رواية احببت وانا علي ذمة اخر الفصل الثامن والعشرون 28 بقلم نوسه حمد
يوم ماشه الشغل لاقتني عبله في وشي لمن شفتها لمن خوفتا وبقيت اتعوذ وفي سري بقيت اقرا الفلق والناس والاخلاص واحصن في نفسي عشان عارفه نيتها شنو قالت لي كيفك قلت ليها الحمد لله وابيت اقول ليها اتفضلي عشان تعمل لي مصيبه في بيتي قالت لي م ح تقولي لي اتفضلي قلت ليها اتفضلي وبقين ادعي في ربنا م تعمل لي شي وفضلتها ودخلت ورسلت لبتي رساله قلت ليها قومي بي اكراميتها من غير انا م اقوم منها عشان دي عبله المهم قالت لي انا م جيت اعتزر ليك قعدت اضحك قلت ليها ولا عايزاك تعتزري لي وتعتزري لي علي شنو ولا شنو اتفضلي عاوزه مني شنو طارق وخليتو ليك قعدت تضحك قالت لي طارق ياااااه انتي مفتكراني ميته فيهو ولا حبيتو من اساسو انخلعت من كلامها قلت ليها وقت م حبيتي دخلتي حياتو ليه وقصدك شنو بعد عملتي فيني اي شي وخربتي بيتي وكسرتيني في السرير وناسيه انو ربنا موجود ومهما عملتي فيني ربنا معاي وصبرتا ونلت جزاي الحمد لله بس انتي استفدتي شنو غير انكتبت عليك سيئات قالت لي استفدت لمن اشوفك متعذبه ابقا انا استفدت قلت ليها اعوذ بالله من الحقد الجواك عبله ناهيك عن الضر الكان بينا انتي نسيتي اني كنت اختك وصديقتك البنقوم ونقع مع بعض قالت لي كلو تمثيل عمري م حبيتك قلت ليها الله اسامحك وما كنتي مجبره انك تمثلي علي وبعدين الحقد دا كلو فشنو قالت لي م جربتي احساس انك تتولدي وما تلقي البتاكليهو ولا البتلبسيهو والناس قدامك اهلهم غنيانين وعايشين في عز قلت ليها ياخ حرام عليك دا كفر منك بدل تعملي مكايد للناس وتحقديهم اتخرجي واشتغلي والما قدرو علي اهلك جيبي انتي وانفعيهم وانفعي نفسك قالت لي اتعب ليه وانتي لقيتيها جاهزه قلت ليها دي قسمتي كده وانتي قسمتك كده وعمري م عاينت لي اني انا عندي وانتي م عندك كنت في كل المواقف يا عبله بقيف قدامك وبدفع انا والبشتري بجيب ليك زيو قالت لي عشان تحسسيني بالنقص ما حباً فيني قلت ليها حرام عليك ربنا عالم بالنوايا عمري ما فكرت للبتقولي فيهو دا وما اتوقعت انو قلبك اسود من ناحيتي وما اتوقعت انو الجواك دا كلو عشان انا قومتا ولقيت عندي وانتي لا عبله كان اهون ليك تشحديني عديل وبدل تعرسي طارق اطلبي مني ابيع حقي ونعمل مشروع ونستفيد الاتنين اقسم بالله م كنت خزلتك بس للاسف انتي عميتي بالحقد انا عمري ما ح اعفي ليك والحمد لله انا حياتي ماشه مهما عملتي لي ربنا معاي وهسي جايه لشنو قالت لي جايه اقول ليك صدقيني م ح تتهني لا انتي لا بتك قلت ليها بتي دخلها شنو اوعك يا عبله تلعبي معاي في بتي عشان لو لمستي بتي اقسم بالله ي عبله ح تشوفي نسيبه غير الواقفه قدامك دي قعدت تضحك بي استفزاز قالت لي ح تعملي شنو قبل اليوم وصلتها قدرتي تعملي لي شي قلت ليها وصلتيها وكنت منفعله قلت ليها عملتي لبتي شنو حسبي الله ونعم الوكيل قعدت تضحك قالت لي اسالي راجلك قلت ليها انا م عندي راجل وحسبي الله ونعم الوكيل فيك وفيهو ما بتخافو الله نور ذنبها شنو في قصصكم دي قالت لي وفري طاقتك ف الكلام واسمعيني للنهايه انا م ح المس بتك بس علي شرط قلت ليها شنو قالت لي تحولي لي كل القروش الرسلهم طارق ليك قلت ليها القروش مفتكراهم ح ينفعوك قالت لي م شغلتك اديني القروش وح اختفي من حياتك للابد رايك شنو وح اديك مهله يومين دا رقم حسابي وسلام طلعت وراسي بقا ملان اسئله عبله عملت لي نور شنو مشيت لي طارق قلت ليهو طارق انت وعبله عملتو شنو لبتي حسبي الله ونعم الوكيل فيكم طارق قال لي استهدي بالله نور مالا وعبله مالا تاني جبتي سيرتها كنت ببكي طارق قال لي نوسه اسكتي وفهميني فشنو قلت ليهو عبله جات تهددني يا احول ليها القروش الاديتهم لي يا تعمل حاجه في بتي زي المره الفاتت وسالتها عملت في بتي شنو قالت لي اسالي طارق طارق انت تتفق مع عبله علي بتك حرام عليك اقسم بالله كل مره بكتشف انك ما تستاهل انظر ليك خلي كمان اتزوجك قال لي نوسه شكرا ليك وبعدين افهمي الكلام اول تتزكري لمن بتك اختفت قلت ليهو اي قال لي شالتها عبله واستفذتني زي م جات استفذتك هسي وطلبت مني مبلغ كبير عشان تديني ليها وانا اديتها العاوزاهو قلت ليهو حرام عليك انت اتعاملت معاها كانك كنت مشترك معاها كيف تهددنا بالطريقه دي نحنا في مسلسل هندي دي مجرمه يا طارق انت ليه تغطي عليها قال لي غطيت عليها عشان اولادي ما عايز احرمهم قلت ليهو انت يعني شايفها ام بتستحق اسامحوها سكت م ردا علي قلت ليهو الحمد لله ندمتوني علي اي شي ولو ما خايفه ربنا كان قلت ليك ندمت اني اتزوجتك بس لي قسمه اولادي والحمد لله اني اطلقت انت ما الراجل المفترض اعيشو معاهو وكنت محتاره في رده فعل هديه بس لقيت هديه معاها حق واسمع يا طارق اولادي تجيهم في حضوري بس انك تسوق معاك نور دي مستحيل ولو سوقتها ببلغ فيك ما اتكلم معاي ومشيت خليتو اتصلت كلمت اخوي اخوي بقا اتعوذ منها قال لي اسمعيني سافري في اقرب وقت الزوله دي انا قلبي اباها دي عصابه عديل قلت ليهو جواها حقد اتجاهي م طبيعي قال لي عشان كده اتوقعي منها اي شي واتسرعي في السفر قلت ليهو تمام ح اتصل لي رامي قال لي جهزي حالك احتجتي لي اي شي انا موجود قلت ليهو تمام رجعت البيت اتصلت علي رامي وحكيت ليهو بي عبله وتهديدا لي واتغاظ منها شديد قال لي نوسه عبله دي لازم اصل معاها لحل م ح تخليك في حالك لو طال الزمن ولو قصر قلت ليهو رامي م تخوفني انا براي خايفه منها قال لي تخافي كيف وانا قاعد انتي نسيتي البعملو انا والله اطبق فيها نظريه اخليها تمش وتكلم نفسها قلت ليهو م عارفه بس نفسي انتقم منها قال لي انتي خليك نوسه الطاهره الطيبه الحنينه وخليها علي انا قلت ليهو تكون م قصرتا قال لي ع العموم اوراقكم جاهزه حاولي ظبطي الوضع ونحنا هنا في انتظارك قلت ليهو ظابط رجعت لي اخوي فهمتو ومشيت الشغل شيلتا اذن وودعتهم ومشيت كلمت هديه وقالت لي جايه اودعك اتصلت كلمتا مهيد قلت ليهو اسمعني هديه جايه رايك شنو نطلع مكان كلنا ومنها وتتعرف عليها لكن انا م ح اقدر اقول ليها قال لي بس ظابط هي جايه متين قلت ليهو جايه بكره قال لي انا بعمل لي برنامج ليكم بكره انتي واولادك واخوك واعزمكم في مكان قلت ليهو ظابط
هديه جات وقالت لي اخوي ف الاول رفض بس لمن عرفك مسافره جابني ليك بي نفسو وبقت تحكي لي قالت لي طبعا نزلت مدرسه ورغم انها مع بتي صعبه بس كل م اتزكر انجازاتك اتشجع ونفسي اكون زيك انتي قدوتي يا نوسه قلت ليها هديه صدقيني ح تكوني احسن مني انتي تستاهلي كل خير قالت لي وانتي كمان وان شاءالله يا نوسه ربنا اديك علي حسب نيتك انتي طيبه شديد قلت ليها امين وطبعا م حكيت ليك قالت لي شنو قلت ليها عبله جات وهددتني يا اديها القروش يا تعمل حاجه لبتي قالت لي عبله دي عباره عن شيطان يا نوسه اساليني منها انا وطارق كان بخاف عليها كانها ماسكه عليهو حاجه وتتزكري لمن بتك كانت ماف هي الساقتا واستفزتو وما عارفه قالت ليهو شنو وطارق بقا متوتر نوسه م عارفه اقول شنو بس في شي غريب في علاقت طارق بي عبله انا من الله خلقني م شفت زول بخاف من مرتو زي طارق وما خوف هلع عديل عشان كده قلت احسن لي اقعد كده مطلقه م ارجع لي واحد بخاف من مرا انا عايزه الراجل البخافو منو م البخاف قلت ليها م عارفه بس ي هديه انا زمان كنت عمياء عديل وماشايفه فيهو اي عيب قالت لي لانها كاتباك تشوفي كيف ومستفيده من قروشك قلت ليها ياخ الزوله دي حاقده علي حقد وندمتني اني صاحبتها وما كل البتصاحبو بستحق رغم اني مرات بستكتر علي نفسي الحاجه وبديها ليها بس كنت هبله قالت لي معليش انتي حصدتي نيتك وهي ح تحصد نيتها قلت ليها الحمد لله بس
رامي قال لي نوسه طبعا هكرت صفحتها وقلت اشوف فهما شنو ولقيتا متراسله مع واحد كان شفتو مع مرت خالد وما عارف الحاصل شنو بس الزول دا بهدد فيها وطالب منها مبلغ قصاد يخليها في حالا عشان كده الزوله دي جات تفتش ليك عارفه انها م عندها وظيفه عشان تجيب قروش والشي الجذبني الولد بعرفك قلت ليهو بعرفني بعرفني كيف قال لي م عارف لانو قال ليها امشي جيبيهن من الجلابيه بتاعتكم ومرسل ليها صورتك لمن كرموك وشكلها هي النار ولعت فيها وداير اقول ليك م تخافي بتك خليها جنبك ولو جاتك تاني من غير م تحس سجلي كلامها كلووووو وعلي الدردشه الحظرتها دي ما ح ارحمها قلت ليهو طيب اقول ليها شنو قال لي قولي ليها كده وكده وحاولي جرجريها في الكلام طلعي كل الحقد الجواها قصادك المهم عاوز تسجيل اوديها السجن عشان تتادب مدام راجلك زمان م ادبها ادبيهاا انتي وما تخافي منها انا معاك ويومك التسجلي ليها ولا تمشي الشرطه انا بجيب ليك صاحبي ضابط حدي عندك وبفهمو اي شي وبرسل ليهو عمايلها كلهن وعلي فكره الزوله دي شغاله في الدعاره وبتطاد بنات بقيت اتعوذ منها قال لي ما تخافي بس انا ماسك عليها حاجات كتيره م ح تقدر تهبش بتك والبقولو ليك كلو تعملي ودخلي اخوك في الصوره
قفلت منو وحكيت لي هديه قالت لي مبالغه لكن بري انا خوفتا قلت ليها انا خايفه اكتر منك وصدقيني لو مشيت السعوديه تاني م جايه هنا تقوم تعمل لي بتي شي قالت لي جنيتي انتي تخلي ليها بلدك اوعك مصيرها تقع قلت ليها قولي ان شاءالله بس
مهيد تاني يوم اتصل وقال لي حجزت لي في مكان عائلي ظريف تعالو الساعه ٣قلت ليهو ان شاءالله قلت لي هديه زميلي عامل لي حفله وداع ح تمشي معاي رفضت قالت لي لا لا امشي انتي اخدي راحتك معاهو احتمال اكون معجب انا ابقا ليكم شوكه حوت بي قلبي قلت ليها ما عارفاهو معجب بمنو قلت ليها مستحيل مهيد دا زي اخوي زول لو شفتي زوق ومحترم شديد واخوي ماشي معانا لمن قلت ليها اخوي ماشي معانا قالت لي تمام بمشي مدام كده اديتا ملابس مني وظبطتها شديد لمن م عرفت نفسها وانا زاتي قشرت قشره من امها ولبست اولادي اخوي قال لي بمش قدامكم قلت ليهو تمام طالعين كده لاقانا طارق في الشارع سلم علينا وما طال النظر فينا هديه طوالي ركبت ف العربيه ولا ردت السلام قال لي جيت اشوف فارس ونور قلت ليهو معليش الليله معزومين تعال يوم تاني بعتزر شديد قال لي لا لا عادي وخلي بالك من نور م تبعد من جنبك حسيت بي خوف م عارفه ليه طارق اكتر واحد عارف شر عبله وحسيت الهم في وشو قال لي ح تسافري السعوديه متين قلت ليهو قريب باذن الله قال لي تمام محتاجه حاجه قلت ليهو لا لا شكرا ليك قال لي امسكي ديل مصاريف اولادك وادي القروش ديل لي هديه مصروف بتها قلت ليهو لا لا والله انا عارفه ظروفك وانا شغاله م محتاجه قال لي حتي ولو انا دا واجبي امام ربنا وفات قطع قلبي قطع اديت هديه القروش حلفت ابت تشيلن قالت لي بتي بعرف اربيها واخوي م محوجني
مشينا لقينا مهيد منتظرنا في الشارع واخوي معاهو طبعا مهيد اشيل واتكبكب فينا وعدينا يوم حلوو وكان مبسوط ورجعنا المساء رسل لي رساله قال لي تتصرفي تديها رقمي تديني رقمها بس المهم تتصرفي قلت ليهو طيب لي بكره بنتفاهم وهديه كانت مبسوطه شديد بس حصلت حاجه طممت بطني اخوي الصباح اتصل علي قال لي عاوزك في موضوع قلت ليهو خير ان شاءالله قال لي لو جنبك زول زحي منو عشان الكلام دا م يسمعو زول قلت ليهو زحيت قول وضربات قلبي زادت قال لي نوسه انا قررت اتزوج قلت ليهو انت جادي دا كلام شنو لا لا عليك الله م تفتح علي نفسك ابواب جهنم قال لي ما شغلتك انتي ما تقولي لي العروس منو قلت ليهو العروس منو دي ان شالله بعرفها قال لي بتعرفيها حق المعرفه قلت ليهو منو قال لي هديه لمن راسي لفه وبطني طمت …….