رواية القاصرات الفصل العشرون20 بقلم خديجة أحمد
نور _♡_ قمت الصباح.. وصليت وطوالي مشيت انظف وبعد شويه جات خديجة.. عملنا الفطور ومشيت انادي ام احمد لقيتها قاعدة دقيت الباب عاينت لي وابتسمت وقالت ادخلي.. دخلت وقلت ليها الفطور جاهز... عاينت لي وابتسمت تاني وقالت لي طيب اقعدي عندي معاك كلمتين.. اتوترت شويه بس قعدت جنبها مسكت يدي وقالت لي.. والله يا نور انا بعتبرك زي بتي تماما ومستحيل اعاملك على اساس غير دا.. وانتي عارفة وضعي والحصل معانا مو هين وصعب.. بس الحصل معاك انتي اصعب الف مره.. انا كنت ساكته وما عارفة المغزى من الكلام دا شنو.. واصلت وقالت.. انا دايراك تكوني جنبي دائماً وانا اكون جنبك.. ف عشان كدا انا دايراك تتزوجي أحمد ولدي على سنة الله ورسوله.. يعني لو وصفت ليكم حالتي الساعه ديك م بتصدقوا كانو ضربتني كهرباء.. اتوقعتها تقول اي شئ الا دا بالذات ما فكرت فيه يوم واحد.. بقيت ساكته وانا لسه تحت تاثير الصدمة وهي تتكلم.. ركزت معاها لمن قالت.. واحمد قال اخدي راحتك وفكري كويس والبريحك اعملي.. وما تقولي دا الزواج دا شفقة عليك.. نحنا والله حبيناك من جواا قلبنا.. والصراحه يا نور احمد كان رافض يتزوج بس لمن اقترحتك ليو قال ما عندو مشكلة وانتي استخيري وفكري براحتك واتاكدي حتى لو رفضتي.. مكانتك جوا قلبي محفوظه وماف شئ ح يتأثر... كلامها طمني شويه بس ما قدرت ارد بكلمه واحدة.. قطعت حديثنا خديجة لمن جات داخلة وقالت الاكل برد ليه تاخرتن.. قمت وانا سرحان في الموضوع وما عارفه اعمل شنو... وبقيت طول اليوم وانا افكر اعمل شنو... بس ما كنت مركزة في حاجه حتى خديجة لاحظت وسألتني مالك؟.. قلت ليها ماف حاجه... وبليل ماقدرت اقعد معاهم بسبب تفكيري المشوش... ف قعدت في غرفتي افكر... وما قدرت انوم لي الصباح...
سلمى _♡_وصلنا البيت ودخلنا.. حسيت سعد مو طايق امه وانا زاتي ما طايقاها..ف دخلته الغرفه يرتاح وبقيت اهتم فيه وامه ساكته وكأنها ندمت على كلمتها بس الندم ما ح يغير حاجه..الكسرتو عمرو م بتصلح . دي ما تستاهل تكون ام اصلا كلامها زي السم...دخلت المطبخ اعمل اكل لي سعد.. جات لاحقني وقالت لي دا كلوو بسببك انتي السبب... قلت ليها شنو انا!.. قالت لي اي لانك دائماً بتحرضي سعد عليّ.. وبتحاولي تعملي مشاكل بينا.. قلت ليها.. عايني.. الحصل لي سعد بسبب كلامك القلتي بلسانك وما بتقدري تنكري عشان انا سمعتك وجاية تحطي الحق علي صح.. بس ما ح تقدري.. طلعت من المطبخ وخليتها منفوخه من الغضب.. دخلت الغرفه وقلت لي سعد قوم اكل.. بس رفض حاولت احنسه بس رفض.. الصراحه امه كلامها يسد النفس.. بس الله يصبرنا عليها... ♡
سديم ♡_ كل يوم بنوم وانا ابكي واصحى وعقلي يفكر فيهم بس ماف زول حاسي بي وعالم بي حالي الا الله سبحانه وتعالى.. فاللهم لا أسالك رد القضاء ولكن اسألك اللطف فيه... دائماً وانا افكر نهاية الموضوع دا ح تكون كيف!... طارق لا همه ولا خصه.. ما حصل وقف قدامي وسالني محتاجه حاجه ناقصاك حاجه!.. مرتاحه... بس بيعرف كيف ينكد علي وانا ما بشكي ابدا لا لي امه ولا لي اخته.. وكل ما اتكلم عن الطلاق يجيب سيرت القروس الدفعهم... ياريت لو عندي قروش ارميها لي في وشه وافتك منه.. ومن كلامه.. بس هل دا ح يغير حاجة؟.. ام طارق مفتكرة انو كل حاجه تمام ودي هواشات بتحصل بين الزوجين وبتقول لينا بكره تعقلوا وتتفاهموا اما ملاذ اخر فترة بقت مشغولة بجامعتها ودراستها.. الا متاب كانت بتخفف علي الملل وبتتونس معااي وبتحكي لي حاجات طفولية حلوة لدرجة اتعلقنا ببعض وبقى يومي ما بكمل بدونها.. ♡
نور _♡_ بعد ما فكرت كويس واستاخرت وشغلت عقلي اتخذت قرار عن قناعه بعد تفكير دام لساعات وان شاء الله ما اندم يارب... و بعد الظهر دخلت لي ام احمد غرفتها وانا مترددة لمن شافتني ابتسمت وقالت لي تعالي يا نور.. قعدت جنبها وانا عيني في عينها وقلت.. انا استخرت وفكرت كويس وقررت اني ح اوافق على الزواج.. ابتسمت وتلقائيا جرتني حضنتني وقالت لي كنت خايفة انك ما توافقي بس الحمدلله.. قعدنا شويه وهي فرحانه وانا اتمنيت لو عندي ذرة من فرحها ما عارفة ليه حاسة اني ما مرتاحة.. بقت تحكي لي عن احمد بحب شنو بكره شنو وحاجات كتيره انا في غنى عنها وما دايرة اعرفها اصلا.. المهم بعد شويه طلعت منها وخليتها ترتاح.. ودخلت الغرفه وبقى عقلي يودي ويجيب.. حسيت بالخوف لاني اتسرعت ووافقت بس في نفس الوقت انا مراة ضعيفة محتاجه زول يسندني من بعد الله.. بس كنت خايفة ومتوترة وحاسه اني اتخذت قرار متسرع وغلط بس برجع بقول لي نفسي اصلا حياتي كدا كدا مجهجهة.. وكلت امري لله والفيه الخير ربنا يقدمه لي..
بعــــــــــــــــــد مــــــــرور عـــــــدة ايـــــــام _♡_
سلمى _♡_سعد اتحسن وبقى كويس ورجع لي شغله بس بقى يتجاهل امه تماما وهي زاد كرهها لي وبتقول ان السبب بس انا ما كنت مهتمه بي كلامها.. مشاكلنا كل يوم شغاله في اتفه الامور.. وبقيت قادرة ادافع عن نفسي.. الصراحه شخصيتي الجديده دي عجبتني شديد يعني زمان ما كنت بعرف اقول كلمتين على بعض هسي بقيت ارد وما اسكت عن حقي وكل ما تحاول تطلعني غلطان انا اطلعها هي الغلطانه.... صح الفترة دي فيها مشاكل بس دي كانت احسن فترة لاني حاسة براحه ما حسيتها هنا من قبل...
سديم _♡_ما كان في جديد اليوم يمر عادي نفس الروتين واي شي بس كنا في ايام عطلت ملاذ نطلع السوق ومره الحديقة.. وباقي الاسبوع في البيت.. وفي يوم جوا اخوات ام طارق زيارة وبما فيهم يسرى.. كانت نظراتها لي ما زي الاول بس انا ما قادرة افهمها كويس.. حاولت اتجاهلها بس قدرت كنت مركزة معاها وهي مركزة معاي لحدي ما مشوا وهي نظراتها عليّ... بالنسبه لي طارق ما عارفه هنا شغال شنو مع انو شغلتو كلها في سنار بس ما علينا.. كان يطلع بدري ويجي متأخر ومشاكلنا خفت يمكن لاننا م بنتقابل كتير..
نور _♡_ من يوم م اديت ام احمد ردي وهم بدوا يجهزو للزواج وانا كل يوم يزيد خوفي واتردد بس كنت ماسكه نفسي.. بشوفهم بجهزوا وانا عايشه اسوا ايام حياتي.. حرب قايمه جوا عقلي.. وخايفه اكون اتسرعت واندم بعدين..