سلمى
ما. صدقت والواطة صبحت أخيراً... قمت من الصباح صليت وصحيت سعد صلى بعدها طلع شويه.. نظفت الغرفه ورتبتها طلعت المطبخ عملت الشاي ونظفت رجع سعد وشرب الشاي وطبعاً ام سعد قاعدة محمّر لي.. واقفة لي على الغلطه.. بعدها بقيت اجهز في الفطور واثناء ما انا قاعدة في المطبخ سمعت ام سعد تقول لي سعد.. الليله مالك.. اتاخرت على شغلك.. قال ليها الليله اخدت اجازة.. عشان مودي سلمى لي اهلها.. بعدها سمعت صوتها واطي حبه وما قدرت افهم بس صوت سعد كان واضح بعد شويه جاني سعد وقال لي خلصتي قلت لي شويه كدا.. بعد مسافه انتهيت وجريت لبست والله لو بيدي اطير طيران.. طلعنا انا وسعد وركبنا ركشه المسافه ما كانت بعيدة شديد وصلنا أخيراً ومشينا باتجاه البيت بس الصدمه لمن وصلت و لقيت الباب مقفول بي جنزير وطبلة.. دقيت ودقيت.. بس ما كان ف رد... قلي انقبض من الخوف والف احتمال خطر ف بالي عاينت لي سعد وقلت لي مافي يا سعد!... اخواتي مافي!.. سعد قال لي اهدئ اهدئ.. طيب تعالي نسأل عنهم الجيران... فجاءة اتذكرت عمتي وجريت عليها دقيت بابها وجاءت بعد مسافه سألتها بخووف وين سديم ونور.. عمتي عاينت لي كدا وقالت سلمى!.. بسم الله مالك.. قلت ليها وين ناس سديم وين ابوي؟.. عاينت لي سعد ورجعت تعاين لي قالت لي اتفضلي.. هزيت راسي بقوة وقلت لاااا لااا انتي ليه م عايزة تجاوبي وين مشوا بابهم مقفول.. عمتي نطقت أخيراً وقالت سديم.. اتزوجت قبل نص شهر ومشت مع راجلها وفي نفس اليوم حصلت مشكلة بين نور وابوك.. وابوك طردها من البيت ومن اليوم داك ما جات تاني طبعاً انا كنت زي الما واعية الاخبار نزلت علي زي الصاعقه عقلي م قدر يستوعب الحصل ليهم في نص شهر!.. نص بس بقيت ابكي واصرخ.. بس ياترى هل دا كان ح يغير حاجة وصدمتني اكتر لمن قالت لي.. اما ابوك مسجون ليو اسبوع لانو كان سكران وقتل لي واحد وهسي احتمال يعدموا.. طبعآ عمتي رمت علي الكلام بدون رحمة ولا شفقة نبرة الجفا واللامبالاة مالية صوتها.. وانا حسيت برجليني خلاص ماتوا وبقيت م قادرة اقيف اكتر سندني سعد وبقى يقول لي اهدئ كلو حاجه ح تكون تمام... بس انا كنت في عالم تاني.. معقولة دي النهاية يعني تاني م ح اشوف اخواتي لالا مستحيل... انا م بقدر بدونهم وين سديم وين نور.. قلبي حسيته بنزف من الوجع والحزن... فجاءة وصلت لي مرحلة بقيت ما قادرة ابكي يعني اتخيلو الحاجه الوحيدة اللي كنت بفرغ بيها وجعي خسرتها.. اتجمدت تماما واحاول اكذب السمعتو والف الف هواجس لعبت بعقلي وبقيت ما قادرة اسيطر على نفسي بقيت جسم بدون روح.. وين تاني بشوف اخواتي وين؟... ليه انحرمت من شوفتهم وانا قلبي لحدي الان كان بنبض عشانهم وين مشوا خلوني.... بعدها حسيت بحاجه تسحبني ولفة قويه لحدي ما فقدت الوعي..
سديم _♡_وانا نايمة حسيت بحركة جنبي فجاءة يد بقت تهز فيني وانا ما دايرة اقوم.. وشويه شويه بقى جر فتحت عيوني حبه وغمضتهم تاني.. سمعت صوت وهو يقول.. استغفر الله العظيم دا الناقص دي مصدق نفسها ولا شنو وكمان نايمه.. والله يا انا يا انتي في الغرفه دي.... ورجع تاني يهز ويقول قووومي بس انا رفضت تمام واتجاهلته وهو يحاول يقومني بس رفضت وتابعت نووم.... الصباح فتحت عيوني بتعب وقمت يا الله بسبب الفستان.. عاينت لي نفسي مسافه وللغرفه مسافه حتى استوعبت الحصل قبل اقوم جاء طارق داخل الا الما كسر الباب وكان شعره منكوش ووشه مورم.. وقال بصوت عالي اطلعي سريع يا عديمة الذوق.. قلت لي نعم نعم انا عديمة زوق احترم نفسك احسن ليك.. ويرد لي وانا ارد لي كلمة بكلمة.. اخر النهاية مسح وشو وقال الدخلك هنا شنو وكمان نايمة في نص غرفتي امس والله اتمالكت اعصابي كان جريتك من شعرك رميتك برا... قبل ارد جات ملاذ جاريه وهي مخلوعة وقالت ما ممكن والله صوتكم نزل تحت بس الحمدلله خالاتي لسه نايمات.. ما ممكن معاكم والله.. قلت ليها انا من امس قلت ليك خليني انوم في الغرفه ديك بس اصريتي انوم هنا واها دي النتائج.. رد طارق وقال.. انا م عارف الحصل امس شنو بس قسما بالله العظيم القاك دخلتي هنا ولو بالغلط الا اوريك وشي التاني.. قلت لي وانا اصلا م متشرفه اخش هنا.. ومشيت مارقه مسكتني ملاذ من يدي وقالت عليكم الله بس اليوم دا رجاءاً خليكم طبيعيا عشان الضيوف المعانا ديل وما تكسرو خاطر امي قدامهم.. سكتنا شويه وقلت لي ملاذ طيب ح اتحمل بس اليوم دا وطلعت من الغرفه وجات لاحقاني وقالت لي امشي انتظريني ف الغرفة اجيب ليك هدوم من الجبناهم ليك ايام العرس قلت ليها تمام... دخلت الغرفه انتظرتها لمن جات دخلت استحميت وغيرت ولبست الهدوم.. طلعت لبست العباية وصليت العشاء والصبح لانو امس نمت قبل اصلي.. انا ملاذ ونزلنا تحت لقيناهم كلهم قاعدين وسلمت عليهم وبعدها بقينا ننجهز ف الفطور وطول اليوم واقفين.. جبنه وشاي وغداء..
نور _♡_قمت الدغش صليت ودعيت ربنا يحفظ لي اخواتي ويجمعني فيهم.. اللقاء بيهم بقى امنية انا بتمناها كل يوم.. عسى الله ف يوم يحقهها.. خلصت وقعدت حبه بعدها اتذكرت اننا اليوم ح ننزل السوق.. قلت طيب امشي انظف عشان نطلع بدري شلت نقابي ف يدي وكان المكان مظلم بس شغلت الانوار ودخلت المطبخ وبديت امسح وانظف... بعد شويه حسيت بحركه قريبة من المطبخ.. طيرت عيوني والهواجس لعبت في عقلي .. فجاءة دخل احمد وانا انخلعت.. يعني اتوقعت يدخل علي شيطان بس ما اتوقعت احمد.. المهم لفيت بي الجهة التانيه وهو قال معليش افتكرت في مشكلة ولا حاجه لاني شفت الاضواء شغاله.. قلت براحة.عادي.. طبعآ انا لسه كنت تحت تاثير الخلعة.. واقول في نفسي اتلقى يقول البت المسكونة بتكابس الدغش مالها.. قطع تفكيري وقال بصوت متغير.. طيب مدامك صاحية اعملي لي كباية قهوة وطلع.. اتحسست من الطريقة الطلب بيها القهوة كاني نادلة في مطعم او مقهى.. اينعم انا شغاله هنا بي مرتب واي حاجة ودي ياها شغلتي.. بس ما عارفه ليه انزعجت.. يمكن لاني ما متعودة او يمكن لاني كنت متوترة.. بس نفضت كل دا من راسي.. وعملت القهوة طلعت لقيته في الصاله فاتح لاب توب حطيت القهوة وطلعت..