رواية احببت وانا علي ذمة اخر الفصل التاسع 9 بقلم نوسه حمد
اشتريت البيت واتفقت مع اخوي بكره يكتب البيت بي اسمي واديتو اوراقي الثبوتيه ورجعني البيت من جنب الباب سامعه صوت اطفال قلت ياربي عبله ما صدقت وجات كان تنتظر حبه دخلت لقيت طارق شايل الولد والبت تبكي عايزه امها قلت ليهو طارق م تقول لي طلقت عبله قال لي ياريت والله عبله من عرفت اني فضيت الشغل والشراكه وبعت العربيه مشت جابت الاولاد وجدعتهم لي وسافرت غلبني اضحك واشمت وغلبني اواسيهو قلت ليهو الله المستعان ربنا يهون عليك ويخفف عليك الحمل قال لي امين وطول م انتي معاي ماف حمل قلت ليهو طارق انا م بقدر اتراجع من قراري وربنا يخفف عليك الاولاد ديل م بالساهل يسكتو ليك وديهم لي امك وانزل شغل وربنا يعوضك وتلقا الاحسن مني ومن عبله قال لي للاسف م ح القا الاحسن منك انتي كنتي نعمه وما حمدت ربنا عليها وشيلت اصبعي وقديت بيهو عيني م اوصف ليك كميه الندم الانا فيهو هسي خسرت شغلي م زعلت قدر م زعلان عليك نوسه عشان حبنا اقعدي معاي م عشان تمسكي لي اولادي بس عشان انا محتاجك جنبي انا حاسي نفسي بموت بالبطي قلت ليهو. اعفي لي م بقدر وربنا يخفف عليك دخلت جوه نور قالت لي ماما ديل منو قلت ليها ديل اخوانك قالت لي اولادك انتي قلت ليها لا امهم واحده تانيه قالت لي حلوين ماما جيبي لي بيبي زيهم ارح نشتري من مكان اشتريتني انا قلت ليها ان شاءالله هسي نومي انتي تعبانه نومتها جنبي وصوت الاطفال قطعو قلبي مشيت سخنت ليهم لبن وجبتو اديت طارق كبايه اسقي البت وانا مسكتا الولد شربتو وبقيت اطبطب عليهو لغايه ما نام وكانو ببكو لمن بتنهفو قطعو قلبي وطارق ملامحو اتغيرت الهم عاوز يقتلو قال لي ع فكره اتوقعت عبله تعمل كده اتزوجتني عشان مصلحه ولمن انا بقيت م عندي قروش وعلي باب الله قالت لي انا م بستحمل وهي عندها اهداف لسه م وصلت ليها ما اتحاورت معاها مسكت اولادي علي قلت ليهو م مشكله امك بتربيهم قعد اضحك وما نطق حرف الاولاد نامو رقدتهم معاهو ومشيت رقدت جنب نور ولليوم التاني لا هو نام لا انا قلبي انقطع عليهم وكرهت عبله شديد عاوزه من الدنيا شنو غنا الغنا غنا النفس ما بالقروش ح تفضل تجري ورا الدنيا كده وما ح تلقا العاوزاهو صحيت لبست بتي وطلعتها وجيت لقيت الشفع يبكو بكا وطارق غلبو البعملو معاهم اتصل لي امو قال ليها تعالي امو بعد ساعه جات لمن شافت الشفع قالت ليهو م تقول لي طلقت عبله المفكره المدبره المعاها بقيت زول طبعا هي تطاعن فيني وبقت تقول ليهو سجم خشم امك يا الماك عارف مصلحتك طلقت الما بتستاهل الطلاق قال ليها انا م طلقتها ولا ح اطلقها م حباً فيها عشان احرمها تشوف حياتا وعبله عمرها ما كانت عاوزه مصلحتي كانت عاوزه مصلحتها هي وبس والدليل من عرفت اني خسرت قروشي جدعت لي الاولاد هسي في مره بجدع اولادها وهم صغار كده هدي عندك نسيبه عشان بتها قعدت معاي وهي مظلومه وماقالت انها مظلومه ولا شكت استحملت عشان خاطر بتها م جدعتها وفاتت بس انا الاخترت الشقاوه وبدفع في تمن اغلاطي هسي وانا م اتصلت عليك عشان تتناقشي معاي ناديتك عشان تمسكي معاي الاولاد ديل قالت ليهو دي منو البتمسك ليها شافع انا م صدقتا كبرتكم وزحيتو من وشي كمان تجي تمسكني اطفال ومالا مرتك البتشكر فيها دي م تمسكهم وتربيهم مع بتها قلت ليها انا في نظرك هامله للدرجه دي انا قراري م برجع منو وبعدين انتي حبوبتهم احن عليهم مني م مسكتيهم اجي امسكهم انا طوالي قالت ليهو انا م فاضيه ليك ولا لي همومك دي وفاتت اتمغستا عليها وطارق زاتو بقا غضبان والشفع نباحين زي امهم كسرو ضهرنا المساء اخوي قال لي خلاص استلمت مفاتيح البيت طوالي قلت ليهو تعال سوقني ذنبي شنو قال لي تمام لميت ملابسي وملابس بتي وانتظرت اخوي جا ساقني وقال لي طارق بكره نجي نبدا اجراءات الطلاق قال ليهو انا م بقدر اديني اسبوع عشان اشوف صرفه للاطفال ديل قال ليهو نصيحتي ليك اتزوج واحده تقبل انها تربيهم وربنا يهون عليك نور قطعت قلبي تبكي وابوها يبكي وانا زاتي بكيت معاهم الفراق نار ماف زول بيستحملو طلعنا وركبنا العربيه ومشيت خليت طارق حالتو بالبلا اخوي قال لي عبله فاتت وين قعدت احكي ليهو قعد اضحك قال لي والله اتوقعتها انتي مفتكره عبله ح تستحمل معاهو وتعيش معاهو علي الحلوه والمره لا طبعا البت دي ماديه كانت عاوزه توقعني انا بس انا مستحيل اتزوج في مرتي واحده قادره زي دي حظرتها وحزرتها تاني تتصل علي شكلها رسمت علي راجلك واتزوجتو وحرشتك واكلو حقك بس عفيت منك قدرتي تطلعي حقك قلت ليهو الله كريم وبقا يسالني الفكر ليك الفكره دي منو حكيت ليهو بالصراحه بس م قلت ليهو حبيت خالد قال لي زميلك دا معلم كبير انقذك شديد قلت ليهو الحمد لله نزلنا السوق واشتريت لي عفش وجبنا معانا النجار ركبو لي وفرشت البيت احسن فرش والبيت كان رهيب ونظيف اخوي قال لي البرقد معاك منو قلت ليهو كنت في بيتي برقد براي معاي ربنا قال ونعم بالله الوكيل بس صعب عليك قلت ليهو لا م صعب خليني بس نزلت في بيتي وكنت متوتره شديد اتصلت علي خالد بارك لي البيت وريتو اني م جبت سيرتو في خشمي بقينا نتونس حسيت اني مرتاحه شويه خالد سالني طارق ح يطلقني متين قلت ليهو قال يومين قال لي كويس نزلت الشغل وعلاقتي بقت قويه شديد مع خالد الحاجه الوترتني طارق قال لي مستحيل اطلقك بخليك كده بس اتكلمت معاهو اني م عاوزه ادخل محاكم خلينا نفترق بالاصول رفض شديد قال لي مصيرك تجي راكعه لي حسيتو بقا قوي شديد كان نفسي اسالو اولاد عبله وين وعملت شنو بس م سالتو مشيت لي اخوي قلت ليهو تتفاهم معاهو قال لي خلاص امشي علي بيتك وانا بتصرف كلمت خالد بي طارق وكلامو قال لي غريبه طارق اخر مره كلامك عنو قلتي كان منكسر الخلاهو يقول ليك ح تجي راكعه شنو قلت ليهو م عارفه والله وتعابير وشو بتقول انو طارق في حاجه مقوياهو من ناحيتي قال لي اعملي حسابك م تظهر ليك عبله في حياتك جديده قلت ليهو لا والله علاقتي مع الناس بقت مختصره شديد الا معاك قال لي يعني بتشكي فيني قلت ليهو لا م قصدي قال لي انتي عارفه انا بحبك قدر شنو ومستحيل اضرك بشي ولا عندي مصلحه اني اضرك قلت ليهو معناتا بس حسا اني ح تغلبني الحياه وح اجيهو وما عارف انو انت سندتني بعد بعدتا عنو
مرت الايام وكل م امش لي طارق بقول لي نهايتك قربت ولمن اسالو بقول لي واصلي ي نوسه وانا طلاق م عندي
سالت الجيران قالو لي طارق اتزوج وجاب مرتو البيت بت مسكينه وهديه ورضيه وما بتخير عنك بشي فرحت ليهو من قلبي وباركت ليهو لمن جا يسوق نور بس ما ردا علي خالد قال لي كويس بعد اتزوج خلي يطلقك عشان نتزوج انا زهجت والله قلت ليهو علاقتك مع مرتك لسه متوتره قال لي اصلا هي م شغاله بي وانا بقيت م شغال بيها وطلاق م بقدر اطلقها عشان اولادي مجبور استحمل بس من حقي اتزوج واخترتك انتي قلت ليهو وقت اخترت اخترت المتزوجه وامورها جايطه قال لي معليش كلها اقدار انتي مظلومه وانا انظلمت وانجبرنا علي الحياه جبر قلت ليهو الحمد لله
مرت الايام ولسه طارق مجرجرني وبرسل وبتصل علي اخوي بقا م برد علي مره اخوي اتصل علي وقال لي انتي وين قلت ليهو في البيت قال لي طيب انا جاي عليك انتظرتو جا لقا جنبي نور قال لي اشغليها وتعالي عاوزك دخلتها تحضر جوه جيت ليهو قلت ليهو مالك في شنو وكان غضبان وضربات قلبو زايده اداني كف لمن حسيت الدنيا ظلام قلت ليهو فشنو فهمني م تضربني ساي فتح لي تلفونو واداني اسكرنات من دردشه اول رساله في الدردشه مكتوب فيها متين ح تتطلقي عشان نتزوج زمان كنتي بتحججي بي انك صابره عليهو عشان حقك العندو بعد شيلتي حقك اطلقي وغيرها رسايل كتيره انا غلبني اتكلم قال لي للاسف انتي م محترمه كيف تعملي علاقه وانتي متزوجه وتهدمي بيتك انا غلبني ارد بحرف ليه لانو الدردشه والاسكرنات المأخوذه لو قراها اي زول بعرف انو انا طلبت الطلاق عشان عملت علاقه مع غيرو وفي نظرهم انا خاينه وفعلا انا خاينه بس كل الحاصل في حياتي من ظلم ماف زول عارفو غيري وغير طارق وماعندي تبرير للدردشه ولا لي علاقتي مع خالد وبقيت محتاره الدردشه وصلت اخوي كيف معقوله خالد يغدر بي تفتكرو الحاصل شنو ………..يتبع