرج بالغرفة فتحت الكنتور لكيت نورة مصفطة ملابسي واكو بعد غير اللي جابهن ايهم هم مسفطتهن.
مرات شغلات بسيطة تصير بحياة الانسان تنسيه جزء من الألم وتفرح قلبه
ورا شوية اندكت الباب وانفتحت التفتت ايهم لازم مقبض الباب وماد راسه مبتسم
ايهم : هااا عجبتج ؟
رسيل: كلش بحيث نستني الطردة مالتك
ايهم: هو طردتج حتى تشوفيها
رسيل : شوكت جبتها شلون ؟
ايهم : وصيتها وجابوها البارحة
رسيل: ما اعرف شلون اشكرك والله انت السويته اليه كلش جبير ويعنيلي هواي
ايهم: الحمد لله يابه من عجبج شي بينا
رسيل: شكراً مرة ثانية
ايهم: محتاجة شي انه رايح بشغلة ربع ساعة واجي
رسيل : سلامتك
ايهم: في امان الله
جاوبناه ، الله وياك
راح ورا شوية صاحوا على نور نزلت ، وصعدتلي ورة نصف ساعة
نور: رسول
رسيل: يوم رسل يوم رسيلو يوم رسول ترى اسمي رسيييل
نور: رسيل وله غسيل كومي جدة تريدج
رسيل: اهوو شتريد مني ؟
نور : ها شنو حجينا ؟
رسيل : ماشي اجيت
كمت بدلت جسمي يحركني بس الحمدلله مو ذاك الحرك القوي رتبت شعري ونزلت ، الله هم مجموعات الحبايب ، سلمت وشفت ثلاثل بنات اول مرة اشوفهن
الجدة: ذن بنات عمج علي سلمي عليهن
رحت بوستهن كاعدات وبالكوه يردن السلام عفتهن وكعدت على القنفة بصف نور ، ورا خمس دقايق تقريباً سمعت صوت ايهم بالكراج ، وبدت رحمه الله وحدة تغمز للثانية، كامت شوق راحت للمطبخ وجابت صينية بيها استكاين وقوري جاي وتمشي باتجاهنا وصلت يمي وجان توكع الصينية و وكعت هي هم بالكاع، كمت عليها صحت...
رسيل : الله الله خوما تأذيتي ؟
جان يدخل ايهم صاح..
ايهم : هااا خير هاي شكو ؟
شوق تبجي وتحجي...
شوق : شفت ايهم شفت هاي التدافع عنها ومن الصبح لسه تشتغل بغرفتها شلون ذبتلي رجل زين ماراح وجهي بالكزاز وطب بعيني
صفنت على جذبها والتمثيل مالتها شلون قابلية عليها باوعت على ايهم عكد حاجبه ، انقهرت حسيته صدك بيها
رسيل: والله كذب مو اني وكعتها هي وكعت وحتى رحت اكومها ، وهاي نور اسألها، نور الله عليج مو هي وكعت ؟
كامت نور راحت للمطبخ ماحجت ، باوعت على ايهم .
رسيل : ايهم صدكني ما اكذب
حجت اخته الكبيرة ..
ازهار: لا انتِ وكعتيها واحنا كلنا شفناج مو بنات ؟
كلهن كالن اي صح هي وكعتها
كمت ابجي جان يصيح
ايهم : رسيل اصعدي لغرفتج وممنوع تنزلين بعد
باوعت عليهم كمت ابجي وصعدت اختنكت حيل ، شنو هاي شنو من قابلية كذب عندهم ، دخيلك ربي استرني منهم
صعدت شمرت نفسي على الفراش دفنت راسي بالمخدة وضليت اشهك وابجي ورا مدة انفتحت الباب ، رفعت راسي واشوف اخته انتصار وعمتي صبرية
انتصار: ها شلونج زينة ؟ بعدج ماشفتي شي حبيبتي هاي اعتبريها تعارف بينا شتكولين عمه ؟
صبرية : ههههه والله عمه عاشت ايديجن تستاهل الصارلها بعد ايدي مروان
تقربت يمي انتصار وكفت فوك راسي
انتصار: شوفي اذا جبيرنا ما رجع للبيت والله لا اخليج بحسرة الهواء التتنفسيه ، ومرة ثانية اذا تجاوزتي حدودج وياه اشوفج شي بعمرج ماشايفته
رسيل: لا تهددين ما اخاف منج
انتصار: عمه ابو المثل شيكول ؟
صبرية : ياغريب كون اديب
انتصار: سمعتي عمتي شتكول ؟
ضليت صافنة عليهن خوش انفتحت جبهة جديدة الله يستر من القادم..