بعد عفركوش ما فشل يهبط عزيمتها ويتعب نفسيتها رجع للنهج القديم وبقى يظهر تانى
(الله يخربيتك ما تتهد بقى )
استغل وجودها ف البيت لوحدها بعد نزول ولادها للمدارس(اه يامستغل يا ابن الوارمه)
هى بتخاف تنام ف الاوض ف كانت بتنام على كنبة الانتريه ف الصاله وكانت ف وش باب الشقه
مره دخل ف هيئة ابنها بس شكله مش مريح ونظرته وعيونه تخوف وقعد على ركبه قصادها باصص لها بصات غريبه وصوته ف ودانها وهى متكتفه مش قادره لا تتحرك ولا تنطق مره بيقولها وحشتينى
(اه ياعم المنحنح واخرتها مع امك ايه)
ومره اكنه بيعاتبها ويقولها واخرتها ايه
(اخرتها سواد عليك وع الى جابوك ان شاء الله يا ابن الصرمه)
بس برغم تقيدها الا انها كانت بتبصله بتحدى ومن جواها بتقول لو لاخر يوم ف عمرى مش هروح معاك ف حته
(جدعه يابت ايوه كدا اوعى تخافى منه)
وساعتها نظرته قلبت لشر وبقى شكله مخيف ولسه هتنطق لاقت الباب اتفتح ودخل منه ابنها برضوا بس ف هيئه حلوه
(الااااه هو ابنك طالع بكام منظر ياوليه انتى)
وقام ماسك ابنها الاولانى
(ايه ياحجه اللغبطه دى مين عمل ايه ف مين)
والى هو عفركوش من قفاه وقام طارده بره الشقه وقعد مكانه
(وتقعد مكانه ليه ليه ما تمشى انت كمان وكتر خيرك لحد كدا ياعم)
فضل يطبطب عليها ويقولها نامى متخافيش
ومره دخلت الحمام بعد العيال ما نزلت وفجأه سمعت صوت قارورة الميه اكن حد بيصب ميه وبعدها شافت خيال طويل ظاهر ف الحيطه جمب باب الحمام من بره
(يانهار جله متعاصه جله)
طبعا الرعب اتملك منها ومبقتش عارفه تعمل ايه وهتخرج ازاى ولا هى قادره تقرأ قرءان عشان ف الحمام ولا عارفه تخرج
(احيه زنقت البت ف الحمام لعبتها صح ياابن الناصحه)
سلمت امرها لله وخرجت وهى ماسكه المساحه ف ايديها عشان لو لاقيته ف وشها تضربه بيها
(بالمساحه ياموكوسه دا كدا هيموت اه بس م الضحك)
خرجت ومن وهى على باب الحمام من بره بدأت تقرأ قرءان بصوت عالى وجريت فتحت نور الشقه كله وعلت صوت الراديو ع الاخر وكل دا وهى بتلبس عشان تنزل من الشقه خالص ومن يومها مقعدتش ف الشقه تانى لوحدها
(طفشت البت من الشقه كلها يا ابن القادره)
وفضل عفركوش على كدا على مر سنين ولحد وقتنا هذا مره يظهر بكابوس ومره يظهر بشخصه ومره يخليها قاعده سهرانه ويجرى من قدام باب الاوضه ف هيئه طفل صغير وبعدها يطل بدماغه يبص عليها ويتدارى تانى
بس هى مازالت متمسكه ب ايمانها بربنا والصلاه وقراءة القرآن
وفضل عفركوش متمسك بيها بس مبقاش يلح على انها تمشى معاه بيظهر لما بتكون نفسيتها تعبانه يقف ع التسريحه يرقص ويطلعلها لسانه بشماته
تمت