رواية في ذمة الغريب الفصل الرابع 4 بقلم كنوز

رواية في ذمة الغريب الفصل الرابع 4 بقلم كنوز 

تصويت و تعليق بين الفقرات لطفاً ✨

━━━━━━━━━ ⚖ ━━━━━━━━━

يمه الوجع بليل اجاني 

من گلبي كضني و گعداني 

يا يمه وصبت دم أذاني 

ونگعت الغرفة مو أرداني 

اجاني ع كيفه وگوه يدبي 

وظليت  مـ ندل وين دربي 

واصرخ بصوت نااا ياربي 

شن هل السواد الترس گلبي 

صبح صباحي وچان ظلمة 

وغميت وجهي مية غمة 

من گد وجع روحي يا يمة 

تمنيت الف جسمي و اطمه 

━━━━━━━━━ ⚖ ━━━━━━━━━

نطقها مهدي ما اشوف غير أزاد ضربه راشدي فره وجه فر وگع  بالگاع يبجي فرفح شلته شلته اسكت بيه و الضابط باوع النه بأنتصار قهقه بضحكة عالية ميل راسه ع الشرطي الواگف يمه 

:: اتصل ع مركز خل يشوفولي بيت هذا أحمد بيا منطقة صاير تحرررك   

:: صار سيدي 

رد عليه الشرطي و طلع موبايل اتصل خلّى ع اذانه و طلع برا يخابر ربع ساعة و رجع همس للضابط سمعته من گال شارع عمر عرفت عرفوا بيت أحمد وين 

رفع للاسلكي بيده سووا نداء لدورية انطاهم عنوان بيت  أحمد اباوع لـ ابراهيم شحب وجه و العرگ أخذه بقينه جامدين بمكانه واحد يباوع ع ثاني انتبهت ع نظرات واحد منهم عليَّه نظرة قذرة رفعت أيدي ألم عباتي ع رگبتي أكثر صارت أيدي ع موبايلي 

بصدري دائما اخلي بهذا المكان عيوني تتنقل بينهم شلون اخابر وانطي خبر لـ عروه تحركت ع اساس اروح لصحيات صاح بصوت عالي يجر الكلمة فززني 

:: وووووين 

:; لتواليت لو هاي هم ممنوع 

جاوبت بساع جنت محضرة جوابي جوه لساني لهذا السؤال  باوعلي وأأشر بيده بمعنى روحي انتبهت عليه أشر لشرطي براسه بمعنى روح وراها 

مشيت بخطوات مستعجلة و الشرطي وراي اجه أزاد ورانه هم ما خلاني وحدي اجيت ادخل التواليت وهذا بعد وراي التفتت عليه بعصبية 

:: شو انت ماعندك مستحة بعد شوية و اطب وياي 

توقف مكانه وگال بـ أمر 

::  يله استعجلي فضيها بلا لغوة زايدة

::  والله خوش تعال احسبلي الوقت هم 

ضرب بالعصا اللي بيده ع حايط و يخزر بعيونه چنهن بيض القلق ( طائر القلق) عوجت حلگي وفريت أيدي بستهزاء عباله يخوفني سبلوح السيان انطيته ظهري قبل لا يرد وهو رد ع أزاد يطلع عقدة النقصة مالته بيه 

::  نزل عينك حيوان 

أزاد : واذا ما نزلتها شسوي بله 

ما احس اله جر أزاد من ياخة قميصه عته حيل دفعه ع حايط و لزم فگه عصره بيده حيل يحجي و ع وجه ابتسامة شيطان 

::  كلشي ما اسوي بس نضيفك ليلة يمنه بالتوقيف اخليك العمر كله تمشي و تتلفت وراك من الخوف 

نهى كلامه و ضربه راشدي دار وجه بيه و اصابعه انطبهن بخد أزاد رجعت بساع هذا يهدد و أزاد يباوع اله بتحدي دفعته بثنين اديَّه عنه رفع ايده يريد يضربني صار أزاد گدامي بساع وهو حچه ع اساس الشرف ينگط منه 

:: والله لو ما مره هاي ايدج اكسرها و اخليها گلادة برگبتج 

جريت أزاد من ايده و همست قريب أذنه بدون ما يشوفني ذاك 

::  فدوة لعينك أزاد عبرها اريد اتصل ع عروه 

سكت أزاد و الشرطي رفع حاجةه يحچي بسخريه يريد يستفزه حتى يحجي و يضربه 

:: ها وردة اله تنضرب شلون يعني  الحيوان ياله تجر عدل 

بلع أزد الراشدي و الاهانة وهو لإخوه الچبير ما يسكت بس لخاطر اخته بلع النخلة بسلاها 

نوب من التوتر حتى بطني گامت توجعني لوية تاخذني و لوية تجيبني عبالك اطلگ وراح اجيب 

اتصلت أكثر من مرة و ماكو من التوتر و الارتباك نسيت همَّه  ابيت أحمد وعندي ارقام الكل بساع طلعت رقم كوثر اتصلت عليها ماترد لزمت گلبي بيدي بس لا وصلت الهم الشرطة 

قبل لا تنتهي المكالمة جاوبت الفاهية

:: الو ها رانيا شلونج 

:: بعد وگت... بساع گولي العروه الشرطة عرفت بيهم يمكم وطلعت دورية عليهم خل يطلعون بساع 

:: شنو يا ستار يا شرطة و ليش جاين عليهم و شيردون منهم 

:: مو وگت اسئله كوثر لخاطر الله وصلي كلامي العروه و هو يعرف شلون يتصرف 

::  اي اي هسه 

رحمة :: گعدت من النوم راسي ثگيل  اريد اشيله من المخدة ماگدر احسه اثگل من جسمي صاير ردت انهض ثگل راسي يسحبني مرة ثانية بقيت امدده

خليت أيدي ع عيوني مرّ طيف طيبة براسي رفعت أيدي گدام وجهي اشوفها متروسة دم انتفض گلبي  ضميت اديَّه جوه البطانية حتى لا اشوفهن 

بساع انتبهت ع عروه واگف يم الشباك يدخن و فاتح الموبايل طلع الخط منه كسره 

:: عروه 

صد عليَّه بساع شمر باقي الجكارة من الشباك ورجع البطارية و الكفر اجه تقرب يمي عيونه تتفحص ملامحي بخوف خفي گعد ع ركبه يمي مد ايده ع جبيني يشوف اذا اكو حرارة 

:: ها شلون صرتي 

تجاهلت سؤاله و سئلته 

::اتصلت ع ابويه شفته شلونه 

::لا غلقت الموبايل و كسرت الخط ذوله ايدهم واصله خاف يعرفون مكانه منه 

::و خطي 

طلع موبايلي من جيبه خلّى يمي وگال 

:: هم طلعته و كسرته بين ما اشوف صاحبي يدبرلي خط گلك 

رمشت بعيوني اله بتعب بمعنى اي جريت نفس قوي احس الغرفة تريد تاكلني حتى الهوى ثگيل گوه يمر لريتي دفعت البطانية عني اتجنب النظر لاديَّه ساعدني هو لزمني من ايدي

گومني يمشي وياي و ايده ع ظهري يسندني طلعت من الغرفة أصوات مرت عمي و أولادها بالهول  خطفت نظرة عليهم گاعدين كلهم داير مداير الصوبة محاوطين امهم تسوي الهم حلاوة شعرية 

عفتهم طلعت وگفت بالطارمة غمضت عيوني فتحت حلگي اجر نفس قوي 

عروه :: الهوى بارد تعاي تطب جوه لا تتمرضين 

:: اختنكت من الغرفة  احس الحيطان تريد تنطبگ ع صدري 

ترك أيدي 

::  دقيقة لعد اجيب الج سكملي تگعدين 

تجيت ع حايط وهو دخل بخطوات متعجلة شويه و طلع بيده سكملي گعدت و حط قمصلته ع اكتافي الدنيا مگدرة بالغيم الجو كئيب كأنه السمه نست شلون تبتسم،

واكتفت  تسدل غمامة سودة على وجهة، تحجب النور الغيوم تزحف عبالك أفكار داكنة داخل رأسٍ مشتّت، لا مطر يسقط، ولا شمس تُشرق، مجرّد انتظار ثقيل لشي مامعروف 

الهوى يضرب بوجهي بارد كلش بس ما احس بي ولا احس باي شي غير الضياع مثل واحد نام وگعد بلا ملامح، لا أسماء للأشياء، لا معاني للأماكن، كأن ذاكرتي نباكت غفلة مني ، وعافوني اتلمّس الحياة بأطراف أصابعي مثل عمية بعالمٍ غريب. 

كل شيء  مألوفاً وغريب بنفس الوقت ، كأن الزمن نفسه فقد اتجاهه

همست وعيوني مرتكزه بالفراغ 

:: و هسه شلون عروه شراح يصير بيَّه و بيكم 

:: باجر راح يتصل ابويه بالشيخ و ياخذون مشيه الهم و نشوفهم شيردون 

::عاف اهله علمودها يقبل بفصل و فلوس هو رأيد رگبتي 

:: ما طول اني اشم الهوى طرف ثوبج ما يوصله مو رگبتج النوب 

:: عروه 

::  گولي 

بلعت ريگي احس مرورة علگم ابلعومي صايرة رغم كلشي ما ماكلة 

:: خل اروح اسلم نفسي و... 

ندار گمبص گدامي لزم اديّه الباردة بين اديه الدافية 

:: اشش هاي الكلمة لا تجيبيها ع لسانج مرة ثانية رحمة تره والله ازعل وياج 

::  شوف 

::لا اشوف و لا اسمع هاي السالفة تنسيها ولا تحجين بيها بعد 

:: بس خل احچي عروه ليش تشلع گلبي 

:: يله احچي بله خل اشوف 

:: اروح واحچي الصار واذا الغلط مني اني قابله واذا.. 

قاطعني برفض 

:: حتى لو الغلط منج حتى لو انتِ صدك گتلتيها بتصرف غلط منج هم ما انطي بيج شنو الواحد ما يغلط يريد ثار مرته خل ياخذه مني... سجن... اعدام اني قابل مو بس اني خل ياخذون ابويه و أزاد و كل عشريتنه ولا تنحط ايد غريبة عليج 

::  وراح ابقى عايشة اذا صارلكم شي من وراي احرگ روحي وراكم والله 

::انتِ ليش متشائمة گتلج جرحه بعده حار هيج متعصب ويصيح و يتوعد اصبري جم يوم بس وان شاء الله كلشي ينحل 

:: والله تعبت فوگ ما الندم ينهش بگلبي اشرد من جريمة ما مسويتها والله ردت اساعدها والله  

::و ليش الندم انتِ ما سويتي شي غير ساعدتيها 

:: التفكير اكل راسي اگول خاف الصوج مني خاف اني تأخرت عليها لو مجيبتها من البداية 

::ماكو لو و لو...  البنيه حتى رانيا شافتها وگالت اول ما طبينه عليها هي منتهية لو عايفتها يمكن حتى الطفلة تموت 

:: والله گلبي خلص تعبت 

::  لا تفكرين باي شي و لا تشيلن هم اي احد غير نفسج 

:: وانتم 

:: استغفر الله احنه شبينه رحمة ترى انتِ المطلوبة وانتِ العليج دعوة والقاء قبض يعني فكري بنفسج وبس 

:: شبيك تصيح ترى اسمعك مو طرشة

ضحك ونهض من مكانه حاوط وجهي بـ اديه خلى عيونه بعيوني ويحچي 

::  يروح اخوج اروحلج فدوة بس ظلي زينة واحنه راح نصير زينين خوش 

::خوش 

:: بعد دقيقة نرد لنفس القوانه وخاف بيَّه الصوج... وخاف يأذوكم 

گال اخر كلامه يقلد صوتي و حركاتي باوعت اله بطرف عيني لزم خشمي بين اصابعه 

;:صار طماطة من البرد گومي طبي جوه اذا صار بيج شي و تمرضتي شايفه الصوندة السودة مال ابويه الي محشيها حصو يلعبها ع ظهري والله 

::  بس اني ولا مرة ضربني بيها 

::  ابويه عنده البنية خط أحمر 

نزلت دموعي 

:: استغفر الله منين تجيبين كل هاي الدموع هم لو تنكر جا هسه وشل 

:: تضحك عليَّه انت مو 

:: هسه مو جنه حلوين نسولف هالبچي ليش 

:: اشتاقت لأبويه متعودة كلما ارجع من الدوام يتلگاني بالباب ويگلي الله يساعدج بوية 

:: ان شاء الله تكضي و ترجعين لبيتنه و يرجع ابويه يتلگاج بالباب هم 

::  ان شاء الله.. يارب 

:: يله گومي طبي جوه صار بيها هوى عالي 

ما خلاني گادني من ايدي دخلنه جوه صارت بوجهي مرت عمي 

::  يا عمة شعندج گاعدة بالبردبره هسه تتمرضين تعالي يم الصوبة گعدي ادفي 

گعدت يم الصوبة اولاد عمي الصغار يباوعون عليَّه واحد باوع ع ثاني تمار ضحك بخبث لـ غزوان گام گعد ع ركبه و زحف بتجاهي 

:: تعاي اشاورج سر

:: اي 

لزم راسي بثنين اديه قرب وجه عليّه حلگه بأذني يحجي حرف و يضحك وصوت نفسه كام يخرخرش بـ اذني 

:: غزوان البارحة بال ع روحه و امي گعدت من الصبح غسلت فراشه و شرته بالسطح 

غزوان عبالك عرف قوس شفايفه مستهضم و بچه 

غزوان :: شگلت الها ؟؟ 

قبل لا يرد تمار حجيت و يفشله لان ادري راح يگول حتى يقهره 

رحمة ::  يگول اليوم أخذت عشرة بالملأ

غزوان :: صدك هيج گالج 

:: صدگني هيج گال 

هز راسه و طلع مغندب راح يبجي و يشكي لـ امه حجيت وياه تمار

::  تمار عيب تفضحه اخوك وتخلي الجهال تضحك عليه انت صير وياه ع ناس لا تخلي اي واحد يستنقص منه بعده صغير هسه يكبر وبعد ما يسويها 

برطم شفايفه بندم قطعت كلامنه من دخلت علينا كوثر دفعت الباب 

:: هاي رانيا اتصلت كلشي ما افتهمت منها شو تكول الشرطة جايه عليكم خل يطلعون بساع عليمن الشرطة تجي عليكم ؟ 

گمت ع سريع و عروه سمع كلام كوثر اجه راح للغرفة الجنت نايمة بيها جاب صايتي و جنطتي 

::  لبسي بساع بساع 

اخذتها منه البس بيها اديَّه تتراجف دنگ هو قفل السحابه و صعدها و مرت عمي تسئل هي و كوثر شكو و شصاير

عروه :: بعدين عمة  لازم نطلع هسه 

طلعنه من بيت عمي ع سريع وهو يباوع منا ومنا بخوف شاف ماكو شرطة أمن ايده تضغط ع ايدي بخوف خايف يترك أيدي للحظة واضيع منه اجر تكسي واحنه ماشين لمحت سيارات الشرطة دخلت لفرع بيت عمي والسابق سئل لان صعدنه وياه بدون ما نگول اله ع مكان اللي رايحين اله 

:: الله بالخير عمي وين توصلون  

عروه :: الله بالخير والعافية عليك 

گالها و بقى صافن محتار دقايق مسح ع وجه وگال 

::  لمطعم....... 

انطاه عنوان المطعم الي يشتغل بيه وصلنه  و لاجن الدنيا مغيمة و تريد تمطر الناس و العوائل گاعد طببني غرفة ما بيها احد 

:: گعدي هنانه هسه اجي لا تطلعين و اي واحد يدك الباب لا تفتحيها 

ضليت واكفه وحدي بالغرفة مبين مبيت للي يشتغلون من المحافظات خطية فزيت من مكاني من فتح الباب شاب من شافني رجع سد الباب بساع و صاح من وراها 

:: اسف خوية اسف ما ادري اكو احد هنا 

بقيت ساكته ماعرف شجاوبه رجع سئلني من ورا الباب 

::  شنو خيتي متيهه وداخله هنا 

:: لا جاية ويا عروه 

_ هاا 

نطقها و سكت اسمع صوت شاب ثاني يحجي وياه و اختفوا بعدها 

رانيا :: طلعت أشرت لبراهيم بعيوني حتى يطمن بقوا مگابلينه و واگفين خاف نتصل و ننطيهم خبر... گعدت ادعي كون طلعوا قبل لا توصل الهم الشرطة مرت علينا الدقايق مثل الدهر 

لحد ما اجه اتصال لضابط تعكرت ملامحه سده وورفع اصبعه بوجه ابراهيم يهدد 

:: هسه گدرت تهزمها قابل راح تبقى العمر كله شاردة و انتم و كل واحد اله صله بيكم راح احطه بالقائمة و بيت بيت اگلبه عليها وهذا ابنك الثاني هسه راح اطلع عليه القاء قبض واريد اشوف اني لو هي 

طلع و انسحبوا ورا الشرطة گعد ابراهيم مهدود حيله حسيت حركة بصدري همزين موبايلي صامت بس يهتز طلعت رقم غريب رفع راسه ابراهيم 

:: منو 

:: ماعرف رقم غريب 

:: جيبي بساع يجوز عروه 

اخذ الموبايل مني رد صدك عروه اشرتله فتح مكبر الصوت 

:: هاا بويه عروه وين انتوا لحكت تطلع اختك مو ؟؟

_:: اي يابه طلعنا وحرت وين نروح اخذتها وياي للمطعم.. اخليها يم بيت خالتي شتكول؟؟ 

::لا بويه من وصلوا لبيت عمك يوصلون للكل وانت هم لاتبقى تفتر يمكن راح يطلعون القاء قبض عليك ذولة 

:: لعد شلون وين اوديها يابه خو ما ابقيها بالمطعم و كله شباب 

يحجي وياه ابراهيم واني گاعدة اسمع شكو و شصاير جريت نفس براحة جيف طالعين تمنيت عندي أهل بيهم خير و تروح يمهم بين ما تفض سالفتها شوية وگال عروه مقترح ع ابوه 

عروه :: بويه عندي صاحب مثل اخويه حاسبه خوش رجال كلف أخذها يمهم شنو رأيك انت 

:: و شعرف اني ع صاحبك هذا و تخلي اختك يمه بويه 

:: مو گتلك اني اعرفه يابه ناس سادة و خايفين الله ويخليها يم اهله يومين بين ما نمشي نشوفهم شيردون 

::   ماعرف بعد اني بويه  تاه فكري 

::  يله بويه اني اتصل بيك عود 

سد الاتصال  وإبراهيم تخربطت كل احواله تالي عمره يتبهذل و يدور ع مكان آمن لبنته بعيد عنه 

رحمة :: رجع عروه اسمعه يحجي وياه الولد بره دخل بيده لفه و بطل مي وعصر 

:: هاج اكليلج لگمهذة بين ما نروح 

:: ما اشتهي اي شي گلي وين راح نروح 

ملابس الولد مطشرة بكل الغرفة لمهن ع صفحة يسوي مكان يعكد ع جودلية واجه خله اللفة يمي وكعد يفتح بطل العصر 

:: لبيت صاحبي 

:: و تريدني ابقى يم صاحبك ؟؟

::  يم اهله رحمة شنو يمه وهنه يومين بس واجي عليج اخذج 

::  لا مستحيل شلون اروح أبيت ناس غربة 

:: لعد تردين ياخذوج لسجن انتِ تعرفين شنو دا يصير بالسجون اذا ماتعرفين اسكتي وخليني اني اتصرف 

صار عصبي يصيح سكتت ابجي وهو طلع شوية واجه مبدل ملابسه زمخ بيّ 

:: ما تاكلين شمنتظرة اقدملج عريضة 

::  لا تصيح ما اريد اتتسمم هي جبر 

:: لعد كومي يله 

گمت ورا ابجي بلا صوت مستهضنة وهو طلع كلنيس من جيبه خلى بيدي بدون ما يحجي كل واحد من عدنه وصل الهم عنده حد التخمة لدرجة بعد ما گدر يواسي لو يطمن 

هروب فقط 

ليل اسود مثل سواد ايامي الجاية اباوع ع السمة ظلام هندس حتى گمرها اليوم غايب و الغيوم رمادية تمطر مطرها ساكت بلا صوت 

حجابي و ملابسي كلهن تنگعن بالمطر الگاع زلگ كل شوية تركس حذائي بالطين انتبهت من دوخة أفكار ع ثگل صار ع اكتافي انتبهت واگف كدامي ما ادري بيه خلى قمصلته عليَّه

:: خليها عليج تنگعتي لا نتمرضين

اجيت ارفعها عن اكتافي حتى اردها اله واني احچي

:: لعد وانت و جمالة لابس نص ردن هاك ارجع البسها الدنيا موت برد

تنهد بضيج ورجع حطها ع اكتافي وهو يرفع الردن بايده حتى ادخل أيدي

:: لبسي رحمة لا تجادليني ولا تناقشيني باي شي شگول الج گولي اي وبس 

نهى كلامه بـ امر و مشه گدامي ورا مشيت احس روحي تطلع ابطء وكفت بمكاني مترددة وهو هم هم من حس عليَّه بعد ما امشي ورا 

صد براسه عاگد ما بين حواجبه مستغرب حجيت واني انطي ظهري اريد ارجع لبيتنه ارجع لـ ابوية للأمان 

::  مستحيل عروه ماگدر افارگكم 

عجل بخطواته لحد ما وصل يمي لزمني من ايدي صار مقابيلي 

:: رحمة حبيبتي لا تخبليني ا... 

قطعت كلامه احاول أفهمه شعوري بلكي الله و يقتنع يرجعني 

::  شلون تريدني اعوفكم واروح يم ناس غربة شعرف عنهم اني تريدني اعوف بيت اهلي و اروح ادور الأمان أبيت ناس ما شايفتهم اصلاً بعمري كله 

دگ صدره اللي وهو يحجي 

::  اني شايفهم رحمة واني اعرفهم عز المعرفة ناو لو ما مأمن بيهم يصونوا الامانة ما اوديج يمهم 

:: صعبة والله و حتى لو اني اقتنعت همه عادي يخلون غريبة ابيتهم انت اتصلت ع صاحبك انطيته خبر 

:: اتصلت عليه من رقم صاحبي ما حصلته  

:; لعد منو يگول يقبل يستقبلني ابيته 

:: صاحبي و اعرفه و الغريب يقصد بيته ما يرده مو اني 

ضليت واگفة ابحيرة جمع اديّه منگعة من المطر أطراف اصابعي ثلج لمهن بين اديه و رفعهن لحلگه ينفخ عليهن يدفيهن 

:: رحمة والله ما اعوفج بلگي ابد واذا لا سامح الله و ظلوا معاندين أدبر جناسي و جوازات و نطلع اني وياج للخارج 

هزيت راسي بـ اي رغم ما مقتنعة بس استسلمت اله  مشينه طلعنا راس الشارع كلنا طين وگفنه ننتظر تكسي يفوت وگفت دراجه گدام عروه ولد شاب جيرانه و يشتغل بنفس المطعم يسئل بقلق 

::  ها يمعود شكو شصاير هوسة ابابكم والشرطة كلساع جافتة بيتكم خير خو ما كو شي 

:: لا ماكو مشكلة بسيطة 

:: والله جنت بالشغل من اجيت المره گالتلي خو ما محتاج شي.. فلوس أخيك اني والله ما يردك الا لسانك 

:: ما تقصر ابو شهاب ممنون منك الغالي 

راح الولد بطريقه أشر لتكسي و فتحلي الباب گال لسايق ع منطقة الي متوجهين الها بأطراف بغداد صايرة واني 

صافنة ارتعد گلبي من شفت ناصبين سيطرة وصاير ازدحام تفتيش التفت عليَّه  براسه اشرلي بعيونه بمعنى لا تخافين رغم القلق مرسوم ع ملامحه أكثر مني اديَّه بحجري افرگ بيهن

وحدة بالثانية بتوتر حطيت أيدي ع يساري احس گلبي يريد يطلع من مكانه كلما تتقرب السيارة ع السيطرة أكثر إلياس يصرخ براسي هذه النهاية راح يلقون القبض عليَّه حتى لو بررت الهم حتى لو گلت اني ساعدتها بس الواسطة

والفلوس فوگ القانون والقانون فوگ الضعيف ماعرف شلون لساني بدا يردد بصوت خافت بسم الله الرحمن الرحيم وَجَعَلْنَا مِن بَيْنِ أَيْدِيهِمْ سَدًّا وَمِنْ خَلْفِهِمْ سَدًّا فَأَغْشَيْنَاهُمْ فَهُمْ لَا يُبْصِرُونَ"

فتح الجامة السايق سئل السيارة الي بصفنا

:: ع شنو مسوين هالازدحام اليوم الافندية 

رد الثاني بسخرية من الوضع

::  ع حزام الأمان والله لو يجفونه شرهم احنه بخير وأمان

رغم كلامه الساخر جان مثل السكينة ال حاوطت روحي جريت نفس براحهة بعد ما نسيت شلون اتنفس اصلاً واحجي وياه روحي يعني مو عليَّه يعني ما راح ياخذوني،،، جر السايق حزام الأمان خلى و التفت ع عروه حچه وياه

::خلى الحزام عمي وخل اهلك هم يخلوا نشوف طلابة المستريحين هاي شوكت تخلص

اندار عليَّه عروه وهو يخلي الحزام

::  خلي الحزام بساع 

مديت ايدي ترعش القلق لسه بيَّه اريد اخلي ما اسيطر من رجفة أيدي مد عروه جسمه جره خلى الي 

وصلنا السيطرة مد راسه الجندي يباوع علينا شاف مخلين الحزام دگ ع القمارة وگال

::  اطلع 

حرك السايق واني بقيت اردد الحمد لله  رجيت راسي ع جام اسمع صوت المطر من يوگع عليها 

انتبهت من شرودي من وكفت السيارة و عروه طلع فلوس انطه لسايق فتحت الباب نزلت لفحني هوى بارد بعد ما جانت السيارة دافية وگفت الدنيا مطر بس گب هوى عالي و بارد... يمشي واني وراه دخلنا 

دخلنا منطقة ريفية نخل و زرع خضار بكل مكان 

صارت عيني ع جهال تلعب بجيحة مال مطر طلعت امهم لابسة عباية من دون حجاب لازمتها من يم حنجرتها بايد و بأيدها الثانية المساحهةتريد تضربهم بيها وهي تصيح 

::تعالوا طبوا گلت لاتخلون صوتي يطلع گدام الناس 

رد واحد من الجهال عليها وهو ياشر الها حتى تبتعد عن طريقهم 

::  بس وخري عن الباب حبابة

رجعت خطوتين ليورا عود تنطيهم مسافة امان وكالت 

::  وخرت يله 

تقدموا خطوتين وهي تحضرت رجعوا بساع شاردين منها صارت كر و فر وهمه يسئلوها 

:: ما تگتلينا مو 

::  لا ما اگتلكم يله لا اخابر ابوكم اخلي يجي من الدوام يبسطكم و يرجع 

آمنوا بيها بس اعرف اول ما راح يفوتون من يمها تحمسهم بالعودة هاي كلها مارة علينا والأمهات كلها نفس الاسلوب التكتيكي عدهن 

صدك اول ما فاتوا من يمهم امنت عليهم حتى ما يشردون ويا ما دخلوا سمعت صريخهم 

دخلنا بستان صارت عيني ع صهريج نفط مبنجر و راكس بالطين جذبت انتباهي الكتابة عليه 

قال تعالى ' كل من عليها فان' 

دخيلك ربي.. انتبهت ع عروه وگف يم باب يمها شجرة سدر كلش جبيرة عملاقة مغطية المكان و الورگ صاير بالگاع انتبهت ع حايط عليه قطعة سودة جبيره مكتوب عليها عزائنا دائم حتى ظهور القائم 

فزيت من مكاني ع صوت طگة قوية و ومضة ضوه ازرگ... بعدها طفت الكهرباء صارت هندس التفت محولة طلع الصوت منها هي طگت 

دك الباب محد طلع تمشه للمحل الي فاتح من بيتهم دخلنا فتح فلاش موبايله فارغ مابي احد شوية واجت بنيه بيدها لايت لابسة صاية وحجاب شامرته ع راسها 

::  السلام عليكم 

سلم عليها عروه و هي ردت توزع انظارها بينه 

:: وعليكم السلام 

::  السيد موجود لا 

:: ياهو منهم تريده عدنه سادة جثيرة خير من الله 

::  سيد غفار 

:: غفار موش هنا طلع عنده مجلس 

:: شوكت يرجع ما تعرفين 

:: راح من ساعة هسه ع جيه تريد اخابره الك اشوفه 

::  والله ياريت اني اتصلت عليه ما حصلته 

::  جا ما تدري مو غير رقمه جي فـ 

قطعت كلامها زامة شفايفها حيل حتى لاتحجين مبينة ما تگدر تضم سالفة عافتنه و طبت للبيت اسمع صوتهه تحجي حتى يتصلون بـيه وهي رجعت يمنه اجت بنية بعمرها تقريبا مدت الها الفلوس 

:: ولج اريد شامبو بساع تحركي 

باوعت للبنية من فوگ ليجوه تحجي بسخريه لاذعه 

::  ليش انتِ هم تغسلين 

::  اشايفتني ولج حتى هيج تحجين 

::لا بس رحلتج جدامي والگمل ينغش من الربطة و يدبي عليَّه 

تخصرت البنية تصيح و  أشرت الها 

::  بيج خير فوتي للبيت موش هنا مو جدام الوادم نتباطح 

عروه صد وجه بساع غاص بضحكته و الثانية ردت 

:: نتباطح عيع شهل هالألفاظ السوقية

:: خايبة تمشين لا العب الغالي ع غالي يله جري منا الغاگة  ام الگمل 

راحت البنية ادردم وهي عدلت حجابها تبتسم و خدودها صارن حمر خجلت 

::  تره انا خوش بت بس الوادم تطلعني عن طوري 

هزيت راسي الها اجت بنية ثانية أكبر منها منها لابسة عباية و واكفة ورا الباب وتحجي ويانه 

::  اتصلت عليه مايرد يمكن مخلي صامت علمود المجلس 

عروة :: ع راحته لعد راح انتظره هنا 

:: ليش هنا خويه تفضلوا تفضلوا عنبر دخليهم لديوانية  

:: لا خويه خاف زحمة انتظره هنانه 

عروه رفض خاف البيت ما بي رجال و عيب يدخل بس هي ما قبلت 

::  لا خويه رحمة تفضلوا 

دخلتنا نفوت البنية تمشي گدامنه البيت ريحة ورد جوري تفوح منه و ريحة المطر و التراب أخذتنه لغرفة بعيدة شوية هي بنفس البيت بس معزولة عن باقي البناء وجبيرة كلش 

طلعت تلگتنه مره چبيرة بالعمر كلش لابسه شيلة و شادة راسها بوصلة  خضرة فوگ الشيلة  

:: هلا بيكم حبوبه هلا تفضلوا 

شافها عروه عرفها ابتسم 

:: شلونج علوية صحتج شلونها .. عرفتيني لااا ؟ 

تقربت علينه تمشي ع كيف بقوة ضعيفة ظهرها محني... طلعت نظارتها من جيبها لبستها ادقق النظر بـ عروه وگالت 

::  انت موش صويحب غفار ؟ 

::  اي علوية اني عروه شنو بس لا نسيتيتي 

::  لا حبوبة نسيتك شني غير حاسبتك ويا احفادي سوه بس العتب ع النظر 

باوعت عليَّه بستفهام و عروه عرفها عني 

:: وهاي  اختي رحمة.. علوية

باوعلتي شالت ايدها بمعنى تقربي وهي تحچي 

:: هلا بيج حبوبه تعاي تكربي ليه احبنج 

تقربت عليها حضنتني و باستني بيها ريحة طيبة دائما اشمها العجايز حسيتها حنينة كلش 

العلوية :: ولج حبوبه ليش هيج مبربعة فوتي خل البنات ينطنج ثوب لا تمرضين 

رحمة :: لا بيبي عادي ا... 

قبل لا اكمل كلامي قاطعتني وهي تلزمني من ايدي ايدها نحيلة جلد ع عظم وبيها رعشة خفيفة 

العلوية :: ولج حبوبه باردة وملابسج كلها ماي هسه تطيحيلج بمرضه بس الله يعلم بيها 

عنبر :: تفضلوا منا 

شعلت البنية لالة محطوطة ع طبلة خشب صغيرة احس بيتهم من ذني البيوت  القديمة حتى الغراض القديمة عدهم.... 

گعد عروه واني اخذتني العلوية من الباب الداخلي  گامن البنات يسلمن عليَّه من شافني وهي گالت الهن 

العلوية ::  حبوبه انطنها هدمة من عدجن خلها تبدل لا تتمرض 

:: اي حبوبه صار 

ركضت بنية تريد تجيب ملابس وگفتها اني 

::  هاي عندي ملابس... بس وين ابدل ؟

::  تعالي وياي 

تحجي وعيونها ع كدامات اللي بوجهي و السحجات تارسة خدي  بلا ما تسئل دخلتني بوحدة من الغرفة و طلعت خاولي هم انطتني 

:: اذا تردين فوتي سبحي مي دافي حتى تدفين وترتاحين 

:: لا بس ابدل ملابسي 

:: براحتج حبيبة 

طلعت شسوار من فاتية الميز شكلته بالنقطة مال كهرباء 

::  نشفي شعرج هم اكيد تبلل شالج ينگط ماي و اي شي تردينه بس صيحي براءة وانا اجيلج 

اسم ع مسمى سبحانه من جمع كل البراءة بملامحها 

هزيت راسي اي و تشكرتها طلعت و سدت الباب بدلت و كملت طلعت رجعت يم عروه لگيته مبدل ملابسه هم لان تبلل أكثر مني و العلوية تسئله 

::  شلونهم اهلك حبوبة 

::  الحمد لله زينين برحمه الله 

:: الله يجعلهم 

اجت البنية ام المحل... عنبر بيدها سراحية مي و كلاص صبت النا 

العلوية :: ما خابرتي غفار گله صويحبك اجه عليك ومنتظرك 

عنبر :: خابرت و ما يرد هسه راح اتصل عليه بعد اشوفنه 

العلوية :: اي حبوبه و خلي البنات يسون جاي و يستعجلن

خلت سراحية المي يمنه بعد ما ضيفتنه وراحت ورا عشر دقائق رجعت بيدها صينية جاي و كليجة رادت تضيف عروه أشر الها ع حجية 

:: انطي للعلوية أول 

ردت العلوية رافضة تاخذ... سوالف ماعرف بيها واحد يشمرها ع الثاني دخذوا وفضونه 

العلوية :: الضيف اول حبوبه ولو انت موش غريب وليدنه وبنص بيتك 

عنبر :: صدك غفار رد و گال جاي بالطريق 

رد عروه عليها 

عروة ::  خاف طلع من المجلس خطية خل يكمل ع راحته 

عنبر :: لا هو بس يفتتح المجلس بالقرآن و صارله هواي من راح 

گعدنا ننتظر شرب عروه من الجاي شويه و دار وجه عليَّه وگال

:: شربي جايهم طيب يسووا ع حطب 

هزيت راسي بـ اي گالت العلوية 

العلوية :: شربي حبوبه لا تستحين شربي دفي بطنج

شلت استكان الجاي يبخر لزمته بين اديّه تسرب الدفو لجسمي شربت منه گمع و ضليت لازمته بين اديَّه صافنة ع البخار يتصاعد منه و يتلاشى عيوني جامدة حتى ما ترمش و عقلي اخذني لبحر من الأفكار

انتبهت من شرودي تنهدت تنهيدة قوية وزفرت انفاسي بخنگة كلشي بيه يرفض بقائي هنا عقلي ما يرضا يستوعب ان اني گاعدة أبيت غريب و دقائق معدودة اخويه يعوفني

هنا و يمشي لا عقلي ولا گلبي متقبلات هذا الوضع بس حالي حال المربط والنار داير مدايرة ماگدر كلشي اسوي

تعبت من التفكير تعبت من هذة الحرب الي توها بدأت ذبيت حملي ع الله تعالى و خليت ثقتي بيه و تقبلت واقع انفرض عليَّه ما اختاريته

اجت طفلة صغيرة وگفت يم العلوية تباوع علينا بفضول عيونها و نظراتها تنتقل بيني و بين عروه ارتسمت ابتسامة ع ثغرها 

::  عمي عروه شلونك 

:: هلا بـ ازولة انتِ شلونج 

سلمت عليه تعرفه وهي صفنت عليَّه و باوعت ع عروه اسئله

::  منو هاي البنية عمي

:: اختي 

:: شني اسمها 

:: رحمة 

:: رحمة ؟؟؟

نطقت اسمي كأنها متعحبة او مستغربهة ضحكت واجت حضنتني و باستني 

:: شلونج عمه رحمة 

:: هلا يعمري زينة

للحظة هذه الطفلة نستني همي و شغلت تفكيري بيها حبيت بيها ما تستغرب و تندمج بساع... عافتنا وراحت وگفت يم العلوية و عيونها ع برا تباوع ع مطر رادت تطلع صاحت بيها الحجية نهرتها 

العلوية :: گعدي هنا جده لاتطليعن برا مطر وهوى بارد تنصگعين

حذرتها بلهجة صارمة و الطفلة برطمت بعبوس

أزل :: اريدن ارجع لبيتنه ترفة گالت جيبي معجون وتعاي لا تبطين 

العلوية :: و اختج ليش ما اجت لهنا شعدها باقية هناك 

رجفت شفتها وقبضات اديها تضغط ع نفنوفها بقهر 

أزل :: عمار طكاها ع عينها صارت حمرة  

العلوية : و أبوج الشفية وينه 

أزل :: وهو گاله طگها حيل جي رادت تروح المدرسة و شككو كتبها همين 

من يمي نقهرت عليها و العلوية دكت صدرها تدعي ع والد الطفلة اللي هو ابنها 

العلوية :: حسبي الله ونعم الوكيل بيك يـ كزار يا ابن بطني 

سمعت صوت رجال بره و عروه عرفه كام  گمت ورا هم اجه رجال راد يدخل من شافني تراجع صاحت العلوية 

العلوية :: تعال غفار..... تعال حبوبه موش غريبة مثل اخيتك 

دخل لابس دشداشة سودة و غترة ع اكتافه وهو غاض النظر گال 

غفار :: السلام عليكم 

رديت السلام بگلبي و سلم ع عروه و بوسه 

غفار :: شعجب منين طلعت الشمس و مريت علينا اليوم 

عروه :: ملتهي بهل الدنيا والله و شغل... بس سيد اليوم جايك بطلب و اتمنى ما تردني 

غفار :: غالي و الطلب رخيص ما يردك اله لسانك أأمر 

گامت العلوية تتوجه ع عوجية و صاحتني وياها 

;; تعالي حبوبه خلهم يتفاهمون بينهم 

گمت وياها ويا ما فتحت الباب الخشب صارت بوجهي عنبر جانت مخلية اذنها ع باب ضحكت بوجهي خجلانة دخلنه و رديت الباب وراي... صاحت بيها براءة  نهرتها بعتب 

براءة :: چم مرة گتلج بطلي هاي السولة النگسة مال تصنت 

عنبر ::شمالج شسويت قابل تصنت ع خطة تحرير الموصل 

براءة :: چا من عبنها هيج موش مو مهمة شعندج شامرة اذنج ع باب فوتي گعدي يله 

عنبر :: فضول چتال صاحبة يا براءة يا خيتي 

گالتها و رجعت اذنها ع باب اجت الثانية جرتها من ايدها 

براءة :: خايبه ميلي ليغاد زلم يحجون بيناتهم مدري عدهم سالفة شغيلة و عيب تسمعينهه 

عنبر :: مثل شنهي عيب يعني 

براءة :: اگللج اگعدي لا اگولن لـ اخوج عليج وانتِ تعرفينه چم مرة توبج من هاي السولة 

فرت ايدها مستهزئة 

عنبر :: وشنهي عبالج اخافن من جراح انا!! 

براءة :: لا عمي منين تخافين انتِ سلف كامل تهججينه 

شمرت طرف شالها ع كتفها بغرور 

عنبر :: طبعا انه عنبر عزيزة آل هاشم ع سن و رمح ياهو يگدر يفگ حلگه  وياي بكلمة يترسونه سماد اله 

عيوني تنتقل بينهن سوالفهن حلوة خاصة عنبر فززني وهد حيلي كله صوت 

                  الفصل الخامس من هنا 

لقراءة باقي الفصول اضغط هنا