رواية وادي الزعيم الفصل الخامس والعشرون 25 والاخير بقلم عبير ادريس
دخلنا الوادي مجبورين
مكسورين مسلوبين
لا أب الفزع لا زوج ارتدع
خسرنا نفوسنا والضنا والشرف
واجهنا بشر ارذال
گادونه بحقد واغلال
وهذاك الزاهد المحتال
بريء ومذنب وكتال
قبيح وجارح وقاسي
حنون وطيب وكاسي
عجيب الحال!
داوينا جرح المنذبح؟
ورشينا عليه شوية ملح!
ننساها الايام المضت
معقولة ؟
ونحسبها شِدة ونگضت!
اي سكتت طبول الحرب!
وخلصت الذخيرة
وهاي احنا لگينه ارواحنا
بالمحطات الأخيرة
بقلم مريم صلاح
🎲🎲🎲🎲🎲🎲🎲
خيلاء : البس وين نروح وانت تعبان؟
اينار : اذا تعبان لا تعبيني اكثر وامشي وياية
تيام : وين رايح تخبلت هم متصوب وما تكدر تسوق وهم مطلوب للدولة!
اينار : ليش قابل اول مرة نتصوب ونطلع بمهمات شنو نسيت؟ يا يوم نمنا بفراش شو من السدية للسيارات
تيام : اي صدك هو انت شكول دلال بس مع ذلك نجي وياكم
اينار : شو صارت جمع انت ومنو؟
تيام : اني وسديل قابل اعوفها هنا؟
اينار : لا يابو جيبها واذا عندك احد ناسيه هم خابره يجي ويانا
تيام : عاجبني انام الصراحة ونعسان حيل اذا بيك حيل تولي وحدك راويني عرض جتافك
اينار: اي بية بس جفيني شر لسانك وهذا هو
تيام : ماشي روح وحاط الله وياك اذا تروح هم ترجع
يغني ويطك اصبع، كمل همام
همام : اكو رب ياخذ الحوبة كلمن خان محبوبة
تيام : شنو انت وما اكدر انساك بعدك روحي تتوجع
اينار : محبتك حيل معيوبة
تيام : كلمن يعرف عيوبة
اينار : وربك اكدر بلياك اسمع يلي ما تسمع
شمالك ما وفيت الزاد ذبيت التعب بالشط
تيام : بسرعة انكرت معروفي من شالنك جتوفي
اينار : ارتب بيك بس ما فاد ما تتعدل مخربط
تيام : صار من اضم خوفي عرفتك بشر ما توفي
اينار : كلبي الذلة مو ثوبه اسمع يلي ما تسمع
تيام : من تخابرني متندم الحكني يا عمي الحك من جرحي انا تأذيت ومن الوادم نذليت
اينار : اكو رب ياخذ الحوبة كلمن غير اسلوبه
تيام : من جرحي انا تأذيت تحاصرت من الحكومة وياخذوك للسجن وهناك دور الحوبة
يغنون واحد يطك اصبع والثاني رغم جرحه يهز، صبا ضحكت وكالت
صبا : ها اشتاقيتوا لأجواء الملهى؟
تيام : هسه مال ننصب ميز ومزة والحور موجودات وصوتي حلو يوفي بالغرض
اينار : انجب يلا
تيام : ها؟ المؤمن الكو***
اينار : خيلاء فضيني اذا بقيت شوية اتعارك
خيلاء : منو صارله ساعة يهز!
حجيتها وهزيت ايدي
اينار : تجين لو لا؟
خيلاء : اسلوب التهديد ما امشي بيه تدري بية كلش زين
تيام : بقى زعيم صابون ركي
اينار : خليك بحياتك حبيبي عمو
ترك المكان وباوعلي بنظرة يعني يلا، رحت وراه للغرفة لبست بس جنت ضايجة كلش كلمة وحدة ما حجيت وياه، طلعنا صعد بالسيارة سحبت نفس وصعدت قبل لا يحرك باوعتله وحجيت
خيلاء : ما صار هواي على جرحك حتى صبا كالت السياقة مو زينة عليك وممكن تفتح جرحك
اينار : اعرف
خيلاء : جنا مرتاحين لولا الحية اتصلت
اينار : وهاي الحية شدراني من راح اجاوب تطلع هي!
مو كدامج جان رقم غريب
خيلاء : المفروض منك اول ما تسمع صوتها تغلقه بوجهها
اينار : الفهمته من كلامج ست خيلاء غيرانة
خيلاء : وعلى شنو يمة اغار؟
اينار : ليش احتركتي من اتصلت؟
خيلاء : ومنو كالك احتركت بالمناسبة خيالك حيل واسع
اينار : وحبل الكذب قصير
خيلاء : شنو تقصد؟
اينار : ولا شي سلامتج
مشينا بالسيارة ساكتين شغل اغاني واخذ الطريق السريع، جنا ناخذ فترات نصف بيها السيارة حتى يرتاح وينزل يغسل واذا اكو حمامات نستخدمها وبعدها يكمل الى ان وصلنا للبيت القديم صفينا كبال الباب مالته
خيلاء : مستحيل جبتنا هنا تريد يلزمونا!!
اينار : لا تخافين ناخذ كم شغلة ونطلع
خيلاء : همام انت صاحي؟
اينار : طبعاً
خيلاء : شلون جبتنا هنا اكيد سمعان بلغ ثروان عن بيتك ونطاه العنوان
اينار : صدكيني راح يدوروني بكل مكان إلا هذا البيت
خيلاء : وليش يعني ما فهمت!
اينار : انزلي واحجيلج
فتح الباب ونزل، فتحت الباب ونزلت وراه اتلفت وايدي على كلبي دخلنا وسد الباب بس ما أمنت بعدها الخوفة بكلبي، فتح الباب الداخلي دخل وبقيت اباوع برا الى ان صاحني، فتت وعيوني تتفحص البيت كل شوية اكول راح يطلعلنا واحد يعتقلنا
اينار : اهدأي ما راح يجون لهنا لان يعرفون بية مهزوم ولازم اكون بعيد عن الانظار لهذا ما يخطر ببالهم اجازف بنفسي واجي لهنا
خيلاء: واحد بيهم ذكاءه خارق وشك بينا ممكن نجي لهنا
اينار : خيلاء لخاطر الله خليني آخذ الاوراق الاريدها ونطلع كافي سكتي شوية
تركني ودخل للغرفة كعدت انتظره خارجها، سمعت صوت فتح سحاب جنطة سفر لهناك وصاحني رحت وكفت بالباب لكيته فاتح الكنتور والجنطة فاتحها على السرير باوعلي وكال
اينار : تعاي ساعديني
خيلاء : شنو راح تاخذ؟
اينار : تعالي ما اكدر ارفع ايدي هواي اتعب، اكو جنطة فوك بالكنتور جيبيها واكو اوراق وصندوق صغير هم خليه بالجنطة حتى نطلع
خيلاء : ماشي
رحت نفذت اللي طلبه مني وانتبهت عليه اخذ كم قطعة من ملابس ابنه وشوية تحفيات، اتوقع معتز بيهن رغم قديمات كلش بس عرفت تربطه بيهن احداث لهذا محتفظ بيهن، خلص ساعدته بغلق الجنطة ردت اسحبها رفض غلق الانارة وسحبها وطلعنا، قفل البيت وايدي على كلبي لحدما صعدنا السيارة ومشينا
خيلاء : هسه يلا تنفست
اينار : لا تتوقعين همامج يجازف بيج
خيلاء : همام منو؟
اينار : همامج مو لو لا؟
خيلاء : لا
اينار : بعدها الغيرة صاعدة براسج من سكرة؟
خيلاء : لا بلة وهاي شنو واغار منها!
اينار : اعترفي يا حب اعترفي
خيلاء : هلوو همامج وحب وهذاك اليوم كلت اربع مرات حياتي وبعد شنو استاذ همامو!
اينار : ها هسه مو زين يعني؟
خيلاء : لا طبعاً لا تنسى زواجنا مبني على مصالح، تنتهي وكلمن يروح بدربه
اينار : حجي يفيدج والله
خيلاء : نخليها لوقتها خلي نخلص من البلوة اللي احنا بيها بعدها نقرر شلون نعيش حياتنا وعلى مزاجنا
اينار : قصدج كلمن يعيش على الجنب اللي يريحه؟
خيلاء : بالضبط
اينار : لعلمج ماكو جنب غير صدري تنامين عليه تحلمين تصيرين لواحد ثاني غير همام
خيلاء : همام ابو النسوان شكد رقمي بلة؟ الثالثة؟ لو الرابعة؟ اكو وحدة غير سكرة وزوجتك الاولى ما اعرفها؟
ضرب بريك التفت علية وكال
اينار : راح نروح لمطعم نتغدا ونحجي كأي إثنين متحضرين ياريت الصوت ما يعلى ولا ننفضح
خيلاء : اذا اني همجية شكو ماخذني؟
اينار : لا حب حشاج مو هيج القصد
خيلاء : حب شنو همام اصحى
اينار : اني سكرت من اول يوم بكت منج بوسة تتذكرين؟
خيلاء : سخيف انت اصلاً وعيب عليك السويته بية وعود ماخذ دور الزعيم من صدك تهين هاي وتخوف ذيج وتبوس اللي تعجبك وتتزوج اللي تفوت راسك
اينار : وداعتها ﻷمي ظلمتيني
خيلاء : يلا برر بالنهاية تطلع انت السوبر مان واني الشريرة اللي رفضت تبني حياتها وية واحد مجرم وراح انكره اعرف
اينار : عوفج من هذا الحجي واسأليني اللي تريدين تعرفيه لو اكولج ما راح تصدكيني اعرف، امشي وياية حتى تسمعين عني بلكت تصدكين
حرك السيارة ومشينا ما اعرف وين ممكن نروح وبمنو نلتقي ويحجيلنا اسرار همام توقعت امه بعدين من شفت تغير الاتجاه استبعدت هذا الاحتمال، صف السيارة مقابيل عمارة نزلنا منها وصعدنا الدرج اتصل على شخص بنت او ولد ماعرفت بس بلغهم هو مقابيل الشقة ثواني وانفتح الباب طلعت طفلة صغيرة شافته ضحكت من كلبها دنك يبوسها تعلقت برقبته قبلها براسها وطبع قبلات على وجهها حجت فرحانة
_بابا حبيبي اجيت ماما كالت
عكدت حاجبي، رفع عيونه باوعلي ضحك
خيلاء : بابا؟؟ هلوو جايبني تعرفني على الرابعة؟
اينار : المقتول لو يصبر على القاتل جان ما قتله
طلعت بنية نهاية الثلاثين وقورة بلبسها وحتى تصرفها شافتنا رحبت بينا وسلامها جان حار وية همام دخلنا وكعدنا اني وياه بالهول تدنيت عليه وهمست
خيلاء : سلامها بارد وياية
اينار : طبيعي لان اول مرة تشوفج
خيلاء : وشلون راح تعرفها علية بصفتي زوجتك؟ عشيقتك؟ لو وحدة عطفت عليها وساعدتها؟
انصت لكلامها وتجاهلها ما رد، رفع راسه وحجى موجه الكلام للبنية
اينار : وين استبرق ويقين؟
زينة : بالشغل
اينار : هاا شوكت يرجعون؟
زينة : بعد شوية ما اتوقع يتأخرون
اينار : ماشي، زينة اعرفج على خيلاء ام تينا، زوجتي
ابتسمت وكامت تقربت مني حتى تبوسني كمت وكفت وجان يكول
اينار : خيلاء هاي زينة وافضل هي تعرفج على نفسها
زينة : اهلاً وسهلاً حبيبتي، شكد حلوة ماشاء الله
جاوبتها بإبتسامة مجاملة
خيلاء: شكراً انتِ احلى
زينة : مبروك زعيم شوكت تزوجت؟
اينار : من فترة
زينة : زواج الدهر يارب
اينار : الله يسلمج، اعرف اجيت بدون موعد
قاطعته
زينة : البيت بيتك وانت صاحب المال وروحنا تفداك
رفع ايده مقاطع كلامها
اينار : اني ما جاي لهنا لوما واكع بأزمة ومحتاجكم فعلياً انتِ والبنات
زينة : عيوننا نشلعها الك وما نوفي دين من ديونك يا ابونا انت
اينار : الله يسلمج عزيزة وغالية ام طيبة بس تعرفين الحكومة عرفت بشغلات الممنوعات اللي يشتغلون بيها الجماعة وطلعوا منها مثل الشعرة من العجين وحتى لو سمعان شريك بالوادي طفر منو يلكاه بعد، الشريك الثاني خيلاء اللي هي زوجتي قبل لا تداهمنا الشرطة اني سجلت حصتي بالوادي بأسمها لهذا هي مطلوبة واني متهم بجريمة خطف وبعد ما اعرف شنو يطلع علية المهم اريدكم تجون وياية تشهدون بالمحكمة بالحقيقة اللي شفتوها بعيونكم وتبرأوني
زينة : صار تريد هسه نروح انه حاضرة
حجتها وكامت
اينار : اكعدي يا عيني مو هسة، اسمعيني
زينة : اي دادة وياك
اينار : اريد تحجين قصتج لزوجتي لغرض معين يقوي موقفنا كدام الدولة بعدين افهمكم عليه
زينة : هذا هو تتدلل
اينار : اني طالع اشرب جكارة بينما يجون البنات وراح افهمهم بالموضوع حتى اول ما يدخلون يحجون لخيلاء ونتفق سوى على الراح يصير
زينة : تمام تتدلل
طلع اخذ الطفلة وياه وسد الباب عيوني وصلتهم لحدما اختفوا من كدامي، همست بدون وعي مني
خيلاء : طفلته!
زينة : استغفر الله لا تكولين هيج هاي ابوها شهيد
التفتت عليها لكيتها عاكدة حاجبها وعيونها مدمعة
خيلاء : عفواً فهمتيني خطأ اقصد همام يعامل الاطفال كأنما اطفاله
ابتسمت وكالت
زينة : اي صحيح هو حيل حنين وية الاطفال وحتى ويانا
خيلاء : الظاهر عندج قصة مثلي
تنهدت وضربت كف بكف وكالت
زينة : ايييه اييه احنا مجموعة قصص كل قصة تحجي واقع مرير عشناه بتفاصيله الى أن الله سبحانه وتعالى الرؤوف الرحيم فرجها علينا
خيلاء : والنعم بالله العظيم
زينة : قصتي قصة تشبه هواي من قصص بنات ازواجهم استشهدوا وصاروا طُعم سهل للما يخافون الله
خيلاء : قصدج اللي بالوادي؟
زينة : وحتى خارج الوادي لا عبالج ارحم منهم، تصدكين لو كلتلج الوادي ارحم بهووواي من الدوائر اللي راجعنا بيها علمود الراتب التقاعدي ذلونا ذل عيشونا مرار مو بس انه حتى البنات المطلقات نفس المعاناة
خيلاء : احجيلي شنو صار وياج؟
زينة : راح احجيلج عن لسان هواي بنات مثلي، من فقدنا ازواجنا واجهنا مجتمع قاسي وضعف قانوني وابتزاز منظم لاحق ارامل العراق بالأخص زوجات الشهيد
خيلاء : للأسف بلدنا خاض حروب وعصفت بيه ازمات متلاحقة خلفت ملايين من الضحايا تركوا زوجاتهم واطفالهم بدون معيل، اذا القصة تتعبين من وراها اتركيها لا تحجين اتفقي وية همام على اللي يريده وخلص
زينة : مادام طلب مني احجيلج لازم انفذ، اول مرة استاذ اينار يطلب مني شي وتريدين ما اسويه! لا والف لا
خيلاء : كملي آسفة قاطعتج
زينة : كالوا اكو مؤسسات رسمية معينة تخص وضع الارامل ونروح نراجع اكيد راح يتوفرلنا شي، المهم رحنا ودخلنا عالم غريب بشع موجع ما لكيت مساعدة غير التهميش والاستغلال والاقصاء على مختلف الاصعدة، من عرفوا زوجي شهيد كالوا عنده راتب تقاعدي احنا هنا نهتم فقط بالارملة اللي زوجها كاسب كلت يا الله على الاقل زوجة اخوية تستفاد ابلغها تجي لهاي الدائرة واني اطلع راتب زوجي التقاعدي واعيش منه، رغم ازمتي بس فكري بجهال اخوية جنت انه اساعدهم زوجي راتبه قوي وحنين علية وجنت من اطلب ينطيني حتى لو ردت عيونه
حجتها وبجت كمت يمها حضنتها وكامت تشهك وتحجي
زينة : بعد الولي انذلينا انه وبنتي
خيلاء : ما عاش اللي يذلج اصبري اجيبلج مي اشربي
زينة : بالله ما تكومين ما بية شي بس تحمليني انه من احجي بيه ابجي لا ارادي
خيلاء : تمام كملي
زينة : رجعت بلغت زوجة اخوية خطية كيفت ورحنا اني وياها نمشي ونسأل بالحر ولابسات بواشي تحرك بوجوهنا حرك، كالوا شغلتها يم دائرة الرعاية الاجتماعية يقدمون راتب شهري رحنا كلنا يا الله فرجت بس من سمعنا المبلغ ظلينا صافنين تدرين شكد؟
خيلاء : شكد؟
زينة : كل ثلاث شهور ينطون ٢٢٥ الف دينار تخيلي ٢٢٥ وهي عندها اربعة اطفال شلون تسد بيها متطلبات الحياة وللعلم القانون يشمل فقط ثلاث اطفال اذا عندج عشرة ما عليهم انتِ تحيرين بيهم توكليهم تحركيهم ينامون جوعانين ما يهم المهم ينطوج تفاليس يذلوج بيها ومن يصير ابنج عمره ١٨ سنة يطلعوه من قاعدة البيانات بعد هو يحير بروحه، صفنت انه وحدي بميدان الحياة عندي طفلة واربعة اولاد لأخوية وين اروح بيهم شلون نعيش حتى اذا طلعت تقاعد زوجي شيكفي واحنا كاعدين ايجار وامنا ويانا وتحتاج علاج ضغط وسكر وهذا علاجها ضروري يتوفر، كولي مشينا براتب الرعاية انشلعت كلوبنا روح وتعال ودي وجيب وانتظر سرة وهم بيها واسطات لعبت نفسنا، صرفنا تكسيات ورشاوي اضعاف الراتب اللي نريد نحصله تالي لزمتني زوجة اخوية كالت تعالي دادة انتِ تداينين وتروحين تكسيات وهاي الشغلة ميؤوس منها عوفيها، باوعتلها حجيها صدك بس انه من النوع ما أيأس رجعت كملتها ونطيتهم رقمي شوكت ما تكمل يخابروني حتى نستلم راتب لزوجة اخوية، بقت شغلتي سألت شلون اروح اطلع الراتب وجهوني مجموعة من الناس الخيرة ورحت، ثقي بذات الله تعرضت للاستغلال والابتزاز، وشفت حالة كدام عيوني بنت عمرها نهاية العشرين تبجي تقربت منها سألتها شبيج بجت بحرقة وكالت هددوني بقطع راتبي اذا ما نطيتهم مجال ومنها اخذت اغراضي وطلعت كلت اموت جوع وما ابقى لحظة بهاي الدائرة
خيلاء : مستحيل عفية معقولة اكو هيج شي عندنا!
يقين : وليش ماكو كلشي اكو بهذا البلد العظيم من فساد ورشاوي وناس بعيدة كل البعد عن الحلال والحرام
رفعت عيوني عن زينة ومصيبتها باوعت بنية شابة تخبل تخجل الشمس من جمالها دخولها عنيف وحاد وحتى ما سلمت مبين اللي عاشته كاتم على انفاسها واجتي الفرصة اللي تريد تفرغ بيها
يقين : كلشي حجته ام طيبة صحيح واني مريت بشي مشابه ويمكن اتعس بعد، انفصلت عن رجال ( ذكر ) بالأصح عار وبعيد عن الانسانية تركني بالشارع اني وابني وركض خلف ملذات الحياة غير مُبالي بأم ابنه وابنه، راح للشرب والنسوان ويومية بحضن وحدة واني وابني مذلولين مادين الايادي يامن يساعدنا ويغنينا عن ذل السؤال، وبيوم صديقتي زارتني بالبيت طبعاً اني عايشة وية اخوية وزوجته امي وابوية ناطيج عمرهم بالحرب المهم زوجة اخوية جانت تحرض اخوية علية وعلى ابني تشوفه ينطينا تفاليس تكلب الدنيا، آخر مرة راد ينطيني بيها فلوس لزمت كفه وغلقته على المبلغ وكلتله هاي الفلوس سد بيها حلك زوجتك ما بية حيل اسمع لغوة اسبوع كامل، حجى وياية كلام خفيف مجاملة يعني ورفضت بالنهاية راح، جنت احجي لصديقتي كالت رفعي نفقة على طليقج وراح تطلعلج فلوس زينة تكفيج ولو نصف الشهر وطالبي بالحاضر والغايب ليش ساكتة عنه، داورتها بعقلي زين رحت بعت قطعة ذهب عندي ورحنا للمحامية دفعت الفلوس وسويتلها وكالة حتى تترافع
عني ٣ جلسات روح وتعال وانشلع كلبي يلا كسبت ١٢٥ الف، ضحكت وين اوديها وشنو اسوي بيها وراها رجعت للبيت وهم بعت باقي الذهب اللي عندي ورفعت قضايا تخص الحاضر والغايب مختصر الهوسة طلعلي ٣٠٠ الف فرحت تكولين عبالك ٣ ملايين مو ٣٠٠ كعدت بيني وبين نفسي قسمتها لاحتياجاتي اني وابني كلت تكفي بس مو هنا الكارثة، من رحت لمحكمة التنفيذ حتى يصرفولي الراتب، دخلت بعالم غير عالمي بعيد عني ما يشبهني
الدائرة مكتضة بالناس بنات بعمر الورد مواليد الفينات مطلقات صفنت عليهم شوكت لحكتوا تتزوجون حتى انفصلتوا! بالجهة الثانية بنية سبحان الخالقها ورجلها كبالها شكله عبالك من هذولة المشاهير واكفين واحد كبال الثاني يتناحرون بالكلام واحد يجرح الثاني وصل بيه الحال ضربها كف وامها رجعتله الضربة بعشرة، تخيلت شكلهم بالكوشة شلون حلوين واكيد واحد خجلان من الثاني ومتلهفين لبعضهم، ضربته الها تخيلت حاضنها بالصالة ويقطعون الكيكة، تركتهم ومشيت واسأل نفسي ليش هالكد الواقع بشع!
صوت صحاني من شرودي
_يمة اشتري مي بردي كلبج وراج وكفة طويلة
التفتت عليها امرأة كبيرة بالعمر وبيدها بطل مي ثلج جامد ومبتسمة، هزيت راسي بلا بمعنى ما اريد تركتها والدمعة بعيوني، رحت اسأل عفية هاي الاوراق كلها شنو اسوي بيها؟
اللي يستهزء بية واللي يصيح علية واللي يباوعلي بنظرة استحقار، كلت اسأل الموظفين رحت عليهم ما يتحاجون ممسوخين الله شايل القبول من وجوههم، عبارة عن زمر من العصابات واحد يشمرني على الثاني
اللي قتلني نظرتهم الدونية الية كأنما سلعة رخيصة بايرة تحت أمر اشارتهم بأي لحظة، اصوات عالية عركات متتالية بين الناس الطكت ارواحها وبين الموظفين الجبناء، رحت لوحدة جنت ابجي واحجي وياها كلت بنية مثلي اكيد تفهمني
يقين : بلا زحمة عليج دليني شنو أسوي
بدون ما تباوعلي تكتب بالسجل رفعت ايدها وكالت
_روحي وكلي محامي يجي يشتغل شغلج احنا ما فارغين
يقين : ماعندي فلوس اوكل محامي يادوب كدرت اكسب القضية الله يخليج ساعديني
رفعت راسها باوعتلي وصاحت بية كأنما كاعدة بعلوة مال سوك
_وشكو تطلكين اذا ماعندج فلوس!
لو موديل صار وحدة تغار من الثانية
يقين : اذا ما تعرفين ضروف البشر حرام عليج هيج تعاملينا وتحكمين بالباطل
_اني باطلة؟ اني هيج تحجين وياية؟؟
بقت تتوعدلي وتتجاوز الى أن تدخلوا الناس واكو محامي رجل كبير بالعمر تدخل بيني وبينها وفض النزاع بإجباري للاعتذار منها، اعتذرت وتركتها اسحل برجلي سحل كعدت على الدرج والغواش يروح ويجي بعيوني افكر شلون اعيش ابني وين انهزم بيه لا اني المتعينة ومستفادة من شهادتي وعايشة باحترامي ولا قطاع خاص يشغلني بدون غايات بعيدة عن الشرف
خليت راسي على الحايط وعيوني للواحد الاحد هو سندي مادام يعرف نيتي نظيفة وانظلمت وطليقي واهله جاروا علية يكفيني هذا الشي، كمت ورجعت للبيت خابرت محاميتي علمتني شنو اسوي ورجعت رحت بيوم ثاني هالمرة دخلت بنفسية محطمة بس بدون دموع تعلمت شوية على الوضع او نكدر نكول اخذت فكرة عنه كملت الاجراءات بين الذل والضغط النفسي اللي عشته فرحت طلعلي الراتب وكلت اي واخيراً راح استلم، حددونا بمواعيد نجي نستلم الراتب من اخذت موعد اروح ساعة تسعة مرات عشرة انصدم بالسرة مال نساء اعداد هائلة ومن يشوفوني واصلة متأخرة يضحكون علية سألتهم ليش هذا الضحك حتى شكيت اكو شي بملابسي ملفت لهذا ضحكوا
_تدرين احنا من اي ساعة هنا؟
يقين : بالسبعة؟
_يا سبعة احنا هنا من الاربعة الفجر لازمين سرة ولحد الآن ما فاتحين الشباك مال توزيع
هزيت راسي ورحت كعدت على الرصيف اشوف شلون طريقة التوزيع حتى من اجي مرة ثانية عندي علم مو اجي مغمضة وكعدت اتفرج من انفتح الشباك بعد بس ناقصهم ضرب يضربون البنات، معاملة سيئة صياح إهانات ونصهم رجعوهم كالوا تعالوا غير مرة لإن خلص وقت الدوام، كمت سألت شوكت اجي مرة ثانية على اساس اني من ضمن اللي لازمين سرة حددوني بموعد ثاني واجيت بوقتها ساعة ستة ونصف من وصلت كالوا لزموا سرة انتظروا لحد بداية الدوام ساعة ثمانية ونصف كلت ميخالف انتظر وانفتح الشباك ويطلع اليوم فردي واني زوجي وهم لازم ارجع طكت روحي كلت لازم احجي وية المدير دخلت اسأل عنه كلت اكيد عنده كلمة عليهم دخلت سلمت باوعلي من فوك ليجوة وما ردلي السلام
يقين : استاذ بلا زحمة عليك بس اريد احجي وياك كلمة
بدون ما يباوعلي ولا يحجي يختم ويوقع بالكتب اللي كباله وينطيهم للواكفين يمكن السرة اللي بغرفته يعادل السرة مال البنات يم شباك الصرف، كررت عليه السؤال ماجاوبني آخر شي صاح بية ورزلني
_شبيج ما تعرفين الاحترام ما تشوفيني مشغول؟
يقين : بس اني سلمت وعندي استفسار بسيط ما يحتاج هالكم من العصبية والصراخ بوجهي وبعدين اني بنية
_واذا قندرة شسويلج يعني
صفنت بوجهه واتلفت على الناس اللي يمي اكو محامين واكو موظفين واكو ناس عادية، بيهم اللي يضحك وبيهم اللي ماقبل عليه بس ما حجى لإن شغلتهم يمه، انسحبت وطلعت قبل لا اوصل للباب شفت المسؤول عن صرف المبالغ سلمت عليه جان ولد حباب ومؤدب عكسهم شرحتله الموقف علمني على هواي امور وتفاصيل طويلة ما ينتهي شرحها ختمها
_هاج رقمي واي شي تحتاجين اتصلي اني اسهلج امورج
كلت الله واخيراً يا يقين انفتحت بوجهج واجى ابن الحلال بدربج راح يسهل كل امورج
تالي من اتصلت بيه يكولي شنو المقابل؟؟ كلتله ماعندي فلوس كال منو كالج محتاج فلوس اذا تحبين اني انطيج كلتله تسلم بس سهلي راتبي استلمه وهذا هو، غلق الخط بوجهي اتصلت بيه مرة ثانية ما رد آخر شي رجعت للدائرة وانتظرت اني وهواي بنات ما استلمنا من نسأل يكولون شغلتكم يم فلان نفسه اللي ساومني
رحناله اني ومجموعة بنات كل شوية يتحجج بشغلة لو معاملتكم بيها نقص لو الفلوس خلصت لو خلص الوقت الى أن يأست وتركت الدائرة وحلفت ما اروح بعد.
صارت مشاكل هواي وية زوجة اخوية وانضربت من ابن امي وابوية انهانيت وابني يتعامل بعنصرية، اخذت روحي العزيزة وانهزمت من شي لشي، اشتغلت بكوفي وتعرفت على زينة جانت قبلي بفترة تشتغل وبيوم اجوي ناس كبار تصورناهم بالدولة، صاحب الكوفي اكد علينا نهتم بيهم واهتمينا
استبرق : وطبعاً اني وزينة ويقين جنا احلى الموجودات
درت وجهي ناحية الصوت واشوف بنية جديدة دخلت على الخط بدون سلام وبدأت تسرد قصتها
استبرق : اني جنت ظالمة مو مظلومة ويمكن ما استحق الرحمة الالهية اللي هسه اني بيها لإن اذيت ابوية رجال كبير بالعمر وامي اللي ماقصرت بيوم بحقي واخوية جان ساندني ويشتريلي كلشي احبه مدلليني على كدهم باللي يكدرون يوفروه ومرات اطلب اكثر وينطوني وما يقصرون بس اني جاحدة ناكرة جنت اباوع للأعلى مني كمت استعار منهم ومن سيرتهم ومن تعاملهم جنت اتعرف على حي الله ناس بمواقع التواصل واحجيلهم متذمرة من عيشتي وفقر ابوية واعتبرهم عار علية انتظر شوكت اخلص منهم وتالي طلعت اني العار اللي خلصوا مني
تعرفت على شاب جرجرني بالحب والكلام المعسول وشوفيني صورة وفتحيلي كاميرا الى أن وقعنا بالمحظور وهددني بصوري ينشرهن لو اجيبله فلوس، بوقتها اخذت ذهب امي وفلوس جامعها اخوية لزواجه من ٨ سنوات يجمع بيهن من عمالة ومن نادل بمطعم شعبي واشتغل حتى صباغ احذية وتالي اخذتهن لواحد ليل نهار نايم
لحد الآن ما انسى من كعدني اخوية ودلاني على فلوسه مسد شعري وكال
_خوية دم كلبي بهاي البوفية شنو تحتاجين اخذي بس لا يقشمرج أحد ويضحك عليج بحجة ينطيج فلوس، الدنيا ما تتأمن لا من بنية ولا من ولد وما اريد احرمج من الصديقات بس قللي منهن لا يخربن عقلج
بوقتها صيحت عليه انت تريد تتحكم بية وانت كذا وكذا نسيت كلامه الطيب من حجالي عن الفلوس، اخذت حالهم ومالهم ونطيته لهذا الولد جان منتظرني بمكان معين بسيارته وصعدت وياه طلب مني انزل رفضت لإن خفت اهلي يكشفوني بايكتهم ورحت وياه للمجهول اخذ فلوس اهلي وشرفي وشمرني للكلاب الظالة اللي تشبهني لحدما وصلت للوادي
زينة : كل بنية تجي للوادي تنعرض قصتها على الزعيم جان ياخذنا وحدة وحدة اللي منفصلة او ارملة وتحتاج شغل شريف يستغني عن خدماتها داخل الوادي بحجج شكل لو يكول مريضة لو غير مؤهلة لو شكلها ما عجبني، وياخذنا بالنسبة النا وفرلنا سكن دفع اول ثلاث شهور ودبرلنا شغل بمصنع خياطة أهلي، صرنا نشتغل وندفع ايجارات وشوية شوية أثثنا الشقة مثلما تشوفيها هسه وبين فترة والثانية الزعيم يمر علينا حتى يشوف شنو ناقصنا من اشياء يوفرها
بقيت صافنة ما عندي تعليق اكوله، دخل همام جان يسمع كل حجاية وكف كبالهم وكال
اينار : اللي سويته مو تفضلاً مني وانما واجب، الله فضل علية برزق ودز رزقكم وياية لهذا من تحجون لا تحجون بالجميل وغيره، المهم احددلكم يوم اجي اخذكم بيه حتى تحجون كلشي عرفتوه عن الحجي وسيادة وعني وعن البقية، ما راح احددكم بكلام انتم احجوا اللي شفتوه وضميركم هو الحَكَم
تركناهم وطلعنا بعدما سلمت عليهم وحظنتهم بالأخص يقين حيل تعاطفت وياها ما اعرف ليش رغم قصص البنات البقية هم تقهر، بقيت ساكتة وهو ساكت رحنا لمكان ثاني وبنات ثانيات وهم دخلنا ونفس الشي انعاد بس الفرق ذني البنات باكر وعاقد عليهم الزعيم بفترة خروجهم من الوادي وبعدها…
_بعدها كلتله اني شاطرة بأمور التكنولوجيا واعرف أصمم وهيج اشياء، فتحنا بيج وشوية شوية كام ينعرف ساعدني الزعيم بأمور الاعلانات الممولة وجان يجيبلي المنتجات واشتغل بيها اني وصديقتي بعدين جابها وسكنت يمي هم بنفس الطريقة وهسه احنا بلوكرات مشهورات محد يعرف ماضينا شنو حتى تبقى صورتنا حلوة كدام الناس
سألتهم شلون وصلوا للوادي، وحدة مهزومة بحجة الحب والثانية تعنيف اسري، وهم اتفق وياهم شنو يحجون وية الضابط وطلعنا، مرينا على هواي بنات ومختلف القصص سمعتها وحدة اتعس من الثانية كل القصص أغرب من الخيال، فعلاً واقع بشع اللي يعيش بستر الله ما يدري بالناس شلون عايشة
التفتت عليه دموعي بعيوني
خيلاء : تصفيق حار للي سمعته، انتَ جبار بمواقفك الرجولية، اعتذر عن سوء ظنوني بيك عن كل جرح سببته الك سواء بالكلام او بالفعل
اينار : هسه عرفتي ليش وهمتج اني معتدي عليج؟
وليش تلاعبت بعلاجج وخليتج تتقيأين واخذت منج اختبار الحمل وتلفته، واصرّيت كل يوم أعقد عليج حتى بس ابعدج عن قذارة هذا المكان، ما جنتي تعرفين ويامن تتعاملين ولشنو راح تتعرضين ومنا اني احبج من زمان وعيني عليج، اكبر صدمة انصدمتها من جنت واكف ودخلتي تعاركتي وياية جنتي كل حجاية تحجيها ما مركز وياها بكد تركيزي شلون وصلتي لهنا وشلون لبستي هذا اللبس وخايف لا صرتي مثلهم، اكبر رعب عشته بحياتي بفترة الجنت اتوصل لمعلومات حقيقية عن وصولج للوادي وعدم لمسج من قبلهم، عاندتي وكبرتي راس وهاي النتيجة هديتي كلشي خططتله على راسي وما استفاديت شي من دخولي لهذا المكان غير الامور القذرة والجرائم صارت براسي والكل طلع منها واني وياج مطلوبين
خيلاء : احلفك بداعة ابنك احجيلي السبب الحقيقي لوصولك للوادي وليش دخلت بوسطهم واشتغلت وياهم وانت بهاي النظافة اللي سمعت عنها هسه
اينار : ما اكدر احجيلج شي قبل لا اتوصل للحقيقة
خيلاء : والحقيقة عند منو؟ منو يعرفها؟
اينار : اثنين فقط
خيلاء : منو ومنو؟
اينار : عواد ونهيل
خيلاء : نهيل اختي؟؟
هز راسه بأي
خيلاء : مو تندل مكانها روحلها وخليها تحجيلك
اينار : اندل بس ما تحجي، جربت وياها هواي كل الحقائق يمها، عوفج من الحجي هسه وخلي ننزل بمكان حتى ناكل، حيل جعت واحس بروحي تعبان
خيلاء : تمام ننزل ولا تضغط على نفسك ارتاح شوية، كل اللي سويته زايد تعب بتعب على صحتك
اينار : اكبر اختلافية شفتها بحياتي
خيلاء : هاي اني؟
اينار : لا اني
خيلاء : ليش بلة غير افهم!
اينار : اسكتي لخاطر الله اسكتي
حجاها ونزل نزلت وراه دخلنا مكان شعبي ما عليه عين طلب لفات وكعدنا بالشارع على ميز دائري وكراسي اثنين من البلاستك
خيلاء: همام من تحجي الحجاية كملها ليش تبسمر
باوعلي سحب نفس قوي وزفره اجى الولد جاب اللفات خلاهم على الميز وياهم قواطي بيبسي قدملي نترت بكلمة ما اريد اكتفى يباوعلي بس، أكل وخلص اكله حسب فلوس خلاهم على الميز باوعلي وكال
اينار : ما تاكلين؟
خيلاء : لا
سوه صوت بأصابعه حتى ينتبهله الولد اجى وكف كباله
اينار : هذا الحساب وهاي اللفة سفري
_بس هذا هواي انتظر ارجعلك لازم اصرّف لإن ماعندي صرف
اينار : مو مشكلة فدوة الك وهاي بعد اضعافهن تكدر تأجر محل صغير على كدك وتعيش منه احسن من الكشك هذا
_لا عمو ما أقبل ولا اخوية راح يقبل
تركنا وراح يصيح اخوه الكبير كمت اباوع للمكان مو غريب علية شايفته بس ما اعرف وين يمكن بالتلفزيون، الى ان اجى الولد الكبير باوعتله صفنت وهو صفن وارتبك من شافني بس لاحت شفايفه ابتسامة خجل انتقلت نظراته مني لهمام وحجى وياه يريد يفهم سبب تبرعه بهيج مبلغ
همام : انت في يوم من الأيام ساعدت زوجتي وحميتها وما ناسيلك فضلك حاولت بأكثر من طريقة اساعدك عن طريق ولد ادزهم وجنت ترفض ونفسك العزيزة نفسها ما تغيرت بس هسه جبتها وياية عسى ولعل تأثر عليك
حجاها والتفت باوعلي بمعنى احجي كمت من مكاني وكفت بصف همام مقابيل الولد
خيلاء : اني مصدومة ما جان عندي علم اني بهذا المكان وانت موجود ولا اعرف همام يعرف بسالفة مساعدتك الية وشلون عرف بأي طريقة وصدمتي الثانية ماجنت متوقعة بيوم راح ارجع اشوفك واردلك الجميل اللي على راسي واني ممنونة منك كلش وما مصدكة شفتك اليوم اتمنى ما ترد ايد زوجي الممدودة بالخير، عيل نفسك وعائلتك بهاي الفلوس وسبب جيتي الك ومساعدتك الية هي فتح باب رزق الك عن طريقي حتى زوجي يندلك ويقدملك بما مَنَّ الله عليه، كلنا سواسية وهذا رزق ممدود من الخالق للمخلوق حرام ترده
ابتسم الولد بوجهي ودمعت عيونه مد ايده أخذ الفلوس من همام وطلب يحضنه ويبوسه اخذه همام لحضنه وربت بقوة على ظهره وينصح بيه ويوجهه للشغل الصحيح وشلون يدير باله على نفسه، سلمنا عليه هواي وتشكرناه ورجعنا للسيارة صعدت يلا هو صعد اول ما طبك الباب تقربت بلهفة حضنته وكمت ابوس بيه بعيونه بخده ويمكن حتى تجاوزت حدي وقبلت شفايفه بعدها حضنته بقوة وبجيت على صدره لازمة بلوزه بأيدي بقوة واحجي
خيلاء : انت شنو من طيبة كلب شايل!!
شلون عرفت هذا الموضوع ياكل ويشرب وياية واريد اردله الجميل!
لهناك ورفعت راسي ببطئ منه جان مبتسم من شافني عكدت حاجبي حل العبوس على وجهه
اينار : ها خيلاء تحولتي؟ مو جنا حلوين
خيلاء : صدك تعال انت شلون عرفت بسالفة الولد؟؟
اينار : بكل بساطة جنت مراقبج
خيلاء : وليش؟؟
اينار : خايف عليج وضايج منج
خيلاء : ما فهمت!
اينار : احميج وبنفس الوقت اشوف وين توصل بيج صلافتج لأي مدى ممكن توصليله
خيلاء : بس جانت سيارة وحدة وشمروني بطريق معزول ما بيه احد غير كشك هذا الولد
اينار : سيارتي جانت وراكم بس محد يدري بية لإن ما بلغت
خيلاء : وسالفة المرة الجابتلي أكل؟
اينار : اني دزيتها من شفتج خويتي من الجوع
خيلاء : والطفل ابو الوردة؟
اينار : اني دزيته ينطيج الوردة وتتريكون سوى حتى ما توكعين لإن وراج مشوار طويل
خيلاء : وسالفة المرة اللي رحت لبيتهم حتى تساعدني وتالي ابنها طردني انت السبب مو؟؟
هز راسه بأي وكال
اينار : اتصلت عليه كلتله ممنوع تنطيها فلوس واطردها لو بيتكم ينهجم
خيلاء : من وين تعرفه حتى تتصل بيه؟؟
اينار : كل معارف امج اعرفهم وعندي علاقة بيهم ومن ضمنهم هاي العائلة جان عندي اتصال بأبنهم حتى اعرف معلومات حول والدي وعمتي
خيلاء : طبعاً تسيطر لإن معارف امي قليلين
اينار : راح تاخذيها بشي سيء مو؟
خيلاء : عقلي راح يوكف ما اريد احجي شي بعدين اندم عليه خلينا نرجع، اكعد وحدي ارتاح وافكر زين هذاك الوقت نستأنف حديثنا
اينار : ماشي نرجع مثلما تحبين بس شنو رأيج ننهي موضوع سكرة مادام بعدنا برا حتى ما تبقين شايلة بكلبج علية
خيلاء : وليش يهمك اذا اشيل بكلبي او لا؟
اينار : طبعاً يهمني وإلا ليش جايبج وافتر بيج على البنات غير حتى تعرفين الحقيقة وين
خيلاء : شنو قصة سكرة؟
ولو هي ما تهمني بس اريد اسمعها
اينار : خلص مادام ما تهمج تولي
خيلاء : لا اريد اسمعها
اينار : ما يحتاج حبيبتي ممكن اكذب عليج من وين اجيبلج سكرة تبرر موقفي وتخليج تصدكيني
خيلاء : همام احجي عاد
اينار : كولي حبيبي احجي حتى احجيلج
خيلاء : غير بالاول تكون حبيبي من صدك حتى احجيها
صفن بوجهي بهت عدة ثواني بعدها همس بصوت مبحوح
اينار : على الاقل كولي احبك حتى لو كذب جامليني بيها
صفنت بعيونه دقايق سحبت نفس قوي درت وجهي وبعدت عيوني عن عيونه الاخذت كلبي
خيلاء : ما اتوقع الزعيم بهيبته ومكانته ينتظر من وحدة عابرة بحياته تكذب عليه بالحب او تجامله
اينار : منو كال انتِ عابرة بحياتي!
حجاها وسحب وجهي من فكي وركز بعيوني جابرني ابحر بعيونه، بعدت نظراتي عنه وهمست
خيلاء : اني عابرة بحياتك
تنهد ارتفع صدره وهبط ببطئ، بتعب كال
اينار : انتِ مو مجرد انسانة عابرة بحياتي انتِ عَبرة بصدري ما ترفض تطلع لا من ابجي تنزل وية دموعي واخلص منها ولا من اصرخ اكدر اطلعها، صرتي مثل الموس اذا ذبيته يجرح واذا بلعته يذبح
نزلت دموعي ورجف جسمي حسيت اريد احضنه بس ما اعرف هل هذا الحضن الاريده حضن حب لو مجرد شعور بالامان
خيلاء : اني عابرة بحياتك لإن الاصل موجودة وعندك ولد منها
اينار : بس انتِ الاولى بحياتي انتِ اول دكة كلب ضايعة ولكيتها انتِ حلم وحققته لا تخليني افز منه الله يخليج
خيلاء : اذا بقيت راح يتحول الحلم لكابوس صدكني
اينار : كلشي تركت علمودج غيرت كل الخطط خسرت قتلت جازفت بأبني وسمعتي وراحتي وسفرت عائلتي بعدت عنهم حتى بس احميج مو يكولون الحب يترجم بالافعال والرجل بفعله مو بكلامه يمكن ولا مرة كلتلج احبج قبل هذا اليوم بس جنت بكل فعل ابرهن مدى
حبي وخوفي عليج مدى اشواقي وغيرتي المميتة خيلاء لا تتركيني اضيع
التفتت عليه لزمت خده اشاح بوجهه بعيد عني
خيلاء : همام تبجي؟
هز راسه لا رافض يباوعلي فتح الجامة اخذ نفس عميق بعدها فرك رقبته ورجع راسه على المقعد غمض عيونه تفاحة آدم جانت تتحرك بشكل تعبر عن حسرته الرافضة تطلع حتى ما تقلل من هيبته الرجولية
خيلاء : همام
اينار : اشششش
حجاها ورفع ايده بوجهي حتى اسكت، سكتت ورجعت ارتاجيت على المقعد وغمضت عيوني مثله، صمت رهيب بس اصوات السيارات السريعة المارة من يمنا نسمعها، من بعد فترة من الوقت تمتم كلمات مسموعة كال
اينار : اصعب شي من تكون نقطة ضعفك هي نفسها نقطة القوة عندك هي نفسها اللي تكون مستعد تحرك الدنيا علمودها
قاطعته وصحت بصوت عالي ودموعي تنزل بغزارة
خيلاء : ليش حبيتني ليش اني بالذات ليش؟؟
التفت علية وصاح
اينار : ما ادري ليش حبيتج ما ادري جنت اريد انتقم اريد اشرب من دمكم واحد واحد على الضيم اللي عشناه بسبب اميرة ونهيل بس ماكدرت ماكدرت من شفتج تراجعت عن كل قراراتي بدل ما أأذيج لكيت نفسي احميج يا خيلاء
خيلاء : تحميني وجبتني للوادي! لو ما تحميني شنو تسوي بية؟ ها شنو تسوي؟
اينار : مو اني جبتج للوادي مو اني
خيلاء : عمك اخو ابوك وشريكك اللي تعرف الشاردة والواردة منه هو جابنا واكيد عندك علم مسبق
اينار : ماعندي علم ماعندي شوكت تستوعبيني شوكت تصدكين بية شوكت تزيلين كل الشكوك عني شوكت؟؟
حجاها وضرب جامة السيارة الامامية بكف ايده تكسرت وسببت جروح عميقة بكفه، كمت اصرخ خفت بس من شفت الدم سكتت سحبت الكلينكس واخذت اكثر من وحدة وخليتهم فوك كف ايده محاولة امنع تدفق الدم بهاي الغزارة، انتبهت عليه يباوع ويدير وجهه بعيد حسيته داخ، سحب ايده مني ولفها بقماش نظيف مخليه بالسيارة اتوقع لغرض مسح الجام بيها، ساق السيارة مسرع الى ان وصلنا لعيادة صبا صفها ونزل نزلت وراه وسألته بصوت خافت خفت يصيح علية
خيلاء : صبا بالانبار خاف نسيت وعبالك هنا
اينار : رجعت
حجاها وصعد درج العمارة بدون ما ينطيني تفاصيل صعدت وراه وكفنا كبال الباب دكها سمعت صوتها تصيح منو جاوبها، فتحت الباب باوعتله عاقدة حاجبها
تباوعلي وترجع تباوعله همست
صبا : خير شبيكم صاير شي؟؟
رفع ايده فتحها كدامها واشاح بوجهه بعيد عن الجرح
صبا : هاي بشنو؟؟ تعال ادخل هسه اروح اجيب العدة واصعد
دخلنا وكعدنا على القنفة دقايق واجتي كعدت على الكرسي المجاور اله سحبت ايده خلتها على ثوبها رغم ايده مليانة دم بس ما لعبت نفسها وخافت لا تتدمر، جانت تداويه وتسترق نظرات من وجهه عيونها تدمع كل شوية تبلع ريكها بخوف، تخيط ايده ومن يغمض عيونه يتألم هي هم تغمضها لو تسوي حركة بشفايفها تدل على الاسى تجاه حالته، لولا معرفتي بصبا جان كلت تحبه بل تعشقه بجنون، للحظة حسيت بروحي غرت منها ردتها بس تخلص وتبعد ايدها عنه
كملت خياط سحب ايده ورجع ظهره على ظهر القنفة غمض عيونه تعبان، ثواني وراسه مال، بهدوء سحبت طبلة خلتها كبال القنفة اللي كاعد عليها رفعت رجليه ونزعته الحذاء بهدوء خلتها على الطبلة وبعدها دخلت للغرفة جابت غطاء قطني وغطته عاملته معاملة الطفل، يمكن نست وجودي للحظة وتقربت منه رادت تطبع قبلة على جبينه بعدها تراجعت ورفعت راسها باوعتلي انصدمت ماحجت شي تركتنا ودخلت للغرفة تركت بابها مفتوح
ماعرف ليش فكرت ادخل وراها واسألها ليش هيج تصرفت ويمكن اتمادى بأسئلتي وياها، اني وافكر بالموضوع ما لكيت نفسي إلا كبالها بوسط غرفتها واسأل بيها كلشي خطر على بالي من ضمن الاسئلة ركزت بعيونها المليانة دموع بعيوني اللي تنتظر جوابها حتى تذرف دموع الغيرة منها ومن تصرفها ويمكن حبها
خيلاء : تحبيه؟
عكدت حاجبها باهتة من سؤالي كررت عليها السؤال تجاهلتني وبعدت نظرها عني من كامت ترتب بالسرير مالتها حتى تنام
خيلاء : هيج سؤالي صعب؟
صبا : مو صعب بس ما يخصج جوابه
خيلاء : شلون ما يخصني اني زوجته!
صبا : ما نكرت هذا الشي ولا ناسيته بس مشاعري تخصني اني ما تخصج
خيلاء : معناها تحبيه
تركت المخدة من ايدها وباوعتلي
صبا : اذا كلتلج اي او لا يهمج بشي؟
خيلاء : لا ما يهمني وليش اهتم قابل أحبه
صبا : خلص شخص ما تحبيه ومو مهم بالنسبة الج بعد شكو تسأليني اذا حبيته او لا
خيلاء : بالضبط ما أحبه ولا يهمني أمره
اينار : كومي نرجع تأخرنا
فزيت من سمعت صوته رفعت راسي باوعتله واكف بالباب ومنتجي بتك ايد على اطارها تقربت منه وهمست
صبا : وين رايح وانت تعبان؟؟
جاوبها ونظرات العتب تاكل بية
اينار : مو تعبان ما بية شي من اوصل انطيج خبر لا يظل بالج
صبا : بس..
قاطعها من كال
اينار : منتظرج بالسيارة لا تتأخرين علية، وشكراً صبا تعبتج وكسرت نومتج
حجاها وطلع اختصر جوابها بربتة ايده على زندها من راح حضنت مكان لزمته بكف ايدها وهمست بغصة
صبا : دير بالك على نفسك لا تتعبها وانت مجروح
تركتها وطلعت سديت الباب نزلت الدرج بخطوات ضايعة واسأل نفسي شنو اريد وليش هيج كاعد اسوي بيه وبنفسي ليش ما اعترف عندي مشاعر اتجاهه ليش خايفة منها ليش البوح صعب لهاي الدرجة!!
صعدت السيارة وانطلقنا طيلة الرحلة جنا ساكتين غارقين بخيباتنا الى أن وصلنا جان توه طالع الفجر، فتح الباب ودخلنا للبيت جان هدوء هو راح لغرفته واني مددت على القنفة بالهول ما كدرت انام ولا لحظة الى أن طلع تيام من الغرفة باوعلي وضحك سلم علية وراح للحمام بعدها طلعت سديل من نفس الغرفة باوعتلها مستغربة شافتني ارتبكت
خيلاء : تعاي وين رايحة؟
سديل : للحمام
خيلاء : مشغول، تيام بيه
سديل : شوكت رجعتوا؟
خيلاء : شنو تنامون بنفس الغرفة؟
سديل : ها لا اي بس اليوم هو اجى مو اني
خيلاء : سديل باوعيلي
سديل : ترى عاقدين يعني يعتبر زوجي ما داخل بغرفتي واحد غريب
خيلاء : كرامة سز ولي من وجهي واذا موتج بيده ممنوع تحاجيني بعد فاهمة؟ بخيرهم ما خيرونا بشرهم عموا علينا
تركتني وراحت وراه للحمام لعبت نفسي منهم تركتهم وصعدت فوك
بعد مرور اسبوع
جنت كاعدة بالحديقة ودخل تيام جايب مسواك صحته باوعلي رافع الاكياس بيده وكال
تيام : اخليهم بالمطبخ واجيج
خيلاء : تمام انتظر
بعدها اجى يمشي يباوعلي مبتسم وعاكد حاجبه سحب الكرسي وكعد عكس
تيام : ها شكو؟
خيلاء : شلون دبرتها عاكد حاجبك ومبتسم بنفس الوقت
تيام : تحسباً للمواقف الراح تبدر منج ممكن اشتاقيتي تحجين وياية وتفضفضين ابتسمتلها وحسبت ممكن تريدين تتعاركين لهذا عقجت وجهي وصار مكس شمدريني
خيلاء : همام وين؟ صار اسبوع مختفي
تيام : شنو مسويتله وطفرتيه من الدنيا كلها
خيلاء : بدون استهزاء جاوبني وين راح؟
تيام : ما حجالي شي بس كال حاب ابتعد لإن مخنوك
خيلاء : ماحجالك من شنو؟
تيام : اعرف من شنو بعد عليمن اسأله
سحبت نفس تنهدت بقوة وهمست
خيلاء : صعب ينولد حب بوسط هيج ظروف وعدا هذا هو متزوج وعنده طفل واني عندي طفلتي يعني شلون ترهم، تقبل ابني سعادتي على تعاسة انسانة ثانية يمكن تنتظره يرجعلها بكل لحظة
تيام : هذا الشي بينكم لا تدخلوني بيه اعتذر، خصوصياتكم لازم تكون خط أحمر لازم
خيلاء : ما عندنا خصوصية حتى احجيها الك اني كاعد افضفض لا اكثر
تيام : فضفضتي للشخص الخطأ، همام اذا عرف فاتحة كلبج وتحجيلي راح يشك بينا لهذا تركيني بحالي
خيلاء : هاي شبيك تحجي صدك؟؟
ضحك وكال
تيام : حبيت اعيش الدور وياج، لا احجي صدك شنو تريدين اخابره يجيج يكيف
خيلاء : اريد اسألك كم سؤال وجاوبني عليه
تيام : اذا عندي اجوبة ما راح ابخل بيها عليج
خيلاء : همام ليش يخاف من الدم ويبعد عيونه عنه رغم يقتل بدم بارد وشايفته اكثر من مرة وغير هذا يكره اللون الأحمر؟؟
اشاح بوجهه بعيد عني وحك راسه
خيلاء : معناها تعرف الجواب، لهذا احجيلي بدون ما تتهرب
تيام : مو اتهرب بس انتِ دخلتي بالعمق العميق
حجاها وكور كف ايده كام يضرب طرف الكرسي بتوتر
خيلاء : هو اللي قتل عمته وابوه؟
لهذا يخاف من الدم صح؟
باوعلي فاتح كل عيونه يريد ياكلني بيهن تحول لوحش كاسر تقرب مني خازرني ويحجي من بين اسنانه يحاول يخنكني ثبتني بمقعد الكرسي بكفه وطوق رقبتي
تيام : تعرفين معلومات عن هذا الموضوع احجي؟؟حجاها بصياح
هزيت راسي بلا ودموعي نزلت
تيام : منو حجالج؟؟ شلون توصلتي لهيج معلومة هو اعترف مو؟؟ احجي لج
اختنكت غمضت عيوني وتشاهدت يأست يتركني وصلت حالة صار كلشي أسود ودخان يحيط وجهه من فتحت عيوني ثواني وغمضتها
اندفع من فوكي واسمع صوت بكاء سديل وتطبطب على خدي تصيح باسمي، فتحت عيوني لزمت رقبتي وبديت اكح كومتني واخذتني للحمام غسلت ورجعتني للهول كايدتني مثل الطفل بيدها جنت مستسلمة وامشي كعدت، مر وقت واحنا ساكتين الى أن رجع كعد كبالي خجلان من تصرفه مدنك عيونه ويفرك كف بكف ويحجي متلعثم
تيام : آسف ما اعرف شلون هيج تصرفت بس من تجي سيرة ذكرى اتخبل ما اعرف شنو اسوي توقعت تدرين منو القاتل الحقيقي ما دريت هذا مجرد افتراض منج إلا من فهمتني سديل بالموضوع، كل شكوكي منصبة على همام هو اللي قتلها لإن الوحيد جان بالبيت ومن رجعنا جانت بحضنه شافنا وانصدم تركها وكام يصيح مو اني، اني ما قتلتها اجيت ولكيتها هيج بس السجينة بيده والدم تارس ملابسه ووجهه شعره المخربط وكل العلامات تدل على شي واحد هو القاتل ومبين مقاومته هواي، من حققنا وياه يكول لكيتها تلفظ نفسها الأخير ومن حلاة روحها جلبت بشعري ما تعرف شنو تسوي بس محد صدك بيه رغم حلف وبرر، ما صدكت لا عنده دليل يثبت برائته ولا عندي دليل يدينه لهذا السبب تشوفيني مثل المذبوح لا بية اطير ولا بية اتعافى..
من كثر الشفته بحياتي تحولت لإنسان مريض اعترف، وامراضي تطلع كدام الكل حتى أضعف الخلق، ما اعرف شنو اسوي بعصبيتي وتهوري بس اتمنى تعذريني وتسامحيني هاي المرة ووعد ما راح تشوفين تصرف مماثل مني
رفعت عيوني باوعتله جان خجلان ومتوتر سحبت نفس وحجيت
خيلاء : لهذا السبب يكره اللون الأحمر؟
تيام : بالضبط كره كلشي لونه أحمر وصارت عنده ردة فعل قوية منه كلما يشوف لبسة يشكها او يجبر الشخص ينزعها واذا تحفية يكسرها وصل بيه الحال ما يطلع حتى ما يشوف هذا اللون لإن كلش يأثر بنفسيته
خيلاء : لهذا السبب خسر صفقة السيارات من جبرتني سيادة البس فستان أحمر واصبغ شعري نفس اللون
تيام : بالضبط
خيلاء : اثر الجرح اللي بوجهه ما شفته قبل بس من سمعان شاركنا بالوادي انتبهت عليه، شنو هذا الجرح العميق اللي بوجهه؟
تيام : قصدج بخده الايمن؟
خيلاء : اي
تيام : تتذكرين الليلة اللي انباعيتي بيها لرجل مهم وخاص بسيادة وحاول…
قاطعته
خيلاء : اتذكر الليلة المشؤومة
تيام : بهذا اليوم لو نرجع ليورا هواي احداث راح تتوضح يمج وتشوفين شلون انحط همام بوسط خيارين واحد اصعب من الثاني
خيلاء : ممكن تحجيلي؟
تيام : احجيلج تكفيراً للغلطة اللي غلطتها وياج قبل شوية
خيلاء : انسى لإن اني نسيت
تيام : شوفي بيوم اللي اتفقت سيادة تطلعج ليلة حمراء وية هذا الرجال بالمقابل سمعان متفق وياها على تشتيت همام بطريقة حقيرة كلش، راد يعتدون عليج ويدزون التصوير كامل لهمام حتى يكسرون ظهره، ويشتتون تفكيره لإن جان بقمة نجاحه بعمله الخاص خارج الوادي
خيلاء : اعرف بيه هذا الشغل؟
تيام : لا محد يدري بيه بس سمعان وصله خبر اتوقع من الحجي
خيلاء : زين كمل
تيام : بنفس هذا اليوم جان عنده اجتماع مهم بالبيت حول صفقة تغير حياته بس سمعان جان أسرع منه وقاده ببال مرتاح للخسارة، خطف ابنه وانتِ فعلوا فعلتهم وياج، اتصلوا بيه بلغوه بمكان ابنه واذا تريده تعال اخذه احنا بالمكان الفلاني ننتظرك جيب الفلوس وتعال وحدك اي حركة غلط تنهي حياة ابنك، اخذ الفلوس وتوجه للمكان وبنفس الوقت وهو بالطريق رايح لأبنه انرسله فيديو شلون يعتدي عليج وصراخج لحدما اغمى عليج هو يتفرج، تخيلي همام بأي وضع جان!
الصراحة اني عبالي انتِ متفقة وياهم حتى تخربون شغله ورغم كلشي خابرهم وبلغهم ينطوه مجال ساعة اضافية يدبر بيها الفلوس بس هو جان يريد يجيج حتى ينقذج من ايديهم وبعدين يروح يدفع الفلوس ويرجع ابنه، كاعد تسمعين لأي مدى يحبج همام! للحد اللي ترك ابنه عزيز كلبه بين وحوش ما يعرف منو اخذوه من ايد امه وحركوا كلبها وكلبه ورغم هالشي اجاج ومن حجيت وياه وربطنا الموقفين سوى وسالفة الصفقة شك للحظات انتِ وياهم متفقين حتى تخسروه
خيلاء : خلف الله عليكم هاي المرجية منكم شتوقع يعني
تيام : لا تلومينا كل تصرفاتج جانت تدل على كرهج لهمام واستعدادج التام ﻷذيته
خيلاء : اي مو اني جنت عايشة بوسط ناس طبيعيين وحياة طبيعية
تيام : حقج ومو حقج، المهم من حجيتله ووضحت شكوكي ناحيتج بأنج متفقة وياهم تركج وراح ورا ابنه حتى يرجعه دفع الفلوس ورجّع الولد بعدها رجع للوادي سأل عن الصارلج وعرف التفاصيل نهى حياة المعتدي بس من قاومه ترك اثر بوجهه يروي هاي الحادثة
سكتت وبقيت اباوعله حك لحيته وكال
تيام : عندج اسئلة ثانية؟
خيلاء : لا بس..
تيام : بس شنو؟
خيلاء : سكرة شنو قصتها؟
تيام : شتريدين منها؟
خيلاء : ضروري اعرف
تيام : اسأليه هو يجاوبج
خيلاء : ما اريد اسأله، احجيلي انت
تيام : ما اكدر
خيلاء : ليش؟ اسرار؟
تيام : هو زوجج ويحجيلج تجين تسألين عمه ليش؟
خيلاء : تمام
وكف كبالي وكال
تيام : محتاجة شي؟
خيلاء : سلامتك
هز راسه وسوى حركة بشفايفه بمعنى آسف، تركنا وطلع خارج البيت، دنكت راسي وكمت افرك بأصابع ايدي كعدت سديل كبالي، حجيت بيأس بدون ما ارفع عيوني عليها
خيلاء : تدرين حسيت صبا تحب همام
سديل : ها يا همام؟
خيلاء : همام شبيج اينار
سديل : وشلون عرفتي؟
خيلاء : وليش تبعدين عيونج عني! تعرفين شي؟
سديل : ها لا شنو اعرف
خيلاء : سديل اعرفج اني اكثر من نفسج
وكفت تريد تروح لزمت ايدها وعتيتها
خيلاء : تعاي وين رايحة احجي بسرعة
سديل : شنو احجي شبيج خيلاء ايدي
حجتها مرتبكة
خيلاء : احجي التعرفيه لو والله…
سديل : لا تكملين راح احجي
خيلاء : يلا
هديت ايدها وكعدت استمعلها وهي تسردلي تفاصيل لأول مرة اسمعها مجرد شك ما شكيت بيها بس جنت اكول بيني وبين نفسي شلون كل هاي المدة وشاب وسيم بهذا القرب منها وما تولدت مشاعر بينهم وخصوصاً هي دكتورة وحلوة، سهيت وابحرت بعيد عن مرسى كلام سديل ما لكيت نفسي غير اسألها هذا السؤال
خيلاء : هو يحبها؟
سديل : هااا
خيلاء : شبيج هو يحب صبا؟؟
سديل : اني وين كاعد احجي وانتِ وين!
خيلاء : جاوبيني يحبها لو لا؟
سديل : ما اعرف الصراحة ماعندي علم
تركتها ومشيت بالبيت اصيح على تيام بعصبية
خيلاء : تيام تيام وينك؟؟
سديل : طلع مو تدرين بيه
خيلاء : ما ادري شوفيلياه وينه؟
سديل : شنو تريدين منه غير افهم!
خيلاء : اريد احجي وية همام
سديل : مو كالج ما يدري بيه
خيلاء : جذاب هذولة يقتلون ويدفنون سوى لا تصدكين بيهم
تيام : منو اليقتلون ويدفنون سوى ممكن افهم؟؟
التفتت عليه منهارة أأشر بيدي
خيلاء : هسه تتصل عليه تطلب منه يجي لهنا هسه تتصل
تيام : وليش اتصل عليه غير افهم!
خيلاء : اريد اشوف كم وحدة يحبها ومتزوجها غيري
تيام : وانتِ شكو؟ يتزوج يحب يكره يموت انتِ شكو؟
خيلاء : لا بلة!
تيام : انتِ مو تكرهيه ترى عجيب امرج يعني تكره وما تغار عليه لا هي زوجته وناطيته حقه الشرعي ولا هي منفصلة، هم مانعته وهم تعال لا تحب ولا تتزوج غيري ترى ماكو هيج شي
خيلاء : كلتلك اتصل عليه خليه يجي لهنا مو تنطيني مواعظ وحِكم
تيام : الله يشافيج
خيلاء : يشافي الجميع اولهم انت
تركني وطلع من البيت انتظرت ساعات يمكن ستة او سبعة واني افتر بنفس مكاني لأول مرة يحترك كلبي هيج تخبلت الى أن سمعت صوت سيارة طلعت اركض برة لأول مرة هيج افقد اعصابي
مجرد شفته نزل من السيارة رحتله كمت اضرب بيه واصرخ طلعت كل حركة اعصاب احتركتها وكل قهرة وكل تعب مريت بيه وكل خوف ورهبة عشتهم، بادل قساوتي بحنية ضمني حيل لحضنه وشمني، مسد شعري يريد يهدأني زدت بجي، كام يهمس بإذني
اينار : اش حبيبي اش اني يمج هياتني ما رحت
خيلاء : انت جذاب
اينار : ما جذبت وعيونج كلشي حجيته صحيح
خيلاء : انت ما تحبني
اينار : احبج لو ما احبج ما ارجعلج من آخر الدنيا مجرد سمعت بيج محتاجتني
خيلاء : ماعندي ثقة بيك مستحيل اصدكك بعد، انت جذاب انت خاين انت مجرم كل صفة سلبية بيك تريد تعلقني وتتركني بعدين حالي حال سكرة وصبا ومرتك، انت اناني تحب بس نفسك مريض تترك ضحاياك بدون علاج
احجي بصياح ودموعي تنزل وهو يباوعلي عاكد حاجبه مصدوم بتصرفي، لزمني من كتفي بقوة هزني حتى اهدأ وكال
اينار : لج شبيج تخبلتي خوما تخبلتي!!
خيلاء : هسه تحجيلي كلشي وننهي
اينار : صوتج منا العالم
خيلاء : معلية ننهي كلشي وهسه
اينار : ليش احنا شنو بينا حتى ننهي؟ هي ورقة هسه اشككها وانطق الصيغة وخلص صعبة يعني! بس كليلي وين تروحين وانتِ مطلوبة وعليج دعاوي قيامة تخيسين بالسجون!
جان يحجي بصوت عالي حتى يغطي على البجي مالتي واسمعه، بقيت ابجي الى اني خارت قواية وكعدت بالكاع دنك لمستواية وحضن راسي لصدره
خيلاء : انت عفتني من موقف بسيط تخليت عني، اني اعرف سمعتني من جنت احجي وية صبا بس حجيت هيج لإن عرفت عندها مشاعر تجاهك وتصورت انت هم تبادلها لهذا هيج حجيت وجرحتك
اينار : هسه انتِ تبجين لإن تحبيني لو لإن تغارين علية لو لإن شكيتي عندي مشاعر تجاهها لو شنو بالضبط مو راح تخبليني!!
خيلاء : وليش احبك! اصلاً ما اغار عليك وانت عفتني وما سألت عني بعد لإن مليت مني ادري
ضحك وعيونه لمعت بعدها تربع بالكاع ونزل عليه الضحك واني على ضحكته هم ضحكت
تيام : زوج مخابيل الله وكيلكم، امشي خلينا ننام جوة خبصتيني راح تتهور وراح يذبحها وتالي ذبحونا من الضحك والتفاهة
التفتنا على مصدر الصوت لكيناه واكف بباب المطبخ وسديل مجلبة بذراعه خايفة والوجه اصفر
تيام : يابه دفضوها عاد مو والله ملينا لو تطلكون هسه لو تاخذها للغرفة وتممون زواجكم غير هذا الشي ما اتحرك منا واحرك البيت وعلية وعلى اعدائي
حجاها واجى يمنا وسحبنا من ايدينا حتى نكوم، باوعله همام وخزره
اينار : هاي شبيك؟
تيام : ما اتحرك منا اذا ما تطلكون لو تتزوجون فعلياً مليت ولعبت روحي
اينار : دروح فوت ونام احنا نتولى امورنا
تيام : اي واني شنو ذنبي وهاي تتصركع كلما تسمع صوتكم وعفية وكوم عليهم وراح يموتها واعرف اختي لسانها طويل
التفتت عليها خزرتها وحجيت
خيلاء : ولج منو هاي لسانها طويل؟
تيام : وهسه انتِ هذا الهامج؟ كومي فوتي جوة لا اطشر المال والبنون وحتى زينة الحياة الدنيا
اينار : هاي شبيك تحجي صدك؟
تيام : اي والله ما اتحرك اذا ما اختاريتوا واحد من الاثنين
اينار : دفوت يمعود
تيام : افوت بس اذا سمعت صوتكم، البيت احركه باللي بيه
اينار : عود ارشلك البانزين
تيام : تسوي فضل علية لإن ايدي توجعني، ما كلتلك مو رحت لابو احمد خجلني وشلت وياه اثاث وكتفي انفصخ شوف
حجاها وتربع يمنا بالكاع وطلع كتفه يشوفه لإينار كل عقله يحجي
اينار : خير شو تربعت سالمين!
تيام : طارت نومتي ومال نلعب ورق شنو رأيكم؟
اينار : شاخط انت؟
تيام : مثلكم معاشركم قابل اختلف
التفت لسديل ابتسملها وكال مأشر بيده
تيام : كرصة خبز فرشيها بوسط طاوة بيها دهن وكسبيها شوية ورشي عليها شكر وجاي مهيل وبدربج الورق وبوسة لهذا الخد من تجين
سديل : تيام اني نعسانة مو وقت سوالفك هاي
تيام : والله يا حبيبتي جنت نعسان واريد انام ونيتي طيبة وسليمة وية الفراش وحتى ما توكحت اجيتي وطيحتي حظي وطارت النومة احصدي اللي زرعتيه
اينار : أكل وحدك والعب وحدك اني تعبان وفايت انام وعندي موضوع اريد اتفاهم بيه وية حبيبتي
تيام : اي فوت وشوف شسوي، عبالك اخليك تنام والله ابقى اطبل يم باب الغرفة وادك عليه لحدما ابزعك وعلية بالطلاك اذا تركتوني بدون كيم
اينار : لو باقية تبجين يا خيلاء ولا ضحكتي
خيلاء : انت ضحكت وضحكتني وياك اصلاً اني ضحكت على ضحكتك
اينار : اي طبعاً اضحك اذا اني كلشي ما شايف منج غير بس العركات والمزاج السيء والمناكر وتجين تكوليلي مليت مني
خيلاء : اي صدك لعد جذبت من كلت هيج، انت مليت
اينار : يابة دروحي
تيام : سديل استعجلي بالجاي بدا التصعيد
اينار : انجب انت الخ
تيام : ايا قندرة ابوك لابو الخلفك هذا احترامك لعمك؟
اينار : ما كلتلك صير نفس عمري
تيام : اي مو اني صوجي يا كو**
اينار : تشفير سدوا اذاناتكم بنات بدأ العم يغرد
حجاها واخذني من ايدي ودخلنا لغرفته شغل الضوء وسد الباب نزع سترته وخلاها على الكرسي وسحبني من ايدي كعدنا بطرف السرير باوعلي لزم ايدي دنك راسه وهمس متفادي نظراتي
اينار : اول شي اني احبج واموت عليج سواء صدكتي او لا هذا راجع الج واذا بقيتي وياية او تركتيني راح تلكيني دائماً الحضن الحنين الدافي اللي يلفيج بكل وقت ويحتويج بكل حنان ويحميج من نفسه قبل الناس
رفع عيونه باوعلي جان مدمع بلع ريكه تحمحم وكمل كلامه
اينار : واذا على غيابي اني آسف ما نطيتج خبر تغيبت لإن جنت انسق وية البنات ونتفق على ايام معينة يروحون يدلون بإفاداتهم حتى أتبرأ، واذا اني تبرأت انتِ راح تتبرأين اما سالفة خطف تينا خليت محامي شاطر واتفقت ادفعله مبلغ جبير حتى يرفع قضية تشهير وتهديد أمن سلامتنا ضد ثروان وباجر راح يوصله التبليغ ومن توصل للقاضي يدزون علينا ونروح نبرأ نفسنا من تهمة الاختطاف ومناك اني تبرأت بتقديمي لكل المستندات اللي تدين عواد وسمعان وسيادة وربعها وكلش هواي فادتني شهادة البنات، تعرفين شنو يعني عشر بنات يحجون نفس الحجي وشهادتهم وحدة وبالادلة! معناها لو سمعان وثروان يحركوها لروحهم ما علية دليل يديني وافوت للسجن
خيلاء : والارواح اللي قتلتها؟ محد شايفك؟ ماكو تسجيل كاميرات تدينك؟؟
اينار : لا ماكو جنت محسب حساب لكل شي اسويه وبعدين خلي ببالج ماكو روح قتلتها اذا ما جانت تستحق
خيلاء : تبرر لنفسك جرائم القتل
اينار : ابداً بس اللي اقتله جان يقتل الناس كل يوم يحصد ارواح بالجملة ومسنود من روس كبار، قتلته وخلصت نفسي وخلصتج وخلصت ابني وبنتج وهواي اطفال جان تأثروا بتجارة المخدرات او الخطف وتجارة اعضائهم
خيلاء : اذا هيج يستاهلون حيل بيهم
اينار : لو جنتي بمكاني وتعرفين شنو مسوين انتِ بنفسج راح تطلبين مني انطيج سلاح اترسه رصاص واخليه بيدج حتى تخلصين عليهم واحد واحد
خيلاء : بعد شكد ويطلع دليل برائتك؟
اينار : تطول شوية، انتِ بس اصبري وياية ما اريد منج شي
خيلاء : وشلون بررت الهم من جان الوادي بأسمك وبعدين نقلته بإسمي؟
اينار : بكل بساطة كلتلهم مزورين توقيعي والاختام بسهولة تتزور واني ماعندي اي املاك رجل فقير وشغلتي حرة اشتغل تكسي وكلتلهم هاي الاوراق نقلوا ملكية المكان لبنية خاطفيها وجبروها تبصم عليها بالاكراه وهسه حاجزيها بمكان ما ندري عنه واحتمال كلش جبير يكونون قاتليها
خيلاء : ولهذا السبب سجلت كلشي بإسمي حتى اذا انكشفت الامور انت ماعندك املاك ولا سلطة ولاشي
هز راسه بالايجاب
خيلاء : وتدري راح يصير كل هذا؟
اينار : طبعاً من يوم اللي اخذت تينا وجبتها يمج عرفت ثروان راح ينبش الارض ويجيبها وتقصدت اتركله اكثر من دليل ردت اهدم اللعبة على روسهم وخلي ببالج ثروان مو قليل
خيلاء : انت تعرفه حق المعرفة؟ اصدمني خليني باهتة اكثر من صدمتي هاي
اينار : كعائلة كلنا نعرف ثروان بس هو ما يعرفنا
خيلاء : وبابا؟ يعرفه؟
اشاح بعيونه للجهة البعيدة وهمس
اينار : يعرفه
خيلاء : اي وشنو كمل؟ وشنو همام؟ يعني كل الحياة عبارة عن لعبة؟ كلشي عشناه اني واخواتي لعبة؟
اينار : اذا تتعمقين تتعبين
خيلاء : اني اريد اتعب ضروري افهم شنو كاعد يصير وياية
اينار : وعد مني افهمج بس مو هسه، بيوم اعصابج هادية واني مرتاح ونحجي حتى اكدر اناقشج وما تظلميني
خيلاء : وسكرة؟ وينها شنو مصيرها؟ ليش تحبك هالكد وصبا شنو؟ احجيلي، كل هاي الاشياء تريد تضمها عني وابقى مستمرة وياك؟
اينار : وين جبتينا ووين جنا نحجي يمعودة خيلاء خبلتيني!
خيلاء : احجيلي اعصابي تلفت بعد ما اتحمل اكثر
اينار : عن منو تريدين احجيلج؟
خيلاء : سكرة
اينار : ما اريد اتذكر اي تفصيلة ولا اجيب سيرتها بس راح انطيج عنها مختصر تمام؟
خيلاء : تمام
اينار : اول شي هي بنت حالها حالج اجتي للوادي بطريقة بيها مظلومية من ناس لناس لعبوا عليها لعبة قذرة واجتي يمنا
خيلاء : شلون يعني مافهمت؟ احجيلي تفاصيل همام لا تضم عني شي
اينار : قصة ما تهمج شكو تدوخينا بيها؟
خيلاء : تهمني اريد اسمعها
اينار : لا إله إلا الله
خيلاء : احجيلي ولا تتذمر
اينار : يابه ما متذمر بس كلامج والحاحج متعب
خيلاء : اي اسمع شنو قصتها؟
اينار : آخ من عنادج آخ اسمعي، سكرة اسمها الحقيقي جلنار هاي البنية جانت تشتغل مندوبة مبيعات بمكان معين نكدر نكول شركة طبية ماشي؟
خيلاء : ماشي
اينار : صاحب الشركة يشتغل بالممنوعات واي وحدة حلوة يهرّب من خلالها بدون علمها
خيلاء : شلون يعني؟
اينار : يعني مثلاً يريد يدخل مواد مخدرة او ممنوعة من دولة لدولة الى أن توصل لكردستان بعدين لازم تفوت لبغداد ومنها تتوزع علينا، جان شيسوي يخليهم ياخذون هاي المواد الطبية على اساس ويروحون بيها للمطار اما يسافرون بيها او يستلمون، بهذاك اليوم طلعوا جلنار اللي هي سكرة وراحت تستلم بضاعة جاية من الخارج بإسم شركتهم وعلى اساس مواد طبية، لهناك وانكشف موضوعها الشرطة انخبصوا بين تطويق المكان وبين البحث عن مواد ثانية ممنوعة وبين تشديد التفتيش، من حظها السيء ما اعرف الجيد جان الحجي بالمطار هو ورجاله وهاي المواد هو جايبها وياه واللي يستلمها جلنار وحتى ما ينكشفون ضحى بالمواد واخذ جلنار جابها للوادي، غير اسمها وشمرها تشتغل بالصالة منها يستفاد منها بلاش تشتغل ومنها ما ينكشف امرهم وبلغ الجماعة اللي جانت تشتغل وياهم بأن جلنار انكشف امرها واضطر الحجي يصفيها، وهو فعلاً جان ناوي يصفيها بعد فترة من اجيت وسمعت قصتها وشلون جانت حمل وديع وتخاف من خيالها وحجتلي عن نفسها وطلعت بنية خريجة اضطرت تشتغل هاي الشغلة حتى تعين نفسها واهلها بس الحظ ما حالفها ووكعها وية ناس مو زينين ، ما جان بيدي غير اساعدها امدلها يد العون واطلعها منا ...
قاطعته بحدية..
خيلاء : وانت سبايدر مان للنسوان صاير ياهو تفوت تخلصها من هذا المكان ؟
اينار : ضميرنا وتربيتنا تحتم علينا نقيم بواجبنا الرجولي تجاه فئة ضعيفة محتاجة للمساعدة.
خيلاء : شو من اجيت للوادي ما شفت هذا الجانب الأنساني الرجولي التحجي عنه..
اينار : ما اناقشج ولا اريد احجي شي غير اكملج سالفة جلنار صدكتي اهلاً ما صدكتني اخذي الباب وخليني انام زين لو لا ترة بزعتيني وكرهتيني بعيشتي..
خيلاء : ما لازم لا تحجي نام تصبح على خير..
كمت وصلت للباب جان اسمع يكول ..
اينار : وغير هذا هي حلوة الصراحة وشكلها ينحب واسلوبها يجبر الواحد يساعدها..
التفتت عليه فاتحة كل عيوني ورجعت وكفت كباله..
خيلاء : هاي عليمن تحجي ؟
اينار : جلنارة
خيلاء : جلنارة ؟
اينار : ما الج حق تحاسبيني هذا ماضي
خيلاء : وعلى شنو احاسبك اصلاً بحالك اني والله ياالله..
اينار : اي صحيح مو بحالي بس جنتي منهارة من غيرتج علية ، المهم عقدت عليها وطلعتها من الوادي ..
قاطعته بحدية.
خيلاء : ما طلبت منك تكمل.
اينار : واني عاجبني احجي تريدين تطلعين اطلعي اريد اسولف وية نفسي ، المهم عقدت عليها وطلعنا عشنا بمكان قريب من الوادي..
رجعت كعدت كباله تربعت..
خيلاء : كعدت وياها سوية يعني ؟
وادي الزعيم (بارت الخامس والعشرون الأخير )
القسم الثاني..
اينار : اي وشنو الغريب والجديد ما انتِ جنتي تشوفينا كل يوم طالعين من نفس الغرفة شو سويتي نفسج متفاجئة..
خيلاء : وليش ما عاملتها مثل صبا ليش اصريت تتزوجها زواج كامل لو صبا اختك لأن ما عجبتك وسكرة على هواك اجتي.
من حجيت هيج ضاج وعصب وكام يحجي بنبرة حادة وجدية بعيدة عن المزح مال قبل شوية بنبرته.
اينار : منو حجالج عن صبا ؟
خيلاء : عرفت والسلام..
اينار : اي جيد عرفت والسلام ، خل ببالج شغلة من تركت صبا ما تركتها لأن ما عاجبتني او ما فايتة راسي تركتها لأن نقية نظيفة صفحة بيضة تحبني وتخاف علية لدرجة تفداني بروحها ما قربتها مني حتى لا تحترك بناري وتتأذى دست على كل مشاعر جانت تتولد اتجاهها وطفيتها ماردت اضيع مستقبلها واربطها بية وبالوادي مختصر ماحبيت ألوثها..
بقيت اباوعله باهتة بلعت ريكي ودمعتي نزلت..
خيلاء : بس عادي تبقيني وياك وتلوثني؟
اينار : قصتج تختلف انتِ اساساً جنتي ..
وسكت
خيلاء : كمل يلا ليش سكتت اساساً اني ملوثة مو ؟ هذا قصدك ؟ احجي ليش ساكت احجي ..
كمت اصيح بصوت عالي ..
اينار : مو هذا قصدي خليني احجي.
خيلاء : اسكت ولا كلمة تحجي ممنوع تحجي صوتك ما اسمعه واذا سمعته اسوي شي بنفسي .
اينار : ماشي خيلاء روحي ونحجي بعدين تصبحين على خير حاولي تنامين ورخي اعصابج لإن كلش تالفة..
خيلاء : انت تلفت اعصابي انت ماكو غيرك.
اينار : الله يساعدج اصلاً بسببي العراق صار محتل بسببي تراجع الدينار العراقي وصار ما يسوة بسببي حرب التسعين والكويت بسببي حرب ايران بسببي صارت الطائفية كلشي موزين جنت اني مسويه هيج زين ؟
خيلاء : هو اني شنو فاهمة منك غير الاستهزاء.
اينار : سدي الباب وخليني انام عبالي صرتي ادمية وحسيتي على نفسج واجيت نحجي مثل اي اثنين متحضرين كل شوية احجي كلمة وكبيتي.
خيلاء : كلامك مثل السم..
اينار : لهذا السبب من نتمم زواجنا يحتاج اجيب وحدة وياج تذكرج باللي اسويه الظاهر عندج زهايمر مبكر عالجي روحج حبيبي.
خيلاء : لا تكول حبيبي لا تكول..
حجيتها وشمرت المزهرية بالكاع تفلشت..
اينار : خبال اي والله خبال الخبلج طلعي برا بسرعة اريد انام لأن اذا تخبلت راح اخليج تخنسين ..
تركته وطلعت برا لكيت تيام واكف كبال الباب متكتف وسديل واكفة تبجي..
خيلاء : لا تحجون شي وتزيدون ناري..
تيام جان مكتف ايده باوعلي وصفك ايد بأيد..
تيام : لا يابه ممنوع نحجي نبقى نعيش هاي المشاكل كل يوم شكو ورانا كاعدين ها اها..
حجاها وكعد على القنفة تربع وجر سديل كعدت بصفه ميل راسه وحجى بعيون ناعسة.
تيام: شنو مشكلتج ممكن احلها اني
خيلاء : ما تحلها ابن اخوك واحد جذاب وابو نسوان.
تيام : ابو نسوان صحيح بس جذاب لا كل حجاية حجاها صحيحة..
خيلاء : اي احرك كلبي بعد.
تيام : هو اني حجيت شي ايدتج ونفيت وين الخطأ لو لازم اسكت ؟
خيلاء : لا تحجي ولا تسكت..
تيام : هاي شلون ؟
خيلاء : اذا سألتك جاوبني ما سألت ابقى ساكت.
تيام : وبعد ماما تبدليلي حفاظتي؟
خيلاء : ادبسز ..
حجيتها وشمرت عليه الكوشة وصعدت فوك نمت بوحدة من الغرف حتى ما عرفت تابعة المن ويمكن حجالي تيام ونسيت ، الليل جان مثل السم بالكوة خلص بألف ونة وحسبة من طلع الصبح فاتتلي سديل وكعدت تسألني شنو صار كمت حضنتها وبجيت بحضنها بضعف بوهن بحركة..
سديل : شبيج حياتي؟
خيلاء : يكولي ما قربتها حتى ما ألوثها ومن سألته عني يكولي اساساً انتِ وسكت من شاف ملامحي تغيرت قصده اني ملوثة.
سديل : مو هيج قصده حجيت وياه الصبح يكول جان قصدي اكوللها انتِ اساساً قوية وتكدرين تحمين نفسج ومصدر قوتج هي قوة الية وعدا هذا الشي احبج الج ما حبيت صبا بس اكذب اذا كلت ما تمنيتها زوجتي بظروف احسن من هيج..
خيلاء : جذاب هذا جذاب لا تصدكين بيه ولج لو شايفته شلون يحجي عنهن .
سديل : عن منو ؟
خيلاء : عن صبا وسكرة ذايب بيهن ومستحيل ينساهم.
سديل : تحبيه ؟
خيلاء : ها ؟
سديل : همام تحبيه ؟
خيلاء : طبعاً لا
سديل : بصراحة نحجي.
خيلاء : كلتلج لا
سديل : اذا هيج معناها ماكو داعي لكل الحجي اللي حجيتيه وكل التصرفات الصارت تصرفات مستهترة لا تزعلين مني صح اني اصغر منج واصلاً صغيرة بالعمر بس افهم ..
خيلاء : يحبها لسكرة لوما خاينته وحاجية لسمعان عنه جان ما تركها ومبقيني وخال باله يم صبا وتريديني احبه شلون اتحمل كل هذا ومن غير هذني زوجته اللي لحد الآن ما اعرف شي عنها ولا اعرفها منو..
سديل : باعي سكرة عرفت قصتها كاملة من تيام ، تدرين من تزوجها همام وطلعها من الوادي وراد يرجع طلبت بأصرار ترجع وياه وما قبلت اي شغل تشتغله بعيد عنه رغم محاولاته وياها ورفضت تنفصل عنه لأن جانت تموت عليه قبلت تكون السيدة الثانية بالوادي وتشتغل شغلهم ولا تعوف همام وغير هذا جانت تغار عليه واجيتي انتِ شافت اهتمام همام تحول ألج طبعاً تغار وتبجي وتسوي مشاكل تدرين بتركيا بيوم اللي تخربطتي وجان يمج جانت واكفة يمي ترجف وتبجي تباوعلكم مصدومة وتكول اني مثلكم بنت ناس بس تخليت عن كلشي واختاريته ، وهو رجال بوسط هيج مكان وبنية جميلة وراقية وفوك هذا حلاله تريدين يتركها ويبتعد ؟ هذا منطق نحجي بيه لو نصدكه ؟
خيلاء احنا كلشي عشناه انفرض علينا ماعندنا خيار غير نتأقلم يا اما نعيش يومية وية وحوش شكل على الأقل تيام وهمام بيهم معدن زين وباقية عندهم شوية انسانية بس البرا ما نعرفهم شنو خوفي لا نتبطر على نعمتنا وتالي نوكع بيد وحوش مثل سمعان وغيره..
خيلاء : صحيح كلامج بس اني تعبانة نفسياً وجسدياً واصلاً ما اعرف شنو اريد كاعد اعيش تخبطات فضيعة كل يوم بمشاعر شكل.
سديل : حقج بس اقبلي بالمقسوم وتمسكي بالأيد اللي انمدتلج نصيحة من اخت تصغرج بثلاث سنوات ..
خيلاء : حيل كل اللي عشتيه وانتِ مواليد ٩٦ مو صغيرة بعدج ؟
سديل : وانتِ على اساس من كبرج شكد اكبر مني ؟ سنتين لو ثلاثة؟
خيلاء : ثلاثة سنوات اكبر منج اني ونهيل اكبر مني بثلاثة سنوات..
سديل : ٩٠ ٩٣ ٩٦ ثلاث سنوات بين وحدة والثانية.
خيلاء : قصتنا مال بنات كبار محد يصدك اذا حجينا قصتنا بصغرنا وعشنا هاي المعاناة والله يعلم شنو نشوف بعد...
بعد مرور شهرين ....
كل حياتنا مرت كما هي نفس الاحداث والتكرار وبين المراكز والمحاكم يومياً دعوة يومياً قضية يومياً شهود الى ان تمت تبرئتنا اني وهمام وتيام من كل الجرائم المنسوبة بالأدلة ...
ارتاحينا نوعاً ما ، آخر حديث وية همام جان بيوم الزعلت بيه وبعد ما حجينا ولا صار تقارب من اي ناحية سوى كلام خفيف واسئلة ، بنتي يم امه اروحلها كل فترة مدة ساعة او اثنين و ارجع ، لكيتها متأقلمة وية الوضع متوفرلها كلشي وقمر حبابة وحنينة عليها ، قمر اخت تيام يعني عمة اينار الصغيرة وهاي قصتها قصة نرويها بيوم من الأيام تتابع لقصة اختها الكبرى..
من بعد هاي الاحداث والتفاصيل المختصرة رغم معاناتها وخوفها وقلقها بس خلصت ، كعدت الصبح على صوت سديل وهي تصرخ ركضت لغرفتها لكيتها نايمة وتنزف دم ، تخبلت كلبتها عبالي احد ضاربها او معتدين عليها اصرخ شبيج ولج احجي شبيج ، لزمت بطنها وبجت صدمتني من كالت..
سديل : طفلي راح طفلي اخذيني للمستشفى وديني ما اريده يموت اريده يعيش حبابة.
خيلاء : طفل شنو طفل ؟
حجيتها مستغربة لأن هي حجتلي وأكدت علية ماعندها اي علاقة بتيام ومجرد ينامون بنفس الغرفة بس هي بمكان وهو بمكان وجانت حيل متحفظة على علاقتهم حتى من يأذيها او يضربها ما تحجي بس جنت اشوف اكو آثار واسألها تنكر ، وهم جنت اشوف هواي اكو لحظات حلوة واهتمام بينهم سواء منه او منها..
تركتها ورحت اتصلت بتيام ، وفرولنا موبايلات حديثة الية ولسديل لأن كاموا يشتغلون بمحافظات بعيدة عن البيت وحتى من نحتاجهم او نحتاج شي نتصل بيهم ، جاوبني حجيتله بدون مقدمات مثلما تفاجأت فاجئته مو بقصد خباثة بس اني مصدومة شلون اخفف عنه صدمته ، المهم بلغني راح يتصل على اسعاف تجي للبيت تاخذها واروح وياها للمستشفى بينما يلحكنا ، وبالفعل بعد ربع ساعة جنت كاعدة يم سديل وافرك بجسمها لان يوجعها واحاول اخفف عنها واطمأنها ، اندك جرس الباب لبست وطلعت لكيت سيارة الاسعاف بالباب فتحتلهم ودخلوا اخذوها ورحت وياهم من وصلنا وشخصوا الحالة كالوا تحتاج كورتاج ومنتظرين زوجها يوصل حتى يوقع ، رحت حجيت وياهم حتى اوقع بدلاً عنه رفضوا تخبلت تعاركت وياهم..
خيلاء : واترك اختي ياخذها النزيف بعد ستة ساعات زين اذا وصلوا بمحافظة بعيدة عن هنا ..
مني حجاية منهم حجاية اقتنعوا واني وقعت على عمليتها ودخلت ، من طلعت وطمأنيت عليها كنبصت كبال باب غرفتها وارتاجيت على الحايط مهدودة كل تعب الدنيا بية ، الى ان وصلوا تيام وهمام سألوني عن اللي صار حجيتلهم مختصر لأن جنت تعبانة ، من صار وقت يسمحولنا نشوفها دخل تيام وبعده بربع ساعة اني دخلت ، جان متأذي كلش وباجي يمها وسألت عن سبب الاجهاض كالت النبض ضعيف وهو حملي اصلاً ضعيف ومتوقعة يوكع بس جانت متأملة خير ..
انتظرناها تعافت شوية وسوينا اجراءات الخروج وطلعنا احنا وبالطريق اجى اتصال غريب وترنا وغير مزاجنا نحو الاسوء برغم السوء الأحنا بيه..
اينار : الو نعم منو وياي ؟
لهناك والتفت ناحية تيام الثاني غمزله بمعنى منو ؟ همسله بأسم سمعان طلب منه يفتح سبيكر فتحه وصف السيارة وقربه من اذنهم..
سمعان : تسمعني مو؟ اذا اي اسمع للأخير يلا تغلق المكالمة
اينار : شرايد ؟
سمعان : همام معركتنا ما انتهت ، ألنا شوط ثاني ورجوعنا راح يكون اقوى...
اينار : واحنا بالأنتظار .
حجاها وغلقه بعدها انطلق بينا للبيت رغم جان عصبي ومزاجه سيء بس ما بينها كدامنا ، دخلنا للبيت وبهاي الفترة اهتميت بسديل شغلي الشاغل سديل وبس اهتم بيها واراعيها ومن يجي همام بعطلة الأسبوع اروح اشوف تينا ، كلشي جان تمام بس همام صار يبتعد قدر الأمكان عن البيت وحتى بنزلته يدز تيام بدلاً عنه بحجة سديل مريضة ومحتاجته ..
ماعرفت شنو نوع شغلهم و وين وبأي محافظة بس شكوكي يكون ببغداد وعند الله العلم.
الوادي انهار بالكامل ما بقى منه غير بنايته فقط ، الرؤوس الكبيرة انهزمت خارج البلد والصغار بيهم اللي مات واللي انسجن واكو بنات سمعت عنهم انتحروا
سكوت ثروان قلقني مو من عاداته يسكت عن حقه ، بس جنت منتظرة منه دكة ناقصة وبالفعل صارت ...
بيوم من الأيام اجاني همام تعبان ومخبوص طلب مني البس واروح وياه لبغداد شنو شكو ما حجالي من بدلت وطلعنا بالطريق بدأ يحجيلي..
اينار : ثروان رافع قضية ضدج
خيلاء : ضدي اني ؟
اينار : اي
خيلاء : قضية شنو؟
اينار : اسقاط حضانة
خيلاء : اسقاط حضانة ؟ انت مو كلت دزيت عليه جماعة وعرضوا عليه شوية من وساخته وسحب دعوة الخطف الجان رافعها ضدنا؟
اينار : صحيح بس هذا ثعلب أمن نفسه بطريقة ما وعرف شغلي صار نظيف والدولة عيونها علية اقل غلطة اقل زلة اروح بيها لهذا رفع دعوة قانونية اصولية
خيلاء : ويريد ياخذ الطفلة بأي حق وهي من حق الأم حضانتها
اينار : بالدعوة مكتوب غير صالحة للتربية وغير كفوئة وهواي اشياء ذاكرها
خيلاء : وراح ياخذ بنتي مني ؟
اينار : اكيد لا ، بس لا تسبقين الأحداث وخلينا نفكر بتأني ونرجعله الضربة بألف.
خيلاء : بنتي هاي همام بنتي تعرف شنو يعني ضنى ما اكدر اجازف بيه ولا انتظر ولا اتحمل مفاوضات.
اينار : اعرف بس اصبري ما كلتلج نتفاوض خلينا نفكر هسه اخذج لمحامية شاطرة تلزم الدعوة وراح تساعدنا هواي..
هزيت راسي ساكتة بس داخلي يغلي لدرجة حسيت روحي راح تغادرني..
وصلنا يمها وحجالها ظروفي بس مو كلها ونوه الها عن رتبة ثروان بالبداية رفضت تلزم القضية بس همام اقنعها و وافقت
طلعنا صعدنا السيارة التفت علية وكال
اينار : كلشي بالهدوء ينحل اصبري لا تستعجلين بأصدار الحكم من هسه احتمال جبير تكون الحضانة الج..
التفتت عليه وكعدت صفح والدموع متجمعة بعيوني منتظرة اشارة مني حتى تهل بغزارة..
خيلاء : يعني اكو احتمال ممكن ياخذها مني ؟
اينار : نكون اكبر اغبياء اذا فكرنا بأحتمال واحد بهيج راح نأمن وما نشتغل صح ننام وراسنا بارد بس اذا خلينا احتمال ولو واحد بالمية ممكن ياخذ الطفلة بهيج حالة راح نحفر الأرض ونطلع ادلة تدينه ونسحب الطفلة.
خيلاء : بس الادلة اللي عنده اقوى همام لاتنسى اني جنت اشتغل بملهى ليلي يعني سمعتي بالطين.
اينار : ولا تنسين اسمج هناك سولافي مستعار يعني مو خيلاء اياد وين دليله جنتي تشتغلين هناك ؟ ها وين الدليل ؟
خيلاء : بس هذا يكدر كلشي يسوي مكار يعني مو صعبة عليه يزور عقود ويجيب شهود زور على اساس شايفيني او طالعة وياهم.
اينار : حبيبتي اكو قانون الدولة مو هيج كلمن أله صح اكو فساد بس عندنا قضاء عادل ما يمشي ورا حجي فلان وعلان مو كلشي نسمعه نصدك بيه ، لا كل القضاة مثل قاضي عواد ولا كل المنتسبين بالسلك العسكري مثل ثروان بيهم الشريف وضميره حي وبيهم باع اهله وضمير وشرفه ماكو شي سواسية لو اكو جان اصابعج تساوت وحكم النار بالآخرة انتهى والكل يروح للجنة ..
خيلاء : بس هم ابقى خايفة منه.
اينار : الله موجود ما راح يحرك كلبج بضناج اطمأني.
خيلاء : يارب يارب يارب يارب يارب يارب
بقيت ارددها بخوف ، مرت اليومين على اعصابي جنت منهارة وخايفة ، اخذني همام لبنتي بالليل كعدت يمها حضنتها ولعبت وياها ما حسستها بكلشي ورجعت ، ثاني يوم رحنا للمحكمة جانت ببغداد اخذنا المحامية ورحنا اني وهمام وتيام والمحامية مالتي ، لكيناه هناك هو وحمايته تارسين المكان ، لابسين قوط واسلحة رغم اللي اعرفه ممنوع سلاح يفوت للمحكمة بس ما اعرف شلون فايتين بيه .
انتظرنا صاحوا اسمائنا قبل لا ندخل لزمت ايد همام عصرتها وعيوني لا ارادياً تجي على ثروان من الخوف ، جان يباوعلي وعيونه كلها شر نظراته نزلت على ايدينا ورجع يباوعلي ويهز راسه متحلف ، انتبه همام على الوضع سحب وجهي وطلب مني اركز نظراتي بعيونه وكال..
همام : فوتي لا تخافين وصيري قوية نكري كلشي منسوب وبيه مضرة الج ولبنتج
خيلاء : بس هو موجود عبالي بس المحامي مالته واني اخاف منه
همام : واذا موجود ؟ اني هم موجود يمج وتذكري كل شدة وكعتي بيها جنت بظهرج واطلعج منها ادخلي حبيبتي اني سندج من بعد رب العالمين وحاميج واقلع عيونه اذا باوعلج مو يأذيج ، وتينا راح تكون الج وعد رجال
بعدها تقرب وهمس بإذني ..
اينار : اذا كسب الحضانة ننتقل للخطة باء
باوعتله بنظرات خايفة وهمست.
خيلاء : تقتله ؟
اينار : لا ناخذها ونطلع تهريب ولا اخليه يتهنى بأبوته ويحرمج من امومتج..
لهناك وصاحوا اسمي بصوت اعلى
_ خيلاء اياد خيلاء اياد..
رجعت التفتت على همام ولزمت ايده.
خيلاء : همام شوف الدولة كلها وياه شلون ؟
اينار : واني وياج مو كافي ؟
سحبت نفس قوي وتنهدت..
خيلاء : والنعم منك والنعم ادعيلي.
ابتسم حتى يلطف الجو وكال.
اينار : هاي اذا توصل خاف هالمرة يصير العكس ادعي انتِ وراح يستجاب دعائج لأنج ام..
هزيت راسي وفتت بخطوات ثابتة ورزنة وبثقة مثلما علمني هو ، القاعة جانت هدوء وبس صوت كعب خطواتي ينسمع وصلت يم محاميتي لكيتها تحجي وتقدم دلائل بس الحجي اللي حجاه ثروان قوة موقفه وضعف موقفنا ، حجى كلشي عن الوادي وشنو جنت اشتغل هناك وألمن تزوجت وتينا مخطوفة والخ..، طلب القاضي يجيب ادلة وشهود والقضية تأجلت ليوم ثاني بتاريخ آخر ...
طلعنا وكلي احباط باوعت لهمام جان مكتف ايده شافني سرع خطواته ناحيتي وراه تيام يمشي ، وصلوا يمنا افتهموا كلشي من المحامية ، طلبوا منها نجتمع بمكان معين ورحنا هي بسيارتها واني وهمام وتيام بسيارتنا وصلنا قبلها انتظرناها لحدما اجتي نزلنا من السيارة ودخلنا لمطعم اول ما كعدنا همام كال..
اينار : كلشي حجاه ماعنده بيه دليل ونكدر نكلب القضية ضده بتهمة تضليل الحقائق وايهام القاضي بأساليب رخيصة.
_ بس راح يطلب منا ادلة نثبت هذا الشي
همام : نكدر نثبت اشياء تعاكس كلامه
_ شلون ؟
همام : اول شي نجيب شهود على شغل خيلاء بأن هي لازمة معمل خياطة وهي مسؤولة عليه واجيب اوراق كاملة تثبت هذا الشي وبدل اسم صاحبة المصنع اخلي اسم خيلاء .
_ ومنو يكول صاحبة المصنع راح توافق على هذا الشي ؟
اينار : غير هو بإسمي واني اديره بمجموعة من البنات
_ لازم نروح فوراً حتى نضبط كلشي وياهم.
اينار : نروح ماعندي شي وغير هذا اجيب شخصية وهمية تدعي هي سولافي حتى ابعد الشك عن خيلاء وهي تتقمص الدور بالكامل ، وغير هذا تكدرين تحجين بعدة جرائم هو مسويها اني انطيج ادلة تدينه وحتى رشاوي ماخذ من ناس حتى يمشيلهم معاملات بدوائر مختلفة رغم مو شغله بس عنده معارف بيها ، كلها وصولات واشياء اصولية تدينه ، تكدرين بالنهاية تكولين هو غير مؤهل لتربية الطفلة وعدا هذا دائماً مشغول..
_ اسباب قوية ممكن حتى ينسجن ويتوقف عن العمل مو فقط تسقط عنه الحضانة.
اينار : هو اريد انهيه وانهي مستقبله المهني لأن مو كفوء .
_ ماشي متفقين هسه اول خطوة نتحرك ونروح للمصنع نكمل اوراق خيلاء حتى نثبت هي تشتغل هناك واي كاميرات لازم تختفي حتى اذا طلبوا تسجيلات تثبت بأن هي تشتغل هناك كل يوم نكول ماعندنا لأن ما نحتاجها هو مجرد مصنع للخياطة
اينار : هذا هو متفقين ...
طلعنا بسيارة وحدة اني والمحامية ليورا وهمام وتيام ليكدام ، مشت بينا السيارة وصلنا لمكان من شفته صار انقباض بمعدتي وين هذا المكان رجعنا لأي ذكريات سيئة بقيت اباوع للمكان وارجع اباوع لهمام بالمرايا ويتفادى نظراتي ، عرف بشنو كاعد افكر نزلوا بقيت اني فتح الباب مدلي ايده اخذ كفي سحبتها منه بنترة .
خيلاء : اني اكدر انزل ...
مشينا لداخل هذا المصنع ما اعرف معمل ، هذا المكان عشت بيه اسوء ايام حياتي جنت اشتغل بيه كله بالمجان ، تعبت وانهنت واعصابي تلفت ، اول ما فتت شفتها بوجهي جانت مبتسمة لهمام من شافتني غابت ابتسامتها عن وجهها ، تفادت نظراتي ورحبت بيهم مرتبكة ، تركوني ومشوا وبقيت اترنح بأفكاري وانبش بالماضي الأليم القريب ، شنو عشت وشنو شفت هنا من معاناة معقولة هذا همام أله ايد بجيتي لهنا وهو جان يوجهها اذا صدك تكون النهاية بيني وبينه...
حجوا وياها واتفقوا واجاني جايب ورقة بدون ما يحط عيونه بعيوني طلب مني ابصم واوقع ، بصمت ووقعت وطلعنا ، راجعين للأنبار بالطريق من التعب نمت فتحت عيوني من وصلنا للبيت حتى ما ادري من نازلة المحامية ، نزلت ودخلت كبل لغرفتي ماحجيت وية احد حتى سديل تفاديتها اريد تخلص المحكمة واكسب حضانة بنتي واحاسبه على وحدة وحدة ، هسه المهم عندي تينا..
مشت الأيام قبل المحكمة بهدوء وبدون ما انطق كلمة وحدة وياهم ، اذا الموضوع يخص تينا احجي على كد الجواب واذا ما يخصها ابقى ساكتة...
الى ان اجى الموعد ، وقدمنا ادلتنا وثروان ماعنده ادلة غير بس شهود ، اقتنع القاضي بحجي محاميتي والأدلة مالتنا جانت كافية خصوصاً فقرة تضليل المحكمة وايهامهم بالأكاذيب..
بلغونا بموعد اصدار الحكم ، جانت بعد ثلاث ايام من موعد الجلسة الثانية او المرافعة ..
صدر القرار وكسبت الحضانة لبنتي واعتقلوا ثروان بالتهم الموجهة ضده..
رجعنا للبيت من بعد طريق ستة ساعات ، لكيت محضرين مفاجئة مسوين مثل حفلة صغيرة كيك ونفاخ وجايبين هدايا لتينا ، دخلت كعدت ما حجيت وية اي احد بس سألت سديل.
خيلاء : هاي منو مسويها ؟
سديل : فكرة همام واني وتيام سوينا كلشي قبل لا تجون
هزيت راسي ساكتة ، لهناك وانفتح الباب دخلت تينا تركض لحضني اخذتها شميتها وبوستها ضميتها بكل قوتي ، دخلوا همام وتيام باركولي واخذوا تينا مني حضنونا واحتفلنا بيها ، بس للأسف فرحتي ناقصة ، ناقصة تفاصيل هواي واحداث مبهمة اريد افهمها..
بعد الحفلة نامت تينا وسديل وتيام فاتوا لغرفتهم اجى وكعد كبالي لزم ايدي سحبتها منه..
اينار : حقج علية بس ماعرفت اللي عشتيه صدكيني ردت اخليكم بهذا المكان أأمن عليكم بينما اتخلص من ثروان.
نترت بيه بعصبية..
خيلاء : وانت شعرفك اني مهزومة وشعرفك بثروان وبحياتي انت شنو سويت فهمني منو طيبة منو هذا الولد اللي وداني اني واختي لمركز التجميل منو المرية الكبيرة اللي بسببها انطردنا حتى نروح نشتغل بكوفي وتجون تاخذونا احجيلي كلشي راح اتخبل تعبت عقلي راح يوكف حرام عليك احجيلي..
اينار : احجيلج بس على كيفج ما اريدج تتعبين ولا اعصابج تنهار..
خيلاء : ليش انت بقيت عندي اعصاب بقيت عندي حيل انت دمرتني بدون ما تحس على نفسك.
اينار : بالعكس اني نقذتج لولا دخولج للوادي ..
خيلاء : شلون وصلت للوادي سولفلي فهمني اني غبية فهمني
اينار : مبدئياً اريد اكولج على شي واستوعبيه حتى تفهمين كل كلامي.
خيلاء : احجي ما راح اسمع وانصدم اكثر من اللي سمعته..
اينار : ثروان نعرفه من زمان بس هو ما يعرفنا..
خيلاء : شلون تعرفوه يعني ما فهمت ؟
اينار : ثروان واحد وسخ ويشتغل بالتزوير والمعاملات تحت الطاولة ، عواد علاقته قوية بيه وبيوم من الأيام انعزموا بمزرعة وحدة وتعرفوا على بعض تعرفين بعد قاضي والثاني بالحكومة يعني متراهمين.
خيلاء : زين كمل..
اينار : هذا ثروان جان يسهل شغلات لعواد وبالمقابل من توصل قضايا لعواد تخص اشخاص راجعين لثروان هو يسهلها ألهم واذا متهمين يبرأهم من يصعدون محكمة..
خيلاء : واني شنو من كل هذا.
اينار : الحلقة المفقودة اللي ما فهمتها ابوج شنو علاقته بعمي عواد وليش دزه لثروان حتى يساعده هاي اللي ما فهمتها وما توصلت لدليل لحد هسه.
خيلاء : يعني مو تعارفهم صدفة ؟
اينار : ابداً مو صدفة عواد عرفهم على بعض بس ليش وشلون ما اعرف ..
خيلاء : زين واني تزوجت ثروان انت شجابك علية وشلون عرفت اني انهزمت..
اينار : اني خططت لهزيمتج بهذاك اليوم وجنت وياج بكل لحظة
خيلاء : شلون يعني ما فهمت لا تخبلني ، يعني سديل متفقة وياك علية لو شنو ؟
لزمت راسي حسيته يريد ينفجر سحب ايدي وحظنهم بين كفوفه ..
اينار : اسمعيني اني اعرف كلشي عنكم من يوم امج اشتغلت يمنا وبدأت تأذي امي كمت اتحرى عن واحد واحد وجمعت معلومات كافية ، وبقيت مراقب الوضع ، الى ان حبيتج ودخلتي گلبي هنا بديت اراقبج انتِ وسديل حتى احافظ عليج واخليج قريبة مني وبعدين يقدر الله ما يشاء
جنت اسمع وايدي ترجف جسمي يرجف شفايفي كذلك مصدومة وما اتحمل اسمع اكثر بس اريد اعرف كل الحقائق..
اينار : من سمعت تزوجتي ثروان تخبلت اعرفه كلب وراح يأذيج ردت اخلصج منه ومن عيشتج هناك ، واعرف كلش زين زوج سديل مو خوش آدمي وعنده سوابق بالجرائم والحشيش لهذا خطفته وهددته طلبت منه يطفش سديل بطريقة يحسسها بخطورة الرجعة لبيتهم ، ولعبها صح واجتج وانتِ انهزمتي وياها لأن اعرفج ما راح تعوفيها وحدها من شدة حبج وخوفج عليها
خيلاء : والتوقيت جان مناسب البيت هوسة وعندنا حفلة والهروب سهل بوسط الضجيج
اينار : اتفقت وياه على هذا اليوم واعرف عندكم مناسبة وهروبج راح يكون اسهل بهيج وضع..
خيلاء : وشلون عرفت هيج معلومات دقيقة؟
اينار : لو تركزين اكثر وتعصرين دماغج راح تتذكرين وجه عواد لأن جان معزوم بالحفلة ، والدعوة اجتي للبيت وعرفت اني ..
خيلاء : وابو التكسي هم انت تعرفه ؟ اللي اخذنا للفندق؟
اينار : لا هذا ما اعرفه ، بس من اخذ منج تينا وما بعده اني جنت حاط ايدي على كلشي .
خيلاء : شلون يعني؟
اينار : يعني من اشتغلتوا بالمعمل مال الخياطة و الولد اللي اجاكم على اساس شمر رقم لسديل واخذكم للكوافيرة للمرأة الكبيرة اللي طردتكم لطيبة للكوفي كله جنت مخططله..
خيلاء : زين مو على اساس جنت غايب اربع سنوات يلا رجعت للوادي شلون جنت مراقبنا ؟
اينار : غبت عن الوادي بس ما غبت عن الحياة لان جنت متصوب ومطلوب بتهمة انحلت يلا رجعت.
خيلاء : وبسببك اني واختي دخلنا الوادي بسببك اختي اغتصبت مرتين من عواد.
اينار : لا مو بسببي ، مخططي جان على اساس شخص يدخل للكوفي ويتهمكم بايكين وابو الكوفي يخيركم يا اما يجيب الشرطة يا اما تنطردون بدون راتب وترجعون السرقة اللي اخذتوها ، وبأثناء الحجي الولد يتنازل عنكم بس تنطردون بهاي الاثناء راح تكون سيارتنا جاهزة ناخذكم بيها واطلعكم تهريب خارج البلد وابالي اجيبلج تينا هم جنت ناوي اخطفها واجمعج بيها بس اللي خرب كل هذا المخطط عواد من اجى للكوفي واخذكم وجابكم للوادي بدون علمي اني انصدمت بالوضع حالي حالج ..
خيلاء : وعواد شلون عرف وليش جابنا للوادي ؟
اينار : عواد علاقته قوية بثروان والأخير جان يعرف كل دكة وركصة تسويها انتِ واختج ويندل اماكنكم وبلغ عواد بمكانكم الأخير ، وليش جابكم للوادي لأن هو من زمان بباله سديل من اول مرة اجتي لبيتنا وجانت صغيرة كلش..
خيلاء : انت كلت صغيرة شلون يطمع بيها ؟
اينار : عواد يطمع بالبنات الصغار ويحب الاعمار المراهقة ما تهويه الناضجة عرفتي سبب دخولكم للوادي شنو ؟
هزيت راسي ساكتة.
اينار : المهم اجيت احجيلج بموضوع واتمنى ما تصديني.
خيلاء : خلي اتقبل الحجيته قبل شوية وبعدين احجيلي موضوع ثاني اسلب راحتي بيه.
اينار : اريد اخذج ونسافر.
خيلاء : هيج خبط لزك تاخذني ونسافر ، وين بلة ؟
اينار : رحلة علاج عندي مرض وضروري اتعالج منه واريدج قريبة مني حتى اذا تعالجت استجيب للعلاج القلق والتوتر مو بصالحي..
خيلاء : آسفة ما اكدر اسافر اعذرني
اينار : ليش ؟
خيلاء : عندك زوجة اخذها وروح تعالج اني ما افيدك ..
اينار : انتِ هم زوجتي..
خيلاء : جنت واليوم لو باجر ينتهي كلشي
اينار : بكيفج مو ؟
خيلاء : صدك زوجتك ما كلتلي منو ؟ هيج تخاف عليها ؟
اينار : مو ضروري تعرفين
خيلاء : خلص انت ما تريدني اعرف شي عن ماضيك بالبيت الكبير ولا تريد تحجيلي عن زوجتك وابنك معناها خلص كلمن يروح بطريقه..
اينار : ماشي كلمن يروح بطريقه بس خلي ببالج شغلة وحدة بس ( همام وما بعده الطوفان )
خيلاء : بمعنى ؟
اينار : ما تحبين ولا تتزوجين غيري
خيلاء : لا تخاف طلعتوا كلكم من عيني محد راح يستهويني وياخذ گلبي اريد اعيش لنفسي وبنتي واختي..
تركني وطلع ركع الابواب بقوة وطلع صوت عالي ، جان عصبي ومستعد يحرك كلشي بس ما سوى اكثر من هذا التصرف...
مشت الايام وبنتي بحضني وما احلى هذا الشعور خصوصاً من عرفت ثروان بالسجن وخلصنا منه ، رجعنا لبغداد اخذنا بيت كبير طابقين الطابق الأرضي لتيام وسديل والطابق العلوي اني وتينا بيه ، همام ماعرفت اذا سافر او لا ، لا اني سألت ولا تيام حجالي عنه ومشت حياتنا عادية ، اكلنا سوية وكعدتنا سوية بس من اريد انام اصعد فوك لو من يرجع تيام من الشغل اتركهم براحتهم ، ماعرفت شي عن علاقة سديل وتيام جانت تتجنب تحجيلي واني ما جنت اتدخل هواي وياها بس حسيتها مرتاحة وتميله هواي..
بيوم جنت كاعدة واجاني مسج من رقم غريب على الواتساب فتحته وقريت مكتوب..
( رجلٌ وما استسلمْتُ قَبْلُ لفارسٍ
مالي أمام عيونها مستسلِمُ !؟
أأعودُ منتصِراً بكل معاركي
وأمام عَيْنيها البريئة أُهْزَمُ !؟
أنا شاعرٌ ما أسعفتْه حروفهُ
الحبُّ من لغة المشاعر أعظمُ
لي ألف بيتٍ بالفصيح أجدْتُها
لكنني في حبها أتلعثمُ)
اشتاقيتلج كافي عاد البعد مؤذي اعرف ما راح تحسين بية بس صدكيني تعبان بدونج..
ماجاوبت المسج هملته ، بعد يومين جنا كاعدين بالهول ونلعب اني وتينا بالمكعبات وسديل تشرب جاي اندك الباب ردت افتحه اشرت بأيدها وكالت..
سديل : خليج اني افتحه ..
رجعت كعدت ، تأخرت لعب گلبي صحت
خيلاء : سديل منو بالباب
ما سمعت جواب تركت المكعبات من ايدي وكمت ولكيته كبالي ابتسم وطلع باقة ورد من ورا ظهره قدمها وكال..
اينار : ما راح تاخذيها من ايدي ولا تكولين تفضل؟
اخذتها منه وخليتها على الطبلة فاتت سديل اخذت تينا وتركتنا وحدنا ، اشرتله يكعد واني هم كعدت، فرك كف بكف وكال..
اينار : اجيت للمرة الأخيرة اسألج وبعدها ما راح تشوفيني بس تهديدي يبقى قائم محد يلمسج من بعدي..
رفعت راسي باوعتله وحجيت..
خيلاء : شنو تسألني ؟
اينار : تريدين تعيشين وياية ونكمل حياتنا لو لا ؟
خيلاء : بدون تفكير لا ، ولا تسألني ليش لأن تعرف الجواب لا تخليني انبش الحاضر والماضي سوة..
اينار : ضروري اعرف ليش ؟ اتصور من حقي
خيلاء : علاقة توكسيك من الخطر اكمل بيها.
اينار : ها توكسيك ، يعني علاقتنا سامة ومضرة ومؤذية مو ؟
خيلاء : بالضبط علاقة مو مريحة ليش اكمل بيها ؟
اينار : وفد مرة كولي اني شخص توكسيك سام واسبب الأذى للأحبهم..
خيلاء : زوجتك اذا سمعت بيك متزوج عليها هاي مو أذية يا استاذ همام ؟ راح تكون علاقتكم مريحة ؟
اينار : هم رجعت عليها هم رجعت..
خيلاء : طبعاً لأن احنا الثلاث مرتبطين بنفس العلاقة اني وانت وهي واني ما اقبل على نفسي اكون طرف ثالث يدمر بيت سواء جان مستقر او لا..
اينار : شنو افهم من كلامج ؟
خيلاء : طلكني همام
تنهد وبعد وقت ببحة صوت كال..
اينار : صعب ما اكدر وبنفس الوقت كرامتي ما هاينة علية ادوس عليها اكثر..
بلعت ريك وتفاديت عيونه جانت تشرح عن حبه ومدى تأثره واذيته اذا اتخذ هيج قرار..
خيلاء : طلكني همام وراح احتفظ بكل ذكرى حلوة منك واحاول اسامحك على اللي صار .
اينار : خليني اخذج وياية واتركج من هذا الكلام كافي عاد تعبتيني
خيلاء : احنا بحياة واقعية مو بداخل روايات يا همام حتى تنتهي بأحداث سعيدة وينجمع البطل وية بطلته تحت سقف واحد روح الله وياك ومبري الذمة وتأكد ابقى وياك على تواصل لحدما نعرف سبب مرضك شنو وتشافيت منه ..
اينار : واذا جنتي انتِ سبب هذا المرض وسبب علتي وعلاجي يمج وحدج تبخلين علية بالعلاج ؟
خيلاء : اعذرني ما راح اكدر اكمل..
اينار : وما اذل نفسي اكثر من هيج ، خيلاء انتِ طالق..
نطقها وطلع دخلت سديل تبجي وتعاتبني ، نزلت دموعي ..
سديل : قسيتي عليه هواي وهمام حباب ما يستاهل.
خيلاء : اريد ارتاح وافكر زين واخذ قرار صح مو صحيح ابقى مرتبطة بيه وعلاقتنا انبنت على اساس كذب وبمكان سيء وكلشي شفته يمرض وكفيل بأن يخليني انهي هيج علاقة ، الله يسعدج وية تيام واتركوني بحالي.
اخذت باقة الورد ودخلت غرفتي شميتها وبجيت بنحيب كأنما انتهت الدنيا ، كلشي حجيته من ورا گلبي بس ما اعرف اذا السويته صح لو خطأ..
لكيت كارت بوسط الباقة اخذته فتحته وقريت المكتوب بيه..
( عشرون عامًا فوق درب الهوى
ولا يزال الدرب مجهولًا
فمرة كنت أنا قاتلًا
وأكثر المرات مقتول
عشرون عاماً يا كتاب الهوى
ولم أزل في الصفحة الأولى)
أين أذهب بكِ؟
أين أخفيكِ؟
والناس يرونك في إشارات يدي
في نبرة صوتي
في إيقاع خطواتي
الناس يرونك قطرة َ مطر على معطفي
يا ليتكِ تعي....
رفعت راسي وغمضت عيوني اتذكر كل لحظة مرت بينا...
ومن منعطف آخر بمكان آخر ظهرت شخصية ناقمة مليئة بمفاتيح لأسرار باتت شبه مستحيل حل لغزها ...
بيوم الخميس الساعة السادسة مساءاً هربت من البيت قاصدة مكتب ثروان، هو الدليل الوحيد اللي يوصلني لخيلاء وسديل ،
ثروان شخص مقرب جداً من شاهين بأعتبارهم عدايل وبنفس الوقت شغلهم سوية...
رحتله للمكتب كالوا ماخذ اجازة تلكيه بالبيت رحت للبيت وطلبت اقابله ، اخذوا اسمي وبعد دقائق رجعوا فتحوا الباب ودخلوني عليه جان كاعد بالمكتب مالته ، سلمت وكعدت..
نهيل : شلونك ثروان ؟
ابتسم وكال.
ثروان : جيتج وية تبرأتي جاية تباركيلي ؟
نهيل : سمعت بيك انحبست ومساعي شاهين ما راحت هدر سوت شغل وطلعت مبروك.
ثروان : الله يبارك بيج.
نهيل : صار وقت ترد هذا الجميل اذا مو لشاهين الية .
ثروان : وشلون اردلج الجميل ؟
نهيل : تنطيني عناوين اخواتي اريد اتواصل وياهم اروحلهم ما اعرف المهم شي يدليني عليهم.
ثروان : تريدين تشوفين اخواتج ؟
نهيل : نعم .
ثروان : بمقابل اكيد ؟
نهيل : طبعاً هذا المتوقع راح تطلب مقابل لهاي الخدمة ما معقول تسوي شي لله .
ثروان : الحياة هيج منافع متبادلة.
نهيل : صحيح
ثروان : اريد تينا مقابل عناوين اخواتج
نهيل : يعني تندل اماكنهم؟
ثروان : طبعاً
نهيل : ماشي اعتبر الشي اللي ردته بين ايديك بس وصلني ألهم..
خيلاء : وانتِ شلون توافقيه على هيج شي ؟ شلون ؟
نهيل : هيج هيج هو راح ياخذها منج ويندل مكانكم سايرته حتى اندلكم لو ابقى تايهة طول العمر.
سديل : وليش اجيتي اساساً انتِ ميتة بالنسبة ألنا.
نهيل : لا تصدرون حكم مسبق مثل ما انظلمتوا اني انظلمت
سديل : بس انتِ بعتينا ألهم..
نهيل : اذا ما سمعتوا مني ما راح اكدر اتفاهم وياكم وافهمكم بكلشي..
خيلاء : ما بينا اي تفاهم عذريني ..
لهناك واندك الباب صرخت بخوف وحضنت بنتي
خيلاء : هذا ثروان اجى حتى ياخذ بنتي متفقة انتِ وياه مو ؟
حجيتها وركضنا فوك باوعنا من البالكون فعلاً هو وجايب وياه حرس سادين الشارع ، اتصلنا بتيام وبلغناه ..
تيام : اكو باب خلفية من بيت خيلاء بالغرفة الأخيرة احسبوا عشرة دقائق و اطلعوا للشارع الخلفي تلكون سيارتي منتظرتكم..
خيلاء : ماشي ماشي بس لا تتأخر..
اباوع للساعة بدل العشر دقائق صارت عشرة سنوات..
سديل : وين شاهين عنج شعجب سمحلج تجين؟
نهيل : انهزم من عرف بالوادي انهار والروس الكبار هربت ، اخذ ابني وراح لهذا السبب تحررت وبديت ادور عليكم
بنات الوادي عبارة عن لعبة خطرة لا عبالكم انتهت..
قاطعتها ...
خيلاء : يلا صارت عشر دقائق اطلعوا.
نزلنا الدرج نركض ما جنت ادري اكو مخرج من بيتي جنت اذا اريد اطلع من الباب المشترك بيني وبين سديل ، طلع عندي مخرج بس من الخلف يطل على شارع عام خلفي..
اول ما فتحنا الباب وطلعنا صار ثروان بوجهنا....
بقى حجي نهيل يتردد بأذني الوادي لعبة خطرة وهاي اللعبة ما انتهت...
نلتقي بالجزء الثاني من وادي الزعيم..
غبار الذهب راح تكشفلنا هواي حقائق غابت عنا بهذا الجزء..
تمت بحمد الله