رواية العروس في الثوب الاسود الفصل الثامن 8 بقلم عبير ادريس

 رواية العروس في الثوب الاسود الفصل الثامن 8 بقلم عبير ادريس 

تغير لون وجهه ايده رجفت 

انتجى على بنيد السيارة رحت يمه اريد اقرأ شنو مكتوب بالورقة حتى هيج تغيرت احواله باوعت انصدمت بالمكتوب گلبي صار يرجف عيوني دمعت ما مصدكة اللي قريته .

رسيل: بابا هاي شنو المكتوب بالورقة ؟

عقجها خلاها بجيب بنطرونه صار يتلفت يمين ويسار..

باوعتله بقلق والخوف انزرع بگلبي مسح وجهه بقلق وكال

صادق: اصعدي بسرعة واللي شفتيه بالورقة ممنوع تحجيه لأي احد ..

رسيل: بس بابا هذا تهديد ..

صادق: اعرف تلكيه واحد زعطوط وكتبها لا تهتمين .

رسيل : شلون ما اهتم بابا حبيبي.

ابتسم وكام يسولف ويحاول ينسيني اللي شفته بس اني بالي مو يمة يم المكتوب بالورقة نفسي كامت تلعب ومعدتي گلبت اشرت لبابا يوكف السيارة نزلت اركض للرصيف استفرغت لحدما ارتاحيت .

بابا جابلي مي غسلت وجهي وكعدت على الرصيف كعد كبالي و يباوعلي بقلق ونظراته تتوزع على وجهي .

صادق: ليش هيج صار بيج قبل شوية جنا نسولف ونضحك وجنتي مثل الوردة.

رسيل: بابا راح يكتلوك مو ؟ راح ياخذوك من عندنا ؟ وتروح مثلما راحت ماما اي ادري 

. خليت ايدي على وجهي وكمت ابجي.

كعد بصفي واخذني لحضنه ..

صادق: باقي يمج لا تخافين اضل وياج لحدما كل اسناني توكع وتكومين توگليني بيدج لان ما اكدر اكل وحدي واصير مثل بيبيتج وتكومين تضوجين مني لان كل شوية اريد منج شي ارجع مثل الطفل الصغير واكوم ازعل عليج وتعالي كل شوية لازم تراضيني .

حجيت بقهر...

رسيل : شفايتلي بابا اتمنى تعيش ضعف عمر بيبي واداريك واشيلك بعيوني اذا اكو امنية بداخلي واريدها تتحقق واكثر شي ادعي ربي تصير هي الله يحفظك النه وما اشوف بيك يوم موزين . 

صادق: لا تخافين وصيري سباعية خلي ببالج شغلة كلمن حد يومه اذا الله كاتبلي اعيش سنة يوم واحد ما اعيش فوكاها واذا كاتبلي اعيش ١٠٠ سنة يوم ما ينقص منها 

رسيل: تدري بابا كلشي ما اريد من الدنيا بس اريدك الك ، كل يوم انزل على كيفي اشوفك تتنفس لو لا من ماتت ماما لليوم اني ما انام الليل كل شوية انزل مخروعة اخاف بيك شي .

صادق: اني ما احب البنية الجبانة وتبجي هوواي اريدج تصيرين سباعية وتتحملين كلشي هاي دنيا طويلة راح تشوفين اشكال الناس وتعاشرين الزين والموزين خوما اقل شغلة تصيرلج وبجيتي اذا صارت شخصيتج ضعيفة ومهزوزة محد يحترمج والكل راح يدوس عليج ويمشي وان شاءالله مايجي بطريقج بس الزين ويبعد عنج كل شخص سيء 

رسيل : امين وانت هم 

صادق : كومي نروح للبيت واهتمي بدروسج .

جريت نفس قوي وكمت ،ملابسي كلها مي وتراب عبالك مدري وين جنت اللي يشوفني يگول جانت تلعب بالطين .

وصلنا للبيت وقبل لا انزل من السيارة لزم ايدي .

صادق: انطيني وعد ما تحجين لأي احد عن مضمون الرسالة

رسيل: ماشي بس شلون اذا طلع الحجي اللي بداخلها صحيح وينفذوه؟ اموت بابا اذا صار عليك شي واني جنت اعرف وسكتت ما اتحمل هذا العذاب وحدي..

صادق: بابا هاي شغلة زعاطيط صارلنا سنين هنا منو يعرف هذا شيعي وهذا سني ؟ امشي ننزل ولاتبينيلهم شي لأن ياكلون راسي ويخلصون گلبي مابية حيل واحد ينك فوك راسي

رسيل: هذا هو ما احجي مثلما تريد 

نزلت دخلت جوا وبابا راح للمحل يم خالو شافتني عمة عكدت حاجبها وحجت مستغربة

زهرة: شنو هذا حالج ليش هيج ملابسج كلها طين .

رسيل: عثرت و وكعت 

زهرة: غير تنتبهين خوما تأذيتي ؟

رسيل: لا الحمدلله ما تأذيت ، عمة راح اروح ابدل واجي ما اتأخر .

زهرة: ماشي حبيبتي 

طبيت للبيت گلبي مقبوض وخايفة عبالك واحد عاصره لگلبي عصر .فتت للحمام سبحت وطلعت بدلت ورجعت لبيت جدو شافني حسام جان كاعد بالحديقة ردت افوت واغلس عليه..

حسام: هي هي رسيل 

يحجي ويأشر بيده التفتت عليه بتعب

رسيل: هااا 

حسام: صار ساعة اصيح وين صافنة ؟

رحت يمه كعدت 

رسيل: ما صافنه شلونك؟ 

حسام: شبيج شو وضعج مو تمام صاير شي؟

رسيل: لا بس اليوم سجلت بالمعهد واريد اطلع معدل وخايفة 

حسام: انتِ مو ترحين تاخذين محاضرات ؟ 

رسيل : اي

حسام : من ترجعين اشرحلج الما فهمتيه وامتحنج تصيرين توب اهم شي الخوف تشيليه من راسج لان يطيح حظج شلون اني اول سنة هم صار بية نفس الشي بسبب الخوف 

رسيل: الله كريم لوقتها لعد وينهم شو هدوء ؟

حسام: ريناد وثائر راحوا وية امي للسوك ..

رسيل: شعندهم ؟

حسام: ريناد تريد ملابس ..

رسيل: وثائر شعنده رايح وياهم ؟

حسام: يخاف عليهن هههه ..

رسيل: والله خوش صار رجال ثأوري ..

حسام: الدنيا تركض ركض بينا ..

رسيل: اي والله صدك ...

حسام: رسوله شنو رأيج نطلع نغير جو ؟

رسيل: وين نروح ؟

حسام: بكيفج وين ما يعجبج نروح ..

رسيل: حسام دائماً تجيني بالوكت الغلط بوكت لو ضايجة بيه لو نفسيتي زفت.

حسام: انتِ يايوم ماضايجة؟ ونفسيتج مو زفت من شفتج وشفتيني تبجين بوجهي .

رسيل: هاي اني؟ 

حسام: لا ابوية عن الحلال والحرام شفت اسنانج بالشمال حتى اكون منصف شو بله خلي اشوف خاف ينرادلهن تقويم حتى ما اورط روحي.

رسيل: تورطها بشنو ؟

حسام : هاا ، حك راسه ، قصدي اتورط اكوم اودي واجيب لدكتور الاسنان تدرين يحتاج جلسات كومة .

رسيل:اسناني يخبلن مسطرات تسطر حير بأسنانك الصفر مال جكاير .

حسام: هاي اني ؟ 

رسيل: وحلكك ازرك صاير ،عوفهن عاد كافي مو خطية خالو يومية مغثوث من وراك؟ 

حسام: غير صوج فد وحدة مفرفحة گلبي من وراها اشرب جكاير ..

رسيل: منو هاي ؟ اذا هنه كم وحدة الله اعلم ..

حسام : وداعتج هي وحدة ومشيبة گلبي..

رسيل: وياك بالكلية ؟ 

حسام: لا 

رسيل: اعرفها ؟

حسام: تقريباً

رسيل: الله عليك كول منو الفضول يقرأ الف 

حسام: وعد اكلج بس تخلص هاي السنة 

رسيل: شمعنى ؟

حسام: عندها امتحانات وما اريد احد يعرف اخاف تصيرلها مشاكل .

رسيل: ننتظر شنو ورانا بس هي تدري بيك لو لا؟

باوع علية وجر حسرة قوية ..

حسام: ما ادري تدري بية ومغلسة لو ما تدري واصلاً ماعندها احساس اني هم حاير مثلج.

رسيل: الزمها وكوللها يابة اني معجب بيج وفضت راحت 

حسام: اخاف اخسرها ؟

رسيل: وليش تخسرها انت اللي عليك كول الها قبلت بيك كان بها ما قبلت هي الخسرانة

ضحك ضحكة قوية رجع راسه ليورا وكال ...

حسام:لنفرض فرضية ها مو تتعاركين 

رسيل: يلا افرض ابو الفرضيات وشبيك خايف ؟ 

حسام: مو خايف 

رسيل : احجي لعد ..

سحب نفس قوي وكال..

حسام : اذا طلعتي انتِ المقصودة شنو ردة فعلج ؟

رسيل: اني وحسام ههههه شلون دبرتها بله؟

حسام: ليش وشناقصني ايد رجل 

باوعت عليه من فوك ليجوه ..

رسيل: الصراحة ما ناقصك لا ايد ولا رجل بس عقل ماكو وفد واحد معقد تحاسب على الصغيرة قبل للجبيرة وعصبي ومرات مرات هااا مو دائماً تصير خبيث .

حسام: طلعتيني انكس من ....،خليني ساكت لو ماسائلج احسن ، اكلج ..

رسيل: كول

حسام: اني اوصلج بعد للمعهد وكوليلي بأي وقت تكملين حتى اجي اخذج .

صفنت كلت وية حسام احسن حتى بابا تصير طلعاته قليلة بس للدوام والعصر خالو وياه هيج ما اخاف عليه

رسيل: هاهي بس راح اتعبك ..

حسام : تعبج راحة عيني ...

رسيل : شكراً ضلع

حسام : تدللي..

ضلينا نسولف الى ان اجوي من السوك ودخلنا جوا. 

ثاني يوم العصر صار وقت المحاضرة بعدلها نصف ساعة بدلت على السريع بدون حتى ما اباوع على المرايا سادس بعد والضيم بدأ مو بحال شكلي .

نزلت رحت لبيت جدو اول مادخلت للمطبخ صحت...

رسيل : هاا بدينا نتأخر وينك عيني ترى راح ابطل وشوف اذا خليتك توصلني يا حسامو ابو سنون وينك... 

وجان اسمع صوت مجموعة مال ولد يضحكون .

عززة بعيني ذولة منو توني اريد افوت للهول وجان يطلعلي حسام وسد حلكي .

حسام: ثول حتى ثول الثولج لج شبيج جنج دلالة صوتج يلعلع جماعتي هنا فضحتيني خرب بيومج وشكو جاية من هسه ادري امتحان وتخافين يروح عليج ؟

وخرت ايده من حلكي وهمست

رسيل: ولك تروح علية المحاضرة بعد نصف ساعة..

حسام : اي بعد وقت 

رسيل : بلغوتك هاي طارت ربع ساعة ما ضل وكت يلا لو اروح لبابا يوصلني.

حسام: جيت جيت راح اطب اطرد جماعتي واجيج انتظري يمه منجن نسوان لو بيت بلاء .

ضحكت على سوالفه ، راحوا جماعته طلعهم من الباب مال غرفة الخطار وصاحني...

حسام: يلا نيوتن امشي تأخرنا على قوانين الجاذبية 

رسيل: قلد قلد ع اساس انت انشتاين بذكائك ..

زهرة: شكد تتناكرون ماتكولون ناس نايمة دنيا الظهر ..

حسام : اسم الله هاي منين طلعتي يمعودة ارجعي نامي واستهدي بالرحمن ،سلاماً قولاً من رب رحيم .

شالت الشحاطة وشمرتها عليه ..

زهرة: امشي شكبرج تصير وعقلك هلكدوته .

رسيل: شوف انشتاين مو بس اني اكول عقلك صغير عمة هم ..

حسام: التمن علية بعد شيخلصني امشي عيني ست رسيل

رحت للمحاضرة وعرفت شكد اتأخر ورجعت بلغته بالوقت وراح 

استمرت الايام بين محاضراتي وبين البيت .

السنة اني سادس وحسام رابع كلية هاي السنة الأخيرة وريناد صف رابع اعدادي وثائر خامس وآران حبيبي صف اول ابتدائي .

مر شهر من سالفة التهديد عمة استلمت بيتنا تنظيف لأن اني سادس ما خلتني اسوي اي شي بعد 

وصلت للحديقة كاعد تكنس بيها وصاحتني .

رحت عليها 

رسيل: ها عمة 

زهرة: تعالي اقري هاي شنو عزة بعيني ؟

قريت الورقة ولطمت على وجهي كلتلها..

رسيل : عمة هاي ثاني مرة تدرين

زهرة: ليش شوكت اول مرة ؟

رسيل: قبل شهر 

زهرة: وهاي ساكتة؟ لو كاتليه لأبوج غير تحجين ..

رسيل: هو ما قبل وكال ازعل اذا حجيتي 

زهرة: واذا زعل يزعل ولا يموت امشي للبيت ابقي هناك واروح اصيحهم من المحل واجي 

راحت عمة ورا ربع ساعة اجوي كلهم 

محمد: هاي وين لكيتيها ؟

زهرة: بحديقة بيت صادق وتكول رسيل هاي ثاني مرة 

باوعلي بابا مخنزر 

محمد: شوكت شو مندري احنا ؟

صادق: لا تخبص روحك السالفة قبل شهر قديمة لو صدك كد كلمتهم جان اني شابع موت بس تهديد فارغين تلكاهم كم زعطوط زايعتهم الكاع وكاعد يسوون بلبلة بالبلد .

محمد: خوفك من الزعاطيط ليش ما كاعد تسمع بغير مناطق بدت الطائفية وناس تشيل ناس خوية هاي شغلة مابيها ضحك روح للبصرة لو تسافر للأردن يم علاء بكيفك بعد بس مال اخليك هنا تحلم.

صادق: ما اروح لأي مكان يكتلوني خلي يكتلوني وما اريد اسمع حجي زايد . 

كام عافنا و طلع.

وجان نسمع صوت طلق قوي وقريب طلعنا نركض مثل المخابيل وجان نشوف بابا كاعد بالكاع وايده على اذانه سادها من الصوت ، خالو من شاف بابا مابيه شي ركض عليه وكع بنص الطرمة كام بابا عليه .

صادق: الله الله شبيك يمعود عدت سلامات ...

خالو تربع بالكاع وكام يبجي واحنا حاضنين بابا ونبجي .

صادق: شبيكم يمعودين عليش هالبجي هياتني ما متت 

محمد: اخ اخ لك ليش هيج تسوي بينا اذا ما تخاف على نفسك خاف علينا والله نموت وراك لك اني ماعندي غيرك بالدنيا انت اخوية وصديقي...

يبجي بصوت اعلى من صوت البجي مالتنا

كومة بابا وغسله برا انتجى خالو على الحايط منتهي الوجه اصفر متت قهر على حالته .

دخل حسام باهت

حسام: ولد الكلب مزرفين سيارتك 

صادق: مالتي ؟

حسام: اي ولكيت هاي الورقة عليها 

اخذها بابا منه وقراها ضل ينافخ بضجر ونفاذ صبر .

محمد: حسام شنو مكتوب بالورقة؟

حسام: كاتبين صار كم مرة نحذرك هاي المرة الضربة بسيارتك المرة ثانية بيك .

محمد : والورقة مال قبل شهر شنو مكتوب بيها ؟

صادق: كاتبين لخاطر بنتك ما نقتلك كدام عينها شيل واطلع من المنطقة احسن الك، نريد انظفها من الروافض .

محمد: لا اله الا الله، كام يضرب على راسه ، لك صار سنين كاعدين ما نعرف البيت اللي مقابيلنا طائفته شنو؟ سني لو شيعي هاي اني وياك مو طوائفنا تختلف وعايشين سوى فد يوم اجيت تدخلت بصلاتك كلتلك ليش ما تتجتف مثلنا اجيتني انت وكلت سبل ايدك .

هاي بالجديد كم كوا*** وابن كلب طلع هاي السوالف و يتحكم بمصير الناس عيني خصم الحجي ماتبقى هنا لو اعرف اشيل وياك ومن باجر اعرض بيتي وبيتك للبيع وحجاية ما تحجي .

مد ايده بابا كومه من الكاع .

صادق: كوم ارتاح وبعدين نحجي 

محمد : ما ارتاح ولا يهدالي بال الا احل شغلتك .

كعدوا بالهول يتناقشون بابا مستبعد فكرة روحتنا للبصرة نهائي .

محمد: مبقالك حل غير السفر 

صادق: ليش اسافر؟ اشيل لغير منطقة 

محمد: راح تضل جاي علينا ما تكعد راحة سافرلك سنة يم علاء ونشوف الوضع بلكت يستقر وربك يسهلها وترجع لبيتك .

صادق: دوامي شلون دوام البنات هاي رسيل سادس خطية ليش تروح عليهم السنة

محمد: تروح عليهم سنة ولا يروح ابوهم منهم شتكولون بنات ؟

رسيل: طبعاً مستعدة اعوف الدنيا كلها واجي وياك مو بس دراستي 

ريناد: بابا اني هم اجي وياكم ..

محمد: ماعندك حجة بعد هذا هو واذا على دراستهم نشوف هناك بلكت يكملون نخابر علاء؟ويشوفلنا الوضع.

حسام: ليش رسيل ما تبقى هنا وتكمل السادس حرامات مادام بلشت بالدروس مالتها.

محمد: شكو بيها هم خوش فكرة اخليها بنص گلبي وبيدي اوديها واجيبها .

صادق: شلون حجي هذا اعوف بنتي وحدها واروح لا عيني لا طبعاً ما اقبل.

محمد: وليش كاعدة بالشارع وما تقبل لو متأمن بينا ؟ 

صادق: يلا بله اني وين كايل هيج لو تكولني كوة ؟ 

مامتعود بناتي ساعة يضلن بعيدات علية مو قصة ما أمن لو ماعندي ثقة بيكم عيب هالحجي محمد.

زهرة: خصم الحجي رسيل تبقى يمنا تكمل هنا وبعيوني اخليها واللي يوديها ويجيبها حسام.

اباوع على بابا حاير يباوع علية وعليهم .

الله يحيرهم مثل ما حيروك ويحرك گلوبهم مثل ما حركوا گلبنا ويفرق جمعهم مثل ما راح يفرقونا 

صادق: هذا هو خلي اخابر علاء واشوف الوضع هناك شنو وضع المدارس الشغل 

خابر بابا وضلوا تقريباً ساعة يحجون على الاجراءات وشيسوي بابا .

اتفق وياه يأجرله شقة علما يروح حتى يستقرون بيها .

خلال اسبوع واحد راح خالو لمدرسة ريناد جاب اوراقها من المدرسة وبابا اخذ اجازة سنة بدون راتب وشرح الهم سبب الاجازة ، وحضروا جنط السفر واني عيوني تفتر عليهم شلون راح افاركهم صعبة والله صعبة ، انتبه بابا عليه عاف البيده واجى كعد يمي .

صادق: ليش ما تجين ويانا وهناك كملي دراسة لو عوفي هاي السنة ومن نرجع كمليها.

افرك بيدي واحجي وياه ..

رسيل: بابا منو يكول يرجع الوضع طبيعي خليني هنا اكمل هاي السنة واجي اكمل دراستي هناك بحال اذا ضل الوضع موزين.

صادق: والله مو هينة علية اعوف قطعة من گلبي هنا واسافر لغير بلد وانتِ مابيه .

كام يبجي واني ابجي ردتها حجة اطلع القهر البگلبي.

مسح وجهه وكال...

صادق: كومي بابا نامي شوفي وجهج شلون صار واني هم راح انام وراية سفر.

رسيل: عادي انام يمك اليوم، حجيتها بخنكة ؟ 

صادق: اليوم الجلاليق للصبح تشتغل على ابوج هههه يلا كومي غسلي وتعالي نامي .

نمت يم بابا وحاضنته بقوة كضيت الليل كله اباوع عليه اريد عيوني تشبع منه شوف ...

صادق: نامي عاد مو حفظتي وجهي على الغيب ..

رسيل: شنو كاعد ؟

فتح عيونه واندار علية 

صادق: غير اكو وحدة بس تحوص ما خلتني انام

رسيل: والله ما تحركت ..

صادق: نامي كافي ما ضلت بس ساعتين ونكعد يلا حبيبتي .

هو هم ما يكدر ينام مثلي ومتأكدة يفكر

بالكوة غفيت واول ما كعد بابا فزيت حتى هو اخترع ...

صادق: اسم الله بابا شبيج

رسيل: مابية بس خفت انام وترحون وما اشوفكم .

صادق: شلون اروح وما اودعج كومي يلا كعدي اخوانج 

رسيل: گلبي كام يوجعني يعني اكعدهم حتى يروحون مني وما اشوفهم منا لسنة كاملة..

كعدتهم بدلت ل آران و كل شوية ابوس بيه لو اروح احضن ريناد .

رسيل: رنودة انتِ عاجبج تروحين؟

ريناد: لا 

رسيل: لعد ليش وافقتي ؟

ريناد: اذا اني ما اروح وانتِ ما تروحين بابا ما يروح .

رسيل: هم صدك ، حبيبتي ديري بالج على نفسج وعلى آران وبابا هسه انتِ الكبيرة بعد داريهم زين .

ريناد: ان شاءالله ...

حضنتني تبجي واني ابجي الى ان سمعنا صوت بابا يصيح يلا ريناد تأخرنا .

گلبي انشلع بالزايد اريد انزل الدرج ما اشوف زين من الدموع التنزل 

طلعنا لبيت جدو لكينا خالو وحسام مبدلين حتى يوصلون بابا .

دخل بابا على بيبي بوسها وماعرف شنو حجى وياها سلم على خالة سهاد و اجى للهول سلم على عمة زهرة .

صادق: ام حسام الطيبة الاصيلة ام الوكفات الحلوة ، لو شما اسوي ما اجازي ربع تعبج وياية و وية البنات الله يحفظج ويبارك بيج وبعائلتج يا اختي ونعم الاخت .

اندار على خالو..

وانت يا اخوية ونعم الاخ ، اخ مو بس بالاسم ، اخ المواقف والصعاب ، سنين انت عكازتي وتجوتي من اتعب ودومك بظهري وساندني الله يخليك اليه ذخر وسند .

خالو بس يبجي اختنك ما كدر يحجي ولا كلمة

وانت حسام ابني الكبير واخو لبناتي طول عمري مأمن عليهن يمك لان انت تربيت على ايدي ومن يوم يومك اصيل واخو خيتك وما فد يوم طلع منك عيب اريدك تدير بالك على اختك وعينك عليها كون من اجي تكولي عمي هاي امانتك مثل ما عفتها لگيتها.

حسام: تتدلل عمي روح وأمن بعيوني رسيل اخليها.

صادق: والنعم منك سالمة عيونك 

التفت عليه ، اخ ياربي اجى دوري بس ابجي ما اشوفهم زين غواش بعيوني صار..

صادق : بنتي السباعية اريدج قوية وماتبجين اريدج جبل متنهزين شجرة قوية شما عصفت الريح بيها تبقى ثابتة بمكانها اريد اروح وارجع الكاج مطلعة اعلى معدل، اكثر من اللي اتمناه اني .

حضنته وبوسته وحضت ريناد وآران وما كدرت احجي ولا كلمة..

محمد: يلا كافي تاخرتوا اني طالع قبلكم للسيارة حسام تعال صعد الجنط .

راحوا صعدوا واخذوا گلبي وياهم ما جنت اعرف هاي اخر حضنه لاخوتي وبعد ما اشوفهم ما جنت اعرف هاي آخر نظرة مني الهم جان ترست عيوني شوف منهم، جان عفت كلشي ورحت وياهم راحوا واخذوا گلبي ، ما حسبت حجي بابا اللي حجاه كله راح اعيشه جان يقويني كأنه حاس باللي راح يصيرلي من بعده..

مر اسبوع على روحتهم و حالي حال الميت ما تحملت فراكهم خصوصاً بابا رغم شكد جان يسافر ويروح مرات اسبوع ويرجع بس جنت اصبر نفسي اكول كم يوم واشوفة بس هسه لا سنة كاملة ويجوز اكثرر.

حسام: رسيل رسيل وينج ؟

رسيل: هياتني حسام

حسام: يمعودة كومي بدلي محاضراتج راحت ما كافي اسبوع راح منج ..

رسيل: ما اروح ..

حسام: بس يخابر عمي اكوله لو ليش انتظر يخابرني اني نازل اخابر .

رسيل: هوب هوب انت ما صدكت صاير حاروكة كل مايخابر ومفتن رسيل ما اكلت رسيل مانامت رسيل ماتدرس.

حسام: لا تنسين انتِ امانه خلوج عندي .

رسيل: يوو راح يكرعني هسه بابا الا يحجيلك هالحجايتين.

حسام: دكومي يلا لو اجرج جر ..

رسيل: كمت كمت بس وخر ..

حسام : منتظرج اذا ما نزلتي اصعدلج تدرين بية خلكي طويل وياج..

رسيل: ماشي اجيت بس لبدل

بدلت على السريع ونزلت طلعنا وصلت للمعهد ، اخذت كل المحاضرات وطلعت لكيته واكفلي ابتسمت .

حسام: هاي شلون ورطة ورطت روحي بيها 

صعدت وصعد بصفي ...

رسيل: ليش ياورطة ؟

حسام: تعال يومية ودي وجيب وانتظر اقل شي نصف ساعة علما تطلع ست الحسن.

رسيل: منو كا لك اتبرع صوجك 

حسام: ما تبرعت كربسوج براسي شلون امانة ثكيلة على الگلب

ضربته على جتفة حيل كام يضحك ..

رسيل: والله ماكلتلك وديني وجيبني انت تبرعت ودكيت على صدرك وبعدين خالو موجود الله لا يعوزني عليك..

اختنكت وبجيت عبالك ردتها من الله ، اعرف يتشاقة بس اني صايرة ما اتحمل حتى اذا واحد گلي شلونج ابجي .

حسام: اهوو هم بجت يمعودة اتشاقة وياج ياكلمة ردلي لمكانج توبة بعد اذا اتشاقيت وياج بس اسكتي .

مرت الايام نفس الروتين محاضرات ومدارس بدات ويومية اخابر بابا وريناد وآران اضل ساعة احجي وياهم واكوم اقرأ ، الشي اللي مامفتهمته حسام يشرحه الي ابد ميمل مني ولا يتعب..

للمدرسة خالو رجع يوديني ويجيبني بطلني من الخط خاف يصير شي ما يأمن باحد بعد ،وحسام حاير بمحاضراتي 

مرت الشهور دخلنا شهر الرابع سنة ٢٠٠٦ 

سنة المأساة سنة الطائفية والتهجير سنة القتل.

زاد الخوف وزاد الرعب ما نعرف مصيرنا شنو حدنا للساعة ستة برا البيت رجال اللي يطلع بعدها ، القتل والخطف بفلس صار والبيوت كامت تنباع بنصف سعرها الناس تريد بس تسلم بروحها كل مناطق بغداد هيج صارت ماكو منطقة سلمت من الخطف والقتل والتهجير للأسف وضع البلد يرثى له...

وبيوم ٤/١٨ جان يوم الصورة مال حسام قبلها بيومين توسل ل بابا ياخذني وياه للكلية بالبداية رفض بس حسام كدر يقنعه على ضايجة وصار هواي ما طالعين بسبب الوضع وخلي اونسها شوية وهم يصيرلها حافز للأمتحانات من تشوف جو الكلية بابا وافق ، اخذني حسام اشتريت زي نيلي بنطرون قماش وسترة وياها قميص ابيض .

رسيل: ترة عندي ملابس كومة ، ليش الا البس مثلكم يعني هاي اللي ما فهمتها ؟ 

حسام: اريدج توكفين بصفي من اخذ الصورة الجماعية..

رسيل: شعندي واكفة وياكم والله استحي عفية لا تحرجني ..

حسام: لخاطري اول مرة اطلب منج طلب وترديني ؟ 

سحبت نفس قوي وهمست..

رسيل : ماشي ...

صار موعد الصورة سشورت شعري ولبست القاط خليت مكياج خفيف 

بهاي الفترة خالو نقل جربايتي والكنتور لبيتهم نطوني الغرفة الفوك عشت يمهم ...

صار موعد الصورة سشورت شعري ولبست القاط خليت مكياج خفيف

نزلت حسام مخبوص جان و يفتر خاف ناسي شي .

رسيل: هاي شنو ؟ كملت وانت بعدك ؟ 

التفت علية صفن فتح حلگه باوعلي من فوك ليجوة .

رسيل: يمعود حلكك سدة راح يوكع بالكاع الوو ، ههههه شبيك حسام 

احجي وألوح بيدي ..

حسام: ولج هاي شطالعة يمبخوتة بطلت ما اخذج .

رسيل: يلا بعد احسن ارجع انام التفتت حتى اصعد ركض قبلي صعد الدرج وجرني .

حسام: شبيج ما تتحملين شقة ؟، امشي ما اروح اذا مو انتِ وياية 

رسيل : بطل زناخة 

حسام : ماشي اعتبريني بطلتها من هاي اللحظة..

طلعنا وصعدنا بسيارة خالو مشينا شوية وكال اهوو ضرب على كصته .

رسيل: شكو يمعود ؟

حسام: لج نسيت سترتي 

رسيل: ههههه زين ما نسيت روحك 

حسام: اي والله زين ما نسيتها 

رجعنا نزل جابها وصعد طول الطريق يتلفت علية ويكول والله مال ارجعج شلون بية هسه واني اضحك

حسام : افتحي الجكمجة .

رسيل: فتحتها .

حسام: ناوشيني هذا القرص.

رسيل: هاك ..

خلاه بالمسجل مال السيارة وشغلة ضل يگلب بالأغاني 

رسيل: اصفالك على وحدة مو راسي بدا يوجعني

حسام: اصبري اكو وحدة احبها هسه تطلع ، اي هاي 

صعد الصوت جانت اغنية لكاظم الساهر .

ما عندي ألماس وقصر .. لكني ميسور الحال

عندي گلب ليرة ذهب .. وصحتي عال العال

ما اواعدك الا أوفي موعدي ..

خطوة خطوة منا حبنا يبتدي ..

بيت على كد أحلامنا .. وعيشة على كد الحال

تغنينا كلمة من الگلب .. والغنى مو بالمال

يدندن بيها لحدما وصلنا لزم ايدي ودخلنا سوى للكلية .

رسيل: والله حلوة كليتك 

ابتسم وكال..

حسام: بس مو احلى منج ..

رسيل: حسام كافي عاد ..

شدد لزمتة على ايدي ، ومشينا لحدما وصلنا للقسم جانت اجواء تجنن الكل مخبوص ولد وبنات .

شافنا ولد مبين صديقه لحسام غمزله وكال

_ ها لك هاي منو وياك ؟ 

حسام: انجب ما عليك لا تباوع لا افكس عيونك

عمر: ما اباوع عمي راح اغمض بس شنو هاي صاروخ 

حسام: عمر لا تخليني اتندم جبتها وياية ولو اني متندم، اكعد راحة احنسلك

بقى يصنف ويضحك مبين صديقه المقرب .

بعدين صاح على بنية واكفة ليغاد مخبوصة جانت وية البنات .

حسام: سارة سارة تعالي 

التفتت عليه وضحكت

سارة: هلو شلونك هاي منو الحلوة وياك ؟

حسام: بت عمتي رسيل..

سارة: الله هم اسم حلو وهم وجه يجنن ..

حسام: قل اعوذ برب الفلق يمعودة لا تحسديها اصلاً متندم جبتها وياية

سارة: لا عيني ما احسد اني بس والله حلوة ..

حسام: امشي لج صوجي صحتج ، ياربي وين اضمها من عيونكم

رنا: هاي منو اليوم وية حسااااام واخيراً تعرفنا على الحب .

حسام: ياحب لج اسكتي فضحتينا 

تغمزله وتحجي ..

رنا: ياحب يعني اللي اربعة سنوات خلاك ما تشوف احد وتمشي كمب الحيط تعال عمر وينك عمررررر ...

حسام: ها راح تنصبون علية مو؟ بسيطة اني الكم

عمر: ها رنووو شفتي الصاروخ ؟

رنا: شفت شفت واخيراً عرفنل منو حبيبة الگلب .

ضلوا يحجون بيناتهم ، كلش ضجت وحسيت بتوتر وابد ما ارتاحيت ، جريت ايد حسام شاورته .

رسيل: حسام دنك احجي وياك ..

حسام: ها عيني شنو ؟ 

رسيل: ترى ضجت شنو هالحجي والتلميحات حاجيلهم شي عني ؟ 

حسام : لا ابد 

رسيل : امشي رجعني ما ابقى هنا ولا لحظة..

حسام: تعالي نكعد بمكان هادئ ونحجي..

رسيل: لا عفية رجعني وانت ارجع اخذ راحتك وية جماعتك ليش تتقيد بية؟ 

حسام: ماتقيد ولا شي امشي نكعد وهم ناكل شي قبل الصورة بعد ساعة موعدها .

رسيل: ماشي ..

لزم ايدي وطاير بية يمشي سريع يا ولد اللي يصير كدامي يباوع يخزرة لو يصير كبالي ويخليني امشي وراه الى ان عثرت بحفرة صغيرة بيها مي وطين 

ماعرفت هاي الحفرة هي بداية لعثراتي بهاي الحياة..

رسيل: اهووو

حسام: شكو شبيج ؟ 

رسيل: عثرت وتدمر حذائي ..

حسام: خوما تأذيتي ؟ شو شوفيني،

دنك على رجلي يشوفها ، سحبتها بحركة سريعة 

رسيل : ما تأذيت بس تدمرت بالطين .

حسام: لحظة انتظري هنا وهاج سترتي لزميها هسه اجي .

راح ورا شوية اجى جايب كلينكس وبطل مي دنك يريد يمسح بنطروني والحذاء.

رسيل: حسام شدتسوي ما اقبل والله ..

حسام: شبيج شكو بيها احسن من ما تدنكين ويشوفوج

رسيل: لا ما اقبل هسه اكعد بمكان وامسحها .

اخذت من ايده الكلينكس وبطل المي ومشينا كعدنا على مصطبة جوة شجرة .

بللت الكلينكس بالمي ودنكت امسح انلاص البنطرون بالزايد ردت ابجي عفته ومسحت الحذاء راح الطين منه همزين بقى بس البنطرون .

انداريت شفت حسام يباوع على بنطروني .

حسام: ها مادبرتيها.

رسيل: لا تليص بالزايد 

حسام: دجيبي شكد عنودية عبالك اول مرة امسحلج الحذاء لو اعدل ملابسج.

اخذه وبدا يمسح بالبنطرون حجيت بصوت ناصي اشبه للهمس .

رسيل: شوكت ماسح حذائي شو ما اتذكر ؟ 

حسام: من جنتي صغيرة ونطلع سوية جنتي توكعين تجيني تبجين حسام شوف وانصي على رجليج كلها تراب ودم مال وكعة اخذج اغسلج وامسح حذائج وترجعين تلعبين واني اعوف اللعب واعوف الونسة واضل وراج وين ما تروحين.

دمعت عيوني من يحجي .

رسيل: ولا اتذكر ابد بس اللي يجي ابالي عركاتنا اني وياك .

حسام: من اكولج گلبج اسود ما تصدكين ، يلا معلينا بالقديم منا وجاي تذكري عود وهذا اول موقف سجليه بذاكرتج التعبانة..

كام وغسل ايده بالمي الباقي وكعد يمي نشفها بالكلينكس

رسيل: شكراً تعبتك صار نظيف ههههه 

حسام: تعبج راحة ست رسيل اهم شي تكونين مرتاحة وفرحانة..

رسيل : هواي شكراً 

ضحك وكال 

حسام : هواي عفواً 

ضلينا نسولف ورا شوية اجوي جماعته ، صاحوه من بعيد يمعود وينك كلنا وكفنا ،بقيت بس انت راح تروح الصورة عليك .

حسام: جاي جاي 

رسيل: امشي بسرعة شو كاعد ؟ 

حسام: هاي شبيج واذا راحت شنو يعني 

رسيل: لا عفية كوم بسرعة حرامات التبديل والصرف الصرفته علية وعليك 

حسام : يفداج كل صرف وتعب..

رحنا لكيناهم واكفين كلهم راح حسام على المصور شاوره واجوي هو و المصور وكفنا اني وحسام بنفس المكان والمصور رتب الوكفة مالتنا ورجع ليورا 

يلا واحد اثنين ثلاثة ، اخذ اول صورة والثانية والثالثة

وصلت اللقطة من يشمرون القبعات ،نطاني حسام القبعة مالته

حسام: هاج شمريها انتِ..

رسيل: لا انت اشمرها ..

حسام: هاج لزمي واني اصعد ايدي عود شمرت وحدة 

اخذت منه القبعة 

المصور: يلا واحد ، وكمل عد..

الكل شمر القبعات وصاحوا هييييي 

والبنات يهلهلن والولد يهوسون وكاموا يركصون 

يوم من العمر والاحلى من هذا كله ابتسامة حسام اللي اول مرة اشوفة يضحك من گلبه وفرحان .

اخذوا لقطات الولد والبنات قسم فردية وقسم جماعية

حسام اشر للمصور ياخذلنا صور اني وياه ، اخذنا كم لقطة ، وخلصت الحفلة رجعنا للبيت ، طريق الرجعة كله اغاني حسام يركص عليها اني هم انطلقت وياه اغني واصفك اريد احسسه بفرحته..

وصلنا للبيت نزلت انتضرته يطبك السيارة وندخل سوى اشرلي بيده يعني فووتي جوة ، دكيت الجرس فتح الباب ثائر 

رسيل: هلووو ثأوري 

ثائر: هلو رسوله شلونج ؟ 

رسيل: الحمدلله شكو ماكو ؟ 

ثائر: ماكو شي تونستي ؟ 

رسيل: كلش فوك ما تتصور ياربي يوم النا ونفرح مثل فرحتهم .

ثائر : الله يسمع منج .

رسيل: شبيك ثأوري ليش ضايج؟ 

ثائر: شكد عمي يبقى مسافر بالأردن ؟ 

جريت نفس رجعني للواقع ..

رسيل : ماعرف حالي حالك ، لا تفكر خليها للوكت الله يحلها .

ثائر : الله كريم 

اني اعرفه علمود ريناد كاعد يحوص عليها متعلمين كله سوية كعدتهم وسوالفهم من هم وصغار لهذا حس بفراغ جبير من بعدما راحت رغم يحجي وياها بالتليفون بس شوية ويسدوه لأن الاتصال غالي .

رسيل: عمه عمتووو عماتي 

زهرة: اليوم عصافيرج طايرة خير؟ 

حجتها وتضحك 

رسيل: والله عمة فد ونسة واجواء من العمر مكانج خالي صار شكد ما فرحانة هيج فرحة ..

اجاني صوته من وراية..

حسام: الله يخليني الج وافرحج دووم 

رسيل: ههههه اي والله الله يخليك النا جنت محتاجة اغير جو قبل الامتحانات.

حسام: الحمدلله ، بهاي المناسبة صبيلنل غداء من ايدج الحلوة واليوم ما تريكنا ورا حذائج 

رسيل: صار بس ابدل وانزل.

صعدت بدلت ونزلت صبيت الغداء وخليته على الميز وكعدنا ناكل اني وياه 

حسام: شوكت تعطلون ؟ 

رسيل: المفروض قبل اسبوع بس بعد الكيمياء ما مكمليها .

حسام: كم فصل بعد ؟ 

رسيل: اثنين 

حسام: حيل ينرادلج اسبوع بعد يلا تخلصون اكعدي عيني واني اقريج 

رسيل: هااا انت هيج تكول ؟ 

حسام: اي لأ ن بعد ماتلحكين 

رسيل: وامتحاناتك شلون اخاف صعبة عليك ؟ 

حسام: معليج ادبرها ، هسه انام وارتاح شوية واكعد اسويلج جدول توب .

رسيل: هاهي متفقين .

تغدينا غسلت مواعين الغداء وصعدت نمت جريتها من الخمسة لحد التسعة نمت نومة عميقة يمكن اكثر مرة انام بيها هيج مرتاحة من سنين فاتت ، كعدت ، نزلت جوا هدوء ماكو احد يمكن نايمين صار العكس اني انام هم كاعدين اكعد ينامون ، لان يكعدون من الصبح ، ردت اروح للمطبخ اشوفلي شي اكله دك التليفون ، هاي الفترة كلها بين يوم ويوم جدي يخابر يسأل على ابوية ويومية ننطيه عذر شكل يوم مسافر يوم بالمحل يوم نايم طبعاً هذا الشي بطلب من بابا ما قبل اهله يعرفون بسفرته ومن سألناه ليش رفض يحجي 

جاوبت..

رسيل : الوووو.

اجاني صوته المزعج .

مروان: يابه شلون الصحة الأحوال الامور ؟ 

رسيل: الحمدلله جنت زينة ومن سمعت صوتك تكدرت..

ضحك ضحكة عميقة 

رسيل: شنو حجيتلك نكتة ؟

مروان: انتِ كلج نكتة..

رسيل: ما تضحك اختصر منو رايد ؟ حتى اصيحه الك

مروان: ما رايد احد .

رسيل: لعد المن مخابر ؟

مروان: اريد رقم ابو احمد 

رسيل: يا ابو احمد ؟

مروان: خالج غير اكو غيره؟ 

رسيل: وشنو تريد منه ؟ 

مروان: تحقيق خوما تحقيق دزيه ايهم يريد يروح يجيب اثاث مناك ويريد يمر على خالج .

رسيل: سجل يمك .........

مروان: شكراً عيناي ازعجناج 

رسيل: اي كلش

ضحك وسدة .

استغفر الله منين اجوي ذولة جنا مرتاحين منهم..

زهرة: منو على التليفون رسيل ؟ 

رسيل: ها عمة هذا مروان 

زهرة: شرايد ؟ 

رسيل: رقم خالو علاء 

زهرة: خوما نطيتياه ؟ 

رسيل: اي ليش 

زهرة: عززة بعينج غير تجين تسألين ليش تتصرفين بكيفج؟ 

رسيل: شكو غير افهم 

زهرة: صارلهم كم يوم يحومون على الرقم يريدون يتصلون بعلاء حتى يشوفون ابوج هناك لو لا ؟ 

رسيل: وشنو يعني خل يتصل ونوصي خالو ما يحجي 

زهرة: بله اتصل رد عليه ابوج لو ريناد شلون ؟ 

رسيل: شنو هذا الاكشن عمة ننطيهم خبر وخلص 

زهرة: اوف اوف منج رسيل 

رسيل: عمة صدك شعجب ما اجوي كل هاي الفترة ؟

زهرة: غير علمود الطائفية كطعوا رجليهم جان هسه يومية واحد جاي علينا على ابو شكو ماكو.

رسيل : هم صدك همزين ما يكدرون يجون .

زهرة : اي والله يلا كومي نسوي اكل الولد على جية..

رسيل: تمام يلا..

حضرنا الاكل عمة سوت نواشف كباب بيت وباذنجان وطماطة وكبة برغل واني سويت زلاطة وطلعت طرشي خليته بالكاسات.

وديت السفرة بالهول ، ورحت على خالة سهاد حتى اجيبها تاكل ويانا...

رسيل: هله بخالتي الحلوة يلا امشي نتعشى..

سهاد: زين منج وتذكرتي عندج خالة صارلج كم يوم ما مارة لغرفتي واحنا بنفس البيت .

رسيل: حقج علية غير دراسة عندي والوكت يطير والله ما ألحك ارجع من المدرسة اتغدا واروح محاضرات للعصر يلا ارجع ومرات للمغرب والوكت الباقي يادوب اقرا بيه وانام جفي على وجهي .

سهاد: بس مايمنع تمدين راسج وتسلمين وتصعدين 

رسيل: منا وجاي اجيب كتبي واكابلج والا اخليج تطرديني 

سهاد: نشوف يلا امشي هسه زهرة تكوم تعيط 

اخذتها بعربانتها والتفتت لبيبي باقي بيها بس النفس جريت حسرة وطلعت للهول .

ورا شوية اجوي نقلت الاكل وكعدنا نتعشى...

زهرة : قبل شوية خابر مروان 

خالو جان ياكل زلاطة نزل الخاشوكة من ايده وكال. 

محمد: منو رد عليه ؟ 

رسيل: اني خالو 

محمد: وشنو راد ؟ 

ارتبكت كلت راح تصيرلي مشكلة 

رسيل: راد رقم خالو 

حسام: عرفته الكلب ، شكلتلك يابة هذاك اليوم مو كلت هسه كم يوم ويسألوك على رقم عمي علاء.

محمد: كم يوم وتبين سالفتهم .

زهرة: الله يستر 

حسام: شكو هيج خايفة ؟ قابل منو وشيكدرون يسوون .

جرت حسرة جبيرة وكالت..

زهرة : گلبي مامرتاح الهم من يوم الأجوي وگلبي لعبني خصوصاً هذا مروان ابد مو هين ومبين صاحب مشاكل.

حسام :مو هين على نفسه ما يخوف جلبي .

محمد: كافي تحجون بسيرتهم اكلوا وانتوا ساكتين..

الكل سكت وساد الهدوء بالمكان..

ثاني يوم ورا الغداء كعدت اني وحسام سوينة جدول مرتب كل مادة اسبوع ورتبنا عدد الساعات اللي اقرأ بيها وفترات الاستراحة اللي هي للأكل والنوم .

طبعاً النوم نصف ساعة الظهر وبس مو هواي .

ذبيت روحي على الدراسة من الصبح ساعة ستة ابلش لحد ساعة عشرة وانام شهيدة .

وصلت للكيمياء كملتها بقى الفصلين الاخيرات نزلت على حسام دكيت الباب اجاني صوته ، تعالي، يعرف اني الوحيدة بالبيت ادك الباب يلا افوت .

مديت راسي 

رسيل: عندك شي ؟

حسام: لا بس كاعد اقرا مادة الامتحان مال عكب باجر

رسيل: اخذ راحتك اجي غير وقت..

حسام: تعالي معليج ..

دخلت وكعدت يمه ، قرب الميز مال دراسة خلاه بالوسط وخليت عليه الكتاب مالتي .

وبدأ يشرحلي واني صافنة عليه على شعره المايل على شكار ملامحة الرجولية لحيته 

انتبه علية ابتسم ودنك .

حسام: مضيعة شي بوجهي ؟ 

حجاها وكتب بالورقة مال دفتر..

ارتبكت..

رسيل : هااا لا 

ضام ضحكته ويحجي بهدوء...

حسام : كولي حلو لا ؟ 

رسيل: هاي شبيك شو صاير مدري شلونك ؟

حسام:اني الشبية لو انتِ اقري بيج وعيونج طايرة 

شلت الكتاب وسديته ..

رسيل: شو جيبة مو صوجك اروح اني اقرأ احسلي 

هو يجر بالكتاب واني اجر بيه عثرت و وكعت بحضنه ، 

ضل صافن علية ، ارتبكت اول مرة اصير بهيج موقف ذبلت عيونه وحار شنو يسوي كمت عدلت نفسي وكعدت 

حسام: احم ، جيبي اكمل وين وصلنا؟ 

رسيل: خليها باجر نعست 

حسام: ماشي براحتج ...

طلعت قبلها التفتت عليه لكيته صافن ، درت وجهي وصعدت ، سديت الباب وضليت افتر بالغرفة وافرك بوجهي بيدي ، جريت نفس قوي اريد بس اهدأ 

اش اش كافي رسيل ، هذا حسام اخوج لا تفكرين بشي ثاني كمت اضرب وجهي اريد اصحى .

من الفشلة يومين ما نازلة جوة من هو موجود اتحجج بالدراسة وهو ما صعدلي ابد..

ورا يومين صعد ثائر 

ثائر : رسيل عمو على التليفون يريد يحجي وياج 

رسيل:اي جيت ..

نزلت اخذت التليفون وحجيت وية بابا 

رسيل: هلو بابا حبيبي شلونك 

صادق: اني زين حبيبة ابوج انتِ شلونج؟ 

رسيل: تعبانة بابا احس خلصت طاقتي 

صادق: ما ضل شي سباعية وتجين هنا يمي ويلتم شملنا..

رسيل: يارب يارب هسه غير اخلص بسرعة..

صادق: تخلص تخلص هاي السنة كلها خلصت بقت على الكم يوم 

رسيل: اي صح ، ريناد وآران شلونهم ؟ يمك اسلم عليهم ؟ 

صادق: انطيني خالج اول عندي شغلة وياه بعدين احجي وية اخوانج براحتج .

رسيل: اوك 

اخذ التليفون خالو مني وحجى وياه.. 

محمد: ليش ياخوية ؟ مو حرامات ! شعجب ؟ ادري مو كاعد انت ؟ صدك تحجي قابل غريب ؟ واذا يزوج ابنه قابل شنو ؟ براحتك لا تصير عصبي هذا هو الله وياك 

سد التيلفون والتفت علينا..

زهرة : شكو خير ؟ 

محمد: يكول بيع البيت والسيارة على خرابها شكد ما تجيب ودزلي فلوسهن اريد اشتري شقة وافتح شغل خلصت فلوس.

زهرة: ليش مو كاعد وية بيت علاء ؟ 

محمد: يكول عيب وزحمة ويريد يزوج ابنه 

رسيل: خالو بالبداية بابا مو كعد بشقة وحدهم اول ما سافروا ؟ 

محمد: اي بس بعدين صاحب الشقة صعد السعر وخالج علاء رفض ابوج ينطي سعر زايد وطلب يروح يمه على منو اكو عندي حتى تستحي ومن هالحجي وكعد ابوج وياهم.

رسيل: وهسه شنو راح تبيع بيتنا ؟ 

محمد: شسوي هذا ابوج وهاي سوالفه عنودي وراسه يابس .

بعدها بأيام قليلة خالو عرض بيتنا للبيع ما قبل يعرضه عد دلال كال يكسر بسعره ، ويومية ناس جاية شراية على البيت آخر شي اجى رجال ومرته من المنطقة عجبهم البيت واخذوه هو واثاثه ، بطلب من بابا نبيع الاثاث وياه وكلشي بسعره

رحنا اني وعمة زهرة جبنا الملابس الباقيه واغراض بابا والبومات الصور وكم غرض لماما معتزين بيهن ، وطلعنا ودعت بيت الطفولة بيت الفرح بيت الأمان واللمة الحلوة ودعت ضحكاتنا سديت الباب وانسد كلشي حلو وياها

لقراءه باقي الفصول من هنا