رواية انتي لي الفصل الثالث3 بقلم اسماعيل موسي
صرخت مالك يا ريهام؟ ولما استدرت وبصيت على ريهام ووشها المرعوب ،بقعة دم كبيره على السرير
ريهام كانت قاعده فى حالة صدمه، عنيها مركزه على الدم وضامه رجليها ناحيتها.
مين عمل فيا كده؟ صرخت ريهام لما قدرت تسترجع نفسها
ادم شايف ؟
رفعت ريهام إيديها ناحيت وشها وضربت خدها
عنيه مثبته على ريهام لكن عقلى مش معايا، رافض يفكر او يصدق.
ادم ؟ ادم!؟ صرخت ريهام انت إلى عملت كده؟
قلت من غير تفكير عملت ايه بس؟
انت، انت قلت انك نمت بره فى الصاله يا ادم، ارجوك لو كنت بتكدب ارجوك قولى ابوس ايدك قولى ان دا حلم
او انك جيت جنبى بأى طريقه، انطق قول اى حاجه قبل ما اتجنن ؟
ريهام ؟ قلت بعد شوية صمت وارتباك، يمكن يكون اى حاجه يمكن ظروفك ؟ يمكن عورتى نفسك ؟
رجعت ريهام تبص عليه بصة غريبه غير مصدقه، لا لا لا
مش ظروفى، ومعورتش نفسى ،انا نمت ذى الميته.
اخدت نفس طويل، ريهام، لو انا ليه هكدب ؟
ثم انتى من لحظة دخولك الشقه مش مظبوطه
قعدتك تحت الكنبه، نظرة عنيكى، ولما دخلت الغرفه ابتسامتك وانتى قاعده تحت الجدار وال... ترددت شويه وكملت الحاجه إلى انا شفتها تحت السرير.
انا عايزة امى يا ادم، اتصل هاتلى آمى ،انا خايفه وعايزه امى
طلعت من الغرفه مش عارف اعمل ايه
امها ايه إلى هتيجى دلوقتى وهقلها ايه ؟
عملت كوباية ليمون فى المطبخ وجبتها لريهام اشربى واهدى ؟
كلمت امى سألتنى ريهام ؟
قعدت جنب ريهام، ريهام احنا لسه اول ليله فى شقتنا
هكلم امك نقولها ايه ؟
وهى امك هتفهم كل إلى حصل ده ؟
حبيبتى خلينا نفكر بهدوء ولو ملقناش حل نكلم امك
ريهام جسمها كله كان بيرتعش والدموع نازله من عنيها
قلت، ريهام عايز اطلب منك طلب بس ياريت تفهمينى
عايزك تدخلى الحمام وتاخدى شاور وتتأكدى حصل ايه بالضبط.
بلعت ريهام ريقها، ريهام بتحبنى
سمعت صوت الميه فى الحمام واطمنت شويه ان ريهام قدرت تتمالك نفسها ،بعدها سمعت صرخه فى الحمام
وريهام وقعت على الأرض.
جريت على الحمام فتحته بالقوه، ريهام مرميه على الأرض
الميه مسحوبه ناحيت البلاعة بطريقه مريبه
المرآيه عليها بخار المياه الساخنه لكن بصوره مفرطه اكتر من الأزم، شلت ريهام غرفتها نيمتها على السرير ،لبستها هدومها وغطيتها وقعدت جنبها
ادم ؟
سمعت همس ريهام الضعيف وهى بتفتح عنيها ،انا شفت
شفت
شفتى ايه يا ريهام؟
وانا تحت الدش والميه نازله فوق جسمى عينى جات صدفه على المرآيه وشفته بيراقبنى
قلبى وقف من الرعب والخضه، شفتى ايه يا ريهام؟
همست ريهام بصعوبه وجسمها كله بيرقص خيال جوه المرآيه مش قادره احدد شكله لكنه اسود ومشعر وعنيه عميقه ومبتسم ،وليه ديل اسود طويل