رواية احببت وانا علي ذمة اخر الفصل الثامن عشر 18 بقلم نوسه حمد
مرت الايام وطارق في شغلو الجديد اتوفق اكتر من زمان قال لي دا رزق نور عشان انا فتحتها بي اسمها قلت ليهو تستاهل كل خير يا طارق
البت الشغاله معاي ساعدتني شديد م قصرت مني ونحنا م قصرنا منها ولا من اهلها ما اعتبرناها بت شغاله عندنا كانها مننا وفينا
مرت الايام وهديه بتها اضايقت واكتشفو عندها قصور وجسمها لين هديه ما شاء الله صبوره شديد والحمل عليها بقا كتير ام طارق بدل تقول ليهو جيب بت تخدمها بقت تملي ليهو في راسو يرجع لي عبله وهديه كلمتني وانا طبعا عقدتي عبله بقيت اكرهها عمري ما عاديت الانسان بس عبله نهاي م قدرت احبها ولا اهضمها وما نفسي الدنيا تجمعني بيها سالت طارق قلت ليهو هديه تعبانه واولادك عليها شوف ليها بت قال لي لا لا بتصرف ان شاءالله قلت ليهو تتصرف كيف قال لي بتصرف ي نوسه حسيت انو بتهرب مني وما بعاين لي في وشي قلت ليهو طارق مالك حسيت تعابير وشك ما ياها وطبعا انا م عايزه اقول ليهو هديه قالت لي قال لي مالي فشنو بس سرحان في شغل كده لازم اتمو قلت ليهو سرحان الشغل انا بعرفو وسرحانك في حاجه تانيه انا بعرفو قال لي تقصدي شنو قلت ليهو البقصدو الانت فاهمو وما عايز تحكي لي بس من غير م اقول اي شي يا طارق فكر الف مره قبل تخسرني تاني قال لي كيف ي نوسه مافاهم انا انتي بتتكلمي عن شنو قلت ليهو الفاهمو انت يا طارق م عايزه اهددك بس انا بقيت م بقدر استحمل اي شي وزي م شايف حالتي تصعب علي الكافر قال لي نوسه ان شاءالله ح تبقي كويسه م تفكري قلت ليهو ان شاءالله م ح افكر سكت منو بس قلبي ماكلني شديد وغالبني اقول ليهو هديه قالت لي م نفسي اوقعها في مشاكل بسببي بي لمحت ليهو ان شاءالله يفهم
مرت الايام والشهور وانا ولدت جبتا لي ولد سميتو فارس وكان قطعه من طارق طارق كان فرحان بيهو شديد وعمل لي سمايه كبيره وعزم كل الناس كلهم جو الا امو رسلنا ليها حقها في البيت وهديه جات قيلت معاي وحالتها تحنن تعبانه مع ولدها حتي شكلها اتغير وهي صبوره لدرجه بعيده شديد طارق قال لي نوسه مفكر ارجع ليك حقك الشيلتو منك قلت ليهو كيف م فاهمه قال لي الدهب الشيلتو منك والقروش وكده قلت ليهو طارق نحنا اتفاقنا شنو اديك القروش وتفتح شغل واكون حق اولادك نور وفارس واكل منو واكل اهلك وشبعهم شبع بس في النهايه الحق حق اولادي تجي تقول لي برجع ليك القروش الهسي بقن م منها فايده اعمل بيهن شنو يا طارق وبعدين انت مالك فشنو حاسه في كلام ورا كلامك دا بس ان شاء الله ما يكون الفي بالي قال لي الفي بالك شنو خلاص قومتي علي التأليف قلت ليهو كفايه المره الفاتت كل م افتح خشمي تقول لي انتي بتالفي وتتصل تكلم علي اخوي في النهايه اكتشفت انك والد منها اتنين قال لي تقصدي منو عبله قلت ليهو في غيرها شيطان دخل حياتنا وفرقنا من بعض سكت م فتح خشمو قلت ليهو طارق رد احساسي صاح ما اتكلم قلت ليهو علي العموم يا طارق لو عاوز تدخل في حياتنا عبله تاني اعتبرني انا بره حياتك ما عندي استعداد لظلم وزي م شايف الحال الانا فيها قال لي ليه ي نوسه بتقولي كده انا لو رجعت عبله ح اكون عشان هدف واحد انها تمسك اولادها عليها ما اكتر ولا اقل والحصل المره الفاتت ما ح يحصل تاني وح اعدل بينكم قلت ليهو طارق عبله فاتت خلتك من غير م تطلقها اتزكر فاتتك لشنو لانك ماعندك قروش وجدعت ليك اولادك بالسنين ما سالت منهم ولا جات قالت ليك النرجع ما عرفت الا ترجعها هسي بعد شافت عندك القروش يلا يا طارق لو رجعت ليها قروشي ما عافيه ليك لو تديها جنيه منهن بجد انا غبيه وفعلا الرجال ما تديهم الامان م قادره اصدق انو بعد العملتو عبله فيك يا طارق تفكر ترجع ليها قال لي نوسه افهمي انا ما عاوز ارجع ليها حبا فيها بس زي م شايفه هديه بقت م بتقدر وهم صغار لسه م بعرفو حتي استحمو براهم وانتي ما بتقدري قلت ليهو طارق ممكن تجيب ليهم بت ومنها تساعد هديه قال لي اجيب بت تربي ليها اولاد ما اولادها فكرك ح تستحملهم قلت ليهو وهديه امهم استحملتهم هدي قال لي هديه فرق من البنات الشغالات قلت ليهو طارق انا خلاص فهمت انت عاوز ترجع عبله بس الباقي دا كلو اعزار رجعها يا طارق بس انت من طريق وانا من طريق وسلم الشغل لي اخوي قال لي نوسه دا كلام شنو معقوله قلت ليهو ومعقوله انت ترجع الهي سبب في الانا فيهو هسي دا قال لي نوسه الفيهو دا مرض جاك من ربنا هي دخلها شنو قلت ليهو هي وامك كانو سببب فيهو قال لي يا مره استغفري ما تخلي الشيطان يلعب بيك وتخربي حياتنا تاني انا م صدقت انها رجعت واحسن من زمان قلت ليهو من يوم رجعت لي وعبله مافي في حياتنا هل غلطت عليك ولا زعلتك قال لي لا قلت ليهو المشاكل بتجي معاها وانا المره دي م ح اسكت وانتظر تظلمني واغلط وانا في عصمتك عشان كده بقول ليك اختار يا طارق يا عبله يا انا عبله في انا مافي سكت م ردا علي وسكوتو عرفني انو باقي علي عبله طلع مني وما اتكلم معاي وانا الدنيا مسخت لي طارق المساء جا ومعاهو اخوي سلم علي وبقا يتناقش معاي ويقنع فيني قلت ليهو والله يا اخوي كلامك علي عيني وراسي بس انا الضقتو من عبله ما نفسي اضوقو تاني وطارق حر في تصرفاتو واختياراتو ما بقدر اتحكم فيهو بس لو رجع عبله هو في طريق وانا في طريق قال لي دا كلامك شنو والعنو الشيطان ما تشتتي اولادك محتاجين لي ابوهم وطارق هدا حلف لي انو كل واحده في بيتا وما بقصر من واحده والحصل من مشاكل قديمه تاني ما بحصل وزي ما انتي بتحبي هديه وهي بتحبك عبله زي اختكن وتحبنها وتحبكن وتربن اولادكن ديل الزمن م معروف اخوي بتكلم علي ثقه وما عارف عبله هي شنو عبله شيطان ممكن توقع طارق في غضب ربنا ويظلمنا غصبا عنو وبكون م واعي بسبب فعايلها هي وامو الخاته راسها معاها
اخوي بقا يحنس فيني ويقنع فيني وحلف علي طلاق اني م اتكلم واخلي طارق يشوف حياتو حسيت نفسي مكسوره عبله كسرتني ورقدتني في السرير وبعد طارق بقا عندو القروش ظهرت بتحب مصلحتها شديد وطارق اكيد امو ملت ليهو راسو عشان يرجعها بقيت اتحسبن علي امو لانها دي ما ام حنينه ام قاسيه وظالمه حسبي الله ونعم الوكيل فيها بقيت في متاهه والشي المتوهني اكتر رقدتي الفي السرير ولسه انا باخد في علاجي بقيت نفسي اقوم علي حيلي عشان اقيف في حق اولادي عبله رجوعها ما لي خير ح تاكل قروش طارق كلهن اخوي طلع مننا طارق جا راجع قال لي نوسه زي م قلت ليك انو ماف واحده بتفرق معاي زيك هن في كوم وانتي في كوم براك قعدت اضحك قلت ليهو ياهو لسان الراجل المعرس في مرتو ما مشكله يا طارق اعمل البريحك بس علي شرط قروش اولادي ما تاكلهن ليها قال لي نوسه العاوزاهو انت ببقا بس انتي ما تزعلي وانا كل شي ولا زعلك قلت ليهو م زعلانه والحمد لله ع قسمتي
مرت الايام وهديه قالت لي طارق جا ومعاهو مرتو مفتكراني ح اقابلها زي ما قابلتك وبقت توصف لي في شكلها لابسه كيف والرسم والحال قالت لي تقولي نحنا ما نسوان هي مميزه ميز قلت ليها ماعندها شغله تشتغلها مالا ما بتكون سمحه قالت لي بس اولادها فرقو معاي وحلفو ابو يمشو معاها اتعابطو فيني قطعو قلبي قطعه قلت ليها م قصرتي انتي معاهم ربيتيهم احسن تربيه
مرت الايام وطارق قال لي عبله عاوزه تزورك وتصافيك وتعافيك قلت ليهو لا يا طارق انت ما بتعرف عبله زي ما انا بعرفها عبله جايه تشمت في رقدتي لا تجيني لا اجيها خليها مكانها قال لي انتي مكبره الموضوع قلت ليهو خليني في حالي وهي في حالها ممكن قال لي خلاص ي نوسه ما تشيلي في قلبك ساي قلت ليهو خليني وبعدين عاوزاك في موضوع قال لي اتفضلتي قلت ليهو العربيه عاوزاها كلمت اخوي يشوف لي ولد يسوقها ويوديني الدلك انت مافاضي لي وكم جلسه ضيعتها بسبب شغلك واخر مقابله مع الدكتور ما مشيتها انت كنت مشغول قال لي بس العربيه انا بمش بيها الشغل وبجي بيها قلت ليهو قبل العربيه دي كنت بتمش كيف الطريقه الكنت بتمش بيها امشي بيها قال لي قلتي كده يعني قلت ليهو اي يا طارق انا عاوزه اتعالج وعلاجي داير مداومه ما داير مماطله انت انا مافارقه معاك بدل المره عندك مرتين قال لي حرام عليك والله نفسي اشوفك متحركه الليله قبل بكره حسيتو بجامل فيني وبجبر بخاطري بس فعلا انا مافارقه معاهو ودي اكتر حاجه وجعتني في الدنيا
اخوي جاب لي ولد بقا سايق لي العربيه وبقيت امش دلك يوميا وطارق ما شغاله بيهو اجي ويفوت
ما مركزه معاهو اتفقت معاهو الايراد يكون انا الجزء الاكبر وهو الربع وافق وكان صادق معاي شديد
يوم طارق اتصل علي قال لي بت هديه اتوفت مشيت ليها وكانت حالتها تحنن قطعت قلبي ونهاي ماسكتت نسيبتي الما بتحس بدل تواسيها قالت ليها بركه الماتت بت خليقه دايره بيها شنو والله كان تتعبك وتتعب ابوها قالت ليها دي نظرتك ليها انها خليقه لكن دي لحمي ودمي شايفاها احسن من اي واحده سليمه وكانت بتبكي شديد قلت ليها بدل تواسيها تسممي بدنها ليه وبعدين خليقه دا بالنسبه ليك انتي ما بالنسبه ليها هي لانها بتها قالت لي هسي انتي فرقك منها شنو ........يتبع