رواية العروس في الثوب الاسود الفصل الرابع والاربعون 44 والاخير بقلم عبير ادريس
يادنيا يمتى اعيشج مشى عمري وما لكيتج صعبة من نعيش غربة بوسط اهلنا صعبة من ننخان مرة والف مرة صعبة من نبعد ونرجع للهجرنا صعبة من نأمن بثعلب وتالي غدرنا هي هاي الدنيا رهبة من صغرنا ...
بقلمي ...
عبير إدريس
مرت الايام يوم حلو يوم مر يوم حسام زين يوم يتغير ويصيح ويعصب على اتفه الاسباب مليت اسأل ليش وشبيك ما الكى رد تغير هواي خصوصاً من ولدت ابني الثاني (مصطفى) كبرت المسؤولية وسند دراستة صارت اصعب ولازم ادرسه وافرغله وقت بس أله حبيبي هسه هو صف سادس ابتدائي وعنده امتحانات آخر السنة وصادفت ولادتي وية عطلته قبل الامتحانات النهائية كلش انشغلت حالي حال اي ام عراقية اشتغل وانظف واطبخ واسبح الاولاد وادرس ووو الخ من مسؤولياتي
رسيل : حسام شوية اخذ مصطفى ترة تعبت كله علية يعني كاعد تشوفني ايد على الطبخ وايد شايلته بيها ، حسام وين بالك صدك جذب عوف الموبايل شوية اكو بشر يحجي وياك
جان يكتب ومبتسم رفع راسه باوعلي عكد حاجبه وكال
حسام : شبيج انتِ بلة ؟
رسيل : مابية سلامتك بس ردت تلزم مصطفى شوية تعبني وعندي شغل جوا كومة اريد اخلصه
حسام :عطلتي اليوم وما ارتاح بيها شطلعت هاي ؟
رسيل : يعني لا انت تراعي ولا امك ترحم تريدون كلشي مني وهذا الطفل بين رجليه وين الحك؟
حسام : محد طلب منج تخلفين واحد فوك الثاني
بهتت بوجهه باوعلي وكال
حسام : شبيج صفنتي طلبت منج تسوين طفل وتزيدين مسؤولياتج؟ لا ما طلبت مو صح؟
نزلت دموعي شكد احاول بمثل هيج مواقف اتمالك نفسي بس للأسف بكل محاولة افشل ..
رسيل : بس انت جنت فرحان بالطفل وطاير بيه شجاك هسه شبيك شنو اللي غيرك ؟ حسام انت ما جنت هيج ابد
حسام : سبحان اللي ما يتغير
اجاه مسج فتحه ابتسم وطلع من الغرفة احتركت حرك ، بقيت افكر هذا شنو اللي غيره علية بيوم وليلة حتى اطفاله هملهم مو بس اني ولا عبالك احنا عائلته اللي يحبنا هاي دموعي اللي جان يتخبل ولا يشوفها تنزل ويحير شنو يسوي حتى بس يضحكني هسه هو صار يبجيني وما يهتم مددت خليت ابني بصفي كمت ارضعه طز بالدنيا لا اسوي اكل ولا انظف خلي امه تحير ، مرات انقهر على ريناد لان كلشي يصير براسها اذا زعلت تالي انزل اضغط على نفسي واشتغل هسه هي بالشمال خل اشوف منو يشتغللهم ولا خدامة متوفرة اليوم ، لزمت موبايلي وكمت اقلب بيه دخلت على الفيس التهيت بالمنشورات استوقفني منشور حسام مجاوب على تاك لبنية مضمون المنشور عبارة عن نصائح عن التفائل وشلون الواحد لازم يبدي يومه بشكل حلو ومميز وشلون الزوجة تفاجئ زوجها بوردة على ميز الطعام او بغرفة النوم وغيرها هواي نقاط ، اللي مسويتله تاك بنية وكاتبتله هاي حياتك بالضبط وضاحكة هو مجاوبها بقلب مكسور وسمايل يضحك اني تخبلت عرفت هاي وحدة مقربة منه لدرجة حاجيلها اسراره كلها تركت مصطفى ونزلت اركض جوا ادور عليه ما لكيته طالع سكرنت المنشور وتعليقاتهم توني اصعد صاحتني زهرة
زهرة : وين ياطير ؟
رسيل : الجهال وحدهم فوك ومصطفى اريد انيمه
زهرة : والغداء منو يسويه و الجداري مطفية
رسيل : عمة كمليهن انتِ ما بية حيل اشتغل
زهرة : وينه حيلج ؟
رسيل : مهدود
ما اعرف شنو حجت تركتها وصعدت فوك افتر بالغرفة اعصابي تلفت ما اريد اتصل عليه واتعارك اريده كبالي واواجهه اريد اشوف ردة فعله شنو بقيت نصف ساعة انتظره ماكو بعدها اتصلت على نور ابجي ، انصدمت سألتني شكو حجيتلها كلشي كامت تهدأني وتصبر بية ...
نور : هذا وقتنا صعب يارسيل الرجال ينأخذ بسهولة والنسوان البايرة هواي تاخذ الكحل من العين ، لا تسوين مشاكل وياه ترة يطفش ويتركلج البيت
رسيل : واخليه براحته يسرح ويمرح اكلج متغير علية واول مرة هيج اشوفه يستهزء بحياتنا واللي حرك گلبي يعرف اذا رد على تعليقها يطلع المنشور كدامي يعني هو يريدني اشوف ما هامته مشاعري ولا خايف من شي
نور : اخاف مسحور يولي
رسيل : ما ادري يانور كلش ضايجة وما طايقة روحي اريد اهج من البيت
نور : وين تهجين وبركبتج ٣ فروخ عمي اعتبريه ما موجود اهم شي سكف فوك راسج وراس جهالج عوفي الحب على صفحة مشاعرج موتيها عيشي لولدج وبس
رسيل : بس اني احب اعيش اجواء العائلة ليش ابقى طول عمري عايشة بنقص ؟ صح بالبداية قصرت وياه هواي بس بعدين تغيرت وحتى هو لاحظ هذا الشي وفرح هواي
نور : من شوكت تغير ؟
رسيل : اخر اشهر حملي وبعدها استعدل صار زين بس يتغيب عن البيت هواي غير عادته تخيلي جان يفوت للبيت ساعة اربعة العصر ينام ساعة والباقي يمنا يشوف طلباتنا شنو ويكعد ويانا اذا حب يطلع نطلع سوية لو ييجي صديقه يكعدون بالحديقة كلش كلش يروح وياه فرة بالسيارة ياكلون شي ويرجعون
نور: رسيل بكل الاحوال لا تسوين مشاكل حاولي بعقل تفهمين اللي صار وصلحي الوضع بينكم مادام هو حباب جان وخوش ولد ويحبكم
رسيل : عندي شك اكو وحدة بحياته ولج طاير وبس يبتسم وطول فترة كعدته بالبيت راسه بالموبايل ويراسل
نور: اذا فعلاً اكو هيج شي و فايتة لحياته بنية حاولي بأسلوب حلو وذكي ترجعيه الج لا تخليها تفوز عليج وتاخذه منج
رسيل : مالي خلك اتباطح وية كحا...... اني لعبانة نفسي واريد ارتاح تالي عمري اكعد اتعارك على رجال
نور: ترة حيرتيني لو بيج تقاتلين على رجلج وبيتج لو تتجاهلين وتغلسين
رسيل : اشوف شنو اسوي الله كريم ، عوفج مني انتم شلونكم البيت ما فرغ شوية بعد وفاة شيماء؟
نور : ماعندنا احد البيت يصوصي شغلي جوا قليل انظف شوكت ما يعجبني وعمي اسويله اكل ويانا وانزل وجبته ومرات ننزل انه وياسر وياه يوم علية ويوم على غيداء
رسيل : قسمتوا الشغل بينكم احسن مو ؟
نور : طبعاً احسن يوم انزل اشتغل واصعد اسوي غداء وانزل وجبة عمي وثاني يوم انظف شقتي وابقى مرتاحة لو احمي اكل من اللي بايت عندي لو اسوي نواشف وغيداء نفس الشي
رسيل : اي زين الحمدلله من خلصتي بيتهم متعب والخبز بعدج تخبزين؟
نور: لا وين بطلت من زمان صار سنتين فد على المشتها اخبز باقي الايام من المخبز ، حيل نور مو مثل حيل اول تعبت
رسيل : ينطيج العافية ياحبيبتي ويساعدج السوالف وياج ما تنمل بس مضطرة اسدة لان سمعت صوت حسام كاعد يصعد الدرج
نور : الله وياج مثلما وصيتج لا تخلين بالي يمج
رسيل : صار
سديته منها ثواني ودخل للغرفة عاقج الوجه بس ما حجى مدد حط المخدة على راسه باوعت موبايله على الشحن بصفه فوك الميز سيطر الشك علية كمت اريد اشوف شنو بيه هو بالعادة ما يخلي رمز يعني اكدر افتحه بكل وقت مديت ايدي حتى اخذه فز وصاح
حسام : رجعيه ليش شلتيه من مكانه؟
رسيل : شبيك حسام اريد اتصل على ريناد
حسام : مو عندج موبايل اتصلي منه
حاول يسحبه مني واني افتحه لكيت بيه رمز هنا بدت اعصابي تفلت
رسيل : شو حاطين رمز هاي جديدة؟
حسام : مو شغلج جيبيه كلت
رسيل : حسام اذا تبقى بهاي سوالفك راح تخسرني
سوا حركة بحلكه معناها مو فارقة وياه ، تركته ما عاتبته مشت الايام وبديت اجمع دلائل ضده وبيوم دخل للحمام حدد لحيته وسبح فات للغرفة بدل وتعطر واني اباوعله بالمرايا كمل و لبس حذائه لمعه فتح المجر اخذ ساعته لبسها ما تحملت حجيت رغم جنا زعلانين
رسيل : وين رايح ؟
حسام : وية محمود
رسيل : وتحدد لحيتك وتلبس لبس جديد وتتعطر والساعة والحذاء يلمع كله علمود محمود اللي جنت تطلعله بتراك البيت والنعال؟
حسام : وين تريدين توصيلن ؟
رسيل : اذا وصلت للي ابالي دقيقة وحدة ما ابقى على ذمتك خليها ببالك
هز كفته بحركة عدم مبالاة بمعنى طز عافني وطلع رجع تالي الليل لف راسه ونام ، اهماله صار واضح حتى بالعلاقة الزوجية صار يتحجج بعدما جان يتوسل ويتمنى قربي هسه هو يبعد ويدور حجج حتى ينام من وقت كمت اتقصد ألبس كل يوم قبل جنت بالاسبوع مرتين اسويله اجواء بسبب انشغالي بالاطفال ويموت عليها هسه مو بعينه اي شي اسويه اصلاً ما يشوفني انثى كدامه حتى ريناد لاحظت تغيير حسام وياية تعذبت وياه لمدة سنة كاملة عشت اهمال بكلشي كذب صار يكذب اطفاله هملهم سند ما يشوفه اصلاً شكد كسر نفسيته جان كلشي بالنسبة اله قربه منه لدرجة صار يصيحله بابا وهسه كسرنا اني وياه مشت الايام على نفس الوتيرة ماكو اي تغيير حتى المصرف قل كمت اصرف مني لا يسأل ولا يهتم قبل جان يتعارك اذا طلعت الف من راتب سند يكول هذا يفيدكم لوقت العازة والضاهر اجى هذا الوقت وكمت اصرف حتى على اولادك ياحسام من خير مروان
بكل موقف يسويه وياية كمت اتذكر حجي مروان من يكولي ما اريد ارجعج لهناك تنذلين لا يغرج حب حسام واستقتاله عليج بس هو مو رجال كفو الج وجنت اتعارك وياه ما اقبل يحجي عليه بس للأسف طلع كلامه صحيح خصوصاً بمواقفه الاخيرة واتعسها من الاولاد يتمرضون ويرفض ييجي وياية نوديهم لو يكولي روحي وية ثائر لو اخذي ابوية وياج ومن ما متواجدين اروح وحدي وارجع وحدي وهاي تكسيات اكضيها لا يوصلني ولا يرجعني ولا يتصل يسألي رجعتي بعدج شنو صار وياج ابد فاصل عن الدنيا كلها قبيح لدرجة المرار...
صوت مروان يتردد بأذني هو هذا شنو بزر النستلة وكمت احقد واكرها لحسام بالزايد الى ان اجى يوم القاضية حسمت كلشي بهذا اليوم
للتوضيح قبل فترة شبه تقسم البيت احنا اخذها الفوك وريناد وثائر اخذوا الطابق الجوا لان اطفال عندنا وما تكفي كلنا بغرفة كل عائلة اخذت غرفتين صار الفوك عبارة عن سويت كامل غرفة نوم اني وحسام وغرفة للأولاد وهول وسطاني وصحيات جنا نكدر نسوي مطبخ ونعزل بس على واهس ريناد شلت الفكرة من راسي وريناد اخذت غرفتين جوا غرفة حسام القديمة وغرفة ثانية بصفها وحطوا قاطع بينهم وبين الغرف الباقية...
وبيوم جنا كاعدين دنيا الظهر تغدينا وشربنا جاي قبل لا ييجي حسام لان متصل على خالو ومبلغه يتأخر وغداه يكون خارج البيت اللي محيرني لا خالو ولا عمة زهرة يعلقون على تغيير حسام رغم جان ملحوظ للكل
اندكت الباب سمعت صوته صاح ياالله دخل صوت اقدام وياه حسيته مو وحده ألتفتت واشوف لازم ايد بنية مبينة بعدها صغيرة ٢٦ او اصغر هيج عمر بهتت التفتت لريناد نفس ردة فعلي مصدومة وحاطة ايدها على حلكها خالو يخوط بالاستكان وعمة زهرة مبتسمة حسيت عندهم علم بهاي الدخلة المفاجأة كمت من مكاني وحجيت بصوت يرجف من الصدمة تلكئ الكلام بصدري
رسيل : هاي شكو؟ ممكن واحد يفهمني شنو كاعد يصير ؟ اكو مهزلة والكل يعرف بيها خالو احجي شنو هذا المنظر جنك راضي بيه ؟ وتدري !
دنك راسه ساكت عمة زهرة بضحكة كالت
زهرة : فوتي يمة اكعدي البيت بيتج
عاطت ريناد بصوت عالي
ريناد : بيت منو ؟ وين تفوت ؟ منو انتِ بابا وليش مجلبة بإيد زوج اختي ؟ شنو من صلافة هاي ؟ حسام شبيك منو هاي ؟ غير نفهم؟
حجى بكل صلافة وقباحة وقلة حياء
حسام : هاي زوجتي على سنة الله ورسوله حالها من حالج
حجاها ويباوع علية
ما تمالكت نفسي هجمت عليه اضرب بيه دفعني كمت ابجي وألطم اكمز بنصهم من قهرتي حسيت روحي اريد انجلط لزمتني ريناد وخالو كتفني واني اصرخ بعلو صوتي ولك ليش بشنو قصرت وياك ليش هيج كسرتني ليش خالو يهدأ بية ويقمشرني بكلمة حشاج من التقصير خالو
سحبتني ريناد من ايدي دخلتني لغرفتها جابت بطل مي بارد فتحته وفرغته فوك راسي
ريناد : لا تنجلطين منو يفيدج وانتِ عندج جهال براسج منو ألهم شفتيه الفترة اللي فاتت لا مهتملج ولامهتم لجهاله
رسيل : بشنو قصرت وياه فهميني بشنو اشو ولد اثنين مثل الورود خلفتله وتغيرت هواي علموده لا قصرت وياه ولا همتله نطيته مشاعر حقيقية بس هو دائماً يتهمني بالتقصير والكذب طلعت كلها حجج حتى بس يبرر سوايته الخايسة
ريناد : اللي راح يخبلني شوكت سواها شوكت شلون محد حس بيه
رسيل : جنت حاسة اكو شي بس مو مال زواج عبالي علاقة ونزوة وترة خالج يدري وحتى زهرة
ريناد : واضح من ردة فعلهم ومبينة الشغلة صايرة برضاتهم البنية صغيرة مستحيل يتزوجها حسام بدون مشية او على الاقل بحضور امه وابوه
كمت املخ بوجهي وابجي
رسيل : شنو ناقصها واخذت متزوج شو حلوة وصغيرة ومبينة خريجة ليش تجي وتهجم بيتي منو الية اني وجهالي منو ، ما ابقى هنا حياتي انتهت مستحيل اكمل
ريناد : اسكتي بلة وين تروحين بهالجهال هاي تبقين هنا ابيتج معززة مكرمة وهو ياخذها ويولي بأي مكان يريد بعيد عن عيوننا
رسيل : وليش ما بقاها بالخفاء ليش جابها كبالي يريد يحرك گلبي لو تعب وهو بعيد عنها جابها حتى يصير تحصيل حاصل يوم يمي واسبوع يمها
ريناد : صدمة صدمة ما اعرف شنو احجي لو شلون اعبر عن النار اللي بداخلي للحظة خليت نفسي بمكانج يمكن جان دخلت للمطبخ جبت سجين وخليتها بنص گلبهم...
بعد ساعة من الحجي وحركان الدم اندكت الباب صاح خالو وينكم بنات تعالوا شوية هنا
ريناد : شيريد هذا ؟
رسيل : ما اعرف امشي نشوفه
طلعنا للهول جانوا هو وعمة حسام ومرته طالعين اشرلي اكعد كعدت بس نار جواية اهز برجلي واباوعله منتظرته يحجي اللي عنده حتى اكوم واصعد فوك...
محمد : على كيفج اهدأي حتى نكدر نحجي وياج
ريناد : ليش اللي سواه حسام يخلي الواحد كاعد بمكانه
زهرة : انتِ اسكتي لا تنطنطين من مكانج
ريناد: اكصها لايدي اذا ما طلعتي ورا الموضوع او تعرفين بيه ورايحة تخطبيله بنفسج
زهرة : وليش ما اروح ؟ رحت اني وخالج طبعاً نروح شابة وصغيرة وخريجة ينطوها بلاش بس للولد
رسيل : واذا بيها كل هاي المواصفات شكو نطوها لواحد متزوج وعنده جهال مايعرفون وراها هجمان بيوت ؟ حسبي الله ونعم الوكيل
محمد : زهرة اسكتي خليني اني احجي لو شلون ؟
رسيل : خالو وفر عليك الكلام ماكو داعي ما راح يفرق عندي شي ترة
محمد : اللي سواه حسام على سنة الله ورسوله وبالحلال
قاطعته بحدة
رسيل : ويطبق شرع الله بية ؟ يكدر يساوي بينا بالمصاريف بالمحبة بالحياة الزوجية بكلشي يكدر ابنك هيج يسوي؟
محمد : ان شاءالله يكدر
صاحت ريناد دمها محترك
ريناد : اي يكدر هو من قبل اشهر هاملها لاختي لا اهتمام لا يدري بجهاله لا يحير بمرضهم لا بمصرف كله على رسيل ولعلمكم هاجر فراشها هم
رسيل : ريناد اسكتي
ريناد : ليش اسكت؟ شوكت ناوية تحجين ؟ من يجيبها فوك راسج ويكعدها
زهرة : وشنو يعني حرام تكعد حالها من حالنا شنو تحرمين شرع الله انتِ
ريناد : خلي ابنج يطبقه وبعدين احجي بشرع الله
محمد : خالو فوتي لغرفتج وخليني احجي كلمتين وية اختج ترة ماكادر احجي شي
ريناد : شنو تحجي خالو ليش هو اكو شي ينحجي بعد اللي صار اليوم؟
محمد : تريدين تهجمين بيت اختج لو شنو اريد افتهم؟
ريناد : هو مهجوم من يوم اللي سايرتوه ورحتوا خطبتوله وما فكرتوا ببنت اختك ياحسافة هيج يصير بينا بعد عين بابا لو جان عايش اخ اخ بس شنسوي للقدر
محمد : كومي لغرفتج حبيبتي بعدين نحجي اني وياج
كامت تأفأف اشرتلها حتى تروح هزت راسها وراحت لغرفتها بعدها اصر على عمة زهرة تتركنا طلعت مجبورة جان عاجبها تبقى تحرك بگلبي اكثر بهدوء التفتت على خالو وهمست
رسيل : شلون طاوعك گلبك تكسرني وانت تعرف اللي مريت بيه ؟
محمد : شسويله يابنتي اخليه يروح للحرام احسن هو يشكي يكول رسيل ما مكفيتني حقوقي ما ماخذها اني ما عايش حياتي بصورة طبيعية
رسيل : بس اني ما جبرته وحجيتله كلشي مريت بية وهو اصر ياخذني كلتله اني ما افيدك اني جسد بلا روح واصر يزرع روح جديدة بداخلي وهسه لا ضلت روح ولا ضل جسد خالو انتم ذبحتوني واذا صار بية شي خطيتي بركبتكم ليوم الدين ، انتم سويتوا بية الاسوء من بيت عمي اني جنت بالنطيحة صرت بالردية للأسف والله للأسف ما اكول غير شي..
لهناك فات حسام نافخ روحه ما يتحاجى كبل صعد فوك خالو صاح عليه ما رد صعدله ورا ربع ساعة نزلوا سوية ملامحه مرتخية عكس من صعد جانت محتدة كعدوا كبالي هو وخالو وكال
حسام : خليها تحجي اسمعها
يحجي موجه كلامه لخالو التتفت عليه بغصة حجيت
رسيل : من شوكت صرت عدوتك اني ؟ شوكت كمت ما تطيقني شو اني ما حسيت بيك من رحت من ايدي شلون ضيعتك هيج واجتي وحدة اخذتك مني ليش هيج سويت حسام؟ ليش حاربتني وذليت مشاعري وتتحجج كل يوم شكل تالي طلعت تحب وخاطب ومتزوج واني ما ادري تدري لو مصارحني وحاجيلي الحقيقة يابه رسيل ترة اني احب وحدة ورايدها على سنة الله ورسوله جان تفهمتك ويمكن تقبلت الوضع واعيش لخاطر اولادي واكمل حياتي وياك بس تعاقبني اشهر وتذلني وتصدمني بدخلتكم علية هاي اللي ما اكدر اهضمها صدمتي بتصرفاتك واسلوبك اكبر من صدمتي بخبر زواجك تدري لو لا؟
حسام : هسه شنو المطلوب مني ؟
رسيل : ما مطلوب سلامتك بس جان تكدر تبقيها بعيدة عن عيني وتتصرف ويانا طبيعي بدون ما تحسسني وجان عشت حياتك بالطول والعرض ليش جبتها كدامي ليش ؟ وين تريد توصل
حسام : لا اريد اوصل ولا اريد اسوي اي شي اللي صار تضايقت جنت مأجر وهسه زوجتي حامل زادت المصاريف ماجاي الحك لهذا جبتها هنا حتى تتأقلمون على الوضع وتعيشون سوية
رسيل : هنا بنفس البيت ؟
حسام : اي هنا
رسيل : وين تكعدها بلة ؟
حسام : فوك بغرفة وانتِ بغرفة ثانية وقدمت على سلفة بينما تطلع ابني بالحديقة مشتمل وحدة بيكم تكعد بيه والثانية فوك تريدين تبقين بمكانج براحتج بس هذا حل مؤقت
رسيل : واذا رفضت شنو يصير ؟
حسام : اللي ما عاجبه الله وياه ماجابر احد على عيشتي
صاح خالو بصوت عالي
محمد : حسام مو هيج
رسيل : عوفه خالو خليه يحجي اللي بگلبه ليش تسكته ، اي حسام كمل
حسام : شكمل اني اتحملت اشكال والوان نسيتي سوالفج وشلون تتعززين علية وكل يومية باجية كال مروان وحجى ايهم عدا تغلطين بأسمه بنومج ومرات تصيحيني بأسمه خليني ساكت متحمل وساكت گلبي يريد ينفجر
رسيل : بس اني ما جبرتك وحجيتلك كلشي مو رجولة منك هسه تعيرني وتنفض ايدك مني وبعدين انت اللي اجيت وفرضت نفسك فرض علية وحاربت امك في سبيل تتزوجي وعلى ها اني صديقج واحجيلي كلشي ونرمم جروح بعضنا هو اني غلطتي من آمنت بيك وفتحتلك گلبي نسيت انت رجال حالك حال البقية ممكن بأقل مشكلة تعيرني وتضم بقلبك وما تنسى بس تعرف شكد مريت بتعب وعذاب بحياتي وعلى اساس اخذت دروس وعبر من مشاكلي بس لا طلعت انت اكبر درس بحياتي انت الندم الاكبر اللي راح اعيشه ما اكول غير ياحسافة ياحسام
حسام : هسه خلصتي ؟ لو بعد عندج حجي ؟
سكتت ما جاوبته عافني وصعد فوك ورا شوية سمعت صوت سحب اغراض من مكان لمكان ألتفتت على خالو
رسيل : هذا يحجي صدك ؟ يريد يكعدها يمي بالطابق الفوك وكاعد يفرغ غرفة الاولاد ؟
محمد : وضع مؤقت بينما نبنيلج مشتمل بالحديقة تكعدون بيه انتِ واولادج
رسيل : خالو انت تحجي صدك لو كاعد تتشاقه ؟ معقولة انت تحجي هذا الحجي عقلي مايستوعب اللي كاعد يصير واللي انت تحجيه وموافق عليه
محمد : اني خجلان منج وبنفس الوقت يحبها وماكدرت امنعه يتزوج هو مو صغير
رسيل : عذر اقبح من فعل لو تسكتون احسن
تركته وكمت رحت لغرفة ريناد جانت واكفة ورا الباب تسمع ، رادت تحجي اشرتلها تسكت مددت غمضت عيوني وطلبت منها تخلي عيونها على الجهال وتتركني وحدي ، ما طلعت من الغرفة ابد بقيت لليل بنفس مكاني اكثر من مرة اجتي ريناد جابت اكل حتى اكل رفضت وطلبت منها تتركلي غرفتها الليلة ردت انام وحدي وافكر طول الليل ، حسام بقى يشتغل بالفوك اتوقع جيتها قريبة للبيت بقيت كاعد للصبح فكرة تجيبني وفكرة توديني كمت للحمام جانوا نايمين عائلة ريناد واطفالي بالهول تركتهم ومشيت غسلت وجهي وطلعت اسمعه يحجي بالموبايل يوصفلهم مكان بيتنا اتوقع كاعد يجيبوله اغراض بيته الثاني صارت ساعة عشرة كعدوا من النوم فاتت ريناد باوعتلي جرت نفس وكالت
ريناد : شلون صبحتي؟
رسيل : شنو تتوقعين وبيتي كاعد ينهجم ؟
ريناد : جابوا اغراض بيته عساهم لا تهنوا بيه
رسيل : خليه هو الخسران
ريناد : شنو راح تسوين ؟
رسيل : اطفالي كعدوا ؟
ريناد : اي هسه راح اريكهم بس بدلتلهم ما لحكت اسوي شي
رسيل : ياريت تستعجلين فدوة
ريناد : ليش ؟
رسيل : اريد اطلع شوية
ريناد : وين ؟
رسيل : اطلع لأي مكان اريد اتنفس اشتم هواء شلون يعني لازم احجي تفاصيل ؟
ريناد : براحتج اهم شي لا تعصبين محد يسوة
رسيل : بعده فوك لو نزل ؟
ريناد : طلع قبل شوية من طلعوا العمال
رسيل : اي زين
تركتها وطلعت صعدت فوك اخذت جنطة صغيرة خليت بيها مستمسكاتنا وشنو عندي ذهب وفلوس اخذتهم ، طلعت ملابس للأولاد والية سديت الجنطة بدلت وطلعت مودعة غرفتي ومكاني للمرة المدري شكد حتى تيهت الحساب ، الهول اللي مسويته بين الغرف متروس اغراضها وغرفة الاولاد بيها اخشاب غرفتهم بعدها ما منصوبة نزلت اسحل بجنطتي شافتني ريناد عكدت حاجبها تتسائل..
ريناد : خير ياطير هاي وين ؟ مو كلتي اطلع شوية لو طلعة نهائية هاي ؟
رسيل : طلعة نهائية
ريناد : وين رايحة وساحلة وياج كوم زعط ابقي هنا وغصبن عنه يصرف عليكم ويعيشكم انتِ اساساً مو بحاله
رسيل : لا بحالة ولا بحال غيره اريد اطلع اسوي جارة لروحي واستقر اني واطفالي
ريناد : وين تلكين هذا الاستقرار بالشوارع ؟
رسيل : اذا لكيت استقرارنا النفسي بالشارع راح ابقى بيه المهم ما اظل تحت رحمة حسام وامه وفوكاها اجتني مرته صدقة
ريناد : وين رايحة زين خليني اجي وياج اطمئن عليج وارجع
رسيل : اني اصلاً ما اعرف وين رايحة حتى تجين وياية
ريناد : مو راح تاخذين تكسي شنو تكوليله وين يوديكم ؟
رسيل : ما اعرف اصعد والله كريم
ريناد : اصبري اتصل على ثائر ييجي ياخذج وين ما تريدين
رسيل : اي شي منهم ما اريده الله يخليج لا تلحين علية ترة اعصابي تلفانه
ريناد : شلون اخليج تروحين وحدج والله صعبة رسيل خليني اجي وياج ما احجي شي ولا اضوجج على الاقل عيوني على جهالج
رسيل : ألتهي بأطفالج وبزوجج اني بيتي انهجم انتِ ليش
ريناد : ثائر كلش متعاطف وياج ومقهور صدكي راح يوكف وياج لا عبالج اذا اجيت يسويلي مشاكل
رسيل : ريناد حياتج ابعديها عن حياتي لا تحاربين احد ولا تنطين لسان لاحد وعيشي حياتج مثل قبل اعتبريني ما اجيت لهنا
كامت تبجي حضنتني بشهكة تحجي
ريناد : انتِ ليش ماعندج حظ وليش هيج القدر لعب ويانا كلما ننجمع نرجع نفترق ليش ما مكتوبلنا نعيش قريبات من بعض
رسيل : مو بعيدة عنج ولا راح اكطع وياج بس استقر اتصل عليج تجيني
ريناد : بس امانة لا تعوفيني بدون اخبارج ترة اتخبل كل شوية اتصل عليج تجاوبيني انتِ لا تتصلين خلي الرصيد للضروريات عندج رصيد مو ؟
رسيل : اي عندي وفلوس عندي قبل لا تسألين
ريناد : مودعة بالله حبيبتي
حضنتني بقوة وبجت على صوتها طلعت زهرة من غرفتها كامت تحجي وتسمعني سحبت جنطتي واولادي وطلعت من البيت تركتها تهدد اذا طلعتي ما الج رجعة لهنا واذا اخذتي الاولاد نشتكي عليج ومن هالحجي الماصخ ، سديت الباب ومشيت دموعي نزلت انهضمت امشي وعيوني على السماء احجي وية ربي ، الهي وين اروح بجهالي لاعندي مكان لا عندي سند بس انت سندي بهاي الدنيا وين اروح وين ؟ سخرلي ولد الحلال اللي يوكفولي اذا مو لخاطري لخاطر هاي الجهال
وكف تكسي صعدت بدون ما احجي وياه هو نزل صعد الجنطة بالصندوك مشا بينا باوعلي بالمرايا وكال...
- وين توصلين ؟
صفنت عادها علية اكثر من مرة جريت حسرة وهمست
رسيل : اخذنا لدرب النجف
صف السيارة وكال
- اعذريني ما اكدر اروح
رسيل : شكد ما تريد انطيك بس وصلني
- مو قصة فلوس بس سيارتي ما توصل
رسيل : ٥٠ الف زين
صفن علية بالمرايا وكال
- اذا ٧٥ تسوة اروح
رسيل : هذا هو نوصل وانطيك كروتك
مشا بينا واني صافنة بالشباك مصطفى بحضني وسند وصادق بصفي كاعدين ورا شوية ناموا كلهم ، اتصلت علية ريناد فصلته ودزيتلها مسج كتبتلها اني زينة لا تتصلين اني اتصل عليج ، كتبت ديري بالج على روحج وين انتِ هسه ما جاوبتها سديت الموبايل ورجعت راسي ليورا وصافنة بزماني وين اروح وين اوديهم ما اعرف شكد مر وقت ما ادري سمعت السايق يحجي ألتفتت عليه
- وصلنا النجف وين تروحين للأمام ؟
رسيل : اخذني للمقبرة
- اكو مكان محدد بيها اوديج كبل عليه ترة كبيرة وخاف تغرب الدنيا وتيهين
رسيل : لا ما اندل انزل هناك واسأل
- خوية وياج جهال صغار والدنيا بعد شوية تبدي تغورب شلون تبقون وحدكم بالمقبرة
رسيل : يعني شنو راح يصير ؟ كلها ميتة خوفك من العايشين لا تخاف من واحد ميت
- ما اعرف شنو اكلج بس نادراً الناس تبقى لليل كلها تخاف تجي بهيج وقت والمحبب الصبح الزيارة
رسيل : المهم وصلني وما عليك رحم الله والديك على اهتمامك وخوفك
وصلنا للمقبرة حاسبته ردت انزل كال
- خليني ابقى وياكم او قريب عليكم لو تريدين تخلين الجهال يمي بالسيارة وانتِ روحي
رسيل : اخوية اخذ كروتك وتوكل على باب الله ورحم الله والديك على التوصيلة وعلى حرصك
نزلت الجهال وكفنا على صفحة جاب الجنطة خلاها بصفي وكال
- انطيج رقمي في حال ما لكيتي تكسي اني ارجعج
رسيل : لا تسلم
صعد سيارته وراح مشيت اجر الجنطة بإيد ومصطفى شايلته بإيدي الثانية وسند لازم صادق ويمشون بصفي ..
سند : ماما وين رايحين ؟
رسيل : لأبوك
سند : بابا مروان ؟
رسيل : اي
حجيتها وجريت حسرة ، مشيت ادوره بين الكبور امشي واسأل محد يعرفه بطرانة يارسيل تسألين عن الاسم غير تعرفين وين بيا مكان ، المشكلة كل مرة اجي وياهم ما احفظ نقطة دالة او شي قريب عليه وعلى اهلي بقينا نمشي حسيت بتعب وجوع وعطش الولد هم تعبوا نزلت دموعي عليهم شنو ذنبهم يتبهذلون بس من حركة گلبي اجيت لهنا ماكو مكان ارتاح بيه غير يمهم اعزاز گلبي هنا بابا وماما ومروان وروحي وياهم اخذوها يمهم بدات الدنيا تغرب كمت امشي واتلفت مذعورة صحت بصوت عالي
رسيل : مروان وينك مروان ولك رسيل اجتك وحدها هي وابنها ولك مروان تعال شوف حالي لا سند ولا واحد حواني بيهم ولك ماكو بعدك رجال ماكو مالكيت واحد بيهم عنده غيره علية مثلك ولك عيوني انت وينك لا تعبني وياية جهال ، مروان الله عليك دليني وينك مو وحدنا نمشي وصارت الدنيا ليل ترضاها الجهال يخترعون ، مروان اني خايفة وحدي جعت وعطشت والجهال على ريوك الصبح وينك ياروحي وينك
يأست كعدت بالكاع اني والجهال بقيت اباوع على القبور وابجي بصوت عالي واشهك لهناك واسمع خطوات تقترب مني ما خفت بس لميت جهالي بحضني باوعت رجال ملثم تقرب منا وكال
- عليمن جاية ؟
رسيل : جاية لقبر زوجي الشهيد وتيهت
- وين مكانه بيا فتحة شنو اقرب شي عليه
رسيل : لو اعرف واندل جان مو هذا حالي
- انطيني اسمه وهسه اتصل على باقي الولد اكيد يعرفون وين وانطيني وقت استشهاده بيا سنة اندفن
اخذ التفاصيل اللي يريدها طلع موبايله اتصل وبعدها التفت علية وكال
- امشي وراية
مشى كدامنا مشيت وراه مثل العمية نطلع من مكان نفوت للثاني الى ان وصلنا مشينا تقريباً ٢٠ دقيقة
سند : ماما عطشان بعد ما اتحمل
رسيل : هسه حبيبي ، عفية بلا امر عليك بس اذا اكو مكان يبيعون بيه مي
- لازم اطلع برا واشتريه
رسيل : اذا تكدر تجيبلنا بلا زحمة عليك الاطفال عطشانين وراح من بالي اجيبلهم
- هسه رايح ماكو اي زحمة
دنكت اطلع فلوس من الجنطة رفعت راسي باوعت ماشي مسافة عنا فتحت جنطة الملابس نيمت مصطفى عليها
رسيل : سند ماما تعالوا اكعدوا هنا لا تتحركون
كعدتهم وامنت عليهم التفتت على قبر مروان شمرت نفسي عليه نزلت دموعي بللت مرمر القبر مالته
رسيل : مروان شلونك زين ؟
حجيتها واختنكت صوتي راح خليت ايدي على وجهي وابجي بقيت على هذا الحال وقت ما اعرف شكد بس اللي ادري بيه هواي يمكن ساعة او ساعة ونص فزيت على صوت مصطفى يبجي طلعت الحليب والممة سويتله وكعدت اشربه باوعت على سند وصادق كاعدين واحد شابك الثاني وبيدهم كعك ياكلون بيه مدلي بطل مي هزيت راسي بمعنى ما اريد رجع حضن اخوه وكعد ، الرجال الله ينطيه العافية جايب مي وكعك ناطيهم للجهال واني ما حاسه عليه سحبت نفس ورجعت التفتت لقبر مروان اعاتبه
رسيل :حبيبي مروان وين رحت وعفتني وين ياروحي ؟ تدري بس ضاقت الدنيا بية اول مكان فكرت اروحله هو قبرك ، عكس قبل جنت انهزم منك وألجئ لغيرك بس شكد طلعت غلطانة، تسمعني مو ؟ اي ادري بيك تسمعني وينك مو كلت ما اعوفج ؟ ها ؟ كوم اكعد تعبت يلا اندليتك جايبة الجهال وياية وتبهذلوا ولك افتر بين الكبور واصيح مروان ادورك هيج واجتي عيوني على اسمك مكتوب على المرمر ولك ما تلوكلك النومة هنا يا حبيبي ما تلوكلك ولك انت شلعت گلبي واخذته وياك مروان ..
جريت حسرة جبيرة ورجعت احجي وياه
رسيل : تدري بعد اللي صارلي والطعنات اللي انطعنتها كمت ما ألومك من رفضت ارجع لبيت خالو بوقتها شكد ضجت منك من كلت ما اريد يوصل خبر لبيت خالج ويعرفون بيج بعدج بنية كذبت عليهم وبلغتهم بخطوبتنا اللي ماجانت موجودة اصلاً عاتبتك بعدها هواي وزعلت منك بس انت جنت صح وكل كلامك الي حجيته جان بمحله بس اني غبية وعنودية شنو تسميني سميني
تعرف شكد تايهة ما اعرف وين اروح فهمني شنو اسوي اجيت عليك واريد تنطيني اشارة او تدليني على مكان أأمن بيه على اولادي وعلى نفسي لو بيدي ابقى هنا بينك وبين بابا ذلوني بعدكم هووواي وكسروني تعبت اخذني وياك اريد ارتاح الدنيا تعبتني ، وين الكاك اذا ادورك بيا محافظة بيا محلة بيا زقاق وين ادورك وين يكولون الشهيد يبقى عايش ما يموت يسمع اهله ويحس بيهم خصوصاً اذا جان يحبهم اجيتك وجيتي بيها عتب هواي لو ابقى ايام احجيلك واعاتبك ما راح اخلص ...
جنت احجي بدون وعي للحظة حسيت راح افقد وبديت اهذي بكلامي لهناك وحسيت انحضنت هاي مو ايد سند ايد كبيرة معقولة مروان ؟ سمعت صوت بأذني يهمس عليج الله كافي مو شلعتي گلوبنا من التفت هاي نور وراها ايهم واكف وبعيد عنهم ياسر بيده سند وصادق ومصطفى شايله ايهم حضنتني بقوة وكامت تبجي صافنة عليهم هاي بالفعل موجودين لو كاعد اتخيل صحت على سند
رسيل : سند ماما تعال هنا ليش واكف بعيد عني ؟ مو كلتلك لاتتحرك من مكانك ؟
سند : ماما اني يم عمو ياسر لا تخافين علية
هنا تأكدت اللي شفته وسمعته صحيح كامت نور رفعتني من على الكاع مشيت وياها لقبر بابا قريتله الفاتحة بعدها رحت على قبر ماما قريتلها الفاتحة ومشيت وياهم صعدت بالسيارة بدون وعي مجرد رجعت راسي ليورا غمضت عيوني وغفيت امنت اولادي يم نور وغطيت بنومة عميقة ما حسيت الا واني كبال البيت صفنت على الباب والمكان والشارع تذكرت اول مرة مروان جابني هنا بوقتها جنت جاية وكلي كره لهذا الانتماء عكس هسه حاسة براحة وكأنما جنت طالعة من بيتي ورجعت ، نزلت انفتح باب البيت ودخلت ما شفت منو بصفي ومنو كدامي دخلت للبيت مابية احد فارغ سمعت نور تكول اصعدي لشقتج ارتاحي واسبحي غيري ملابسج بينما ابدل للجهال واوكلهم ، صعدت رجل اصعد بيها والثانية ترجعني ليورا بكل ثانية ونفس اتذكر ذكرى عشتها هنا بين الحلوة والمرة وصلت باب الشقة حسيت باب ايهم انفتح ما التفتت دخلت كبل وسديت الباب حسيت براحة مو طبيعية حسيت بأمان حسيت روح مروان حاوطتني رحت كبل للحمام سبحت وطلعت لغرفتي مددت على السرير كلشي تركته نفس مكانه بعده اغراضنا ملابسنا ترتيبي للشقة كلشي ما متغير بس منظفيها مابيها تراب ابد ، باوعت للساعة جانت سبعة الصبح مددت وسرعان ما غلبني النعاس نمت بدون ما افكر بأي شي ماحسيت الا وباب غرفة النوم تندك فتحت عيوني فز گلبي من لكيت نفسي بغرفتي القديمة كلش فرحت حسيت رجعت لمكاني لانتمائي صحت بصوت ناعس منو ؟
انفتح الباب دخلت نور مبتسمة وعيونها مدمعة من شفتها ضحكت خليت ايدي على حلكي حتى صوتي لا يطلع
نور : كومي عيني كومي قبل جنت مبتلشة بيج هسه ابتلش بيج وبخلفتج هم
مطيت جسمي وهمست
رسيل : ساعة بيش هسه ؟
نور : ساعة خمسة العصر
كمزت من مكاني وكفت كبالها مصدومة
رسيل : جذب ولج ليش عفتيني هلكد نايمة ؟ جان كعدتيني مو هذا مصطفى يرضع مني
نور: اول شي حتى لو جنتي كاعدة ما جان خليتج ترضعيه لان حليبج شايط اثنين ياعيوني الاستاذ منعني اكعدج واليوم ماخذ عطلة وكاعدلج وية الجهال
رسيل : منو قصدج ؟
نور : منو غيره بدينا نغشم نفسنا ؟
رسيل : ايهم قصدج ؟ليش ومرته وين وعايفته براحته يسرح ويمرح وية جهالي ؟
نور : البارحة قبل لا نجيج سمعت راح نجيبج تعاركت سوتلها زعلة وراحت لأهلها كالت اني ما اخلص من رسيل وشبحها
حجتها وضحكت
رسيل : الله اشتاقيت لايام المشاكل تصدكين
حجيتها وضحكنا
نور : امشي تغدي من البارحة ما ماكلة شي
رسيل : اريدج تحجيلي شلون عرفتوا اني بالمقبرة وشلون اجيتوا وشنو صار
نور : يابه احداث تشيب كومة صارت اشياء اكلي وكملي وننزل بالحديقة نتعلل ونسولف براحتنا
رسيل : يلا بس ألبس
انتظرتني غيرت ملابسي لبست حجاب وطلعنا
رسيل : ادري غمضي عيونج بالجذب ما تشوفيني ابدل
نور: ديلا على اساس ما جنت اسبحج بيدي
ضحكنا ونزلنا الدرج عيوني صارت عليه وعلى جهالي كاعد بوسطهم ومصطفى بحضنه منيمه رفع راسه باوعلي ابتسم وكال
ايهم : مساج الله بالعافية
رسيل : الله يعافيك عذبوكم الجهال ليش ما كعدتوني ؟
ايهم : كلت لنور تعبانة خليها ترتاح وتلحك على الجهال وهوستهم
رسيل : عمي وين بيبي ؟
ايهم : بيبيتج لا ايد ولا رجل نايمة ابيت عمي وابوية بعده ببغداد
رسيل : شيسوي هناك ؟
ايهم : تغدي ونحجيلج كلشي
التفتت لنور عاكدة حاجبي بمعنى شكو شنو صاير عافتني وراحت للمطبخ رجعت باوعت لأيهم مستفسرة حجى مبتسم
ايهم : كلشي أله حل لا تشيلين هم ارتاحي يابه تعبتي هواي
هزيت راسي ساكتة
ايهم : سند كوم من حضن امك رجال انت حبيبي
رسيل : لا خليهم مرتاحة
ايهم : شلون راح تتغدين واثنينهم بحضنج؟
رسيل : متعلمة عليهم ماعندي مشكلة
بقى ياشر لسند لحدما نزل من حضني وراح كعد يمه ، اجتي نور جابت الاكل خلته كبالي وكعدت ابتسمت
رسيل : ياربي شكد مشتهية اكلاتج احس روحي بحلم رغم مشكلتي وتشتتي وما اعرف شنو مصيرنا اني والجهال بس حاسة براحة غريبة ما اعرف اوصفها شنو
نور : سبحان الله جنتي تدكين وتلطمين حتى تردين لبغداد هسه صارت راحتج هنا ؟ شلون دنيا متقلبة
رسيل : اي والله يانور اني اصلاً حياتي عشتها مو بأختياري هاي المرة اريد اعيشها بأرادتي واكون مرتاحة لهذا الاختيار
نور : الله يقدم اللي بيه خير الكم اكلي حبيبة اكلي
بديت اكل سألت سند اذا يريد ياكل نور كالت اكلي كلهم مغديتهم قريب ما اخلص اكل راحت جابت الجاي واجتي وديت الصينية للمطبخ ذممت علية اغسلها تركتها ورجعت كعدت يمهم اشرب جاي ، اجى تليفون لأيهم استأذن وطلع برا يخابر بعدها دخل اخذ سويج السيارة وكال رايح لياسر للمعمل ، اول ما سد الباب ألتفتت لنور سألتها
رسيل : يلا سولفي شنو صار ؟
نور : جنت اسوي بالغدة ساعة ١١ الصبح اتصل علية ياسر وكال
ياسر : نور بدلي ملابسج عشر دقائق ونجيج نروح لبغداد نجيب رسيل
نور : يا شبيها رسيل ونجيبها خوما صاير وياها شي ؟ اني من البارحة اتصل عليها ماترد وكلتلك ياسر بالي يمها كلتلي ملتهية وية جهالها شفت
ياسر : هسه تبدلين لو شلون ؟ عوفي الحجي
نور : ماشي هسه ابدل
سديته منه وصحت على غيداء
نور : غيداء انزلي جوا كملي الغداء الج ولابنج
مدت راسها من فوك وكالت
غيداء : شو الية ولأبني ليش وانتم؟ طالعين ؟
نور : اي رايحين لبغداد عينج على البيت
حجيتها وصعدت الدرج وصلت لشقتي كالت
غيداء : منو ومنو يروح ؟
نور : ما اعرف ياسر خابرني وكال بدلي غيرها لا تسأليني
غيداء : ايهم يروح لو لا؟
نور : عندج موبايل خابريه واسأليه انه شكو ؟
تركتها ودخلت غيرت ملابسي وطلبت من اية تبدل الها ولاخوها حتى اوديهم يم اهلي كملت قفلت الباب ونزلنا جوا اسمع صوتها تصرخ من الشقة وتتوعد ورا شوية دخل ايهم بدون ما يحجي صعد فوك معصب صاير نار صارت مشادة كلامية بينهم انتهت بزعلتها نزلت اخذت ابنها وجنطة ملابس وطلعت وصلها ايهم ورجع صعد ويانا وتوجهنا لبغداد بالطريق عمي علي خابر خالج متصل عليه يسأله عنج
ياسر : اي عندي علم وهسه رايحين لبغداد
علي : خالها خابرك ؟
ياسر : لا ريناد اتصلت على ايهم تدك وتلطم تصيح ألحكوا اختي هي وجهالها ما نعرف وين وهسه رايحيلهم
علي : مروا علية اجي وياكم
ياسر : شعندك جاي طريق طويل وتتعب
علي : مو لازم هسه اخلي السايق يجيبني
ياسر : شنو السالفة انه جاييك
سد الخط رجع اتصل عليه ما يرد
ايهم : خليه يروح وية السايق اذا جبنا رسيل وين نخليها هي وجهالها ؟
ياسر : يعني انت مصر تجيبها لهنا؟
ايهم : اي
ياسر : انه برأيي نصالحها وية رجلها يابه عندها اثنين منه وين تروح بيهم ؟
ايهم : انه اعرف شنو كاعد اسوي
ياسر : ايهم رجعنا ؟ مو عندك عائلة ما فكرت بيها ؟
ايهم : اللي يسعد رسيل اسويه حتى لو اعرف اطمس روحي بالنار واي نقاش مرفوض
سكتوا وصلنا لبغداد صفينا السيارة بباب بيت خالج اتصل عمي كال لا تدخلون انتظروني ندخل سوية انتظرناه نصف ساعة وصل نزلنا دكينا الباب طلع خالج ورجلج الكلب عذريني على الغلطة بس احترك گلبي من اللي سمعته منه..
دخلنا للأستقبال جانت ريناد كاعدة ودموعها تنزل وزوجها يمها ، خالج وزوجج كعدوا كبالنا عمتج ما شفناها ولا طلعت سلمت علينا
علي : الله بالخير
محمد: الله بالخير والعافية
علي : احجولنا شنو صار والبنية هجت وما بلغتكم بمكانها
خالج حجى كلشي صار وياكم الى ان وصل لموضوع زواج حسام وجيتهم للبيت هو وزوجته هنا ايهم ما تحمل كام وضربه بوكسات على وجهه وعيونه ما اعرف الدم منين كام ينزل
ايهم : كلب اذا مو كد المسؤولية ليش تزوجتها ليش ما تركتها ليش ؟
حسام : المفروض هسه تفرح راح ترجعلك ولو صارت مستعملة اكثر هواي بس الحب يفوز بكل مرة
ايهم : يا كلب يا نذل تحرم عليك رسيل ليوم الدين وجهالك تحلم تشوفهم بيوم
حسام : مو بكيفك جهالي اخذهم واعلى ما بخيلك اركبه
خنكه من ركبته كز كلى اسنانه وكال
ايهم : اسمعني لك تتذكر مروان شنو سوه بيك ؟ وحازم بطلقة عوق رجلك تعرف انه شنو اسوي ادفنك وما يرمشلي جفن وحك علي ابن ابي طالب ( عليه السلام )
تدخل خالج فاككهم وكال
محمد : عوفه اللي تشوفه رسيل وتريده اني وياها حتى لو جان على حساب راحة ابني
حسام : يابه مو بكيفك تقرر تجي هنا وغصبن ما عليها واذا ما اجتي اطلبها بيت طاعة
ريناد : اي و هاي وين تروح تطلكها ؟
حسام : هاي زوجتي وعندها اسم وغصبن على خشومكم تحترموها
ريناد : احترمها انت احنا ما نحترم اللي تهجم بيوت غيرها شلون عيون صلفة
حسام : لج هاي عليمن
تقرب عليها راد يضربها وكف رجلها كدامه وحذره يتقرب منها ، اخذها ايهم وطلعوا برا طلعت وراهم
ريناد: ايهم اختي ما اعرف وين راحت ولا تقبل تجاوبني من اتصل عليها
ايهم : انه اعرف وين هسه رايحلها
ريناد : وين الله عليك برد گلبي راح اتخبل
ايهم : لا تخافين ، نور صيحي ياسر وخلينا نستعجل
دخلت اشرتله وطلعنا ودعنا ريناد وصعدنا السيارة
ياسر : وين رايحين ؟
ايهم : اطلع للنجف
التفت عليه مستغرب
ياسر : شعندك ؟
ايهم : رسيل هناك
ياسر : خابرتك لو خابرت ريناد شلون عرفتوا؟
ايهم : لا خابرتني ولا خابرتها انه اكول
ياسر : خمنت يعني ؟ يمعود طريق النجف طويل نروح وتالي ما نلكاها خلينا نسأل عليها هنا نشوف وين راحت
ايهم : ما عندها احد عليمن تروح ؟ وبعدين وين تدورها
ياسر : شمدريك احتمال عندها صديقة شي
ايهم : ما عندها احد كلتلك اطلع للنجف
ياسر : ادري عايش وياها انت ؟
ايهم : ما عايش وياها فد اعرفها اكثر ما اعرف نفسي
جر نفس ياسر وزفره بطريقة معناها نروح وامرنا لله نشوف وين تاليها
وصلنا للمقبرة جانت الدنيا ليل التفت ياسر على ايهم يريد ينفجر
ياسر : اكو براسك عقل منو يفوت للمقبرة باليل ؟
ايهم : رسيل
تركنا ونزل نزلنا وراه توجهنا لقبر مروان من بعيد ونسمع صوت بجي ونحيب وكف ايهم مخنوك بعبرته وكال
ايهم : كلتلكم الكاها هنا انه گلبي ما يجذبني
مشينا وصلنا يمج اخذنا الجهال بحضنا كل واحد اخذ واحد وكعدنا على التراب نسمعج ونتفرج على الحال اللي وصلتيله دموعنا تنزل وياج والباقي تعرفيه انتِ
رسيل : حسبي الله ونعم الوكيل بيهم تدرين اني خايفة على ريناد لا يأذوها اعرفها ما راح تسكت وخوفي لا تهجم بيتها بإيديها
نور: اذا هذا البيت باقي على حساب كرامتها وكرامة اختها تنداس وما تحجي طز بهيج بيت ولا تستبعدين اذا سكتت وانتِ سكتي اخوه يسوي سواية رجلج
رسيل : لا ثائر يختلف وحباب
نور : حسام هم جان حباب بيوم من الايام اسكتي رسيل عفية
ضلينا نحجي الى ان رجعوا الولد سوينا عشا تعيشنا وبعدها طلعنا للحديقة كعدنا صاح ياسر
ياسر : نور جيبي الطاولي بدربج
ابتسمت بقهر وهمست
رسيل : ما جايبيلنا شي حتى نشجعكم عليه
دنكوا راسهم اثنينهم بعدها طلع ايهم للشارع اجتي نور جايبة الطاولي وراها جابت صينية الجاي وكعدت
نور : ايهم وينه ؟
ياسر : طلع هسه يرجع
ورا ربع ساعة رجع جايب علاكة مليانة حلويات واجباس فرشهم على الميز باوعلي وكال
ايهم : كل اللحظات ممكن تنعاد بس احنا مو احنا
رسيل : ولا اللي جان يفوت من برا ويشوفنا كاعدين ويكعد يريد يلعب واعوفكم واكوم وراها يسوي مشكلة لان طبيت وحسسته بضوجتي راح يعيده الوقت ويرجع بوسطنا
حجيتها جريت حسرة نزلت دموعي باوعلي ياسر عاكد حاجبه وكال
ياسر : تحبيه لمروان ؟
رسيل : ليش ما احبه يعني شنو تتصورني اكرهه ؟ لو شنو ؟
ياسر : انه عبالي لحد آخر يوم بحياته هو متعذب بسببج وما مرتاح لهذا جنت حاقد عليج وحاربتج رغم نور تحجي وتبرر فد ما جنت اصدكها
رسيل : اللي صار صار ما اريد ارجع اتذكر شي ولا نلوم بعضنا
ياسر : يلا خلونا نلعب لا تكلبوها مناحة
رسيل : اني تعبانة رايحة ارتاح
ياسر : تونا كاعدين وين ؟
رسيل : ما اكدر صدكني تعبت
باوعت لأيهم مدنك ويتصفح بموبايله ما رفع راسه ابد اخذت الولد وصعدت فوك
ثاني يوم رجع عمي من بغداد كعد وياية حجينا هواي اخرها ختمت كلامي بقراري بالانفصال
علي : متأكدة من قرارج ؟
رسيل : اي عمو اريد اعيش مرتاحة بدون حركان دم وقهر ولا اعيش اطفالي ببيئة مليانة مشاكل وعقد نفسية اريدهم يرتاحون مو مثل حياتي خلصتها تعب بتعب
علي : اكعدي وية ايهم واتفقوا على كلشي تريديه
رسيل : وايهم شعليه ؟
علي : هو راح يوكل محامي ويتكفل بكلشي يخصكم
رسيل : عمو ما احتاج احد ايهم عنده عائلة وما اريد تتأثر عائلته بوكفته وياية
علي : ما تتأثر لا تخافين
ضلينا نحجي بالساعة تقريباً بعدها اجى ايهم وكعدنا وحدنا بالاستقبال حجينا بهواي امور تخص حياتي وحياة الاولاد
ايهم : انتِ متأكدة من قرار طلاكج ؟
رسيل : اي ومابية رجعة بعد
ايهم : وين عاجبج تعيشين بعد الانفصال ؟
رسيل : جان كلتلك بشقتي فوك بس ما ترهم نبقى بنفس البيت افضل اكعد ببيت من بيوت مروان الله يرحمه
ايهم : وشلون تعيشين بيه وحدج صعبة يارسيل
رسيل : احسن الية والكم هالمرة اللي يوكف بوجهي انت عانده وسكته الله يخليك ما بية حيل مشاكل ابد تعبانة واريد اطفالي يعيشون براحة وجو بعيد عن المشاحنات
ايهم : اكو بيت ورانا لمروان بس بيه مؤجرين راح احاول اطلعهم لبيت ثاني من بيوت مروان ومن ينتقلون نرتبه ونأثثه وتكعدين بيه
رسيل : شكراً
ايهم :بعدني ما مسوي شي انشكر عليه
رسيل : حتى لو شكراً قبل لا تسوي شي من رخصتك
تركته وطلعت ، مرت الايام وصار شهر على طلعتي من بيت خالو وصلت ورقة طلاكي خالية من كل حقوقي لا حاضر ولا غايب بيها ومن سألت كالوا عاند يطلكني الا اتنازل عن كلشي والمقابل يتنازل عن حضانة الاولاد الية والمحامي اللي وكله ايهم هو تكفل بكلشي وصار التنازل ، ما اهتميت المهم اخلص منه واولادي يبقون يمي ، اتصلت على ريناد الوضع بعده متأزم يمهم والعروس جايبها ماخذه الفوك وزهرة طايرة بيها الكل ما مهتم لطلعتي بس ريناد متأذية وخالو..
طلعوا المؤجرين ورحت للبيت شفته جانت وياية نور وبعدين ايهم اجى
ايهم : هذا كله ينصبغ ونسويه بيه ديكورات ونأثثه يلا تكعدون بيه
رسيل : عليمن ديكورات صبغ واثاث بسيط وهذا هو
ايهم : لا تخافين عبالج راح اصرف ترة كله من فلوس مروان
سكتت وراها رجعنا ثاني يوم طلع عمال اشتغلوا بالبيت وطلع عمال من شركة حتى ينظفوه من كمل اجى جايبلي المفتاح حطه بيدي
ايهم : هذا مفتاح بيتج الجديد وان شاءالله تكون حياتج سعيدة بيه
رسيل : تسلم ربي يحفظك اكدر اروح اشوفه؟
ايهم : اي تكدرين تحبين نروح هسه ؟
رسيل : اشوف نور اذا ماعندها شي نروح
ايهم : انه ما اكل بشر اذا رحتي وياية بدون نور
رسيل : ما اريد تجيني حجاية لو واحد يشوفنا ويوصلها لزوجتك وتصيرلك مشكلة بسببي
ايهم : هممم شوفيها واذا ماعندها شي وماتكدر ناخذ سند ويانا
رسيل : ماشي
رحت على نور جانت تنظف بالسطح وكالت خلوها بالليل ما اكدر نزلت بلغت ايهم كال لا نروح هسه حتى وراها نروح نفتر على الاثاث صعدت بدلت ملابسي وبدلت لسند وخليت اية يم مصطفى وصادق تدير بالها عليهم بينما امها تجي يمهم اية كبيرة صايرة حبيبتي وتفتهم
طلعنا وصلنا للبيت من برا يفتح النفس الباب لونها ابيض ومكحلة بلون رصاصي بداية البيت اكو طرمة مساحتها تكفي سيارة وعلى اليسار حديقة كلش حلوة ومرتبيها بالجديد ، داخلت للبيت بالبداية استقبال على اليسار وعلى اليمين مطبخ واثنينهم يطلون على البرا ، ورا المطبخ اكو حولي صغير وغرفة وفوك اكو غرفتين نوم وحمام ، التفتت على ايهم مبتسمة
رسيل : ايهم البيت يفتح النفس ماشاءالله
ايهم : تتهنون بيه ان شاءالله
رسيل : امين يارب
بعدها طلعنا صعدنا السيارة التفت علية جنت كاعدة ورا
ايهم : من وين تحبين تختارين الاثاث ؟ من معرضنا لو من غير مكان
رسيل : ما يهم اي مكان عادي اشتري منه
توجهنا للمعرض حتى نشتري اثاث للبيت قبل لا انزل دخل جوا طلع العمال بقى بس هو وياسر اجى فتح باب السيارة وكال
ايهم : يلا انزلوا
رسيل : ليش طلعت العمال ؟
ايهم : حتى تاخذين راحتج
دخلت للمعرض سلمت على ياسر وافتريت اختاريت تخم القنفات وغرفة نوم للاولاد عبارة عن كنتور وثلاث اسرة واختاريت غرفة نوم الية ، تحفيات على اكسسوارات اخذت للبيت ، جنت ماخذة راحتي من اختار لان اعرف هذا المعرض اكثر من نصف فلوسه لمروان ، رحت لأيهم وبلغته بأختياري سجلهم بالدفتر وبلغ ياسر يجهزهم من المخزن
ايهم : بعد الكاونتر واغراض المطبخ بطلعة ثانية نشتريهن
رسيل : ان شاءالله
رجعنا للبيت ومشى اليوم عادي بين سوالفنا اني ونور وبين اطفالنا ، ثاني يوم وصلت اغراض البيت للعصر كملوا شدهن جهزت اغراضي اللي اريدهن والنواعم اللي بالمطبخ والاجهزة الكهربائية الموجودات بالشقة حتى ما اشتري اغراضي بعدهن جدد خليتهم على صفحة وطلبت من ياسر ينقلوهن للبيت الجديد ، ثاني يوم رحت اختاريت الكاونتر والطباخ والثلاجة ورحت بوجهي لبيتي بلشت انظف بيه بحماس اتصلت نور جاوبتها
رسيل : هلو حبيبتي
نور : شنو كال ايهم باقية بالبيت تنظفين مو اتفقنا نروح سوية ؟
رسيل : خليج يم الجهال وين نجيبهم بين رجلينا ؟
نور :ايهم وياسر اليوم عطلة عندهم ابقيهم يمهم واجيج اساعدج
رسيل : صدكيني ما يحتاج جان كلتلج تعالي تدرين البيت نظيف ايهم جايب عمال منظفيه بس تراب خفيف امسحه وارتب الاغراض
نور : يلا لعد اي شي تحتاجين اتصلي
رسيل : من اجيب الكاونتر تعالي ساعديني
نور : فصلتيه لو جاهز ؟
رسيل : لالا جاهز اريد انتقل هنا خلال يومين
نور : بسرعة مليتي من عندنا ؟
رسيل : لا مو هيج بس اريد استقر تعبت وانتم هم تاخذون راحتكم وبلكت غيداء من تسمع طلعت ترجع للبيت
نور : ترجع لا تخافين عليها
رسيل : الله يهدي النفوس
سدته وراحت للعصر اتصل ايهم
ايهم : رسيل خلصتي اجيج ؟
رسيل : بعدلي شوية
ايهم : باجر من نشد الستائر ونركب المطبخ عود كملي كافي تعبتي
الحنية اللي بصوته تموتني شكد ما اكول كرهته وبعد ما اهتم لأمره اطلع اكذب على نفسي ..
رسيل : تمام تعال اذا تريد
رحت للحمام غسلت ايدي و وجهي لبست عباتي وكفت انتظره اتصل على موبايلي ودك الجرس والباب بنفس الوقت قفلت وطلعت لكيته واكف يم السيارة مكتف ايده ومبتسم
رسيل : شنو سالفتك موبايل وجرس وباب سوية
ايهم : طولتي هنا الجهال وحدهم بالبيت
رسيل : يم نور شكو عليهم
ايهم : لا مو شكو عليهم طولتي
رسيل : ليش احسك تريد تتعارك ؟
ايهم : ما متعارك تتبلين علية ؟
حسيت راح نرجع لسوالفنا القديمة سكتت وصعدت بالسيارة وصلنا للبيت رحت يم نور شوية كعدت يمها بعدها اخذت الجهال وصعدت ، ثاني يوم جابوا اغراض المطبخ ورحنا اني ونور خلينا الجهال بغرفة كبال التلفزيون ويمهم اية سدينا الباب عليهم ورحنا نكمل شغلنا ، سوالف وضحك خلصنا كلشي ، سوينا اكل وطلعنا بالحديقة ناكل والجهال تاكل وتلعب مكيفين ماخذين راحتهم
نور : رسيل ما حبيتي حسام ؟
التفتت عليها عاكدة حاجبي
رسيل : شنو مناسبة هذا السؤال ؟
نور : ما اعرف بس حسيتج ابد ما متأثرة عليه ولا انقهرتي من اجتج ورقة طلاكج لهذا فكرت ماتحبيه
رسيل : اكو فرق بين اللي يبيعج برخص ويتخلى عنج بعز احتياجج اله وبين اللي يتمسك بيج والظروف تجبركم تتعاوفون حسام تركني وباعني برخص معاملته اخر فترة واذيته الية وشكوكه وختمها من جابلي ست الحسن موت كل شعور بداخلي اتجاهه جنت اتمنى اطلع من البيت واعيش وحدي اني واطفالي بدون ضغط نفسي بدون تعب والحمدلله تحقق هذا الشي بعد ليش انقهر ، هسه التفت لنفسي ولاطفالي واحير بيهم
نور :انسي كلشي وابقوا هنا عيشوا بخير مروان احسن ما يروح للحلوك الجايفة
رسيل : الف رحمة على روحه لو من البداية ناطيني هذا البيت وعايشين بيه اني وسند ومرتاحين جان كل هذا ما صار بس شنو نسوي للانانية
نور : معقولة ماجان يحبج لو اخذج حتى ينتقم لنفسه ؟
رسيل : ليش ينتقم ؟ شنو سويتله اني ؟
نور : يعني لان عرف بيج تزوجتي غيره وحبيتي وتعلقتي وشافج شلون تأذيتي على مروان وحجيتيله عن ايهم ، احتمال قارن بينه وبينج شلون هو صبر وانتظرج كل هاي السنين وانتِ عشتي حياتج وما اهتميتي
رسيل : ممكن كلامج صح بس اني حجيتله كلشي و وضحتله وهو وافق بعد على شنو ينتقم مني
نور : الرياجيل ما تعرفيهم غفلة يتغيرون
رسيل : على اللي شفته وعشته أأيدج الف بالمية
بعدها حجينا حجي عادي وبيومها نور وجهالها باتوا يمي ، اول يوم الية ببيتي مملكتي راحتي بيومها سهرنا للصبح اني ونور نرتب ونعدل ونسولف ما مصدكين رجعنا انجمعنا حتى لو بمكانين مختلفين المهم بنفس المنطقة وقريبين على بعض ...
ثاني يوم اجى ايهم متسوك للبيت مخضر ولحوم وبقى على الغدا تغدا ويانا للعصر شربوا جاي وراحوا هو ونور سديت الباب وراهم ورا عشرة دقائق اندك الجرس عبالي رجعوا طلعت فتحت الباب مبتسمة وانصدم بغيداء هي ورغد دفعوا الباب وفاتوا
رسيل : اطلعوا برا لا اتصل على الشرطة
رغد : وعليمن تتصلين على الشرطة وينه الحارس الشخصي مالتج ، ولج ما كفاج اخذتي مروان وحرمتيني منه رجعتي هسه على زوج اختي شنو انتِ من بلوة ها ؟
رسيل : انتِ بيدج قدمتيلي مروان على طبق من ذهب بسبب مكائدج وخسة اخوج النذل اللي سويتوه بية انگلب ضدكم اني شكو ؟
غيداء : وليش اجيتي لهنا العراق كله ما يكفيج رجعتي لأيهم ماكو غيره بالدنيا تريدين تقنعيني جيتج ما وراها شي ؟
رسيل : املاك زوجي هنا واني وابنه احق بيها من الكل ، هاي وحدة اثنين ما يخصج ليش اجيت لهنا وشنو وراية ، ثالثاً اذا اريد ارجع لأيهم لا انتِ ولا عشرة غيرج تكدرون تمنعوني بس اني ما اسويها مو علمودج لا علمود راحتي وراحة اولادي وهسه اذا خلصتوا تفضلوا بلا مطرود وهذا البيت ممنوع تعتبون بابه مرة ثانية ...
طلعوا بعد غلط وفشار وصياح بصوت عالي سديت الباب وراهم ودخلت جوا تلكاني سند
سند : شبيها عمة غيداء ليش تصيح عليج ما تحبج ؟
رسيل : ما عليك بيها حبيبي ، عجبتك غرفتك حبيتها ؟
سند : كلش كلش بس جان عاجبني اجيب ملاعيبي واغراضي بيت بابا حسام تركناهن
رسيل : اجيبلك غيرهم احلى واحسن وبعد ممنوع تصيح لواحد بابا غير مروان ماشي حبيبي ؟
سند : بس هو يحبني ليش عفناه ؟
رسيل : هيج احسن بعدين من تكبر احجيلك كلشي هسه روح العب بينما اخلص تنظيف المطبخ
هز راسه ودخل لغرفته رحت لمصطفى غيرتله ملابسه ورضعته نام ورحت لصادق غسلتله و غيرت ملابسه راح يم سند يلعب ، رحت للمطبخ نظفته شربت جاي ورجعت للهول كعدت اتصلت ريناد حجيت وياه وطلبت منها ما تجيبلي اي خبر عنهم واي شي يصير ما تحجيلي ونبهتها ما تتدخل لو تسمعهم يسبوني حجينا على البيت وتجهيزاته فتحتلها كامرة ضحكت من شافتني مرتاحة وبيتي حلو ومرتب كالت هسه يلا ارتاحيت وامنت عليج
ورا يومين رحنا لبغداد اني وايهم وتركت الجهال يم نور ، سويت نقل لسند من بغداد للبصرة قبلها ايهم جابله ورقة قبول من مدرسة قريبة علينا ، وراها رحنا كملنا كم شغلة بخصوص المعاملات ورجعنا بنفس اليوم ، الطريق كله حجينا عادي مواضيعنا عامة من ضمن الكلام التفت علية وكال
ايهم : رسيل
رسيل : نعم !
ايهم : ما عاجبج تخلصين دراسة ؟
ضحكت
رسيل : ويني وين الدراسة اني وزعاطيطي خليني ادبر امورهم اول وبعدين افكر ادرس
ايهم : حرامات العمر يمشي وهذا حلمج وانتِ ما حققتيه
رسيل : اذا على الاحلام هواي انهدت وانباكت الحمدلله على كل حال بقت على الدراسة
ايهم : مو مشكلة اللي ما تحقق بالصغر نحققه بالكبر وبعدج صغيرة والعمر كدامج
رسيل : ايهم اني شاكرة خوفك علية وحرصك وتريد تفرحني بكل الاحوال بس اني ما اريدك تتأثر بينا هواي مرتك وابنك احق بأهتمامك من عندنا اتركني اعيش حياتي مثلما احب
ايهم : على العموم اذا حابة اساعدج بموضوع الدراسة اني حاضر واذا على الجهال وتحيرين وين توديهم اكو روضة وحضانة يمنا كلش زينة ونظيفة جنت مخلي حسوني بيها
رسيل : خليني استقر وارتاح وراها ان شاءالله افكر بالموضوع واردلك خبر
ومشت الايام بينا مرتاحة وسعيدة اول مرة احس بنفسي حرة مثل الطير لا احد يحاسبني ولا ينتظر مني شغل لو كعدة لو اتحاسب على مشاعري والمهم ضميري مرتاح و ننام اني والجهال بوقت ونكعد بوقت تأقلمنا على الهدوء والراحة
موضوع دراستي انفتح مرة ثانية بحضور نور وياسر ايهم اصر اخلص دراستي ، وعدوني يساعدوني بأطفالي ويتكفلون بيهم لحدما يكبرون ، ما اعرف مقهورين علية ويريدون يعوضوني لو ضميرهم يأنبهم ، بدا موسم المدارس سند سجلوه بخط وصادق روضة ومصطقى خليته بالحضانة واني رحت وية ايهم حتى اسجل قدملي على كلية تقنية طبية جامعة البصرة عمري ما يسمح صباحي بس ايهم عنده واسطة سوالي استضافة للصباحي بس شهادتي تنحسب على المسائي
سجلني وراح التفتت عليه لوحي بإيده مبتسم ، جريت نفس تذكرت كل تفاصيلنا سوية بوقت اللي سجلني بالمعهد ومن اشترالي ملابس وووو الخ من ذكريات تجتاحني بكل حين ...
داومت ومشى يومي عادي بالرجعة اجى اخذني بعدها سجلت خط والحمدلله حياتي استقرت بين البيت والاولاد ودوامي ايهم تكفل بكلشي يخصنا من مسواك ملابس طبيب ، ومن رجع مرته متفق وياها بحضور ابوها وعمي علي ، ما يتخلى عنا اني واولادي وهو يتكفل بينا وممنوع تصير اي مشكلة وافقت ورجعت للبيت
شوق ماشفتها ابد ولا شفت اخوات مروان اللي عرفته بعدين شوق تزوجت واحد من طرف اقاربهم وكعدت بمحافظة ثانية بعيدة عن اهلها وزوجها مستغل هذا الشي ومأذيها بشكل غير هذا يعرف علاقتها بأخوانها مو كلش لهذا دايس بيها
اما نور صديقتي الصدوقة تبقى بر الامان الخاص بية
حسام زوجته حامل ومنتظرين طفلهم وعايش حياته طول بعرض ، ريناد عزلت عنهم بنت مشتمل بالحديقة وبابها وحد هيج يلا خلصت المشاكل بينهم...
احلى شي بالدنيا من نرجع للبيت اني واطفالي وتنسد باب علينا ويومنا يكون مشغول بين دراستي ودراسة سند وبين التزاماتي بالبيت وبالاطفال ، اللي عرفته بعدين سبب الحاح ايهم على رجوعي للدراسة حتى اطلع من جو الكآبة والتفكير وما اتأثر باللي صارلي بعده مثل قبل يفكر بية ويخاف علية وعلى مصلحتي بس القدر مستحيل يجمعنا بيوم اني وياه الا اذا شاءالله ....
لم يكن يومآ الحُزن قضيتي !
بل قضيتي كيف اتخلص منه !
الحزن هو شعور بالعجز يشعر به المرء لكنه لايدوم
احياناً يغرقنا الحزن حتى نعتاد عليه وننسى في الحياة اشياء جميلة ممكن أن تسعدنا
عادة ما يشعر الناس بالحزن لا يفعلون شيئا أكثر من البكاء
على حالهم أما عندما يغضبون فأنهم يحدثون تغييراً
الحياة رواية جميلة عليك قرائتها حتى النهاية
لاتتوقف ابداً عند سطر حزين ربما تكون النهاية جميلة......
تمت بحمد لله