رواية العروس في الثوب الاسود الفصل العاشر 10 بقلم عبير ادريس
يا طارق الباب رفقاً حين تطرقهُ
فأنهُ لم يعد في الدار اصحاب
تفرقوا في دروب الأرض وانتثروا
كأنه لم يكن انس واصحاب
__________________
اخذوا بابا للنجف دفنوه بصف ماما ، الله يرحمهم شكد صعبة من اترحم على اغلى اثنين بحياتي البارحة ادعي ربي يحفظه النا واتخيل هو بيدة ياخذني يسجلني بالكلية ، واسرح بتفكيري من البس البدلة وهو يسلمني لزوجي ، واليوم اترحملة ؟
اباوع الكل كاعد طبيعي ، نسوان بيت جدي منتظرات الزلة على عمة زهرة ، حتى ينافقن ، خواته عمرهن مافكرن يشوفن بابا لو حتى يتصلن بيه على الأقل بس هسه لا طلع اخوهن والعزاء عزائهم ، وكاعدات حسب الاصول ، ويحاسبن بعمة هاي ليش هيج ، وهاي ما يصير وهيج تقاليدنا تكول لازم انتم هم هيج تسوون مثلنا جنا نسايرهم ما نريد عزاء بابا ينكسر ...
رجعوا من الدفنة ، باليل دخل مروان وعمو علي وخالو محمد، اخذوا من خاطري ، خالو كعد يمي بالكاع يحجي ويبجي ، واني گلبي خلصان لو شما يحجون ما يبردون ناري ، بركان مشتعل بصدري وياكل دواخلي ، من اتنفس ، الزفير يطلع حار يحرك بلاعيمي حرك.
حجى مروان وجان صوته تعبان
مروان: كومي جدة نرجع لهلنا ، الدنيا مكلوبة هناك ونصبول الجادر اعتبروا اليوم اول يوم ،ولازم هسه نطلع يادوب نلحك، باجر من الصبح كون احنا واكفين وي الزلم.
الجدة : يلا امشينا يمه لبسن عبيجن يبنات.
صافنة عليها مرية قوية وبحيلها ومبين الكل يخاف منها ، بس كالت كومن ، تطافرن وحدة تلطخ بالثانية.
راحوا واستغربت شعجب ما استفسروا على مقتل بابا ، منو قتله ؟ وليش؟ وشلون؟ اباوع البيت متروس نسوان والعين منصبة بس علية ، أقل تصرف اسويه ينتبهون ، اريد فرصة حتى اشوف حسام واسأله عن بابا ماكو ما اكدر محاوطيني بنظراتهم كلها حقد وغل
روحي تلوب، كمت فتت للحمام غسلت وجهي ، اباوع بالمرايا وجهي صاير احمر على ازرك وشراميخ ، عيوني داخلات بنكرة ، صفنت على روحي الظهر وين جنت وهسه وين ، حسام عازم العالم حتى يعلن خطوبتنا نفسهم اجوي يعزونا بوفاة بابا بدل ما يباركوله بخطوبة بنته، دنيا غريبة وغدارة مالها امان الدنيا عبارة عن امتحانات ودروس وعبر ، فاز اللي نجح بالامحتان وتعلم من الدروس ، واستفاد من العبر .
هاي ثاني صفعة الي، والله يعلم شنو ضامتلي الدنيا بعد جريت نفس وطلعت ، شفتهن ملتهيات ، تسحبت على كيفي وطلعت للطرمة شفت خالو وحسام كاعدين واكو رياجيل ازواج خوات عمة زهرة دكيت باب المطبخ على كيفي حتى يسمعني حسام ويجي ..
رفع راسه بأتجاه المطبخ انتبه علية ، كام واجى دخلت وكفت على صفحة اجى يمي ، حاله من حالي تعبان كلش
حسام: حبيبتي البقاء بحياتج بالي يمج وگلبي ممرود على عمي وعليج
حجاها و كام يبجي واني ابجي ..
حسام: كولي محتاجة شي ؟
رسيل: لا بس ردت اسألك عن بابا شفته ؟
حجيتها والعبرة بزردومي خنكتني
حسام: باعي منو فوك بغرفتج ؟
رسيل: ماكو احد عمة قافلة الغرف ..
حسام:اصعدي ارتاحي لا تبقين كاعدة بنصهن ، اكلتي ؟ اكيد لا
رسيل: ما الي نفس، حسام اني متت ما اتصور اكدر اعيش طبيعي ورا بابا.
حسام: بعده جرحج جديد ، كلشي بالدنيا يبدي صغير ويكبر الا الحزن يبدي جبير وبعدين بأرادة الله يصغر وترجعين لحياتج وتمشي ،اني ما اكلج تنسين ماكو واحد ينسى جان نسينا عمة سوسن بس تتناسين حتى تكدرين تكملين حياتج اللي مجبورة تعيشيها سواء بفرحها اوبحزنها ، الله يعينج ويعينا على فراك عمي ، ماكو بطيبته وحنيته واخلاقة ، اوووف ،الله ينتقم منهم اخذوا غدر.
رسيل: حسام منو كتله ؟ الله عليك ،عرفتوهم ؟ زين من رحتوا للمستشفى بيه نفس؟ حجى وياكم ؟ سأل علية عفية جاوبني الله يوفقك.
لازمة ايدة واهز بيه اريدة بس يحجيلي.
حسام: شاكين ببيت سالم هم السبب بقتل عمي..
رسيل: يا سالم اخاف؟
حسام: اي هو صديق شجن
رسيل: لا ياكلاب ليش ليش مو بابا ما اخذ منهم فلوس مو سكت عنهم هاي جزاته ؟
حسام: هم مو علمود الفلوس اعتقد ياخذون بثار ابنهم لان عمي سكطة وذبه
رسيل:زين شلون عرفتوهم ؟
حسام: ناس شايفين ابنهم الجبير يلاحك عمي من نرجع لحد اليوم عبالهم صدفة، واليوم من انضرب هو جان واكف بدراجة يبعد كم متر عن الحادث ومن شالوا عمي للمستشفى يلا راح.
رسيل: وليش سكتولهم اهل بابا سمعوا بهالشي؟
حسام: اي كلنالهم.
رسيل: شو سكتوا وما سووا شي ما اخذوا بثار بابا ليش ما اخذوا بثاره ليش ؟
حسام: رحنا الهم لكيناهم شايلين قبل يومين ، يعني مخططيلها زين .
رسيل: يعني هيج يروح دمه هدر ومحد ياخذ حقة راح اتخبل
حسام: شوفي مادام عمي على حق وهم باطل ربج يطلع حقه وينقتل بنفس الطريقة القتل بيها عمو ( وبشر القاتل بالقتل)
رسيل: شفته بالمستشفى حجيت وياه جان متأذي شنو كال اخر شي ؟
جر حسرة طويلة وكال
حسام: ارتاحي بعدين احجيلج وعد بس مو هسه.
رسيل: ابوس ايدك بس كولي كلشي ما اريد منك.
حسام: وعديني اذا حجيتلج ، ماتبجين ولا تسوين اي شي وتروحين تنامين.
رسيل: وعد بس احجي .
حسام: من وصلنا للمستشفى جانت آخر انفاسه
سكت وكام يبجي
رسيل: كمل عفية ادري صعبة عليك بس اريد اعرف
حسام : اول شي وصى عليج كال لأبوية هاي بنتك اريدك تعوضها عني وماتخليها تحس بفقدان ابوها ، خليها بعيونك مثلما عوضتوها عن سوسن اريدكم تعوضوها عني والتفت علية وكالي عينك عليها واريدكم تعقدون عن قريب واخذها وسافروا يم اخوانها لا تبقون هنا اهلي مايخلوها بحالها ، واذا متت لا تخلون ريناد ترجع ورسيل سفروها باقرب وقت ، بناتي امانة عندكم ريناد ورسيل ، آران ولد ما اخاف عليه ، وخواته حنينات عليه بس بناتي منو الهن متعلقات بية واختنك وراح نطاج عمره
رسيل: ليش ما لحكوا عليه الاطباء ليش؟
حسام: لا تعيطين رسيل على كيفج هو منتهي جان ويعرفون بيه ما يطول لهذا من طلب يحجي ويانا سمحوله
يحجي واني احس سجاجين تذبح بصدري وگلبي وكل حجاية احس ملح على جروحي تنزل ، كمل كلام ، واني عطت و وكعت من طولي بعد ما حسيت بشي ، ورا مدة صحيت على واحد يغسلي وجهي فتحت عيوني واشوف حسام خالني بحضنه وعمه وخالو وكم وحدة من النسوان واكفين داير مدايري يباوعولي بقلق ويبجون .
عمة : شبيج حبيبتي ليش وكعتي ؟
حسام: ماماكلة شي وتخربطت جيبولها شي تاكله ، ادري ليش هيج عايفيها ، غير وحدة بيكم تراقبها لو ملتهيات بالكال والكلت.
حجت اخت عمة زهرة
_مو عيب خالة شنو هالحجي هي كالت واحنا ماجبنالها لو سادين حلكها عن الاكل ، وبعدين بهيج مصيبة منو اله نفس ياكل.
نتر بيها ...
حسام: حتى لو اجبرها غصب عنها تاكل، تريدوها تلحك ابوها، كومي يمة سويلها عصير ولفة اي شي خل اوكلها .
كامت عمة تسوي اكل، وحسام شالني لغرفة خالو نيمني على السرير وكعد بصفي .
حسام: كلتلج ما احجي عاندتي الا تحجيلي هسه زين الصار؟
ما اكدر احجي اريد اجاوبه ما اكدر صوتي ما يطلع حسيت فقدت النطق .
حسام: رسيل مو احجي وياج يمعودة لا توكعين گلبي شبيج بس تباوعين احجي
كومني وكام يهز بيه ويصيح ..
حسام : احجي رسيل رسيل.
على صوته فات خالو يركض
محمد : شبيها شكو ؟
حسام: يابه رسيل ما تحجي
محمد: شنو؟ شو وخر عنها ، رسوله بابا احجي شبيج شنو الصار احجيلي
بس ابجي ما اكدر اجاوبه ، جابت عمة الاكل ،حسام اخذ الصينية منها وكعد بصفي .
حسام : شو افتحي حلكج
هزيت راسي بمعنى ما اريد..
حسام : لا تخبليني اكلي الله يخليج .
هزيت راسي بمعنى لا .
كام يعيط ويبجي اكو تحفيات بالغرفة شمرهن بالكاع تكسرن ، وطلع..
خالو يحجي ويبجي
محمد: شلون بلوة ياربي اختبارك صعب علينا ، ما اكدر احمله ، الهي برد گلب هالمسكينة باوع لحالها ولحالنا
لاحول ولا قوة الا بالله العلي العظيم .
ثاني يوم من الصبح اجوي خالو علاء وزوجته وولده وبناته ونبراس ما كدروا يجون فيزتهم تتأخر ، كالوا بس يرجع خالو يسافر هم يجون .
فات خالو يبجي واخذ من خاطري وزوجته هم
نصبوا جادر والناس كلها اجتي بفاتحة بابا صار عزاء ضخم ، كل الناس تحبه ما ٠مأذي احد ، وصارت فاتحتين وحدة يمنا ببغداد والثانية يم اهله بالبصرة، خلصت ايام الفاتحة والتفتوا الي على شبيج وليش ما تحجين وحاولي بلكت يطلع صوتج وهاج مي دافي اشربي صوتج يرجع ومن هالحجي
المشكلة يحجون وياية و اني ما اكدر احجي ، اريد اجاوب ما اكدر ، بالبداية عبالي صوتي مبحوح من البجي كلت يومين ويرجع مر اسبوع وصوتي ما طلع ، تخبلوا بيت خالو حسام يمشي ويضرب براسه ويصيح من وراية اني خرستها اني صوجي حجيتلها ، ومن افتهم خالو هو حاجيلي تعارك وياه وصار صياح بينهم حسام منهار وخالو هم.
على اساس يسفروني وية خالو علاء بس حالتي الصحية كلش تعبانة خافوا لا يصير بية شي وما اتحمل سفر كالوا اسبوعين تلاثه ترتاح ونسافر كلنا سوى..
مرت عشرة ايام وحالتي كل مجالها تسوء اكثر، الى ان حسام اصر ياخذني للدكتور راح حجز واخذوني هو وخالو
دخلنا يم الدكتور وشرحوله حالتي، طلب تحاليل فقر دم وبعد كم تحليل انتظرنا برا علما طلعت نتيجة التحاليل طلع عندي فقر دم حاد الدكتور يقرأ بالاوراق ويحجي
_راح اكتبلها ابر تضربها بين يوم ويوم ابرة وهذا كبسول هم تاخذة يومية وبالنسبة لصوتها يرجع لا تخافون هاي اثر صدمة قوية وماتحملتها
ومابيها غير العافية ..
حسام: دكتور يعني شكد ويرجع ايام اشهر سنة غير نعرف ؟
_حالياً ما اكدر اجزم باجر لو بعد سنة ، ننتظر احتمال تحجي غفل واحتمال ما تحجي الا بصدمة اقوة من هاي .
حسام : هههه دكتور تحجي صدك لو تتشاقة وياية؟
_ابني اذا تشوف كلامي شقى وضحك روح اعرضها على طبيب ثاني احتمال افهم مني ، وتفضل عندي مراجعين لاتاخذ من وقتهم.
حسام: شي اكيد اخذها قابل اعتمد عليك ، لو شنو رأيك انتل روحي بالكهرباء حتى اصدمها وترجع تحجي؟شنو من منطق هذا التحجي بيه
_ اذا انت عندك هيج حلول ليش جبتها يمي جان عالجتها حضرتك مبين تفتهم.
يريد يحجي حسام وخالو جرة طلعه برا طلعت وراهم ، صعدنا بالسيارة تعاركوا هو وخالو والطريق كله حسام يسب بالدكتور يكول ما يفتهم
رجعنا للبيت ، نزلت من السيارة اباوع على بيتنل ، شبسرعة هيج تطشرنا وينهم ليش كلمن صار بصفحة ، ليش راحوا مني كلهم ، كمت ابجي وارجف ، اجوي خالو وحسام يتوسلون بية حتى ادخل للبيت
فتت كعدت بالحديقة اريد هواء اريد اتنفس اختنكت صدري عبالك عليه جبل من الهم ، اجى حسام كعد بصفي ، اشرتله بمعنى اريد ابقة وحدي ، كام باوعلي ودخل جوا ، كل شوية يطلع يشوفني شنو اسوي يلكاني على نفس صفنتي ويدخل .
صار الليل اه يا ليل كمت اكرها يهيج علية المواجع واضل كاعدة للصبح كل شوية واحد فاتح الباب يلكوني لو ابجي لو صافنة لو اهز بمكاني واون ، من توفى بابا هجر النوم عيوني ، انام لو ساعة بالنهار بالزايد ساعتين واكعد ، اكلي كلش قليل وزني نزل هواي
ورا اربعة ايام من روحتي للدكتور اجى خالو كعد يمي
محمد: رسولة خابرت ريناد وآران يريدون يحجون وياج خطية بالهم يمج ، انتِ الجبيرة هسه بابا وعيونهم عليج صيري زينة لخاطرهم منتضريج كلنا توكفين على رجليج
على كعدتي واباوع ليكدام مانطيت اي ردة فعل لحجي خالو وهو مستمر يحجي
محمد : زين بس هزي راسج بأي او لا ، تتحملين سفر حتى احجز ونروح يم اخوانج ، بلكت تطلعين من حالتج هاي
ما جاوبت ضليت على نفس كعدتي ، خالو كام يبجي عافني وطلع، حسام مل من الحجي يومية يجي يحجي وياية لحد مايمل يشوف ماكو نتيجة ويكوم ينزل وعمة كذلك ، عجزوا ما يعرفون شيسوون بعد حتى يطلعوني من حالتي هاي.
وبيوم ورا وفاة بابا بثلاث اسابيع تقريباً كعدت الصبح على صوت صياح كلش قوي، حسام وخالو وبعد اكو اصوات مال زلم كمت من فراشي ونزلت على كيفي بالكوة امشي حيل مابية ، طلعت للطرمة واشوف حسام ومروان متلازمين وخالو بوسطهم يفاككهم.
بالطرمة زلم اللي عرفته منهم مروان وياسر البقية ما شايفتهم بس الغريب كلهم شايلين سلاح وحسام وخالو بالوسط ، صفنت عليهم ذولة شجابهم وشرايدين من خالو وحسام وشنو الشي اللي خلى حسام بهيج حال ، منفعل ويصيح من كل گلبه احس وجهها يريد ينفجر يرجف من الاعصاب ومروان يحجي ببرود ولا كأنما واحد كباله كاعد يحترك من فرط العصبية اللي بيها..
حجى مروان مستهزئ
مروان: اثبتلي هي خطيبتك وهسه اعوفها انه ما امشي على الكال والكلت، عندك عقد شوفه الي وانه الم الزلم وادير وجهي وبعمرك ماتشوفني بعد
صاح حسام بعلو صوته...
حسام : اكوله قرينا الفاتحة من جان عمي عايش ، وقبل مايموت وصاني اتزوجها واسافر، بس غير هسه وضعيتها ما تسمح، شلون اتزوجها وابوها ما صارله ثلاث اسابيع متوفي مروان العن الشيطان واخذ عصابتك وروح منا .
ضحك بحقارة ومسد شاربه بيده باوع لحسام ورجع باوع للولد الوياه...
مروان: سامعين بوية لو فد انه جاي اسمع التلوص هذا ...
كاموا يضحكون كلهم بصوت عالي وكالوا
_ اي سمعنا
تغيرت ملامحه عكد حاجبه ونتر بحسام
مروان :شوف حبيبي سالفة الفاتحة وعمي ناطي جلمة ماتاكل يمي ، اشوفني عقد ، اعوفها الك وابارك زواجك هم ، وحتى الزفة احضرها ، تدري انه ابن عمها الجبير ولازم اسلمها بيدي ، فد مال تكولي حجاية ، هاي ما تمشي عندي مو طفل جدامك انه .
حجى حسام بس يرجف موتني قهر...
حسام: عوفك من الحجي هسه اخطبها منكم مادام انتم هنا واجيب شيخ سيد ، شنو يعجبكم واعقد عليها .
اباوع عليهم يضحكون عليه مستهزئين بيه ردت املخهم تملخ وگلبي ما يبرد
مروان: واللي ما ينطيك مرة شتسوي ؟
حسام: مو بكيفك هي بالغة السن القانوني وبكيفها تختار تبقى يمنا لو تجي وياك.
حجى واحد منهم ، بعدين عرفت اسمه حازم
حازم: اهل بغداد حقوق المرأة مطبقينها بحذافيرها، كالك جبيرنا ما ننطي مرة بح ايس يلا...
مروان: سمعت ابن عمها شيكول ، كلنا ما نقبل ننطيك مرة واظن احنا اولى ببنات عمنا ، واذكرك اذا ناسي ، ويمكن جنت صغير بعدك، بوفاة عمتك اجينا وابوية كال جلمة لابوك ولعمك ، بناتنا ما يطلعن للغريب، واذا ناسي هذا ابوك يمك يذكرك، شتكول حجي هيج الحجي لو بكيفي ارطن ؟
اباوع على خالو يرجف خوف على حسام لايأذوه يأشر براسه يعني صح كلامك .
مروان: هاهي ناخذ البنت ونتوكل ، لا الكم شي يمنا ولا النا شي يمكم الجان يربطنا بيكم مات الله يرحمه
حسام: منين الكم ؟ ماعندكم شي يمنا البنات احنا ربيناهن نودي ونجيب مدارس ، وتعبنا عليهن ، انت جاي من تالي وكت تاخذهن ليش يعني ؟ اكتلني واخذها مال اني عايش ورسيل تطلع منا تحلم.
مروان يباوع للسلاح بيده ويفر بيه بصبعه..
مروان: انت سامع ربوني وانه لهلي جزاك الله خير الجزاء ربيتوا والنعم ،احب اكولك للأسف البنات راجعات النا ، هسه رسيل وكم يوم نطير نجيب اختها ، وكان الله يحب المحسنين، واذا تكول اكتلني يلا تاخذها اذا عاندت وتعبتني ، اضربك مايهمني ترى..
عمة كامت تبجي وتبوس بيد حسام حتى يعوفهم ياخذوني وخالو هم نفس الشي يحجون وياه ويقنعوه على فترة ونروح نرجعها هسه خليها تروح، صح انقهرت من تصرفهم بس عذرتهم مهما يحبوني ويعزوني بس يبقى ابنهم اعز مني على گلبهم.
اجى حازم ، جرني من ايدي، واني مابية حيل ولا اكدر اقاوم صحتي تعبانة وعلى كدي مشيت بدون اي مقاومة مني غير بس عيوني على بيت خالو وابجي.
اباوع على حسام خالو حاصرة بالحايط وعمة مجلبة برجليه ما يخلوه يتحرك وهو يضرب براسه بالحايط ويصيح..
حسام : رسيل لاتطلعين لج رسييييييييييييل .
طلعوني للشارع واشوف ثلاث سيارات نوع جيب صعدوا كلهم ولد العم الله يجرم عصابة مو ولد عم ،صعدت بسيارة يسوقها مروان وليكدام ياسر .
جنت بس ابجي ما بيدي شي اسويه حتى صوتي مايطلع واكدر اصيح وادافع عن نفسي واكولهم اريد ابقى ما اريدكم .
مشت السيارات لطريق مجهول لحياة جديدة ماعرف شنو منتظرني بيها ، ورا تقريباً عشرة دقائق من طلعتنا من بيت خالو ، انتبهوا على سيارة تمشي ورانا سايقها يمشي سريع يريد يلحك بينا خفف مروان ، وكال لياسر..
مروان: هذا شبيه هيج يسوق سكران شنو؟ الطريق شعرضه ليش يكسر علينا؟
ياسر: اطبك على صفحة نشوف شنو سالفته
طبك السيارة ونزلوا مديت راسي من الجامة ،اشوفه حسام يا گلبي جاي وراية كمت اضرب على وجهي راح يضربوه وفعلاً تلازموا وياه، فتحت باب السيارة اريد اصيح اريد صوتي يطلع ماكو الى ان انثارت طلقة وشفت حسام وكع صرخت حسام
قصر كبيرٌ جداً.....ظلامٌ حالك.......صمتٌ مخيف
أعمدة تحمل مصابيح مضيئة تصنع أشكالاً قد تبدو مرعبة.... وجوه حقودة انفس غدارة ...
أحيانآ نحتاج من يقول لنا حكمة عن الحياة وان كانت قصيرة، بل هي في الحقيقة تعني الكثير، في وقت المحن والشدائد، في وقت الفراق او الخيانة، الحياة فيها تقلبات كثيرة تجعلنا لاندري الى اين نسير وماذا نفعل لنتخطى المفاجآت السيئة، ونرتقي بأنفسنا لنصبح أشخاص أفضل واقوى لا تكسرهم الأحزان آبداً
(البصرة العشار الساعة الثامنة مساءً)
دخلنا بشارع واسع متكون من سايدين، ارصفة محفوفة بالأشجار ،بيوت كبيرة فجأة وكفت السيارة والسيارات البقية كدام بيت كلش كبير نزلوا، وانفتح الباب الخلفي مال السيارة ، باوعت ياسر واكف وعاقد الحاجب اشرلي بحركة بمعنى انزلي ، نزلت وكفت كدام هذا القصر ، يمكن لو بغير ظروف ومارة من كدامه لكان متت حتى ادخل واشوف دواخله، شنو من بناء فخم وفاخر ، لكن بعيني شنو ؟ عبارة عن سجن كبير واظلم ، والسجان ظالم
نزلت اترنح شبه اريد افقد التوازن انتبه علية ياسر تقدم اتجاهي مد ايدة حتى يساعدني على المشي ، اشرتله بحركة معناها ابتعد ولا تلزمني .
انفتحت باب القصر او بالاحرى السجن ، واشرلي ياسر بالدخول ، التفتت وراية واشوف العصابة اللي جابتني من بغداد كلهم منتظريني ادخل حتى يدخلون ورأيسهم جان مرتاج على السيارة وعيونه علية
بيهم تقريباً تسعة اشخاص ..
دخلت للكراج ، كلش كبير يسع خمسة سيارات ، على يميني حديقة كلش كبيرة واكو كلب حراسة لونه اسود وكبير شكله مخيف مربوط بزنجيل مشيت واتعثر بخطواتي الى ان وصلت باب خشب ضخمة كلش وبيها مقبض كبير دفعت الباب ، اريد ادخل ومترددة ، اقدم رجل ارجع الثانية الى ان سمعت صوت عوجية تضرب بالكاع تعلن قدوم شخص .
رفعت راسي واشوفها ام بابا ، تقربت علية اشرتلي بيديها بمعنى تعالي ابوسج او احضنج ، باوعتلها بنظرة كره وحقد وحسرة و ألم كلهن انجمعن بنظرة وحدة تدل على رفضي التام لأنتمائي لهذه العائلة ، لهناك واجاني صوته اللي اكثر صوت اكرها بالدنيا بدون مبالغة ، ابشع الاصوات والاشخاص المروا بحياتي ، نتر بية
مروان: ما تفوتين لو عاجبتج وكفتج برا ؟
الجدة: عوفها جدة بعدها ما متعلمة علينا انطيها مجال .
مروان: فوتيها لا توكع الطريق كله تنحب وترجف كل شوي اندار عبالي ماتت ، وكعت گلبي يلا وصلتها .
الجدة: شصار وهيج تأذت البت.
ياسر: ماقبلت تجي رادت تبقى يم بيت خالها.
الجدة: جا احنا لفو ( غرب ) تضلين عند الغريب وما تجينا ياجدة ؟
علي ابو مروان : عوفوها تدخل ترتاح استلمتوها من الباب كر كر كر كر تعالي بنتي ادخلي ارتاحي ..
راد يلزم ايدي سحبتها منه حيل .
دخلت جوا اباوع اشخاص هواي بيهم بالخمسين واحد نسوان وزلم واطفال ،كاعدين بمكان كلش كبير بيه كعدة عربية و تخم عادي المشكله كلها تباوعلي عبالك فلم كدامهم والكل ساكت هدوء اخاف تفوتهم لقطة من هذا الفيلم بقيت واكفة بمكاني جانت غترة سودة على راسي جبرني مروان البسها قبل لا انزل ، نزعتها وشمرتها بالكاع ودست عليها ، هو تخبل
مروووان : لج ليش تدوسين عليها؟
رسيل: مثل ما دست على انسان وتلطخت ايدك بدمه ومشيت عادي اني هم دست عليها وادوس عليك هم.
خزرني
مروان: الصبر يارب الصبر
يحجي وينافخ
مروان : رسيل احترمي نفسج وامشي عدل لا تبلشين من اولها مشاكل.
رسيل: محترمة نفسي عدل بس انت مو محترم من تجي تاخذني من نص اهلي انت وعصابتك شنو معناها؟ ها شنو معناها ؟ اختطاف هذا لو مواختطاف؟ تحت تهديد السلاح اخذتوني، ما اريدكم ولا اريد اشوف شكولاتكم كوة هي كوة شخص كاره يسمع حتى طاريكم تجيبوه بنصكم غصب ليش؟ ها ليش؟ اريد واحد عاقل يجاوبني
احجي بعياط وارجف جسمي كله يرجف.
مروان: ها تريدين اعوفج هناك وتلعبين لعب بكيفج لا اب على راسج ولا ام مو؟
يصيح وخازرني .
رفعت اصبعي بوجهه وهددت
رسيل : خلي يكون بعلمك وعلم الكل اني سنة كاملة سنة تعرف شكد ١٢ شهر اني باقية ببيت خالو وبنصهم انام واطب واطلع وية ولد خالي وازيدك من الشعر بيت انخطبنا عن حب ، ويجي ياخذني غصب عليك وعلى الكل وارجع وياه واتزوجه واشوف يا رجال بيكم يمنعني.
ضربني كف على وجهي اختل توازني ، اكو كرسي وراية كعدت عليه لان ردت اوكع
ضربني وجان اهجم عليه ، كمت وركضت بأتجاهه واضرب بصدره بقوة..
رسيل : قذر مجرم ، حقير ، عصابات صايرين ، تخطفون وتقتلون ، شنو فرقكم عن اللي قتل بابا شنو فرقكم ؟ انتو ارهاب اي ارهاب ، اذا صار شي على حسام الا افنيكم والله اقتلكم كلكم ، خلوا ببالكم اني هنا عبوة وزرعتوها بداخل بيتكم على غفلة تنفجر، خافوا مني ولا تأمنون ابد، ناموا وفتحوا عيونكم لان اللي راح اسويه يخليكم تتندمون بكد شعر راسكم لان جبتوني هنا غصب
ضليت اصيح اصيح الى ان فقدت الوعي ووكعت بالكاع ما احس بأي شي بس ببالي حسام شصار بيه وراية صورته ما غابت عن عيوني بكل المشهد اللي صار..
(بغداد الساعة الحادية عشر صباحاً )
نزلت اركض شفت الاسحلة متوجهة علية شمرت نفسي فوكاه.
رسيل: كتلوني وياه حضنته وابجي ، لزمت وجهه وين انضربت شو شوفني كمت اكلب بجسمه بيه دم بس ما اعرف الضربة وين بالضبط رجعت على وجهه ابوس بيه ، متأذي كولي شنو يوجعك كله من وراية اذا صار بيك شي ما اسامح نفسي .
حسام: فدوة الج اهم شي سمعت صوتج ورجعتي كلشي مابيج، رسيل تحبيني؟
رسيل: اا...
توني اريد احجي وانجريت بقوة التفتت واشوف حازم كمت اضرب وادفر بيه واغلط عليه
رسيل : كلب انت ضربته مو؟ شفتك حقير حيوان ، شرمخته ملخته تملخ .
شفتهم توجهوا على حسام ، ضربت بطنه بعكسي هدني وركضت ادفع بيهم واصرخ
رسيل : وخروا عنه جبناء ، كلكم عليه توليتوا ولية مخانيث، حقراء الله لا يوفقكم الله يحرك گلوبكم .
صاح مروان
مروان: ياسر اخذها منا لا اهفها بطلقة وادفنهم اثنينهم هنا
ياسر:امشي شكد صلفة وعيونج ما تنكسر ولج كوم زلم ما خفتي منهم شكد كوية لعد.
رسيل: وخر لك وخر زبالة حرامات انتم اهل بابا والله حرامات، يعرفكم شنو من ملة وماخلانا نختلط بيكم عزلنا سنوات كويلة عنكم جنت اسأل نفسي عن السر اللي يخلي الانسان ينقطع عن اهله سنين هسه عرفت ليش؟
ياسر: شكد تلغين بالعة لسانج جنتي وعلى حظي طلعتيه ؟
يريد يصعدني بالسيارة ما يكدر مجلبة بيدي حيل بالباب اجى مروان سريع ولزموني اثنينهم وصعدوني وصعدوا
قفل الابواب وحرك السيارة ومشى سريع..
رسيل: هاي شنو عفتوه وحده مضروب؟ لكم هسه يموت رجعوله ودوه للمستشفى مو احجي وياكم ؟ياهمج يا حثالة الناس ..
التفتت اشوفه من بعيد متمدد بالكاع بصف السيارة وماكو احد يمه
رسيل: ابوس ايديكم رجعوله نقذوه هسه يموت والله يموت
خليت ايدي على وجهي وكمت ابجي.
مروان: شفت يابه كامت تبوس بالايادي علمود بزر النستلة لج بابا هذا ما يفيدج مو رجال وجلمة اخذيها من واحد خبير بالحياة وشايف هواي منه..
رسيل: رجعوله عفية شنو انتم ماكو بگلبكم رحمة ماتخافون الله؟
مروان: شكد تعوين خليني اسوق مو خبلتيني ، لاتخافين ما يموت ، مضروب برجله واتصلت على خالج نطيته العنوان وجايين عليه بالطريق.
رسيل: حسبي الله عليكم اشوف بيكم يوم.
مروان: هسه جنتي تبوسين الايادي من عرفتي مابيه شي وراح ينقذوه كمتي تدعين علينا ؟ سكد ملعونة وملعبة
شفت من جنت احجي واكول ما تصدكون بية وابوك سواهن هن وبس.
ياسر : لا والله واحد يحجي الحق مو مثل ما وصفتها، لك اتعس بقاطات ، انه ما شايف بحياتي حرمة سوت ربع السوته بالشارع شلون تتماعط وي الزلم .
مروان: عيش وشوف
اباوع عليهم واحد يرفع والثاني يكبس ، حجيهم كله سم ، تعبت بعد ما اكدر احجي شي واتعارك ضليت بس ابجي، باوعت على الطريق والسيارة تمشي سررريع ، تتسابق وية دكات گلبي ، ماخذتني للمجهول، لحياة مختلفة وناس غريبين عني بس بالاسم اقاربي
تذكرت كلشي صار وياية فتحت عيوني اشوف وحدة واكفه فوك راسي وتبتسم ،
شايلة بيديها عطر وخاولي ، مبين جانت تشممني بيه حتى اكعد .
نور: صح النوم يا لبوة .
درت وجهي واشوف نفسي بغرفة كلش كبيرة وبيها اثاث ضخم بس موديله قديم عبارة عن غرفة نوم وتخم
رسيل: اني وين ؟
نور: بغرفة الجد والجدة نايمة بفراشهم ، يابختج ، منو يدخل هنا فد العزاز
رسيل: اريد مي عطشانة .
نور : هسه اجيبلج تدللي.
جابتلي المي اخذته منها وكعدت رجيت ظهري على ظهر السرير ، شربت المي واباوع على هاي البنية اتأمل ملامحها البصراوية..
نور : كولي حبيبة شنو بخاطرج؟
رسيل: انتِ منو ؟
نور: انه اسمي نور بنت عمج جابر واصيرن زوجة ياسر .
رسيل: همم..
نور: انه هنا يمج اللي عاجبج وبنفسج اشري يجيج ليمج.
رسيل: تسلمين ، اريد اخابر اهلي عفية بالي يم حسام.
نور: صعب لو طالبة طلب ثاني اكولج اشلعي عيوني واخذيهن
رسيل : حبابة الله يخليج
نور : صدكيني ما اكدر اخالفهم يأذونا اثنينا..
رسيل: زين اريد انام وين ؟
نور: تنامين هنا لو فوك بغرفة ايهم مسافر وما معروف يمتى يرد.
رسيل: اصعد فوك ما اريد اشوف احد ولا احجي تعبانة
نور : امشينا نصعد ، هاج حجاب خليه على راسج حبيبة حتى مروان ما يحجي ويهوس علينا
رسيل: اني مو محجبة واني اريده يحجي.
نور: رسيل بالج من مروان تراه مو هين .
رسيل: كومي صعديني عفية تعبت
كمت صعدت فوك طابق كلش كبير وبيه ابواب هواي مشيت وراها ، فتحت الباب دخلت وراها المكان عبارة عن شقة بداخل البيت
بالبداية هول وبيه تخم واكو غرفة نوم دخلنا بيها ، الحايط لونه ابيض والباقي كله لون اسود من غرفة نوم وفرشة وبردات شي فخم
رسيل: زين شلون اذا اجى واني نايمة ؟
نور: لا تخافين يتأخر بالسفر ، نامي اليوم بينما عمي يجهزلج الغرفة
رسيل: ماشي.
طلعت افتريت بالشقة ادور بلكت اكو تليفون ارضي ولو هسه قليل موجود. باوعت اكو مطبخ صغير بس حلو مرتب واكو حمام فتت غسلت ورجعت لغرفة النوم اكو ريمونت مال سبلت على الكومدي بصف السرير ، شغلته ورا شوية الغرفة صارت ثلج تغطيت وعيوني غلبها النعاس ونمت لان تعبانة كلش وصارلي ايام ما نايمة ، غطيت بنومتي ما اعرف كم ساعة بس مبين هواي نمت ، كعدت على صوت اثنين يحجون كمت تقربت من الباب واسمع واحد يحجي
يعني سوة الي براسه مو ؟ بسيطة ...