رواية الحب القديم الفصل الثامن8بقلم هند ايهاب الحبال
قعدت ترن عليه لحد ما رد بضيق وقال:
- أيه يا هدير كُل ده رن، في أيه مبتفصليش!!
- أيه يا فارس، أنا بس أستغربت أنك مشيت ومكلمتنيش
بخنقه قال:
- مفيش بس مشغول
ابتسمت وقالت:
- ولا يهمك يا حبيبي، أيه رأيك ننزل بُكرا نفطر سوا في مكان
- فطار أيه يا هدير، أحنا مش فاضيين للكلام الفارغ ده، بعد ما نتجوز أن شاء الله
سكتت وبعدين قالت:
- كُنت حابه أشوفك بُكرا
- بُكرا!! أقفلي يا هدير، أقفلي
قفل من غير حتى ما يسمع ردها عليه، بصت للتليفون واتنهدت تنهيده كُلها زعل.
- للدرجه دي نسيت عيد ميلادي يا فارس!!
فضل طول اليوم مش بيكلمها لحد ما هي فقدت الأمل أنه يكلمها ونامت.
صحيت من النوم لقت فارس في البيت نطت من الفرحه وقالت:
- أكيد جاي عشان عيد ميلادي
مامتها دخلت وباين على ملامحها الضيق وقالت:
- أطلعي يا هدير فارس برا
بصيت لها بستغراب وقالت:
- حاضر
لبست دريس وحطت ميكب بما أنه عيد ميلادها وهتخرُج، طلعت وعلى وشها أبتسامه واسعه.
أتفاجئت بوجود تميم وتميم قال:
- تعالي يا هدير أقعُدي
ابتسمت وقالت في سرها أكيد هيقول أن فارس هيخرجني.
قعدت وتميم قال:
- فارس جاي يكلمني أن أنتي هتعيشي مع اهله
بصيت له وقالت:
- يعني أيه!!
بعصبيه مكتومه قال:
- أيه يا هدير ما أنتِ عارفه ظروفي
تميم بص له وبعدين قالها:
- أيه يا هدير!!
هزت راسها وقالت:
- هو أنتَ جاي النهارده يا فارس عشان كدا!!
- أُمال أيه اللي هيخليني أجي يعني وأسيب شُغلي ودُنيتي يعني
هزت راسها وقالت:
- صح معاك حق
قام وقف وقال:
- طب أنا همشي دلوقتي وأبقوا عرفوني هتعملوا أيه، عن أذنكوا
خد بعضه ومشى، تميم بعصبيه قال:
- هتعملي أيه يا هدير
هزت كتفها وقالت:
- يعني هعمل أيه يعني يا تميم، فارس ظروفه مش أحسن حاجه
بضيق قال:
- وهو عشان ظروفه مش أحسن حاجه ترمي نفسك
- أرمي نفسي!!
- أيوه ترمي نفسك، أنتِ مش شايفه أُمه ست وحشه أزاي!! مش شايفه أن أُخته شايفه نفسها، وأن أبوه مالهوش لازمه وسطهُم، يعني من الأخر هتتمرمطي معاهُم
بضيق قالت:
- تميم لو سمحت متتكلمش عن أهل فارس بالأسلوب ده، أنا عارفه ومُتأكده أن فارس مش هيسمح أن حد يضايقني أو يجي عليّ، وأنا موافقه ومحدش يتدخل في حياتي
دخلت وسابتهُم بص لمامته وقال:
- أنا كده عملت اللي عليّ، عشان محدش يرجع يقول أنتَ سكت أنتَ معملتش
هزت راسها وقالت:
- خلاص يا تميم براحتها، خليها تشرب بقى
فضلت قاعده مخنوقه وقررت أنها تنزل أستوري بعيد ميلادها، وكان فارس أول شخص يشوف الأستوري.
- مقولتليش ليه أن عيد ميلادك النهارده!!