رواية العروس في الثوب الاسود الفصل الحادي عشر 11 بقلم عبير ادريس
بعد مروان ماتعرفه ؟ اذا خله شي براسه ينفذه !!
فتحت الباب شوية اريد اشوف منو ، هذا اللي كاعد يحجي ، انصدمت من شفته ايهم شجابه مو مسافر؟ وهاي نور كاعدة يمه
ايهم: كلتله لاتروح وتجيبها عوفها هناك وضعيتها تعبانة ليش هيج سوة ؟ ليش ؟ مو راح يخبلني.
نور : محد راضي بسوايته ، لا ابوك ولا ابوي ولا عمي جواد.
ايهم : شلون راح ؟ محد كدر يوكفه عد حده ؟
نور: دخل يم جدك اول البارحة وما ادري شقرأ براسه وجدك كاله تم
ايهم : اخ اخ مروان ، هذا عود يحب عمي وصديقه جان وسوة هيج لو عنده عداوة وياه شيسوي
نور: اسكت ايهم ماشفتها للبنية شلون تعبانة وجهها اصفر متت بجي عليها تصدك البارحة عيوني ماضاكت النوم
ايهم: شفتها دخلت الصبح وتخبلت ماعرفتها بالبداية الا من سألتج هاي منو بغرفتي نايمة وكلتي رسيل.
نور: افكر لا يجرالها شي وينحسب ذنبها برگابنا لان ما منعنا مروان ورديناه عن اذيتها.
ايهم: ماشفتي راح البارحة استغل سفرتي ، وانتِ من دزيتيلي مسج كتبتي مروان راح لبنت عمك يرجعها ، اخذت اول طيارة ورديت،ماضنيت بهالسرعة يجيبها صدمني..
نور: والحل شنسوي ؟
ايهم : اردها وغصب عنه ، منتظرهم يلتمون خابرت على ولد عمج واخوانج الهيلك ، مابيهم زلمة بيه حظ يرد مروان عن سوايته ، كلها ركضت جدامه مثل الغنم.
نور: الله يستر ، مروان ناوي نية كشرة وكاشف عن انيابة .
ايهم: شحدة يجيس شعرة من راسها ، بوكتها انسى اخوي الجبير وله مكانته واكسرله اصبع اصبع
نور: اول تالي تحجي على مروان هيج ؟ وهو روحك من الدنيا.
ايهم: احبه ما كارها ، انه اكره ظلمه ، لزمتة حاجيته بيوم الرد من دفنة عمي، كلتله عوفها مالك شغل بيها البنية تربت هناك وتعلمت على بيت خالها سنين يمهم، جاوبني بأي وسكت ماضنيته يضحك علية ويسايسني ويسوي اللي براسه..
ورا شوية كمز من مكانه..
نور: وين ؟
ايهم: اجوا هذا صوت مروان .
طلعوا على السريع وطلعت وراهم على كيفي حتى اسمع شنو راح يصير اريد بس خيط امل اتمسك بيه حتى ارجع لبيت خالو ، وكفت فوك على الدرج ، محد يشوفني لان لوفة بيه سمعته صاح بعلو صوته وتلازم وياه..
ايهم: مروان تضحك علية ؟ من كلتلي مالي شغل بيها، انتظرت سفرتي ورحت جبتها ؟ لك انت شنو من بشر فهمني كدرتك على اليتيمة.
مروان: حقك ما شفتها بيوم جبناها شلون شمرت روحها فوكاه، لك جدامنا لا استحت ولا خجلت ، لو وحدهم شتسوي هااا كلي شتسوي ؟
ايهم: حقها شتريدها تسوي ؟ تصفكلك خطيبها وانضرب جدام عينها خافت يروح منها ومنا جرحها اخضر على ابوها وهذاصديقك ، هيج تجازيه مروان ؟ شتكول لعمي بيوم الحشر اذا شافك ؟ ها شتكوله ؟
مروان: بالعكس مفروض يفرح انه حميت بنته وجبتها بنصنا قابل شامرها بالشارع ؟
ايهم: من شنو تحميها من شنو ؟ لو جاية بارادتها اضربني طلقة لو حجيت انت جبتها غصب مروان وتحت تهديد السلاح ، شدولك رتبة تحمي الناس لو ترهبهم ؟
جانوا يحجون بصياح وانفعال واضح..
مروان: من الأخير ولا تدوخني وراي شغل ، شرايد ؟
ايهم: تردها مثلما جبتها.
سمعت صوت جدي الكل سكت وصار هدوء.
الجد: المن ترد ؟ ولد علي ؟صارلك ساعة تعارك اخوك الجبير على ياهو شنهي اليوجعك ؟ كلي بيه حتى اطيبنا الك.
ايهم: جدي رضيت بسواية مروان و ولد عمامي ؟
الجد: راضي وهاي جدامك احبن راسه..
مروان: لا جدي العفو منك انه ابوس راسك
ايهم: هذا ظلم وحرام شلون تغصبوها على عيشة هي كارهتها ماتت من قهرها شلون ؟
الجد: ماعليها الا العافية يومين وترد مثل اول واحسن بعد.
ايهم: جدي من رخصتك انه باجر طالع لبغداد من الصبح وماخذ رسيل وياي وما اسمح لواحد يتدخل ويمنعني.
الجد: يعني تكسر جلمتي وتدوسني وتعدي( تمشي) .
علي ابو مروان: حشا يابة حشا مو قصده هذا الكلام، فد خايف من المشاكل لا تكبر بينا وبينهم.
حجى مروان مستهزئ
مروان: بين منو ومنو حجي ؟ ليش هم منو عندهم مكطمين ، هو عم واحد ومسافر وباقي فد محمد والبارحة يتراجف على ابنه.
ايهم: وفرحان مخرع العالم بسلاحك ؟ انت و الوياك توليتوه للرجال ، ما خفت من ربك مروان ؟ اتقي الله لا توكع وكعة محد يطلعك منها.
الجد: بس ما اسمع جلمة زايدة البت تبقى ببيت جدها وما ارضى لا الك ولا لغيرك يتحكمون بامرها، الجلمة الاولى والاخيرة يمي
ايهم: اردها يعني اردها لو اعرف الدم يوصل للرجب..
الجد: يلا يا ولد ولدي دوس على جثتي واخذها وروح.
صاح ابوهم
علي: ايهم اصعد فوك وعوف جدك لا يتخربط .
انداريت حتى ارجع لغرفة ايهم خاف يصعد ويشوفني واكفة ما اريد احجي وية اي واحد منهم ، وجان اشوف وحدة مكتفة ايديها تباوعلي وتضحك ، عديتها ردت افوت ،كالت..
_ مو عيب اليتنسط على حجي الغير ؟ اهلج ماعلموج الأدب ، ولو انتِ منين تعرفين الادب؟
انداريت الها
رسيل: مثل ما تشوفين الموضوع اللي سمعته يخصني ما يخص احد ثاني يخص حياتي ومستقبلي ، تمام ، واهلي مربيني ونعم التربية بس اويلي على اللي يتدخل بشي ما يخصه وحاشر نفسه بيه .
انهدت تريد تجي علية ، طلعت نور من غرفتها وصاحت .
نور: شوق عوفي البنية مالج دخل بيها .
شوق: والله خوش مركبتلج درع بعدج ما جيتي والمحامين مدري منين طلعولج.
نور: رسيل روحي ارتاحي وهاج هاي ملابس اسبحي وبدلي
اخذت الملابس منها ودخلت لشقة ايهم ، عفتهن يتصايحن بيناتهن.
فتت للحمام شمرت ملابسي بالسلة ، فتحت المي ودخلت جوا الدوش اريد اعصابي تهدأ، كملت سبح ، نشفت ولبست ملابسي وطلعت ، راسي يموتني احس بدوخة كلش قوية اندكت باب الشقة فتحتها
ايهم : ها انتِ هنا ؟
رسيل: تعال ادخل اني راح اروح يم نور.
ايهم: لا لا اخذي راحتج .
عافني وراح اسمعه يصيح
ايهم: نور نور ، شوق ، ادري ولا وحدة هنا اختفيتن .
شوق: ها عيني جنت بالمطبخ نحضر بالغداء
ايهم: تعالي ادخلي لغرفتي طلعيلي تراكسود ومنشفة اريد اسبح بشقة ياسر ، وبدربج انطي خبر لنور .
شوق: صار .
انفتحت باب الشقة ودخلت شوق فاتت للغرفة وكفت بالباب وتخوصرت .
شوق: هاي راح تبقين هنا بغرفة الولد وهو متهجول؟
جنت امشط شعري ما جاوبتها
شوق: انتِ هي مو احجي وياج ؟
رسيل: كلتله لأخوج اطلع مارضى شسوي يعني؟
ايهم : شوق وينج ساعة هو سلاب وين دازج انه وين صرتي ؟
رسيل: اخوج يصيحلج روحيله
باوعتلي ونفخت بضوجة راحت فتحت الكنتور طلعت ملابس ومنشفة وطلعت.
ورا ساعة صعدتلي نور ، شايلة صينية بيها اكل خلتها بالهول وكعدت
نور: تعالي ياحلوة نتغدا سوى
رسيل: ما اشتهي اكلي بالعافية
نور: هاي سالفة؟ انه عايفة زلمتي جوة ياكل وحدة وجيتج نتغدا اثنينا تاليتج ما تاكلين وياي ؟ ازعل وما اخلي الزاد بحلكي وحك علي.
كمت ابجي
رسيل: مخنوكة والله گلبي يوجعني ومالي نفس لأي شي
كامت تسوي لفات صغار وتنطيني ، جنت كاعدة على القنفة نزلت كعدت يمها بالكاع..
نور: هاج حبيبة قوي عظمج، شبلاج جنج جريدة
رسيل: جريدة شنو؟
نور: ممسوحة مسح ماعندج علامات الحرمة
رسيل: هههه والله ضحكتيني
نور: اي حبيبة اضحكي والله گلبي يفرح صار هالكبر ، وتأشر بيدها.
رسيل: نور
نور: عيونها
رسيل: انتِ ليش زينة وياية ؟
نور: وهذا زين ما زين !!
رسيل: لا قصدي ليش تعامليني بشكل يختلف عنهم ، رغم الكل كارهني بس انتِ مبين لا
نور: عيارة ياهو الكارهج كلها تتراجف عليج
رسيل: شلون يعني مافهمت؟
نور: انه افهمج فد هاج اكلي اللكمة افتحي حلكج اي عفية ، شوفي يبت عمي، هنا كلها تحبج وما ظن واحد بيهم يبغضج لكن طبايعهم تختلف عنج كولي شلون .
رسيل: شلون ؟
نور: انه اكلج ، عندنا هنا الحرمة توصل ثالث وكلش كافي تبطل من اول قسمة تجيها ، اهم شي تعرف تقرأ وتكتب.
رسيل: يعني معقولة الكل هنا هيج مثلكم ؟
نور: انه ما اعمم على الكل احجيلج عن عمامي وابوي وجدي مالي شغل بغيرنا
رسيل: كملي
نور: هنا الحرمة المفرعة عيبة بحق اهلها، والترادد هم عيبة والترفع حسها ، والضحكتها عالية ، وماكو حرمة وي زلمة يكعدون سوى اذا مابينهم خطوبة رسمية بعقد لو زواج ، وماكو وحدة تطلع باب الحوش وحدها اذا مو محرم وياها.
رسيل: محرم شنو ؟
نور: يعني زوجها لو ابوها لو اخوها ، وها لازم شغلة ضرورية، طبيب ، عرس اقارب، فاتحة اسم الله وتأديه الواجبات تروح وحدة من نسوانه الكبار وي الحجية احنا ما نطلع.
رسيل: بس هذا سجن شلون متحملين هيج؟
نور: من شب على شيء شاب عليه، من احنا صغار شفنا جدة وامهاتنا هيج ، طلعنا عليهن.
رسيل: بس اللي حجيتيه شعليه بحبهم وكرهم الي ؟
نور: جايتج بالحجي ، انه الحجي الكلته كله انتِ مسويته
رسيل: شمسوية يعني مافهمت ؟
نور: اكمل ولا تقاطعيني
رسيل: كملي.
نور : الشغلة الاولى والاساس مفرعة وصوتج عالي وتراددين الزلم كلمة بعشرة ، وفوك كل هذا ضربتيهم وتجاسرتي عليهم ، تعرفين لو انه لو شوق لو وحدة من البنات، مسوين ربع السويتيه وي مروان جان هسه وحدتنا حافرين كبرها بالحديقة وشابعة مي ورد، فد ساكتلج لان يعز عمي الله يرحمه ، ولخاطر جدي عبن يحبج وما يرضى احد يزعلج ، ومن يوم ما اتفقوا يجيبوج ليجاي وصاهم عليج هو وعمي علي.
رسيل: بس هاي حياتي ومسحتيل اتغير علمود واحد وابقى مثلما اني يعجبهم يعجبهم ما عاجبهم يرجعوني لحياتي القديمة اني ما اتحمل هيج مستحيل اموت
نور: تتغيرين وتصيرين مثلي ومثل البنات انطي صبر.
رسيل: هم ما كلتيلي شلون عرفتي يحبوني ؟
نور: الي ساعة ارطن ، وتكولين شلون يحبوني ؟ حبيبة هم ماكارهيج، كارهين افعالج غيريها يشيلوج بعيونهم .
رسيل: بس اني اريد ارجع لبغداد بيت خالو ما اريد ابقى هنا شلون عفية ؟
نور: هاي لا بيدي ولا بيدج بيد جبيرنا
رسيل: منو هذا جبيركم من جيت لحد الان تحجون بيه .
نور: مروان
رسيل : وليش تصيحوله جبيركم ؟
نور: هسه افهمج
اجتي بصفي لزمت ايدي وكعدت تسولف .
نور : شوفي خيه مروان ابن عمي الكبير اسمه علي اول فتحة عينه اجى على ثلاث بنات
رسيل: يعني عمي علي عنده ثلاث بنات كبار ويلا اجى مروان ؟
نور: عليج نور اي هو اجى فوك ثلاث بنات ، عمي علي طار بيه وجدي وجدتي ، وها هو اكبر ولد عمامي واكبر اخواني ، من يوم يومه ثكيل وما يرضى يلعب وي اللي بعمره دوم تشوفينه مرافج الاكبر منه بالعمر ومن جان بعمر خمسة سنوات يحضر كعدات وفصول وي عمي وجدي يوم بعد يوم صارت جلمة مروان مسموعه اللي يريده يتنفذ ومن كبر صارت جلمته تمشي على الكبير قبل الصغير عدا عمامي وجدي طبعاً
مروان من هو وصغير حلمه يصير ضابط ،وتوفرت كل السبل اله كمل علامه ودخل دورة ضباط وصار ضابط ويوم بعد يوم بده يترقى ويكبر.
رسيل: هم
نور: عمي علي عنده بناته الثلاثة الكبار ازهار الجبيرة عمرها قريب ٤٧سنة ، وراها ابتهال اصغر سنة ما اعرف شكد بالضبط والأخيرة انتصار، من بعدهم مروان عمرة ٣٦ ، وايهم ٣٤ وياسر ٣٢ وشوق الله يعينه عليها المصيبة صغيرة الكعدة ومدللةالبيت محد يحجي وياها عمرها ١٨ سنة جابتها عمة شيماء على كبر لهذا عزيزة عليهم.
رسيل: خوش مسطرتهم زوجة عمج
نور: ههه كون تسمعج هسه ، من جابت مروان وجدة وكفتلها هاي الوكفة جيبي ما جيبي لن بطنج انفتحت وربج زرع بيها الولد.
رسيل: ليش هي بيدها كله رزق من رب العالمين وشمدريها راح يجي ولد ورا مروان.
نور: عقلية اهل قبل على نياتهم اذا جابت الولد تجرها ولد واذا جابت بنات تجرها بنات.
رسيل: وانتِ بنت ياعم بيهم ؟
نور: انه بنت عمج جابر اكبر من ابوج ويعتبر الثالث بعمامي ، اخواني قسور وسرمد ولؤي وحاتم ، والبنات انه وهديل
رسيل: ماشاءالله كلهم عندهم ولد خوش عصابات
نور: هههه ما ازعل منج شما تحجين اعرف البداخلج نظيف وابيض فد من حركة گلبج هيج جاي تحجين .
رسيل: وبعد منو عندي من العمام الحلوين عندي ؟
نور: عمج جواد عنده حازم وكرار وسام وسيف والبنات نوران ورغد وغيداء .
وعندج عماتي اعددهن خير من الله للصبح ما نخلص منهن ومن خلفتهن
رسيل: لا عفية دخيلج السمعته كافي علية صدميني بيوم ثاني..
نور: خية انتِ صدك مخطوبة لو جذب ؟
رسيل: لا صحيح
نور: يحبج عاد!!
جريت حسرة قوية
رسيل : اي يحبني
دنكت وكمت ابجي
رسيل : تدرين يومية يصعد باليل يفتح باب غرفتي يشوفني نايمة لو كاعدة ابجي ؟ يكعد يواسيني ويصبر بية ويهون علية مصيبتي، هسه منو يصبرني ؟ نور منو ضل الي ؟ اني جنت اواسي نفسي واقنعها راح اشوف اخواني واسافر الهم شلون هسه فلست من كلشي لا اخوان ولا اب وام ولا حتى خطيبي هم اخذوا مني ، وتريديني ما اكرهم ؟
اجتي يمي حضنتني .
نور: حبيبتي ادعي الله كون يكدر ايهم يقنعهم لان حيل ضايج من تصرفاتهم
رسيل: نورة
نور: بلي
رسيل: وين غرفتي؟
نور: هنا بالطابق الفوك اكو غرفتين فارغات وحدة بصف غرفة شوق وما انصحج تاخذيها تبقى اللي بصف شقة مروان هم فارغة
فركت وجهي
رسيل : استغفر الله ربي يعني هم مروان وين اروح وين انطي وجهي واخلص منه .
نور: هدي رسوله مالها داعي هاي الاعصاب وين ما يعجبج افرشي ونامي عسما بشقتي اطلع منها وانتِ نامي بيها.
رسيل: لو انتِ ماموجودة جان شصار بحالي ؟
نور: هسه ليش البجي ؟ انه راح ابجي وياج.
رسيل: المريت بيه صعب ، ماكو انسان عادي يتحمله ، بابا راح من ايدي وجان كلشي بالنسبة الية كل حياتي هو، شلون اصبر بلياه شلون ؟
كمت الطم على وجهي واصيح..
اندكت الباب قوي ، راحت نور فتحتها واجتي
نور: حبيبة جدة سمعت صوت نحيبج ودزت عليج كومي ننزللها ، انطيني ايدج اساعدج.
رسيل: ما انزل ما اريد اشوف احد.
نور: مرأة كبيرة ودزت عليج شلون تردينها وبعدين مو لخاطرها لخاطر عمي صادق، لو موجود ويشوفج هيج تسوين وي اهله ينقهر ويشيل بگلبه عليج.
تذكرت من تجاوزت على مروان ، شلون زعل علية وبقى فترة طويلة مايحجي وياية التفتت لنور مسلمة امري لرب العباد..
رسيل: ماشي امشي ننزل
نور: اروح فدوة للسباعية التسمع الجلمة
كمت مشيت وصلت للباب اريد اطلع كالت ..
نور: هوب هوب وين تعالي ؟
رسيل: شنو !!
نور : غسلي وجهج بالاول
رحت غسلت وجهي ورجعت شفت بيديها شال اخذته منها بدون ما تحجي ، لفيته على راسي شلون ماجان ونزلت جنت لابسة دشداشة مال نور ، هي شويه اترس مني واطول بس زينة ماشي حالها ، احنا وننزل على الدرج التفتت عليها
رسيل: نور فدوة عندج ثوب اسود لو تراكسود اي شي البسه اني بابا توه ميت وهاي الدشداشه الوان.
نور: عندي فد هاي لون نيلي وجبتها الج ماعندي اسود باجر اوصي الولد يجيبون الج
رسيل: لا لا تكلفين احد
باوعت على الدشداشة صح نيلي بس بيها ورد ابيض وسمائي ، استغفر الله ، شلون راح تكضي ما ادري .
نزلت واشوف الكل كاعد ، عمي علي مروان ياسر جدو وبيبي ومرت عمو علي وشوق اللي نظراتها كلها سم بسم من جيت لحد الآن
طبيت ورا نور سلمت ..
رسيل: السلام عليكم
ردو السلام
الجد: هله ببنيتي هله بريحة صادق تعالي كربي اشمج
مشيت باتجاهه ، اشرلي اكعد يمه ، كعدت وخلى ايده على جتفي وحضني
الجد: عساج مرتاحة يمنا ؟
ما حجيت ضليت ساكتة
الجد: كون احد غثج ؟ اشريلي عليه امردة مرد .
اشرت براسي بمعنى لا، وبجيت كمت اكره ضعفي اكره دموعي ليش هالكد ابجي ما اريد احد يشوفني مكسورة لو مهزوزة
الجد: ابجي وفرغي البداخلج ترتاحين .
مخنوكة ما اكدر اجاوب .
الجدة: نور يامكموعة وينج ؟
نور: نعم جدة امريني
الجدة: اخذي البت تغسل وجهها ، وبدربج خلها تعاين بالمشوفة ،تشوف وجها شجاريله.
نور: ماشي بيبي تعالي رسوله كومي وياي
كمت ومشيت وياها وصلت للمغسلة غسلت وجهي والتفتت على نور
رسيل: شنو بيبي تكول علية مشايفة ؟
نور: هههههههه لاخية مو ما شايفة قصدها شوفي وجهج بالمرايا
رسيل: والمرايا تصيحلها مشايفة
نور: مشوفة مشوفة يمعودة
ضحكت ما تحملت جان اسمع صوت مروان
مروان: خوش تمثيل والله جبتي الدور توب ، الا شوية ردت ابجي على حالج
نور: ياخوي مو بقصد تضحك انه صوجي ، كلتلها على سالفة وضحكتها هواي بجت اليوم ما تشوف حالها ؟
رسيل: نور دليني على غرفتي حتى انام
نور: فد ما مجهزة
رسيل: عادي افرش فراش وانام.
نور: امشينا يلا
صعدنا فوك ، ودخلنا لغرفة حجمها وسط لا كبيرة ولا صغيرة بيها بس مروحة..
نور: مو حارة عليج ؟جو البصرة مايفيد وياه مروحة..
رسيل: لا عادي
نور: براحتج
راحت جابت فراش ، اخذته منها فرشته ومددت.
نور: نامي ارتاحي واذا ردتي شي دكي باب غرفتي.
رسيل: عاشت ايدج ، نور
نور: بلي
رسيل: وين بنتج ما شفتها ؟
نور: جوا جانت تلعب من تكعدين اجيبها الج..
رسيل: ماشي
راحت وسدت الباب ، صفنت على الغرفة ،فارغة وهدوء بس صوت المروحة تفتر وهواها حار طبعاً جو البصرة مميت الله يساعد اهلها شنو من حر ودبك ، اسبح منا ورا شوية احتر عبالك ساونة ، ضليت افكر بطريقة اوصل بيها لبيت خالو حتى اطمأن على حسام عقلي راح ينفجر من التفكير بوضعه هالكد ما فكرت غفيت ، والنومة نومة للصبح كعدت على لمسات ايد صغيرة على وجهي فتحت عيوني واشوف طفلة تضحك وضحكتها تجنن .
_ هلو لسيل
رسيل: هلو يا روح رسيل انتِ شسمج ؟
_ اية
رسيل : الله احلى اسم
اية : فد اسمج احلى يصير اسوي اسمي لسيل.
رسيل: عادي يصير ماطول عاجبج اني اصيحلج رسيل تمام .
هزت راسها بالقبول وضحكت بوستها من خدودها تجنن تنكال
باوعت بالغرفة رجعت لمأساتي ،جريت حسرة قوية والتفتت على اية
رسيل: ايوو
اية : لسيل اسمي لسيل.
رسيل: يلا لسيل
اية : ها
حجتها بضحكة
رسيل: اريد اروح للحمام
ايه: امشي وياية
طلعت واشرتلي على حمام كبال الغرفة دخلت غسلت وجهي ، اباوع على المشوفة على كولة بيبي وجهي خريطة صاير احمر وخراميش بيه ، بس همزين عيوني شافعتلي شوية بيهن شوفة كملت وطلعت ، صار ايهم بوجهي ابتسم
ايهم: صباح الخير
رسيل: صباح النور
تيهم: شلونج اليوم ؟
رسيل: الحمد لله احسن
ايهم: محتاجة اجيبلج شي وياية ؟ راح اطلع للشغل وارجع العصر
رسيل: لا مامحتاجة شكراً
أيهم: على العموم اذا ردتي شي بلغيني وانه اجيبة الج
رسيل: ما تقصر شكراً
مديت ايدي على شعري اريد الفه بالكيتر واتذكرت اني بلا حجاب ، كلت يلا علما اتعود عليه
نزل ايهم واني مشيت اريد ارجع لغرفتي جان اشوف مروان واكف مكتف ايده، وخازرني
رسيل: صباح الخير
مروان: شنو هذا شعرج فاتحتة على طوله تكول مال كيوليات ، عود شوفوني عندي شعر، ما استحيتي من اخوي يباوع لطولج وتفاصيل وجهج والركبة طالعة وحركات المياعة مالتج وتهزين بشعرج جدامة
رسيل : يعني كلت راح اصير مؤدبة وياك لخاطر بابا حتى ما يزعل علية واحاول اتكيف وية الوضع بينما عقلك يرجع لراسك وترجعني لبغداد ، بس انت ماكاعد تنطيني مجال اتأقلم وياكم ولا اغير من نفسي ولو شوية ، شوكت ارجع واخلص وانتم تخلصون مني ؟
مروان: لا تاكليني بلسانج ، تصيرين مؤدبة غصب عنج وتتكيفين ويانا غصب عنج لانج باقية هنا ماكو ردة لبغداد .
رسيل: مو بكيفك مروان مو بكيفك فهمت لو لا ؟
مشه سريع ، اجى يمي ، وصار كلش قريب علية بحيث اتنفس انفاسه..
يباوع لوجهي ويحجي بنبرة صوت هادئة ، رفعت عيوني باوعتله عيونه ذبلانة ولا عبالك ذاك الجان خازرني قبل شوية
مروان: بكيف منو ؟ هابكيف منو ؟
ارتبكت ونفسي صار سريع اريده يوخر ماكو خال ايده على الحايط منا ومنا واني بالوسط
رسيل: وخر مروان اريد افوت
مروان: فوتي لازمج انه ؟
رسيل: عيب هالتصرفات وخر
مروان: اذا تعرفين العيب عليش تفترين بنص الزلم وهازة طولج .
رسيل : مروان وخر كلتلك
ميل راسه وعيونه اكلتني اكل
مروان : اذا ما وخرت شتسوين؟
رسيل : عيب عليك وخر كلت
دفعته حيل وشفت ايهم واكف يباوع باتجاهنا
عفتهم ودخلت لغرفتي ، اروح وارجع لحد ما دخت وكعدت بالكاع لزمت راسي عصرته حيل اريد افكر بطريقة اوصل بيها لبيت خالو واخلص منهم .
اجتني فكرة بس يارب تنجح انتظرت نصف ساعة ضبط وطلعت من الغرفة باوعت يمين يسار ماكو احد مشيت وصلت للدرج مديت راسي اريد اشوف اكو احد بالهول كلشي ميبين بسبب لوفة الدرج ، يعني لازم انزل نزلت الدرج على كيفي واتلفت عبالك حرامي اوف شراح تسوين بعد يا رسيل ؟
خلص الدرج واخيراً نفسي انكطع شلون يصعدون وينزلون يومية الله يساعد نور صاعده نازلة علية تشوفني شنو احتاج وتنزل تكمل التزاماتها بالبيت ، فتت للهول شفت بيبي كاعدة وعوجيتها بيديها...
رسيل: هلو بيبي
الجدة: شني هلو ، هذا سلام ..
رسيل: شنو اكول؟
الجدة: كولي السلام عليكم مصباح الخير ، ولو صار الظهر يا مصباح هذا؟
رسيل: بيبي كاعدة من الصبح بس جنت تعبانة وبقيت فوك.
الجدة: ساعدي البنيات التهي وياهن بلجي تنسين .
جريت حسرة
رسيل : ماشي
حجيتها و رحت للمطبخ شفت نور واكفة على الطباخ تطبخ كل جدر شكبرة.
رسيل : هلو نورة.
نور: هله بحبيبتي شلونج اليوم عساج بخير وعافية ؟
رسيل: احسن شوية اليوم ايوته كعدتني.
نور: انه دزيتها عليج حتى تصبحين عليها.
رسيل: تخبل احلاً صباح عاشت ايديج
نور: اكعدي على الميز لبينما اخدرلج جاي جديد ، اسويلج بيض لو جبن؟
رسيل: لا عفية ما اريد
نور: شني هي الاكل شعليه وتكاطعتي وياه.
رسيل: ما اشتهي الاكل مر بحلكي حتى المي علكم.
نور: ازمة وتعدي ، فد يرادلج قوة ليش انتِ هشة؟ الحياة ينراد الها الكوي، ترى الضعيف ينوكل..
رسيل: ومنين اجيب القوة ؟ وبابا اخذها وياه
نور: امر ربج ، تعترضين على امر الله ؟
رسيل: حشى لله بس هذا فعل البشر لو مو دنائتهم جان بابا لحد الآن عايش ..
نور: لكل اجل كتاب، ولكل موت سبب ، ربج كاتبله بهذا اليوم يموت وبهاي الساعة وبهيج طريقة..
رسيل: تعرفين من شفت التهديد على سيارته ، شافني خفت وكمت ابجي ، كالي اذا الله كاتبلي اعيش سنة ما ازيد يوم عليها واذا ١٠٠ سنة ما انقص يوم، بس هو حتى السنة ما كملها ويانا
جان اسمع صوت واحد جر حسرة طويلة ، التفتت واشوف بيبي ، من شافتني التفتت كامت تبجي ، فتحت ايدها اشرتلي تعاي احضنج ، كمت رحت حضنتها ، كلش محتاجة احد يوكف وياية بهاي الفترة الصعبة اثنينا نبجي ونور هم
الجدة: الله يرحمه راح وما شبعت منه شوف ، اخذ نظري وراح ، هاج ماشوفن عيوني غشاوة بيها، سنين حارمني شوفته ومن جاني تلوع گلبي بالزايد ماشبعت منه راح بساع بساع، الله ينتقم من جتاله عساه بحركة گلب مثل حركتي وازيد .
رسيل: امين يارب امين
الجدة: نورة
نور: بلي جدة امريني.
الجدة: ما يأمر على گلبج ظالم انه داخلة افرد جسمي ( امدد) اذا نمت صحيني وي آذان الظهر .
نور: صار جدة صار .
التفتت علية وكالت
الجدة : وانتِ لاتضلين تبجين لهي روحج وي البنيات .
هزيت راسي بمعنى اي، نور جابت الريوك خلته على الميز .
نور: اكلي حركي حلكج شكد فاهية
رسيل: ههه ليش فاهية؟
نور: هاي كلجن بنات بغداد هيج مايعات .
رسيل: ليش شبينا مايعات حالنا حالكم.
نور: كم يوم واجربج اشوفنجن مثلنا لو لا؟
رسيل: بشنو تجربيني غير اعرف؟
نور: اكعدج وي آذان الفجر اول ما يصيح الله اكبر، نعجن ونخبز خبز حار ، ونبلش بالريوك نريك الجد والجدة ، بوراها نريك عمي وعمة بعدين الولد وكلمن يروح لباب رزقه.
رسيل: صدك شو ماكو احد البيت فارغ وينهم ؟
نور: عمة راحت وي عمي لبيت اختها جنتها جابت والولد كلمن لشغله وشوق نايمة ما تكعد اذا ما يأذن الظهر.
رسيل: وهاي يومية وحدج تشتغلين؟
نور: انه قايمة بكلشي خبز طبخ تنظيف فد انه اكلج المسواك عمي والولد يجيبونه .
رسيل: خطية ليش ما يساعدوج؟
نور: خلج منهم لا تركزين حيل تتعبين
رسيل: مروان مو عنده دوام شلون كاعد هسه و وين يشتغل؟
نور: مروان دوامه عشرة بعشر .
رسيل: شنو يعني ؟
نور: يداوم عشرة ايام و ينزل عشرة مجاز
رسيل: هااا فهمت وهسه هو مجاز ؟
نور: اي حبيبة ، ومن مجاز ينزل للمعمل وي عمي.
رسيل: شنو شغلهم ؟
نور: عمي عندة معامل اثنين مال نجارة اثاث عراقي تخم على غرف نوم وغيرها،
وعندهم محلات كبيرة بيها اثاث مستورد من الخارج، هاي شغل ايهم كل شهر يسافر اسبوع يروح يجيب اثاث و يرد نوبات يتأخر اسبوعين حسب شغله، والمعامل عمي وياسر لازمينهن،
ومروان بايام الاجازة ينزل يلتهي وياهم وهم عينه على العمال .
رسيل: معناها هسه ماكو احد بلبيت مو؟
نور: تقريباً فارغ.
رسيل: اطلب منج طلب فدوة وتساعديني ؟
نور: اذا اكدر عليه من عيوني
رسيل: عندكم تليفون ارضي؟
نور: بلي موجود بالصالة الكبيرة
رسيل: اريد اخابر بيت خالو فدوة لعيونج ، گلبي نار على حسام والله كاعد اموت.
نور: شلون اذا جا واحد والله يعلكوني.
رسيل: ما اكول انتِ سمحتيلي ، ولا اجيبلج طاري ، اكوللهم اني خابرت.
نور: يأذونج رسيل .
رسيل: ما عليج لا تخافين بس راقبيلي الوضع واذا اجى احد نبهيني بسرعة اقفل الخط
نور: لحظة اشوف واجيج
رسيل: منتظرتج
راحت ورا شوية اجتي خايفة ترجف عبالك مسوية جريمة مو هيج
نور: باعي عفية لا تحجين شي غير تحمدي على سلامته وبس .
رسيل: ليش ؟
نور: اكو جهاز بغرفة مروان ونفس الخط واذا واحد رفع السماعه يسمعونج.
رسيل: تمام ، وينه التلفون .
نور: تعالي وراي
رحت وراها واتلفت خاف احد يشوفنا ، مو خوف منهم ، بس متأكدة يمنعوني اتصل .
نور: هاج الج ربع ساعة اراقبلج الوضع لا تتأخرين فدوة .
رسيل: اي والله ، نطتني السماعة لو عبالك ملكتني الحياة كلها .
دكيت الرقم مال بيت خالو ودكات گلبي تدك وية كل رقم اسجله ، فرحانة ، ياصوت راح اسمعه اول ؟ عبالك صارلي سنين عايفتهم ، دك اي والله دك ، شهكت ، وخليت ايدي على حلكي باوعت على اتجاه الباب خاف اخد سمعني .
خلصت اول رنة انصابيت بخيبة امل محد جاوبني
رديت دكيت مرة ثانية ، هالمرة ادك الرقم بقلق وخوف لا ما احصلهم، يأست ردت اسده واجاني صوته التعبان
حسام: الو
گلبي كام يدك سريع
حسام: الوو منو وياي ؟
ياعيوني يحجي بتعب .
رسيل: الوو شلونك حسام ؟
حسام: رسيل ؟
رسيل : اي رسيل
حسام: هله بحبيبتي هسه يلا ردلي النفس ، اخذتيه وياج ورحتي
رسيل: شلون صرت بالي يمك ؟
حسام: مو زين ميت بلياج .
رسيل: اسم الله عليك بس كولي ضربتك قوية ؟ رجليك تأذيك ؟
حسام: عوفج مني ضربتي مو اقوى من ضربة گلبي.
رسيل: ماعندي وقت طمني عليك فدوة .
حسام: اذوج ؟
رسيل: منو ؟
حسام : بيت جدج
رسيل: لا لا يضل بالك مابية شي
نتسابق بلهفة واحد يسأل عن الثاني.
حسام: اريد منج شغلة تكدرين تدبريها؟
رسيل: شنو كول ؟
حسام: اريدج تعرفيلي العنوان وين بالضبط
رسيل: ياعنوان ؟
حسام: بيت جدج يعني ياعنوان ، اسم المنطقة والمحلة والزقاق.
رسيل: شتسوي بيهن ؟
حسام: اجي اخذج غير
رسيل: حسام يكتلوك من كل عقلك تجي لهنا ويخلوني ارجع وياك شفت شسووا من اجوي لبغداد.
حسام: شبيج قابل اجي وحدي راح اجيب دورية شرطة وياية ، واريدج تكوليلهم خطفوني وكاعد يأذوني زين
رسيل: شلون كرايبي وشلون خطفوني ، منو يصدك بية؟
حسام: ما عليج يصدكون واني اشتكيت على مروان هنا بالمركز هسه مطلوب ببغداد وما يكدر يجي بعد.
رسيل: بس الضربك حازم.
حسام: ما هيمني منو ضربني اللي يهمني هذا الكلب ما يوصلج لبغداد.
رسيل: حسام خاف يصير شي عفية؟ تدري هنا العشاير دولة بوحدهم ، محد يحكمهم هم حاكمين نفسهم بنفسهم.
حسام: لا تخافين مايسوون شي اجيب مفرزة واجي ، تدرين شنو كاعد اسوي.
رسيل: شنو ؟
حسام: الانسيابية مالتج ، كل شوية اباوع على اسمج واجر حسرة يمكن هالكد ما حسرتي قوية وصلت للسماء ورب العالمين سمعها وخلاج تخابريني .
رسيل: يومية اريد اتصل بس المشكلة ما كدرت بيتهم متروس ناس
حسام: ديري بالج عيوني انتِ وشديلي حيلج واقرب وقت انطيني العنوان حتى اجي.
رسيل: اسأل خالو اكيد يندله.
حسام: عبالج تفوتني سألته وردته بس يحجي ماكو، يكولي ما اندل وين ، بس اني ما مصدك بيه لان مستحيل ما فاتحين موضوع هو وعمي وسائله وين بيت اهله.
رسيل: حقه يخاف عليك ما تعرفهم شلون ما يرحمون احد.
حسام: عوفج منهم تحبيني ؟
رسيل: اي وحسام الله عليك دير بالك عل....... بعدني ما مكملة الجملة انجريت من شعري حسيت راسي انشلع التفتت واشوف