قلت لي.. بمجرد ما مشكلتك تنحل.. تخليني امشي وما تجيبني لي ابوي.. رد بسرعه وقال.. أصلا ابوك قال ما عايز يشوفك تاني اعملي العايزة.. فرحت من جوايي لاني بعد اخلص الموضوع دا ح اعمل حاجات كتيرة واحاول اساعد اخواتي ... رجع سأل وقال.. انتي دا ابوك جد جد ولا قاعدين تمثلو علي.. عاينت لي بالامبالاة... وفتحت باب العربيه ونزلت بدون ما اجابو لانوو سؤال غبي.. بقيت اعاين في المول الكبير الرااقي حاجه كدا خياليه واول مره اشوف حاجه زي دي.. فجاءة جاء ماشي بعندي زي الاعصار.. شكلو عدم ردي وجعوو.. المهم ما ركزت ودخلت وراه.... كان مليان حاجات رهيبه وواسع لي درجه خيالية بقيت اتلفت وعاين لي كمية الناس الموجودة.. اكتر من ناس حلتنا.... فجاءة لقيت نفسي برايي وداك ما عارفه طار وين المهم ما اشتغلت بي كتير.. بقيت اتفرج.. لي لحظه نسيت نفسي نسيت اي حاجه نسيت انا منو والجابني هنا شنو.. كان الناس يعاينو لي باستغراب.. بس انا ما اشتغلت بيهم.. لحدي ما شفت مكان كبير زجاجي في لافته مكتوب عليها ملابس للمنقبات فقط.. طيرت عيوني وقلت بس خلاص اكان اخش.. الباب اب ينفتح.. وبقيت احاول افتح فيه واتاريني اصلا ما جنب الباب لانو المكان كلو قزاز ف ما عرفت.. المهم وقف جنبي واحد لابس لبس زي اولاد المدرسه.. قال لي ي انسه في مشكله.. بقدر اساعدك.. قلت لي لالا اي حاجه تمام.. قال لي من قبيل ونحنا مراقبينك بكاميرات المراقبه كانك ضايعه أو خاشه غلط... قبل ارد جاء المعصعص زي الشيطان وقال لي.. لالا بس هي اول مره تحي هنا وضاعت مني عشان كدا.. الراجل هز راسه ومشى.. قبل علي وقال لي.. انتي مجنونه يابت الناس.. مشيتي وين.. قلت لي انت المشيت وين...
اتنفس براحه وقال لي انتي قايله نفسك في الحله ولاشنو.. استغفر الله... عاين للمكان الواقفين جنبو وقال لي بنهرة كدا تعالي ورايي.. دخلت سرعه مو عشان قال.. عشان انا دايرة اشوف من جوا المهم ديك يا العبايات المعلقه.. والطرح والنقابات. بقيت اعاين لي عبايتي الباهته وطرحتى المشروطه ونقابي المبشتن.. فجاءة مدا لي عباية لحميه خامة وحلوة قال لي البسي دي.. عاين لي وقال انتي منقبه ولا...
قبل مت يرد سبقته وقلت.. لا يعني لابسه موضه ما اكيد منقبه قال لي تمام.. اول مره اتكلم بطريقه زي دي وكمان مع راجل.. فعلاً حاسه نفسي ما سديم القديمة المسكينه ديك.. رجع جاب طرحة ونقاب بيجيات.. قال لي اسرعي عشان اتاخرنا.. بقيت اعاين للهدوم واعاين لي.. قام اشر لي على باب مقفول وتقريبا غرفة الغيار.. مشيت بسرعه.. ودخلت وكانت تحفه فيها مرايات بالحجم الكبير من شفت نفسي في المرايه والحاله العلي لمن انخلعت.. المهم لبست وظبطت النقاب ف المرايه وبقيت ما بنعرف فجاءة دق الباب.. فتحت الباب ومدا لي اسبورط عالي اعلى من حقى مرتين وقال لي البسي دا شلتو منو ولبستو سرعه ولميت هدومي واسبورطي القديم.. وطلعت.. بعدها اشترا شنطه لحميه متوسطة فيها شئ جوا لانها تقيله... وطلعنا من المكان الرهيب دا بعد ما دفع الحساب وركبنا العربيه ومشينا...
سلمى _♡_رمت الصحن الكان ملان اكل ف الارض.. وقالت لي بصوت عالي..انا كم مره قلت ليك ما تكتري الملح انتي ما بتفهمي ولا شنو.. والله دي غلطتي انا الخليت ولدي يعرس بت شوارع زيك.. حتى الاكل ما بتعرفي تسوي!..كلامها لامس قلبي بس بقيت ماسكه دموعي بالعافيه.. عاينت لي بعيونها المليانه حقد وشر وقاالت لمي الاكل دا وامشي اعملي اكل زي الناس.. دنقرت في الارض وبقيت الم في الاكل والصحن المكسور وبقيت... دخلت سرعه المطبخ وبقيت ابكي... بوجع وقهر واحساس الاهانه متمكلني.. فجاءة دخل سعد.. اللي هو زوجي وانا ندمانه على اليوم اللماني مع الناس دي وكلو من ابوي.. ربنا يسامحوو.. معاه او ما معاه انا متعذبه..
سمعت صوته الحاد وهو يقول بصوت واطي.. سلمى!.. الحصل شنو وامي مالها.. عاينت لي بغضب واضح.. قلت امك وانت عارفها ما تجي كلو مره تسالني.. انا فترت والله.. ما باقي لي الا اقطع ليكم لحمي دا وتاكلوو وترتاحوو وتريحوني.. قرب مني وقال.. مافي يدي حاجه ي سلمى عشان اعملها ونتي عارفه ظروفنا.. واناعارفاك صبورة.. ولازم تتحمليها.. عاينت لي وقلت امك دي ماف زول بتحملها... وانت اكتر واحد عارف... قبلت على البوتجاز اعمل اكل تاني... وسعد واقف.. فجاءة اتقدم وقال لي طيب ممكن اساعدك.. عاينت لي وانا عيوني حمر من البكاء وقلت.. لا.. امش من هنا قبل تجي امك وتعمل لي صداع.. ومع كلامي جات امو داخله.. وقالت ماشاء الله.. قاعدين لي هنا وانا منتظرة الاكل برااا.. عاينت لي ولدها وقالت.. انا كم مره قلت ليك البت دي ماتدلعها وما تدها قيمه اصلك من يومك الجبتها لي وانت متمسكن ليها كدا.. ما كفى اننا رضينا بيها.. انا كنت ساكته وما قلت شئ ود الواقف جنبي حسيتو برجف من كلام اموو.. واحد جبان وما قادر يرد عليها.. انا صح ضعيفه بس هو راجل ومفترض يكون عارف انو امو كلو يوم قصدي كلو ثانيه هي بتغلط في حقي وانا ساكته..
عاينت لي وقالت.. سعد اطلع براا.. وبدون ما يتلفت طلع.. طوالي عاينت لي وقالت ربع ساعه والاكل يكون قدامي والا اخليك تنومي الشارع.. بمجرد ما طلعت انفجرت وبقيت ابكي بصوت واطي... لحدي ما حسيت بوجع راس شديد.. مسحت دموعي سرعه.. وبقيت اعمل في الاكل وانا افكر في اخواتي..ياربي الحاصل ليهم شنو هسي.. وكيف متحملات ابوي.. واكتر واحدة شايله همها سديم لانها اصغر واحدة فينا واكتر واحدة حساسه اما نور ف اكتر واحد قويه وبتتحمل اي شئ...
سديم _♡_ساعات ونحنا ماشين انا نمت وصحيت وعاينت واتفرجت ونحنا ماشين.. ماف زول اتكلم وكنا ساكتين... لحدي ما اتكلمت بطني تصرخ وتقول سدددددديم انا جيعانه حدك وين انتي... بقيت اكح بصوت عالي عشان ما يسمع صوت بطني ما فيني.. المهم لمن عاين لي كان يتبسم.. من شنو انا ما عارفه فجاءءة وقف العربيه ونزل.. رجع بعد وقت وجاب معاه كيس مليان حاجات ومداه لي قال اتفضلي اتغدي.. شكلو سمع صوت معدتي.. قلت لي ما عايزة.. قال لي الطريق ليه قدامنا طويل احسن تاكلي.. رديت تاني.. وقلت.. قلت ليك مااا دااااايرة!