كيف بتوافقي... على عقد بطريقه زي دي..
سكتت وما عرفت ارد وانا عارفه نفسي مجبورة على العقد دا..
تابع وقال... طيب ما مشكله انا افهمك الموضوع.. شكلو ابوك م كلمك.. انا كنت ساكته وبسمع فيو.. قال.. احم انا اسمي طارق زياد من الخرطوم.. وشغال في المرور هنا في سنار... لي قريب خمس سنه هنا.. المهم امي مراة عندها قلب وضغط.. وكان عندها امنيه واحدة وهي انها تشوفني متزوج ومستقر انا كنت دائماً بتهرب من الموضوع دا كتيرر.. لحدي م في يوم وانا بتكلم معاها بالتلفون قالت لي انها ح تخطب لي بت خالتي البكرهها واشوف الموت ولا اشوف البت دي ماكنت بطيق وشها ف كيف لو اتزوجتها .. المهم من خوفي انو امي تمشي تسوي الفي راسها استعجلت وقلت ليها ي امي انا اتعرفت لي على بت في سنار هنا وعجبتني وعرضت عليها للزواج ووافقت.. المهم امي فرحت شديد بدون ما تهتم للبنت جنسها شنو وعمرها كم والتفاصيل دي كلها ما اهتمت بيها.. فرحت فرحه انا ما قادر اوصفها يعني انا لو عارف انو زواجي بفرحها كدا كنت فرحتها من زمان بس كنت مفتكرها خايفه اضيع عمري كلو ف الشرطه بدون ما اتزوج.. واتاريها عايزة راحتي واستقراري..
المهم بعد الكلام القلتو ليها.. بقت تتصل على طوالي وتسالني منها واقول ليها كويسه مع انها ما موجوده اصلا.. المهم كانت بتقول عايزة اتكلم معاها وانا بكضب عشان اتخلص من الموضوع.. واتكرر الموضوع كتيرر وكتيررر لحدي ما اتصلت علي امي في بداية الاسبوع دا وقالت بصوت غريب وكانها بترجف.. اني لو جبت خطيبتي البقولها دي وشافتها بعينها.. ح تمشي تخطب لي بت خالتي.. ولو امي عملتها انا ممكن انتحر عادي.. لاني مستحيل مستحيل اعيش مع انسانه زي دي..
ف عشان اتخلص من الموضوع دا كان لازم اشوف لي بت اخليها تمثل انها خطيبتي وكدا بس لمدة الايام البنمشي ونجي تاني انا بتصرف لسوء الحظ م لقيت.. بس استشرت اصحابي وواحد فيهم من نفس منطقتكم قال لي انو ف راجل اللي هو ابوكن ممكن اجيب واحدة من بناتو لانو قالوا ابوكن بحاول يتخلص منكن.. المهم يكون في قروش..
هنا انا دنقرت راسي من الحسرة والوجع..
ورجع واصل كلامو.. وقال.. المهم عجبتني الفكره ومشينا في نهاية الدوام المنطقه بتاعتكم.. وقابلنا ابوك وحكيت ليو مشكلتي وعرضت ليو مبلغ محترم وقلت ليو مسالة ايام بس.. بس رفض تماما وقال لي عايزة واحدة.. تعقد عليها وتاني ما اشوف خلقتها عندي.. الساعه ديك انا قفلت معاااي وقمت على حيلي وقلت انت بتلعب ولاشنو بقولك عندي مشكله عايز احلها وبتك امانه ف رقبتي تجي تقول لي اعقد عليها.. انت قنعان من بناتك للدرجه دي.. ابوك رد بهدوء وقال دا كلامي العندي غير كدا ما بقبل... المهم مشيت وانا غضبان.. رجعت المخيم وانا افكر ف حل تاني.. اجتمعوا حوليني اصحابي واقترحوا على الفكرة الاولى تاني بس عدلوها.. وهو اني اوافق اعقد عليها.. واحتمال امي تصر اننا نتزوج وعشان الموضوع يتحسم مره واحدة واخلص منو.. .. ح اعدي شهور واطلقها واقول لي اهلي انو ماف نصيب والموضوع ينتهى.. وقالوا لي بكدا بنت خالتك تاني م ح تعاين ليك لانها ح تقول انك زوج م كويس وح تعمل فيها زي ما عملت في دي.. المهم الفكرة عجبتني شديد يعني انا مستعد اخاطر مخاطرة زي دي بس عشان اتخلص من بت.. بت لا بتشبه البنات العياذة بالله... المهم قمت اليوم التاني ورجعت لي ابوك واتفقت معاه واديتو مبلغ محترم.. وقال لي تجي بعد يومين اعقد ليك عليها وتسوقها.. وياهو بعد يومين جيت وعقدت عليك وحصل الحصل وهسي مسافرين الخرطوم قبل نهاية الاسبوع.. عشان نخلص الموضوع دا...
انا كنت في عالم تاني تماماً دا شنو.. لا! يعني موضوع الزواج هين للدرجه دي ولي اسباب تافهه زي دي .. انا ما قادرة استوعب دا مجنون ولا نصيح. نعم ابوي طماع وبريد القروش وبعمل اي شئ عشانهم بس دا برضو مجنون زيوو..يالله دي حياة..دي..لا كيف يعني امشي امثل انا ناقصه..قطع تفكيري صوتوا وقال..ح ننزل مول قريب..واجيب ليك ملابس محترمه..اتحركت العربيه تاني وبقينا ماشين.. حسيت بالاهانه والذله وبقيت ابكي ف صمت..حسبي الله فيك ي ابوي..ياتو نوع من الاباء انت!...صدقت عمتي لمن قالت انو ابوي ببيع فينا بيع.!
حاسه اني لعبه بين يدينهم.... يا الله دا شنو... انا ما قادرة استوعب حاجه.. فجاءة العربيه وقفت قدام مول كبير وفخم وكان على طريق عام عاين لي وقال لي انزلي...
صرخت بصوت عالي وقلت انا ما لعبه بين يديكم عشان تجي انت وتشتريني .. ليه عايزين تفرضو سيطرتكم علينا.. نحنا ذنبنا اننا ضعيفين بس.. لاكين ما عندكم الحق تعملوا لينا كدا...
كنت بتكلم من غيظي وغضبي... حتى يعني ما اتوقعت اني ممكن انفعل كداا.. فجاءة صرخ فيني بصوت عاالي وقال... قلتي شنو؟... اسمعي هنا ي بت الناس الكلام دا تمشي تقولي لي ابوك ما لي انا فاهمه.. وبعدين انتي من قبيل ساكته جايه تتكلمي هسي ليشنو.. العقد وقلتي موافقه تاني في شنو.. انا دفعت لي ابوك دم قلبي.. وتاني الكلام دا تقولي لي ابوك..
لي لحظه حسيت اني رخيصه.. رخيصه شنو حسيت اني ما عندي اي قيمه.. اهانه ولله.. وما عندي ولا حتى عزة نفس ولا حتى حبة كرامه كلهم خسرتهم ما قادرة ادافع عن نفسي وكلوو بسببك ي ابوي ذليتنا وبعتنا عشان القروش...
سمعت صوته وكانه هدأ حبه وقال.. يابت الناس.. انا وريتك مشكلتي ف عشان كدي انا واصله معاااي للنهايه.. دحين انزلي وخلينا نخلص الموضوع دا.. عاينت ليه بكره عجيب مع انو السبب الاساسي ابوي بس هو لو اختو حصل ليها كدت هل حيرضى.؟ عينو لي مجبورة مفترض يكون راجل ويرفض.. دموعي بتحكي قدر شنو معذبه وقدر شنو ضعيفه بس للاسف اخر همو بس عايز يستغلني عشان يخلص نفسو من كذبه كذبها.. وانا ذنبي شنو ف دا كلوو... الله يسامحك ي ابوي...! الله يسامحكم!
رجع تاني اتكلم بضيق وقال.. زي ما وعدتك كلها مسألة اسبوع بس وبطلقك وبجيبك لي ابوك تاني اعملي العايزة..
مسحت دموعي بطرف يدي بسرعه واتنفست بهدوء.. وعاينت لي بقوة مع انو ما من طبعي.. وقلت.. طيب وانا مستعدة اعمل ليك العايزو بس بشرط.. عاين لي كدا وقال شنو؟...