رواية غبار الذهب الجزء الثاني من وادي الزعيم الفصل العشرون 20 والاخير بقلم عبير ادريس

رواية غبار الذهب الجزء الثاني من وادي الزعيم الفصل العشرون 20 والاخير بقلم عبير ادريس

 السبيكة العشرون ( بارت قبل الأخير ) 

صباح الخير والعافية على عيونكم

المفروض هذا البارت الأخير يكون كتبته وختمت، ٢٠ ألف كلمة ، بس من كاعد انقح بيه انحذف اكثر من نصفه حيل انقهرت وبسبب تأخيري عليكم قررت انزل هذا البارت واعتبره بارت ما قبل الأخير، ومن يخلص الجزء اللي انحذف ينزل ويكون الأخير نختم بيه هاي الرواية بجزئيها ان شاء الله...

متابعة ممتعة احبتي

__________________

بدون ما يباوعلي كال 

ثروان : يلا نرجع 

اشر للكابتن دفع الحساب وطلعنا اول ما صعدنا السيارة اخذ مني جنطتي فتحها وطلع موبايلي اخذه 

خيلاء : شنو معنى هاي الحركة ؟

ما جاوبني رجع اتصل على الحارس وبقى وياه على تواصل مستمر والأخير يبلغه أول بأول ، الخوف دب بداخلي، جسمي يرجف خفت على همام شلون اذا غلقوا النوافذ كلها ...

من وين راح يطلع ، اعصابي انهارت وتفكيري مشغول بأسوء الأحتمالات الممكن تصير 

هيأت نفسي لكل ردة فعل وتصرف يبدر من ثروان اتجاهي ..

وصلنا للبيت الحارس بالباب واكف منتظرنا ، دخلنا بالسيارة للكرج نزل ثروان وترك الباب مفتوح وتوجه للحارس بهمة يسأله 

ثروان : غلقت الابواب والمنافذ كلها ؟

مؤيد : اي سيدي غلقتها عن طريق النظام واذا جان اكو واحد بداخل البيت مستحيل يكدر يطلع منه 

ثروان : كلش زين انت ابقى عند البنات دير بالك عليهم لا تتحرك وتبعد عنهم خطوة وحدة واني فايت اشوف منو يتجرأ يتدخل بيتي بغيابي 

مؤيد : خليني ادخل وياك لا يكون مسلح سيدي

ثروان : سلامتهم عندي اهم عينك عليهم لا تغفل ابد

مؤيد : أمرك سيدي

دخل للبيت تاركني بخوفي وضياعي اذا انكشف أمرنا شنو راح يكون مصيرنا اكيد يقتل همام بدون تردد واني ما راح افلت من العقاب ...

بقيت واكفة ورجلي تضرب بالكاع بدون وعي ، واباوع على البيت منتظرة حكم ثروان علينا ، او منتظرة اسمع صوت طلقات ثائرة بالمكان ..طول بالبيت تقريباً نصف ساعة او اكثر واحنا منتظريه برا ،بعد انتظار طويل طلع وكال 

ثروان : ماكو اثر لأي شخص داخل البيت 

مؤيد : معقولة ؟

ثروان : فتشت البيت كلشي بمكانه اللي يفوت اكيد يريد يبوك شي او يغير بالبيت على الأقل يدور على فلوس او غيرها بس ماكو كلشي مثل ما تركناه 

مؤيد : الحمد لله بس النظام ليش تعطل ؟

ثروان : احتمال الكاميرات تحتاج صيانة باجر الصبح اتصل بالشركة حتى يدزون تيم يصلح النظام 

مؤيد : صار تأمر سيدي 

ثروان : يلا ادخلوا جوة الجو بارد 

باوعتله صفح اخذت تينا من ايديها ودخلنا للبيت ، صعدتها لغرفتها غيرت ملابسها وطلبت منها تنام حتى تكعد اقريها ورحت لغرفتي تصادفنا بالممر باوعلي وكال 

ثروان : رايحة تنامين ؟

خيلاء : اي ليش ؟

ثروان : اريد احجي وياج بموضوع ؟

خيلاء : بخصوص ؟

ثروان : مو هنا على الواكف خلينا نكعد ونحجي 

خيلاء : تمام جاية..

نزل نزلت وراه ودخلنا للمكتب كعدت سحب كرسي كعد كبالي باوع علية بنظرات مليانة شك وكال 

ثروان : المرة السابقة من رحتي للدكتور وحدج بدون ما تبلغيني متذكرة ؟

بلعت ريكي وهمست 

خيلاء : اي متذكرة بس ليش خطر ببالك تسألني هيج سؤال ؟ صار مدة على الموضوع..

ثروان : جاييج بالحجي اصبري 

خيلاء : اوك اسمع 

ثروان : منو جان وياج ؟

ارتبكت ما اعرف شنو اجاوبه اذا كلت وحدي احتمال يعرف بهمام جان وياية ويكشفني كاعد اكذب عليه واذا كلت همام وياية الوضع بعد اسوء يصير..

خيلاء : شاك بشي ؟ 

ثروان : سألتج جاوبيني على كد سؤالي ليش تلفين وتدورين ..

سحبت نفس قوي وهمست..

خيلاء : لا ما جنت وحدي 

رجع بظهره على الكرسي وعيونه توسعت صافن علية منتظرني اكمل بس اني سكتت منتظرته يسأل 

ثروان : اي كملي منو جان وياج ؟

تمتمت بكلامي وهمست..

خيلاء : الولد الجنت كاعدة عندهم بعد الحادث وانت بوقتها وصلتني كبال بيتهم متذكره ؟ 

ثروان : اي 

خيلاء : هو جان وياية..

ثروان : حلو وشجابه عليج وين تلاكيتوا وليش هو ماخذج للدكتور ؟ 

خيلاء : ما ماخذني بس تصادفنا بالعيادة ولأن هو يعرف الدكتور وجان ياخذني عليه سابقاً سهلي أمر ودخلت قبله ..

باوعلي بشك ما مصدك كلامي عكد حاجبه وكال 

ثروان : وليش ماعندي خبر بهذا الشي ليش ما حجيتي اذا تعتبرين تصرفج صحيح ومابيه غلط ؟

خيلاء : بكل بساطة لأن انت جنت عصبي واخذتني بالصياح وكسرت البيت على راسي ما بقى داعي للكلام حتى اجي واحجيلك ، ثروان مشكلتك تشك بية على طول وما منطيني مساحتي او على الأقل حرية التعبير عن الرأي كلشي عندك ممنوع وما يصير لهذا ضميت عليك خفت تفهمني بطريقة خطأ وتزعل مني ..

ثروان : مو مشكلتج شلون افهم المهم عندي ما تكذبين علية وما تضمين هيج شي...

خيلاء : وليش حتى اكذب انت ما سألت واني ما حجيت وهسه من سألتني جاوبتك ما كذبت عليك 

تنهد براحة طلع موبايلي من جيبه حطه بأيدي 

خيلاء : اذا خلصت تحقيق ممكن اروح لغرفتي اغير ملابسي وارتاح ؟

ثروان : ليش تعتبريه تحقيق مو حرص ؟

خيلاء : الحرص من يكون بطريقة تخنك ما يتسمى حرص راجع نفسك ثروان اذا ردت زواجنا يتم وبسرعة ..

تركته وطلعت صعدت غرفتي دخلت وقفلت الباب ، فتت للحمام اخذت شاور سريع بمي بارد رغم برودة الجو بس جنت محتاجة اهدأ اعصابي ....

خف التوتر شوية سديت الحنفية و لفيت شعري بالمنشفة لبست البرنص وطلعت اشد بالحزام على خصري ، وكفت كبال المرايا حتى انشف شعري بالسشوار وبالي يم همام شلون طلع وشوكت والبيت انغلقت كل مداخله ومخارجه.

لهناك وألمح ظل خلف الستائر بالمرايا ..

تجمدت بمكاني ألتفتت واشوف خيال شخص بالبالكون... معقولة يكون همام ؟ اذا صدك معناها انجن رسمي ، اخذت تراك من الكنتور ودخلت للحمام لبسته على السريع وطلعت لفيت شعري انداريت حتى اطلع اشوف منو اول ما فتحت الستائر دخل وحاوط خصري بيده ، طلعت شهكة مني سد حلكي وهمس 

همام : اش اش ديري بالج تطلعين صوت 

فتحت عيوني باوعتله واعصابي ترجف وخرت ايده وهمست ..

خيلاء : شتسوي هنا ؟ تخبلت ؟ شعندك بغرفتي ؟

تركني وراح للتلفزيون شغله صعد الصوت ورجعلي ، جنت واكفة مكتفة ايدي منتظره يجاوبني..

همام : وين اروح برأيج وكل منافذ البيت انغلقت بعد ما طبيت للبيت بدقايق 

خيلاء : وشلون ما شافك ثروان وهو كال فتشت البيت كله ما لكيت شي؟ 

همام : طبيت جوة سريرج وحطيت بطانية علية وكلت لو تصيب لو تخيب دخل افتر بالغرفة وبالحمام وطلع للبالكون وراها سد الباب وراح واني طلعت للبالكون شفتكم واكفين بالكراج ردت انزل بعدما دخلتوا بس المسافة بعيدة كلت ما تسوة اتكسر ..

حجاها وضحك..ضربته على صدره وابتعد عنه..

خيلاء : وهسه شلون تطلع وهو بالبيت ومؤيد بالباب فهمني شلون ؟

همام : انتظري شوية وبعدها روحي شوفيه وين اذا دخل غرفته اوكفي كبال الباب واني انزل و اذا طلع لهيه ..

خيلاء : منين راح تطلع بلة ؟ 

همام : من الباب من وين يعني؟ وبعدها اطلع من الباب الخلفي 

خيلاء : ثروان مو بهذا الغباء تلكاه غلق الابواب كلها بنظام محصن ما اتوقع تكدر تطلع 

همام : نجرب 

خيلاء : وشلون ؟ 

همام : انزلي وجيكي الوضع شوفي الباب تنفتح عادي وراها روحي للباب الخلفي شوفيه مفتوح وتعالي بلغيني اني راح انزل بكل بساطة وانتِ راقبيلي ثروان 

خيلاء : شلون وضع خليتني بيه تدري دمي نشف ، من الصبح لحد الآن عايشة على اعصابي وهسه كملتوها علية هو من جهة سألني منو جان وياية من رحت للدكتور ومنواصعد اريد ارتاح اشوفك بوجهي هنا ، زين مني ما انجلطت لحد الآن 

همام : سألج عن شنو عيدي الكلام 

خيلاء : ثروان شاك بينا وعنده دليل قاطع انت جنت وياية فهمت من نظراته وتلميحاته لهذا ما كدرت اكذب وكلتله تصادفنا اني وياك 

همام : خليه يشك المهم ما متأكد 

خيلاء : لا حبيبي متأكد وجان يحجي بثقة بس حابب يختبرني اذا اكذب عليه او احجي الحقيقة ..

همام : المهم اقتنع بكلامج ؟ 

خيلاء : يمكن ما ادري..

همام : هسه تبين اذا صدكج او لا ؟ 

خيلاء : نشوف ، خليني انزل اشوف الوضع وبعدها ابلغك ..

همام : منتظرج حياتي 

باوعتله بعتب وطلعت من الغرفة ، نزلت جوة جان ثروان بعده كاعد بالهول يتفرج فيلم ... كعدت يمه باوعلي ودار وجهه على الشاشة ..

خيلاء : تريد تشرب شاي ؟ 

ثروان : لا مو ابالي 

خيلاء : عصير فواكه ؟ 

ثروان : ما مشتهي واذا ردت اطلب 

خيلاء : تمام رايحة اكعد تينا حتى ادرسها ..

هز راسه ساكت ، تركته وصعدت فوك دخلت لغرفة تينا وكتبتله لهمام الصار ، كتب ..

همام : اريد انام نعسان ومنا عطرج تارس السرير ثكلت عيوني ، راح اخذلي غفوة سريعة..

_ همام تخبلت ؟ واذا صعد ثروان شلون ؟ 

_ ما راح يطب لغرفتج زعلان 

_ لا تجازف همام اعقل 

_ عاقل بس انتم المجانين شنو رايد غير انام شوية 

خيلاء : همام الله يخليك ارجع اكعد بالبالكون محد يوصلها وهيج ابقى مأمنه عليك 

_ شنو رأيج تقفلين باب الغرفة وتخليني مرتاح تعالي قفليها بداعة تينا 

_ ابد هسه تكوم تطلع همام لا تزيدها علية 

_ واذا كلتلج بداعة حبنا هم تمانعين ؟ 

_ استغفر الله ربي واتوب اليه ، جاية وامري لله

_ بس ها اريد حضن سريع 

_ همام هماااااااام

_ خلص صوتج وصلني من المسج اقفلي الباب وروحي ومن ينام ابو صماخ كعديني اكمل نومتي بالبيت 

_ يلا اجيت 

رحت فتحت الباب لكيته متمدد على السرير نازع قميصه وماخذ راحته ، اخذت المفتاح وسديتها قفلتها من الخارج ورجعت لغرفة تينا كعدتها وبلشنا دراسة....

مرت ساعتين تقريباً صعد ثروان وكف باب الغرفة ، ألتفت علية وما اعرف شنو صار بية وضعي كله تخربط حسيته يقرأ ملامحي ويعرفني ضامة شي ....

ردت احجي وياه تعلثمت ، كمت ورحت وكفت يمه ...لميت شعري وشديته بالكيتر 

خيلاء : هاا خلص الفيلم ؟ تريد اسويلك عشا وية تينا ؟ 

ضيق عيونه وهو يباوعلي ، رجعت كررت عليه السؤال كال 

ثروان : اشوفج هواي مهتمة بتفاصيلي شنو الوضع ؟ شنو اللي تغير ؟ 

خيلاء : ها لا بس مجرد تعويد على مسؤولياتي اذا زاعجك هذا الشي كول عادي ابتعد وبعد ما اسأل 

راد يجاوبني سكت من سمع صوت من غرفتي ألتفت ناحيتها ورجع ألتفتلي 

ثروان :سمعتي هذا الصوت ؟ لو يتهيألي

خيلاء : لا وين اكو 

ثروان : شو اسكتي ، الصوت جاي من غرفتج ..

تقدم خطوات للغرفة حرت شنو اسوي يبس الدم بعروقي ماكو غير اتحجج بالمرض لزمت راسي وعطت بصوت عالي حتى همام ينتبه ويطلع من الغرفة...

خيلاء : ثروان راسي راسي ما اعرف شنو صار بية ألحكني راح اوكع 

ركض علية لزمني من ايدي وسندني دخلنا لغرفة تينا كعدني على القنفة وكال 

ثروان : شنو صار وياج فجأة ؟

خيلاء : ما اعرف وجع براسي غريب ودخت ردت اتخربط 

ثروان : على الاغلب صار عندج هبوط بالضغط نامي وارفعي رجليج راح اسويلج عصير ليمون ونعناع تشربيه و تصيرين زينة وتينا اني اعشيها...

خيلاء : تمام 

ترك موبايله على السرير آخذ تينا ونزلوا للمطبخ تسحبت بهدوء رحت لغرفتي فتحت الباب لكيت همام كاعد ومرتاج بظهره على السرير ويباوع بموبايله..

همست بتحذير 

خيلاء : خطوة وحدة بس بينك وبين ثروان لو ما امثل عليه بسالفة راسي جان هسه اني وانت منتهين ، كوم اطلع اختفي شنو تسوي سوي بين ما اشوف طريقة تطلع بيها منا 

همام : فزيت من احلى نومة بسبب صوتج يالعايقة 

خيلاء : لوما صوتي جنا بخبر كان كوم الله يخليك قبل لا يصعد كوم لخاطري 

احجي وياه واسحبه من ايده وهو ولا يمه يضحك ويعاند بية ..

سمعت خطوات ثروان على الدرج ، ركضت فتحت باب البالكون وسحبت همام من السرير وكمت ادفع بيه برا سديت الباب والستائر وركضت للحمام غسلت وجهي وطلعت لكيته واكف باب غرفتي بيده العصير ويباوعلي عاكد حاجبه اخذته منه بأيد ترجف وهمست..

خيلاء : شكراً تعبتك 

ثروان : ليش كمتي مو كلتلج مددي وارفعي رجليج 

خيلاء : اختنكت ردت اغسل وجهي واحتاجيت افوت للحمام 

ثروان : اشربيه هسه تتحسنين ان شاءالله 

خيلاء : لو جايبلي شي اكله 

ثروان : مثل شنو تريدين ؟

خيلاء : اي شي حتى لو فواكه احس معدتي فارغة واذا شربت الليمون على معدة فارغة اتأذى ..

ما جنت اريد آكل بس ردته ينزل ...

ثروان : تمام هسه اجيبلج تينا سويتلها لفة وفرشت اسنانها وراحت مددت على سريرها ..

خيلاء : اي زين ..

نزل سحبت نفس قوي طفيت الاضوية سديت الباب ورجعت لغرفة تينا كعدت اشرب من العصير ، انتبهت لشاشة موبايله كل شوية تلمض رحت اخذته ، رسائل من شاهين ابو صقر قريتها من برة 

كاتبله 

_ سدن ما مبينة ولا ترد على اتصالاتي حاولت اوصللها ما كدرت وكرم مختفي ما إله أثر صارله ايام 

تركت الموبايل بمكانه ورجعت كعدت ، دقايق وصعد مسوي تشكيلة من الفواكه بصينية ولفة بركر ، حط الصينية بصفي وراح على موبايله 

خيلاء : عاشت ايدك بس هاي اللفة هسه سويتها ؟

شبسرعة ؟

ثروان : لا لكيتها بالثلاجة وحميتها بالمايكرويف

خيلاء : ها هاي لفة تينا سويتها الها قبل لا نطلع نتغدا على العموم مشكور تعبتك ..

ما اعرف شنو كاعد احجي المهم احجي وبس عقلي افتر خايفة على اعصابي كاعدة ..

عيونه بالموبايل ويكتب 

خيلاء : شكراً على اللفة 

بدون ما يباوعلي رد بعفواً وطلع من الغرفة ..

عظيت من اللفة وشربت العصير واكلت تفاحة وتركت الصينية ... راسلت همام بلغته بمسج شاهين بقينا نحجي كتابة الى ان كتبلي 

همام : كلش بردت حياتي راح انزل واطلع من الباب ، القندرة وينه ما انخمد ؟

خيلاء : سودة علية حبيبي اصبر شوية بداعتي اتحمل لخاطري هسه بلكت ينام 

همام : طلعت روحي واني كاعد هنا وما لابس ملابس ثكيلة..

خيلاء : غير انت ردت تسوي بيها سوبر مان 

همام : لوما مسوي بيها سوبر مان جان شلون رجعتيهن للقاصة وهو موجود ؟

خيلاء : جان شفت طريقة ثانية اتصرف بيها ولا هذا الخوف العايشة بيه على العموم اخذ بطانية من غرفتي ولف نفسك بيها بين ما تطلع..

ما رد ، كتبتله 

_ لا تتهور الله عليك 

كتبلي ماشي ، حذفت الرسائل وكعدت ، النعاس والتعب حلوا علية بس عيوني ما تاخذ نوم ..

مرت ساعة تينا نامت والبيت صار هدوء طلعت باوعت لغرفة ثروان مطفي الاضوية ، ما اعرف اذا نايم او لا ، نزلت جوة دورته ماكو فتحت الباب وطلعت للحديقة مشيت للباب الخلفي فتحته لكيته مقفول ..

تراجعت خطوتين ما احس الا اصطدم بشي ألتفتت واشوف كلاب (الكي ناين) عددهم اثنين واكفات كبالي مكشرات عن انيابهن عطت بصوت عالي وركضت مذعورة وهنه ينبحن بقوة ويركضن وراية...

على صوتي طلع الحارس ركض بأتجاهي صار سد بيني وبينهن احتميت بظهره خايفة ومرعوبة باوعت للبالكون همام ماد راسه يباوع والشرار يطلع من عيونه ، ضليت اتنفس بقوة الى ان طلع ثروان من البيت يباوعلي عاكد حاجبه حجه بعصبية 

ثروان : هاي شصاير ؟ شعندج طالعة برا وحدج بهذا الوقت ؟ 

بلعت ريك وهمست منزلة عيوني خفت يقرأ الخوف البيها 

خيلاء : اختنكت ردت اشتم هوى نظيف وطلعت ما ادري بيك هاد جلابك 

ثروان : كل يوم بالليل نطلعهن للحراسة شنو الغريب بالموضوع ؟

خيلاء : الغريب ماعندي خبر ما مبلغني 

ثروان : لأن ما طالعة قبل ولا طالبة تطلعين وحدج حتى احذرج 

سحبني من ايدي بقوة باوعت للبالكون همام واكف يباوع بسرعة نزلت عيوني خفت ينتبهون عليه 

دخلنا جوة كعدنا بالهول شغل التلفزيون ويتأفأف...

خيلاء : شنو راح تسهر ؟ ما ناوي تنام ؟

ثروان : لازم زاعجتج كعدتي ؟

خيلاء : لا بس انت بالعادة تنام من وقت 

ثروان : جنت نايم وكعدت على اتصال مؤيد ونزلت 

خيلاء : اسفة ما ادري هيج راح يصير 

ثروان : عادي ماصار شي 

خيلاء : راح اصعد اغير ملابسي وانزل انترست طين 

ثروان : ماشي 

حجاها بضوجة تركته وصعدت دخلت الغرفة وقفلت الباب ، فتحت الكنتور طلعت تراك ورحت للحمام لبسته ورجعت للغرفة لكيت همام واكف ، يغلي من العصبية تقرب مني حضني بقوة حسيت اضلاعي رادت نتكسر بين ايديه قرب فمه من اذني وهمس 

همام : ما متحمل قربه منج اللي ردناه حصلنه عليه خلينا نطلع اني وياج لا تعاندين بية راح اموت حسي عاد..

لزم كفوف ايدي مردهن بكفوف ايده الخشنة 

دموعي نزلت همست بضعف 

خيلاء : ما اكدر همام بنتي شلون اعوفها وراية تواجه مصيرها وية اب مجرم ترضاها انت ؟

بعدني عن حضنه وحاوط خصري متفحص ملامحي بنظرات تجرح بگلبي كال...

همام : وشلون اعوفج بين ايدين واحد مجرم ؟ وما اعرف على يا ساعة شنو ممكن يسوي بيج ؟ صبري نفذ وماعاد اتحمل يابنت الناس تعبت حسي بية 

آخذت وجهه بين ايدي وهمست 

خيلاء : حبيبي هانت ما ظل شي ونطلع اني وبنتي من هذا الجحيم بس محتاجين شوية وقت 

همام : ماكو بعد وقت ما اكدر اتركج واطلع ما تشوفين تصرفاته صايرة غريبة وياج حاسس اكو شي غلط وكاعد يحوك لعبة قذرة خلينا نبتعد الله يخليج اتوسل بيج شنو تريدين اسوي بس تعالي وياية وباجر من الصبح اروح لمحامي شاطر واخليه يقدم كلشي عندي للمحكمة واحبسه وتاخذين بنتج ..

خيلاء : مو بهاي السهولة ياريت الوضع هيج سهل جان جازفت ..

همام : خيلاء حبيبتي اسمعيني مرة وحدة 

قاطعته ..

خيلاء : انت اسمعني ، ثروان كاعد ونومته طارت والحارس مصحصح ما راح ينامون والكلاب هاديها بالحديقة شلون راح تطلع انطيني حل خلينا نطلعك منا وباجر روح قدم الادلة العندك وراها اصير حرة واخذ بنتي ونطلع منا . 

سكت يباوعلي سحب نفس قوي تنهد وكال 

همام : المنوم اللي جبته وينه ؟

خيلاء : بالجرار خليته 

همام : سويلهم عصير وشربيهم اثنينهم وخليهم ينطمرون ماكو حل ثاني 

خيلاء : ثروان اكدر اقنعه يشرب بس الحارس شلون ؟

همام : اول شي انطي لثروان من ينام روحي للحارس وانطيه العصير واخذيله قطعة كيك كوليله تنغصنالك اني والسيد وخليه يتسمم وينام 

خيلاء : شنو اللي يضمن يشربون العصير ؟

همام : نجرب ما خسرانين شي 

خيلاء : تمام هسه راح انزل ونشوف شنو يصير

رحت للجرار اخذت المنوم وصلت للباب حتى اطلع رجع سحبني وحضني بقوة 

همام : ما كادر ابتعد اكثر تعبت واني انتظرج تعبت..

خيلاء : هانت ما ضل شي 

همام : ماكادر ابعدج عن حضني ما كادر ..

خيلاء : لا تضغط علية أكثر اعصابي تلفت

تنهد تركني وكال..

همام : ماشي يلا انزلي ، وخلي بكل كلاص حبايتين مفعولهم قوي راح يخليهم ينامون اقل شي اربع ساعات 

خيلاء : ان شاءالله ينامون بسرعة ونخلص.

همام : ديري بالج 

خيلاء : ماشي 

تركته وطلعت ضميت الشريط بصدري ونزلت ثروان متمدد على القنفة يباوع على التلفزيون رحت للمطبخ سويت عصير رمان لثلاث اشخاص ، طلعت الشريط وخليت حبايتين بكلاص ثروان وصبيت عصير الية وإله خليتهم بصينية ورجعت الشريط بصدري ورحت للهول سحبت طبلة صغيرة خليتها بيني وبينه وحطيت الصينية عليها واخذت كلاصي شربت منه وكمت اتفرج على الفيلم ، باوع للعصير وكال 

ثروان : ليش تعبتي نفسج ؟

خيلاء : ما تعبت بس حبيت اسوي الية وكلت اكيد انت هم حاب تشرب 

كام من مكانه آخذ العصير وبدا يشرب وكال 

ثروان : اجه بوقته عاشت ايدج..

خيلاء : بالعافية 

ثروان : الله يعافيج 

باوعتله شربه مرة وحدة ورجع الكلاص بمكانه رجع تمدد يتفرج على التلفزيون ، مرت نصف ساعة وبدت عيونه تثكل 

ثروان : حاسس بدوخة قوية راسي ما اعرف شصار بيه 

خيلاء : اليوم هواي تأذيت تعب وقلق وتوتر اكيد هيج يصير بيك..

راد يجاوبني لسانه ثكل ، هناك ورجع راسه على المخدة غمض عيونه وكع الريمونت من ايده ، رحت عليه هزيته واهمس بأسمه اكثر من مرة ما كعد ..

تركته ورجعت للمطبخ صبيت العصير بالكلاص وخليت بيه حبايتين منوم وطلعت كيك قطعته وخليته بماعون واخذتهم بصينية وطلعت حتى اوديه للحارس خفت اتقدم ناحيته لا الكلاب تهجم علية ، صحت صوت على مؤيد طلع من غرفة الحراس شافني وكال 

مؤيد : محتاجة شي ست ؟

خيلاء : اي هاي السيد ثروان دزهم الك 

تقرب اخذهم مني مبتسم 

خيلاء : بالعافية 

مؤيد : الله يعافيج شكراً تعبتج..

خيلاء : ماكو داعي تشكرني راح انتظرك هنا خلص وجيبلي الصينية حتى اغسلها 

مؤيد : خليها اني اغسلها وارجعها الصبح 

خيلاء : لا انتظرك عادي 

آخذها ورجع للغرفة ورا عشرة دقائق رجع جايبهم شارب العصير وماكل الكيك ، اخذت الصينية ودخلت ثروان على نومته ثكلان كلش ، رجعتهم للمطبخ وصعدت اركض دخلت الغرفة لكيته متمدد على السرير ، وكفت قريبة منه وهمست 

خيلاء : احسب دقايق واطلع ثروان نام والحارس على وشك ينام نطيته العصير وشربه ...

بدون ما يجاوبني سحبني من ايدي وكعت بصفه على السرير ، قاومته بس جرأته ضعفت قواي ، بين همساته والنظرات ضعت ونسيت نفسي وابحرت ييه تيهني بين الغزل واللهفة والاشتياق فصلنا عن العالم الخارجي..

بعدها تسحبت من حضنه ونزلت من السرير لبست ملابسي ومشيت تاركه جزء من روحي ..

و بين بقايا الهمس ودفء المكان... باوعتله ، غارق بسكونه، وملامحه تحمل آثار العاطفة التي جمعتنا خلال دقائق معدودة...

ابتسمت بخفوت ، وكأني أودع لحظة ما تتكرر ، خرجت بخطواتٍ بطيئة، والقلب ما زال معلق خلفي، يلتفت بكل نبضة الى تلك الذكرى التي خُلقت بيننا دون وعد ، لكنها سكنت أعماقي كأجمل صدفة.

شفت الوضع تمام رجعت اشرتله 

خيلاء : اطلع قبل لا يكعدون 

ابتسم بنشوة انتصار وكال ..

همام : حليانة حقيرة 

خيلاء : همام اطلع كافي

سحبته من ايده وكمت ادفع بيه وصل لباب الغرفة لبس بلوزه وتقرب خطف قبلة قوية مني وطلعنا نزلت قبله لكيت ثروان على نومته وكفت كباله سويت سد بينه وبين همام خفت يفتح عيونه ويشوفه ، ألتفتتله دزلي قبلة بالهوى لبس اللثام وطلع من الباب الداخلي ، مرت ثواني واسمع نباح الكلاب ، خفق گلبي بقوة طلعت وراه لكيته متسلق الباب حتى يعبر والكلاب تمط بجسمها تريد تتسلق وتلتهمه ، الجو متوتر وصوت نباحها يدوي بالمكان ..

همام سوالي حركة بيده بمعنى اشوفج بخير ونزل ، تنفست براحة ودخلت للبيت سديت الباب وركضت لغرفتي غيرت الشراشف وحطيتهم بالحمام حتى الصبح اغسلهم ، اخذت شاور سريع ورحت غطيت بنوم عميق بعدما سألت عن همام وتطمنت عليه وصل للبيت.....

همام 

ما عاجبني الوضع خصوصاً من احس بيه قريب منها لهاي الدرجة ، اني مو رجل ضعيف بس ما بيدي حيلة وبنفس الوقت خايف عليها وعلى مشاعرها تعبان اريد اطلعها من هذاك البيت بأسرع وقت ممكن...

تعبت امثل الراحة تعبت اسوي نفسي ما متأثر تعبت منها خيلاء تعبتني ، اتوقع هذا عقاب لأيامي السيئة اللي عشتها ..

تيام : ليش عقاب ليش ما تكول تصفية حسابات ؟

همام : اسألك بالله لو جنت بمكاني تسمح لسديل تعيش وية طليقها بنفس البيت كل هاي الفترة وما تسوي شي ؟ ما تغار ؟ ما تحترك بنارك ؟ 

صفن صفنة طويلة وبعدها كال 

تيام : مو هيج تنقاس الأمور 

همام : شلون تنقاس ، اكيد هسه انت شايفني بلا غيرة حالك حال هواي ناس اذا سمعت بقصتنا 

تيام : وضعنا يختلف عن باقي الناس مرات الظروف تجبرنا نتقبل ونتأقلم وية اشياء ما حابين نعيشها ولا نشوفها بس تذكر وضع خيلاء حرج لوما دخولها لبيت ثروان مستحيل راح تكدر تتلف الأشياء اللي تدينها ويبقى مصيرها مرتبط بكلمة من ثروان ، وحتى انت الأوراق اللي وقعتها بوقت عقدك على سدن توديك ورا الشمس فكر بهاي الناحية راح تشوف اللي سويته وضحيت براحتك علموده هو عين الصواب 

همام : ما ادري ما ادري بس تعبت والوضع ابد ما عاجبني ومأرقني 

تيام : من وصلنا للنهاية تريد تستسلم ؟ احمد الله كلشي ضدكم صار بين ايديك لولا شطارة خيلاء جان مصيركم لحد الآن بيد هذا الكلب 

همام : منو يكول ماكو نسخ ثانية غير اللي عندي 

تيام : ماكو لأن اللي جان بين ايد عواد انت تلفته واللي بين ايد ثروان تلفته وفوك هيج حصلت على اشياء تدينه بيها هسه انقلبت الادوار وصارت حياته بين ايديك 

واستمر الكلام بينهم واني واكفة اسمع ، فرحانة من جهة انحلت مشاكلهم ومن جهة حزنانة لأن ولا واحد بيهم فكر يرجعلي ابني على الأقل ،  معقولة ابقى هيج مصيري مرتبط بشاهين شوكت اشوف ابني شوكت ارجعه لحضني شوكت ...

الافكار تتلاطم براسي لدرجة تعبت وكرهت كلشي ....

خيلاء 

بعدما طلع همام ورجعت عند ثروان لكيته غاط بنومة عميقة اخذت موبايله وبديت اجرب اصابع ايده على الموبايل حتى افتحه ، الجرأة اللي عندي مستغربتها شلون ما خايفة منه شنو اللي وصلني لهاي الحالة ، من وحدة تخاف منه خوف المجلود من الجلاد الى وحدة كل همها تنتقم وتتخلص منه الى الأبد 

جربت اصابعه كلهم الى ان انفتح الموبايل دخلت على الصور واشوف بلاوي ، صور وفيدويوهات هو ونسوان بأوضاع مخلة بالأدب ومن ضمن هذه الفيديواهات فيديو هو وسدن جداً جريئ وسخيف بنفس الوقت ، حولتهم كلهم لجهازي بعدها دخلت على المحادثات لكيت اشياء ما تتسولف بينه وبين عواد وبينه وبين شاهين وحتى سمعان وسيادة كلهم عبارة عن دائرة من الفساد والرذيلة ، اخذت سكرينات لأشياء تدينهم وصورتهم فيديو وبعثتهم لجهازي ، اكثر شي صدمني محادثاته وية بابا ...

لحد الآن اياد يتاجر بينا ويطلب فلوس مقابل هالشي ، بابا مثل الحفرة شكد ما نترسها تراب ما تنطم تريد بعد ...

بعدما حولت كلشي لجهازي وحذفت اشياء ضدنا اني وهمام مسحت كلشي دزيته من المحادثة ورجعت كما هي ، ودزيتله مسج من جهازي حتى من يشوف محادثي اول شي ما يشك ...

كتبتله 

_ باجر عندك شي ؟ حابة نطلع نغير جو 

وتركت الموبايل بصفه على الطبلة وصعدت اركض لغرفتي ..

دزيت كلشي عندي لهمام وطلبت منه يحتفظ بيهن حتى امسحهم من جهازي ، كتبلي بعدما شاف كلشي 

_ متوقع منه هاي النذالة واكثر ، ديري بالج على نفسج وبعد لا تسوين شي يخليج بوضع خطر وياه ، الباقي علية اني اتصرف 

_ تمام وانت لا تراسلني ابد ولا تتصل حتى لو اختفيت اني احاول اطمنك عني 

_محاوطج من كل مكان حتى اذا ما راسلت اني قريب منج 

_ احبك 

همام : واني هم راح تنامين ؟

خيلاء : ما نعسانة بس احاول انام لأن راسي يوجعني وبديت احس بتعب اريد افصل عن كلشي 

همام : نوم العافية 

خيلاء : الله يعافيك انت هم نام لا تبقى سهران 

همام : ما يجيني نوم الأ اطلعج من هذا السجن 

خيلاء : وصلنا للنهاية ما ظل شي وينتهي كلشي 

همام : ان شاءالله يمشي كلشي مثلما نريد واكثر بعد 

خيلاء : ان شاءالله 

حذفت كلشي ونمت ، ثاني يوم فزيت على اصوات بالبيت وهوسة حجي على ضحك كمت من فراشي باوعت للساعة صايرة بالعشرة ، كمت اركض لغرفة تينا ، فات موعد دوامها فتحت الباب ما لكيتها بفراشها نزلت الدرج اركض وانصدم بالوجوه الشفتها 

ام ثروان مدام عالية واخته بالرضاعة اللي هي بالأصل بنت خالته بس عايشها وياهم من هي وصغيرة امها هدتها لأم ثروان لأن ماعندها بنات واختها عندها خلفة خير من الله لهذا ربت عندهم وكبرت بينهم ...واخوه وزوجته

ثروان كاعد باوعلي مبتسم واني واكفة مصدومة وباهته مرت علية كل ذكرى سيئة عيشتها الية هاي المرأة ، كل دمعة نزلت ظلم كل قهرة ورجفة كل معاناة عشتها بسببها ..

جانوا منتظرين مني اسلم عليهم وهي بالذات جانت تباوعلي بنظرات تريد تفترسني بيها 

كام ثروان وصل يمي باوع بعيوني يقراها ويريد يشوف ردة فعلي بشوفتهم اتذكرهم او لا 

ثروان : اعرفج على عائلتي ، امي عالية واخوية برهان وزوجته نبأ واختي طيبة 

اتصنعت الأبتسامة وتقدمت ارحب بيهم سلمت عليهم من وصلت لأمه ايدي رجفت دنكت حتى ابوسها سحبت نفسها حتى ما كامتلي باوعت لثروان وكالت 

عالية : صايرة احوال بجالك 

برهان : يمة شنو حجينا قبل لا نرجع ؟

عالية : الحجي انت واخوك حجيتوه اني لا معترفة بيها ولا راح اعترف بزوجها من ابني من يوم اللي فاتت حياتنا واحنا ما مرتاحين كلشي سيء صار النا بسببها شلون تريدوني اسامحها واعترف بيها جنة لبيتي وزوجة لأبني بعد السوته ، ما خلت النا وجه بين الناس ، انهزمت وتركته بيتها وزوجها وبنتها وسكنت الملاهي والله اعلم بكم حضن نامت ، ورجعت تزوجت واحد وعافها مثل الجلبة وفوكاها ترجعلي بصفتها جنة هذا البيت ...

باوعلها ثروان بغضب ، بعصبية كال 

ثروان : مو هذا الاتفاق حجية حجينا كلشي وفهمتج المفروض ما نحجي هذا الكلام كدام الكل مو لو اني غلطان ؟

كامت وكفت وعاطت بيه ..

عالية : غلطان يابزر بطني غلطان ، انت حطيتني امام امر الواقع ما استشاريتني ولا اخذت رأي اخوك مشيت ورا عواطفك مشيت ورا گلبك ، اجه اليوم اللي لازم تصحى بيه وتفز من هذا الكابوس ...

تقرب حضني من كتفي حطني جوه جناحه وكال..

ثروان : خيلاء زوجتي وام بنتي ، واللي صارلها كلنا السبب بيه ، بالنسبة الية غفرت وسامحت ما يهمني رأيكم ..

قاطعته بصوت هز البيت ..

عالية : ونسيت ؟ نسيت من عافتك وما سألت عنك ؟ نسيت من خطفت بنتك وضعيتها منك ؟ نسيت من حبستك ؟ نسيت من نامت بأحضان الرياجيل ؟ شو انت صاير ما ادري شلونك ؟ 

ثروان : بالنسبة الية نسيت ورضيت ، ما يهمني رأيكم 

عالية : ما يهمك رأينا ؟ وحجي الناس والكرايب ؟ لشوكت راح تبقى ضامها عنهم ، اذا نسيت ورضيت ليش ما اعلنت زواجك كدام الملأ ليش ما دزيت على اهلك يشاركوك فرحتك لو مستعار منها ومن سيرتها ؟

ثروان : بالعكس ما مستعار منها وسويتلها عقد اللي يتمناه گلبج بس هي رادت العقد يتم بينا سكته ولو مستعار منها ما جان عزمت اصدقائي وخليتهم يشاركوني فرحتي ، اللي صارلها بدايته من هذا البيت بدت ، كلنا ألنا ذنب باللي صار محد بينا بريء ..

تركهم واخذني من ايدي وصعدنا لغرفتي ، كعدني على السرير وكعد بصفي باوعلي مد كفه مسح دموعي وكال..

ثروان : اني آسف على كلشي سمعتيه اعتذر بالنيابة عنهم اعرف حطيتج بوضع حرج بس فكرت اللي سويته هو الصح لكن للأسف طلعت غلطان...

خيلاء : اللي سمعته من امك صحيح ؟ يعني اني تاركتكم ورايحة وعايشة بهيج مكان ؟ امك وصفتني بأوصاف بشعة مستحيل رجل عنده غيره يتقبلني مرة ثانية بحياته اذا كلامها فعلاً صحيح انت شلون تقبلتني ؟ ورجعتني لحياتك ؟ بدون ما تحاسبني او على الأقل تنتقم لكرامتك اللي هدرتها ؟ 

سحب نفس قوي وكال ..

ثروان : مرات الحب يخلينا نتغاضى وعيونا تعمى ونصم آذانا عن حجي الناس ومرات تكون صحوة ضمير بس تجي متأخرة ، ومرات تكون حوبة تلاحكنا وما تخلينا نعيش حياتنا براحة ، اللي صارلج وغير حياتج كلها بسبب هذا الشخص الكاعد كدامج ، تراهن عليج وبعدها هو خسر..

خيلاء : لحظة شلون يعني الصارلي بسببك ؟ وشنو سالفة الرهن ؟ ممكن توضحلي اكثر ...

ثروان : ما اكدر 

خيلاء : ليش ؟ 

ثروان : راح تكرهيني وتنفرين مني 

خيلاء : مو من حقك تضم علية ومن حقي اعرف الحقيقة واختار ..

ثروان : كلشي احجيه بوقته مو هسه 

خيلاء : مستحيل اكمل وياك اذا ما حجيتلي شنو هذا الرهان ويالعبة لاعبها بحياتي ؟ 

ثروان : وعد احجيلج كلشي بالوقت المناسب 

خيلاء : شوكت يحين هذا الوقت برأيك ؟ شوكت ؟ من نتمم زواجنا ؟ واصير على ذمتك مرة ثانية وتضمني ؟ 

ثروان : كلت مو هسه 

خيلاء : وليش جبت اهلك اذا تعرف بيهم يكرهوني ومستعارين مني حتى تشوف شلون يهينوني كدام عيونك ؟

ثروان : لا بس ردتهم يرجعون هنا لأن خايف عليج 

خيلاء : خايف من شنو؟ اريد افتهم 

ثروان : انتِ ما تحسين ما تشوفيني تركت دوامي ومكابلج بالبيت ما تشوفين شلون تغيرت حياتي وكل شغلي الشاغل اراقب بيج ..

خيلاء : من شنو خايف ؟ وليش تراقب ليش ما تحجي كلشي من حقي افهم 

ثروان : من حقج بس مو وقتها افهمي عاد

خيلاء : ليش من شنو خايف انت بالضبط ؟ 

بعد اصرار وضغط مني عليه كام وكف ويصيح بصوت عالي فقد اعصابه..

ثروان : خايف من همام الكلب ومن ظله ومن انفاسه اللي يتنفسها قريب منج خايف اخسرج للمرة ثانية وياخذج مني ، لا عبالج نايم على أذني وما اعرف بيه شلون يحوم داير ما دايرج ، اغلب الاوقات برجعتي من دوامي جنت اشوفه بسيارته كبال البيت ويتقصد يخليني اشوفه ويتحداني بنظراته ، هسه عرفتي من شنو خايف ؟ خايف يلعب بعقلج و ياخذج مني ..

هدأ وبعدها تقرب كعد كبالي واخذ ايدي بين ايده نزلت دموعه وهو يحجي ..

ثروان : بحياتي ما عندي نقطة ضعف غيركم انتِ وتينا ، انتم مو بس نقطة ضعفي انتم حياتي كلها ، ثروان ما يكدر يتنفس بدونكم تعتبريني مريض بيج اعتبريني تعتبرين حب تملك اعتبريه بس حابب اكولج اللي الية يبقى الية ...

خيلاء : حتى اذا ما جان عاجبني اكمل وياك ؟ 

ثروان : حتى اذا ماجانت الحياة عاجبتج تبقين يمي وتحت جناحي ممنوع واحد ياخذ حاجتي ممنوع واحد يتقرب من شي اني احبه ..

يكفي اللي صارلي يكفي اللي خسرته بسبب ضعفي اتجاه قرارات عائلة مليانة عقد وتكبر كل همها المظاهر كدام الناس ما يوم فكروا بأحتياجاتنا ، وشنو نحب وشنو نكره شنو نريد وشنو ما نريد ، خيلاء انتِ مو خارقة الجمال ولا ماكو غيرج نسوان بالدنيا ، من باجر اكدر اجيب اللي تسعدني وتعيشني ملك بفلوسي بس اني رايدج الوحيدة من بينهن اخذت گلبي وحبيتج وما مستعد افرط بيج رغم كلشي سويتيه ..

خيلاء : انت مجنون رسمي اني شلون عايشة وياك ؟ شلون راح أأمن على بنتي تعيش وية واحد مليان عقد نفسية ومتملك وعنده تجبر شلون فهمني ..

تقرب حط وجهي بين كفوفه ويحجي برجفة ..

ثروان : اني وانتِ وتينا ضحية مجتمع مريض او بالأصح عائلة مريضة بنت بينا كل هاي العقد ، وغيرتنا من اشخاص اسوياء الى مرضى نفسيين ، اعترف اني مريض ويمكن مرضتج وياية بس وعد محد يأذيكم ولا يتقربلكم ولا يمسكم بشعره  طول ما اني عايش وخشمي يطخه الهوى ..

بعدت عنه وفكرت شنو اسوي وشنو احجي ووين مصلحتنا اني وبنتي قررت ألتزم الصمت لحدما اطلع من هذا البيت...

خيلاء : خليني وحدي اريد ارتاح ، وتينا وين ؟ 

ثروان : بالمدرسة

خيلاء : ما اعرف شلون اخذتني النومة وما حسيت على وقت دوامها..

ثروان : دخلت الغرفة لكيتج نايمة ما حبيت ازعج نومتج تركتج ترتاحين واني غيرتلها ملابسها وطلعتها للمدرسة ...

خيلاء : عاشت ايدك ، خليني ارتاح شوية اذا تسمح ..

ثروان : اكيد اكيد اخذي راحتج ..

اول ما طلع راسلت همام بلغته باللي صار كتبلي ..

_ ما يلحكون يسوون اي شي اني هسه عند المحامي وكاعد ارتبله كم دعوة تليق بتقاعد العقيد ..

خيلاء : مطولة السالفة ؟ 

همام : لا بس اكو كم ورقة اريد احصل عليهن واذا حصلتهم شغلنا يصير توب ..

خيلاء : من وين تحصلهم ؟ 

همام : اكو اشخاص مشتكين عليه قبل وطالع من السالفة كلها وذابيها براس واحد لا بيها ولا عليها ، اذا وصلتلهم وحصلت اوراقهم موقفنا يكون اقوة وحبسته مطولة اذا مو ٢٠ سنة ياكل مؤبد ...

خيلاء : ان شاءالله الله كريم دير بالك على نفسك حبيبي 

همام : ان شاءالله وانتِ هم لا تخلين بالي عليج 

خيلاء : تمام باي 

همام : باي 

ما نزلت جوة ظليت كاعدة بغرفتي الى ان رجعت تينا ، اجتي يمي فرحانة وتصيح ..

تينا : اجتي بيبي ماما بيبي جابتلي شكد ملاعيب 

خيلاء : اي ماما بالعافية ، جوعانة اصبلج غدة ؟ 

تينا : لا بيبي كالت راح نطلع ناكل بالمطعم ..

خيلاء : بابا وياكم ؟ 

تينا : ما ادري 

خيلاء : كومي ابدلج ملابسج ..

دخلتها للحمام وبعدها غيرتلها ملابسها حضنتها بقوة حسيت محتاجة حضنها مفتقدة لحنية طفل اضم روحي بيها ..

تينا : ماما ليش تبجين ؟ 

خيلاء : لالا حبيبتي ما ابجي ليش ؟ 

تينا : عيونج حزينة 

خيلاء : فدوة عمري اليعرف بماماته مابية شي حبيبتي بس اشتاقيتلج والصبح جنت نايمة ما شفتج لهذا السبب شوية ضايجة..

باستني من خدي ونزلت راحت وياهم واني رجعت لغرفتي...

مرت الأيام هادئة لكن ما تخلوا من مهاترات ام ثروان وبكل مرة تحاول تستفزني بس جنت ابتعد واترك المكان ...

وبيوم بعد مرور شهر على رجعتهم ، ثروان قرر يسوي عيد ميلاد تينا بوسط حفل كبير يعزم بيه كل الأقارب ...

طلعنا اني وياه وتينا واشترينا ملابس لعيد ميلادها واني اخذت فستان بسيط يناسب الحفل ...

خلصنا تجهيزات العيد ميلاد وزينه الحديقة ، بيومها وكفت كبال مرايتي اصفف شعري حسيت بدوخة قوية وضيق بمعدتي على انقباضات غريبة انتابني شعور بالتقيء ركضت للحمام واستفرغت كل اللي اكلته ، كمت وكفت كبال المغسلة غسلت اباوع على وجهي بيه شحوب مو طبيعي بشرتي مايلة للصفار وعيوني ذبلانة..

رجعت للغرفة اريد اوكف ما اكدر ، مرت نصف ساعة واني مستلقية على ظهري اريد نفسي تهدأ ..

اندك الباب صحت منو اجاني صوت ثروان وهو يستعجلني ..

ثروان : خيلاء خلصتي ؟ المعازيم بدوا يتوافدون وموحلوة نستقبلهم بدونج .

جاوبته بصوت خافت..

خيلاء : دقايق وانزل..

ثروان : تمام حبيبي منتظرج لا تطولين ..

كمت وكفت كبال المرايا ارتب وجهي ، ايدي ترجف ما جنت اسيطر على فرش المكياج ، بصعوبة يلا خلصت جنت كل شوية اكعد استراح وبعدها ارجع اكمل ، سحبت فستاني من التعلاكة ولبسته ، الفستان عبارة عن قماش من الستان الناعم وبيه شغل بسيط بالصدر والردن ، لونه زيتوني غامق ..

رشيت عطر كرهت ريحته حسيت اريد اتقيء بس ما بقى شي بمعدتي طلعت من غرفتي واني ضاغطة على خشمي حتى ما استنشق العطر اكثر. 

اتصلت على ثروان صعدلي واخذ ايدي نزلنا سوية وطلعنا للحديقة نستقبل المعازيم ونسلم عليهم..

نفس المشهد تكرر عندي بيوم القررت انهزم بيه من البيت بس الفرق ،  اليوم ما حابة اطلع واترك بنتي واترك انتقامي وانسحب ببساطة ناوية اكمل للأخير ..

انتبه ثروان علية وحس بوضعي مو طبيعي تقرب مني وهمس بأذني ..

ثروان : ليش احسج مو على بعضج مرضانة ؟ 

خيلاء : اتوقع اخذت برد 

ثروان : تحبين تكعدين بمكان ترتاحين وبعدها نكمل ؟ 

خيلاء : لا خلينا قريبين من تينا اذا حسيت بتعب ابلغك.. 

ثروان : تمام..

بلشنا بمراسيم العيد ميلاد غنينا وتمنينا الها سنوات طويلة من الفرح ، ختمناها بتقطيع الكيك وتوزيع الهدايا ، الحديقة انترست هدايا وحارت تينا ياهو تفتح أول ... 

بعدها بلشت مراسيم العشا ومن خلصنا اخذني ثروان من ايدي وتوسطنا المكان ، جان يباوعلهم بنظرات مليانة ثقة ، خصوصاً من علن عن رجوعي إله ... 

طيلة الحفلة نظراتهم تلاحكني ويتسائلون بينهم عن سبب وجودي وشلون رجعت جاوبهم ثروان من خطب بيهم وكال.. 

ثروان : اليوم جمعتكم لأجل فرحتين الأولى تشاركونا فرحتنا بعيد ميلاد بنتي تينا والثانية اريدكم تعرفون بقرار رجوع ام تينا على ذمتي ، اعتذر لأن ما صارت فرصة اعزمكم وابلغكم بيها بس ان شاءالله قريباً نسوي عرس كبير وتكونون اول المعزومين ...

بهذه الأثناء تقرب مؤيد من عندنا وحجه وية ثروان  

مؤيد : اسف قاطعتك بس اكو بنت برة وياها طفل واكفة وما تقبل تروح شكد حاولنا وياها مصرة تريد تشوف مدام خيلاء وتدعي بأنها أختها.. 

تغيرت ملامح ثروان من الفرح الى العصبية ، ترك أيدي واستأذن الحضور وطلع للباب تبعه مؤيد ... 

الوضع صار هادئ ما اسمع غير همساتهم ونظرات استغرابهم الية.. 

تقدمت خطوات وكفت قريبة من الباب واسمع صوت سديل وهي تتوسل بثروان حتى يسمحلها تشوفني وتكوله.. 

سديل : الله يخليك مسألة حياة او موت خليني اشوف اختي ، صفيت وحدي بهاي الدنيا ما عندي غيرها وهذا الطفل وياية... 

تقصد على آدم انجنيت من شفتهم ملابسها وملابس الطفل مليانة دم . ....

كانت البداية ورقة على طاولة، والآن انتهى الدور، انطفأت الأضواء، وغادر الجميع. بقيت الحياة فقط… تنظر إلينا وتبتسم، كمن عرف أخيراً من كان اللاعب الحقيقي.....

كمت اعيط بصوت عالي فقدت ما سيطرت على نفسي نسيت وين اني وشنو لازم اسوي وشلون اتصرف  حتى ما انكشف كلشي ذبيته ورا ظهري من شفت اختي بهذا الحال ...

تعديتهم وركضتلها حضنتها بقوة واصيح اريدها تصحى تنتبه ترجع لوعيها وتبطل رجيف وتحاجيني

خيلاء : عمري اني يمج لا تخافين واحجيلي شنو صاير وياج؟ سديل اصحي سديل 

انتبهت على آدم حبيبي يباوعلي ويرجف تركت سديل ورحلته اخذته لحضني ضميته بقوة اريده يهدأ الرجيف اخذه حاولت اثبت جسمه متت قهر عليه وهو يكول 

آدم : بابا بيه دم بابا مات

 باوعت لسديل هزيتها وعطت بيها يلا كدرت تحجي ..

خوف ورجيف وملابس ملوثة بالدم وحادثة مجهولة كدامي ، وراية بيتي وبنتي والناس المنتظرتني ارجع حتى نكمل احتفالنا بعيد الميلاد..

احتاريت شنو اسوي اصعب شي من توكف بالنص وما تعرف شلون تتصرف...

انجريت من ملابسي بدون رحمة وايادينا المتشابكة انحلت رغم متسمكين وحدة بالثانية بس الظلم اقوة منا ...

سديل : خيلاء همام وتيام ونهيل قتلوهم خيلاء لا تعوفيني وحدي شنو اسوي ما اعرف خيلااااااااااااء

آخر شي سمعته دوي صوتها بالمكان ، سحبني من ايدي لداخل البيت لازمني بإيد والأيد الثانية يكسر بيها الأغراض اللي تجي بوجهه ، الناس  رادوا يهدأوه ويبعدوني منه ، كام يصيح ويطرد بيهم مثل المجنون دخلني للبيت وهو يسحب بية ويردد تريدين تفضحيني مثل المرة الفاتت متفقات علية بنات اياد ...اني اعلمج اصبريلي..

حاولت اسحب ايدي منه ما كدرت قبضته اقوة مني ، توسلته يتركني بس بدون جدوى..

خيلاء : ايدي وجعتني وين ماخذني وين ؟ 

اعرف كلش زين وين ماخذني بس سؤالي الغبي زاد عصبيته بالأكثر ..

ثروان : هسه تشوفين وين ماخذج راح اعيشج ليلة بعمرج ما تنسيها امشي..

نزلنا الدرج وهو يعت بإيدي بقوة وصلت كبال اكثر باب مرعب شايفته بحياتي ، فتح القفل ودفعني بيها ظلمة موحشة باردة مليانة بالذكريات الحقيرة حضنت نفسي خايفة مرت كل المواقف السيئة كدام عيوني من ليلة زواجي الى ولادتي بتينا ...

ثروان : تتذكريها الغرفة هاي ؟ المفروض من البداية اجيبج الها ونكشف كذبتج اللي عيشتينا بيها ، واني الغبي مصدك فاقدة ذاكرتها هالرعنة 

شالني وشمرني على السرير بقوة ، بعدها بدا يتقرب وينزع بملابسه نظراته مليانة شر استمر يتوعدلي ويكول..

ثروان : اليوم اعيشج الجحيم بنفسه اني جنت شاكك بيج بس ما متأكد مشكورة سديل اكدتلي مخاوفي ..

خايفة عليه جلبة تحبيه وتخافين عليه ، تريديه مو ؟ عاشكته بعدج ؟ يا حقيرة اعلمج شلون تلعبين عليه اعلمج ثروان منو اليوم اخليج تتعرفين عليه وحش وبدون رحمة...

بدا يسحب ملابسي وينهش بلحمي بطريقة همجية مقرفة ، عيشني كل انواع الذل والاهانة الممكن المرأة تعيشها...

 رغم كل محاولاته وياية بس ماكدر يعتدي علية ، جنت اقاومه بقوة الى أن تمكن من ايدي درت وجهي عنه باوعت بصفي اكو بطل كزاز مال مشروب قديم ، مجرد رخت ايده عن ايدي فلتتها واخذت البطل وضربته بقوة على راسه ، وكع مني متأوه ويتوعدلي بس الدم اخذه ركضت للباب دكيت عليها اريد احد يسمعني ويفتحها بس بدون جدوى ، رجعتله جان اكو تيبلام منضدي اخذته وتقدم يريد يهجم عليه بس جنت اسرع منه لأن الدوخه براسه ضربته مرة ثانية اختل توازنه وكع بالكاع...

 دنكت فتشت جيوب بنطرونه الجان مشمور بالكاع لكيت المفتاح اخذته وركضت للباب فتحته وطلعت للهول ماكو احد صعدت اركض لغرفة تينا دورتها ماموجودة ، كمت اصيح بصوت عالي عليها ماكو رد ، دخلت لغرفتي طلعت جنطة صغيرة حطيت بيها ملابس ومستمسكاتي والاشياء الضرورية الممكن احتاجها ، فتحت الكنتور اخذت فلوس سديت الجنطة اخذت موبايلي وسويج السيارة وطلعت اركض اريد بس اوصل اشوف شنو صار وياهم بعدها ارجع لتينا واخذها من عيونه ..

صعدت السيارة نسيت شلون اسوقها من يوم الحادث من صلحها بعد ما طلعت بيها ، شغلتها وخليت رجلي على البانزين ودست ، مشت السيارة وعيوني على البيت اباوعله بالمرايا الجانبية دموعي نزلت على تينا وين راحت منو اخذها اكيد امه حتى يتفرغلي مو جديدة عليها تسويله اجواء ....

وصلت قريب من بيت همام هوسة سيارات الشرطة وحواجز ما يسمحون لأحد يتقرب صفيت السيارة ونزلت ..

خيلاء : بلا زحمة اهل هذا البيت وين وديتوهم ؟ 

جاوبني واحد من الشرطة الواكفين ..

_ وانتِ شتصيريلهم ؟ 

خيلاء : بهذا البيت زوجي واختي وزوجها 

حجيتها وفركت وجهي بيدي ، باوعلي وراح صاح الضابط اجوني اثنينهم الضابط عاكد حاجبه باوعلي صفن علية بعدها كال..

_ شايفج وين ما ادري  بس تفضلي شرايده ؟ 

_ سيدي البنت تدعي تكول الها صلة قرابة بأفراد هذا البيت ..

تقدم أتجاهي خطوتين وكال...

_ من وين تعرفيهم ؟ 

خيلاء : اخواتي ساكنات بهذا البيت 

ما كلت زوجي وياهم خفت يكون من معارف ثروان لأن كال شايفج وصفن بوجهي صفنات مو طبيعية..

هز راسه وكال..

_ وين ساكنة حضرتج؟ 

خيلاء : بيتي قريب منا مسافة يعني..

_ وشلون سمعتي بالخبر ؟ 

خيلاء : اختي اجتني استنجدت بية دخلت اغير ملابسي لكيتها راجعة قبلي لهنا بس طمني الله يخليك اكو اصابات قوية اكو واحد مات لو لا بس جاوبني وبعدها شنو تريد مني اجاوبك..

_ بيهم وضعهم خطير

صاحوا عليه تركني وحجه بالجهاز مالته ..

سألت عن مكان المستشفى اللي اخذوهم الها رفضوا ينطون اي تصريح لسلامتهم..

وين اروح وين انطي وجهي صعدت سيارتي وكعدت بيها انتظر على اعصابي ودموعي تنزل ، اتصلت على موبايلاتهم بلكت واحد منهم يكون عند سديل وترد علية للأسف ماكو اي رد ...

لليل انتهى التحقيق بالمنطقة وانتهى صبري وياه ، قبل لا يروحون الشرطة رحت للضابط توسلت بيه بس ينطيني مكانهم كمت اشهك وابجي كدامه يلا نطاني اسم المستشفى اللي نقلوهم عليه بعدما شوفته هويتي وعرف اني فعلاً اخت البنات..

صعدت سيارتي ورحتلهم اول ما وصلت سألت عنهم دلوني عليهم ركضت مثل المخبلة بممرات المستشفى ، لكيت سديل كاعدة هي وآدم على كرسي ويمهم شرطي واكف صحت بصوت حتى تنتبهلي..

خيلاء : سديل سديل ..

باوعتلي نزلت آدم من حضنها وركضتلي حضنتني بقوة ودموعنا نزلت ...بعدتها عني باوعت على ملامح وجهها بقلق وأستفسر منها عن الصار..

خيلاء : شنو صار احجيلي منو هجم عليكم وليش والولد شلونهم نهيل شلونها ولج كومة اسألة براسي راح انجن واسمع جوابها

سديل : تيام ونهيل زينين الحمدلله اصاباتهم خفيفية..بس 

خيلاء بخوف : بس شنو ؟ همام بيه شي احجي سديل احجي ..

اسأل بيها واهزها بقوة ... دارت وجهها عني ما تقبل تباوعلي..

خيلاء : لا عفية لا تكوليها همام مو ؟ همام راح بيها لج سديل ليش ساكتة ما تحجين شبيج ؟ 

سديل : ما مات بعده عايش بس حالته خطرة ما اعرف مدى خطورتها لحد الآن متكتمين عنه 

خيلاء : ياالله رحمتك ياعمري سودة علية حبيبي شكالت روحك شصار بيك ياعيوني زين ما عرفتي منو هجم عليهم ؟ 

سديل : لا بس اتوقع نهيل تعرف 

خيلاء : وانتِ وين جنتي ؟ الحمدلله على سلامتج يا گلب اختج..

حجيتها واخذتها لحضني ضميتها بقوة..

سديل : اخذت آدم وطلعنا نشتري رجعت لكيت الكارثة صايرة لج هي دقائق بسيطة من حسبتها من وين اجوي شوكت نفذوا همام جان طالع شوكت رجع ما اعرف ...

تحجي وتبجي ترجف خايفة...

خيلاء : الله لا ينطيهم كون عساهم بالحرك..

سديل : امين يارب ..

مرت ساعة ونفس الوضع ولثاني يوم احنا على وضعنا بعدها  اجه الضابط طلب من الدكتور يسمحله يدخل يحقق وية نهيل وتيام بما ان وضعهم استقر نوعاً ما ...

نهيل 

جنت نايمة وراسي يفتر دايخة من البنج ولعبانة نفسي دخل الدكتور فوك راسي وكال..

_ شلون وضعج اليوم ؟ احسن؟

حجاها مبتسم ..

نهيل : دايخة دكتور دايخة..

_ طبيعي المرينا بيه مو سهل بس انتِ سباعية وكدها ان شاءالله 

نهيل : اختي وين ؟ خوما ماتت ضربوها لو لا ؟ 

_ لا تخافين اخواتج بخير وموجودين خارج الغرفة بس ممنوع يدخلون حالياً 

نهيل : ليش ؟ منو مانعهم ؟ 

_ اكو ضابط برة منتظر ياخذ اقوالج بعدها يدخلون اخواتج يشوفوج ..

نهيل : اهاااا

_ تكدرين تحجين ؟ اذا تعبانة اخذي كفايتج من الراحة وبعدها يدخل يسولف وياج 

نهيل : لا عادي خليه يدخل ما بية شي ..

_ حلو بس اهم شي ما ننفعل نحجي بهدوء تام 

نهيل : تمام دكتور..

طلع الدكتور ودخل الضابط سلم علية وتحمدلي على السلامة وطلب مني احجيله تفاصيل الحادث وحجيتله كلشي صار دون اقوالي وطلع بعدها سمحوا لخيلاء وسديل يدخلون عندي ... تقربت خيلاء وبدت تسأل بلهفة عن الصار ...

نهيل : جنا نشتغل اني وسديل بالبيت خلصنا الجوة تعزيل شلنا الفرش الشتائية وغسلنا البيت وطلعت للطرمة اغسلها ...

نهيل : سديل خليني اكمل انتِ تعبتي ..

سديل : عادي خليني وياج نخلص سوية حتى نتغدا ميتة جوع 

نهيل : همام كال اليوم غدانا من برا لا تسوون 

سديل : صدك اي همزين يلا حتى ما نتعب اكثر  ونسوي غداء نتغدا ونام كلش تعبت اليوم 

نهيل : اني هم تعبت البيت جبير وتنظيفه ما يخلص ..

سديل : اي صدك ..

بهذه الاثناء طلع آدم وكف كبالنا وكال..

آدم : اني جوعان ..

سديل : ياحبيبي هسه بابا رايح يجيبلنا اكل ويرجع وناكل عم عم كلنا 

آدم : ما ما اريد اشتري اخذيني 

نهيل : ما يصير ناكل شي قبل الغدا بابا ما يقبل 

زعل منها وكام يبجي..

سديل : راح اخذه اشتريله وارجع شسوي خطية

نهيل : لا تطلعين انتِ خلي تيام ياخذه 

سديل : هسه اشوفه اذا كعد اخليه يروح واذا بعده نايم ما اكعده اني اخذه المحل قريب بسرعة نرجع ..

نهيل : بكيفج خليني اكمل شغلي لا تلهوني 

سديل : دخلت للبيت لكيت تيام على نومته استخطيته اخذت فلوس ولبست العباية وطلعت اخذت آدم ورحنا للمحل..

نهيل : بعدما طلعوا سديل وآدم دخلت للحديقة انظف منها اوراق الشجر اليابسة ...اني وانظف لفت نظري شي يلمع على السندانة تقربت شلتها كلبتها بيدي ورقة جوكر جانت مميزة اعرفها كلش زين يستعملها شاهين باللعب ..

خيلاء : لحظة يعني شنو مميزة شلون عرفتي هاي الورقة تابعة لشاهين ؟ 

نهيل : اعرفها الورق الجان يلعب بيه مطلي بالذهب مو ورق عادي ..اتوقع واكعة منه او هو حاطها تهديد او شي ما اعرف المهم..

خيلاء : لحظة لحظة شنو تبادر لذهنج من شفتيها ؟

نهيل : عرفته قريب من البيت او يمكن يكون بداخل البيت واحنا ما ندري هنا خارت قواي والرجفة استولت على جسمي وصحت بصوت عالي حتى تيام يسمعني ..

تياااام الحك تيااااام وينك تياااااااام ..

هي لحظات بين ما صحت عليه وبين طلعته من البيت انهالوا علينا بالطلق ما اعرف بشنو اضم روحي لو وين اروح تيام تصوب ودخل للبيت يطلع سلاح بهذه الاثناء دخل همام وجان اعزل بيده الأكل وكف صافن عليهم ما محسب حساب جيتهم شكلهم مرعب كلهم ملثمين بعدها ما حسيت بشي غير شي حار دخل بجسمي وكعت مغمي علية ومن فتحت عيوني لكيت نفسي بالمستشفى...

خيلاء : لعد شنو الضابط اسمعه يكول لواحد وياه يكوله تكول صاحت  انتهت اللعبة من شافت الجوكر تدرين عبالهم مخبلة ؟ 

نهيل : اي كلتله من شفت الجوكر عطت بعلو صوتي وكلت الحكوا انتهت اللعبة وين الخبال بالموضوع ؟ 

خيلاء : ما اعرف هو هيج حجه..

نهيل : من وجهة نظره السمعه جنان بس من وجهي نظرنا هذه حقيقة مو صح ؟ 

خيلاء : صحيح ...

ومرت الأيام بعد الحادثة تشبه بعضها واي خبر يطمنا عن همام ماكو ، مرة نسمع راح يفوت غيبوبة اذا استمرت حالته على هيج وضع ومرة نسمع العمر بيد الله واستعدوا لكلشي ومرة ناخذ جرعة أمل من افواه الاطباء يرجع بوسطنا حتى لو ماكان متشافي مية بالمية...ومرة نوصل لمرحلة اليأس...

تينا ماكدرت ارجعلها بعد تيام منعني اوصل...

احداث هذه الأيام مرة ومكروهة ما احب اذكرها بس اللي اريد تعرفوه اني عشت اصعب ايام حياتي من اشوف  اللي حبني وتمناني واحتواني بكل مراحل حياتي الصعبة متمدد كدام عيني لاحول ولا قوة بطرك النفس وعلى الأجهزة ...

تعبت واني اتذكر تفاصيل حياتنا العشناها سوية صح مو هواي بس كل لحظة مرت علية وياه تحفر بعقلي وبگلبي بطريقة كافرة تهد كل قوى بية ...

اتذكره من يكولي خيلاء شوكت عاد ننجمع ونعيش حياتنا شوكت اصبح بوجهج الحلو كل يوم ونتريك سوية نفكر شنو نسوي غدة والعصرية وين نكضيها بالبيت وية استكان جاي وكعك لو نطلع نفتر بالسيارة لو نروح بمكان نسهر بيه ...

وحلمه جان بطفل يتوج حبنا ببذرة صالحة يمحي بيها ذنوبنا ..

تفكير وقلة نوم وتعب وارهاق وارفض ارجع وياهم للبيت تعبت كلش لهناك وجان اوكع من طولي 

مغذي على تحاليل عامة وفحوصات وانصدم بحملي الطبيبة واكفة كبالي تقرأ بالتقرير ابتسمت وكالت ..

_ مبروك حبيبتي حامل  ..

خيلاء : شنو ؟ 

_ حامل شنو ما تدرين بنفسج ما حسيتي ؟ 

خيلاء : لا بس اني بالعادة تتأخر عندي طبيعي لهذا استغربت ..

اخذتلي سونار وكالت عليج شهرين والطفل بيه نبض و وضعه تمام..

كتبتلي شنو اخذ بهاي الفترة اخذت منها الراجيتة تشكرت منها وكمت من السدية مشيت اترنح اريد اوصل لهمام افرحه اكولة كوم ابنك زرعته بأحشائي لا تعوفنا وحدنا اريدك ويانا تفرح بهذا الخبر الجنا اثنينا منتظريه...

رحت للدكتور المسؤول عن حالته وطلبت منه ينطيني اشارة اعرف بيها اذا همام يسمعني او لا اذا حاجيته...

كعدت كباله وجنت احجي ودموعي تنزل..

خيلاء : دكتور اني اعرف زوجي دخل بحالة غيبوبة واعرف اكو منو موصيك ما تحجيلي بس هذا الشي مو صحيح ولا عدل تبقوني عايشة على أمل زوجي يصحى ويكعد عادي وهو داخل بغيبوبة..

_ شوفي بنتي احنا هنا مثل ما نخاف على مريضنا نخاف على نفسية اهله ، وعمه طلب وبأصرار شديد ما نبلغ حضرتج بس مادام اجيتي وحجيتي وياية بكل صراحة وشفافية وتريدين تعرفين مصير زوجج هنا تحتم علية احجيلج الحقيقة ..

خيلاء : ياالله احجي دكتور اسمعك ان شاءالله خير..

_ اختصرلج حالة زوجج الطلقة للأسف اصابت جزء من الرأس وسببت تلف بمركز الوعي ، هذا اللي اكتشفناه فيما بعد وبسبب اصابته بالصدر والبطن وفقدانه كمية كبيرة من الدم زوجج تعرض لغيبوبة 

سيطرنا على كمية النزف وكدرنا نسعف المريض بطريقة صحيحة هنا المفروض يستعيد وعيه بعد انتهاء فترة العلاج والعناية المركزة بس اكتشفنا فيما بعد هذا التلف الناتج من اصابته بالرأس...

اسمع ودموعي تنزل من وحدها معقولة بعد ما اسمع صوته ولا يحس بينا معقولة ما اشوف طوله من يمشي كبالي ولا نعيش حياتنا بصورة طبيعية حالنا حال الناس ؟ 

_هسه احنا ما نحكم على الحالة بهيج طريقة ونخلي اليأس يسيطر علينا لازم نصبر وننتظر ويصير عندنا أمل 

خيلاء : شلون دكتور اصبر ؟ وكل المؤشرات تكول همام فات بغيبوبة ويمكن ما يطلع منها 

_ما دام الدماغ ما متضرر ضرر بليغ ، معناها اكو فرصة كبيرة يستعيد وعيه بس يحتاج فترة من العلاج والعناية المركزة 

خيلاء : شكد يحتاج انطيني وقت 

_حسب حالته اكو بعض الأشخاص يستيقضون بعد ايام او اسابيع ، والبعض الآخر يبقى بالغيبوبة اشهر او حتى سنوات حسب شدة الأصابة ما اكدر اجزم بوقت معين واخليج بأمل كاذب بس لا تنسين ممكن يحتاج ايام فقط ويكون بينكم من جديد 

خيلاء : دكتور كل الأمكانيات اللي ممكن تتقدم حتى يتشافى بسرعة قدموها أله حتى اذا يحتاج سفر للخارج مستعدين نسفره 

_ ليش نسفره وممكن تتأزم حالته ويتعب كلشي محتاجه هنا متوفر من الدعم الطبي سواء تنفس اصطناعي او تغذية ، ادوية لتخفيف التورم الدماغي ، كل هذه الاشياء تلعب دور مهم بتحسين فرص الإفاقة عنده

خيلاء : تمام دكتور شكراً لسعة صدرك وتحملك لأسئلتي 

_ بالخدمة المهم هاي الفترة نكون قويين وصبورين حتى نجتاز المرحلة بكل هدوء الدعم النفسي للمريض كلش مهم بهاي الفترة 

حجاها مبتسم ..

خيلاء : ان شاءالله خير 

طلعت منه والدموع تتسابق على وجناتي سبحان الله الأنسان بلحظة ممكن يكون عاجز حتى عن معرفة نفسه .. 

اتصلت على تيام اشوفه وين صار 

خيلاء : تيام وين صرت تأخرت علية 

تيام : بالطريق جبتلج ملابس والأغراض الوصيتيني عليها باقي بس اجيب غدة واجي 

خيلاء : منو من البنات اجتي وياك ؟ 

تيام : تركتهم نايمات بالبيت العصر اجيبلج سديل 

خيلاء :هااا تمام 

سديته منه نصف ساعة وصار يمي حط الأغراض بالغرفة وكعدنا خلف الزجاج نباوع لهمام بنظرات ضايعة ألتفتت عليه وسألته 

خيلاء : ما عرفتوا منو ورا الحادث ؟ 

تيام : اكو دليل عندي يورط شاهين الكلب و ثروان ...

خيلاء : شنو هو ؟ 

تيام : واحد منهم جان كاشف عن وجهه صاحبهم بس الكلب اختفى تكولين الكاع انشكت وبلعته 

خيلاء : وين راح نلكاه يعني هيج صعبة يتعرفون عليه من شكله 

تيام : مو صعبة بس مهزوم ما لكيته 

خيلاء : قدم التصوير للشركة وهم يتصرفون اكيد يكدرون يوصلون إله اسرع منك..

تيام : اكو شغلة ببالي بعدين تعرفيها مو هسه ..

خيلاء : وثروان ليش لحد الآن حر طليق ويتمتع بحريته رغم بين ايديكم اشياء تدينه وينسجن عليها..

تيام : من يوم اللي رفعنا عليه دعاوي هو يشتغل من جوة ليجوة مرة يخلي جماعته يماطلون ومرة ايد عواد تتدخل بالقضية وجماعته يسدون شكو ثغرة تنفتح عن ثروان ، وبيوم اللي وصلنا للأشخاص اللي عندهم دلائل عن ثروان توديه ورا الشمس دز جماعته وسووا اللي سواه..

خيلاء : وراح يبقى حر طليق وشلون اذا سافر واخذ بنتي مني 

تيام : ما يكدر يسافر مقيديه من السفر الى ان يثبت برائته او احنا نثبت ادعائنا عليه والسالفة اتوقعها مطولة تعبت منهم والله تعبت ... 

خيلاء : حتى اني تعبت ما عندي صبر بعد متلهفة  اشوفه بالسجن ويتحاكم واخلص منه..

تيام : ان شاءالله نهايتهم قربت واكو خبر حلو عواد رجع للعراق 

خيلاء : شلون عرفت ؟ 

تيام : مصادري الخاصة 

خيلاء : شنو راح نستفاد من رجعته احتمال يصيرون حزب ضدنا يتحدون ويطلعون ثروان منها مثل الشعرة من العجين .. 

تيام : ابداً انتِ بس ثقي بية وما عليج بالباقي مهمتج تهتمين بهمام وبس .. 

خيلاء : انتظر نهايتهم بفارغ الصبر 

تيام : قربت وداعتج ما يدوم الظلم مهما طالت حباله 

خيلاء : يارب يارب .. 

للعصر جاب سديل يمي وكعدنا نتبادل همومنا سوية بعدها بلغتها بحملي... 

خيلاء : عندي خبر الج 

سديل : شنو ؟ خير ؟ 

خيلاء : اني حامل 

جانت تشرب مي شهكت بيه كامت تكح ..ابتسمت وطبطبت على ظهرها ...

خيلاء : اسم الله اسم الله شبيج ؟ 

سديل : شنو حامل ؟ شو تحجيها ببرود اعصاب ؟ شلون ولج وانتِ زواجج من ثروان باطل امشي خلينا انزله..

خيلاء : صبرج علية يمعودة

سديل : احجي بسرعة مو راح اموت

خيلاء : مو من ثروان يا فهيمة 

سديل : منين اذا مو من ثروان ؟ 

خيلاء : همام وين راح ؟ 

سديل : شلون شلون ؟ وشوكت عيني ؟ 

خيلاء : عن طريق البلوتوث ، شلون يعني شبيج 

سديل : لا قصدي ما انجمعتوا سوية شلون صار الحمل ؟ 

خيلاء : انجمعنا حياتي انجمعنا وصار اللي صار 

تقربت حضنتني وباركتلي وعيونها تدمع 

خيلاء : هسه ليش البجي ما نعرف نفرح بشي إلا نبجي يعني 

سديل : مو هيج بس دائماً فرحتنا تكون ناقصة ، همام جان يدري ؟ 

خيلاء : لا مايدري بالجديد عرفت 

سديل : ياالله شلون توقيت صعب بس تدرين مو وقته ابد 

خيلاء : بعد صار ورزق الحمدلله على كل حال 

سديل : الحمد لله بس لازم تعلنين لا تضمين هيج خبر خصوصاً عن امه لازم تعرف هسه تسويلج هوسة 

خيلاء : وليش تسويلي هوسة غير من ابنها 

سديل : ما تدرين بيها تنتظر بفارغ الصبر تتخلص من عندنا عاد تعرف بيج حامل هسه تتخبل 

خيلاء : بوقتها نعرف ردة فعلها خلينا ما نستبق الاحداث 

سديل : نهيل وتيام عندهم خبر ؟ 

خيلاء : لا انتِ اول وحدة ابلغها 

سديل : اي زين ، همام شنو وضعه ماكو تطور بحالته ؟ 

خيلاء : الدكتور يكول لازم ننتظر فترة ونشوف 

سديل : الله كريم عمت عيني عليك همام ..

خيلاء : الله موجود 

سديل : ونعم بالله

لليل اجتي امه الحجية وكالعادة من تجي تبجي وتلوم بينا اني والبنات وبسببكم ما بسببكم هيج صار طكت روحي وحجيت .. 

خيلاء : والله يا خالة اللي صار بينا هو بسببكم انتم وبسبب البيئة اللي جنتوا عايشين بيها شو لا عواد ولا شاهين يقربولنا وهم اساس البلاء ليش كل مرة تذبين الصوج بينا وتعرفين كلش زين احنا ضحية 

_ ليش ثروان يقربلنا لو ابوج وامج يقربولنا ؟

خيلاء : تريدين تحاسبيهم روحي لأميرة لكبرها حاسبيها وابوية هذاك موجود حي يرزق وثروان تندلين مكانه وحاسبيهم شلون كاعد تحاسبينا هسه على ذنب تعرفين كلش زين احنا بريئين منه 

_شلون لسان وصلافة ما اعرف ابني الاغبر شلون حبج ؟ 

خيلاء : من يكعد اسأليه شلون حبني 

سديل : لا تنفعلين موزين عليج انتِ حامل 

باوعتلي صفنت بوجهي مصدومة بملامح باهته كالت 

_ حامل من منو ؟ 

سديل : من همام خالة مبارك عليج حفيدج الجديد

_ حفيدي شنو ؟ مستحيل اتقبل هاي اللغوة هذا مو حفيدي ولا يقرب لهمام اكيد ابن ثروان وتريدين تذبيه براس ابني وتعگلينا بيه 

خيلاء : من يكعد ابنج تأكدي منه 

_ لا كل شوية وكايلة من يكعد ابنج جاوبيني هذا ابن من ؟ 

خيلاء : بكيفج انتِ شتكولين منو ابوه ؟ 

تعالت اصواتنا دخل تيام صاح  بينا 

تيام : صوتكم هسه يطردونا كلنا بالكوة سمحولنا ندخل عنده وتالي تتمالخن يم راسه عدچن شي ارجعن للبيت تمالخن مو هنا 

_ تعال اسمع الكارثة المدام حامل وتريد تذب حملها براس ابني ترضاها 

باوعلي وعيونه لمعت فرح تقرب مني وكال 

تيام : صدك حامل خيلاء ؟ 

خيلاء : اي حامل 

تيام : ماشاءالله تبارك الرحمن ربنا ما يكطع حاشاه الف مبارك اذا كعد همام وعرف بالخبر اكيد راح يفرح 

خيلاء : الله يبارك بيك ان شاءالله 

_ عاد اني ردتك عون وانت تباركلها ؟ 

تيام : وليش ما اباركلها بهيج خبر حلو كلنا منتظريه 

_محد منتظره غيرك وخر من وجهي انت كلشي ما تفتهم لو اكولك امشي رجعني للبيت 

لفت عبايتها وكامت مغتاضة ، اخذها تيام رجعها ومن اجه جاب نهيل وياه اول ما شافتني حضنتني وباركتلي على حملي ... 

ومرت الأيام وصار شهرين على وجودنا بالمستشفى ما جنت اقبل ارجع للبيت ابد الأ ساءت حالتي والدكتورة كالت لازم ارتاح بالبيت وانام على ظهري رفضت بقوة ، بس تيام وسديل ونهيل اصروا علية حتى ارجع ورجعت بس بالي وگلبي عند همام ... 

رجعت للبيت نايمة على ظهري دخلت بالشهر الرابع من اخذت سونار طلع بية ولد كلش فرحت راح يصير عندي اخ لتينا ، اخ يا تينا شسوة بية غيابج من يوم اللي طلعت من البيت ما عندي اي تواصل او خبر عنها ... كلشي انقطع وباقي بس أملي برب العالمين حتى ترجعلي..

وبيوم جنا كاعدين اني والبنات انفتح الباب دخل تيام للغرفة باوعلي وباوع لنهيل وكال .. 

تيام : عندي الكم مفاجأة إلا بشدة 

خيلاء : ياالله همام كعد احجي الله عليك .. 

تيام : ان شاءالله يجي يوم وابشركم بكعدته بس اكو ضيوف جايبهم وياية راح تحبوهم هووواي وتفرحون بجيتهم

نهيل : احجي الله عليك ما ضل عندي صبر منو ؟ 

راح فتح الباب ويدخلون تينا وصقر 

شهكنا من الصدمة ، كمت من فراشي واخذت بنتي لحضني ونهيل حضنت ابنها ونصرخ من الفرحة ما مصدكين نشوفهم عبالك حلم ، نحضن ونبوس بيهم ونسأل شلون هيج صار و شوكت جابهم وشلون ...

تيام : افهمكم بس اشبعوا منهم بالأول .. 

صقر مستغرب الوضع وخايف من عندنا وتينا باهته ما نطت اي ردة فعل صافنة بوجهنا..

خيلاء : شبيج ماما ما فرحانة بشوفتي ؟ 

تينا : اريد بابا وين اخذوه اريده 

باوعت لسديل وطلبت منها تاخذ الأطفال لغرفة ثانية حتى افتهم من تيام اللي صار .. 

سديل : تعالوا يا حلوين تعالوا اعرفكم على صديقكم الجديد اسمه آدم راح تحبوه هواي ... 

اخذتهم وطلعت ، ألتفتت على تيام وسألته عن الصار وعن سبب اختفائه عن البيت ايام 

تيام : من جمعت الأدلة وصارت واضحة بين ايد العدالة ، راقبوهم للجماعة والبارحة لزموهم جانوا ناوين يطلعون تهريب عن طريق البحر 

خيلاء : منو ومنو ؟ 

تيام : الروس الكبيرة ، شاهين وثروان وعواد وكم كلب وياهم 

خيلاء : ياربي و شلون انكشفوا شنو اللي صار احجيلي بالتفاصيل الله عليك..

تيام : اشبعوا من جهالكم وخلوني ارتاح واسبح بعدها احجيلكم..

طلعنا من الغرفة نحضن بالأطفال ودموعنا تنزل ما مصدكين اللي صار ، بعدها كامت سديل سوت العشا ما قبلت نساعدها كالت ابقوا اشبعوا من اطفالكم..

خيلاء : ربي يترس حضنج اطفال ياحبيبتي.

سديل : وانتم حاضرين وتربوهم وياية ..

ضحكت على سوالفها ... عشينا الاطفال ونيمناهم وعلى العشا كعدنا وية تيام وبلش يسرد النا التفاصيل..

تيام : تتذكرون الشركة المنافسة ألنا ، من جنا نخسر بسببهم وبعدين دخلنا مروان بوسطهم 

خيلاء : اي اتذكر شبيهم ؟ 

تيام : الشركة راجعة لعواد وثروان وشاهين بس مسجليها بأسم شخص آخر

خيلاء: زين كمل 

تيام : من دخل مروان بينهم  وتخشخش بلشنا نكتشف صفقات اختلاس وتزوير وغسيل اموال عن طريق هاي الشركة ، من انلزم صاحبها اعترف عليهم واحد واحد حتى يبرأ نفسه

خيلاء : زين 

تيام : بعدها كدرنا نوصل للشخص الجان كاشف عن وجهه بيوم الحادث لزموه واعترف بكلشي طلعوا عليهم أمر القاء قبض بس ما لكوهم ببيوتهم ، بعدين اجاني اتصال بلغوني بيه كالوا ترة الجماعة متفقين وية مهرب يطلعهم عن طريق تركيا و وياهم الأطفال والحمد لله القوات الأمنية البطلة كدرت تلزمهم ونطوني الأطفال بعد ما ثبتت صلة قرابتي بيهم ، حتى اني اخذوني وحققوا وياية وبعدين طلعت وجبت الحلوين وياية .. 

خيلاء : الحمد لله يارب الحمدلله

تيام : تفاصيل كلش هواي بس المهم تحققت العدالة ومنتظرين الحكم عليهم 

نهيل : يارب يارب ، بس بقى بابا ما سويتوله شي ؟ هو اساس البلاء لا تكولي بعده حر طليق عايش حياته 

تيام : شلون انساه جروه جر من فراشه ، متورط بقضايا ما تقل سوء عنهم وان شاءالله ياخذ جزاته 

سديل : ان شاءالله 

بعدها ألتفتت ناحية نهيل لكيتها صافنة.. 

خيلاء : وين صافنة ؟ نهيل يمعودة وين رحتي ؟ 

نهيل : مصدومة ما مصدكة ابني رجعلي حاسة روحي بحلم ، من رخصتكم اروح اشوفه اريد اشبع منه اريد اعيش هاي الحقيقة الجنت منتظرتها فترة طويلة.. 

تركتنا وراحت لأبنها ، بعدها طلعت وراها واخذت تينا وآدم لحضني ونمت بوسطهم 

ثاني يوم انتبهت على تينا متنحسة وكل شوية تسأل عن ابوها بس من شافت الأولاد ألتهت وياهم شوية وقللت اسئلة عنه ... 

ومرت الأيام تشبه بعضها بين فرحتنا برجعة اطفالنا لحضنا وبين اذيتنا وخوفنا على وضع همام ،كسرتنا عليه جبيرة ، وبسبب وضع الحمل مو تمام عندي ما قبلوا ابات بالمستشفى رغم اصراري عليهم بس الكل رافض ، اروح اشوفه شغلة ساعة وارجع ، وهاي كاعدة بالبيت اعد ايام ، اللي مهون عليه بنتي بحضني وابني اللي ينبض بداخل روحي كل نبضه منه احسها أمل لحياتنا القادمة .. 

افرش سجادتي وادعي من كل گلبي يشافي زوجي حبيبي ويطلعه من هاي الشدة ويرجع يوكف على حيله.. 

بهاي الفترة اني والبنات قررنا نتحجب وطلعنا اشترينا ملابس محجبات كله طويل ومستور بوسط الطلعة حسيت بتعب مفاجئ رجعوني للبيت وطلعوا غير وقت كملوا النواقص العندنا... 

ومرت الايام الى ان دخلت بشهر السادس ، حددوا موعد المحاكمة للعصابة واصريت على تيام يدبرلي مقابلة وية ثروان وبابا رفض رفض قاطع لكن اصريت عليه الى ان وافق واخذني .. 

تيام : يعني شلون افوتج لهناك ما تكوليلي ؟ سجن هذا بابا سجن مو متنزه 

خيلاء : ومنو كال ما اعرف وين رايحة ؟ اعرف بيه سجن واظلم من الليل بس گلبي ما يبرد اذا ما اشوفه مهزوم ومذلول كدام عيني .. 

تيام : اي مو خسر كلشي وانسجن والدولة خلت ايدها على كل ممتلكاته شنو رايده بعد اكثر من هيج ذل ؟ 

خيلاء : الحجي شكل والشوف شكل اريد اشوف نظرة الذل بعيونه واطلع ما اريد اكثر .. 

تيام : وحملج ما فكرتي بيه راح تفتحين علينا جبهة جديدة هسه يحرك عليج دعوة وشو شنو يحوكلج بيها .. 

خيلاء : اني اريده يشوفني حامل تيام وديني وانت ساكت

تيام : شو تشمرين بالحجي شنو محد بعينج ؟ 

خيلاء : ما مشمرة انت مدري شبيك وياية 

تيام : مو سوالفج مو منطقية 

خيلاء : المو منطقي حجيك 

تيام : تدرين لو همام صاحي ما جان يقبل بسوايتج هاي 

خيلاء : جان اخذني بيده لو جان صاحي 

تيام : على اساس تعرفيه اكثر مني 

خيلاء : مو قصة اعرفه اكثر منك بس اللي متأكده منه ما يرفضلي طلب 

تيام : خليني ساكت هاي وصلنا بس باعي سايرتج وجبتج غير الربع ساعة ما تطولين اكثر 

خيلاء : حتى لو دقيقتين يكفي اشوفه مذلول كدام عيني 

نزلنا ودخلنا لمكان المقابلة صدري احتصر من دخلت ما جنت كد هاي المواجهة بس بنفس الوقت رايدتها

كعدت بالانتظار وتيام طلع ماكو دقايق وصاحوني حتى اقابله مشيت للمكان الجان بيه باوعتله بيني وبينه جام فاصل و اكو فتحة نحجي من خلالها، باوعتله لابس بدلة الاتهام وايده مكبلة شافني انصدم وتغيرت ملامحه .. 

ثروان : هاي انتِ؟ اشجابج ؟ 

خيلاء : اي اني ما متوقع تشوفني مو ؟ 

ثروان : شرايدة ؟ ليش اجيتي ؟ 

خيلاء :  اجيت اشوفك وامتع نظري بهذا المنظر 

ثروان : شمتانه مو ؟ 

خيلاء : فوك ما تتصور 

ثروان : حرام التعب بيج 

خيلاء : شفت آخر الطغيان شنو ؟ عبالك الدنيا بس الك بكيفك تسرح وتمرح وتقتل وتسلب ارواح ناس بريئة بدون سبب 

ثروان : اسكتي واحجيلي هاي شنو بطنج منفوخة ؟ حامل منه مو كلبة ؟ 

باوعت لبطني وحطيت ايدي عليها وابتسمت رجعت باوعتله 

خيلاء : ابوه رجال وما تركني بيوم ولا غدر بيه 

ثروان : شوكت هيج صار من جنتي على ذمتي مو ؟  زانية نكسة قذرة 

خيلاء : لا مو زانية حملت من زوجي ما سويت الحرام مثلك ، فوكاها يتصور وياهن حتى الذنب يصير ذنبين..

ثروان : شلون من زوجج واحنا جنا متزوجين ؟ احجي 

حجاها مستفهم بملامحه ويكز على اسنانه..

خيلاء : زواجي منك باطل يا عزيزي اني جنت على ذمة همام وبقيت وياه ما يوم تركنا بعض وازيدك من الشعر بيت ، صار الحمل واني بداخل بيتك  وقريبة منك..

ثروان : شلون يعني ما فهمت ؟ 

خيلاء : من جنت تدور على الحرامي الدخل بيتك جان همام وبغرفتي واني ضميته عنك بين قوسين استغفلناك وهاي ابسط شي ممكن نسويه الك ونرد جزء بسيط من حقارتك ، وخليتك تحبني بل تعشقني وسحبت كلشي منك وانت مثل الاهبل ، خليتك تترك منصبك ووظيفتك وبيدك سلمتني كلشي يدينك وهسه انت بمكانك الصحيح شنو اريد اكثر من هيج ؟ 

ضرب بيده على الجام الفاصل بينا وصاح 

ثروان : والله الا اقتلج اذا مو بيدي ادزلج ناس يصفوج لا عبالج بين اربع حيطان ما اكدر اسويلج شي اذا ما خليتج عاجزة بطرك النفس لا انتِ بالسما ولا طايلة الكاع مثل حبيبج النايم بالمستشفى ما اتسمى ثروان روحي روحيله و اشبعي بيه وهو نايم عاجز تتفرجين عليه وتشبعين قهر..

خيلاء : كلشي بيد الله وان شاءالله يرجع على حيله ويرجع لزوجته وابنائه ويفرح بيهم بس اويلي عليك انت خسرت كلشي خسرت وظيفتك وبيتك ومنصبك وبنتك وخسرتني والأهم خسرت حريتك وان شاءالله الاعدام حليفك 

تركته وطلعت من المكان حاسة بمشاعر غريبة انتصار على خسارة على ضعف على قوة ، مشيت لكيت تيام منتظرني ردت اقابل ابوية رفض وكال هذا هو خلينا نرجع ورجعت... 

مرت الأيام وبيوم تيام كال لازم نغير البيت ونشتري شقق مستقلة كل عائلة الها شقة خاصة ونكعد كلنا بمجمع قريبين على بعض ، لأن صرنا هواي ولازم الكل ياخذ راحته ، وبالفعل عرض البيت للبيع واشترينا ٣ شقق بمجمع سكني وحدة اني والحجية ام همام وآدم وتينا وان شاءالله همام من يطلع يسكن ويانا ، والشقة الثانية لتيام وسديل والثالثة لنهيل وابنها وبلشنا بتجهيز الشقق وكملت على اتم وجه وسكنا بيها الموضوع ما طول شهر مادام الفلوس موجودة كلشي سهل .. 

بعدما استقرينا عشنا ايامنا براحة المنغص الوحيد غياب همام بينا كلش مبين علينا ملامحنا حزينة وماكو اي طعم للفرح .....مشت الأيام خلصت دخلت بشهر التاسع وخلصته ودخلت بالعاشر وما ولدت طبيعي دكتورتي قررت تولدني عملية  لأن الطفل شارب مي الراس .. 

بيوم عمليتي رحت لهمام كعدت يم راسه واحجي وياه عيونه تباوعلي بس ما يشوفني نفسه يصعد وينزل بس ما ينطي اي ردة فعل ، حجيت وياه وعاتبته اكثر ، دنكت بست ايده ورجعت بست راسه وهمست بأذنه .. 

خيلاء : ابنك راح يجي للدنيا وانت بعدك نايم شوكت تكعد وترجع بينا شوكت اشوفك تحضن ابنك ، راح تعوفني بأصعب ايامي ويمكن احلاها لان ابنك راح يصير بين احضاني ، تمنيتك تشيله بإيدك وتحضنه وتأذن بأذنه وانت تسميه وتشمه بس اخ اخ يا نومتك كسرت ظهري بيها ... 

كمت منه وطلعت لكيت سديل ونهيل ينتظروني باوعولي وحدة حضنتني والثانية مسحت دموعي ... 

نهيل : يلا حبيبتي خلينا نروح تيام منتظرنا بالسيارة .. 

مشيت وياهم وعيني على غرفته متمنية يطلع ويصيحني ويكولي انتظريني جاي وياج بس خلصت الممر وماكو اي اثر إله ، صعدت السيارة وتوجهنا للمستشفى ، الطريق كله ادعي تصير معجزة ويطلع همام بسلامة ، وصلنا دخلوني للمختبر سويت تحاليل وبعدها دخلوني للغرفة غيرت ملابسي واخذوني لغرفة العمليات قبل لا اتبنج بالكامل صورة همام كدامي وصوته بأذني كأنما حقيقة حاضرة وياية.. 

ثواني وغبت عن الدنيا ما حسيت الأ واني بغرفتي اون من الألم واصيح بأسمه واخواتي محاوطيني ويبجون على حالي...

من صحيت بالكامل جابوا ابني اخذته لحضني ورضعته رغم جنت متوجعة بس حبيت هذا الشعور طفلنا بين احضاني حسيت بريحة همام تلف بالمكان ... 

ثاني يوم طلعوني ورجعت للبيت ، حضيت بأهتمامهم بس جنت احس بفراغ جبير محد يمليه غير صاحبه جنت مكسورة وتعبانة نفسياً  ..

ام همام تغيرت وياية بهاي الفترة بسبب كسرتها على ابنها وشافت محد ألها غيرنا تقبلتني وتقبلت الوضع وصارت تعاملني بالحسنى بالمقابل اني جنت اداريها وحاطتها بين عيوني لأن تبقى اجمل ريحة من حبيبي واذا باريتها وداريتها لعيون زوجي ما اخسر شي ، اني ما حضيت بمحبة ام على الاقل احضى بحبها واهتمامها بية وبطفلي .. 

اما تينا جانت مستغربة الوضع الجديد وما متقبلة الطفل نهائياً جانت تغار وتتذمر منه وخالاتها جانوا ياخذوها ويحجون وياها ويحاولون يخلوها تتقرب منه وتتقبله... 

ما نست ابوها ولا لحظة مرت اذا ما سألت عليه وتطالب بشوفته وجنت اكوللها بابا مسافر وراح يرجع عن قريب ...

جان كلامي مجرد مخدر الها ... 

بعدما ولدت رفضت اسمي ابني اي اسم ، وبالبيان مالته سموه محمد وكالوا حلو لا تغيريه ، امه كالت همام يحب هذا الأسم وهو جان عاجبه يسمي آدم محمد بس سارة اصرت على آدم وهمام ما رفضلها طلب... وافقت وسكتت..

اول ما تعافيت من العملية وكدرت اكوم على حيلي طلبت ياخذونا اني وابني لهمام نشوفه .. 

ورحنا حطيته على صدره وقربته منه كلت بلكت يحس بيه وتصدر منه حركه وللأسف ماكو اي تفاعل منه ... 

ضليت كل يوم على هذا الحال اجيب ابني واجيه ساعة ساعتين ونرجع للبيت ومرت ثلاث اسابيع وبيوم اجينا اني ومحمد كعدنا يم راسه واحجي واناغي وية ابني الى ان حسيت صدرت منه حركة جديدة ركزت وياه جان يحاول يحرك شفايفه ويصدر اصوات ما مفهومة وهاي اول مرة يسويها عبالي اتخيل ركضت على الدكتور وبلغته اجه وياية وكعد يراقبه مبتسم باوعلي وكال.. 

_ ان شاءالله هاي علامة ممتازة للشفاء ممكن يصحى بأي لحظة حاولوا تكونون قريبين منه هاي الفترة.. 

شنو من فرحة وشنو من شعور حسيته خابرت على البنات وعلى تيام وبلغتهم ، كلهم اجوي وسمعوا من الدكتور التطورات الممكن تصير بالأيام القادمة مادام بدأ يطلع اصوات معناها راح يصحى.. 

بمرور الأيام بدأ يتفاعل وية الكلام او الألم ومن الطبيب يسأله تسمعني يرمش بعيونه ، هنا طرت من الفرح بعمري ما فرحت بشي بكد فرحتي هسه .. 

_ هاي نسميها بالطب مرحلة الإدراك الجزئي يعني ممكن افاقته تكون قريبة... 

تيام : شكراً دكتور على جهودكم المبذولة ما قصرتوا وياه ابد 

_ هذا واجبنا وان شاءالله فرحتكم تكون قريبة.. 

خيلاء : ان شاءالله.. 

بعد فترة بسيطة كام يميز الاصوات ويلتفت تجاه صوت مألوف لمسامعه مثلاً صوتي او صوت امه وجان يبتسم بس ما يكدر يحجي .. 

والدكتور كال وصلنا لمرحلة الافاقة الفعلية وهنا يحتاج فترة اعادة تأهيل لتقوية الذاكرة والحركة والنطق ....بس شوكت يباشرون بيها ما اعرف كال انتظروا ...

وبدأت مراحل افاقته شوية شوية.. 

مرة جنت كاعدة عند راسه واراقب نفسه الصاعد نازل ، الغرفة ساكنة بس صوت الأجهزة تقطع الصمت القاتل بيها .. 

الستائر نصف مفتوحة وضوء الشمس داخل منها بخجل يضرب وجهه الشاحب و ايده المرتخية مثل الورقة على السرير .. 

بدا راسه يتحرك حركة خفيفة بعدها انتبهت على اصابعه ارتجفت .. 

تقربت منه فتح عيونه باوعلي بظرة مو كاملة بدون وعي ، بتركيز بسيط مثل الطفل تقربت من أذنه همست.. 

خيلاء : حبيبي تسمعني ؟ 

رمش بعيونه مرة مرتين وحاول يحرك شفايفه صدر منها أنين بسيط.. 

حاول يرفع ايده بنحول وتعب ماكدر ، لزمت كفه وهمست   

خيلاء : حبيبي اني يمك اني خيلاء ياروح الروح اكعد منتظريك على نار .. 

انتبهت على ايده وكعت من السرير وهاي اول مرة هيج يحركها..تنفسه تغير صار اعمق ، حرك رقبته بس جان يتألم يفتح عيونه ويرجع يغمضها بعد دقائق صدر صوت منه بس ما فهمت طلب مي او شي ثاني بس سمعته طلب مي متأكدة .... 

ركضت بلغت الدكتور كل عادة اي تطور يصير اركضله ويبشرني خير.. وكال عن هاي الحالة تطور فعلي بحالته ...

وبيوم جنت نايمة يم راسه وحسيت ايد انمدت على راسي تمسد بيه فزيت من نومي باوعتله يباوعلي مبتسم طرت من الفرح اخذت ايده ومسدت على وجهه وكمت ابوس بيه مثل المجنونة وهو مبتسم يباوعلي .. 

خيلاء : حبيبي كعدت هاهي يعني ؟ حبيبي عرفتني همام ما مصدكة عيوني ما مصدكة .. 

همس بضعف كال.. 

همام : احبج... 

خيلاء : ياعمري يا حبيبي ياروحي 

الف الحمدلله والشكر يارب لك الحمد يارب يارب الف سلامة عليك ياروحي انت

ما اعرف شنو اسوي ارتبكت ، ابوس بيه واركض لباب الغرفة اريد اطلع اصيحهم وارجعله اريد اصدك الشافته عيوني وسمعته أذني ، بعدها تركته وركضت على الدكتور دخلت غرفته بدون ما ادك الباب واستأذن واصيح بصوت عالي هرجت المستشفى..

خيلاء : دكتور دكتور همام صحا عرفني وابتسم دكتور زوجي صحا.... 

_ ياالله ياالله. 

كام وياية واني اركض كدامه واصيح واهلهل خبصت الدنيا والناس تباوعلي مبتسمين على فرحتي ، دخلنا عنده لكيناه بعده فاتح عيونه شافني ابتسم لزمت ايده والدكتور بدا يحجي وهو يتجاوب وياه الحمدلله.. 

_ هسه شلونه البطل ان شاءالله احسن ؟ 

همام : الحمد لله 

يحجيها بصورة متقطعة وبثكل.. 

_ هاي زوجتك البطلة ما فاركتك ابد عرفتها مو ؟ 

همام : شلون ما عرفتها ؟ 

_ الحمدلله هسه نكدر نكول وصلنا لمرحلة زينة ومتطورة من الشفاء بعد محتاجين فترة بسيطة ونطلع للبيت.. 

تركتهم  اخذت موبايلي وطلعت اتصلت على تيام والبنات وامه بلغتهم واجوي...

كلش فرحوا بيه دموعهم تشرح الموقف ، تحمدوله بالسلامة وامه بقت عنده واحنا رحنا للدكتور حتى نفتهم الحالة اكثر.... وكعد يشرحلنا .. 

_ اغلب المرضى اسهل شي يرجع عندهم الحركة البسيطة مثل حركة الاصابع وتحريك اليد بشكل خفيف تحريك القدمين هاي الحركات ترجع قبل الكلام وقبل الذاكرة لأن مراكر الحركة احياناً تتشافى اسرع ، بعدها تجي مرحلة الانتباه والتركيز .... 

قبل لا يحجي ينتبه للصوت يلتفت اذا تصيح بأسمه ، يرمش بعيونه كرد فعل ، مرات يركز على نقطة معينة هاي علامات بداية الوعي .. وصارت وية مريضنا

بعدها يبدي يفهم الكلام نسميها مرحلة الاستيعاب عادة يرجع الفهم قبل الكلام ، يفتهم اذا تحجون وياه بصوت هادئ ويعرف الشخص المقابل من يحجي وياه بس ما يكدر يجاوب مرات الاستجابة تكون بإيماءة او حركة رأس ، ومرحلة الكلام تكون آخر شي يرجعله .. 

الكلام يحتاح وعي وتركيز وتحكم بعضلات الفم ، لهذا من سألتيني ليش كلامه متقطع لو حجه كلمات بسيطة وسكت ، لأن المريض بدا يرجع تدريجياً لطبيعته ، بس احب أأكدلكم شغلة مهمة لازم تاخذوها بعين الأعتبار. 

تيام : وهي دكتور ؟ 

_ الذاكرة ترجع بشكل متأخر وغير كامل بالبداية يعني اذا ما اتذكر اشخاص او مواقف لا تنصدمون لأن هذا الشي عادي .. 

تيام : ممكن توضح اكثر دكتور يعني يحتاج فترة اطول بعد ؟ 

_ الذاكرة عنده ترجع مثل شرائح متقطعة ، ممكن يتذكر اشخاص وممكن ينسى اشخاص آخرين ، او مثلاً هسه هو يعرف تعرض لحادث بس ما يتذكر تفاصيله ، احياناً اول ايام يكون مرتبك او يسأل نفس السؤال اكثر من مرة وهذا طبيعي بالبداية .. ضروري تتحملوه وتطولون خلك وياه..

تيام : اكيد اكيد المهم كام بالسلامة ، طيب دكتور شوكت نكدر نطلعه من المستشفى ؟ 

_ لما يكون واعي جزئياً يتنفس وحده ، جسمه مستقر وماكو خطر على حياته 

تيام : يعني شكد الوقت اكو مدة معينة ؟ 

_ من اسبوعين الى ستة اسابيع ، اغلبها عناية مركزة وبعدها جناح تأهيلي واذا شفنا الوضع تمام راح يطلع.. 

وبالفعل بلشنا بهاي المرحلة جنت كل يوم اكعد يمه واسولف وياه والدنيا ما سايعتني من الفرحة .. احجي احجي حتى لو ينام ما يتجاوب وياية المهم اسولفله عن شعوري وفرحتي وشكد مشتاقتله ..

مرات يتجاوب وياية بس تعبان و كلماته قليلة ومحددة.. 

واجه اليوم اللي طلعناه من المستشفى هذا اليوم جان عندنا بمثابة عرس ، ذبايح ومزايق ، حبيبي ضعفان وشكله تعبان وجهه اصفر .. 

دخلناه للبيت ونزلناه على السرير جنا محضريه بالصالة... حضن آدم تذكره وبوسه وحطه بحضنه لحد الآن هو ما يعرف بمحمد.. 

جان كاعد مبتسم ويباوعلنا وطلع حمودي من الغرفة يمشي بالحجلة باوعله مستغرب عاكد حاجبه وسألنا عنه.. 

همام : منو هذا الحلو ؟ 

جاوبته بأبتسامة جبيرة وشهكة ودموع تتسابق على وجناتي اخذت حمودي وحطيته بحضنه.. 

خيلاء : هذا حمودي ابنك .. 

همام : شلون.... ابني ....ما ما فهمت ؟  

يحجي بس بثكل والجملة تحتاج وقت يلا يكملها.. 

خيلاء : ابنك هذا حبيبي ابنا اني وياك .. 

نزلت دموعه وحضنه بقوة همس بتعب..

همام : لا مستحيل ما مصدك هذا ابني ؟؟.. 

جان يحجي ودموعه تنزل ، حضنتهم بقوة وحاوطتهم بقلبي..

خيلاء : ابنا هذا ياروحي ابنا ..

تنهدت وابتعدت اراقب الموقف من بعيد صح همام طلع من المستشفى بس يحتاجله عناية فوق الطبيعي.. 

لازم تعاملنا وياه يكون بهدوء وصبر مرة يفهم ومرة ينسى ، مرة يتفاعل ويانا ومرة يحب ينعزل ... 

وكلماتنا تكون بسيطة مو معقدة ، بدون عصبية او ضغط حتى يستجيب النا .. 

مرات يتقبلني ومرات يرفضني ويكعد وحده.. 

والدكتور اكد علينا وكال لازم يصحى بنفس الوقت وياكل بنفس الوقت ، تمارين بسيطة كل يوم يسويله تيام ، نومه نحاول نخليه منتظم ، هذا الروتين مهم حتى يساعد دماغه يرجع بشكل اسرع أسرع.. 

تيام يسويله تمارين بالبيت تحريك الايدين والرجلين ، ونساعده يكعد على وينام على السرير.. 

نساعدته يمشي خطوات بسيطة ، اذا وضعه يسمح 

الهدف من هذا الشي منع ضعف العضلات عنده .. 

عدا تمارين الوعي والتركيز نحجي وياه بصوت واضح ونكرر اسمه اكثر من مرة ونسأله اسأله بسيطة تعرف فلان شنو تتذكر عنه مثلاً او تحب تشرب شي معين حتى يبدي يتذكر الاشياء اللي يحبها .. 

الأكل لازم يكون لين وكميات صغيرة 

نراقب البلع حتى ما يختنق .. 

كلش ملتزمين بتعليمات المستشفى وغير هيج ناخذه بين فترة وفترة للدكتور حتى نتطمن على حالته  .. 

الدكتور يأكدلنا على مراقبة سلوكه ومزاجه ، مرات ينفعل ويخاف وينهار ويبجي ، اغلب الاحيان يصير عصبي بدون قصد ... 

رجعنت للدكتور  سألناه يكول هذا الشي طبيعي لأن الدماغ بدأ يرتب نفسه.. 

بين فترة وفترة يخضع لمراجعات طبية ، جلسات علاج طبيعي وعلاج للنطق ..

نسويله تصوير دماغ كل فترة ومتابعة طبيب اعصاب.. 

جنت اشيل كلشي بالبيت ممكن يتعثر بيه وما اتركه وحده لفترات طويلة واذا حب يمشي لازم واحد منا يرافقه ... 

وآخر شي عرفناه من الدكتور كال التحسن يصير بشكل بطيء ويبقى يحتاج مساعدتنا لأن الدماغ ما يرجع دفعة وحدة يرجع طبقة طبقة ممكن يبدأ ينطي وعي جزئي بعد سنة او اكثر .. 

حبيبي يفهم بس مو كلشي 

ويحجي بس مو بطلاقة 

يتعرف على الناس بس يخربط بينهم مرات ، يكون ذكريات بسيطة ..ويرجع ينساها...

يمشي بمساعدتنا ياكل بمساعدتنا ، يتعب بسرعة يتوتر من الاصوات العالية يخاف من اللمس المفاجئ ينسى الاحداث القريبة ... 

مرة جنا نايمين وفزيت على صراخه بالليل بسبب الكوابيس.. 

حضنته بقوة واخذته لحضني شربته مي ورجعته على صدري نام. 

خيلاء : حبيبي اسم الله عليك اسم الله .. 

ما يجاوبني بس يرجع لحضني ويدخل نفسه خايف... 

اغلب الأحيان يخلط بين الحلم والواقع يحلم ويحسه حقيقة ويتفاعل وياه بعدين يبدأ يهدأ .. 

الضوء اغلب الاحيان خافت لأن يتحسس منه ... 

كلش تعبنا وتأذينا بس عندي احلى من العسل المهم اشوفه كدام عيوني ، وان شاءالله حالته تتحسن بس يحتاجله وقت بعد يمكن سنة او سنتين حسب استجابة جسمه ودماغه.. 

نهيل فرحانة وية ابنها وتطلكت من شاهين غيابي ... 

سديل حامل بتوأم واستقرت حياتهم هي وتيام ومنتظرين عوض رب العالمين الهم .. 

ولهنا نختم قصتنا وألمنا ... 

صح اتخلصنا من ثروان وعواد وشاهين واتباعهم وانحكم عليهم قسم مؤبد والقسم الثاني من اتباعهم ١٥ سنة فما فوق بس اخذوا روحنا وسلبوا سعادتنا ... 

كل اللي صارلنا بسبب اهلنا وطمعهم وطغيانهم ونظرتهم لفوك ..

مرة استوقفتني عبارة  قريتها تكول السكن عند الأهل ليس بالمجان ستدفع ثمنه نفسياً

احنا دفعناه نفسياً وجسدياً وعقلياً 

للأسف مرات الأهل يكونون نقمة على ابنائهم مو نعمة ..

 بابا اخذ جزاته وانحكم مؤبد وماما لفها التراب وما حصلوا شي غير اذيتنا ودعائنا عليهم..ابد ما مسامحيهم على اللي سووه بينا..

مرت سنين عمرنا وتغيّر كل شي الأخوات الثلاث، اللي كانت الدنيا ما تعرف ألهن طريق غير العتمة، صارن اليوم نساء يعرفن معنى الضوء. تركن خلفهنّ وجع السنين الثكيلة، ومسحن دموع الخوف من وجوههنّ، ومشن بخطا ثابتة نحو حياة يحلمن بيها ..

تزوّجن رجال ما شافوا بيهن الماضي الوسخ ، بل شافوا قلوب تستحق البدء من جديد.

بيوتهنّ صارت مليانة ضحكات الأطفال، ورائحة اكل البيت تنبعث من بيوتهم، وصوت أذكار المساء بدل صمت الألم.

كل وحدة بيهنّ شالت جرحها وصارت تداوي بيه غيرها، من قصتنا علمنا البنات الصغيرات بأن الكرامة مو حلم، و كل سقوط ممكن ينهض من بعده إنسان أقوى.

وبين كل لحظة اكو سعادة مخفية، مرات يمر طيف الماضي مثل ظل بعيد... ما يأذينا  بس يذكرنا

بأن الطريق للنجاة مو سهل، وإن اللي نجى من الليل يعرف قيمة الفجر أكثر من أي أحد....

في زاوية معتمة من المدينة ، تعيش بنات الليل حياةً لا تشبه حياة أحد. وجوههنّ تحمل بقايا جمال كان يمكن أن يزهر لو لم تذبل أرواحهن مبكراً ...

 خلف الزينة الصارخة والابتسامات المصطنعة، تختبئ حكايات وجع طويلة، كل واحدة منهن دفعتها الحاجة، أو القهر، أو الخديعة إلى طريق لم تختره بملء إرادتها

هنّ نساءٌ يبعن الجسد لأن العالم سرق منهنّ الروح أولاً يحلمنَ بليلة نوم بلا خوف، وبصباح لا يلاحقهنّ فيه العار ولا نظرات الاحتقار. بعضهنّ أمّهات يخفين دموعهنّ عن أطفالٍ لا يعرفون ما تفعل أمهاتهم لتأمين رغيف الخبز، وبعضهنّ بناتٌ ضائعات يبحثن عن حنانٍ لم يجدنه يوماً..

في صمت الليل، بعد أن تنطفئ الأضواء وتغادر الأرصفة صخبها، يعودنَ إلى غرفٍ باردة، يواجهنَ أنفسهنّ — لا كبائعاتِ هوى، بل كضحايا لقدرٍ قاس لم يُنصفهنّ. فهنّ لسنَ آثماتٍ بقدر ما هنّ منكسراتٌ في مجتمع لا يمنح الغفران لمن لم يجد فرصةً للبدء من جديد.

من الوادي انطلقت الحكاية ومن ضجيجها انتهت تركتنا حين اكتشفنا قواعد اللعبة واليوم لم نربح كل شيء لكننا لم نخسر انفسنا وهذا وحده يكفي.....

تمت بحمد الله 

 لقراءه الجزء الاول من وادي الزعيم من هنا