سلمى
يوم بليل قاعدة ف غرفتي وسعد جاء داخل قعد شويه وبقينا نتكلم عن مواضيع مختلفه... سكتنا شويه وقلت لي سعد!.. قال اي قلت لي عندي عندك طلب بس م تردني.. قال لي قولي ولو بقدر ابشري طلبك فوق الرأس.. عاينت لي وانا بديت ابكي.قلت لي.... قال لي بخوف مالك؟.. قلت لي اخواتي يا سعد لي شهرين ونص م شفتهم وانا طول الفترة دي ما قادرة ابعد تفكيري عنهم.. حلفتك بالله يا سعد توديني اسلم عليهم.. سعد حسيته اطرب شويه وبقى يفكر وقال بس يا سلمى.. قاطعته وقلت.. لو كان عندي معزة عندك ما تردني.. تابع وهو يمسح وشه وقال ابوك يوم عقدت عليك خلاني اوعده اني ما اجيبك ولا ارجعك ليو تاني.. ما انصدمت ابدا ابوي وعارفه كويس قلت لي انا عايزة اشوف اخواتي يا سعد.. قال لي وابوك قلت لي ح توديني ولا لا؟.. فكر تاني وقال طيب ان شاء الله بكره بوديك بس اتمنى ابوك يتفهم وم تحصل مشكلة يارب قلت لي ان شاء الله.... سألت سعد لو ابوي حصل لاقاه قال لي لا والله من يوم عقدنا وتاني م شفته.. قلت لي ايواا..
يعني أخيراً بكره بشوفهم أخيراً!.. اتحمست وفرحت من جوا قلبي.. نمت وانا طايرة من السعادة عشان وأخيراً حان لقاء الاحبة! ♡
سديم _♡_
جاني وجع راس وانا قاعدة مصنقرة لي نص الليل.. واقول في نفسي دا عرس دا ولا سهر.. المهم طارق اصلا كان قام من جنبي لمن نادوه الرجال وبقيت قاعدة انا مع النسوان يعاينن لي ساي طبعاً عيون تشع من الحسادة وعيون مقهورة وعيون منبهرة ومندهشه وانا عيوني افتح فيهن واغمض فيهن من النعاس.. شفت ملاذ وناديت ليها وقلت ليها بصوت واطي.. حدكم وين انا والله خلاص م قادرة قالت لي مالك؟.. قلت ليها نعسانه قالت لي يابت يادوب الساعه 11قلت ليها ياخ ان شاء الله 8 انا نعست قالت لي طيب اصبري شويه قلت ليها بطريقتك والله انوم هنا دا هسي.. ضحكت وقالت لي طيب نص ساعه لانو الناس زاتهم بدوا يمشوا قلت ليها تمام نص ساعه ولا بزيد فيو ولا ثانيه...
النسوان بدوا يمشوا لحدي م البيت فضى وبقى في اخوات ام طارق وبناتهم وعمات ملاذ سمعت ملاذ تقول ليهم عن اذنكم يعني ح اسوق العروس فوق عشان تعبت الليله قالوا ليها م مشكله عادي.. وجاتني قالت لي اها ارح.. طلعنا فوق ومشينا بالجهة التانية قلت ليها والله انتي نعسانه اكتر مني.. الغرفه بجاي يا فهمانه عاينت لي كدا وقالت يابت غرفة طارق بجااي قلت ليها طارق دانا منو.. ايواا قصدك اخوك.. وخير ان شاء الله غرفتو دايرين بيها شنو.. ملاذ اتنهدت وقالت لي مش انتي مرتو قلت ليها يمكن او نص نص.. ضحكت ملاذ بصوت عالي وقالت والله!... قالت مش انتو اتزوجتو رسميا يعني ح تكون غرفتكم مشتركه.. قلت ليها نعم!.. قالت لي ي سديم انا عارفه انكم م متقبلين بعض لكن ان شاء الله ح تتعودوا على بعض .. قلت ليها يا ملاذ انا مستحيل اشترك غرفه مع طارق ارح نرجع الغرفه القاعدة انوم فيها اصلا.. بس ملاذ بقت تحنس فيني وتتكلم معااي وانا رفضت خاالص..
المهم بعد قريب نص ساعه اقتنعت بعد ما قالت لي انو ناس خالاتها وبناتهم ح يبيتوا الليله في البيت وما عايزنهم يشكوا ف الموضوع.. فكرت شويه وقلت ليها تمام بس الليلة دي قالت لي تمام تاني حلو بينكم.. قلت ليها والله لو قعدنا عشان نحلو بيناتنا اكيد واحد فينا ح يموت ضحكت وقالت لي طيب يلا خشي ارتاحي مش قلتي نعسانه قلت ليها ميته من النعاس.. مشت ملاذ وانت فتحت براحه غرفة طارق ودخلت فتحت الضوء كانت مرتبه ومنظمه وريحة رجاليه فايحه في الغرفه وكانت واسعه قدر غرفتين..ما كنت قادرة اقيف اكتر وطوالي رميت نفسي في السرير الكبير الواسع.. بفستاني.. والسرير كان ناعم ودافئ ونمت بدون وعى لانو كنت ميته من التعب!...
نور _♡_
طبعاً شغل البيت اتقسمناه انا وخديجه زايد انا بهتم بي ام احمد بس يوم خديجة جات متاخرة وما لحقت تخلص شغلها فقلت ليها انا ح اساعدك.. طلبت مني انظف الغرف وهي ح تطبخ قلت ليها تمام.. اصلا الغرف البتنظفهم ثلاثه قصدي يعني الغرف المستخدمه اما الباقيات مقفلات اصلا.. شلت ادوات التنظيف وبديت بغرفة ام احمد نظفتها ورتبتها ورشيت فيها معطر جوا.. بعد طلعت افتش للغرفه المستخدمه التانيه اللي هي غرفة احمد.. لقيتها.. دخلت فيها وكانت كل حاجه فيها الوانها رمادي اسود بني خاليه من اي الوان ملفته.. المهم بديت انظف مسحت الارضية كلها ولقيت في السرير ملابس طبقتها وفتحت الدلاوب ادخلهم دولابه كان خيالي بمعنى الكلمة.. يعني لمن فتحته حسيت نفسي ف سوق.. عطور وبدلات.. وحاجات كتيرة لفت انتباهي دفتر صغير لونه بني تحت الهدوم.. جريته براحه وفتحته كان فيه صور لنفس البت قصدي مرتو الاسمها زهرة ومذكرات وكلام قفلته بسرعه وحطيته مكانه وقفلت الدولاب.. وقلت لنفسي دا شنو البسوي فيوو دا ياالله.. اول كذب ولف ودوران وهسي فتيش في حاجات الناس.. استغفر الله.. بقى شنو وتاني م عملتو.. من متين وانا كدا.. اوفف... اتنفست بصعوبة ورجعت لشغلي وكملت التنظيف والترتيب وغسلت الحمام وشلت الملابس المحتاجه غسيل لمكان الغسيل واخر شئ نظفت الغرفه البقعد فيها انا.. وكدا خلصت رجعت لخديجة لقيتها عملت الغداء وكملت باقي شغلهاا..
بليل.. كنا انا وخديجه وام احمد قاعدين ف الصالون نشرب في قهوة ونتونس كانت القعدة ظريفه وحلوة... ما حسينا بالوقت لحدي م سمعنا الباب فتح وانا طوالي لفحت طرحتي.. جاء احمد داخل وسلم علينا وهو يعاين لي امه بفرحه ومبتسم.. مشى ليها باس راسها.. خديجة قالت اتلقي جيعان يا ولدي قال شديد اكل المطاعم م بحبو.. قامت خديجة قبلت علي وقالت قومي يانور حضري لي الغدا انتي حركتك خفيفة.. لمن قالت كدا حسيته اتفاجأ شويه بس ما اظهره لاكين انا انتبهت.. قمت طوالي ودخلت المطبخ سخنت الاكل وعملت سلط وحطيت ليو الاكل ف السفرة بعدها جاء داخل وقعد ياكل انا طوالي رجعت للصاله ولقيت ام احمد قامت وقلت لي خديجة.. يلا تصبحي على خير... قالت انا ح اعمل قهوة لي احمد واطلع طوالي قلت ليها تمام ومشيت دخلت الغرفه صليت العشاء ونمت نوم عميق بعد تعب طول اليوم...