(في داخل كل قلب مدينة لم تُبْن بعد وشوارع لم تُسلك ؛ وأحلام تنتظر من يدلّها على الطريق )
ســــــــــــــــــــــــــــــــوؤد
فتحت عيوني كوة اتنفس و حسن.. حاضني
ـ شبيج تنفسي تنفسي
مكدر اتنفس وهو يصيح لأمي
ـ صارت زركه شسوي..
شالني يريد مستشفى ورجع مثل التذكر افضل شي اسعاف اولي اني واعيه هنا ومنتبهة بس مكدر اتنفس مشكلتي معرف ليش مكدر اتنفس حيل ضاقت بيه الدنيا من القريته وشفته...
ـ تنفسي..
مددني عدل و رجع راسي لورى وعينه بعيني و سد انفي بصأبعه و عينه بعيني و حلكي فتحه وهو يسويلي قبلة الحياة
اكثر من اربع مرات لمن كحيت وجريت نفس بس بعدني بيه رجفه وهو جنه رجع جر نفس و دنك لشفتي..
امي ركضت تفزع جوارين علمود سيارة للمستشفى وهذا ملتهي بقبلة الحياة
ردت اوخره
: جاي اتنفس
همس: للأحتياط خاف ترجعلج الخنكه
رد لشفايفي يدفع هوا ريته بريتي
و بدل ميوخر عني جرني اله بحضنه
واللوتي يدري تنفست بس عجبه يجرب بوسة رومانسية بين مخطوبين..
كمزنا على صوت امي.. وعون.. و مرت ابوه
ـ تفضلوا منا تفضلوا..
همستله : امي معدها شغل وعمل المن جابته هذا..
عدلت كعدتي و حسن.. كاعد يمي
حسن : كطعوا رزقي الله يكطعهم عبن حظي المجير واعرفنه موش حظ اوادم
ضحكت ودنكت خجلانه يمكن لو ما الخجل الي مدري شلون اجاني جان كوتله حظ بقر دخلت امي لكتني كاعدة.
ـ ها جبت عون.. ومرت ابوه جانت تشتغل ممرضة وتعرف يمكن رد الربو الولادي لبنيتي
ام مريم : الربو ميرجع اذا ولادي بس عدها تحسس واختنكت اشوف مبيها شي حتى وجهها مورد..
ركزت امي بوجهي الصاير احمر من انفعالات مشاعري اني و حسن.. من جنا نسوي قبلة الحياة الاخيرة الي بالحقيقة بوسة مخطوبين.
ـ راح اخذها دكتور شنو هاي الخنكه الجديدة مصايرتلها اختنكت بساع بساع
حسن : عمة وتنفست بساع بساع.
ما يحتاج طبيب تدلع علي
وسعت عيني وهو يباوعلي بعتب تذكرت هنا دفتر المحاضرات اللوتي ببوساته نساني الشفته
بقت ام مريم وعون ..شوية
عون : عندي سيارة صاحبي مخليني سايق بيها اشتغل و ناوي اشتريها منه خليني اخذكم مستشفى لا ترد عليها الخنكه
حسن بغيره من عون : لا ما يحتاج
دنك عون.. بسبب نظرات حسن.. و ترخصوا منا هو وامه وهنا حسن.. انهد بعمته الي هي امي
ـ ادري شبساع سفيتي يعمه المن فزعتي العالم..
سكتت امي و شوي هدت عليه
ـ شبيج مساع تغلطين على حسن..
هنا رجعلي غضبي و جريت المحاضرات الي صارن جواي من وكعت واني بعصبية اكلب بالدفتر و اطلع الورقة واخليهة بعين حسن..
ـ هذا شنو حسن؟ تعرف لو هذا وكع بيد الميخاف الله تضيع و تضيعنا
صفن و عكدة حاجبه وهو يجر الدفتر
ـ الدفتر طلبته طالبه مني و ما كلبته من رجعته اقسم بالله موش انه الكاتب الحجي هذا
ـ لعد المن تنطي للطلاب دفاترك ترى ياما ناس راحت ورى شمس بعدين شنو طالبه تاخذ دفترك ما اقبل
كلتها واني اشك الورقة و اشككها وصل وصل
ـ بيك بوكسي يكرم الله اورم خشمك الحلو..
امي لطمت من كتلها شنو مكتوب
ـ كاتبين بمحاضراته عبارات ضد الريس والحكم وحزبه..
ـ يمه لو محاضراته شايفهن احد والنبي غير يكرفونا كلنا ويضيع ذكرنا
ظلت امي تخرط خدودها
ـ حسون ولك يمة استر علينا اشوفنك تريد تروح اقسام داخلية تريد تصخمنا وينك وين هاي السوالف والله ياحسن.. اردنك لهلك وما تشوف ذيال بنتي
حلف ماله علاقة و الشغلة ما يعرف منهو الكاتب اكيد مستحيل البنية..
هنا بغيرة حجيت
: وليش تدافعلها بلغ عليها وطلع روحك لا يبلنك انت صاير مو حسن.. الاولي من تعلمت على الجامعه صرت بدروب البنات ابو البنات الطايح حظ
رد خزرني
ـ لسانج حصانج لا اكصنه الج واضح سووودة..
تعمد ميلفظ الهمزة يغثني كام يريد يطلع
امي : وين رايح يمة.؟
ـ عمة ام سووعدد اختنكت اطلعن شوي اشمن هوا...
الخبيث يتعمد يقلد على اسمي
هم جفصت
: ولويش تطلع اليختنك يسوله قبلة الحياة وفضت
خليت ايدي على حلكي هو منطيني ضهرة ايدة على يدة الباب الفتحه يريد يطلع تجمد مكانه اهتز ظهره مثل اليضم ضحكتة بصدره.
التفت براسه بس من بين متونه ضحك وهو يهمس
ـ طاح حظج متونسة ام قبلة الحياة.
خجلت وامي ما فهمت شكو بس سألتني
ـ عود شنهي هاي قبلة الحياة يمة..
سكتت رد حسن.. وهو يضحك
ـ درس طبي اسعاف اولي يعمتي
نفضت نفسي بغضب وكمت واني اخزره
ـ ما عندك امانة طبية..
ظل يضحك و اني من الخجل شردت لغرفتي رحت اعدل ملابسي شبابيك غرفنا صوب باب الحديقه فباوعتله وهو يطلع..
دار يسد الباب من ورى ما طلع بابنا الي بيه تاج حديد يبين راسه منه و عيونه اجت صوب شباكي رجعت البردة
وخليت ايدي على خدودي يارب احميه يارب حرسه يارب لا تكشف عليه عدو..
خليه الي ما عندي غيره هو وامي ما صدكت صار عندي زلمة يحمينا اني وامي..
طلعت البوم الخطوبة واني اكلب بصورنا ابتسامته و ضحكته التارسة وجهه مجنت منتبهه لشقاوته الا من عقدنا وصرت حلاله جان دومه مدنك و مؤدب.
رغم اوقات الكفه يباوعلي ويتحداني بكلامه اعترفي سووعدد انت تحبيني ليش تخليها بنفسي اعترفي..
مــــــــــــــــــــــــــــــــاجدة
كولش منحرجة من سؤدد.. احس نفسي اضغط عليها حتى اشوف بابا..
بس شسوي ماكو حل غير هذا من ايام احسها قلقة و هواي تتحسر بديت احس على روحي واحس بأمها وحسن.. متضايقين من جيات بابا الهم.
نزلت للطابق الجوة لكيت امي و بابا سهيل.. يسولفون تصنتت بالممر.
ـ غريب مستغرب لؤي.. من فترة طويلة لا طالب ببنته ولا سوى فعالياته يأخذها لأهلة يوم..
ردته امي
ـ ملتهي شغله صار مو مثل قبل شغلة قليل يتواجد بالبيت.
ـ وانتي شمدريج..؟
ارتبكت : اتوقع قابل شمدريني ونسيت جد ماجدة.. كل فترة يجي و يحجي عنه..
ظلت مرتبكه دوم تتوتر ورجعت بتشدد
ـ وماجدة.. بنتنا وهو ماله حق زين؟
ـ تمام مفهوم اعرف كرهج اله لذا تنكرين ابوته يا الله..
كالها ووكف..
ـ ها شو كمت؟
ـ واجب بالفرقة وخفارة دربالج على حارث.. والبنات قفلو بابكم هاليام حراميه وفرارية تفتر..
ـ الله يحرسك ان شاء الله..
صاح : مجدي ماجد مجودة ابوها
انتظرت شوي اترك مجال وقت لا يكول تصنت ورة دقايق طلعت من ورى الممر
ـ بابا صحتني جنت ادرس
ـ لؤي هم يجيج للمدرسه ذمه ما اقبل تنطيه وجه
دنكت
: لا وين اشوفه؟ انت ما تقبل بس ليش بابا خليه يجي خطية والله ما بي اي ازعاج بس يشوفني وهاي هي ليش الظلم
ترى ابوية هذا انت حتى بيت جدو متقبل اروحلهم خاف يجيني هناك انت طيب كولش فلا تصير ظالم..
ردد مستغرب انتفاضتي
ـ اني ظالم؟! هاي جزاء رباي يا ماجدة.. كوليلي انتي تلتقين بي وسمم افكارج ضدي مو؟هذا افه سوسه..!
يمكن بين بوجهي ضامه شي لأن بساع كال
ـ يصير خير!
وطلع يوصي امي تنتبه للبيت وتقفله لأن اليوم هو خفر واجب بالفرقة بس طلع اجتني امي
ـ لمحت سيارة ابوج من ايام بشارعنا
و كلت بس لا شافج وحاجاج وقتها معزومه يم سؤدد.. امنت كلت يجوز شغل عنده بمنطقتنا خاصة هنا اهل مرتة
شوي اختي اجت هي واخوي لازم اذانها
ـ لكيتها عالسطح تباوع للجيران
شوفي حل لبنتج
صاحت امي
ـ حارث انت ما عندك شغل بس عرايك وي اخواتك خليك حنين عليهن انت سندهن الوحيد
ـ ليش الوحيد مو هاي صار عدها اخوة توأم. من ابوها اني اخو انتصار الوحيد بس هاي عدها غيري
فرحت يعني مرت بابا اخيرا ولدت اخر مرة شفته كالي حملها صعب و جانت زالكه من الدرج و انزلاق عدها طلبت بس تجيب يراويني الطفل..
انتبهت من صفنتي على امي تعترض طريقة كلام اخوي
ـ اختك الجبيرة عيب ماما وسياج السطح عالي لا تصير قنقينه
خابرت ابوي بسكته تباركتله و طلبت اشوف اطفاله اهل مرتة بفرعنا و دوم اشوفها.
شكد توكع مرته دومها مضبرة ويشكي منها يكول عدها مشاكل بالعظام
نظرتها الي عادية و اسلم عليها وترد ماكو مشاكل ولا بينا تواصل مجرد من تصدف بيت اهلها بالصدف اشوفها ببابهم او جانت طالعة ونتلاكة
بس مبين مدللها يعني الذهب تارسها ترس من هنا اتصور ابوية راتبه صار قوي و تحسن وضعه المادي خاصة هو على مشاكل وي ابوه
وميروح بيت اهله الا لخاطر امه يشوفها سبق رجع يعيش وياهم بس من تزوج للمرة ثانية فضل بيت وحد..
هواي مظلوم شكد اكره الظلم من بشر يحب يحرم بشر من ضناه شكد سولفلي وهو يبجي..
يكول حاربت اهلي علمود اعزل بأمج تالي ضحك عليها سهيل.. وخذاها مني
مدري هي دارت عليه حتى تحرمني منج جبرني بسلطته وهددني وقعت تحت التهديد بالسلاح على تنازل تام عنج.
كولش قهرني وكلش ضجت من بابا سهيل.. بأي حق يستعمل سلطتة حتى يفرق اب عن بنته
عموماً بس ابلغ سن الرشد اروحلة زيارات اقسم نفسي بين ماما و بابا و هذا الحق الي لازم يصير.
مــــــــــــــــــــــــــــــــريم
بالحديقة مال بيت عمي اني وبنات عمي غمزتلي بنت عمي
ـ نصير جاي وي جدو تدرين يكدر يتزوجج غصب عن امج لان جدو مكان ابوج يعقدلج بس جدو كال خلي تكبر بعدها زغيرة بلكت على سنة تجي من تصيرين 18..
ـ نصير امس اخذ مني وعد ما اقبل بغيره..
ـ اي عيني يحبج و حيل مقهور كاعدة بيت رجل امج و عنده شاب شراب عرك
صح عون.. منا وبينا ومن اولاد عمامنا
بس مكسراته عامة عليه وعموما نصير ابن عمج اخو ابوج واقرب واحق بيج من عون.. ترى نعرف بعون يحبج.
رفعت راسي مستغربة
ـ شلون يعني..؟
ـ اجه عون.. لجدو يريد وعد مينطيج لغيره لو شايفته شلون اجه يتوسل ويكولة
ـ جدي رايدها منك والله هي عافيتي والله ما عندي زايدة ناقصه و اذا على الشرب اتركه احلفك بروح جدي غانم اخوك..
باوعله جدي و كله
ـ خوما اجبرها شوف عون.. انت وليدنا بس ابوك طلع من الطريق و جانت سوالفه سبب موت اخوي غانم شوف وليدي انت توب و صلي و اذا هي قسمتك الك لو ورى مليون سنة الك
الك..
باوعت لافنان
ـ اكول نصير.. يحلفني ما اقبل بغيرة اثاري جدي مسويها منافسة لا عيني فكرت و عون.. كل ماله نسخه ابوه شلي بهاي الطلابة.
خليت و كمت لجدي بست ايده و اني اريد اوصله فكرة عون.. بالنسبة الي اخوي بس مكدرت احجي..
جدي : امج خابرت تكول ترجعين باجر من تطلعين من المدرسة يجي عليج عمج يوصلج الهم..
ضجت باوعلي جدي
ـ جنج ما مرتاحه بيت امج تردين تبقين يمنا اروح لأمج واتفق وياها شتكولين بوية
جرني الحضنه وهو يشم بيه ريحه ابنه الي استشهد من وكع صاروخ على بيتنا القديم نتيجته امي اجهضت و خسرت الرحم و اني طلعت بأعجوبة و ابوية توفى.
ـ اخاف امي تزعل اني ما اريد اتركها كولش بس اريد اجيكم يمتى ما اريد ما تقيدني.
ـ الله كريم بنيتي لابد نحلها.
خلا وكام وهو يكول تعبان جيبولي لغرفتي جاي بس كام جدو اجه نصير.. يمي
ـ عون يلح على جدي و جدي يحبة يكول معدل لو بس يصلي و يترك الشرب يكول ما بي من ابوه لو لاكي الي يربيه صح ما يروح للشرب و ترك الصلاة ابوه من شبابة نصاب ومكسرات و سوالف يدور فصول و طلايب هذا شاغول ومعدل..
شوفي حبيبتي هذا الحجي ما ينفع خاف جدي يقتنع بعون.. السكط و ترحين مني
ما اعرف ليش كرهت كلمة السكط لأن عون.. مو سكط بس الدنيا ما نصفته ومشى وي جماعه تشرب وتعلم منهم وهم بيئته تربى ببيت الاب يسكر و ميصلي..
ـ عون مو سكط..
جر ايدي حيل و نترها عافها
ـ انتي شنو الترديه بالضبط خاف حنيتي اله وتردين تنهين علاقه حبنا
ـ لا بس ما اقبل تسميه سكط لأنه مو سكط. يعني ربيت وياه و هو اذا ما املكله مشاعر. الحبيب املكله مشاعر الاخو
هو جان سند الي من عمري سنتين الى يومنا نصير.. لا تخلي غيرتك تهين عون.. يمي
وكف و هو معصب
ـ ولج ينافسني بيج ادري بت عمي و الي شنو طلابة لو فرهود لاحكني عليج
ـ بس نتزوج بعد يشوف حياته و انت كافي تندك بي ترى سمعت امك وهي تكولك بطل تروح لعون.. بالمطعم بمكان شغله تهينه و تستهزأ بي اذا سكتلك لخاطر انت من دمه ولحمه و ما يخسرك لخاطر مرة..
دنك : ولج قاهرني كولش يعني من ترحين بيتهم اني هنا ما انام بالي يمج اخاف يدكني ناقصه يعتدي عليج لو اخاف يقنعج تعوفيني
ابتسمت
ـ عون مستحيل يعتدي عليه ولك عون.. اصلا منبه عليه ورى العشا ومن امي تنام بغرفتها اقفل غرفتي تدري ليش يخاف لا يشرب ومو بوعيه يسويلي شي يعني حريص عليه..
تذكرت اليوم الخان عون. ظالامانه الي هي اني وبيتهم وباسني و حضني و حتى وصلت بينا امور
وراها عصب عليه كولش لان ضعف وخان الامانه هي هاي المرة الاولى والاخيرة الي تحارش بيه وراها يتجنب يبقى وياي مكان منفرد لوقت طويل..
بس هم كلام نصير.. صح لأن مدام مرة تحارش خاف بيوم يكررها لذا حذرة من يشرب انعزل بغرفتي واقفلها.
اطمن نصير.. واحنا بالعطلة الصيفية اصير 18 و هنا يقبل جدو يزوجنا..
ـ بيني وبينج هواي سنين بس والله احبج
ـ ما يهمني الفرق البينا واذا عمرك 30..
اصلا رجال متزن ولا شاب مسربت..
تثاوبت : جني تعبت واريد قيلولة حتى العصر اكعد و ادرس.
ـ اي شي عندج بالانكليزي لو الرياضيات اني حاضر..
ـ اي عندي امتحان انكليزي اني زينه بي بس اريد تشرحلي عن المرادفات
ـ ذن حفظيهن ميحتاج شرح
ـ اقصد ترجمتهن و عندي هم بالاصغاء ما افتهم دوم درجتي قليلة..
ـ ولج ذن سهلات عموماً بالليل ادرسج انتي كملي واجباتج.
ـ صار..
ابتسملي و الوردة الي بيده خلاها يم خدي ومررها عليه رجعت ورى واني احس جسمي كزبر ضحك فجريت الوردة منه بعناد
ـ الوردة للوردة الي هي اني
ضحك و شاقاني
ًـ منو يكول؟
ـ اووو لتصير مثل عون.. خبيث
عضيت شفتي من الجفصه وهو عصب وكال بغيرة
ـ شنو عون.. منطيج ورد ومدري
ـ لا اقصد دوم يقلد عليه يكلي دبية
ردت الزكها متلزك هو بخزرة مصدكني جر الوردة من ايدي حيل و شمرها بالكاع و دعسها و طلع ما همة صرختي من جر الوردة والشوك نبتت بيدي ونكسرت جواتها
فتحت ايدي كلها دم ومشخطه ظليت ابجي من قسوته هذا عود الزين الي ملتزم والله عشيرة مخابيل متدينهم و المرعبل البيهم نفس الشي كلهم خباث و خبالات.
ســــــــــــــــــــــــــــــــسوؤدد
ورى جمعتين عزيمه عند ماجدة.. والجمعه الثانية عند مريم.. خجلت لازم اعزمهن..
فتحت الثلاجه عادي كالعادة متسوك الا كد الوجبه السمج نشوفه مرة بالشهر و اللحم بس بالاعياد.
اما الدجاج بالمناسبات الدينية بس
يعني ايفاء نذر وفاة نبي لو ثواب لأبوي ..
ذن شعزمهن هسة عمتي رجوة من تجي تشوف ابنها غير تجيب صوغه فد دجاجه و ديج عرب حتى اني اكاثرهن يفيدنة بيض و هم نشبع دجاج
والله مسكين حسن.. متعلم وين الاكلة زينه لحم سمج دجاج الريف غني بكل هذا..
وكابلني عالفكريات تمن ماش تمن عدس تمن ابيض وروبة مركه باميا جنهن بطات تسبح بالشط كد متخففها حتى تكفينا كم يوم..
من احجي تردني هذا الموجود كملي دراستج و نرجع يم اهلي تشبعين هناك خير الارض وافر حجتها اني ودراستي ومصبرة روحها عالمدينه بسببي بس لا هي متفارك المدينة تعلمت عليها
هسة شطبخ الهن ذن وعيب اعتذر من عزيمتهن ندور بالبركة بلكت حتى لو فروخ سمج ونقشمرهن..
بس شيطلعني وهذا حسن.. منبهني ممنوع اطلع بعد واسرسح بكيفي من هسة و حاكمني لو نتزوج شيسوي
مشطت شعري الجنه شمسيه لأن قصير لو عندي فلوس اجيب العصارة الحمرة مال مسرح ولو ريحتها كهرباء بس تسرح الشعر..
لبست الطوك ابعد شعري الاجعد عن عيوني ولملمته بقراصات واني امد راسي بالممر امي ملتهية بالمطبخ..
النوب امي فوك الخبز كامت تطبخ للموظفات والله بلوة اليشم انواع ريحه الطبيخ يكول بيت ام سؤدد.. نيالهم يومية اكلة دسمه ميدرون بس بالصيت..
دخلت للمطبخ واني امد خشمي بوياي ريحه لحوميات
ـ فوزية..
ـ تأدبي
ـ امي امي امي انطيني شوية بس اضوك
ًـ لا عيب يمة وحرام امانه هذا غدة بيت ام جواد
ـ اكول من الفجر تطبخين..
ـ اي حتى بس احررة وادز الغدة ب11 الهم وراي معاجن الخبز
ـ زين مكالتلج فد صحين لبنيتج اليبست من التقشف والمجاعه الي بيتنا
التفتت الي
ـ حمدي الله وشكري غيرنا ملاكي لكمة يأكل
ـ علساس لاكينها كافي وحش الطاوة كد ما اكل باذنجان زدت سمار.
ضحكت
ـ طاح حظج..
ـ اليوم جمعه شعجب ام جواد متطبخ ماكو دوام اليوم.
ـ شلون تفترين على رزقي ولج مرة وتريد تكضي الوقت يم جهالها وزوجها وتريد تدلل روحها هم ناس مقتدرين لا عاد تخلين عينج لا تطيرين رزق العالم ويطير رزقي وياهم الله يرزقهم ويدللون نسوانهم حتى اطبخلهن واخذ اجرتي.
ـزين خوش اروح ادرس لحد يزعجني بغرفتي..
ـ روحي والله يوفقج و تجيبين اعفاء.
ـ ان شاء الله هذا الشهر يحدد الاعفاء بس لو تنطيني درجتين للعربي انعفي عام بس خباثه..
قبل لا اتسرسح و اطلع دك التلفون رفعته جانت مريم..
ـ هلو مريومه..
ـ هلاوات اكولج سؤدد.. اعرف وضعج هو حصار كلنا بالهوى سوى بس شويه اني وماجدة.. افضل من وضعج لا تشيلي هم الاكل
ماجدة.. تجيب وياها سمج شوي واني عليه الطرشي و الخضرة والتمن انتي عليج بس الخبز و اللبن عاد عمتج رجيوة عدكم من يومين
ـسافرت لأهلها الفجر
ـ اي بس ما تخلا من الروبة
ـ اي هو صوغتها روبة جبن كيمر من كد ما تجيبه يجي يوم تسلمن عليه
بـ هلو واني ارد السلام بـ مااااااااع ميعععع و انكلب جاموس وطليان
ضحكت مريم
ـ المهم واذا بيها مجال اريد طابك سمج من ايدج عليج خبز سمج مدري شسمونه انتم و لبن وخبز حنطه..
ترى خالتي و بتها عدنا..
ـ حلو قنعيها تجي تدرس بجامعاتنا
ـ متفيد علمي هي اول تالي بكليات تخصصها بس واكعه وكعة بأبن عمها..
عزمتها تجي وياي اعرفها بيجن
وهم نسولف عندي الج هواي تطورات وي نصير.. واي واي اعترفلي اخيرا بصريح العبارة لا وفوكها خايف من عون.. لا ياخذني منه ههههه عزا عون.. اجه يلة باي نلتقي ب 12 الظهر..
سدته و غميت السماعه
ام بطن تتنسى على طابك الحرشي منين اجيبه السمج بعد ما بيها مجال من فترة امر بالبركه ماكو بلكت اليوم حضي والكى فريخات سمج.
لبست بنطلون برمودة اشبع بلبسي والسفر لان لمح حسن.. بس نتزوج اتحجب ميقبل مرته سافرة..
طلعت وبيدي شبكه سويتها من التول و واير المنيوم امشي مرة واركض مرة لمن وصلت للبركه واشوفهن ملح مثل حالي اكيد يكبرن يصيرن ذن زوري و بني و سمتي املح مو احمر صدتهن و ااني اخليهن بالعلاكه
عمتي رجيوة جابت طحين تمن عنبر هو عود بجيتها علمتني اسوي عجينه سياح لأن ابنها يحب يتريك كيمر وسياح لو بيض وسياح
وهي كالت كل اسبوع تمر و تجيب النا المقسوم الله عمتي الحنينه لو ما ابنج ما شفنا خيرج عمة هيج وقتها بسمرتها
اول ما وصلت دخلت على كيف واني اريد انزع حذائي صوته العصبي وزمخته
ـ وين جنتي ست والطرطور العندج موش لازمن تنطيه علم بطلعاتج..؟
رفعت نفسي واني ابتسم اريد امتص غضبه
ـ حشاك من الطرطرة ترى رحت بس اصيد سمج واجي والله مو قصدي ما اكولك بس صارت
اجه صوبي هاد واني شردت كلت حنضرب
ـ يمه لحكيني يمة...
وامي اجت
ـ اسم الله شبيكم صوتكم عالي
ـ يريد يكتلني
حسن : طلعت دون اذني..
ردت امي: ودون اذني هم ولج اثنينا موش بعينج
نزعت الشحاطه و نزلت بيه كتلة وحسن.. بدل لا يعاقب تحول لحاجوز
ـ عمة عوفيها لخاطري عقل مجعوص موش تفهم بس نزوج تكبر وتفهم غلط التسويه بينا..
ـ خليني ولك خليني اااخ يا قهري ام الخوارة كبرت و ما بطلت فرفرة ولج سويدة قوطية ام القواطي..
هنا من حسيت حسن.. صار حاجوز ونسى هو اساس المشكلة وكفت وراه شاردة من امي و اتحامى بي واني ارادد امي..
ـ جمعتين ما شايفة جهرتي انعزم يم البنات ليش تحرجيني تطبخين للوادم والي لا اريد اوكل البنات افضل اكل اتباهة شوفن امي شنو تطبخ لعزيمتي الجن.انتي جبرتيني اطلع دون علمج واجمع قواطي ابيعهن عالوزن...
بصغري حسرة عليه الفلس والمصرف لو اجمع بقايا الخبز وابيعهن بالوزن حتى اشتري الي اشتهيه وهسة تعيريني..
دهاج صدت سمج و الا تسويه طابك لصاحباتي مو عمتي رجيوة جابتلج مطابك شو ركنتي انتي بت عرب تعرفين احسن مني شطالبه منج
شو ماجدة.. حجيب جدريتها وتجي و مريم.. تكمل الباقي من عزيمتنا الا اني سوده بوجهي هن سمجات فريخات سمج دهمنيهن و فضيها
وها لبن رجيوة نريد منه للعزيمة
لبن عمتي جابته مو مشتريته فلا تمنين عليه بي
وسعت عينها
ـ حسن وخر خلني ادوفنها الجلبة هاي شلون ترادد طلع لسانج سوادي.
ظل حسن.. يحاجز امي عني وضامني وراه
امي: منيلج السمج احجي منين ولج..
ـ قابل اول مرة اطلع اصيد تعودنا حقج ملتهيه بخدمه العالم وبنتج طز..
حسن : ذكرن الله وانتي منين اكو فروخ سمج موش موسم تفريخ يمكن شهر ويبدي الموسم شوداج للشط لو غاركه
ـ يا شط غير للبركه رحت هو اني اخاف اصلا من الشط لا اغرك بس هاي ما تعلمتها اسبح
حسن : يكرم الله خاطبلي صبي موش بنية شو جيبي سمجاتج اشوفهن.
انطيته العلاكه فتحها و انصدم وهو رجع باوعلي و سألني
ـ سووعدد ولك سوادي سودة قوطية ام القواطي ام الخبز ام الدعاميص كم مرة صايدة وموكلة صاحباتج من هذا سودة فركج خايبة شني هذا موش فرخ سمج..
رفعت خشمي
ـ هواي اصيده اصلاً كل ما اشوف بالبركة سمج اصيده واطبخه لعزايمي ولا منيه فوزيه علينا..
ـ غبرة انتي موش سنعه وغبية معقولة ما ميزتي الدعاميص يا ام دعاميص
ـ شنو دعاميص النوب تكلي ام دعاميص لتمشيها عليه كافي سودة وسووعدد و سوادي تعيبون على شكلي واسمي واني ساكته عبني واثق الخطا يمشي ملكاً..
ـ ام ثغه دعاميص فرخ عكروگ يالغبرة يعني ابو ذنيبة يعني خوث لفج شنهاي معقولة علوم اول متوسط مدرستي ترى مار عليج قبل لا تدخلي ادبي لو انتي الخوث عندج والغباء واجد..
باوعت للعلاكه
ـ اكول اسود املح مو فضي.
شرك بضحكته من عقجت وجهي
ـ عزااا لو يدرن شموكلتهن..
النوب ما اكل اني حتى يكفيهن اكول ماجدة.. تسممت.
ـ تردين اسكت ما افتن بشرط بعدين نتفاهم عليه وانتي عمة شو تبجين
غمت امي كصتها
ـ على حظي يمة زين مموتت بنات العالم شيفكني اخ لو ما العوز مراحت الخوثه تصيد عكاريك.
اخذ العلاكه و ذبها واني معدتي كلبت تقيأت الخبزات الاكلتهن الصبح هن بس خبز وجاي تريكت و تقيأته ضامة الجوعه لغدة ماجدة.. المطبك و التجيبة مريم..
باوع لساعة ايده وضحك
ـ علاش هاي الحوسة وطالعه وموش ندري بيج لو طالبة مني ترى انتي مرتي.
كالها وطلع
امي : وين يمة..
ـ شوي واردن هنانه
راح وجاب زوري بس شنو يرد الروح
ـ يلة عمة والله لو ما مصاريف الدراسة المصادر اشتريهن مشترى ادللكم موش ملحك على دراستي الصعبة جان اشتغل اي شي ولا هاي ام نفس دنية تأكل وتوكل رفيجاتها فرخ عكاريك.
سوتلي امي الأريده واجن صاحباتي محملات اكل وهم فرحن وتعرفت بشيلان.. بنت خالة مريمه .. كولش جميلة ومن ملامحها من محافظات شمالية..
ـ هاي المرة الزوري كبار مو توة مفقس وزغار بحيث ينمرد منفهم من خبزج بس نقاط سود بيه
ـ اي اي مسواك حبيبي تسوكلي مصدت..
تفاخرت
ـ حقجن ممخطوبات متعرفن لازم زلمتجن يقبل تطلعن و ها الغيرة يمة شكد يغار عليه بوياي يلة شفهمجن بسوالف خطوبه ومخطوبين
ـ ديلة احجيلنا
ـ دخلي نتغدة اول..
كملنا و شربنا جاي و هنا اندك الباب طلع حسن.. وهو كالعادة بيده سجل
شوي و دخل وراه عمو لؤي..
آشرلي حسن.. اطلع
ـ خوية ماجدة.. ابوج يريد يشوفج
كامت مريم.. و شيلان.. وراي وهم الباب اندك و هنا صياح عمو سهيل.. على امي وهو يكسر حرمة بيتنا ويفوت
حسن.. من ارتباكه جان مدنك يريد ياخذ كتبة من الصاله حتى يدرس غير مكان
بس وكع من بين السجلات كتاب دنك عمو لؤي.. بساع و هو يباوع للكتاب وينطيه لحسن.. الصار اصفر
ـ ضمه لا الارعن يشوفه
جنت يم حسن.. اجيت المهن وياه واني متوترة نخاف بذاك الوقت من هيج كتب رغم دينية وما بيها اي سياسة بس ممنوعه
انتبهت لعمو سهيل.. عينه على الكتاب وحسن.. و عينه على عمو لؤي.. وجهة يرجف غضب بس حجى بهدوء وهو يباوع للكتاب و لؤي.. و لحسن..
حتى ما حاجاه على كسره لأوامره ويقابل ماجدة.. بيتنا جان كل عينه على الكتاب
اما العم لؤي.. جان يبتسم بهدوء وثقه عكس العم سهيل.. بين بعينه حجي مكتوم.