مهند:و قتلو؟
وعد:مفروض .. انو سالم يكون ميت
مهند:حاسه ب انتصار؟يعني شنو الأتغير بعد مات؟
وعد:صدقني شعور انك تاخذ حياه زول عشان عذبك سنين .. شعور لا يوصف .. انت ماف انسان نفسك تنتقم منو؟لانو اخذ سعادتك .. لانو خلاك تحس ب احاسيس سيئه .. اكيد في ..
مهند:…
مهند طلع من غرفه التحقيق و دخل غرفه نون ..
مهند:حياه ماتت
نون:حياه اختي !؟
مهند:اي .. قتلت نفسها في المستشفى
نون:انت بتكذب !!!
مهند:لا .. وعد اعترفت بتفاصيل الجريمه .. باقي انتى .. اللعبه خلصت يا نون .. حتى لو ما اعترفتي ما حا يتغير شى .. عمر ال ساعدكم كمان نهايتو حا تكون زى الزفت .. خلاص .. ما استفدتو اي شى من الانتقام حقكم ده غير انكم خسرتو باقي حياتكم
نون:….
مهند طلع و ضرب ل عمر
مهند:لي يا عمر؟
عمر:عرفت خلاص؟
مهند:ما قادر استوعب انو ده كلو انت خططت ليهُ .. معقول انا ما كنت قادر اشوفك عشان انت صحبي ؟؟
عمر:انا تحت في الكافي .. تعال لي ..
مهند نزل و كان مقرر انو خلاص حا يقبض عليهُ
قعد قصادو ..
مهند:دى اخر قهوه حا تشربه و انت حر
عمر:احنا مش سوا في الموضوع ده؟و مش حا نمسك الشبكه سوا؟
مهند:قبل اعرف وساختك وصلت وين .. اللعبه خلصت .. انت اصلا كيف جاى لمن هنا كأنو ما حا نقبض عليك؟
عمر:آسف .. بس انا ما حا اخلى الراح كلو يضيع ساي ..
عمر طلع تلفونو .. و فتح التسجيل
كان كلامهم يوم موت محمود
عمر:ده اول اثبات ممكن يدخلك انت كمان السجن .. انت ما احترمت شغلك و خليت انسان للموت ..
عمر فتح فيديوهات ..
عمر:دى تسجيلات دخلتنا و طلعتنا من بيت محمود .. انت دخلت اول و ضربت نار .. حتى الصوت ظاهر .. كلو عندى
مهند:دى غدرتك بي؟طعنتنى في ظهرى؟استغليت غضبي؟
عمر:انا ال رسلت ليك رساله ال يوم داك .. انا ال قلت ليك عن اروى
مهند:….
مهند كان واضحه خيبه الامل في ملامح وشو ..
عمر:كنت محتاج اشغلك عن القضيه شويه .. كنت عارف انك حا تصل لي و تحل الموضوع .. عشان كده فتحته ليك جرح قديم .. كنت عارف انك حا تمشي ل محمود و استغليت ال حاجه دى ل صالحي .. عارف اني حا اكون صدمتك حسي .. و عارف انك عمرك ما حا تثق فيني تاني .. بس يا مهند ده كان الحل الوحيد عشان افوز في اللعبه الوسخه ال انا دخلته فيها .. كان لازم ادعس على كل الناس
مهند:انت عارف الفرق بينا شنو ؟؟ انا كنت مستعد ادعس على نفسي عشان اطلعك انت من الوسخ ده .. بس انت دعست علي و غرقتني معاك .. انت اخوي .. انا كنت مستعد اخسر شغلي و ادخل الحرب دى عشانك و عشان نلقا بتك .. بس في النهايه طلعت انا ال غبي .. انت مستعملني كأداه عشان تصل لل انت عايزو !!
عمر:ح يجي دكتور نفسي و ح يوريك اثباتات انو وعد مريضه و انو كل القصه ال قالته من وحى الخيال .. نون اصلا ما اعترفت ب شى .. حا تخليهم يطلعو الاتنين
مهند:و لو ما عملت كده ح تخليني اخسر شغلي؟
عمر:اسف .. اعتبرها عداله ربانيه .. البنات عاشو في ظلم .. ده اقل شى يستاهلو اهلهم .. بعدين هيا قتلت محمد اكبر زول في المنظمه ال احنا عايزين ندمره
مهند:انت بتحاول تريح ضميرك ..
عمر قام من الكرسي
عمر:ما حا اطلب منك شى تاني .. بس البنات يطلعو .. و اعتبر الدليل ال معاي ضدك اتحرق ..
مهند ابتسم و عمر مشى ..
عارفين برودة ال دم ال بتجيك بسبب صدمتك من انسان قريب ؟
خيبة الأمل ال كبيره ال بتخليك ما عارف تفكر و لا تصرف و لا حتى تحزن
ده كان وضع مهند ..
عمر طلع من القسم و ضرب ل مروان
عمر:الليله حا نخلص اى شى
مروان:اى .. رسلت ليك الموقع ال فيهُ حلبي .. ما معاهو حراسه شديده .. اربعه بس من رجالو المقربين .. حا تقدر عليهم؟
عمر:اكيد ..
مروان:تمام .. بعد تخلص ح نتلاقي في بيت عبد الوهاب
عمر:تمام ..
عمر قفل الخط و ركب العربيه ..
عمر:حا اقتلك الليله يا حلبي .. خلاص اللعبه خلصت ..
#عنده_نجاة :
نجاه:امي سرعه
منيره:يا نجاه ابوك ليهو بس كم يوم متوفي .. حا نسافر وين و لي
نجاه:امي .. ماف وقت .. حا يحصل شى سئ لو قعدنا .. انتى عارفه ابوي كان شغال شنو و مع منو
منيره:عشان كده خليت ليهو البيت .. اخخ قلبي واجعني .. لو ال يوم داك كنت معاهو امكن ما كان قتلو
نجاه:اي امكن كان قتلوكم انتو الاتنين صح
منيره:طيب راجلك وين يا نجاه.. انا و الله ما فاهمه شى
نجاه:سالم .. ما برد .. و لو ما برد معناتا حا يكونو قتلو
منيره ختت يدها في قلبها
منيره:شنو؟سجمي .. ده كلام شنو يا بت !!! و مالك بتقوليها ببرود كده
نجاه:امي انا كنت عارفه العالم ال وسخ ده .. ما كان مفروض اخلى سالم يدخلو بس انا ال اقنعتو بالحاجات دى .. فما مستغربه انو مات لاني كنت عارفه حا يحصل كده في النهايه
منيره:نجاه انتى عملتي شنو؟
نجاه:في واحد اسمو مروان شغال مع جعفر .. كان في صفقه مهمه شديد مع مجموعه من ال صين .. حالياً انا حسابي فيهُ مليارات بسبب الصفقه دى .. هو ساعدني اني اخذه .. و طلب مني انى اقنع سالم يتعامل مع مجموعه معينه في الشغل .. و عملت زى ما قال .. بس قال لي انو لو يوم ح يضحى ب زول ح يكون سالم .. عشان يقدر يحميني
منيره:انا ما فاهمه شى .. مروان عايز يعمل كده في سالم لي يعني .. و دخلو شنو ب شغل سالم
نجاه:انا حسب ال فهمتو انو ورط سالم في شى .. بس ما عارفه هو شنو بالضبط .. يعني كنت عارفه يا امي بس زى الغبيه ما اديت اهميه للموضوع .. امي انا مهم عندى اننا نعيش براحه بعيد من الجوطه دى .. و نفذت ال حاجه دى و القروش ال عندى ح تعيشنا ملوك
منيره:نجاه .. يا بتي .. انتى كمان دخلتي حياه ال ناس الوسخه دى .. صعب تطلعي منها
نجاه:امي حسي عندنا فرصه و حا نطلع منها .. م مهم عندى سالم و لا حاصل ليهو .. مهم عندى اننا نمشي بس
منيره:….
…..
#بلسان_ملك :
وصلنا بيت ابوي .." عبد الوهاب"
ملك:لي جايبني هنا؟
عمار:حا يحصل شنو لو عرفتي انو كل ال في قصتك ال انتِ سمعتيها بالعكس .. الطيب شرير و الشرير طيب
ملك:ما فاهمه؟
عمار:ابوك كان خايف يجي يوم و يكذبو عليك .. عشان كده وراني القصه كامله.. و انا حسي ح اوريك
كان في مجرفه في الحديقه
شالها و مشى جمبه الشجره و بدء يحفر
كنت مستغربه و بعاين ليهُ
فضلنا امكن نص ساعه كامله و هو لسه بحفر
لمن ما وقف
عمار:تعالى
مشيت محل كان واقف
كان في قماش ابيض كبيره ملفوف حولينو شى
عمار:دى امك
لمن قال كده قلبي بدء يدق سريع
و لفيت وشي الجهه ال ثانيه و بكيت
ملك:لي عملت كده .. ما صح بعد تدفن يحصل كده
عمار:عايز اوريك حاجه ..
عاينت ليهُ بأستغراب
عمار:ابوك قال لي لو حصل و يوم ملك ضاعت و ما عرفت تصدق منو .. جمبه امك مدفونه رساله ليك
استغربتا شديد
عمار بدء يحرك جثه امي و انا كنت بس ببكي
بعد وقت لقى فعلا جمبها صندوق صغير
فتح الصندوق و كان في ورقه
عمار:ها ..
اداني الورقه و انا مشيت بعيد
ما كنت قادره افتحه
و لا قادره اشوف من كميه ال دموع ال كانت في عيوني ..
حاولت اخذ نفس و اهدى
و فعلا بعد ثواني استجمعت كل قوتي و فتحت الورقه ..
……
#المكتوب :
بتي حبيبتي ..
طالما بتقرى الكلام ده معناتا ال خايف منو حصل ..
انا ما عايزه تصلي مرحله زى دى و لا عايزك تعرفي كل الأسرار السوده ال في ال حياه .. بس انا عارف انو ده شى مستحيل..
حا تستغربي لي ختيت الرساله هناك تحديدا بس خفته اختها ف مكان و تلقيها و تعرفي ده كلو و انتى ما مجبوره تعرفي ..
خايف حياتك تكون كويسه و تتقلب بسبب الرساله ..
فخليتها في مكان صعب .. مكان انا عارف انو ما حا يتفتح الا و انتى مسبقا ضايعه بين الكذب و الحقيقه ..
ما كنت عارف منو ال ممكن اثق فيهُ .. بس عمار كان الخيار ال انسب ..
انا عارف انك بتحبي مروان .. بس مروان فيهُ جانب مظلم .. و انا ما عارف لو جانبو المظلم ده انتصر في يوم ممكن يحصل ليك شنو ..
عشان كده ما قدرت اثق فيهُ ثقه تامه ..
بس عمار انسان نظيف يا ملك ..
حتى لو ما وقعتى في حبو في يوم ..
خليك عارفه انو ابداً ما حا يضرك ..
قبل سنين انت كنت هديه ربنا لي .. ما كان مكتوب لينا نجيب عيال ..
لمن ربنا رسلك لي حسيت انو تعويض و جبر خاطر لي ..
حاولت انى احميك .. و قدرت
بس ما عارف لمن اموت ممكن يحصل شنو ..
جعفر هو ابوك يا ملك و انا متأكد انك عندك خلفيه عن هو منو و شغال شنو ..
كان بحب امك شديد .. و امك ملك حملت منو ..
ملك امك كانت متزوجه زواج تقليدي و انفصلت و راجلها خلى ليها عمر اخوك و اختفى
يقال انو سافر امريكا و بنى حياه هناك ..
امك كانت مع جعفر بس للأسف في نفس الوقت كانت مع حلبي ..
عارف انو ال كلام حا يكون صعب عليك
بس امك لعبت ب اتنين اخوان ..
حلبي و جعفر ما كانو عارفين الحقيقه دى ..
بعد حلبي اتقدم ليها جعفر عرف بس صدق ملك و انو هيا ما عندها ليهُ شى
كانت عادات قبيلتهم و المكان ال فيهُ صعب شديد
ما كان في ارتباط و حب ..
جعفر كان مصدق انو ملك ما حصل اتكلمت مع حلبي اصلاً و انو حلبي فرض نفسو عليها و اتقدم ليها ..
جعفر ما قدر يواجهه حلبي بحقيقه انو ملك اصلا حامل ..
ملك طلبت من جعفر انهم يهربو سوا .. و جعفر كان راضى يخسر اى شى عشان ملك
حتى اخوهو ..
بعد ما كانو ح يهربو يوم الزفاف
جعفر اكتشف الحقيقه
و انو ملك اصلا بتكذب و انها كانت بتلعب بيهم الاثنين ..
كان زعلان و مستعد يعمل اي شى عشان يحرق ملك
مشى عنده حلبي و حكى ليهُ
و ده كلو كان يوم الزفاف ..
ملك اكتشفت من صحبته انو الدنيا جايطه و انو الاخوان عرفو الحقيقه ..
هربت من غير تفكر ..
جعفر و حلبي و اهلهم كانو عيله واصله .. كبيره في المكان ال هما فيهُ
فملك خافت على نفسها و اخذت عمر و هربت ..
جعفر كان شاكك انك اصلا بتو .. بس بعد تحاليل اكتشف الحقيقه
انا عارف انو ال كلام الجاى حا يصدمك اكتر
بس بسبب ملك امك الاخوان حصل بينهم خلاف كبير
و للأسف في الجانب ده من القصه
حلبي هو ال كان طيب
و ابوك للأسف اختار الشر
بس امكن لانو قلبو كان مكسور ؟
جعفر كان عايز يقتل امك ب اي طريقه
كان عايز ياخذ حقو و حق قلبو ال اتكسر
حلبي رغم حزنو و رغم كل ال حاجات السيئه ما كان هاين عليهُ يخلى حب حياتو تموت
حلبي هو ال عرف مكان امك و عمر و جابهم عندى عشان احميهم ..
بس كان صعب علي انى اقدر على مسؤليتك انتى و عمر
فأخذ عمر ال ميتم ..
بعد فتره ما طويله جعفر اكتشف مكانكم و انكم عندى
جعفر جا شخصياً و قتل امك .. كان عايز يقتلك بس انا رفضته
هو كمان للحظه قلبو حن و لمن شافك كنت صغيره شديد .. كان شكلك برئ و حلو
مشى من غير يعمل ليك شى ..
بس ما كنت عارف هل ح يجي يوم من الايام و يكمل انتقامو و لا لا ..
جعفر شايف انك غلطه في حياتو ..
و انك بتذكرى بماضي عايز ينساهو ..
جعفر و حلبي اعداء بسبب الماضى ال اتقاسمو ..
بس الحقيقه حلبي عمرو ما اعتبر جعفر عدو ليهُ
كان عايز ينسى ال ماضي و يبدى صفحه جديده معاهو ..
بس عدم موافقه حلبي انو ينتقم من امك خلت جعفر يثور ..
حمايه جعفر ل امك خلت جعفر يحاول بكل الطرق انو ينتقم براهو ..
و مع الوقت اتحولت علاقتهم ل اكبر علاقه توكسيك في الحياه ..
جعفر اختار يكون عدو ل حلبي في الشغل و في كل ال شى ..
اختار يدمر حلبي
و حلبي ما كان في يدو شى غير انو يدافع عن نفسو ..
عارف انو دى حقيقه تقيله عليك
بس ابوك قتل امك يا ملك ..
و هو اخر زول ينفع تثقي فيهُ ..
جعفر حا يحاول بكل الطرق انو يدمر اخوهو
و هو اجبن من انو يعمل كده بنفسو
حا يستخدم دايماً ناس عشان يصل ل حلبي
انا ما عايزو يستخدمك انتى ..
عشان كده عايزك تعرفي انو جعفر اخر زول ينفع تثقي فيهُ
إنتبهي يا ملك ..
اى شى ممكن يعملو او يقولو حا يكون كذب ..
انا بحبك .
اتمنى تلقى ال طريق ال صح
اتمنى تنجى من كل الحروب دى .
…….
رميت الورقه ال ارض ..
كُنت برجف
عمار جا و بدء يحركني يمين و شمال
عمار:ملك .. ملك انتى كويسه؟؟
عمار جاب مويه و رشاها في وشي
كُنت شبه فاقده الوعي
عمار:ملك
بديت اصحى شويه و استوعب ..
ملك:عمر ..
عمار:عمر مالو؟
ملك:ح يورط عمر ..
حاولت اقيف و ما قدرت
في اللحظه دى جا مروان
عمار لمن شاف مروان مشى عليهُ
عمار:انت ؟؟ جايبك هنا شنو
مروان:عمار انا ما عايز نكون اعداء
عمار:احنا اعداء فعلاً .. انت عارف جعفر و العملو .. و اخترت تكون ف صفو
مروان:جعفر ما عمل شى .. بعدين انت اصلا داخل في الحوارات دى لي ؟ما احسن تشوف شغلك و مكتبك و تبعد من ده كلو؟
عمار:انت عارف انو بسبب غبائك بتعرض امي و ملك للخطر ..
مروان:ما فارق معاي
لمن قال كده قمته من مكاني و عاينت ليهُ بنظره حزن ..
ملك:ما فارق؟انا كنت ما فارقه معاك؟انت كنت عارف ده كلو و ما قلت شى ؟ لي ؟انا وثقته فيك
مروان:كنت عايز النهايه لمن تجي .. ما تحسي بكل الالم ده
ملك:م فهمته؟
مروان وقف قدامي
مروان:كنت عايزك تمشي من غير الحقيقه ال قاسيه على قلبك دى
ملك:انت بتقول ..
قبل اتم كلامي حسيت ب حاجه قويه بتدخل بطني
و بحركه سريعه حسيت انها اتكررت كم مره ..
كُنت بعاين ل مروان .. كنت بتأكد انها من مروان ..
من الانسان ال انا بحبو ..
من ال انسان ال انا بثق فيهُ
من الانسان ال عشت معاهو سنين من عمرى
صاحب ذكرياتي السعيده كلها ..
ما كنت حاسه ب الم ..
كأنو جسمي مخدر
بس قلبي !!
قلبي كان مقبوض ..
تأثير الطعنات؟لا
تأثير ال طاعن ..
اول مره اعرف انو الخيانه حاره كده ..
حسيت بنفس شعور امي الحقيقيه قبل تموت ..
اكيد هيا كمان ما اتوقعت انها حا تموت على يد انسان ادعى ليها الحُب !!!
جعفر حول مروان ل نسخه منو ..
و مروان سار على نفس خطى جعفر
و من عيونو اكتشفت السبب ..
مروان كان عايز القوى ..
دخل عالم و اختار انو يكون قوي في العالم ال دخلو
عشان كده اتخلى عني !…
فجأه بديت اشوف ضباب
سامعه الأصوات بعيده
عمار كان بصرخ و مروان كان ماسكو قوي
فجأه الأصوات هدت
ما عارفه لو عمار حصل ليهُ شى و لا لا
ما كنت قادره افهم
ما كنت واعيه ..
…..
#عنده_عمر :
وصل المكان ال رسلو ليهُ مروان ..
نزل و كان معاهو سلاحين ..
اول ما دخل كان في ممر طويل
نهايتو في اتنين حراس واقفين جمبه الباب
_اتفضل؟عايز منو؟
قبل يتم كلامو عمر طلع السلاح بصوره سريعه و ضربهم الاتنين و دخل البيت ..
حلبي كان قاعد في الصاله براهو
عمر وقف قدامو و هو كان قاعد في يدو كبايه قهوه ..
حلبي:جيت بدرى
عمر:جيت عشان اقتلك خلاص
حلبي:نتونس شويه قبل تعمل كده؟
عمر ابتسم ..
عمر:انت كنت عارف اني جاى؟
حلبي:اي
عمر نزل السلاح
عمر:ممتاز .. يعني البيت حسي مليان رجال .. قبل اقتلك او حتى لو قتلتك حا يقتلوني!
حلبي:لا .. ماف زول ..
عمر:ما فاهم .. عايز تموت انت؟
حلبي:انت كان نفسك تقتلني .. عايز احقق ليك حلمك .. بس للأسف بعدها حا تندم
عمر:اندم؟انت قتلت مرتي و خطفته بتي بكل دم بارد .. و حا اندم؟
حلبي:جعفر كذب عليك
عمر ضحك
عمر:اها دى كذبتك ال حا تنقذك؟
حلبي:لا هو كذب عليك بالجد .. استغلك بصوره ثانيه .. العمل الحريق كان جعفر ما انا
عمر:ايوا و شنو تاني؟
حلبي:انا ال اهتميت فيك يا عمر .. الميتم و قرايتك و كل شى
عمر:ما تضيع زمنك في الكذبه دى
حلبي:عمر بتك ميته
عمر في اللحظه دى سكت
حلبي:انت قررت تتمسك ب كذبه انها عايشه عشان ما تدمر نفسياً .. بس كان واضح انها ميته .. رسلو ليك كم صوره ليها بس .. انت عارف ده ما دليل انها عايشه
عمر:ما فاهم؟
حلبي:قبل الحريق صورو بتك كم صوره .. عملوها بالذكاء الاصطناعي و قدرو يفبركو صور .. انت ما حاولت تتأكد اصلا لو الصور حقيقيه .. خايف تنهار عشان كده صدقته انها عايشه؟
عمر يدو بدت ترجف
عمر:انت بتكذب ..
حلبي:سالم ما كان ليهُ دخل بجريمه عيلتك .. هو كان يدي اليمين .. خلوك تصدق انو ليهو دخل لمن قعدوهو مع شركه 7M لانو ديل الوقتها انت قبضتهم بتهمه المخدرات و ربطه انهم من جهتي و انو اصلا كل الحريق و التعذيب ده لاني عايزك تخلى الملف و ما تمشى وراي كتير .. فعلاً الشركه كانت تبعي و الوصلت ليهُ ما غلط بس انا بقدر اطلع نفسي من الموضوع من غير أأذى عيلتك .. الرساله ال جاتك ما مني اصلا .. جعفر عمل ده كلو عشان يخلي عندك رغبه تنتقم مني اكتر .. محمود كان خاين و شغال معاي و مع جعفر برضو .. هو كان بجيب لي معلومات من جعفر و بياخذ معلومات مني يديها جعفر انا كنت عارف بس عامل غبي بس لمن جعفر عرف زعل و ورطو في الموضوع برضو عشان كده زرع جواك شك و كراهيه اتجاهو عشان تقتلو .. جعفر قال ليهو اني محتفظ ب بتك و هو صدق عشان كده قال الكلام ال قالو يوم مات .. اصلا ال مشو قتلو رجال جعفر ما رجالي
عمر:انت بتكذب
حلبي:كنت عامل نفسي م شايف ده كلو .. عايز اعرف ف النهايه حا تصلو ل شنو .. محمد ابو البنات كان شغال معاي .. سبب خلافو ب محمود انو اكتشف انو محمود بلعب بجهتين و شرح ليهو انو حا يضيع بسبب الحاجه دى .. بس محمود رفض يخلى ال بعمل فيهُ .. جعفر عرض عليهو يكون في صفو بس محمد رفض .. عشان كده محمود عداوتو زادت مع محمد و جعفر اختار انو محمد يموت ..كان عايز يقتل رجالي و الناس ال قريبه مني و يخلص مني حبه حبه .. انت بجد شايف انو صدفه يظهر ليك مروان و يوريك ال حقايق ديك كلها؟و متين!يظهر ليك بعد الحريق !! صدفه غريبه
عمر:انت بتحاول تقلبني على جعفر
حلبي:جعفر هو ال قتل امك يا عمر
عمر:ههه بتكذب برضو
حلبي:في رساله كتبها عبد الوهاب قبل يموت فيها القصه كامله .. في الغالب هيا حالياً مع ملك .. عمار اخذه عشان تقراها .. الرساله حا تثبت ليك كلامي
عمر:كذاب .. مهما حصل مستحيل اصدقك
حلبي:تمام .. في طريقه تانيه تصدقني ..
حلبي فتح اللابتوب ال كان قدامو
حلبي:شوف
عمر قرب و بدء يتفرج
كان حوار بين حلبي و جعفر ..
#الحوار :
حلبي:انا ما عملت كده .. انت ال حرقته بيت الولد ب عيلتو صح ؟
جعفر:حا يكون منو غيري؟
حلبي:لي؟
جعفر:اكتشفته انو ما عندى طريقه انتقم منك الا ب واحد حامل حقد دفين ليك .. عمر خيار مناسب .. تخيل لو عرف انو انت ال قتلته امو ..
حلبي:حا تألف للولد سناريو؟و حا يصدقك؟
جعفر:انا مجهز اى شى .. انت ما عارف انا ل ياتو درجه جاهز
حلبي:ملك ماتت يا جعفر .. و انت عملت فيها كده .. تاني عايز شنو؟متين الحرب دى حا تخلص
جعفر:لمن احس اني ما قاعد اضايق لمن اتذكره
حلبي:بتفرغ حزنك فيني و انت عارف اني مظلوم زيك
جعفر:انت لمن اخر لحظه كنت بتحميها .. و ما حا انسى ليك الحاجه دى .. ابدا
….
عمر سمع الكلام و حاول يستوعب
حلبي:جعفر قايل انو هو مغطى كل الثغرات .. بس انا خليت اهم الأدله للنهايه ..
عمر:مستحيل ده يكون حقيقي .. و لو حقيقي انت لي ما حاولت تعمل شى؟
حلبي:لي اعمل شى؟انت عارف انشغال جعفر بي و انشغالك بي خلاني انجز في شغلي اكتر .. انت عارف انا دخلت كم كميه من المخدرات البلد؟انتُ في نص الدراما دى و انا بنجح في حاجات تانيه .. انا كنت بحب امك بالجد .. حاولت اني احميها و احميك و احمي ملك .. بس صراحه عملت ال علي .. جا وقت تكبرو و تختارو براكم عايزين تقيفو مع منو .. انا ما حا أأذى زول الا يحاول أنو يأذيني يا عمر
حلبي كان بعاين ل عمر
ال كان واقف مصدوم
ما قادر يصدق ..
معقول كل ال كان بعملو و كل ال عاشو كذب ؟؟
عمر:ما حا اصدقك
حلبي ابتسم
حلبي:انا اديتك ال خيار يا عمر
عمر رفع السلاح على حلبي
و قبل يطلق النار
في زول وراهو ضربو نار ..
عمر رمى السلاح و كان مصدوم
خته يدو في بطنو ال كانت بتطلع دم
إلتفت وراهو عشان يشوف ده منو
و كانت صدمتو
عمر:مهند؟؟
مهند:صدقني ما كنت عايز اعمل كده .. بس انت غدرته بي اول ..
عمر ما كان مصدق ..
صاحب عمرو!!
اخوهو !!
كان عارف انو ممكن يحصل اى شى من اى زول في الرحله ال هو اختارها
بس ما كان متوقع انو مهند جزء من إنهيارو ..
بصوره تانيه ..
جزء من موتو !!!
عمر وقع في الارض و كان بعاين بإستغراب ل مهند
مهند:آسف .. قلت ليك كنت بحاول اطلعك من المستنقع ال عفن ده .. بس انت اخترت انك عايز تكون فيهُ .. دى نهايتو يا عمر
عمر:بتي ؟
مهند:بتك ميته يا عمر .. من يوم الحريق .. جعفر كان بكذب عليك عشان يصل ل ابوي
عمر في اللحظه دى اتصدم اكتر
عمر:ابوي؟
مهند:حلبي ابوي .. جعفر عمي .. بس جعفر ما عندو خلفيه ب وجودى كولد اخوهو طبعاً
عمر:انت .. مستحيل .. و روان؟
مهند:روان كانت شغاله جاسوسه فعلا .. انا و هيا .. بس هيا اتكشفت بسبب اروى ..
عمر:ما فاهم يعني اروى …
مهند:اروى ما خاينه ..
حلبي قام من مكانو و وقف قدام عمر
حلبي:جعفر اقنعك بموضوع ال خيانه و ب اروى عشان تقدر تشتت انتباه مهند .. يعني كذبه تخلي مهند برضو ما يثور عشان ياخذ انتقامو زيك و يساعدك و عشان يثبت ليك انو كل ال حاجات ال سيئه بسببي و اصلا هو ما عارف مهند بكون منو و انو اروى فعلا كانت شغاله معاي و ده ما كذب .. مهند عمل نفسو مصدق و مشى معاكم في الخطه
عمر:بس هيا انتحرت !!!
مهند:اي زول بتمسك لازم يموت
عمر:حبيبتك!!!!دى كانت حبيبتك!!!
مهند:ده الشغل ال احنا فيهُ يا عمر .. ما لازم المشاعر تتحكم فينا
عمر:كلو كان تمثيل؟؟؟
مهند:للأسف
عمر كان ما قادر يتكلم من الالم
عمر:يعني انا كل ال عملتو عشان بتي .. كان ساي؟
مهند:انت اخترت ما تشوف من الغضب .. و ده كان غباء
عمر:ما حا تعملو شى ل ملك
مهند؛لو جعفر ما عمل شى
عمر:لي انتظرتو ده كلو؟
مهند:بسببك و بسبب انشغال جعفر في انتقامو من ابوي قدرنا نصل لحاجات كتيره تخصو و شغل يخصو و حتى ال مكان ال قاعد فيهُ .. حالياً انا حا اطلع من هنا و حا امشي اقبض عليهُ لانو عندى كميه معلومات تدينو في كل شغلو ال سئ .. يعني احنا كنا بنعمل ليكم في حفره اثناء ما انتُ بتحاولو انكم تعملو لينا ثغره
حلبي:ما كنت عايزك تموت يا ولدي .. بس انت اخترت .. ما انا ..
عمر دموعو نزلت
مهند:آسف
مهند رفع السلاح و ضربو تاني مرتين ..
و كما يقال
ما كان بتألم الرصاصه
كان المؤلم ال طالق ..
الإنسان بقع دائماً لو ما كان قادر يشوف حقيقه الناس ال حوليهُ ..
الإنسان بتصعب عليهُ نفسو لمن يعرف انو غبي
غبي لدرجه انو اتعرض ل طعنه من انسان
كان مديهُ كل الامان ..
" عمر ما انهزم من أعداؤه.
انهزم من قراره.
لأنو في لحظة واحده ..
اختار يكون نسخة منهم.
و الزمن ..
ما بيرحم الزول ال يختار الظلام وهو عارف إنو في طريق تاني ..
الانتقام كان أعلى من صوته الداخلي.
أعلى من خوفه.
أعلى من حقيقته ..
عشان كده خسر روحو في النهايه .."
…
بلسان_ملك :
فتحت عيوني و كان عمار واقع قدامي ..
ملك:عمار!!!!
مروان جا قعد قصادى
مروان:ما كنت متخيل اني يوم من الايام حا اعمل كده
ملك:ما حبيتني؟
مروان:ده بالجد ال شى ال عايزه تعرفي و انتى بتموتي؟
ملك:مروان .. ما حبيتني؟
مروان:حبيتك .. بس جعفر كلامو صح .. الحب بضعف الانسان ..
ملك:بابا قال لي انو فيك جانب مظلم .. و انو ما عارف لو الجانب المظلم انتصر حا يحصل شنو .. لمن اقابلو حا اقول ليهُ .. حا اقول ليهُ انو الانسان ال بحبو .. الانسان ال انا اخترت اثق فيهُ .. هو ال اختار يقتلني بكامل قواه العقليه .. كيف ما كنت شايفه ده كلو ؟
مروان:انا بحبك يا ملك
ملك:…
مروان:ح ادفنك جمبه امك
ملك:…
ملك ما كانت بترد
مروان إلتفت عليها
مروان:خلاص !! مشيتى؟
مروان حضن ملك قوي
مروان:انا اسف ..
اثناء ما هو حاضنه دخلو رجال الشرطه
مروان اتخلع ..
مسكو مروان و كانو بشوفو ال باقين ..
مروان:انتو جابكم شنو؟في شنو خلوني!!
شافو عمار ما كان في ضربه في جسمو بس واضح كأنو ضربو في راسو و عمار فقد ال وعى
اخذو عمار و شالوني على اقرب مستشفى …
" أصعب حاجة في الخيانة
ما إنها بتسرقك أمانك …
بس هيا بتسرق كمان نسختك البريئة من نفسك .."
…..
#عنده_مهند :
داهمو ال مكان ال كان يخص جعفر ..
ما كانو عارفين بالمداهمه
فأتفاجؤ كلهم حتى جعفر ..
كان في كميه اطفال و كميه مخدرات في البيت ..
ما كان في دليل اقوى من كده ..
كل الوصلو ليهُ ضد جعفر كان موجود ..
الفتره ال بدت فيها خطه جعفر انو يقضى على حلبي و رجالو ..
حلبي بدء فيها خطه انو يخلي جعفر يخسر شغلو و يدخل السجن ..
جعفر كان مشغول بتفاصيل الانتقام .. و انو حلبي ما عارف شى
بس حلبي كان شايف و عارف كل مجهوداتُ و ساكت ..
مهند اخذ الأدله ال كانت مع عمر و خفاها من الوجود ..
و بكده قدر يدخل ال بنات ال سجن
نون و وعد دخلو السجن بتهمه القتل العمد
و أتحكم عليهم سجن مؤبد ..
عمر اتحكم عليهُ بالسجن برضو بس كانو قايلين أنو هرب ..
و الحقيقه انو دُفن ..
ماف زول كان عارف حقيقه انو عمر مات على يد مهند ..
جعفر اتسجن و كل ال كانو شغالين معاهو ..
و مهند وصل ليهُ رساله مهمه في المحكمه ..
مهند:لو ما اخترت طريق الانتقام ده .. ما كانت حا تكون دى نهايتك ..
مهند ابتسم و مشى ..
" جعفر فشل ما لأنو أعداؤه أقوى ..
فشل لأنو ما عرف يسامح ..
ما عرف يوقف.
ما عرف إنو بعض الخسارات لازم تُتقبل…
مش تُحارب.
وفي النهاية
الزول ال كان عايز ينتصر
لقى نفسه واقف برا اللعبة ..
وحده.
لأنو الانتقام ما بيرجع الزمن
و ما بيرجع الحب
و ما بيصنع كرامة.
بس بيخلي الإنسان
نسخة قاسية من نفسه ..
نسخة ما بتعرف تعيش إلا وهي بتدور على خصم جديد
وجعفر !!
أضاع عمره كله
وهو بيحارب حرب
كان ممكن تنتهي
لو اختار يواجه ألمه بدل ما يهرب منو .."
……
نجاة و امها سافرو و اختفو عن الأنظار ..
مروان و امو اتحكم عليهم بالسجن مع جعفر ..
حلبي بعد خلص على نص المنظمه كمل شغلو بكل هدوء من غير زول يحس ب شى
و طبعاً من غير زول يحس انو مهند هو ال كان بساعدو من جوا القسم ..
#بعد_سنه :
#مستشفى_نفسيه :
#بلسان_ملك :
فتحته عيونى .. نفس ال مكان كل يوم
عمار:صحيتى؟
عاينت ل عمار و ابتسمت
عمار:حا تطلعي قريب ..
ملك:متين
عمار:شهر تقريباً ..
ملك:حاسه اني احسن فعلاً
عمار:حا نسافر ايطاليا اول ما تطلعي
ملك:ماف خبر من عمر؟
عمار:لا
ملك:تتوقع ..
قبل اتم كلامي عمار رد
عمار:خلينا نمشي و ننسى ده كلو ..ما تفكرى يا ملك .. يوم من الايام حا نعرف .. و لو ما عرفنا فحننسى .. ح نرمى ده كلو وره ظهرنا ..
فجأه سمعت صوت زول ..
ملك:اوه .. دى حنين شكلها .. يا حنين اشتقت ليك .. عارفه امبارح عملت شنو؟
عمار كان ساكت و بعاين لي و انا بتكلم مع الهواء ..
ما كان في حنين ..
حنين دى صديقتي ال خياليه ال كل ال ناس شايفه انها خياليه
الا انا ..
عمار اتنهد تنهيده طويله ..
ملك:مالك م سلمته على حنين؟رجعت يادوب من الجامعه
عمار:حنين .. كيفك ؟
ملك ابتسمت ..
ملك:يا ريت اخترتك انت ..
عمار:المهم انك اخترتيني حسي ..
ملك:….
" خاتمه غير مُرضيه ..
امكن لانها ما سعيده زى المتوقع ..
بس ماف نهايه سعيده في عالم مليان خيانه ..
كُلنا حا نعيش الألم و نستمر ..
بس استمرارنا ما هو الا دليل حُزننا بطريقه اخرى ..
العالم السفلى ال شرير ..
حيث وجد توجد المأساه .. الحُزن ..
فلا تثق
الجرائم ما حا تخلص .. و كل ال حاجات القاسيه ال مرت علينا في الروايه موجوده في الحقيقه و حا تفضل موجوده
كان حا تكون اكبر كذبه لو قلنا انو المنظمه انتهت من الوجود ..
انو ال ناس اتصلحت و السعاده ملت المكان
كان حا تكون اكبر خيانه لو أنهينا كل البؤس ده بسعاده مزيفه
أبداً
و إن كانت النهايه حزينه
هيا الحقيقه."
خاتمه_توضيحيه :
الخداع كأداة بقاء". لم يكن الصراع مجرد تبادل لإطلاق النار، بل كان صراعاً على من يستطيع كذب الكذبة الأكبر.
• خيبة الأمل كعنصر: أعظم ألم واجهه "عمر" لم يكن الرصاصة، بل إدراكه أنه كان أداة، وأنه "غبي" لأنه وثق بالخطأ. هذا الشعور هو أقصى درجات الهزيمة.
• ثمن الحقيقة: "ملك" دفعت ثمن الحقيقة التي سعت لمعرفتها؛ عندما عرفت الحقيقة، تحطمت. كانت الرسالة التي تركها "عبد الوهاب" بمثابة لعنة أكثر من كونها طوق نجاة.
• نهاية بلا عدالة مطلقة: لم تنتهي القصة بـ "انتصار الخير"، بل انتهت بـ "بقاء الأقوى أو الأكثر دهاءً" (حلبي)، بينما دفع الأبرياء (أو الأقل دهاءً) الثمن.
لا يتبع بعد الآن ..
تمت بحمد الله