سلمى _♡_ صحيت لما سمعت اذان العصر وقمت مخلوعة لاني الظهر ما صليته اتحركت بسرعه ودخلت اتوضيت وصليت.. بعدها مشيت المطبخ وكان البيت فاضي وبديت اعمل في الغداء وانظف لحدي قريب الساعه 5 كدا.. جات نسيبتي داخله وزهجانه وفرغت كل غضبها فيني وكل يوم الحال كدا بتهيني وبتذلني بدون سبب واضح.. عملت ليها الغداء وانا قابضه على قلبي بعدها بقيت اغسل في العدة وارتب في المطبخ وهي كل ما تجي بعندي تسمعني كلمه لحدي ما جاء قريب اذان المغرب وانا واقفه وكل ما ادور اقعد توقمني بحجه مره اعملي لي شاي ومره جيبي داك.. بس عشان ما اخد لي راحه.. بعد المغرب طوالي جاءتنا مرت الجيرات وبقت تتونس معاها والمهم انشغلت مني حبه اتسحبت براحه ومشيت الغرفه وصليت المغرب وختيت راسي في المخدة قبل اغمض جاء سعد داخل ووشه شاحب من شنو ما عارفه لما شفته قمت سلم وقعد في السرير سالتو مالك قال مصدع مشيت عملت لي غدا وقهوه وجبت لي حبوب بندور وجيت لقيته استحم وغير ملابس الشغل المهم اتغدا وانا رفضت اكل بحجة شعبانه والله عالم ما اكلت حاجه من الصباح لانو نفسي مقفوله.. المهم بلع الحبوب وشرب القهوة وروق الحمدلله.. زي ما هو بحترمني بحترمو ما كنت بحب اشكي ليو عن امو ابدا الا لمن اكون غضبانة.. يمكن عشان هو شايف وعارف عمائل امو.. وعارف اني ساكته عشان كدا كبرت ف عينو المهم بقى يحكي لي عن يومو والحصل معاه قطع كلامنا لمن امو ضربت الباب بقوه الا الما كسرتو وهو اصلا واقف يا الله.. عاينت لينا بغضب وقالت لي قومي. كمان قاعدة.. المراه دي قاعدة من المغرب م عملتي ليها حاجه لا شاي ولا قهوة.. ما عندك احترام للضيوف... عاينت ليها بكره.. وقمت من السرير بصعوبة بسبب وجع رجليني قبل اتحرك سمعت سعد وهو يقول لي امو.. يمهه سلمى طول اليوم واقفه. ما كل مره تعملي فيها كدا...
ما قادرة اوصف ليكم شعوري الساعه ديك فرحت لدرجة قلبي بقى يدق بقوة.. اول مره سعد يرد ف وش امو.. واول مره احس اني متزوجه راجل استند عليوو.. حولت عيوني لي امو الكانت شويه وتطق شدة ما ملامحها قلبت.. قالت بصوت عالي.. بتقول شنو.. بترد لي انا.. والله متوقعه منك اصلك جاري وراها اتلقي شكت ليك مني مش.. اخر الزمن والله انا الربيتك وتعبت فيك تجي تقول لي كدي...
رد ليها بسرعه.. يمهه انا بس.. قلت ليك سلمى تعبانه... طيب انا ح اعمل الشاي
صرخت فيو بصوت عالي... وقالت.. تعمل الشاي! عشان دي يا الخايب... بدل تنهرها وتقول ليها قومي تقول لي بعمل الشاي..
رديت بصوت مرهق نفسياً.. يجماعه خلاص حصل خير.. ح امشي اعمل الشاي..
طلعت من الغرفه بسرعه وخليتهم وانا سامعه صوت امو تكورك فيوو دخلت المطبخ وبقيت اعمل ف الشاي...
سديم _♡_ نمت نوم عمري وحياتي ما نمتو.. المهم قمت نشيطه كدا ما عرفت الساعه كم بس صليت العصر وانا قاعدة ف المصلايه باب الغرفه فتح وكانت متاب.. كانت تعاين لي بانبهار.واندهاش.. قالت لي انتي عثثثل... ابتسمت ليها لانو اول مره زول يقول لي كدا.. عاينت لي شديد..وقالت.. ناس امي لسه م شافوك امي قالت ما كانت عايزة تحرجك وتقولك افتحي وشك بس بعد تشوفك ح تعرف انك حلوة شديد... قلت ليها ما احلى منك.. قالت لي ناس امي منتظرينك للغدا.. اتوترت حبه وقلت ليها امك ومنو.. قالت لي امي وملاذ بس.. طارق طلع عشان جاهو اتصال.. حسيت براحه.. وقمت من المصلايه وانا اصلا كنت لابسه العبايه والطرحه شلت النقاب في يدي وكنت عايزة البس الاسبورط مشت متاب طلعت لي سفنجه منزليه خفيفه لبستها ونزلنا تحت لقيت ملاذ شايله تلفون ايفون.. يخليك تحرد حياتك وامها لابسه نظارة وتقرا في المصحف سلمت عليهم ويمكن اول مره يسمعن صوتي قبلن على وبقن يعاين لي بانبهار وخاصه ملاذ... معقول انا حلوة للدرجه دي.. المهم سمعت امهم تقول ما شاء آلله تبارك الرحمن يا حافظ.. ابتسمت ليها وقعدت وجات متاب اتلصقت جنبي وقالت بصوت عالي يمهه عايني ليها عسل كيف.. انا قايلاها ما حلوة لمن كانت مغطيه وشها.. امها ابتسمت وقالت اي والله حلاتها ما شاء آلله.. بعدها ردت ملاذ.. انتي حلوة ما شاء آلله.. مسكتني ليك خجلة وما عرفت ارد بشنو.. بعد وقت.. ملاذ قامت وقالت ح اجهز الغدا.. قمت انا بسرعه وقلت ليها ح اساعدك ابتسمت لي وقالت طيب تعالي.. طبعآ افتكرتها تقولي لي انتي ضيفه وم لازم تعملي حاجه.. بس صدمتني.. لاكن انا اصلا عايزة اساعدها المهم مشيت معاها ولفينا بجاي وبجاي زي المتاهات.. حتى دخلنا المطبخ وانا قربت اقع غمرانه من نضافتو وجمالو والحاجات الموجوده فيو..
كان بعيد من المطبخ شويه تربيزة كبيرة حولها كراسي بقت ملاذ تشيل في صحانه راقيه كدا الاكل وترص فيها هناك وانا القايله اننا ح ننزل حله من النار ونرفع حله... اتاري جاهز.. المهم خلصنا رص الاكل من مختلف الانواع وكل ما تشتهيه الانفس..وقعدنا كلنا نتغدا سوا..
نور _♡_
عاينت للعربيه السوداء بخوف وطيرت عيوني فجاءة نزل القزاز بتاع العربيه وانا قبضت يدي بخوف.. وانصدمت لمن لقيتو نفس الشاب القبيل عاين لي بنظرة كدا وقال لي.. انا متاكدة انك حاصل معاك مشكله.. بس ما ح اسالك.. طيب لو ما عندك مكان تبيتي فيه ممكن تبيتي ف بيتي ما عندي مشكله هنا انا قلبي الا الما مرق من الخوف.. ويديني بقو باردات.. وما قدرت اتكلم.. رد تاني لم حس اني خايفه وقال بسرعه انا عندي امي في البيت م قاعد برايي.. برضو ما طمنت.. رديت تاني وقلت لالا.. ح ادبر اموري.. عاين لي كدا وقال.. والله انا بس قلت ليك كدا لانك قاعدة حاليا في مكان ما كويس وممكن يجو شباب بجاايي م كويسين.. طيرت عيوني من الخوف وبقيت ابكي وانا مدنقرة ف الارض ما على نفسي.. بكيت على الحاله الوصلتا ليها..
بقى واقف قريب نص ساعه وانا مترددة وابكي.. لحدي ما قال لي.. والله انا ختيتك مكان اخت لي.. يعني مستحيل انا ارضى اختي تكون قاعدة كدا ف عشان كدا... احسن تمشي معاااي البيت وتمشي بكره لانو النهار احسن من الليل.. بقيت اعاين حوليني بخوف وتردد.. والناس الماشه والواطه المضلمه.. فكرت.. وغمصت عيوني بقوة وقلت..