رواية خطايا واجتثات الفصل الثالث والثلاثون 33 بقلم نور علي البصر

رواية خطايا واجتثات الفصل الثالث والثلاثون 33 بقلم نور علي البصر

‏فرق بين اليروح وبين اليتاني

أنت تمشي وتروح وآني أضل أعاني 

أنت مرتاح بحياتك وآني غيابك اذاني

أنت فرحان و مبتسم وآني حزني للگبر خذاني.. 

ــــــــــــــــــــــــــღ ـــــــــــــــــــــــــــــ

بنبرة أصرار قررت أخلي حد و أجازف قررت أضرب لـؤي بنفس السلاح اللي يستقوي بي على الناس إتصلت بدائرة تابعة للأمن والمخابرات.. 

وطلبت يحولوني لمكتب شخصية إلها وزنها عسى ولعل هالمرة القانون ينصفني من طغيانه هاي فرصتي الأخيرة حتى أقلب الطاولة عليه ​دگيت الرقم و گلبي يدگ ويا كل رنة  أجاني صوت رسمي بي هيبة.. 

: السلام علیکم أريد تحولوني لمكتب الأستاذ ••••  آني مـاجدة لـؤي ال••••  ممكن أقابل الأستاذ شغله مهمة حياة أو موت أريد موعد أقابله.. 

اللي جاوبني يمكن سكرتير مكتبه.. 

: الأستاذ مسافر لوسط الوطن ممكن أسجل طلب المقابلة الى يوم السبت

الساعة العاشرة صباحاً 

(وقتنا السبت ما كان عطله مثلكم) 

: تــمام..

نهيت المكالمة وياه و ظليت متوجسة الخوف أكلني خاف لـؤي.. يشم خبر آني رحت أستنجدت بواحد من كبار الدولة هو نفسه اللي لـؤي.. يستقوي بيهم  يارب سترك كون هالخطوة تعبر على خير وميوصله علم لأن لو عرف يقرأ علي السلام.. 

أجه وعلى وجهه أبتسامة بشوشة نادراً يبتسم ببشاشة ومرح جر شعري بشقى غير معتاد منه..

: عندي ندوة سرية وبلغت السيد حامد إنچ موافقة بس تخلص هالندوة نرجع تعقدون و أعتبريها فترة إستراحة إلچ وتجاوزي موضوع إعدام طليقچ.. 

خزرته وبس هزيت راسي أي الله كريم والله لإنعل أبهاتكم بس خليني أوصل للمعني وأشرحله الوضع سامعة هذا  عيون وآذان لرمز من رموز القصر الرئاسي كل ثقتي جانت لابد أكو بين زمرة الشر خيط أمل وخير ولو ضعيف

صح أجازف بعد ما عندي أي حل مثل ما كان بابا سـهيل.. خيط أمل وخير بنص الفساد والشر هيج فكرت لابد أكو اللي ميقبل بالظلم و يأخذ حقي وحق  بنتي إللي تيتمت دون ذنب.. 

رحت أخذت طـيف.. بحظني أشم بيها كولش هواي تشبه مـاجد.. حظنتها بخوف من لـؤي.. لا يغدر بيه وياخذها مني بلكت التقي بهذا الشخص وتنحل وأخلص من لـؤي.. غفيت وبنتي بحظني.. 

عاد يوم السبت تركت طيف.. يم رنا..و رحت للموعد ردت أقابل هذا الشخص إله إتصال مباشر بأحد الرموز بس قابلني السكرتير و ساعة كاملة بس يحقق وياي شتريدين من الأستاذ؟ و لويش مستعجلة؟ ولازم أكتب تعهد لزگو إلا أوقع تعهد ما أدري المن وشنو بس قفلت ما وقعت ظليت مصرة إنو كلامي ما يطلع إلا للأستاذ نفسه أقابله ويمه أذكر أسبابي وهواي خرط أنتهى بتأجيل المقابلة  

: الإستاذ بالعاصمة بظل هاي الظروف اليمر بيها البلد و إنذار عام لذا يرجع بتاريخ... 

أنطاني موعد ثاني وطلعت أهز بإيدي يعني فوگ  الساعة موقفني أنتظر وتاليها مدخلني وسواها تحقيق؟ 

رجعت للبيت بنتي بحضن رنا.. اللي تباوعلي بخوف وتوجس.. 

: لا تخافين أنقذج وياي بس ساعديني مستغربة عاف البيت دون أي حراسة 

ميخاف أعيد الهروب..؟ 

بس هذا أكيد مراقب كل خطوة أخطيها و دينطيني الأمان  هذا سرطان شلون أتخلص منه؟ أقتله وأخلص  النار اللي بگلبي تبرد لو أنعدمت؟بس بنتي منو إلها لو رحت؟

كتبتلي رنا.. بورقة لا تسوين شي ترى تتندمين قبلچ حاولت وشوفي النتيجة مجرد شبح و عايش وياكم خسرت صوتي ونداست كرامتي وهسة عايشة برعب كل ثانية تمر علي أخاف يجي اليوم اللي ينهي بي حياتي وحياة أولادي لا تتهورين.. 

همست الها بإصرار

: أجازف حتى لا أصير نسخة منج 

أحس نفسي بمعركة و بدوامة صعب أطلع منها.. 

عفتها ورجعت طلعت مريت للمحلات القريبة أجيب غراض إلي ولبنتي الله يساعد هالفقير السوك غالي و الحصار واگع براس الناس التعبانة من رجعت لگيت رنا.. منومة طـيف.. لزمت  إيدها وآني أتلفت و سحبتها للحديقة وهي متوجسه مني وعيونها خايفة.. 

: إذا نظل ساكتين نصير جواري يبيع ويشتري بينا براحته هو البشر المن يقاوم يا رنا.. لا تنهزمين بعيونچ مني ركزي وياي البشر المن يقاوم؟ هااا؟ 

لأجل شنو؟ علمود حياته؟ لو علمود كرامته الضاعت الحياة شنو نفعها لو تنعاش بذلة وإهانة بلا كرامة وشرف شتسوى؟ يا رنا.. 

البشر يقاوم لأجل شي أغلى حتى من ضناه الكرامة والشرف ذني إذا راحن بعد ميرجعن لو نجيب كنوز الدنيا شعبالچ ما أگدر أبيع؟ أگدر أبيع روحي وأتحول لوحدة من ذني البنات اللي يجن بهيچ گعدات أگدر أسوي كلشي يا رنا.. و بمساندة لـؤي.. وأمثاله غصباً عن ماجد يسكت ويتقبلني بس آني ضحيت بكل هذا حتى لا أصير ساقطة بياعة شرف..ضحيت ببيتي بكرامتي  وحتى برجلي الله شاهد علي يا رنا.. ما تمر ليلة إلا وأحس بذيج الخطيئات فوگ متوني مثل الجبل الثگيل وذنب مينغفروالله أكره روحي كون الموت ياخذني ولا أعيش جارية بلا شرف يا رنا.. آني بس خوفي على بنتي خايفة يستغلها ضدي ويذلني بيها عفية خل نصير إيد وحدة ونتساعد لازم نهرب إذا مكدرت أقابل الأستاذ.. 

بس رنا.. نترت إيدها مني بخوف وهي تفرك بيهن جانت ترجف من العصبية والرعب  ضربت رجلها بالگاع وأنهزمت أوف يا رنا.. ليش ما تقتنع هاي تعرف كل أسراره و أدلة تكسر ظهره لو بس تتعاون ونروح سوية ونقدم الأدلة ضده هنا إلا أخذ ثار كل واحد تأذى بسببه وثار كل إنسان أستغلني خلاني واجهة لظلمة ركضت وراها لزمتها من زندها بقوة وگفتها وآني أستفهم.. 

: رنا.. أنتِ أكيد عندچ عليه نقطة ضعف أو فد مستمسك فدوة أروحلج لازم تنطيني ولو دليل واحد أقلب الطاولة عليه أريد أدمره وأنتقم لكل خطيئة وذنب شايلته برگبتي ولچ والله ممرتاحة عذاب الضمير ياكل بگلبي أكل شخسر بعد؟ ماجد وقتله مثل ما قتل أبوية سـهيل.. وضيع عالم وشباب بعمر الورد مبقالي بس بنتي ولازم أصارع حتى تعيش ولج خايفة لا بيوم تواجه نفس المصير.. 

ظليت أبجي وأتوسل لازمة أيدها هي على كيف وخرت أيدي منها وهزت راسها لا وشردت تبجي بغضب صحت 

: تعرفين كل وساخته بس طلعتي أنتِ أنذل منه و ساكتة عن الحق ولج الساكت عن الحق شيطان أخرس.. 

ظليت أحوم مثل الطير المذبوح أدور على خيط دليل مستمسك أي شي تمر الأيام وآني نفس الوضع أروح وأرجع وماكو مقابلة تاليها بطلاع الروح حصلت مقابلة.. 

ودخلت لمكتب فخم حسب ذاك الزمن چان كاعد بهيبته وبالبدلة الزيتونية وبإيده قلم حبر سوفت يلعب بي ببرود وعيونه تترقبني خلف المكتب..

: سيدي آني مواطنة مظلومة وأريد اقدم مظلّمة بخصوص السيد لؤي وافعاله الي تسبب تشويه لجهاز الامن وجهاز المخابرات وللوطن وللثورة المجيدة ومبادئها 

عرفت عن نفسي

: آني ماجدة لؤي•••• وشرحت رتبه لـؤي.. وكل السيناريو من يوم اللي بديت التقي بي ودمر أهل صاحبتي ليومنا

أستنجدت بي أتوسل يوصلني لسيادة نجل السيد الريس حفظه الله لو لسيادة الريس نفسه توسلت يوصل مظلوميتي و موضوعي أبتسم وهو يلعب بقلمه للحظات رجع للملف الأمامه نظرته كولش يركز بوجهي وهمس.. 

: أنتِ مو بنت هـديل مناحي ال•••• 

صفنت منين يعرف أمي.. بس كلت يجوز بالمؤسسات الخيرية الجانت أمي تديرها من جانت تابعه للتنظيم النسوي وخاصة زوجة عضو شعبة منطقتنا كانت صديقة أمي.. 

: تعرف أمـي..؟

أبتسم : مو بصورة جدية ولا مباشرة بس خليها بعدين تعرفين ههه رغم مملتقي بيها بصورة مباشرة بس أعرفها 

كلت يجوز لأن زوجة لبابا سـهيل وبابا سـهيل.. جان جبير الرتبة الا منا يعرفها

رجع يسجل روس أقلام لشكوتي ولهنا كولشي طبيعي الشكوة وتقيدت بس 

طلب دليل على كلامي.. 

: أستاذ شلون أنطيك دليل هو أنسان شيطان سبب هواي مشاكل وقتل و أعتقالات ظالمة والله.. 

عجيب يحاجيني وهو ما أعرف شلون مجمع عني معلومات طلع الملف كدامة معقوله بالفترة اللي أجيتهم أطلب المقابلة وسياستهم تحتم جمع معلومات عن الشخص اللي يريد يقابل يالله يوافقون مقابلته المهم قدمت شكوى ووقعت..

بعدها كتلكم ظل يسأل عن بابا سهيل وأذا أعرف من أعوانه الي كان يلتقي بيهم  ومدام أشتكيت عن رجل مهم بإعتقال أكبر خائن وبعض أعوانه أكيد عندي معلومات عن اللي للأن هاربين من الحكومة وسأل عن جدو هواي وأنطاني أسماء مهمة وشنو علاقة جدي بيهم.. 

: كولشي ما أعرف.. 

سكتت أكو أسم أذكر هذا جدتي تعرف مرته بس لا شاكين بي كون أوصله تنبيه.. 

: أكو أشخاص مجرمين ليومنا هذا مكدرنا نلزم خليتهم اللي كان زوج أمج يلتقي بيهم و ملفج يقرأ محاولة هرب عن طريق مهربين إلهم علاقة بشخص كان ضمن خليه الخائن سـهيل.. 

توترت هذا شنوو شو جنه قلب ضدي من مشتكية ديحولني لمتهمة بالتستر.. 

: العفو أستاذ آني اللي داشتكي دتحسسني بتحقيق.. 

صاح بيه.. 

: وأنتِ تشتكين على رجل مناضل كدر يلزم أهم عناصر شبكه غوغائية مخربة.. خائنة.. بالبلد أكو بنت تسوي فعلتج بدل متفتخري بأبوج تشتكين؟! أنتِ بنت عاقَ ببلاغج دتكولين يريد يزوجج السيد حامد.. قسرا و المثلج تحمد الله..  

وكفت وكتله... 

: أستاذ يعني شنو أفهم من كلامك؟  الظاهر غلطانة أجيت أبلغ عن فساد بين صفوف دائرة تابعه الكم الظاهر كلكم كلمن يستر لربعه.. 

: أنتِ قيد الأعتقال.. 

فتح لاقطه صاح لأحد الحمايات.. 

: أخذها للتوقيف الى أن يتم تسليمها إلى الجهة المعنية بأمرها ولازم تحقيق نعرف شكو وراها وليا جهة تنتمي.. 

بذيج اللحظة الخوف جمد الدم بعروقي أجيت أطلب من الحكومة تنقذني وثاريها ناس تغطي لناس لـؤي مو بس واصل لـؤي مثل السرطان بكل اعضاء الحكومة مستفحل  كل اللي إجا ببالي بنتي.. شراح يصير بيها؟ شنو مصيرها لو لفقولي تهمة وعدموني مثل ما عدموا أبوها؟ 

      شـــــــــــــــــــــــــــــــــيلان​

أخذت إجازة كم يوم و رحنا للشمال رافقت أمي. إلي أنطردت بذلة والله يا مـريم.. بعد فلا أحاچيچ تطردين أمي يا حقيرة أمي اللي گضت طريق السفر كله تبچي مهظومة..

المهم وصلنا وارتاحينا يوم وبلشت حملة تعزيل بالبيت ردت أقضي كم شغلة قبل لا تخلص الإجازة لكيت بالمجر تفاحة القرنفل اللي نسويها

شميتها وأبتسمت حسيت بحضنة دافية لفتني درت بين إيديه بلهفة بس أستغربت بوجهه جانت أكو كدمة

: متعارك..؟ وي منو متعارك..؟

همس معصب..

: رايح أسافر لوسط البلاد.. 

هذا شبي تقربت منه و إيدي على وجهه

: بروان.. شبيك؟ شبي وجهك؟ مو رحت لعمامك وگالولك ماكو أي خبر عن أبوك؟ شصاير وياك ومنو أعتدى عليك؟

رفع راسه وعيونه مدمعة

: بعد ما أبقى هنا تجين وياي نأجر يم  عمامي.. 

: بس ليش نترك قريتنا أنت متعارك؟ وي أهلي.. 

دنك راسه وشفت دمعة نزلت من عينه بروان يبچي؟ من دخل للبيت ناسي الباب وراه مفتوح فدخل بابا يصيح صوته رج البيت رج وكفت بمكاني جامده وهو يرجف من العصبية وصاح بوجه بـروان.. 

: ولك فوگ ما أنت كاعد بخيرنا وهيچ تجازينا؟ شلون تمد إيدك وتضرب آدم؟ و بأي حق تسويها؟ ولك أسمعني زين جزاتها لأبوك لأمك لا تضيع وتصير بخبر كان.. 

التفت بـراون.. لأبويه  بعتب مدنك ويحاجيه 

: عمي لا تعيرني آني ضربته لأن تجاوز حده ويشيع يم جماعته اله يفرقني عن مرتي عمي آدم.. طغى 

: ولله لو ما كاكا آزاد.. فلا أتناسب وياك وأنطيك بنتي أنت مكطم وحرامي.. 

: أشكرك عمي.. 

​بوسط هالصياح دگة على الباب تنبيه وأستئذان أنفتح الباب ودخل عمو آزاد بروان.. أول ما شافه بساع راح عليه دنك وباس إيده.. 

: عمي وأبوية آزاد.. آني أعتذر منكم ع العركة بس والله دمي فار وما تحملت و يشيع عليه و على مرتي وفوگاها يسميني مكطم الأصل لويش مكطم؟ عندي عمام صح هم عرب من وسط الوطن ومو أكراد مثلي وصح هم إخوة أبوية من الأم بس آني دمهم ولحمهم لوما النسوان وكرههن جان تربيت بنص أهلي وعمامي بعد نكبة قريتنا الضاعت.. 

عمي آزاد.. باوع لبـروان.. وحضنه وكله 

: آني أبوك و أنت وصية صديق العمر اللي كان دوم يوصيني بيك إذا تتخلى عنك كل العالم ألا آني 

هنا بـراون.. ظل يبجي.. 

: أفكر أخذ مرتي وأرجع لوسط الوطن هناك أعيش أحسن مما أتعير مكطم.. 

بس بابا صاح.. 

: تأخذ بنتي للعرب؟ لا والله ما أقبل تريد تولي وحدك ولي بس بنتي مستحيل أخليها تروح لمكان ما تعرفه أبد ما أقبل تضيع بوسط الغربة.. 

حسم الأمر عمي آزاد.. 

: شوف كاكا...... 

و آشر على أبوية.. 

: آني كبير العائلة و دا الاحظ هواي كلامك وي بـروان.. مو لائق هذا آني ربيته أخذته من نص المحرقة أنتشلته حتى يعيش بكرامة مو ينهان

آخر كلامي سمعوا كلكم بـروان.. و إن مو من صلبي بس الله يشهد أعتبره أبني و آدم.. عقليته طايشه وبعده شاب مو رزن يعني يا أبو شيلان.. بـروان.. هو أيدي اليمنة بالشغل وألا إذا أعتمد على آدم.. يضيع كلشي.. 

يعني يا بـروان.. شلون تعوفني وآني مسلمك كل أمور الشغل سفر لوسط البلد ماكو أولاً مستحيل تتأقلم ويه عاداتهم وثانياً هم عرب وأنت كوردي.. 

قاطعه بـروان.. 

: بابا كلنا خلقنا من آدم وحواء و كلنا بشر وذولة يبقون دمي 

آزاد : عود لو متت أخذ مرتك وروح هسه لا.. 

بابا : يروح وحده بنتي لا لا لا.. 

ضحك عمي يلطف الجو.. 

: كاكا ترى بعدني ما متت.. لذا ما يروح لعمامه يبقى يبقى مدام النفس بيه. 

وأكتملت بدخول آدم.. بوجهه خياط وأمه وياه معصبه.. 

: آزاد الله يقبل شوه الولد.. 

رد عمي آزاد عليها.. 

: يستاهل.. 

وهي عصبت وهجمت تضرب بـروان.. كدامنا.. 

: ألا اقتلك هاي جزاتنا شوهت أبني..

آزاد : أبنج السكط هو الغلطان يستاهل

بـروان.. مدنك يحس بندم هو يباوع لوجه أخو بالربى أعرف حيل يحبه بس آدم.. خبيث يحب بس نفسه بـروان.. تدنى لآدم.. وحظنه 

: أعتذر و كلمات الإعتذار أبد ما تمحي السويته بس آدم أنت قهرتني وآني عصبت 

دفعه آدم.. وطلع يصيح 

: لا تعتذر ما أقبل أعتذارك تدري أريدها الي و أخذتها مني بشنو أنت آحسن مني.. 

طلع عمي يستغفر وبابا يهز راسه موافق كلام آدم.. اللي طلع آني ما أقبل يهين زوجي ركضت وراه تبعته درته من زنده وفريته براشدي 

: مو كلشي تريده تحصل عليه مفهوم وعيب تحجي بيه بعد آني صرت مرته لأخوك.. 

صرخ و دفعني.. 

: مو أخوي مو أخوي.. 

ركض  معصب غاضب و بـروان.. وراي 

: الله يهديك آدم.. 

لزمت إيد بـروان.. 

: هذا حقير و خبيث دير بالك منه هذا ماكر.. 

  ســـــــــــــ♡ ــــــــــؤود

صارلي أشهر أشتغل بمعمل خياطة طبعاً شغلي بس رزم وتغليف لأن آني بالخياطة صفر! گلت أي شي أشتغل لحد ما نحصل موافقة الهجرة للبلد اللي بي عمي هو كاعد يرتب لم شمل وهنا لازم أمي تتقبله صار زوجها ولو حاليا ورقياً

كاعدة وصوت الماكينات يرن براسي إيديه تتحرك بآلية أشد الكارتون فجأة توقفت إيدي وسرحت لبعيد شباك المعمل صار مراية

رجعتني لذاك اليوم بالبلد العقدت أمي بيه قرانها على عمي  أول ما غادرنا الوطن وبعدها سافرنا لبلد عربي كبلد وسط الى ان يرتب عمي وضعه. 

​أبتسمت وأنا أذكر وجه أمي چانت وجهه أحمر جمر من الخجل وتبررلي وهي تعاتبني بذاك اليوم:

: يا يا يا.. شني يمة بعد ما شاب ودوه كتاب..

: وين؟ بعدج يمة أنتِ تزوجتي عمرج صغير جدًا وترملتي وراها بكم سنة 

ما عشتي يمة وعمي من الأول ميت عليج.. 

: والله أبوج رجال محترم و يصلي يصوم عمج الملطلط شسوي بي..؟ 

لزمت أيدها أبوسها.. 

: تزوجيه خوما تبقين وحدج ترى آني باجر استقة بحياتي عنج بس يجي حسن.. 

غمضت عيوني وآني اتخيل اليوم الي اني وحسن يلتم الشمل امي تباوعلي وجهها ما يتفسر بس وراها اذكر من كوتلها

: يلة تزوجوا وخلفيلي اخو سند الي بهذا زمنا الغبر.. 

تذكرت تفلة الهوى مالتها وهي تغمني وتصيح 

: أمداچ وتف عليچ ويني وين اخلف واتزوج وانت خوش بعتيني و أنة اللي كسرت شبابي عليچ؟ ما جبتلچ رجل أم مثل مـريم صاحبتح ومـاجدة وين تلگين مثلي؟ بس إنتِ أم حظ المجير شلون تحچين علية؟ جيرة والله جيرة

زعلت وراحت لغرفتها سكتت تدريجياً الابتسامة على شفايفي بدت تذبل.. تحولت لغصة ببلعومي تغيرت لشنوفه بعدين برطمت رجفن شفايفي بجيت ما كذبت صدك حظ مجير بس يمة ليش تجرحيني آني بنيتج.. 

طلعت من الذكرى ليوم امي ملجت وي عمي انطونا استراحه جريت نفس وآني اتمغط.. 

وهاي حياتي بهذا البلد من طالبه ببلدي تركت دراستها وتهجرت الى عامله بمعمل مرت الأيام والأسابيع وعمي ما قصر رايح جاي علينا تذكرت بيوم أجانه والبُشرى بوجهه كال حصلتلكم لجوء كهاربين من نظام الحكومة.. 

أمـي كلتله.. 

: ومنحتاج نعقد خوية أحلا خبر.. 

: ذاكرتج وين ليش احنا مو عاقدين؟! 

أذكر خزرته لأمي بوكتها اللي دنكت وهي تتهرب منه أباوع لعمي وأمي بعدهم مو كبار أمي زوجوها طفلة وتحملت مسؤوليه تزوجت بعمر 14 سنة وحالياً عمرها بالثلاثينات دفنت عمرها لأجلي وكبرت بهمها وترملها و أجه الوقت تعيش وأشوف عمي خوش عم باوعتله مد حلكه ببوز و بين ضوجته من أمي.. النكرت عقدها وياه. 

بس تجاهل وكمل كلامه

: لم شمل و تبقى على المواطنة وبس تتجاوزين إمتحان اللغة والمواطنة تستلمين الجنسية هذا أحسن بهواية من اللجوء وأنتظار السنين والدوخة وبعدين آنتِ زواجج بمجنس حاصل على الجنسية افضل. 

​گامت أمي وگفت وإيدها راحت لطرف شيلتها بدت تعگد بيها وتفتح تعگد وتفتح بحركة سريعة متوترة ما تعرف شتسوي.. 

: شنهو عود الخيل يوميه يسوگها خيال. 

: يا خيل دخيل بختج لا تخليني افلش المكان على راسج إحنا عقدنا لو غلطان شو تحجين عبالك دخطب واقنع بابا أنتِ هسة مرتي. 

بس من شافها طفرت بعيد لان رفع إيده تهديد ونزلها جر نفس للحظات ملامحة الجدية تحولت لضحك..

: لا تخافين مو طبعي اضرب مرة لو بيه خير اخذتج من زمان من حلك السبع بس صدوك ترى كلمة  يسوگها؟ يا فوزية الكلمة هاي تنگال للمطي المطي ينساگ الخيل أصيل وحر مينساگ بعدين تعاي أكولج ليش هو كل فارس خيال؟ مو كل خيال خيال فوزيتي.. 

سكت وطلع سبحته يفر بيها بيده ويسبح مدري يلتهي و همس

: المثلي ألف وحدة تتمناه و غيرج هواي نسوان رادني ما تذليني ترى سبق وذليتيني بالرفض وأشتكيتي علي وأنكتلت من وراج بالنسبة للزوجة الثانية الي ارتبطت بيها ورافعه قضية صفيت اموري وياها بمبلغ مالي وفضت لذا بعد تسافرن وياي ولج ترى آني ما اتعوض هواي يتكاتلن علي.

غمزني بشقى بس امي.. تصدك. 

عاركته ..

: ومنو ذول منهووو ها ما تفهمني خاف موش ذكية الكفنها... ترى الكفنها ابو نساوين الاجنبية. 

ضحك وسكت حسيت اول مرة اشوف أمي تغار.. رجع يجاكرها

: هن هواي 

ردت امي بعصبية 

: هسة أعرف لا عبالك ميته عليك بس مال تعقدني الك ودور نسوان عبني افهم أنة مرة لازم كرامة متقبل هذا الوضع. 

: هاي سـؤدد تعلمج هههه ولج سؤدد غير عقدتها مرتي لخاطرج لأجل بنت أخوي يا فوزيتي قبلت بيج

انقهرت أمي.. حيل من عيونها عرفتها ضاجت وهو تعمد يضيك نظرته وهمس ببطء. 

: لخاطر سـؤدد.. أسوي كولشي يا غاليتي. 

هي ناقشته

: وأنت من يمتى عرفتها لبت أخوك شو ربيتها وحيدي يتيمة تكسر ظهري وتحشفن أيديني من العجن و الخبز والكراب ببيوت الوادم هسة جايني تحجي تكول بت أخوي.. 

صيح على أمي معصب يرعد رعيد

: فوزززيـــة.. أذكرج لو نسيتي ولج مو أشتكيتي علي يم الرفاق وكلبچوني دكوني كتله وتعهد ما أوصل بيتج لو نسيتي ردت من وراج أروح ورى الشمس.. 

: زين خوش خوش سـؤدد.. تأخرنا منمنا ورانة شغل عبن نريد نعيش يله خوية لفندقك وقت تأخر و ورانه دوامات..وكف مضايق

: آني رجلج.. وما اروح سابقاً بذاك البلد  سربتيني للفنادق بس جنت ذكي جبت وياي الشيخ حتى احلل نومتي اضايق من فنادق. 

هنا هم تذكرت ذاك اليوم يومها من اخذنا من مخيم الحدود لعاصمة ذاك البلد ليل وتعبانين. وأمي طردته

: شوفلك فندق شنو تنام يمنا 

: مو كتلج نعقد ما قبلتي ​هذا واحد من الأسباب اللي تخليني أريد نعقد حتى من أجيبكم لم الشمل أروح وأجي عليكم براحتي وما أحتار وين أنام العقد يخلي جيتي الكم رسمية وحقانية.. 

: وتنام يمنا؟ لا زحمة روح فندقك.. 

ضحك : ترى ما طلبت أبقى أعرف حدودي أقصد لو عقدنا توكلي على الله وافقي هو لمصلحتج  وعود من آجي يمكم ما الفج بحضيني أنام هناك عالقنفة.. 

أباوع لأمي خجلت.. 

: شحدك شو أنت بعدك ملطلط.. 

تذكر  من تلطلط بحجياتك وانه موش اقبلن اروح للفرقة ويدكوك كتله لمن اخر مرة كطعوا. رجلك مني. 

ضحك...

: ​هسة شگلنا ترى أنتِ ما شفتي من رضوان شو عافچ وأنتِ بعدچ صغيرة أصلاً هو أخذچ مني أنتِ أخت ربيعي وطلبتچ لنفسي وبدال ما ينطوچ إلي أنطوچ لأخوي وهاي السنين المرت هاي حوبتي وحوبة حرماني منچ.. 

هنا تحمحمت.. 

: آني كاعدة شو أنت دتتغزل بأمي كدامي لا عبالك ما وراها بنات حوك وتأخذ راحتك.. 

جر كفشتي 

: أنتِ حوك على عمج يبعد عمج.. 

رجعت أمي.. كعدت.. 

: زين هو بس نعقد مو زواج  يعني بس كلاوات..؟ 

ظل يستغفر الله.. 

: صار بس كلاوات لا تخافين ما ميت عليج.. 

تدخلت بينهم.. 

: شنو ما ميت غير صارلك ساعة تقنع وتتلوك الها حتى تقبل هي أمي جمارة منين تحصل مثل جمالها والنبي ليلى عتوي وحاطها.. 

ضحك : عتوي شنو ولج؟ 

: يعني أحلا من الممثلة أمي جمالها قططي بزازين دشوف جرة العين ولونهن الله عليك بزونة مال أجانب.. 

لاحظت عمي شلون يركز يباوعلها من جوة لجوة وأنكلب أحمر همس

: باجر الصبح نعقد و نخلي موضوعنا يم رب العباد تصفى يا فوزية تصفى.. 

: أروح هسة باجر الصبح جاي وجايب شهودي و الشيخ.. 

: هاا خوش.. 

ردت أمي وهي حمرة من خجلها.. 

: يله روح شو وكفت نريد ننام

دنك مبتسم وأيده على يده الباب..

التفت ألها وجر نفس حسيت عمي مجمر شوك وعشك الله لينطي الما أنطاك أمي جان هي هسة مو أرملة ومتعوبة صفنت وآني ؟ لا جان هسة آني مو آني ولا بت أمي بت غير أمي والله يدري شلون شكلي..: همزين منطوك أمي قبل حتى أضمن أنولد أول و بعدين أنتم عرسوا.. 

أخر كلامي حجيته بصوت أثنينهم باوعولي وآني غلست جني محاجية.. 

ردت أمي تذمر

: نعسنا نريد ننام..  

: أروح فدوة للتحجي خبيط.. 

: شنهو يعني تقصدني.. 

: لهجتج صايرة حلوة تحجين دمج لهجتين ريف وحضر.. 

: والله عبالي دتلطلط ردت أحضرلك خوش حجي رزايل.. 

حاجيت عمي

: أمي من تعصب تحجي موشحات آني مجربة معلقاتها وموشحاتها غلبت معلقات أمرؤ القيس خوب لو غردت بالموشح الأندلسي على أنغام موسيقى  نعالها أبو الإصبع مكرم وجهك عمو.. 

هو جنه مستوعبني شرطن دنبهه أمي عصبية ليغرك هالوجه الأحمر و الملائكي..

: لا تنسين باجر أجيب الشيخ والشهود ونعقد.. 

أمي عصبت.. 

: هواي لحيت ترى داسايرك تروح لفندقك هو منو موافق ورى مشاب ودوه كتاب.. 

رديت : شباب أنتِ يمة.. 

كرصتني : آااااي... شنهاي النوب شلون أم بس تكرص  ذاك عمي تزوجيه وكرصيه جايتني شكو. 

صارت حمرة وفشلانه وعمي يضحك ويلطلط 

: اي اموت بالتكرص منج طبعا 

رجعت كرصتني: ارتاحيتي خليتيها بلسانه 

صرخت ااااي 

ردت 

: ويعه أمي.. (وجعه امي )  

رد عمي.. 

: لا إله الا الله ذليتيني مو كلتي خوش

: كلت خوش ما كلت قبلانه بيك.. 

أباوع إلهم سينما ببلاش طلع عمي وأخر الكاله

: الصبح لتنسين و نشوف شلون ترفضيني أنتِ مو ببلدج وتفزعيلي الحكومة تعتقلني يدكوني كيبلات وصوندات.. 

سد الباب وراح أمي غمت الباب

: شهاللزكه.. ... 

: ترى يحبج مشفتي عيونه والله أبوي محبج مثله أخذي اللي يحبج و يدللج لا تدوري التحبي يذلج.. 

شو هذا ساعة واندك بابنا 

أمي.. باوعت من زرف.. 

: صخام جايب شيخ و شهود ولا افتحنه اني الك 

وجرتني يمها

: يلة نوم هسة يمل ويروح

وفعلا نفذ وعده بهليل شيخ جاب وامي ما فتحت باب الصبح احتاجيت اطلع كلت اروح قريب مو بعيد امي تعبانه نايمه

واني امشي بشوارع حلوة ونظيفه وناسهم تستغربني نسيت اخلي فوطه على راسي عايفتها بكتفي من نظراتهم بساع لبستها لا تصير مشكلة الي وي هيئة اداب الحجاب مدري هم شنو يسموه. كعدت بمصطبه واني صافنه و ريحه هيل وورد والجبال من بعيد  بمنظر ضبابي يخبل.. 

تذكرت بيومها من تعبت رجعت للبيت لكيت أمي كاعدة حمرة وهي منگبه بالشيلة.. 

: خيرج يمة.. 

: عمج منو بعد غيره سواها وحرجني جاب الشهود و الشيخ والله موش قابلة أنة.. بس زحمة من الشيخ.. كلت ما افشلن الشيخ زحمة من عمامه رسول الله يمة. 

رفعت حاجبي وانطيتها نظرة أستحت ودنكت 

: عمامه الرسول هااااا اييييه زحمة يناس زحمة... ييييي خوووش صدكناج عود ام الكلاواتبخجل دنكت وهمست: يا سويده هيج تحاجيني لا موش مقبوله منج  جا يمة خاف عيب من الشيخ ارفضن فكلت خلي اقبل. 

: أي يمة أي صدك عيب حقج.. 

حجيتها وضحكت.. 

: جنج ما مصدكة ويني وين العرس بتي بطولي بس عيب شيخ لحيته بيضة تلالي وجهه ملاك زحمة يطلع أخو الطردة فمرديته والله لأجل الشيخ زحمه منه..

: هااااا صدكناج.. 

: يا يا يمة شايفتني أريدلي رجل لو من ذن المهرفلات عالزلم شو ما مصدكتني.. 

عركانه وخجلانة وتبررلي تزوجت  أبتسمت لفطرة الريف الخجول باقي بأمي والعيب والزحمة الي مترسخ بعقلها هي كل عقلها تبرر تزوجت وهذا حقها..

: يمة لتبرري حقج والله..

: لا ما أبرر بس خليج مكاني تعوفين الشيخ والشهود أخو الطردة و زحمة دايسين بساطي واكلهم موش قبلانه فطلعت كلمتي قبلانه كالي الشيخ عبنه فاهم مبين مثقف موش غبر كال كولي قبلت بك مو قبلانه فكلت بكلبي  لا والله هاي الشيبة البيضة والوجه الملاك فلا أرده زحمة يااا شلون أردنه ما يجوز يمة شيخ وزحمة.. 

دردمت : والله يمة شكلج..

: ها خوما بالج نزعت الحيا و أدورلي رجل ترى والله حرجني عمج الملطلط من جاب الشيخ والشهود تگيدت وتبربدت وكلت قابلة.. 

: هسة بشرينا شصفيتو.. 

تنكبت بشيلتها تنود ومتونها تهتز  وردت تبوشت كل وجهها غطته بالشيلة يا صخام أمي تبجي.. 

: تبجين وجبروج وحرجوج بالشيخ والشهود حرجج عمي والله لألعن أبو الزواج والرجال اليبجيج هسة يفسخ

وخرت الشيلة أريد أمسح دموعها رجعت مصدومة يا يا شوف الوعد أمي ميته ضحك تهتز من الضحك الكاتمته بس متون تهتز وجه أحمر عيون مدمعة عبالي ميته بجي.. 

: صدك جذب يمة وكعتي گلبي كلت أفركش العقد وطز بالرجال شو كضينا عمرنا بلا زلمة وسند من تالي.. 

: لا يمة بس أضحك عبن عمج كام يريد يزت العالم للباب من كد ما متلوه ومرتبك طلع هو وسد الباب والشيخ و الشهود ظلوا جوة..

: ههههههههه عود صدك.. 

: وداعتج وروح خواني الماتو غدر.. 

: هذا عمي طلع خجول تلوهتيه.. (دوهنتيه) تالي شلون.. 

: فتحت الباب لكيته واكف و يضحك على روحه وكالالي ولج فوزية خردلتيني بحبج چا يمة هيج الحب يدوهن ولا مجربته أنة المرحوم خطبني و أهلي نطونياه نعجبو بأخلاقه وأخوي صهيود وسوادي كالولي آحسن من أخوه هذا يصلي ويصوم ويذكر الله والمرة شتريد من الزلمة زينيته بصلاته و ذكر ربه وأخلاقه يمة.. 

: وعمي هسة خاتم القرآن ويصلي.. 

: شدراني يمة ناخذه ونشوف فعله بعد أمج تورطت بي يبعد أمج.. 

: يله سنعيه عود أذا لكيتيه مو خوش

: يبتي المسنع من كاعه مو تجي مرة وتسنعه وأحنا متفقين زواج كلاوات..

حضنتها.. 

: والله و أجة الياخذج مني شنهاي بديت أغار والله.

وفجأة ​صوت شخط بالگاع وضربة على الميز خلت روحي تفز من مكانها وجسمي كله أختض أنشگت ستارة الذكريات فزيت من صفنتي على صوت المشرفة وهي تحجي.. 

: سـؤدد ! وين رحتي؟ شو صافنة والكراتين مكومة گبالچ؟ أشتغلي لا تظلين تتصفنين بوجهي

​رجفت إيدي وأنا أحاول أستوعب مكاني ريحة القماش الخانقة وصوت المكائن رجع يثقب راسي ثقب 

        مــــــــــــــــــــــــاجدة

أخذوني للمعتقل قيد التحقيق  أباوع الكاع صبابه هنا كم دمعة سقطت وكم صرخة صوت صياح من زنزانات أخرى 

بقيت يومين محد بحالي أفكر ببنتي شنو حالها من دوني يارب أفرجها وخلصني من هاي الزمرة بخير وسلامثالث يوم صوت أقدام أقتربت من أنفراديتي  دخلو عساكر على رأسهم لـؤي.. 

: يــله.. 

آشرلي بايده ووجهة ما يتفسر أتبعه.. 

: راح تنتقم تموتني مو ؟

ما حسيت إلا وهو يفتر حول نفسه و رافع إيده وسطرني راشدي أخذ نص وجهي الدنيا أفترت بيه وفقدت توازني وگعت بقوة راسي طگ بالحايط طگة خلت أذاني تصفر أحس الدنيا أسودت بعيني شهكت.. 

: بعدج ما شفتي شي.. آني تخليني بموقف محرج! أتعرض مسائله مناضل مثلك لويش بنته تقدم بلاغ عليك أذا ما بهذلتج ولج بنت هـديل.. لو أمج بيها حظ ما عافتج فريسة سهلة الي إذا ما طلعت حليب أمج من خشمج فلا أتسمى لـؤي..

​جرني بكل قسوة و عيني تعصبت بعصابه أجتني لفحة هوه خلتني أعرف طلعوني من مكان المعتقل وين ماخذيني ما أعرف توقفت السيارة صوته الغاضب.. 

: نزلوها...

: أنفتحت أبواب و أنغلقت أبواب و أندفعت بكل قسوة كفختني ريحة الروث من الريحة عرفت رجعني للعقوبة من جنت حامل صاح.. 

: جيبولي السوط آني هاي الحيوانه تشوه سمعتي كدام رؤسائي آني اللي سويت المستحيل حتى أصعد مناصب وأترقى وأنتِ تردين تدمرين كولشي شوفي ولج أنتِ دكيتي بيه ناقصة هنا راح أراويج نجوم الظهر لوما معارفي تلاحكت جفصتج لوما أكللهم مخبلة 

أتلفت وآني معصبه عيوني ومقيده أيدي صوت السوط يضرب بي حايط وشي آخر معدني بعدها صرخة من نزل السوط ع ظهري ضربه وره ضربه لمن شهكت والدنيا أظلمت بعيني صار عندي فقدان  أنتبهت ع سطل ماي بارد شهكت وتوسلت عفت القوة أريد بنتي.. 

: بـابـا...

صحتله أنادي  عسى ولعل بطيف الأبوة  أستجلب الأب اللي بداخله

: بابا بنتي متكدر دوني وحدها بقت شكد بقيت هنا ؟!بس ماكو أي صوت للـؤي.. عرفته مموجود بس صوت خشن من أزلامه 

: أمرنا كلما تنامي نصحيج.. 

معصبين عيوني بس رفعت راسي إلى إتجاه الصوت.. 

: من يمتى هنا... 

: من أمس يوم كامل.. 

: أفتح عيوني نتفاهم... 

: آني عبد مأمور أي تفاهم ماكو لا تبليني ما عنده مانع أبد يعدمني بمكاني.. 

همست.. 

: الأستاذ حسب ما تلقبوه أرذل البشر وأحقر بشر شفته بحياتي.. 

: نصيحة طيعيه ما تعرفيه مستعد حتى أنتٍ بنته يمحيج الأفضل طاعة الأب.. 

: أفتح عيوني و إيدي تعبت.. 

بس صوت لـؤي.. هو يتمشى يعلن دخوله للمكان..

: ليش ما تنفذ طلبها مو دتتوسلك.. 

: سيدي كل طاعتي وولائي الك وماكو أوامر منك أنفذ توسلات كريمة حظرتكم.. 

أنشالت العصابة والشالها لـؤي..

: شفتي طاعة عمياء.. 

: بابا.. بنتي ماعرف أخبارها.. 

ما جاوب بس التفت للحرس 

: علكوها من إيدها بس أريد إصابع رجليها تلمس الكاع  وشعلوا مجمرة (چانون) تحت رجليها.. 

صرخت بخوف.. 

: لا عفية...

أبتسم وتقرب وجرني من شعري الطويل وقتها شعري للخصر طويل جداً 

: راح تنفذي أوامري.. 

هزيت رأسي بـ : أيي.. 

: نزلوها...

أبتسم راضي عن نفسه وأستغربت كلامه.. 

: شعبالج تفلتين من أيدهم 

عصب عيوني ورجعوني وهاي المرة هو لازمني صوته يأذيني.. 

: مبدأياّ عفوت عنج بس لازم تتهيأي نفسياً للي أريدج تسوي 

يجر بيه من زندي و إيدي ليورى مربوطات طلعني و دفعني بسيارة وتحركت بينا ورى مسافة طويلة توقفت السيارة جر العصابة وفتح الشناطة من إيدي بسكين ياي  .. 

ظليت أفرك الرسخ اللي ترك حدود حمره بنفسجيه من أحتصار الدم 

كان هو اليسوق محد ويانا بالسيارة تلفتت طريق مبلط بس ماكو أي مدينة أراضي صحراء رمل ضحك 

: مـاجدة.. يا حلوة بنت أجمل حب و عشق عشقته بحياتي آني عشقت أمج الخاينة وهسة أنتِ ثمن جرائم أمج بحق قلبي من عافتني.. 

مدري هذا عقله وين عقل مجرم شلون أنخدعت بوجه البراءة اللي يملكه 

: تنتقم من أمي ببنتك.. 

رجع يسوق وهو يركز بكلامه 

: لو أبوي هم أتخذه أداة حتى أدمره.. 

:  بس هذا غلط إذا جنت مظلوم منها الله موجود.. 

ضرب الأستيرن وهو  يصرخ 

: حمدي ربج ما أستخدمتج مثل رحمة 

: رحـمة الحملتني خطيئتها بس أريد أفتهم شغله يعني كل هذا الدمار لأجل مشاكل وي أمي؟ الي خلعتك وتزوجت بابا سـهيل.. 

هز رأسه و هو يطقطق لسانه تؤ تؤ 

: إنتقام و ترقيات هم وهدفي أصعد أصير أعلى من سـهيل.. وراها حبيت المناصب وراها أفكر أصعد وأترقى مو بس الأنتقام لا طموح وماديات.. 

شوي وكال.. 

: شو أخذ و أنطي وياج  تنجبين وتسكتين أكو أمور أكبر من راسج تستاهل نضالي للوطن.. 

: قصدك لمطامعك.. 

: كافي هذر كلام لعبالج عفيت عنج ترى ضاملج مفاجأة دخلي نوصل.. 

مفاجأة؟ جانت هذه الكلمة تنهش بصدري طول الطريق أول ما دخلنا البيت ركضت مثل المخبلة.. أدور بغرفتي و بالصالة مرعوبة لگيت رنا.. منومتها شلتها وشميتها بلهفة الخايف

حضنتها أريد أدخلها بين ضلوعي حتى لا يسلبوها مني يريدون ياخذوج مني بس على جثتي همست بإذنها ونومتها وطلعت وآني أحس روحي بعدها يمها

ما حسيت الا دخل و جر البت مني وينزعها كل ملابسها بقسوة 

ركضت بساع احاول اخذها منه 

يجرها مني حيل.. 

وهي تصارخ مه.. مه. وتلاكف ايديها تجاهي به ببه.. 

عود تعتبره ابوها وتشكي قسوته

شمرها على . طاولة.. 

وجاب بصف الطاولة منقل بيه نار هيتر... كهربائي 

و بصفها جوله عليها معجان مي حار.. 

وباوعلي 

: اختاري  تنفذين؟!  وطيعين؟!  لو..  لو هم اختاري  شوي تردين طيف لو سلق.. 

تخبلت اريد بس اكوم اجر بنتي ماكو.. 

مدري شبيه احس جسمي خدر  و رجلي ما تتحرك احاول بس اريد اوصل للبنت مكدرت.. 

: بس...  بس... لحظة اترجاك هاي طفلة حرام تدخلها بينا. 

: اختاري شوي لو سلق..  لو تطيعين.. 

غمضت عيني واني احتسب  

: ما اكدر اقبل بلي تطلبه مني صعب والله بس لا تستعجل تأذي طفلتي خلينا نتفا هـ... 

ما  مرت ثواتي حتى أنشگ الهدوء بصرخة هزت أركان البيت..... 

وسعت عيني واني ازحف اريد..... 

وحدي وبوجهي جيوش.. والظلم عالي 

بس الشرف يا ناس.. غالي ويظل غالي

لا والد عندي سند . ولا  أخو ظل إلي  

بس ريحة الغيرة.. بضميري وتربـات ذاك الاصيل الرباني 

انا المابعت ذاتي ولاطخيت راسي 

رغم الجروح وكل المآسي 

     ☆☆☆☆☆☆☆☆

صرخت: بنتــــــــــــــــــــي

صوت الحوض الي أنشمر جهة الباب مو جهة بنتي.  

جان صوت مرعب و يشبه طرطقة أنفجار...

و  البنت  خافت من صياحه..  وفعلته

ظلت تصرخ تبجي. وهي تباوعلي تستنجد..  

أني ذاتيا وكعت على ركبتي.. أباوع بنتي من البجي تشاهك مثل الطير المذبوح وهي تشامر أيديها ورجليها.

  أخ يمة كلبي بنيتي ربي...  لا تعاقبني  بيها... 

أشوف عيونها علي تبجي وأحس تستنجد تريد حضني للأمان من حرارة لهب المنقل البقت بصفه.  . 

كوة أشهك واجر النفس كوة  ..  ملتمه على نفسي.

أريد أوكف أفزعلها كوة وكفت نص وكفه بس ردن ركبي طخن بالكاع.. ااخ يمة هوة الوجع المالي حنجرتي.

دخيلك ربي لا تعاقبني بضناي هاي شمعتي الأمل الأترجا والضوة الينور ظلمة حياتي.   ....

ظليت كوة أتنفس أحس النفس سجاجين تذبح بلعومي... 

  ..  الترقب.... 

تعرفون شنو الترقب؟! الترقب هو تعيشون الوقت بجزيئات الثواني  هيج يصير عليكم يحبس النفس من الحدث الكدامكم ممكن يصير كارثي.. هو موت بطيء من تحسون الثانية صارت سنة..  

والوقت سياف بلحظة ينفذ أعدام روحك.   

مكدر أكوم... أريد أكوم تصنمت بقت حشرجات بصدري صارت مسموعه عبالك ونين الفاقدة... 

هذا حالي يومها...  

خوف ترقب نفس كوة ينجر حشرجات بلعومي  صارت تنسمع أشهك واتوسل. بيه.. 

لؤي  أنسان متوحش سادي..  لدرجة..  شيطان بوجه جميل بس هو أصلا ً شيطان... 

ما همه أنو طفلة عرضها لخطر... الموت..  

ظليت لحظات ممستوعبه بنتي أحترقت؟  لا هذا صوتها.  عايشة.... 

مابعد الترقب... تستوعب الحدث صار بس  مرّ على  سلامات.. 

هنا تنهار  عقلك مخدر لسانك ينطق بحمد الله..  رغم العقل صار بيه خدار... بس يلهج بحمده لله... 

يارب الحمد لله ما سلخها..  يارب يارب.. 

أتمتم وأني أحضن روحي برجيف.. 

أريد أكدر أوصل للميز مكدر شلل وقتي مكدر أتحرك..

بعد الصدمه هنا تحول الوضع من وضع  نفسي تترجم  الى جسدي..

وأني أحس بأنفعالات... عديدة...هي.. 

رجفة لا أراديه عبالك موجة برد تلفعني.. وي كل قشعريرة..  حتى أسناني تطك سن بسن...  . أريد أسيطر على نفسي ماكو... 

ظلت بس عيوني التبجي تتحاضن وي نظرة بنتي الي تشامر بيديها ورجليها تبجي... تطلبني 

أما هو كعد يباوع للفوضى الصارت. 

بنت طفلةـ كالقربان ـ على طاولة   قريبة من أختيارين للـ موت.. 

واحد منهم أنتهى ينشمر بعيد...  و نتيجته المي الساخن غرك  طلعة باب الغرفة.. 

هنا يرجع عقلك لنفس حالة من الترقب المخيف لأن بقى خيار الثاني.. يعني بنتي بعدها بخطر

ظليت ألطم.. 

: فدوى أروحلك بابا أنت أب المفروض تعرف الضنا عزيز بابا بنتي...  هاي حفيدتك.. 

بس الله شاء يلفت أنتباهه عن ممارسة ساديته علي نفسيًا وعلى... بنتي جسديًا.   صرخة من الطابق الارضي لواحد من أولاده.. 

أعتقد  من شمر الحوض غرك باب الغرفة والممر الي يم الدرج... فديتساقط المي الحار من سياج الدرج القريب من الغرفة... 

صوت بجي بالطابق السفلي خلاه يركض... 

يطلع وأني ركضت أخذت بنتي أحضنها.. 

البنت عركانه من الحر بسبب  حرارة المنقل....  قريب منها.. 

طفيته بساع.. وشلت البنت الي حضنتني وهي تناغي تبرطم تشتكي... 

وترجع تبجي أعتقد أنرهبت من شمر الحوض... 

أخذتها غسلت وجهها بمي من الحنفية.. 

و بدلتلها وأني أحضنها حيل 

هذا الحجي أني كوة أتحرك.   يعني أرجف واوقات أحس ألم بجسمي شد عصبي

بس قاومت... حتى لتوكع بنتي من أيدي.. 

أخذت البنت وأني صرت أخاف عليها وما أعرف شنو مصيرها.. 

شلون أهرب بيج ووين ما أروح هذا يلزمني.. 

هنا جان القرار كلش صعب.. 

وهو أنطي بنتي لأهلها.. لعمتها... أمانه أمنها الى أن الله يفرجها.. 

نامت البنت غطيتها.. 

نزلت أستطلع جان يضمد أيد  أبنه الظاهر وكع عليه من الدرج مي حار... 

بس ما. حرق هواي هيج طفار مي ففرگيس.. صار.. 

كعدت مترددة شلون أفاتحه. 

حس بيه ضحك

: فهمتي الظاهر البنت ترجع لأهلها حامد يريدج الج وحدج دون بنت وأني خوما أربي للغوغائي بنته... 

حجى قبلي عرفت السواه  تهديد..  حتى يوصلني نقطه أضحي ببنتي.. 

بس غيرت الموضوع...  أريد أول أفهمه مستحيل يخلق مني  بنت ليل... حتى يترقى.. 

: خلينا صريحين أنت شنو تريد مني..؟ أني شغل الشغلتوه لرحمه صعب علي..  ما أكدر أنتحر ولا أسوي.. 

هنا داخلي حاجز..  ما أتقبل... 

صعب والله... 

أنت ما تحتاجني حتى مصالحك تمشي شو ماشاء الله..  كدرت توصل مناصبك.. من غير ما أني أكون سبب 

أكو هواي طرق وعدكم هواي التشتغل لصالحكم.أني ما أصلح للي ترغبله.

وكف وهو يباوع لأبنه المستغرب يضمده.. 

صاح: رنا وقز القرط.  تعاي هنا أشوف

أجت تركض وهي ترجف..  وضعها يوم على يوم يسوء. 

هاي كد ما عاشت ويلاته صارت مجرد ظل خايف..  الله يساعدها.. 

بس لو تعاونت وياي لهربنا..   من زمان. 

: أنتبهي لأطفالج. زين؟

لا مرة التجي يصير بيهم شي..  سكت ورجع همس يهدد.. 

:- تعرفين شسوي. ميحتاج أنبهج كل مرة.. 

وكف وباوعلي.. 

: أكو حفل.. تكريم باللجنه الأولمبيه..  بيج كاريزما تخبل..  ترافقيني..  

: أخذ رنا... 

باوع لرنا وضحك.. 

: هاي المسكينه شمعرفها ببرتوكول الحفلات.. الي تسويها  الحكومه.. 

أضافه شلون تتعامل وي الحضور أشارات؟! 

حجاها بأستهزاء..  وضحك.. 

: أنت ِ مارة عليج  وجنتي ترافقين أمج 

: هسة كل هذا تريده وتعوفني بسلام.. بس بنتي ما أمن أعوفها هنا.. 

أختصر علي الموضوع من كال

: سلميها لعمتها... أصلا ً تبقى يمي ما  أضمن تعيش.. 

يحجي بكل صراحه

: هاي هي..  مثل ما تريد أَفضل  أنطيها تعيش يمهم ولا بنتي تموت بعد الصار اليوم لحد هسة..  أني أرجف.. 

أشر بيده أروح لأن أندك الباب.   أجت مرته تأشرله.. واحد من حماياته دخل

: سيدي...  وفد من العاصمة بزيارة لحضرتكم...  ينتظرونك 

بقاعة الأجتماعات..   

باوع لساعته

: حضروا السيارة نروح..  الوضع يوم على يوم بالوطن يسوء. 

ذول شخصيات مهمة.. 

التفت باوعلي:  راح أدعوهم للعشا هم وعوائلهم ..  جهزن أمورجن...  ضيافه خمس نجوم.. 

رديت بتوتر: شنو تقصد شنو نوع الضيافة؟ 

أبتسم... ورجع ضحك.. 

ذكرني بأبتسامته ببابا سهيل معرف ليش هم هلابتسامة ميزة عدهم من يخططوا لشيء

: أرجع بالليل الكى كولشي كامل... 

بس أني معول يطلع أروح لبيت ماجد... 

بس طلع رحت لملمت ملابس بنتي.   وكل أغراضها.. 

بس طمعت أبقى يمها أحضنها أشمها أفيش يعطر أبوج... أفيش يا حبي اله.. الله يرحمك متت مراضي علي متت كارهني متت خاذلني مو كلت أني ألج أمان ووطن متت وأنت مضيعني.. 

شميت بنتي حيل وأني مترددة أنطيها.. 

أبقى أقاوم وأخذهم بالحيلة لمن  أهرب 

لو أنطيها لعمتها أمانه 

لمن أهرب أخذها منها. 

حيرة يربي.  حيرة... 

أنطي  بنتي أحسن.

حظنتها واني أناغي الها وهي أمه... أبه.  داد ادا...

دتتعلم تنطق حياتي يبعد روحي ضناي. أويلي شلون راد يحرقج..

اأمنج يم عمتج يبنتي بس 

ولج راح أعوفج..  يارب لتخلي عمتها تكرهها بيه.. 

يارب باجر هم تكبر وتنكرني.   وتعتبر تضحيتي بيها تخلي.. 

: طيف ماما...  ماكو أم تتخلى مرات الأم تضطر..  تتخلى

لو ما أخاف على حياتج  ما أتخلى  عنج تعيشين تكبرين.. أحسن ممّا تبقين يمي... 

نهايتج يمي موت... 

بس أني راح أجي أشوفج أكيد بس تجي أي فرصة أزورج... 

بلعت غصة من هسة أحس بألم..  شلون أنطي بنتي بس شسوي.. 

هذا مقيدني.. 

ظليت أباوع لبنتي.. 

مرت بذاكرتي وأني طفلة دوم أمي تمدح ببابا سهيل. 

أنت َ حميتني أنت َ الي جنت سند من لؤي.   

بنتي لو ما أنت َ يمكن هسة جوة التراب

ما جنت أفهم كل عمري بين ثمانية وعشر سنوات وقتها جان عصر أذكر بالحديقة نلعب أني وأنتصار وحارث جان يضوج ماكو ولد وياه.   

وما يحب يلعب بيت بيوت. 

ما بقى ألا هذا ...  أقبل بيه..  كدامي خيارين الرفضت يجوز ميتركوني بحالي يجبروني قسرا زواج أو دونه

وأذا لؤي تركني...  الشايب  أكيد يدبرلي مكيدة..   

زواجي منه بيه صالح ما أخسر بنتي وتتربى يمي هو رافضها بس راح أشرط عليه... 

ماكو حل ألا الحيلة أتزوجه أو خطوبة طويلة وراها أقشمره آخذ البنت وأروح شمال الوطن الى أقصاه هناك ميكدرون يوصلولي. 

الجأ للاكراد المعارضين للحكومه مناطقهم محد يكدرلها. 

يارب ساعدني وفقني.. 

ظليت أخطط وأني أحس نفسي مو ماجدة الفقيرة والخجولة. 

أكيد بالليل هو أحد الحاضرين.. 

تجهزت..   قررت حربي تكون بذكاء.. 

الظاهر مكتوبلي أصير هديل حتى أنقذ نفسي وبنتي من براثن لؤي.  

لليل كمل كولشي. 

متهيئة ومبدله لأستقبال الضيوف.. 

أتصل وأكد لازم الضيافه على أكمل وجه.. 

بلغته تم... 

أستغرب طاعتي.. 

: الظاهر عقلتي..؟  جيد ممتاز

: لأجل طيف أنفذ بس أريد بنتي يمي..  صعب أسلمها لبيئة ناس مثل أهل ماجد... لازم أربي بنتي على حب النظام ورجال النظام.  

كال مستغرب: عجيب.  أخيرا قريتي أنت ِ بغلطتج...  من تزوجتي واحد مهتلف... 

: بعد صارت..  

: كل هذا نضال لأجل الوطن..  

بقلبي كولت أنام وي واحد مسؤول جهاد للوطن هذا عاقل مخبل.. 

: أني قابل بنتج يمج مدام تطيعين بس يا بنتي...  الرجل رافضها.. 

: أني اقنعه..  

: خوش حجي.  أذا قنعتيه بقي بنتج. 

صار ناعم بالحجي وبنته صرت.. 

رحت تمددت يم بنتي أحضنها وأبجي.. 

مكدرت أتنازل وأنطيها  لازم أهرب بيج بس شلون أهرب. 

من الأخبار الوضع بالبلد مو زين بلكت الدولة العظمى تنهي هذا الحكم وأتحرر قبل لا أتورط وي حامد ..أباوع للسكف..  

يا طيف لو جنتي مكاني و آني بمكان أمي  فلا أعوفج بهاي الزوبعه وأهاجر مثل السوته أمي ولا أتبرى منج.  . لأن جنتي ضحيه وأداة..  

ظليت أقارن.   أمي لو تحبني جان من صغري قوت شخصيتي

جان عرفتني بحقيقة لؤي بدل ما بس تمنع تواصلي وياه. 

بس أني ضحية؟..  دبرأ نفسي من الصار لا أبد..  اني أقر بذنبي لمن أموت أقر.   

نفس الوقت ما كنت متقصده..  اأذي.. 

بالنسبة لبابا سهيل كان ظني بيه إنسان  طاغي..  

أوف ما يفيد ندمج  يا ماجدة نسيتي شلون دللج وأهتم بيج رباج كبنته..  

مدري مدري شبرر شيطان مدري شنو خلاني أستغبي ووثقت بلؤي.. 

يارب كون صدك تهديدات هاي الدولة الأجنبية  و تشيل الحكم ألا أنتقم منك لؤي...  وآخذ الثار مربع.. 

غفوة محسيت ألا صوت عميق... 

: أجو الضيوف نايمة كومي؟ 

كعدت صفنت بي..  أستوعبت كعدت لكيت بنتي كاعدة وتلعب

: صار بس خلي رنا تنتبه لطيف.. 

بتذمر كال: لو ترجعيها لأهلها هل...  وفشر على بنتي..  بما معناه بنت الزنا... بس حجاها بكلمة دارجة 

طلع قبلي مشطت شعري الي انهوس بنومتي

أني  مبدلة ومكيجه. 

طلعت وأني أضفر بشعري صفح وصل لخصري

مر طيف ماجد بعقلي.. جان يحبه..  ويغطي وجهة بيه من ننام. 

جريت نفس ولبست حجابي وطلعت

لكيت ستة رجال.. 

تطمنت وياهم نسوانهم.. 

دعوة مو خاصة همزين 

أشرلي أكعد يم حامد .. 

جان كرشة طافر..  

واستغربت شعجب رجال بالأمن دون لياقه ولا جسم رياضي الأعرفة ذول يتعاقبون أذا سمنوا 

والهم وزن محدد لازم يبقون عليه وعليهم متابعه كل كم شهر وزن إجباري. 

هسة أني شعلية بوزنه خل أخلص روحي من هذا المستنقع وأهرب لو وحدي يمكن بسهولة أهرب بس مشكلتي بنتي. 

كعدت وأني أراقب.. الوضع... 

بادر حامد: ست ماجدة..  فرحان بشوفتج

. أبتسمت بس شنو داخلي مال أتفل بوجهة السكط. 

: أني الأسعد.. 

تفاجأ: ها... فرحانه 

أبتسمت أضحك على روحي وأعاتبها..._ماجدة الخجولة صارت هيج جريئة _

: والله نورتنا أستاذ.. 

والتفتت للضيوف: نورتونا

التهو سوالف..  عن الوضع... 

حامد  كال: مبقى شي وتخلص الفترة الي نطتها هاي الدولة..لحكومتنا المجيدة  والله خلي يجون نراويهم أفعال الزلم مدام الريس موجود منتصرين بعون الله. 

يحجون وأني بس مرة أمسح بصبعي   حاجبي مرة أغص بضحكه مكتومة

هواي زامطوا...  خاف تدخللنا الدولة وهم أول الهاربين.. 

: ماجدة

همس يم أذني...: لازم نتزوج قبل هاي الظروف... أبوج كال وافقتي

: أوي سيدي والله أحتاج فترة خطوبة طويلة..  أريد أتعرف عليك. 

: بس.. 

سكت بدلع ومكر الثعلب حاجيته وأني أنعم بصوتي أكثر مما هو أنثوي وناعم ومغري. 

: سيدي.. 

رفع أيده على كتفي وتقرب يشم عطري  يقاطعني

: كولي حامد شعجب محجبه.. بس لا بعدج متأثرة برجلج المنتمي لل... 

كلت بكلبي الله أكبر عليكم سويتوه منتمي لحزب ديني. شلون تبلي على خلق الله.لمصالحكم 

بس التفتت اله وأبتسمت أغواء وأني أمثل أرذل تمثيل ما ينطبق مع أخلاقي بس معندي حل ألا الحيلة حتى أهرب ببنتي.

: حمودتي 

تسرسح.. وبساع كال

: الزواج بعد أسبوع قبل لا تصير  الحرب.. 

: يااا لااا بعد وقت أجهز نفسي لازم. عفية حمادي ترى أزززززعععععل 

جريت الكلمة بمياعه غيمت عينه برغبة وخفت لا أسلوبي هذا وحيلتي تنعكس ضدي. 

: ماأكدر أنتظر.. كل هاي الأنوثة مجودتي ما أحب المحجبات. 

ضجت من جر حجابي وذب ستري يم رجلي

وجر قراصة الشعر الحديد  وكع شعري الطويل وانحلت الضفيرة

الموجودين يضحكون ويشاقون 

وحدة أدب سز من الجايات كالت: أي عيني شلون كتاكيت عشق.. 

رد الي بصفها 

: لمياء لو بيدج مشروب كلت سكرت شو عصير برتقال ولج كتاكيت شنو كولي عصافير حب. 

أكو زوجات رجال أمن ومخابرات من الضباط حاضرات ومحترمات

كلامهم موزون ما أريد أحجي عالكل الله يشهد 

بس الغثني كم وحدة ما مؤدبات 

وأيضا أكو عشيقات وأكو زوجات سريات هم حاضراتنا 

مشكل يلوز دعوتك هاي يا لؤي الحقير... 

بكد ما حبيتك لأنك أبوي كرهتك أكثر من لكيتك مو أبو شيطان. 

بقيت بصمت.. 

أستمع للمهاترات وأخذت جانب أمين شوي لأن ما أرتاحيت لهذا الحقير. 

ظل يتغزل وأرد الغزل أضعافه. 

بس لعبت روحي سكتت هو أصلا معرفت نفسي... وين مبادئك يا بابا سهيل على عتبه كعدات لؤي ضاعت مبادىء الشرف.. 

أعتبرت نفسي ملوثه رغم ما نطيت شرفي بس التدلع و التغزل وهذا أيده مرة على كتفي مرة جر حجابي مرة على فخذي هنا أعتبرت نفسي تلوثت.. 

بس يمكن التحايل بهاي أهون من أصير عشيقه أو زوجه سرية. 

تدلعت حتى لا يشكون بيه هنا لازم أقنعه ببنتي عود تعيش وياي حتى أبين فعلا قبلت  بهيج زواج. 

: سيدي أقصد حمودتي  بنتي تبقى يمي وتربيها أنت على حب الوطن ومبادىء الثورة..  مكدر أنطيهة لأهلها.. 

يباوع لحلكي وهو همس

: كومي نتفاهم على أنفراد

: بس.. 

: أي أي بقيها...  يلة كومي أريدج

كومني وجرني من أيدي. 

وأبوي ال:::::::  فرحان..طلعنا للحديقه وهو يجر بيه ورى الحديقة بين شجرة وثيل.  جرني لحضنه أنصدمت من تصرفة حاولت أوخره هذا الخفت منه لا أسلوبي بالتحايل ينعكس ضدي. 

وهو متمسك يتحارش  . 

لعبت روحي وكرهت نفسي الي أعتبرتها تلوثت

: عوفيني..براحتي لاتمنعيني   وحمدي الله أتزوجج ترى غيرج دون زواج..  أويلي نعومتج...  

وخرت وخليت بينا مسافة 

عصب وضرب الشجرة جلاق

: أني أعشقج ليش ما تقبلين أبوسج...ملحكت أحضن ودفعتيني. 

: أني الك وين طايرة  بس مو هيج..  مدام نتزوج مبيها شي نتلهف لليلة الزواج عاجبني أول نتزوج حبيبي. 

:حبيبج يعني هم تحبيني ولا مصدك ولج فرحان شوفي حبي  باجر أمر عليج مو تردين تعارف... نطلع طلعات مخطوبين 

عاتبت ربي  

يارب  يمتى تخلصني.. طال أنتظاري ربي أستجب دعائي.. 

رفع أيدي وهو يبوس أصابيعي...  واحد واحد.. 

رجع باوع لشفتي وجرني.... 

رفضت و مانعت بس بغضب 

صاح: هي بوسة شطالب.؟!  أنت ِ خطيبتي وحقي عليج

رديت بأصرار: بعد الزواج. 

هز راسه موافق وضايج كلت هذا همزين مو من النوع الي يفرض عالمرة ويجبرها جان ضعت. 

بس راح يدخل يبين ضايج لؤي هنا خاف ينطي بنتي لعمتها. 

لحكته: سيدي أقصد حمادي حامد حبيبي أنت َ زعلت مني 

باوعلي وذب حسرة

: كلت أخيرا الله نطاني الي تسعدني يا ماجدة أنه التزوجتها وحدة مو حلوة ولا تحترم متسلطه ولأن أمها صديقه لناس بالقصر الرئاسي.  تهددني وعايش مضطهد لا شوفيني بهيج منصب أنه بيدق شطرنج بيدها. 

بكلبي كلت أمداك وأمدا حظك يمي مسترجل ويم ذيج دجاجة هواي عليك. 

بس أبتسمت وباوعتله 

: سودة علي حبيبي والله ما عدها ذوق يمه الخدود مالاتك كنفوشي يمة شحلاتك أنت َ لازم تفرح بخطيبتك نزيهة متنطي مجال هنا تأمن  متخونك. 

والله يا حامد بهذا البيت شفت أنواع أشكال كعدات بابا الما تخلص زوجات و أزواج والملامز والمغامز بين زوجه ضابط وي مسؤول رجلها. 

وما خفي أعظم أنت َ أحمد الله علي وأفرح يله حبيبي أضحك وأفرد وجهك شنو بوسة بالحرام الحلال أحلا و الإنتظار أكثر لهفة لليلة زواج باجر بليلتنا راح تذكر كلامي وتكول عشتي لأن ما نطيتيني مجال قبل زواجنا. 

باوعلي بغموض و رجع أبتسم وكال 

: أول مرة بهذا البيت أشوف أخلاق وشرف من الي بكعدات أبوج. 

: ههههه لا تدرجني ضمن الشفتهم ترى أنت َ خطيبي وحبيبي.. 

لزم أيدي متعمد وأحنا نمشي 

هنا خفت أرفض يشك ليش هيج كولش متشددة. 

. 

دخلنا وهو صار يتعامل دون تجاوز وتحرش  بس يسولف يضحك متونس وفرحان ومصدك قبلت بيه وديحاول يبرز أحترامه الي و حتى تودده تحول بأدب... 

همزين طلع هذا قشمر.. 

كون أفلت منكم أوف يراد عيد.. وأحني أدية. 

وهذا خلا لؤي يسترخي بمكانه

حمدت الله وشكرته على نجاح أول خطوة بالتحايل. 

: لؤي..  راح أرفع أسماك للترقية..  والك مكافئة مالية.. و أريد لهاي الحلوة مكافأة مني شخصية مكدر أتلاعب بأموال الدولة.

كولت واو كل هذا وممتلاعب ولا سارق شي ههههه عود يبيع علي نزاهة. 

فرح لؤي.. وإني أحسب وقت  يطلعون.. 

ورى ما راحوا... مدحني لؤي.. 

: هذا ميقنع بسهولة شسويتي وهيج..  من طلعتو ونستيه؟ 

أكيد وألا ما رضخلج دخل عبالك طلي بين أيديج ويوزع ترقيات و مكافئات. 

شنو أكيد لعبتم برى بختله الحديقه يله لا عبالج أضوج أهم شي مصالحنا بنتي 

ردت أتقيأ من كلامه

بس لو أعرف وين أبوتك شلون تتقبل.. 

بس هو بلا شرف وكرامه أذا بيته  محوله لبيت دعاره للضباط الكبار و المسؤولين أعتب عليه؟ 

لملمت المكان وأني كوة أحجي

: ترى عرضك أني عجيب أمرك؟ 

ضحك وأشر بيده يفرك أصابيعه الإبهام بالسبابة. علامه الفلوس. 

: الفلوس والمكانه هن عرضي أنت َ ورنا وحتى أولادي دون ذن مالكم قيمه بحياتي لو ما المكانه والفلوس أني هسة بعدني ذاك الضابط البسيط الي يبوس بساطيل حتى بس ينطوا إجازة لو حتى بس يجزون غياب لسبب طاريء. 

الإنسان دون مكانته بالمجتمع والفلوس  بلا قيمه. 

وراح 

كعدت دموعي على خدي وأني أتذكر... شلون الليلة أتحايل  ومر بخاطري هنا  طيف بابا سهيل وهو ضايج يباوعلي بعتب ليش بعتي مباديء ربيتج عليها يا ماجده ولاقاه بخيالي طيف ماجد زعلان وداير وجهه ماجدة وين الحب البريء الخجل والنزاهة وينها وتحولت ملامحه الى غضب كاسح وهمس بس الكاج أقتلج يا عار بس الزمن يدور و أتمكن منج أغسل عار قلبي الحبج  من أنحرج... . 

هزيت راسي حيل أريد أطرد طيف ماجد وعتابه و غضبه و  تهديده الي بإنتقامه مني مستقبلا.. 

بس الأعدام أخذه وما حقق تهديده.. 

ظل  صوته يحاربني بصحوتي ويقضتي وخيالي ويهمس صداه 

رحمة وين يا ماجدة وين أختي  .... 

والذنب يشتعل بيه يتجدد بكل ثواني عمري. 

غمضت عيني و كمت وأني أفتح عيوني أجر نفس وركضت صعدت لغرفتي وأني حيل أبجي. 

شمرت روحي يم بنتي أحضنها نايمة ومغطاية 

ورنا كامت من شافتني بعيونها نظرة قهر و حسرة مكتومة 

مسحت دمعتها وطلعت دون أي ردة فعل آخر منها أحسها كشبح صامت   تتنقل بينا.وتمر بينا الأيام ما بين خوف من مستقبل مجهول وحاضر مهدد بالضياع وماضي مملي ذكريات.

بديت أندرج وي مناسبات عامة... 

لجان رياضية ولجان أخرى.. 

وأخر حفل رحتله..   وراها الكارثه.. 

الخسرت صحتي بسببها و خسرت طيف. 

وخسرت سلامية أصبعي.. 

هو باللجنه الأولمبيه.. 

.  وقتها تكريم.. 

للانشطه المراهقه..  بنادي معروف هو ••••• 

أناشيد وطنية ومظاهر تبرز النظام بابهة صورة ونزاهة وتبرز علاقة أهتمام الحكومه بالناشئة الشباب بالرياضة.. 

أناشيد. تمجد..  يعني ضحك على الأذقان.. 

أتفرج لهاي العروض والفعاليات..  أبتسم.  

هذا المسرح العلني.. وما خفي أعظم.. من مسارح الظلام المخفيه خلف أبواب.. من الظلم والجبروت.. 

هناك بمسارح المنسترة والسرية بين غرف أو مزارع أو قاعات تابعة لسيادته وأبن سيادته وللمسؤولين 

مسارح الحياة المظلمة مسارح التعذيب والتنكيل مسارح الأغتصاب والضياع 

مسارح من يدخلها قد لا يخرج... .. 

من ترتفع الستارة 

لمثل هيج مسارح 

يبين ... الوجه الحقيقي. هناك صراخ الأبرياء.  . 

قرابين عذرية..  تفسد بسبيل  أتباع الريس وملذاتهم.... 

عوائل تختفي وشباب تنعدم أو حتى تصبح مجهوله المصير. 

أباوع للي يلبسون زيتوني..  

و نساء  مسؤولات عن تنظيم نسوي..  هلاهل وصفكات وهوسات 

ظليت أقارن بين الطبقه المخملية والطبقه العامة. 

الفقير  الي ينام بردان جوعان عود ستر الله على ملابس اللنكات.. 

لو شغله بيهن لو المثل عمي زيارة الي فصلوه من وظيفته وعاش على تصليح  السكراب وأعاده تدويره.. 

لو عمتي الي تحوك ليف و تطرز كواني تسويهن علاليك لو بسط.. 

العالم الفقره هم الشعب الحقيقي للبلد 

هم جنت مثل ذولي المبذرين المغرورين أنظر للفقرة  بغرور لمن عاشرت هاي الطبقة فترة وعرفت معاناتهم.. بس حتى يلبس و يوكل أهله وناسه... 

مجنت أحس بهاي الطبقة ومعاناتها إلا من تزوجت...  عرفت مو كل الشعب ينعم بالرفاهية

وأكو ناس كوة تجيب قوتها... وأكو ناس تخسر مبادئها حتى توكل أولادها. وتلبسهم.. 

وأكو ناس رغم الفقر مصبوبين صبابة عزة نفس..  وما يمد أيده وينذل..  يموت بالليلة الف موته وينام جوعان حتى أولاده تاكل... 

يتغطى بغطى ذرعانه يحضن نفسة يدفيها ويترك اللحاف لأطفاله.. 

شكد سولفلي ماجد..  عن جماعته وعن هاي العوائل الي تعتبر متعففة.. 

أبتسم بتصنع..   للي يسلم وأني بصف لؤي.. 

بهيئة إستقبال أحد  كبار المسؤولين... الي من رموز الدولة... 

وراها... حامد ويرافقه.. 

الي رحت أشتكيت يمه.. 

ههه بداخلي شلون زمرة طلعوا. 

وأني القشمر رحت أشتكي سجاني والمن ههه كلهم نفس الصنف 

لزم حامد  أيدي يعرفني للمدعو خليل

خليل الي كان سبب كارثتي الجاية خليل الي كان عكس حامد  إلي ممكن يتقشمر بس خليل كان نذل و ما يثق بكلمه أبد... 

: أقدملك خطيبتي.    

أبتسم بصورة جانبيه لحامد  وهو يضحك

: بعدك تدور نعومه و طفوله ونسوان.. صغيرات ولك كبرت.  والشيب تارس راسك. 

ضحك حامد  للشقى وكال

: نطري شيباتنا شتريد خليل ترى روحي خضرة.. 

رجع خليل ركز بيه

: أنت ِ الخبلة التشتكي على واحد كبير بالمخابرات  والمضحك تشتكين على  أبوج. يا بنت أكو وحدة تشتكي على أبوها هههه بس ال ### تشتكي.   

بلعت الفشرة القبيحه بحقي... 

درت وجهي متضايقة... 

نظرات  خليل أبد مو مريحة.. 

..  ويبتسم مستهزأ.. 

ويهمس من حامد أبتعد ملتهي يحجي وي كبار المسؤولين.. 

: تصالحتم.. مو؟  ما تسوى لؤي ينهضم مرتين وعاقبه هضيمة لؤي موت لؤي أذا أنهضم ما يعرف أبوه من أمه يعني يا حلوة الحذر من لؤي .. صيري  بنت مطيعة... والظاهر خطوبتج لهذا الطحش أكبر دليل خضوعج للؤي  هههههه بس خلينا نضوك شويه من طاعتج مو بس للشايب  حامد.  

أني متعلم أتذوق  قبل هالقطيع نسوانهم.. 

صفنت بالتلميحات.   شكد شفت لؤي مو شريف هذا أسقط منه.. 

ردت أكوله.. شتقصد بله.؟ 

بس حامد   رجعلي وجرني من أيدي وراه عبالك شاب يتصرف دون وقار رجل نهايات الأربعين

حاجه واحد من الرجال.. كبارية الدولة 

: سيدي..  أكيد ما تذكر هاي الطفلة بحفل الخيري بسنه..... 

شوفها شلون كبرت.. تذكر كوتلك عنها هاي دخلت قلبي وعقلي..  وكوتلي طفلة عليك الطفلة كبرت سيدي... 

وصارت خطيبتي... 

ظل يفتر بيه يتباهة..  عود شنو هاي شيسموها..  أجت الفشرة بطرف لساني بلعتها ما رباني بابا سهيل هيج.... 

بس عاشرت بيئة لؤي و تعلمت أصناف الفشاير 

حيل لعبت روحي من الوضع كله نترت أيدي وكتفتهن على صدري حتى لا يلزمني 

عيونه عصبت من تفشل كدام مسؤوليه. 

تلاحق الموضوع لؤي وهو يبرر... 

: مرت بهواي أزمات أعذرها... وهي قررت بعد تطيع...  

بس خليل بساع كال.. 

: تدري تذكرت شاكر أخوك يوم أستشهد.. تذكر شاكر يا لؤي جان مناضل ومجاهد ضحى لأجل الوطن.. 

حجاها بضحكه.. 

: شذكرك..  ؟  سد الموضوع شاكر جرح مريد أحجيه للآن جرحه الي يدك بقلبي.. 

بس خليل لاحظت..  هواي يتعمد يضايق لؤي.. سبحان الله لكل متسلط يسلط الله عليه الأقوة منه... 

مدام بينهم حزازيات لويش ما ساعدني وشكاني وخلصني من لؤي لويش خابرله يحذره غريب أمر ذولي المنتمين للدولة..

أنتبهت من شرودي  على رد لؤي.. 

: بعد تذكرته..  شوف رغم علاقتي بالأستاذ مقربة..(أحد الرموز) 

بس رتبتك أعلى..  

ورغم هاي رتبتك أني أكدر.. أنفيك وأكدر أرفعك..  نفس الصار لسهيل يصير بيك مو جنت أنت َ  أقل منه درجه..هههه عزيزي

وأشر لؤي إله. 

: شتريد..؟ كول يجيك طلبك بس لا تروح يم صديقك المقرب تحجي مريد يوصل شي للريس ولا لأولاد ريسنا حفظه الله ورعاه. ولا تنسى جنا بفرقة وحدة بالجيش وأصدقاء. 

: الصداقة أنتهت بموت شاكر عزيزي بس بقينا بشغل واحد من مخابرات بفرقة بالجيش لمخابرات أمن دولة. 

: كافي هذرة بهيج موضوع..  من مصالحك أني لسة عايش.. لأن خدمت الوطن بأخلاص والمثلي ثمين جدا يبقى عايش.. 

: مممم هو هم صح فايدنا بهواي أمور..  بس أحذر بلحظة أنسى منجزاتك وأدزك لشاكر أخوك..  لذا أريد.. 

وسكت وكمل.. ورى ثواني وهو يضحك. 

: بنتك الغزالة...  

وضحك... كمل بصفاقة 

: هيج أجتمع بخصوصية بيها كون قبل زواجها بحامد ضروري متعود أني قبلهم لازم أتذوق. 

وضحك

سوى لؤي روحه ما سمع غاية خليل ولا فهمها 

: بس  حامد خطبها قبلك لذا صعب تخطبها. 

رد يضحك: وأني كولت أخطب؟ سمعتني طلبت زواج لا يا رفيقنا أني أتذوق الفواكه قبل لا تنقطف..والأصح أقطفهن قبل أزواجهن.

هو حامد  يخطب دومه وأني أضوكهن قبله هههاااا هاااا ههههها اااهااا وليلة أو أسبوع يخلص منهن يطلق عنده مرةحرباية متخلي الها ضره... 

حتى ضحكته الله ماسخها.. 

سكت بابا يخاف لا يأثر على رتبته ومكانته لأن خليل الظاهر جاسوس للقيادات والرموز العليا مزروع بدائرة الأمن والمخابرات....

وما عجبني التلميح عن عمي شاكر..  حسيت أكو جريمة بالموضوع و هذا أكيد تستر وبثمن.. مو لله.. 

ظليت ساكته أخاف أحجي وأعترض..  ما أنطيت رد... بس ناوية أبلغ حامد  ألا أخليكم أنتم الثلاثة  راس يطك براس... 

ظل لؤي يفكر...  مثل اليختار بضاعته لمنو يبيع... محتار ما بين عرض خليل المحرم وحامد  الزواج السري 

تاليته يفكر مصالحه... 

سكتوا من بدا المرسوم الجمهوري.  وبدا التكريم... 

أنتهى الحفل وأني قلقة شضامتلي الحياة بمستنقع لؤي.... 

وعيونهم تصارع منو اليربح يانصيب.. 

هواي زواجات سرية.. 

ملذاتهم.. 

بس الله شاء..  يلهيهم بوضع البلد.. 

فنسد الموضوع حاليا.. 

تعبت من هاي المناسبات والبلد بأزماته الصعبة

تحولت المناسبات لأجتماعات.. أستنكار مظاهرات ضد الدولة العظمى

تصعيد بالأحداث..  

بدة الوقت ينفذ... 

وراح تدق ساعه الصفر..  والحرب تبدي.. 

بس العربدة طبع بيهم صعب يعوفوه.. 

بأوج الأزمات تلكاهم بحضن كاوليه يطربون.. 

سكارى.. 

مريــــــ☆ــــم 

حفلات تخرج هاي السنة قدموها.. 

بسبب الأوضاع والحفلات دائمًا قبل الإمتحانات النهائية. 

طبعًا فرينا الجامعة تصوير وفرحانين.. 

خلاص مسيرتي الجامعية أنتهت بقت بس أمتحن.. 

طبعًا أكو حفل ليلي بحدائق ••• 

ونسقت جامعتنا مع هاي الحدائق... 

قنعت نصير أريد أحضرها بس ما قبل وضجت 

لذلك أكتفيت بمسيرة كليتنا بروب التخرج وتصوير الدفعة 

جنت جايبة رجلي وأبني وياي.. 

وصارت هذن الصور ذكرى.. 

لمحت شيلان  أبتسمتلها زعلانه مني بس والله ضجت على أمي هاملتها خالتي رحت أريد أصالحها وأحاجيها 

بس عافتني وحيل أنقهرت 

ترخصت من زوجي أشوف صاحباتي 

: روحي أني وياسر بيك بكافتريتكم.  نكعد. 

: خليه يجي وياي 

ضحك: وأبقى وحدي حبيبتي يسليني بغيابج. 

أبتسمت: غيابي هههه هياتني كبالك يم صاحباتي. 

رحت كعدت وهاي المرة تعمدت أتجاهل شيلان.. 

خليها تولي أم خشم مغرور.. 

شلون عافتني وراحت تفشلت كدام رجلي وهمزين غلس ما سأل شبيكم.!

:هلااااااو سنافيرو.قزومات 

وكعدت 

ردت رحاب:رجاءا الكنية لا تشملني لازلت أتمدد

ضحكن ولزمت عروبه قبعة التخرج و ضربت رحاب بيها بالشقى

:عوبة راح أشتاقلج.. يماي يماي ولكم شلتنا أندهرت راح نتفرق

:تلفونات أكو.

:وأذا حرب ومتنا شلون بينا

ضحكت آمال:شلون بيج خوافة ولج عروبة كولي يا الله.

هنا دوم نكعد ناخذ هاي الطاولة ونجيب كراسي نكمل العدد.

لو نكعد عالقنفات كلنا.. 

العدد ناقص سؤدد وماجدة 

يمكن البقية ضاجوا لفراقهن 

بس مو مثلي آني تربيت وياهن نفس المحلة والشارع. 

نفس الروضة والأبتدائي الى الجامعه سوى وهم ما أفترقنا

صداقة عمر خربتها الظروف 

سؤدد منعرف وين والأشاعات هربت للخارج. 

و ماجده مصير مجهول حتى سألت أمي تكول مختفيه مرة لمحتها بالمنطقة تاركه الحجاب 

أما ماجد يكولون هرب لأن عليه حكم أعدام  غياب بس من نصار صديقه يشيع أنعدم... 

خذته الحكومه ومنعرف أخباره أكيد أنعدم.. 

شلة السنافر تشتتت.  

جريت نفس وهمست 

: الشلة خربت بغياب ماجدة و سؤدد

باوعتلي شيلان وذبت بسمار

: أوي يالحنينة.. 

غلست عنها و سكتت.. خلي تولي شايفة روحها شوفة عشتو.خليت وكمت: منو تروح للحفلة 

ردن كلهن يرحن ألا رحاب

: منو يخليني سيد حيدر أخواتي لو أمي لو خوالي والله معدنا بنات تروح حفلات مثلجن

ضحكت: الحال من حالج بس ترى حفلة عادية الساعة أربعه العصر وتنتهي بثمانية ليلا 

: لا بوية موش يقبلون لو أبن عمي الحب مال أني أي هذا أصلا ربات خارج تربى هناك و متفهم. 

: خية يخافون علينا ترى مو معقدين هذا نصير ما قبل رغم كتله. أمشي وياي دعوة مفتوحة

: أني حيدر كال أني أجي وياج بعدة مراهق وحاكمنا حكم  يعني أذا أحد يجي وياي يقبلون بس محد يروح عالم مشاغل عدهم 

ألا حيدر تبرع بس ما أخذه يولي آخر طلابة أعتقلوه الحزب. 

وكوة طلعناه بالدفرات والواسطات والفلوس 

هذا مشكلجي  يجي زميل  يسلم علينا 

يتلكاه بوكسيات 

ضحكت وياها وباوعت لنصير غمزني وضحك.. 

وأشر بحاجبة  يله  يقصد كافي خلي نروح.

ترخصت ورحت اله 

:نروح؟ لو بعد تبقين..؟

:لا حبي يلة نروح...

مــــــ♡ـــــاجدة  

بيوم لؤي أجاني

:حضري نفسج... أجتنا دعوة  ولازم نروح الغريب حامد  ما مدعوا

: الدعوة منين؟ 

باوع بتوتر وهو يفتح دكم قميصة الأولى

: الأستاذ خليل

: ما أروح نيته مبينه وهو مو ثقة لذلك ما أروح 

سكت بالأول 

تالي كال: لو علي ما أروح حتى أني بس صعب أرفض حصانته من جهات عليا

: أنت َ أعلى منه شو هو كأنما الأمر والناهي بالدائرة مالتكم..  كولشي بيده وأنت َ الأعلى

: هذا مدعوم حتى لو معندة أي رتبه..  يكدر يمحيني ويمحيج شوفي نروح و أذا شفنا الأمور مو مريحه ننسحب.. 

: وأذا ما كدرنا ننسحب برأيك منو الكبش. زين نوع الدعوة شنو غير تفهم منه

: دعوة عشاء وحفل ميلاده حسب الدعوة الوصلت. 

: أني ما أروح.. تريد مرافقه مرتك موجودة وأني شكو.. 

: الدعوة خص نص أنت ِ بالذات تحضرين.. 

: ما أحضر..  لأن أخاف.. زين ليش كنسل حامد  مو صفته خطيبي عشتو غير يدعوه وياي 

: ما أعرف..  وكافي ملحة المصلحة تقتضي نروح..  أني رقبتي بين أيده 

: أوي...  خطية أنت َ!  بعدين أبو رقبة بين أيديه راح أتخبل أنت َ رئيسه بالشغل شلون هيج ترجف.. 

: كوتلج هذا أتصاله مباشر بلي فوك..  يكدر يلفق علية تهمه توديني للجنة

ضحكت: جنة ومتأكد يلفق لو لازم عليك لزمات ؟!  النوب يكول يوديني للجنه ههههه متأكد أنت شنو من صلاتك لو صيامك.. لو أعمالك الصالحة كول يوديك لجهنم وبئس المصير. 

محسيت الأ راشدي

: ترحين وغصبا ما عليج  وأذا الأمور تتأزم هناك ومنكدر نطلع ألا ننفذ  رغبته تنفذين فاهمة.. 

بحدة كوتله: هنا الزبدة  أنت َ تعرف يعني شيريد أو متوقع شنو نوع الدعوة..  مو؟  

دار وجهة: رقبتي  بيده ماضي وحاضر..  أصلا الي مسكته عني ما ينفيني أو يسوي وياي السويته بسهيل أنو أني مفيد الهم وأنجازاتي هواي رقتهم و هواي حققت غايتهم. 

لأن الدولة بحاجة للي مثلي هذا مسكته وهو من نوع متزمت بحبه للرموز الرئاسية بالدولة.. 

: حضري نفسج للدعوة.. بلكت مجرد حفل ميلاد... 

: وأذا شكوكي صح منو يفيدني أذا هذا راد... 

قاطعني: دربالج تتسببي بزعزعة منصبي أو تضريني والله أندمج لخليج عمر كامل تمشين وتهلوسين ألا أفقدج عقلج.. 

سكتت هي الدنيا مناوية تنصفني ويصير إنقلاب أو فد شي يزيل الحكم وذول ينسجنون أو يجتثون.. أو أي داهية تاخذهم.. 

. 

: هي الدعوة يمتى

: الليلة 

: غير واحد يهيأ نفسه

: حضري نفسج وأنجبي.  رايح لمكتبي عندي شغل 

واحسن شي سويتيه ذبيتي الخركه العلمج عليها ماجد وتركتي الحجاب.. لا جيبيلي شبهة شكلك بنته من حزب ديني ال.... 

: تركته لأن الحجاب يستحق الأفضل مني ولأن خطيبي  حامد هتكه.. 

أصلا الحملة الأيمانية هواي ناس تحجبت بيه بعد شنو تهمة لحزب ديني... بكل الأحوال ما تجينا هيج تهمه وتعرف أنتماءنا . 

دخل غرفة مسويهة هو مكتب بيتي.. 

أني صعدت لبنتي... جانت كاعدة ويمها مكعبات..  تلعب بيهن شافتني وكالت مه. 

أبتسمت: يروح أمه. 

تهوس  بيديها وتلعب عود تركص.. 

ظليت أطك بصابيعي وهي بيديها تركص عود. 

: بنصف الألم والجبروت أنت ِ هنا شمعة..  ياريت أرجع بعمرج ياريت... 

دخل لؤي متعطر ومبدل زيتوني

: غير دعوة عشا عيد ميلاد زيتوني المن؟ 

باوعلي: يحب هيج مظاهر دكولج معتز بالنظام وحتى الزي الي مينزعه ألا بس ينام.  

ضحكت  أستهزأ أتخيله 

حتى ببيته محنبط متحنط بالبدلة الزيتوني. 

: بيها مجال أنومها

أشرت للطفلة هو بغضب

: هاي لو تموت نفتك مال رصاصة وأنهيها الج.. فزي كومي خلي تفض...  رنا تنومها. 

بنتي شافته وبرطمت تاشرلي وتكول ببه بببه

تسميه بابا لأن هي مشافت أبوها ولا فطنت عليه.. 

يمكن تصوره هذا أبوها 

هو باوعلها بحقد ودار نزل الدرج

حضنتها أبوس خدودها

: لا مو ببه هذا إبليس خليتها بالكاع و رفعت أيدية ثنينهن بكل أيد السبابه رافعته فوك راسي  عود قرون شيطان.. 

: إبليس جدج شيطان رجيم. 

هي ضحكت بشوشة مثل أبوها..   مر طيفه ودمعت عيني معقولة أنعدم..  لو لعبه منهم هاي..حسيت أختناق من ذكرته مشتاقتله رغم الفراق ورغم التهم والخذلان  بس أبقى أشتاق أله..  

نزلت وأني أوصي رنا 

وراها رحت لمكتبه فارغ 

لفت نظري الخزنه ناسيها مفتوحه.  

الفضول خذاني للخزنه

وأني أشوف ملفات رسمية مع  كل ملف قرص سيدي... 

هواي أسماء محتفظ بنسخ مدري ملفاتهم الأصلية 

منه ملف لرحمه ولماجد. 

وملف مكتوب عليه أسماء، المشبوهين والفارين من العدالة. 

ذولي الفالتين بجلدهم من البعث... 

ظليت اقرأ بس أسماء الملفات 

هن هواي بس جذب نظري  أسماء 

منهم رحمة.. 

فتحته بس جذب نظري ملف بأسم شاكر... 

هذا شهيد ليش مخليله ملف؟!!! 

غلب فضولي عفت كل الملفات ماجد كال أنعدم لذا أريد أعرف مصير رحمه بس ملف شاكر مدري ليش جذبني أكثر من رحمه

يمكن التلميحات بين خليل ولؤي حفزت فضولي.. 

أذا شهيد ليش عنده ملف يم لؤي.. 

غريب؟! 

رجعت أتأكد من الأسم الرباعي واللقب.. 

نفسه نفسى أسم الأب والجد واللقب عمي الشهيد بس ليش اله ملف هنا..

يعني  هو مو معدوم وأكول إله أرشيف ساحب نسخه منه وضامه هنا.. 

هو شهيد شجابه معاهم.. 

ظليت محتارة.. يا ملف أكلبه على السريع.. 

بس قلبي نبضي خلاني أروح أسحب  ملف ماجد بساع واترك كل الملفات توكع للكاع ما همتني كد همي بحبيب روحي..

أريد أطمن صدوك قتلوه. 

لو كدرت أحيه أنطيته الحياة بواسطتي يم معارف بيبي والفلوس الدزيتهن للمهربجية يهربوه.. 

حتى  وقتها بعت الي تبقى من ذهبي وتداينت من بيبي  فلوس ثمن تهريبه. 

سويت المستحيل أنقذه  حتى لو هو محملني ذنب  وتهم آني ما أذنبتهم. بس ما أكدر أعوفه بوطن محكوم بيه إعدام أو مهدد بالأعدام 

وقتها على أساس أهرب أني أيضا وبيبي 

بس الحظ شاء هو عبر 

وأني البقيت.. 

غمضت عيني وجريت نفس فرحانه 

الملف يبين حكم غيابي لم ينفذ بعد بسبب هرب المجرم الخائن حسب ممكتوب برأيهم هم 

.

أوف الحمد لله أذا صار علي شي عمات بنتي يوصلن البنت اله..

بس رجعلي شعور أنخذلت بدون سند هو مرتاح وأني التعذبت 

وهم رجعت أبررله هو ماله ذنب الذنب مني وبيه لؤي دمار أهله 

وأعاتبه بيا عين. 

أني أعترف بذنوبي ولا أنكرها.. 

جائز ذنبي لؤي أبوية قشمرني بأمور واستغل رحمة دون علمي ورطها. 

ذنبي دخلت حياته ودمرت عائلته لأن إنتقام لؤي بمحورين 

يعاقب هديل العافته عن طريق دماري. 

يعاقبني تزوجت دون علمه ورضاه  أستغليت وقتها أنسجن وانطرد من الأنتماء للنظام ورجاله. 

فتحت ملفه  من جديد أتأكد القريته صح لو خدع بصري من أمنياتي 

قريته  مختوم وتواقيع محاكمة أعدام غيابي

تواقيع بالاحمر وأكو بالأسود 

وملاحظة لم يتم تنفيذ الحكم 

ومقيدينه كهارب. 

أقرأ فرحانه وإيدي ترتجف يكول  أنعدم الكذاب.. 

ردت أفتح ملف رحمة.. 

متجاهلة  ملف شاكر..  لأن ما أعرفه وان كان عمي ما ملتقية بيه اصلاً .. 

صوت  صرخته... وهو يهرول سريع سحب الملفات من أيدي.. 

ودنك سيدي وكع وأخذه.. ملحكت أعرف مصير رحمة.. 

رجعهن مكانه و قفل الخزنه و جرني  تدفع

: يله...  للسيارة...  يله كدامي. تلعبين بملفات سرية أدب سز تردين تدورين علي لزمه. مو؟ 

نترت نفسي منه وأني  أمشي باستقامة

: ماجد عايش هذا يكفيني ينطيني أمل بالحياة أقاومك أنت وجلاوزتك 

دخلت للسيارة 

وهو وراي كفخني على راسي وسد بابي حيل 

رجع دار لمكان السايق وكعد.. وسد بابه. 

رجعت أبسمر..  

: لو مخابر خطيبي حامد يرافقنا ممرتاحه لهذا خليل.. 

سكت مجاوبني.. درت أباوع من الجامة وأني بس شغلة ماجد عايش فرحتني،  الحمد لله كدر يهرب منهم. 

بس اااخ ملحكت أعرف مصير  حسن ولا رحمة يجوز  تحفظوا عليها يم واحد من شخصيات كبار أو أحتمال أحترقت ورقتها أنتهى دورها و خلاص أنتهت من الحياة يعني ميتة،  بقى مصيرها مجهول. 

وصلنا الى أراضي ريفية. طريق متعرج. 

بس مو ريف شمال المدينه جان ريف جنوب المدينة شبه أرض وعرة وشبه صحراء  

: هاي مو نفس الطريق لمزرعتك الحبستني  بيها، 

: لا ذيج بشمال الجنوب..  هاي مزرعة بأقصى الجنوب.. 

هزيت راسي وأني أفكر.  شنو عود عيد ميلاد بمكان بعيد. 

: أكولك رجعنا،  ما مرتاحة للمكان،  ما أعرف أحس بخنگة. 

: وصلنا وهذا متعلم من الرموز حفلاته أغلبها بالمزارع،  وأعتقد هاي مزرعه موفرها لقادته كأستراحه الهم بأيام صيد الطيور.  

ركن السيارة نزلت وهو وياي. 

الحرس بلغ بالاسلكي وصولنا وطلب ندخل. 

الي صار ماكو أي مظاهر للحفل. 

التفتت للؤي: وين الحفل؟!  

بس هو تقدمني وأشر أجي وراه. 

هنا حسيت لؤي متواطيء لخليل حتى يزكيه يم رموزه ويترفع أعلى منصب وأخذني بالحيلة.  

تراجعت لورى ودرت وأني أركض بس وكف هو وأشر  فسدوا طريقي حرس بالزيتوني. 

ظليت واكفة رجع لزم أيدي: يله بابا

لعبت روحي حتى من كالي بابا كولش، صرت أكرهه. 

دخلنا خليل موجود أبتسم: أفهم من جبتها وافقت؟ 

هز لؤي راسه وهو يتمتم: أخذ التريده ولا تنسى وعدتني وخلي اليصير سر بينا ما يوصل لحامد حتى أمشيها عليه.ضحك خليل: هذا حامد فرحان بالحلوات الصغيرات ميدري كل الي أرتبط بيهن ذقتهن قبله. 

خلا أيده على كتف لؤي وهو  يبتسم: إعتبر المنصب التريده أخذته روح  وأني إتصل بيك تجي على بنتك من أكتفي منها.

أريد أستوعب المستنقع الفاسد الي يحكم بلدنا...  حبسة ببلعومي منعت أي عبارة توصفهم.. 

ظليت ساكتة بس عيوني تحجي دموع كرامتي الي أنهانت من صرت حالي حال التبيع شرفها وترضي سيدها. 

أباوع للؤي وهو يوصيني: صيري مطيعة وفكري ببنتك.. 

حجاها وطلع ــ تهديد مبطن ــ. 

التفتت اله: أني شرفي غالي  لا تتوقع أطيعك. 

ضحك وهو يجرني لغرفته. 

الحيرة هنا شلون أنقذ نفسي منه.

طاولة بيها عشا وبطل  وكاسين. 

أكل زيتونه وهو يتفحصني: ماكو مرة ترفض خليل وتطلع تتنفس مصير أبوج منصبه بيدي 

هنا صحت: طز  أنت َ عبالك أني مهتمة؟  كول ها؟  ترى لؤي ما يهمني

تقدم ناحيتي وحضني و..... 

              الفصل الثالث والثلاثون من هنا 

لقراءه باقي الفصول من هنا