رواية في ذمة الغريب الفصل العاشر 10 بقلم كنوز

رواية في ذمة الغريب الفصل العاشر 10 بقلم كنوز

لعبة بنص مگبرة 

وصياح سحارات 

واليشرب الدم والتاجر بعرضة 

وذنب گتل الطفل و الهجج امه بچول 

اذا رضا الخالق انا ما ارضى 

━━━━━━━━━ ⚖ ━━━━━━━━━

وگعن الرارنجات من ايدي و تملكني الرعب لحظتها راسي يدور ع جهتين وين أركض وين اروح صوت الصافرة مال سيارات شتت فكري 

اريد اركض بس رجليَّه ثلگن گوه انگل رجلي عبالك شاديهن بيهن احبال و مثبتيهن للگاع 

من حرگت روحي صرت اضرب عليهن حيل واحجي وياهن ولجن امشن اجه آمين بس شافني شال ايده و غمني 

امين :: امداج العوبة.. الفاهية 

لطمت ع وجهي شنو الذنب السويته ويصير بيه هيج مر من يمي يضحك و يغم بيه 

باوع ع سيارات الشرطة ابداية البستان و الطريق كله طسات لذالك يمشن ع كيف 

رجع باوعلي عاگد جبينه انمحت ابتسامته و عدل وكفته چان مشله  باسنانه نزل ردان القميص و مد ذراعة كدامه 

:: كضي أيدي زين .. ذبي ثگلج عليَّه وامشي 

فتحت عيوني ع وسعها كلامه تصرفه مو مال مجنون ابد بس ماعندي وقت افكر أكثر جلبت بيه وهو يجر بيه اكو حديقة جبيرة بس محاوطة بسياج سعف والها باب هم 

هي أقرب شي دخلني و سد الباب گعدت ع كاع رجليَّه تخدرن بعد ما احس بيهن

الحديقة عبالك ومضة من الجنة أشكال النباتات و الورد بيها و ترتيب يخبل نظيفة وحتى أوراق النباتات ممسوحة مبين صاحبها شكد يعشق النباتات 

باوعت اله واگف متواري ورا الباب و فجة بالسعف يباوع منها مستحيل هيج تصرف يبدر من شخص عقله بيه خلل صد الي براسه يضحك 

:: جاين ع اخوي حيدر راح ياخذونه

ما اعرف اصدگه لو لا وهو من شافني انتبهت اله و ع تصرفاته رجع خربط وضعه غمني و يروح هيج و يرد هيج يركض و يگمز 

آمين : بين خدها و الحاجب حضارة 

زحفت ارجي ظهري ع حايط انتظر الخدر يروح مني و سئلته اريد اتأكد منه عاقل 

:: منو هي... البنية التحبها 

بوز شفايفه صافن و إصبعه ع صدغه يتصنع التفكير 

آمين :: لا موش انا هذا غفار يكول هيج غفار.. غفار.. غفار انا سمعته يگول لسجدة هيج سجدة.. سجدة.. سجدة 

يضحك  و يكمز يكرر الاسم أكثر من مرة.. مرة اشوفه شخص عاقل مرة مجنون معقولة عنده انفصام بالشخصية 

:: اگللج شيگول غفار بعد.. اگولن انا كلشي احجي ما اضمن شي 

:: شيگول 

عافني و طلع واني لطمت ع وجهي اصيح ورا تعال وين عفتني عيوني تشرگلت ع الباب برعب شوية و رجع بيده كتاب كعد ربع كدامي وكلما يفتح الكتاب يرجع ينسد عقج وجه عليَّه و بلهجة أمر 

:: كضي وياي عاونيني 

لزمته اله وهو يبلل اصبعه بـ لسانه و يگلب بأوراق الكتاب بقى دقايق يگلب وكل شوية يگول

::  جانت هنا والله جانت هنا انا شفته من كتبها 

لاحت ابتسامة خبيثة ع وجه دار الكتاب الي قريت المكتوب 

" نزاحت الغيمة الجبيرة و أشرقت شمسي" و جواها مكتوب جمبذة و محاوطها بدائرة 

يباوعلي بحماس وهو يطشر أسرار ابن خاله باوع ع باب بحذر و رجع دنگ يهمس بصوت خافت 

:: هاي العاشگها غفار يسميها جمبذة ..... اي اي جمبذة غفار غفار غفار 

سديت الكتاب بساع احس فشلة وعيب هاي خصوصية بقيت استفسر من آمين الهي نفسي 

:: تعرف تكتب وتقرا 

:: اي أعرف بس ما اگدر اكتب بعد هو گص أيدي الاكتب بيها 

عقلي بساع ضرب ع ابو المحابس و السجاجين العنده چنه گصاب 

:: منو هو.. غفار گصها 

:: لا لا موش غفار.. غفار خوش زلمة حبوبي 

:: لعد منو گص ايدك 

:: واحد حقير.. غدار  گصاها جي بكت الأوراق منه وديتهن لـ خالي 

:: خالك!! 

:: اي خالي حاكم جبير بالجيش كلش جبير... حلو خالي انا احبنه حنين غير عنهم 

:: آمين جنت تساعدك خالك بالقضية 

بسوالف التحقيق افتح لان دائما اتابع افلام جريمة و بغير شي افهي وهو من حس لقطت السالفة منه غمني 

:: امداج العوبة... الفاهية 

::يااا ولك 

خنست من صوت السيارت تقربت و صوت الشرطة انتشر بالمكان حسيت گلبي وكع من افتح الباب اجيت اصرخ و سكتت من شفته هو باوعلي و رجع باوع لـ لـ آمين احتل الغضب ملامحه 

:: شسوي هنا ولك 

أكو صوندة بالگاع مشكلة بالحنفية شلعها واجه بساع ع آمين لسعه بيها ويضرب بيه 

:: عوفه حرام عليك والله ليش تضربه هيج.

اصيح بيه وهو مستمر يضربه هدور گعد ع صدره و شبعه بوكسات زحفت احبي مثل الطفل اعت بقميصة حتى اوخره عنه 

:: وخر عنه شبيك تخبلت مو حتى نشليت من وراك هاي عود انت سيد وهيج تسوي حتى الامام علي ع بريئ منك 

وكفت ايده و دار راسه عليَّه باوعلي شلون كاعدة ما اگدر اوكف ابتعد عن آمين عاگد جبينه 

:: نشليتي!! 

:: اي من وراك 

:: شني نشليت شو گومي اوكفي بله 

:: شوكف دا اگلك نشليت 

بقيت مصرة ع كلامي حتى اشتت انتباه و ااشر لـ آمين بعيوني اطلع بس ذاك بقى واكف مثل الصنم و فاتح حلگه يضحك ولا كأن قبل شوية نضرب ضرب ما صاير 

مدري شلون انتبه علينا 

:: اوكف انت بمجانك وانتِ شمالج شنهي نشليتي 

:: مابيه شي هسه اروح اخذ علاجي و اصير زينة... بس الشرطة..

::  موش عليج لا تخافين ع حيدر ابن عمتي جي متعارك بالشغل و قايمين دعوة عليه 

:: يعني كلام آمين

هز راسه اي 

::و هسه  لنفرض عليج من كل عگلج اخليهم ياخذونج كفيلج الله يسحكون ع جثتي وهم ما يوصلونج  انتِ موش امانتي لوحدي صرتي بذمة ال هاشم و لو گتلوا زلامنه تفزعلج النسوان 

:: ما اريد احد يموت بسببي بس اريد اخلص من هاي القضية ابتليت ع عمري ساعدتها 

:: تخلص والله انا متابع القضية و عندي واحد عرف صاحب ابوي وصيته يشوف السالفة حتى افتهم 

:: صدك والله و ارجع لبيت اهلي 

:: اي والله بس شنهي جنج مستعجلة ع الرجعة 

:: لعد شسوي ابقى هناية اريد اهلي 

:: هااا موش البنات تعودن عليج و حبنج 

:: اي عادي يجن اليه واني اجيهن هم 

:: و تبقين انت وياهن رايحات رادت لا ما ترهم 

:: لعد ترهم اعوف بيت اهلي واكعد هنا شبيك انت

:: انا ارهمها ماعليج 

صفنت لا والله بيه بيه شي يحجي حجي ما معقول بس هو مقتنع بيه و يگوله بثقة هم ندار ع آمين و رجع غضب 

:: وانت الاخر شسوي خانس هنا 

:: احبنك انا غفار والله احبنك واحبن خالي حاكم جثير 

رفع ايده يريد يضربه صحت بيه امنعه 

:: هو ساعدني خطية عوفه 

تنهد ضايج خلگه 

:: وهذا دواج وين حاطته 

:: براءة انطتني خانة من كنتورها حاطة بيه كل ملابسي و غراضي وهو وياهن 

راد يمشي رجع كال 

:: ما ترهم انا افتش بغراضج راح اشوفن الج ياهي موجودة تدوره الج وتجي تكعد يمج ليمت ما تصيرين زينة 

طلع و جر آمين من رگبته وياه شوية واجه ورا ترفة بيدها علاگة 

ترفة ::  شوفي لگيت هذني كلهن ما اعرف ياهو تردينه حبتهن كلهن واجيت 

رحمة :: تسلمين تعبتج وياي 

ترفة : : لا شنهي تعبتيني قابل شمسوية الج 

أخذته منها طلعت الاريدة وهو جابلي مي من الحب بكوب فخار حتى طعم المي بيه حسيته يختلف و طيب 

ترفة :: هاي عين رحاب ما طاحت للكاع من اهد ما شافتج كل يوم واكعتلج وكعة 

:: امرغهن الج هلبت الله و يصيرن زينات 

:: لا العفو هسه بس شوية العلاج ياخذ مفعولة اصير زينة 

:: حبوبتي خوش عدها خلطة طب عرب زيت زيتون ومدري شنهي لكل علة يرهم هسه اخليها تخليلج منه ايدها عافية والله 

بقيت كاعدة و ترفة يمي خطية تسولف و تمرغ رجليه لحد ما اجتها أزل صاحتها وقبل لا تمشي ساعدتني ارجع للبيت لگيت أزاد جاي وكاعد بالديوانية ينتطري تغدينه اني وياه و كعدت اشبع عيوني منه وهو يسولف اللي ع اهلي 

إصالة :: حجنجلي بجنجلي صعدتي فوگ الجبلي صحت يـ عمي ياحسين هذا مقام السلطان شيل رجلك يـ عمي عمران 

واكفة بـ عتبة الباب و عيوني ع جهال تلعب بالبستان ياريت وگف بينا الزمن بهذا العمر و بقت أكبر همومنه ناخذ فلوس من ابونا و نطلع نشتري عالوجة 

طلعت تنهيدة ازفر بيها حرارة صدري... ردت اطبگ الباب صارت عيني ع رحاب حرمة كزار گاعدة بظل 

النبگة عيونها تفتر ورا الجهال بلهفة واضحة بنظراتها خليت المشلح ع جتافي و طلعت اتمشى عليها برهدنة محيت كل كسرة و حزن بوجهي و رسمت ابتسامة تشفي ع ثغري 

عاينت عليها و ع جهال.. كرفصت جدامها و بنبرة متروسة شماتة گلت 

::  لساها الحسرة بصدرج مو ؟

انتبهت عليَّه تبعثرت أحوالها دومها الگوية الما يكسرها شي بس داخلها صاير رماد.. حلت شيلتها و ردت لبستها و خلت الجلاب الذهب عليها وكأنها بهاي حركتها موش تعيد ترتيب شيلتها لا تعيد ترتيب حالها 

و صدك هدأت و تصلبت ملامحها مثل سيف مصقول 

::  شنهي گصدج أصالة جفيني شرج تره راسي يوجعني و مالي خلگج 

رفعت حاجبي كل ظنها تگدر اللي لو اعوفنها گبل لا اشوفهن الكسرة و الدمعة بعيونها 

:: گصدي واضح.... أشرت براسي ع الأطفال وهي تلعب و كملت كلامي : الجهال.. الخلفة،، ،طفل يصيلحج يمه شوفة عينج الأصغر منج و الأكبر صار عدهن وانتِ صار اله سنين فارغ شليلج 

رجف فكها بغيظ و تضغط ع راس العوجية بجف ايدها من گد القهر اللي بداخلها صارت رجفة بحركتها 

:: احذرنج أصالة و انا گايلة ما تحجين بهل موضوع والله اخلي كزار يجر لسانج من بلعومج و يگصه  

بدا الغضب يحتل ملامحها دكيت الحديد وهو حامي اريد ابرد ناري بقهرها 

:: ردت اكولن الج الطب تطور و هلبت يلگون الج دوه لعلتج.. لاسامح الله ... بس حظج اسود مثل سواد روحج

طگيت ايد بالآخرة شلون واحد و خسر كلشي وگلت 

:: اي يا رحاب ضاعت فرصتج طبيتي بالستين مامش رجه منج بعد تشوفين الجفن ولا ما تشوفين طفل بحضنج

رفعت العوجية و بطرفها دغتني بصدري و تدفع بيه حتى ابتعد عنها 

:: وتالي وياج انتِ شتردين مني طالبتني طلابة 

:: و شنعدج باقي حتى اريدنه  حتى كرامة ماظلت الج بدل الوحدة تزوج عليج تلاثة مثل كطف الكجارة و سحكج بطارف مداسه 

;:  و شنهي جاية تتشمتين بيه خلها ابالج بعدج بت بيت مثل ما انحرمت انا تنحرمين 

:: لا ما انحرم،، انا موش شيطان و وزيت رجلي حتى يذبح اخته 

:: ومن بطر ذبحها غير نهبت و صخمت وجوهنه جدام العالم

دمي گام يغلي كضيتها من شعرها من فوك الشيلة و كربت وجهه الي صرنه وجه بوجهي ومهمها حاولت تفگ نفسها اجر شعرها أكثر 

:: ياهو خلاها تشرد غيركم ولج... و شنهي جريمتها غير عشگت بالحلال و ابوي راد ينطيها رحتي هيجتي عليها جدي و عمي جبران وكل العشيرة شبعتوها گتل و ظلم.. ربطتوها بزنجيل للشباج حالها حال الحيوان ومن شردت ذبيتوا الصوج بيها 

:: محد طگها ع ايدها وگالها تتمعشك و النوبة تنهزم 

كضيت راسها و طكيته بذع السدرة وراها حيل 

:: ولج لا بنتها الطفلة كسرت عينكم لا جنينها اللي ابنطها  شنهي من ملة انتم ولج لون كافر جا عطف عليها و عافها 

:: وشلون جهال نطف نجسة بالحرام 

:: يا حرام هذا رحاااب عبالج ما اعرف انتِ و حرمة جبران بگتن العقد منها بيومها حتى تطلعينها جذابة و زانية و تحللن ذبحها 

ضحك سنها بشماتة تحرك حواجبها مثل الساقطة 

:: هسه شراح تستفادين من كلامج هذا بعدها گتلها ومن عارها وحتى جنازتها شالوها تالي الليل لا فاتحة لا خلوج تصيحين وراها 

:: بشر القاتل بالقتل رحااب و مصيره دمج ينثر و دين برگبتي اوكف فوك تابوتج واهلهل يومها 

:: شنهي تهدديني إصالة 

:: لا موش تهديد بس دم مسلم ما يروح وانا عندي ايمان بالله و هيج احساس بگلبي يگلي مثل موتتها تموتين و الوجع الشافته وهي تنحز رگبتها راح تعيشي أضعاف 

شفت القهر لاح ع تقاسم وجهه 

:;  اي انقهري كلنا اشوفن نظرة الحسرة بعيونج لجهال ماي بارد و ينزل ع گلبي وكلما اضوجن و انقهر اطلع اعاين لحالج و افرح 

::  امشي من جدامي امشي 

:: تبطي الحوبة بس ما تخطي حوبة الذبحتوها و جنينها ابطنها ما تتخطاكم و الكل جاية الدور 

ركزت عوجيتها ع كاع تريد تنهض ومن غضبها ووجع گلبها ايدها ترتجف و تطيح العوجية رجعت الكرة ثانية و ثالثة وكل مرة توكع ذليلة يم جدامي اخر مرة نهضت 

::  انا الج اذا ما خليت كزار مثل ما نحرها  ينحرج انا موش رحاب 

مشت عني تردم العلوة بالنصة النوبة شافت علياء ضرتها اخر وأصغر حرمة لـ اخوي كزار تتغنج و تتمايل بمشيتها جدامها كامت تغلي أكثر 

طبت للبيت و صاحت لـ عمار اخذته لحجرتها عرفت راح تعلمه و تبث سمها بيه ... گبل لا تطب علياء ندهت عليها

:: علياااء

::  هاا شتردين 

::  صيحلي ترفة من يمج خل تجي گلها جدج يريدج 

هزت راسها اي و طبت تصيح الها اعرف كلما يصير تغتاظ رحاب تطلع حرگتها بـ ترفة تخلي كزار و عمار يطكونها بقيت واكفة انتظر شوية و طلعت ترفة بندقة قسيم 

::  هاا عمه صحتيلي 

:: امشي جدامي ابوي يريدج 

:: تره موش غشيمة اعرف صحتيلي حتى لا يطكوني 

:: جا خوش امشي وانتِ ساكتة ولا تردين لبيتكم اليوم باتي يمنه 

:: تره ما اخافن منهم واذا ساكتة هسه جي منتظرة طلعت فطرس من السجن و يحاسبهم ع سوايتهم بيه وحدة وحدة 

:: عود لمن يطلع الله كريم امشي هسه 

:: عميمة 

::  ما تروحين ترفة لا عميمة ولا صخيمة 

كضت طرف عباتي تمشي وياي و تتوسل تكول طفل يتوسل امه ع ربع 

:: عليج الله عمة مالي غيرج يقنع جدي 

::  شنهي شادينهن ستيل و تردينهم ياخذونج بيدهم للمركز تشوفينه 

:: جا اخوي و صار فوك السنة ما شايفته الله اكبر مامش رحمة بكلوبكم 

:: گولي ابوي تسودن و قنع ياخذج فطرس ياهو يقنعه يقابلج بس يسمع بـ اسمج جايته يگل لضابط من رخصتك شوية يطلع يدكج و يكسر شكو عظمة بيج و يرد الحبس و النوبة ترجعين لهنا يكضون سره عليج كلهم يطگونج 

::  ما يسويها فطرس اخوي و يعزني 

::  بعدج ما تعرفينه.. فطرس و كلهم الولد انا ربيتهم ع أيدي و اعرف كل واحد بيهم شني 

:: عمة والله 

:: اشش 

قطعت كلامها من شفت عنبر شايلة شي حدر عبايتها و تتختل ورا النخل راحت صوب بيت كزار و عيوني تلاحكها 

ترفة :: وين مولية هاي تتختل ويا الريكان الله يستر منها 

ضحكت من شفتها طلعت كرون الهايشة من حدر عبايتها وعلگتهن ع باب بيت كزار و رجعت تركض والعباية تهف وراها طكت ترفة ايد بالآخرة متعجبة 

ترفة :: يااا ياا عايني وانا اكولن عليها الحباية صدك من تحت السواهي دوهي 

إصالة :: دمها حار هل بت ما تسكت ع حگها ذاك اليوم أبوج شاف لا ابوها ولا اخوها هنا و طكاها وحجالة حجاية شكبرها 

::  صدك شو انا ما ادري شكال الها 

:: خلها سكتة ولا تجيبين طاري لحد ع صار هسه اللي ينشدج ياهو علگ الكرون لا شفت ولا سمعت 

::  شنهي توصيني عمة من يمته افتن عليها جا غير حاسبتها أخيتي والله 

::  اي عفية عليج يله امشي 

طبيت بيتنه براءة جاية من الجامعة هم طفيت النار من الجدر كملت الطبخ و اريدن امشي اشوفنها متفقة وياهه من امس اروحن الها و حايرة شلون اطلع بأي حجة 

بدلت ثوبي و طلعت بره البس بربطتي ع مرايا اجتني براءة رادت تحجي من شافتني مبدلة 

:: هاا عمة اشوفنج مبدلة ع خير 

:: صاحبتي مريضة من امس بالمستشفى اريدن اروح الها 

عكدت جبينها مستغربة واعرف سبب استغربها هذا جي انا ماعندي صاحبه ولا عمري حجيت عندي 

:: أول مرة اعرف عندج صديقة

:: من امتحنت خارجي تعرفت عليها مناك وصارت صحبة بينا فشلة اسمع بيها مريضة وما اروحن الها 

::  اي صدك ما يصير تردين اجي وياج 

::  لا ابقي بالبيت اخاف يجون الولد من الشغل الغدا سويته بس احمي و صبي الها 

:: صار 

نشت عباتي من الحبل و طلعت ادعي ما يلاگيني كزار موش اخافن منه بس اخافن عليها منه.. ومنهم كلهم I طلعت البستان وصلت الشارع التفتت اعاين لا أحد شافني واجه وراي تأكدت ماكو احد 

صعدت بالكيات ورحت وقبل لا اوصل منطقتهم نزلت خاف لا أحد لحگني حتى اضيعه.. هوسة الشارع و السيارات لان بداية شارعهم اكو سوك 

عيوني تفتر ع ناس من أمنت ماكو احد كملت طريقي ما احس الا سيارة 

طبگت يمي هبد حيلي كل ظني كزار لو واحد من بيت عمي جبران 

من شفته جريت نفس براحة وهو نزل الجامة 

:: صعدي 

::  روح انا اجي وراك 

:: هاي شبيج أصالة صعدي 

عفته وكملت طريقي نزل من السيارة يشد بـ لثامة عدل يعاين وراي و نشد 

::  خو ما اجه احد وراج 

:: لا من طلعت لحد ما وصلت هنا كل شوية التفت واعاين ماكو احد 

بقى يعاين ع شارع ع ناس ع أفرع السيارات يراقب ابتسمت تك خد 

::  شمالك صاير تترتجف و لثام شو ما خفت من اخذت بثار اخوك و گتلت اولاد جبران 

نرسمت خطوط يم عيونه عرفته ابتسم من حدر اللثام تكرب أكثر يحجي 

:: تعتقدين الحافر قبره بيده يهاب احد لو يخاف الموت 

::  جا شمالك اللي ساعة اكولن الك تأكدت ماكو احد وراي وما تقتنع 

:: خوفي كله عليها لا يندلوها و يلوثون حياتها بالدم مثل ما لوثوا امها و ابوها 

::  الماضي ما ينعاد لا تخاف 

وصلنا للبيت شفتها واكفة اباب الحوش ومادة راسها تعاين من شافت السيارة ابتسمت غورگت عيوني اشوفنها اختي و واكفة يا وسفة ذاك الطول الحلو ندفن حدر الترب 

طبك السيارة وانا نزلت بلهفة وهي طلعت حافية اجت صوبي و الفرحة تارسة وجهه فتحت الها ذراعني تلگيتها بودي اضمنها حدر ضلعي 

شذر :: شلونج خالة فد مشتاقتلج والله 

إصالة ::  يا روح و عيون خالتج وعلي صرت زينة من شفتج 

بوستني و كضت أيدي حتى ندخل 

:: يله تعاي هالمرة مو مثل ذيج المرة ما تروحين الا تتغدين وياي 

::  تدللين عليَّه جم شذرة عندي 

طبينا البيت اجت حبوبتها تتمشى تهلي و تمرحب سلمت عليها وكعدت يم شذر اشبع عيوني شوف منها.. ما اصدك بعد ذيج السنين لگيتها و رجعت اشوفنها بعد ما جان عمها فياض شارد بيها 

طلع برا هو وشذر جابت الغدا كعدنا انا وياها و حبوبتها نتغدا من كملت غسلت المواعين وياها رغم ما قبلت بس ساعدتها وهي واكفة تسوي جاي و جدتها ادعكس وهي تعاين الها 

أحسنها عدها سالفة ما تكدر تحجي جدامها من طلعت جدتها تكربت يمي بساع وكالت بصوت خافت 

:: خالة اسئلج سؤال بس عليج الله تحجيلي الصدك 

::  اي گولي 

::  امي و ابوية شلون ماتوا ؟؟ صدك حادث

درت عيوني عنها اشغل روحي بالمواعين واحجي 

::  اي صدك ليش ما مصدكة 

::  ماعرف احس اكو انَّ بالموضوع بيبي و عمي حتى لقبر امي و ابوية ما يقبلون ياخذوني واحس عدهم سر خافي عني حتى انتِ ما جنت اعرف عندي خالة الا من شهرين واكلج وين باقي اهل امي ما تقبلين تحجين ولا تاخذيني الهم 

ضحكت اضيع الموضوع عنها 

::  يمه اثاري محملة عليَّه ع كيفج اكلتيني بكشوري 

بجت عيونها الحلوة و اليتم واضح عليهن 

::  خالة والله گلبي يوجعني هسه اقتنعت ما عشت وياهم ولا شفتهم لا شبعت منهم اريد اعرف قبورهم وين اريد ازورهم اكعد يمهم احجيليهم عني والله بگلبي كومة حجي  الهم 

:: ان شاء الله اخذج الهم ولهذاك الوگت انا يمج و شنهي بخاطرج احجي اللي 

كعدت يم الصوبة و نزلت ثوبها ع رجليها تغطي حتى قدامها 

:: رغم بيبي و عمي ما قصروا وياي وانتِ صح ما صارلي هواي اعرفج بس هيج حسيت بيج ريحة امي بس احس ناقصني شي.. كلمة يمه،، بوية حضنهم.. خوفهم.. اكو شي بداخلي يريدهم 

كعدت يمها جريت راسها لحجري واخلخل اصابعي بين خصلات شعرها مثل لون الگهوة 

::  حكج لو شما سوينا الج تبقى غصة بداخلج تريدهم بس أمر ربج بعد مالنا حگ نعترض 

::  ما اعترض بس... 

بلعت ريگها و دموعها نزلن تناشغ 

:: جم مرة صفنت بليل وكلت لو امي موجودة هسه ... جم مرة امشي بشارع وكلت لو ابوية موجود من دون العالم تيتيمت

::  شنهي من دون العالم هاي العراق متروس أيتام حمدي ربج حبوبتج و عمج ما قصروا وياج وانا هنا هم غيرج كلها تخلت عنهم وعاشوا بدور الايتام 

_ الحمد لله... 

سكتت و دموعها تسولف وجع جبير بداخلها حگها والله بس ما بيدي شي عليها جريتها لصدري امسح ع ظهرها ما طلعت الا خليت ابتسامتها تشرق 

ودعتها و وهي طلعت وراي للباب مشيت مسافة وهي صاحت وراي 

:: خالة مو تكطعين بيه 

::  تكطع بيه العافية اذا اكطع بيج 

::  اسم الله عليج 

نرسمت ابتسامة ع وجهه شالت ايدها بـ معنى مع السلامة وانا شلت أيدي الها هم هي كل ظنها هي بحاجتي جي خالتها تشوف امها بيه ما تدري انا المحتاجة الها انا الـ اشوفن اختي بيها

جان فياض كاعد بالكهوة براس الشارع ملتهم من شافني ترخص من الزلم الكاع يمهم واجه صوبي بخطوات سريعة 

::  مو گتلج من تطلعين اتصلي عليَّه اجي اوصلج 

حديت ملامحي و رديت عليه 

::  انا اروحن شمالي ما اعرف الدرب قابل 

::  انتظري هنانة اجيب السيارة واجيج ما اتأخر 

::  لا تجي فياض ما اريدن احد يشوفك وياي 

گبل لا يرد وصلت رسالة لنقالي طلعت اشوفها جانت غفار كاتب 

" مالك بالشارع الوراج لا تلتفين وتخلي ينتبه الج ضيعي وانا بالسايد الثاني انتظرج" 

التفتت بساع صارت عيني بعين مالك حفيد عمي جبران لفيت عباتي بساع وهمست بخوف 

::  شافنه

ارتبك فياض وياي عاين منا ومنا 

:: منو هو شافج اوكفي أصالة شبيج  

::  لا تجي وراي لاااااتجي 

عرف اكو شي سوى نفسه غريب و راح بطريق ثاني واني عبرت الشارعين حتى السيارت اجت تسحكني و اللي طلع راسه من السيارة يغلط و يشتم واللي صاح وثول و عمة ما تشوفين حگهم انا دعمتهم موش همه 

طبيت بنص هوسة و ضيعته و عبي كومة وانا لابسة عباية بعد ما اندلني خابرت غفار و رحت وين واكفلي صعدت بالسيارة انهج ب انفاسي وهو شغل بساع 

غفار :: بت عمتي خميلة مو؟ ؟ 

نشد چن جواب موش سؤال چنه يعرف بالسالفة 

:: اي 

:: لا عليج الله من شوكت تعرفين مجانها بله 

:: شهرين بس 

:: شهرين و ترحين و تجين الها والله ومحد يدري صدك اذا كال جدي انا مخلف شاهينة موش حرمة 

ضحك تالي كلامه صحت بيه بعصبية

:: لا تضحك غفار گلبي راح يوكف من الخوف 

:: ومنين خايفة بس لا من مالك حتى شارب ماعنده بس البسه شيلة يصير هو وسجدة خوات  

::  والله سجدة ارجل منه ذاك اليوم طكته بالربد خلته طلع من البستان يركض و يتلفت 

::و وانتِ خايفة منه 

::  اخاف منه شنهي انا كل خوفي لا يعرفون مجانها  اريدنها تبقى بعيدة عنهم 

::  جدي يعرف تره ومغلس عنج بكيفة منتظرج تحجين اله وتره مثل هيج سالفة ما تنضم هواي احجيله گبل لا يعرف من غيرج و تدرين بزعلة صعب 

:: لا غفار ابوي بس يعرف يروح يجيبها تعيش يمنه بالبستان وانا ما اريدنها توصل هل مجان 

سكتت بس عقلي بقى يسولف شلون نسيت ابوي زلمة كلف والدنيا علمته هواي مثل هيج سالفة ماتعبر عليه اكيد من أول مرة ما طلعت بيها شك و دور حد ماعرف سبب طلعاتي والمن اروح 

وصلنا السلف اشوفن سيارت بيت عمي جبران و احفاده تارسة الكاع نزلت و نزل غفار هم كلهم كاعدين بالديوانية گال بلهجة ساخرة 

غفار : :  مثل الحرمة شيشوف يجي يسولف فوتي للبيت هسه انا احجي وياهم 

أشرت اله اي براسي وگبل لا اطبن البيت طلع عمي و ابوي  صاحلي عمي بصوت عالي ينتر 

جبران ::  هيووو انتِ تعاي ليجاي 

وگف غفار مثل حاجوز بيني و بينه و بنفس نبرة الصوت و علوها صاح بيه 

::  شني هيوو جاي تصيح بهيمة شكدك تصير وبعدك ما تعرف تسولف جبران 

عدل عمي جبران عگالة فوك راسه ولم طرف خاجيته حدر ايده تگرب صوب غفار يگزل بمشيته و غفار مبتسم بخبث و عينه ع رجله چن يگول اله تذكر ياهو سوى برجلك هيج 

جبران :: انت بالذات لا تدخل و خلي النفس طيبة تره ما ناسي ثأر ابني وثاري ولو تمر الف سنة أخذه منك و اسگي هاي الگاع بدمك 

غفار :: الك سطعش سنة تعيد نفس الحجاية شوكت تاخذه بس لا من اموتن تصيح اي هسه اخذت ثاري وانت تفكة ما تعرف تكض عدل 

هز راسه جبران أكثر من مرة وبالعكس ما اغتاظ ابتسم و رفع عوجيته يدك ع زند غفار بخفة ايده و رجع اشر ع احفاده 

جبران :: لا تستعجل ع گتلك جايك السرة 

صارت عيني ع ابوي ما عاين الي ابد عرفته زعلان كلش فززني صوت جبران من نشدني 

جبران :: وين جنتي ولج وياهو هذا الواكفة تسولفين وياه 

إصالة :: زلمة مستطرق نشدني ع مجان و دليته عيب لو حرام 

جبران :: ومن ويمت نسوانه توكف تحجي وياه الزلم 

إصالة :: اكلك مستطرق شمالك انت ما تسمع لو ما تفهم 

رفع ايده رايد يطكني غفار وكف بوجه صدر بصدر مانعة و ابوي صاح بيه بلهجة تحذير 

هاشم :: هاي أخر مره الك جبران انا واكف و ترفع ايدك ع بنيتي 

جبران :: جا ما تشوف حجي بنتك الماصخ شلونه 

هاشم :: تغلط انا احسابها انت خلك بعيد عن أولادي و احفادي لا تخليني افتح دفاتر عتگ و ازعلنك 

رص ع اسنانة يطلع صوت صرير واضح عيونه ما حادت عن غفار 

جبران :: بعيد انا بس هذا هذا هذا ما فجعت آل هاشم بيه وحنيت أيدي بدمه انا ما تسمى جبران 

كرر كلامه وهو يأشر بـ إصبعه عليه شر من عيونه يطلع و الحقد تارس صوته اخذ جلابه و مشه وصل للباب و وكف يهدد 

جبران :: سمعت دارسة خارجي و تردين تفوتين جامعة ولج 

هاشم :: اي واسبوع الجاي تداوم ياخذها غفار واذا عندك زلم امنعهم عود 

طلع وهو يتوعد و يهدد اذا اداوم يگتلني 

دافعلي ابوي گدام جبران ومن راح بين زعله عليه توقعت  ينشدني ع سالفة بس دار وجه عني و طب الديوانية 

غفار :: كتلج يعرف و غتاظ منج هم جبتيله الحجاية و وهم ضامه عنه 

بقيت مترددة شوية و طلع من الديوانية فات من يمي وبدون ما يعاين بوجهي كال

هاشم :: انطيها خبر خل تلم هدومها و حوايجها باجر امر عليها 

إصالة :: شنهي بوية 

هاشم :: تعرفني شني گصدي أصالة... بت اختج المرحومة منا و غاد تجي تعيش هنا 

إصالة :: لا بويه فدوة اروح لك وين تريد تجيبها يم اللي گتلوا أهلها و يتموها 

طبك باب الحجرة بوجهي رحت ل امي اكيد تعرف لكيتها مكدرة و الحزن بوجهه نفس ذاك يوم الگتلوا خميلة عبالك اتجدد عاتبتني بقهر 

دلة :: تحطين عينج بعيني و تجذبين أصالة.. اكلج وين رايحة تگليلي لرفيجتي  

إصالة :: يمه والله خفت.. 

::  روحي من جدام وجهي اختج هم حطت عينها بعيني وجذبت وشفتي تاليها شصار 

بقيت احوم مثل طيرة و شافت الصياد گتل فروخها ركضت ع غفار جي ابوي يسمع كلامه 

إصالة :: غفار عليك الله بس انت تكدر تقنعه 

غفار :: شقنع منه انتِ ما تعرفينه اذا حط سالفة براسه وكال كلمة لو الدنيا كلها تحجي وياه ما يتراجع بعد 

::  افهمني غفار وين يريد يجيبها لليتموها للحرموها حضن امها و ابوها 

::  واذا تبقى هناك و جبران و جلابه عرفوا بيها تنسحك بالرجلين تعيش هنا احسن الها جدي ما يخلي احد يتكرب صوبها 

صار الغروب حسيت خنكة صارت بصدري التفكير اكل راسي فياض موجود إذا راح ابوي باجر جبران وكلها راح تدري و يرجع الدم و الثأر 

افكر اقنع ابوي يأجل روحته الها بين ما عمها فياض يلتحق

عنبر :: واكفة اسوي عشه انا ما اعرف هيج شنهي بالثلاجة اجيبن و احطن و شيصر ابوي و جراح ياكلونه

عاينت ع جدر أحسنه ناقصة شي تذكرت براءة من تطبخ تحط 

ورگ مال كرفس ركضت للبستان جاي احوش اجت بت  تتلفت و تعاين ع بيوتنه ومبين عليها التوتر زحفت للوح الجت 

جي عالي و كعدت بيه جتى لا تشوفني واعاين الها اراقبها اريدن اشوفنها شسوي وعود انا نجرة و كضيتها ظلت واكفة بحيرة 

مدري شلون انتبهت لوجودي تگربت صوبي وانا  وكفت ع حيلي موش مال ابقى خاتلة 

:: السلام عليكم 

:: وعليكم السلام اشوفنج تدورين شنهي متيهه 

:: اكو واحد عايش هنانة هو دكتور اسمه عون مرتضى 

:: قصدج المدلل 

عگدت مابين حواجبها مستغربة و كررت كلامي بتعجب 

:: المدلل !! 

:: اي مدلل جدي و عمامي ما عدا عمي كزار عبن هذا كزار حتى نفسه ما يحبها 

:: وين بيته 

:: ياهو عمي كزار 

:: شسوي بعمج بيت الدكتور وين 

أشرت الها ع بيت الجان عايش بيه عون و ارسلان وبعد ما اختفى ارسلان بقى عايش لوحده 

:: شايفه ذاك البيت البي نخلة و مرتب من دون البيوت و تحسينه نظيف يلهث 

عيونها تتبع اصبعي وين ااشر وهزت راسها اي 

:: هو ذاك بيته بس هسه موش هنا مسافر 

جانت ابتسامة ع ثغرها وهي تعاين للبيت من گلت الها مسافر انمحت وتعگرت ملامحها بحزن مستبان 

:: مسافر !؟ 

:: اي مشه يدور ع امه گالوا ع اساس بتركيا وراح 

البت تخربطت وضعها من گلت مشه لـ امه اديها ترتجف تفكرهن وحدة بالآخرة بللت شفايفها اليابسة تريد تحجي و تسكت وحتى تنفسها صار سريع جن واحد سمع خبر خربط إيقاع گلبه 

:: اا.. امه مشه لـ امه... يعني عايشة هي 

:: اي عايشة بس خواله مزوجينها وما يگلون اله وين و المن زوجوها 

رجفت شفتها و دموعها سالن تمسحهن بس لمعت عيونها بفرح 

:: شوكت يرجع 

:: ما اعرف تردين منه شي تعرفينه انتِ 

تجاهلت سؤالي مشت صوب بيت عون تعاين اله تتأمله فرح غريب مرسوم عليها ومشت شوية و ندارت براسها اللي 

:: اني نجمة اذا رجع گليله عليَّه 

راحت وخلتني بحيرتي هاي ياهي وشلون تعرف عون بس لا تعشگه رجعت لبيتنه اكمل الطبخ عود صفنت ع مركة لونها غريب 

باب ندك حيل طلعت اشوفن هذا ياهو وياه ما فتحت الباب صارت أزل بوجهي تبجي شعرها مكفش و طالع من القراصة مبين احد جارها حيل 

:: گتلوا ترفة طكوها حيل وطلع دم جثير 

شمرت الخاشوكة من ايدي هاي الطبخة ما مكتوب اله تكمل اخذت عباتي و ركضت لبيت عمي حاكم افزع بيهن 

لاكتني فضيلة تشعل بالصوبة نشدتني شكو ما جاوبت ركضت صعدت لحجرة سجدة سويت مدامهمة عليها هي غافية 

:: ولج سجدة كعدي بساع صارت لخة 

فزت من نومها تتلفت يمنه وويسرى 

:: وعلي يا عنبر اذا سالفة تافهة احطنج و اطبنج هنا 

غورگت عيوني مستهضمة و رجفت شفتي 

:: انا تافهة يا سجدة وانا اكولن عليج اختي حتى من طكج قسيم من ورا جراح زعلت ع زعلج وبعد ما حجيت وياه الا اعتذر منج 

تنهدت و فد فرحت من شفت الندم بعيونها انا اعرفها تحبني فتحت حلگها رادت تحجي من شافتني مبتسمة حدت صوتها 

:: تحجين لو اكومن الج 

::موش خوف منج بس الموضوع اهم مني أزل تكول طاگين ترفة اموتينها گتل 

اخذت عباتها و طلعت لكيت جراح و قسيم موجودين و مبين عرفوا السالفة من أزل 

قسيم :: :: شنهي حاطينها و يطكون بيها مالهم رداد واليوم 

سجدة تعدتهم وراحت مستعجلة لبيت عمي كزار و انا وراها تحمزت بعباتي بيدي العودة صاح وراي محرابحتى 

دكت الباب سجدة هجمته هجم الحديد كام يتكلكل 

:: خيرجن متحلمات بينه 

:: اي والله شفتج مكلوبة شاذي من السحورة و الناس تكطف عليج حجار بدال الشيطان

عافتني سجدة اتعارك وياها و دفعت ميعاد ليغاد عن طريقها وفاتت 

:: وين زهراء 

:: طولت لسانها وابوها يريد يربيها حبسها بالحجرة القديمة 

:: وانتِ شوكت يربيج لو انتِ مربيته 

درنه ورا البيت غرفة قديمة كلش من جدوع النخل و البواري بابها حديد مزنجز مقفولة بسلسلة و قفل 

:: ترفة تسمعيني 

ماكو لا حس لا نفس ندارت 

:: تمشين مثل الحبابة تجيبين المفتاح الولد كلهم بره صوت واحد اخليهم يحركون البيت ع روسكم 

:: والله طلع الكم لسان هم بعد السوته بينة و خلت روسكم بالطين مفروض تطمون رواحكم 

:: رحاااب 

رحاب تخاف من ثنين من عمتي إصالة ومن سجدة طلعت تركض و سجدة تحجي وياه ترفة تنده بـ اسمها 

:: ترفة 

ماكو ما رد گلت الها 

:: اخافن نايمة البت 

:: ليش همه من يطكونها يخلون بيها عظم صاحي حتى تكدر تنام 

اجه عمار وجه ما يكصه السيف 

:: شسون هنا يله طلعنه يلااا

:: المفتاح عمار لا اخلي الولد هسه يذبحونك ع قبلة وتعرف انت كلش زين شني سجدة و شنو گلمتها بالسلف 

اغتاظ منها طلع مفتاح مشدود بقيطان من جيبه شمره عليها و مشه دنكت شالته فتحت الباب وانا وراها الحجرة ظلمة و تصل من البرد 

:: ترفة 

همست بيها سجدة وانا شغلت فلاش النقال اضوي شفناها بالزوية امدده وجسمها كله يختض من البرد بس الخلانه نشهك دشداشتها من جوه كلها دم 

ركضت الها سجدة شالت راسها خلته بحجرها وجه مورم متروس دم 

:: ترفة شو فتحي عيونج عاينلي 

ما حجت شي سنونها تصطك ناس بناس بس كضت ايد سجدة عصرتها حيل لدرجة اصابع سجدة صارن زرك وهمست بصوت يكطع الگلب 

:: لاتعوفيني سجدة لا تعوفوني 

:: ما اعوفنج والله شلون اعوفنج 

نزعت قمصلتي خليتها عليها الدم بعده رطب جديد 

عنبر :: ترفة شو عاينلي منين هذا الدم طاكينج ع رجلج 

نزلت دموعها تعصر بيد سجدة و تضم روحها بحجرها

:: جاي انزف 

شهگت و سجدة صاحت 

سجدة :: صيحي الولد بساااع ناخذها للمستشفى 

كمت اتعثر بثوبي اريدن اندل طريقي بعد ما اشوفن من استعجل انخبص وهي ردت صاحت تنبهني 

:: جيبي عباية و بطانية وياج ولا تخليني احد يفوت لهنا 

هزيت راسي و طلعت اركض كلهم واكفين قسيم محضر الاخمس مخلي فوك جتفه  شافني طلعت اركض اجاني يركض 

:: ولكم راح تموت سجدة تكول خل يجون بساع نطلعها 

ركض قسيم  صحت وراهم 

:: لحد يفوت للحجرة... جراح لاتخلي يفوت بين ما اجيب الها عباية 

كلت لجراح جي هو يتفهم و يلكفها وهي طايرة طبيت للبيت اخذت عباية لكيتها ع حبل و بطانية و طلعت 

لكيتهم كلهم جدام حجرتها و قسيم يدور ع عمار بس لگوه شارد  جي يعرف الراح يصير اله 

طبيت الهن لفتها سجدة بالعباية و البطانية طب قسيم شالها و جراح جاب سيارته خلوها بيها و رحنه 

وصلنه المستشفى سجدة شرحت لدكتورة حالتها ظلوا يفترون بيها من مكان لمكان ساعة مفراس ساعة سونار تحاليل ضمدوا جروحها هدات رجفتها شوية 

غفت وهي تتنهد بتعب جر قسيم البطانية يصعدها عليها يغطيها أكثر جي طوارئ وناس طابة طالعة و جراح كام رد البردة منا ومنا عليها محاوطينها 

اجت الدكتورة  تشرح النه حالتها و تعملنه ع علاج 

:: ضربة قوية ع بطنها صاير عدها نزول بالرحم لازم راحة تامة و تستمر ع علاج واذا استمر وضعها نضطر نستئصل الرحم 

براءة :: گلبي نخمش ع ترفة شكثر تتحمل بعد هالبت اااخ يفطرس شسويت بروحك و بـ اخيتك اجوا جدي هو و غفار جانوا بفاتحة نشد جدي شكو صاير من گلت اله گال 

:: غفار.. 

::أمرني جدي 

:: عمار اريدنه جدامي صاغ سليم ممنوع تطخه و لا تجيسه 

كيف غفار عيد و جابه العباس اله بساع اخذ سيارته و طلع و هو يعرف كل مجان يشرد اله عمار يروح يجيبه سحل و يجي 

ورا الغروب رجعوا من المستشفى  سويت الها شوربة و صبيت الها و جبت خبزة حارة هم طبيت الحجرة لكيتها صافنة ع سگف 

:: الحمد لله ع سلامة تروفة شلون صرتي 

باوعتلي ابتسمت ابتسامة باهته 

:: زينة 

:: يله كعدي عمتي إصالة شلون سوت الج شوربة ع لحم تخبل انتظركم خطية بس بس عمتي انعام تخربطت ومشت الها 

:: ما اشتهي الاكل روحي تلعب 

:: هسه تاكلين انطيج علاج تصيرين زينة يله كعدي 

تجيت الها كعدتها و خليت الها مخاد ورا ظهرها ساعدتها تاكل اكسم الها اكلت شوية وعافنه  

:: ما أكدر  بعد والله احس اللكمة نار تنزل ع معدتي 

رحمة گاعدة يمها كضت ايدها  اديها ودموعها وكعت قطرة قطرة ع ايدها همست بنبرة ترجف 

:: بعد ما اصيرن ام مو ؟؟

حجت مخاوفها وانا مدري شبي دموعي نزلن وياها شبگتها اطمنها 

رحمة :: لا اسم الله عليج تصيرين واحسن ام هم بس انتِ تغذي زين واخذي علاحج حتى تطيبين 

:: الدكتورة كالت يشيلون الرحم 

:: اخر احتمال هذا اذا هملتي نفسج و علاجج وهم يدخلوج مستشفى هناك يعتنون بيج مو سهل عبالج هل موضوع 

مسحت دموعها شوية ارتاح وجهه انطيتها علاجها ومي 

من غفت عفتها و طلعت البنات كلهن گاعدات ندك الباب مد قسيم راسه يحجي وياه سجدة 

:: جوعان كومي سويلي اكل

هزت راسي كمت نزلت وياه كعدت تگشر بتيته من خلاها تكمل و تحط الزيت تريد تگلي گال 

:: ياهو كالج اريدن بتيته 

:: جا شتريد 

:: سويلي من هاي الاكل التحبينها كل مرة تسوينها 

:: ماعندي صدر دجاج 

:: ناوشيني سجينة 

انطته السجينة طلع عود يذبح دجاجة وهي  تنتظرة شوية واجه لگاها گاعدة 

:: شو كعدتي 

:: منتظرتك تجيبها 

:: و تردين انا اركض ورا الدجاجة 

:: ماكو داعي تركض هنه بالكن روح طلعلك وحدة و اذبجها 

:: هم صدك 

طلع دقايق و رجع ابتسمت عليه عبن اعرفنه يريد يراضيها بس ما يكول اعتذر يجيها بغير طريقة 

:: انا طويل وبابا الكن صغير كومي انتِ طلعلي لي وحدة 

تنهدت وكامت وياه گبل لا توصل الكن جراها من ايدي وكفني 

:: لا اوكفي ما اريدن بعد بطلت 

:: خوش جا انا ارد انام 

ما هد أيدها أخذها وهو گايدها عاينت الهم جن اب و كاض ايد بنته وهي هم ما نشدت ولا اعترضت مسوي نار كعدها وگبل كعد نشدها 

:: بردانه اجيبن الج الفروة 

:: لا هاي نار دافية 

هز راسه كعد صافن 

:: شو ساكتة عود زعلانة مني ولج 

:: لا ليش ازعل قابل شسويت ابوي بحياته ما ماد ايده عليَّخ وانت سويتها 

:: كسر بيدي ان شاء الله 

:: اسم الله 

طلع من علاكة لفات كباب انطاها و انطاني انا خانسة بس اكل و اصتنت الهم احبن سوالفهم 

:: هاج توي شويته بس ماعرف اكل وحدي 

اخذته منه تاكل و صب الها جاي حط شكر قليل مثل ما تحب هي تشربه 

:: بعدج مغتاظة 

:: لا 

ابتسمت عليه سوى كل هذا وما كدر يكول اعتذر عاف الاكل يشرب بس جاي زفر انفاسه بحرارة 

:: سجدة شاهد الله تعبان لا تشوفيني واكف ع طولي بنيتي خذوها مني و البنية الاحبها تفضل عذاب أهلها ع زواج مني حتى دين ما ظل براسي وهل طلعت حركتي بيج 

:: ترفة بيها شي أحسنها ضامة شي 

تنبهت حواسه يعدل كعدته و نشد يستفسر 

:: شي مثل شني 

رفعت سجدة جتافها بعدم معرفة تجهل السبب 

:: ماعرف بس تأكدت امس من دزيت عنبر تصيح الكم ناخذها للمستشفى عمار كضاها من شعرها وهي بهل حالة و هددها اذا تحجي يموتها 

:: و ماطكيتي ع حلگي 

:: شرد بساع وجنت حايرة بيها ساعتها 

كعد صافن ع نار ضياع جبير وكلش ضايع من ايده بنته البت العاشكها ع نفسه ضيعها بضياعهن صد ع سجدة 

:: سجدة 

أشرت براسها بمعنى هاا 

:: اريدن اشوفنها بس اتطمن عليها و اطلع 

گامت وياه وهو شال لفة بيده و بطل عصير طبيعي عرفته ضامه الها رجعنه للبيت صنته طبت سجدة للحجرة أزل نايمة يم اختها ندهتها ع كيف 

:: كومي نامي ع البنات 

:: ليش اريدن ابقى يم اختي 

:: كومي حبيبتي اختج مريضة لا تطخينها و تتوجع 

اخذت بطانيتها وكامت تمشي وهي مغمضة طلعت وراها وصلتها يم رحمة خطية نيمتها يمها 

رجعت الهم سجدة كعدت يم راس ترفة تمسح  ع شعرهابحنان وهي فزت بساع صرخت 

:: والله ما احجي 

عكدت حاجبي مستغربة وكل يوم تتاكد شوكك سجدة وتصير يقين 

:: اشش اسم اسم هاي انا 

شربتها ماي و عدلت حجابها زين 

:: لاتنزعينه هسه اجي 

استغربت هي تعاين ورانا من طلعنه انا وسجدة نشد قسيم والقلق واضح وجه 

:: شمالها ليش صاحت يوجعها شي 

:: لا بس خافت عبالها أبيت ابوها و يله بساع تره اذا يشوفك غفار يطيح حضنه كلنا 

ابتسم و دخل خله باب الحجرة مفتوح شويه سمعت كلام ترفة 

وكف فوك راسها مسح ع وجه بضيج يمد ايده يتهمه يريد يمسح ع راسها ع جروحها و يبتعد يستغفر خايف عليها من الحرام كعد يم الجرباية 

قسيم :: كلمة وحدة رايد اسمعها منج بس گولي اي موافقة يشهد الله عليّ اخليهم يحبون اديج و رجليج حتى ترضين عليهم 

ترفة :: وكلت اي شيصير لا ابوي ولا عمار ولا حتى فطرس يقبلون ينطوني الك

:: فطرس شيلي من القائمة دواه عد غفار هو يعرف شلون يتصرف وياها و أبوج اجيبن عربنه و شيوخنه و اجبرنه يوافق 

:: و كل عقلك يخلونه نعيش ابوي كض القرآن و قسم يمين عليه يخلي ثوب العرس جفن الي و عمار حلف كل امام يكسر الظهر يذبحك جدام عيوني 

:: و شنهي بس لا خايفة منهم 

:: اهلي واعرفهم يسونها روح شوف طريقك و تزوج 

حاول شكثر يأمن خوفها قسم اله يحميها وجان ردها الرفض بس 

رحمة :: البنات طلع لدوامهن بس براءة كملت الشغل و وصتني ع ترفة و طلعت للحديقة ملتها سويت ريوك لـ ترفة اسمع صوتها تقرا قصيدة شدني كلماتها الحلوة وتعاتب امها 

" ليش عفتيني يمهم يمه لويش ما خذتيني وياج " 

ردت اخذ الاكل الها للغرفة شفت بره الشمس طالعة الجو دافي و حلو فرشت حصير بالحديقة و رجعت الها 

:: يله كومي وياي 

:: وين 

:: دكومي هسه وتعرفين 

ساعدتها تنهض تمشي وياي وايدها ع أسفل بطنها بوجع وكالت 

:: عليج الله لاتجذبين عليَّه انتِ موش ممرضة وتعرفين ما أكدر اصيرن ام بعد ؟ 

:: و الله والنبي محمد تصيرين انتِ بس شيلي هلفكرة من راسج و تصيرين زينة 

كعدنه صبيت الها جاي كوه تاكل كوة تبلع اللكمة الكدمات صايرة بنفسجية بوجه و ع اديها عودها ضعيف و بنيتها غضة 

:: نسولف لو ما تقبلين ادخل بحياتج

:: لا ليش انا بيت عمي حاكم احسبهم اهلي وانتِ وحدة منهم صرتي 

:: سمعت قسيم يريدج و دك صدره ما يخليهم ياذوج بعد بس انتِ ما تقبلين ليش يعني ما تحبي 

:: ما حبيت احد بهل الدنيا كد ما حبيته 

:: لعد ليش ظالة بالضيم وافقي وتعاي هنا والله كلهم زينين بهذا البيت و حبابين اني الغريبة شايليني بالصلوات ما بالج انتِ بنت عمهم 

:: اهلي عدواني لا يرحموني ولا يخلون رحمة الله تنزل عليَّ 

:: وتالي شلون تظلين بهل وضع 

:: لا يطلع اخوي فطرس هو الأمان الي 

اجت فضيلة باوعت النه بطرف عينها و ترفة ارتبكت من شافتها حتى الاكل عافته 

فضيلة :: اكلج انتِ  اله تذبين ابني بداهية ياله ترتاحين 

ترفة :: ليش عمه شسويت انا 

:: متحلف ب ااهلج يريد ياخذ حكج منهم و اهلج مراح يسكتون وابني يضيع بينكم 

:: ماكتله اخذ حگي ولا رأيده من احد ياخذ حكي الله موجود ويمه ما يضيع احد 

:: جا گليله احجي وياه انتِ گليله ما احبنك بلجن الله يطلعج من راسه 

:: صار عمه بس اشوفنه احجي وياه 

:: صيري زينه و ردي لبيت أبوج عمه بيتنه بيه ولد و الوادم تحجي 

طبت و ترفة نزلت دمعتها بقهر 

:: ماعليج بيها لاتديرين الها بال 

:: بس كلامها صح راح يضيع روحه من وراي و ياريت جايب نتيجة 

كامت تعدل بحجابها 

:: اريدن عباية عفية 

:: صدك تحجين وين تردين وانتِ بهل حالة 

:: عليج الله انطيني عباية بس 

انطيتها عباية طلعت ساعدتها تمشي هدت أيدي و راحت 

راقبتها  تتوجه ع حايط كوه تنگل رجلها كوة تخطي الخطوة عصرت روحي عصر هل البنية أهلها بيت الأمان صاير رعب الها 

براءة :: شفت الشمس طالعة و الجو دافي طلعت للحديقة مالتي شلت النايلون عنها شوية زيكت الشتلات 

فزيت ع صوت صريخ عالي طلعت وجان اشوف قسيم واكف جدام بيت عمي يعاين عليه وهو يحترك  صوت رحاب تصرخ من جوه البيت و طلعت تركض بطرك ثوبها 

انتبهت كل حواسي و فزت جوارحي من شفت رحمة تركض تاشر ع بيت و تصرخ 

:: ترفة جوه بالبيت 

قسيم مثل المجنون ركض صوب البيت وگبل لا يوصل اجه علي يركض و يصرخ 

علي :: عمي الحك بيت جبران محاصرين عمي غفار بالبستان 

وگف قسيم عين صوب بيت عمي كزار وين ترفة روحه و عين صوب بستان جبران وين ضلعه أخي

هلي يهدمون ساسي وانا ابنهم ...

وأخو زينب نسوني وانا ابنهم ...

ماسويت شينة وانا ابنهم ع ليش الگطع بيه

━━━━━━━━━ ⚖ ━━━━━━━━━

اعاين لـ قسيم إيده فوگ راسه  والحيرة اللي بيها ما توصفها كلمة  چن رجليه انغرست بالكاع ما تتحرك،  بس راسه يدور …

مرة صوب بيت عمي كزار  الدخان والنار تلهب منه… ومرة صوب بستان جبران صااااح بصوت يقشعر اله البدن و الروح 

:: دخيلك يااااا علي… يا حاضر الشدّات

رحاب طلعت تركض من البيت بلا عباية والشيلة رايحة صفح نص شعرها طالعة و النار گايدة بطرف ثوبها وكلما تركض تشتعل وتأخذ أكثر 

تركض مثل اللي يتخبطه الشيطان من المس و  الأرض مو ثابتة جوها 

ركض الها عمي ابو طالب جان لابس خاجيته نزعها و لفيها بيها يخمد النار و الناس الخيرة شمروا عليها عباية يستروها 

ما رف اللي جفن ما فزعت الها اطفيها ولا خفت تحترگ جدامي بالعكس تمنيت موتها ركضت كضيتها من ذرعانها 

انشدها 

:: ترفة وين  ليش ما طلعت وياج 

نفضت إيدي  عيونها مشخصة تلطم على صدرها و فخذها بعزاء صوتها متشخرج من الدخان 

:: يبووو لحگونه يا ناس يا عالم حرگنه الما يخاف من الله حرگنه علمودها.. علمود الـ 

عرفت تريد تحجي بشرف ترفة و تستغل وجود الوادم حتى تشوه سمعتها و تحلل تعذيبها 

ما بقى برسة عقل ولا وعي  بدون ما أحس لطمتها بكفه أيدي ع حلكها و كضيتها رگبتها خنكتها حيل 

:: ولج احچي  ترفة وين حابسينها لا والله اخلي قسيم هسه يدير فوكج نفط و يحركج 

قوة غريبة ما أعرف منين اجتني رحاب ضخمة طويلة و جسمها راهي يفوقني وزن وطول صار مثل الصلب المرن  بين إيدي. عيونها نگلبت وغدت دم تجر النفس گوه .

::ورا البيت بالحجرة القديمة… كزار غفلها عليها گبل لا يطلع 

قبل لا أستوعب شخص خطف من يمّي مثل الزئبق. التفتت اشوفنه جراح.

ركض صوب بيت كزار دگ ع ظهر قسيم حيل يصحي من ضياعه وصاح بيه 

جراح : : قسيم  البت راح تحترگ… موش وكت صفنتك هاي.. غفار سبع هو يدبر روحه 

چن بهاي كلماته انطاه الضوء الأخضر حرر تفكيره اللي عجز عن التفكير ساعتها مثل سهم و انطلق من القوس ركض صوب بيت عمي 

الوادم الواگفة حاولوا يمنعونه سبگ من بينهم طفر السياج من صوب الحديقة جانت ماكو نار بس دخان و جراح وراه .. 

بلا وعي ركضت للبيت واني اتخيل ويا كل هل النار ترفة الباب مسدودة والنار تلهب من كل كتر كلما اتقرب تلهب وجهي جرارة قوية لطمت ع وجهي والناس تصيح ترديني ارجع 

بقيت اروحن و أردن فرفحت روحي و الزلم كلها تعاونت يجيبون ماي من الساگية بالسطول و يطفون نداريت ع رحمة ادورها بعيوني 

تركض منا و ترد منا تحشم الناس ينگلون ماي حتى يطفون النار و تصيج صوتها يختفي و يرجع من گد ما صرخت 

رحمة :: اتصلوا الإطفاء شبيكم واكفين  

صارت هوسة وكل واحد ينطي رقم شكل واحد يكول هذا والآخرة يكلي لا هذا مال الإسعاف 

جريت رحمة من بيهم انشدها 

:: شرجعها لبيتهم ولج مو جانت يمنه شطلعها 

:: امج طردتها وهي ما قبلت تبقى عاندت الا ترجع 

عضيت اصابع بحرگة من أفعال أمي ااااخ منج يمه وديتيها لموتها بيدج اسمع النسوان الواكفة تسولف وحدة منهن  خمشت گلبي بحجايتها 

" منيتها هاي يمه منيتها صاحت الها" 

گلبي يصرخ لوحده دخيلك ياعلي يا حاضر الشدات احضرها يتيمة ومالها احد ياعلي 

النار تشتعل الزايد اخذت السعف كله و صريفة الحيونات صاح عمي ابو طالب 

ابو طالب :: فتحوا الباب للدواب عمي احتركت و تصيح الغوث 

اسمع صوت الحصن تصهل و الهوايش تصيح هوسة والناس تركض منا ومنا طفر علي فتح الهن الباب طلعن طشن بالبستان 

رحمة شالتها الغيرة اخذتلها سطل و ركضت وياهم تريد اطفي النار عود جابت أول سطل تركض بيه و يتدى منها ونصه وكع عليها تبربع ثوبها رفعت اديها تريد تذبه ع نار صار عمي 

ابو طالب جدامها طشته عليه غركته من فوك ليجوه مسح عمي وجه وكض طرف صايته عصر من الماي گال حتى لا يفشلها 

ابو طالب :: ميخالف عمي ما صار شي 

اجه عمي كزار يركض شايل طرف دشداشته و يدك ع راسه 

كزار :: راح حلالي يا بوي راح مالي.. فلوسي كلهن بالحجرة جوه

رحمة بيدها السطل طكته بالكاع طلعت عصبية وانا ظنيتها هادئة وصاحت بوجه عمي 

رحمة :: عمي شنو گلبك انت حجر بنتك جوه و النار اكلت البيت يا حلال هذا التحجي بيها 

جانت عيونه ع بيته وحسابه كله يم فلوسه من حجت رحمة صد براسه عليها يعاين الها بطرف عينه حتى البت الغريبة كره واضح الها چي من طرفنا وكاعدة يمنه من حقد گلبه و سواده حتى وجه ممسوخ 

كزار :: يطبها مرض من عساها احتركت وخلصت منها گبل لا تجيب العار الي 

نداريت عليه رغم انا ابد ما تجاوز بس حرگ دمي كلامه ع بنيته اللي مفروض كون هسه هو أول واحد يدخل النار حتى يطلعها 

براءة :: من كون احتركت انت وغديت رماد ولا هل يتيمة ما تريدها انطينياها تبقى يمنه لحد ما يطلع أخيها

كزار :: بيدي ادير عليها نفط واحركها ولا انطيها الكم وهذا قسيم اذا ما خليته يموت بحسرتها انا موش كزار 

صوت انفجار من جوه فزز الكل والنار كامت تفتل قوية الدخان تشكل غيوم سودة  شاغت روحي قسيم و ترفة.. جراح  كلهم جوه ركضت اريدن اطب كضاني عمي ابو طالب 

براءة :: هدني عمي عليك الله  راحوا كلهم احتركوا راااحوا غفار وينك الحگنه 

اصيح و اهمش بـ اديه بس اريد يهدني واركض الهم ما اتخيل اعيش حياة من دون واحد منهم عندي الموت أهون صاح عمي صوته جان أعلى من أفكاري 

ابو طالب :: اواشج عمي ذولة طلعوا والله ذولة 

درت وجهي اعاين وين يأشر عيون تدور بين الوجوه عليهم صارت عيني ع علي يركض يأشر صوب الكاع الفارغة ورا بيت عمي صايرة 

علي ::ذولة اجوا ذوولة 

ركضت بلهفة الهم... الحجرة الجانت بيها ترفة صاير ورا البيت كله و الها باب ثاني ع الگاع طالعين منه 

وجوهم كلها دخان ترفة مثل خرگة بين اديهم مغطينها بجرجف.. 

قسيم جفوف اديه الجلد مسلوخ عن الحم جي الباب صاير حار و كاضه حتى يفتحه و جراح ردن قميصة محترك و لاطش ع ايده  

ركضنه الها انا و رحمة  البت فوك مرضها اختكت بالدخان سندنها وصلنه بيتنه ما قبلت تدخل كعدت ع بلوكات بالشارع يم عتبة الباب تشهگ بالنفس 

براءة : : وين كعدتي كومي جوه ارتاحي خل اسويلج تبخير 

عيونها تنظر صوب ابوها وهو يركض حاير بالبيت و الحلال ما كلف نفسه ينشد ع أحوالها.. الخذلان نعكس ع لمعة عيونها 

مثل الام وابنها رايح للحرب.. تنتظر منه خبر وتالي توصلها الرسائل فارغة تنهدت وگالت بتعب 

ترفة :: شوفيلي اهلي وين يروحون اروحن وياهم 

قسيم واكف ليغاد نزع قميصة وملامحة تعكرت بوجع من سمع كلامها صاح بيها 

قسيم :: وين تروحين تريدنهم يموتنج يله كومي فوتي جوه 

:: يبقون اهلي مالي مجان غيره بيتهم 

تقدم خطوة صوبها دفعه جراح حيل حتى اختل توازنه و راد يكع وگبل لا يحجي قسيم اشرله جراح بمعنى اش 

جراح :: انت تنجب و تسكت ما اريدن اسمع صوت الك وهاي سوايتك احاسبنك عليها بعدين 

كرفص جدام ترفة يحجي وياها بهدوء عكس نبرة وياه قسيم جانت خشنة 

جراح :: مال تردين لبيتكم هاي تنسينها فطرس خلاج أمانة برگابنه ليمت ما يطلع كل بيوتنه مفتوحة الج تختارين و تدخلين وين ما تردين وما عليج بحجي النسوان خوش 

گبل لا تعترض و ترفض دنگ عمي لمستواها بـ إصبعه عمي ابو طالب 

ابو طالب :: كومي عمي يمي ماعندي احد بس عنبر حتى جراح اطردنه بره حتى تاخذين راحتج 

:: رحم الله والديك عمي بس ماله داعي والله 

ما انتظر منها رفض أكثر اخذ بيدها ساعدها تنهض ومشه وياها ع كيف وايده الثانية وراه جتافها ساندها من كل جهة و يحجي ايجابيات السكن يمه وشلون هدوء هو يطبخ الها و ياخذها بنفسه للمدرسة 

نداريت ع قسيم و جراح واكفين يتعاركون 

براءة :: غفار وين جنكم نسيتوا 

هز جراح ايده يضحك 

جراح :: يابه يا محاصرينه غير هو رايح الهم يتحارش يكول هلبت الله و يطكوني حتى الگالي حجة عليهم واخلص من عرج جبران النجس 

براءة :: وهسه شني ما تروحون ورا تعوفونه لوحده هناك 

جراح :: شنهي بس لا خايفة عليه ولج 

براءة :: جا شلون ما سمعت جبران هذيج المرة من هدده يگله اسگي الگاع

قسيم :: والله انا خايف عليهم موش عليه 

راحوا كلمن بدربه گلبي بقى يمه آل جبران الغدر يمشي بدمهم حتى لو وما يگدرونه ياخذونه غدر وغفل 

رحمة :: من الصياح و الخوف حسيت بلعومي تجرح و عطشانه مي كومة ركضت شربت الدولكة كلها شفت فضيلة جاية من بره ركضت طبيت لغرفة البنات 

لاتشوفني و تسمعني حجي جي فتنت عليها مرت ساعة ورا الثانية و ابو المحابس ماكو 

مدري ليش خفت من جان موجود احسن هسه أحس إني بين ناس، بس وحدي. بين طرق، بس بلا مسار

كل الوجوه اللي مفروض تطمّن... صارت فجأة بعيدة، باهتة

براءة :: وديت جهاز التبخير ورا ترفة لبيت عمي ابو طالب لكيته فارش الها و جايب الها ماي و وصلة يمسح الصخام من وجهه 

:: ترفة صدك تاخذين بكلام امي و تطلعين 

ابو طالب :: شنهي الفرق عمي واذا ظلت يمي هذا بيتها وذاك بيتها واذا ما تشيلها الگاع احطنها فوك راسي  

بجت مستهظمة لو نفتح الها كل بيوتنا تبقى كسرة داخلها بيت أهلها انسد بوجهه جراها عمي لصدره يمسح ع راسها بحنان و حباها 

ابو طالب :: لا تبجين عمي والله دموعج مردني مرد 

مسح دموعها اشرلي اكعد يمها وهو كام 

ابو طالب :: كعدي يمها عمي بين ما اسوي الها لكمة تأكلها 

براءة :: لا عمي اكعد انا سويت الها شوربة ع لحم هسه اجيبنها الها 

ابو طالب :: لا  انا اريد اطبخ الها من ايدي لو ما تحبين اكلي ترفة بوية 

ضحكت بوجع تأكد كلامه تحاول تتنسى خيبة أهلها 

ترفة : والله بعد طبخ امي الله يرحمها ما ضكت أطيب من طبخك عمي 

صدك عمي نفسه كلش طيبة بالطبخ هو الوحيد جان دوم يساعد حرمته يوكف وياها بكلشي ومن توفت الله يرحمها هو قام بدورها لـ عنبر ما تزوج ابد

كعدت وهو تسرفن يطبخ و يقرا دعاء كلش حلو بصوته رفعت ترفة الغطه ع وجهه و اسمع صوت نحيط تبجي بلا صوت 

رحاب... عمار... كزار... كلهم عيونهم عليها تراقبها موش خوف عليها لا منتظرين الخطأ و الزلة منها حتى يحدون سجاجينهم الها 

ما گدرت احجي بعد لا اواسيها جرح الاهل لو كل العالم رادت تضمده ما يندمل حتى طاب بيوم يبقى الأثر 

حجيت وياها بدون ارفع الغطه عنها ادري بيها گاعدة و تسمع 

:: ترفة فدوة اروحن الج لا تقهرين نفسج هيج والله احنه اهلج غفار اخوج واحنه اخياتج وهسه يجي جدي و يحاسبها لأمي ع حجايتها وياج 

بجت طلعت كل اللي بـ گلبها  لحد ما تعبت وغفت ع صوت عمي البقى يقرا الها... 

تذكرت رحمة لوحدها بالبيت جدة مشت بواجب و امي ما ينكعد يمها كمت امشي ع اطراف اصابعي حتى لا تكعد دورت ع عمي 

لگيته يزگي بالزرع و يرتب السنادين عيني ع شجرة جديدة بعدها بالسندانة ما شاتلها بالگاع الورگ ملتها احمر و قليل أخضر وبيها ورد صغار كلش يصير ع شكل أغصان 

:: عمي انا راح اروحن لبيتنه خطية رحمة لوحدها اشوفنها وارد الكم 

:: روحي عمي اخذي راحتج انا يم ترفة باقي 

عيوني ما حادت عن الشجرة ابتسم اللي گبل لا اطلع گالي 

:: هاي الشجرة الج عمي أخذيها بحديقتج تطلع احلى 

:: هاا لا عمي توك جايبها ما اريدها 

بس بگلبي اريده يعاند و يگلي لا الا تاخذينها وصدك هو يعرفني 

:: وشني تغلى عليج شجرة 

شالها و طلع وياي فتحت اله باب حديقتي خلاها بمجان فارغ وياه طلعتنه اجه جدي خطية يمشي بخطوات سريعة كاف طرف خاجيته بيده و نشد 

هاشم :: وينها ترفة صار بيها شي 

ابو طالب :: لا بوية الحمد لله عدت ع خير 

راد يروح لبيتنه 

:: خل اشوفنها بعيوني ياله اتطمن 

:: هاي ابيتي موجودة بويه 

عكد جبينه مستغرب بس جان همه الوحيد يشوفها أول شي مشه وياه عمي وياه ما صارت عينه عليها نايمة و بخير ظاهري 

جر نفسه براحة 

:: ليش يمك صاير شي وليش ردت بيتهم اصلا وانا محذرها 

:: شمالكم معترضين تره انا هم عمها ما صار شي لونها كعدت يمي 

:: يعني صاير شي... خوش بس تكعد دزها اللي 

طلعت صارت عيني ع بيت عمي كزار طلعوا اللي سلم من الغراض و داروا ع بيت الثاني كعدوا... رجعت للبيت  وياه جدي كعد و مرجي ايده ع عوجية يفكر و رحمة ليغاد عنه همزين لو ما جدي اجه جا امي استفردت بيها 

انتبهت عليها تلوب تروح هيج و ترد هيج و الخوف وكل شوية تنشدني وينه اخوج 

صاح الها جدي و طبطب بيده ع مجان يمه راحت تمشي بخجل كعدت يمه وهو نشدها 

:: شلونج جدي مرتاحة يمنه خو ما احد غثج 

:: لا جدو كلهم حبابين 

هز راسه اي قوي الجاي ع جمر و طاسة بيها استكاين صب اله والها وهي من شافته كامت تساعده هم 

:: أبوج طيب 

:: اي عايش الحمد لله 

:: الله يخلي خيمة الج.. و جم اخوه عندج انا اعرف بس عروة صويحب غفار 

:: عندي بعد ثنين واحد من امي و ابوية و والصغير من ابويه بس 

:: احنه عايلتنه ما نثني واللي ياخذ ع حرمته اكسر العوجية ع ظهره ماعندي بنت تنظلم يمي بس كزار هذا متبري منه 

:: لا حتى ابوية ما تزوج ع امي الا بعد وفاتها 

:: الله يرحمها 

:: صدك جدو شعحب ما تخلي حد لهذا ابنك كزار دا ياذي ترفة كلش خطية 

::بهذا طوله و طكيته و طردته و تبريت منه حشاج جدي بس ذيل الجلب أربعين يوم حطوا بالگصب رادوا بنعدل ما انعدل... 

وهاي الآخرة هم ما تسمع حجاية 

قصد ترفة بنهاية كلامه جي يجيبها يمنه وترد لبيتهم هي عزيزة نفس ما تتحمل حجاية.. وامي الله يسلمها كلماتها تكول سهام مسمومة اذا ما يموتن يسمن... ضحكتني رحمة من كامت تشكي لجدي 

:: تره حتى هذا قسيم مدري شلونه ذاك اليوم ضرب سجدة هجمي وما يتفاهم 

:: وهذا الاخر هم اخذ عقابه 

هزت راسها اي فر جدي اخر الجاي بالستكان و شربه 

:: و غفار مامش ملاحظة عندج عليه حتى اسويله فرگة اذن 

:: لا زين 

:: زين زين لو كواك 

صفنت تفكر و تفرك اديها وحدة بالآخرة وانا هم انتبهت كل حواسي وياها اريدن اعرف شني رأيها بيه وجدي حثها تحجي

:: سولفي وياي جدي لا تستحين انا مثل جدج 

:: اخاف منه وبنفس الوقت خايفة من دونه

حرام الجان فهمت عليها شلون هاي تخاف منه وتخاف من دونه بس مبين جدي فهم عليها من تسلطت ابتسامة ع ثغره وگال 

:: احنه ان شاء الله من تخلص سالفة عمج نسير عليكم 

:: اي جدو هلا بيكم تنورونا باي وقت 

هو يقصد شي و هي فهمت شي ثاني عبن بالها موش يم السالفة اللي يفكر بيها جدي... بقى يسولف وياها انقشع عنها غبار الخوف و اندمجت بالسوالف وياه  واحد يتعرف ع ثاني 

سمعت صوت غفار بره طلعت اركض اعاين متلهفة اجه هو وعمة إصالة اللي راحت تركض لبيت عمي ابو طالب تطمن ع ترفة وانا من شفته ياله أمنت ما لاح غدر آل جبران صاحلي جدي 

هاشم :: صيحله خل يجي بساع 

صحت اله نشدني شبيه جدي و شني يريد رفعت جتافي بحركة ما اعرف شي وياه ما شافه جدي دك العوجية بالكاع 

هاشم :: تعال جدامي 

صدك راح وكف جدام جدي و الغضب واضح ع جدي مغتاظ منه 

:: شگتلك انا امس

صفن غفار عاگد جبينه يستذكر وكال 

:: عمار 

:: وينه 

:: جان يم صاحبه و نهزم 

:: الك لبعد ساعتين اريدنه جدامي لا ترجع لسلف من دونه 

:: صار 

دار وجه يريد يمشي رجع صاح اله عبن جدي بكلشي يعتمد عليه 

هاشم :: فطرس من دخل السجن شخله عندك أمانة 

غفار :: ترفة 

:: خوش تروح تشوفها وين و ترجعها للبيت واللي ضيج خلگها تأخذه وياك يتعذر منها

:: صار جدي بعد عندك شي ثاني تأمرني بيه 

:: لا ولا تنسى عمار اذا جبته لا ترويني وجه جتفه و ذبه وياه الحلال عبن الحجي ما يفيد وياه بعد 

اشرلي بيده طلعت ورا نشدني ياهو وياه ترفة حجيت اله الصار مسح وجه بضيج دخل حجرة امي دقايق طلع و طلعت ورا تلبس عبايتها و تدردم 

:: خيعونها عمي كلها وياها و تدور رضاها 

بقيت بالباب وعيوني صوب بيت عمي انتظرهم طلعت امي وجهه ما يتفسر وراها ترفة و غفار اجوا تلگيتها اهلي بيها 

:: ترفة 

ندارت عليه براسها وهو كمل كلامه بكل هدوء و كل حجاية منه تزيد فخري هذا النشمي اخوي 

غفار :: هذا موش بيت احد بيت عمج و بحياته كال هذا بيت العلويات كلهن لو بيوم نظلمن هاي الباب ما تنسد بوجهه وحدة منهن يعني انا لو احجيلج واكلج طلعي توكفين بوجهي و تحطين اصابعج بعيوني وتكليلي هذا بيت عمي تريد اطلع انت خووووش 

هزت راسها اي اغتاظ منها ما يحب هل حركة 

::  تهزين براسج احجي وياي ردي جواب 

:: اي 

:: واذا كالولي راحت لبيتهم انت و كزار ادكج فهمتي لو اعيد 

:: فهمت 

:: خوش أخذيها براءة خلها ترتاح 

اخذتها للحجرة فرحانة بيها اتمنى تبقى يمنه لدوم كزار ما يستاهل تكون عنده هيج بنت 

عنبر :: لملمت كتبي بالدرس الاخير حاطة راسي ع رحلة و المدرسة كاعدة ع أول رحلة و تسولف النه ع اول ايام بتعينها و شلون راحت لمنطقة بعيدة بالجول 

و تلگوها الجهال فشخوها الطماطة وكل هذا بقت و درستهم عكس هسه 

دك الجرس طلعت اسحل بروحي هوسة و السيارت ادور ع سيارة جراح مالها أثر بقيت بمجاني واكفة و عيوني تدور عليه واكف بعيد وما اشوفه 

ربع ساعة و فرغ الشارع الجدام المدرسة بقت المديرة اخر شي طلعت نشدتني ليش واكفة گلت الها انتظر اخوي خابرت عليه 

گال هسه جاي راحت وانا كعدت بمجان الحارس  انتظره طلعت كتابي اقرا لباجر حتى من ارجع للبيت ماعندي شي ابقى يم البنات 

:: السلام عليكم ابو الشباب منين اطلع للعمارة 

گبل لا اشوفنه عرفته صوت جراح ماد راسه ينشد ويضحك زميت شفايفي و عقجت وجهي عود مغتاظة رجعت كتابي للجنطة ومشيت جدامه ادبج 

:: تعاي ولج شني هاي عود زعلانة 

:: ما احجي وياك 

:: لا كلشي ولا زعلج عليَّه تعاي نتفاهم و اراضيج 

:: ما أرضه لونك تحب جف أيدي 

شو هذا گمزة ونص صار يمي عتني من ايدي و بصوت حاد همس

:: ياهو يحب ايدج ولج 

عصرت عيوني اريدن ابجي حتى يعوفني صارت عيني ع ايده ملفلفة 

:: شمالها ايدك بس لا حمست طماطة وكبت النار عليك 

:: لا ياطماطة ابشرنج بيت كزار احترك صار هبود 

يمه اسمع گلبي گام يهوس من الفرح بـ لساني اكولن اللهم لا تجعلني شامت بس انا بگلبي كلش شماتة هلكدها عنت عليه ترفة صحت 

:: ولك و ترررررفة خو ما صار بيها شي 

فز ع صوتي فتح عيونه ع وسعها صم حلكي بيده و الوادم انتبهت علينه من صحت دفعني امشي جدامه وهمس بنبرة غضب 

:: خل نوصل واعلمنج شلون تصيحين بالشارع 

هزيت أيدي بسخرية و گبل لا احجي برهدنة و مامنة عود بوجود ابوي لجمت لساني و بلعت حروفي جي ابوي ما يتأمن يوم والثاني ناحر للنجف 

:: و تهزين ايدج مو تهديلي بس ارجع هاي ايدج اذا ما خليتها كلادة بركبتج وتفترين بيها 

خنست حاشرة روحي بالكشن استذكر شكو موقف حزين شكو واحد ميت عزيز وين الحجاية التوجع اللي سمعتها بحياتي تذكرت كزار من گالي الدايحة ما لكيتي واحد يربيج امج ماتت وابوج ساكن النجف جي دفعته عن أزل من طكها 

من صدك استهضمت موش كلمات احسهن جوم احجار و واكفلي بزردومي 

:: لو موش تبجين اليوم اجنزنج وعلي وسبع اللي يطلعج من جوه أيدي 

ما رديت عليه ولا سمعت شگال حتى.. بس حجايات كزار تفتر براسي و تطحن بروحي مثل طوايحن الرحى كاتمة الغصة و طلعت شهگة بواجي مني التفتت براسه مستغرب 

:: عنبر !! 

ما أكدر احجي انا اعرف روحي بس افتح حلكي تاخذني البواجي أكثر 

:: ولج هاي من صدك گمتي تعوين 

من طال سكوتي طبگ السيارة ع جهة و والتفت بجذعة يحجي وياه كضاني من ايدي دارني عليه 

:: موش احجي وياج شبيج 

:: ما بيه 

:: لا تقنعيني انتِ ما تبجين  مني هيج .. اكو شي صاير وياج مو 

:: لاا 

:: ياهو كزار لو قسيم محد يغثج بالسلف غيرهم 

عود اسكت وما ادور طلايب لاااا انا احجي و اشكي حتى كزار يعرف وراي زلم يردونه وما يعيدها حجيت اله اغتاظ 

:: وليش ما حجيتي بساعتها 

:: اجيت اكولن الك جنت طالع وياه غفار ونسيت وهسه تذكرت راح اطبنه لكزار موش 

هز راسه اي وصلنا الشارع مال منطقته شاف سجدة تمشي ما ظل للغضب مجان عيونه تبتسم گبل حلگه  ادك دگ الها هورن ما

ندارت بقت ع مشيها امشي  صار يمها نزل الجامة 

جراح :: بلور 

تعرف هو جاي يصيح عليها هم من صوته وهم من اللقب هو الوحيد يسميها بلور وبقت تمشي ولا التفتت  

جراح :: بلوور صعدي لا تطلعين صوتي عليج جدام العالم 

نار و زيت ثنينهم واحد يحرگ الثاني اكثر من شاف عنادها نزل هددها 

:: تصعدين برجلج لو اصعدنج مكسرة 

::  فنك حتى غفار يكسر شكو عظمة بيك 

:: خوش اريدن اشوف هذا غفار الشادة ظهرج بيه شيسوي 

اجه صعد وهي مشت انتظرها تبتعد مسافة شوية وداس بانزين دعمها من صدك صرخت 

::ولك شسويت اليوم غفار يشحتنه من السلف 

نزلت اركض وهو نزل بس طايحة ع كاع ما متاذية كومها والناس التمتت اسم الله واسم الله حتى يكف تدخل الناس گال الهم 

:: راح اخذنها للمستشفى عمي 

صعدها السيارة وهي عيونها تكول شاهين مكفهر بغضب حتى انا سكتت بس وصلنه نزلت و ركعت باب السيارة حتى الجام اهتز مشت خطوات ترعد و رجعت اله نزل الجامة الها وهي 

:: حگي اخذنه منك وتشوف و اذا انت زلمة و سبع ساعتها ابقى واگف جدامي 

أشر الها ع عيونه الاثنين و الفرح تارس وجه راضي تحجي وياه حتى لو جان كل كلامهم تهديد و وعيد 

:: بهاي گبل هاي.. و عيونج اشتل رجليني للكاع الج بس كون انتِ مره ومن ظهر زلمة تسوينها 

براءة :: اجت عنبر ما كايل الها جراح ع صار بس البيت احترك هي عرفت ترفة شمرت الجنطة و ركضت الها و سجدة تلكتها امي من الباب عتتها من ايدها 

اخذتها للحجرة مدري شگالت الها 

طكتها ع وجهه حيل 

:: گولي انا اريدنه لجراح و اماطل بالسالفة بس يسجدة انا حذرتج ثوب العرس يصير الجفن الج خاف تكولين ما گتيلي ما نبهتيني 

اعاين لسجدة  وجع ما ينوصف الخيبة من الام توجع أكثر من الصواب نفسه  شعور غريب... مثل واحد بردان يركض صوب حضن يحسبة يحمي ولما يوصل يلگاه فارغ، بارد، 

سكتت سكتت و انفجرت بوجه امي تعاتبها مدري تلومها 

سجدة :: ليش؟... ليش خلتيني اسكت  موش مفروض تصيرين لبوة وانتِ اول  وحدة تحميني شو صار العكس  بيدج سديتي الباب بوجهي وخليتهم ينهشون بيّ ع كيف 

:: جان بعده شباب طايش و غلط تردين افضحنه حتى ابوج و اخوتج بس يعرفون يذبحونه 

دموعها تصب و تمسحن حيل تكرد خدها كرد و كلمات تكول واحد كاضلة سجينة و يحفر بگلبي 

سجدة :: تدرين كلما أغمض عيوني، أشوف ذيج الطفلة  وهي غارگة بدمها و تنتظر امها تروفها وتالي ما حصلت غير الطك و من ردت احجي لطمتيني ع حلگي جنت اشوفن روحي الضحية خلتني بعيني نفسي جلاد 

ما اهتم لـ امي جفن 

:: لا تبقين تتعايرين انتِ بس اطلگي من جراح وهو يصحح غلطته ياخذج 

طلعت امي وعافتها تصارع خيبتها طبيت الها افتح حلگي اريدن احجي ضاع الكلام مني 

:: سجدة 

فزت ونخطف لونها جن توها انتبهت لوجودي گبل لا احجي حطت ايدها ع حلگي 

:: اشش لا تحجين اي كلمة براءة... سري سرج و لو طلع معناها موتي تردين اموتن 

هزيت راسي.. لا.. وهي ما تخليني احجي ايدها ضاغطة ع حلگي 

:: حتى بينج وبين نفسج ما تحجين خوش 

ابتعدت عني كضيتها من ايدها 

:: لا تسمعين حجي امي غفار ما ياذيج والله ما سمعتي شلون فزع لعمتي خميلة وكتل ابن جبران و صوبه

:: براءة انا شكلت 

:: جا تردين تضيعين نفسج 

:: محد يضيع  انتِ بس سكتي وانا اتصرف 

گطع كلامنه نقالها من دگ رقم بلا اسم عرفته رقمه مصطفى الخسيس جي دوم يخابر امي   فتحت خط وانا وياها اسمع  رجف جسمها من سمعت صوته 

:: الووو 

يمط الحجاية جنه حرمة...نبرة صوتها قوية مابيها اي خوف بس جسمها مثل سعفة وصارت مواجهة وياه الريح 

سجدة :: وجع شعندك متصل 

مصطفى :: ردت اعرف قرارج بالموضوع الحجينة بيه سوه وهم عمتي گالتلي ابن عمج جراح محدد العرس  

ضحكت بوجع أمي ما تضم سالفة ابد بث مباشر من بيتنه لخوالي 

سجدة :: اي بالايام الجاية وانت أول المعازيم موش ما تجي ازعل عليك تره 

مصطفى :: ليش تردين اشهد مراسيم ذبحج 

فتحت حلگها تجر نفس قوي حتى ضعفها يبين بصوتها 

سجدة :: لا للاسف ما تلحك يذبحونك گبلي.. يعني انا بس اشوفنه دمك وهو ينهدر مثل الماي النجس 

:: و تكدرين تكوليلهم ع سويته بيج 

:: وليش اسكت وانا بكل الاحوال ميتة ع اقل اشوفنك ميت جدام عيني ذيج الساعة لونهم يحركوني وانا عايشة اقبل 

:: ههههه هاي قوتج تخليني ارغبج أكثر تدرين لو لا 

:: اي ادري هو الجلب يحب خناكة 

ضحك أكثر صوته يخلي معدتي تتكالب مجرد عرفت فعلته القذرة جزت نفسي منه اله  

:: صدك امس بليل عمتي اتصلت بيه  كالتلي حل كلش عجبني يمكن راح اسوي شتكولين ؟

بعيونها.. قهر.. خيبة خذلان كلهن التمن بنظراتها.. سكتت و الغصة تصعد وتنزل وياه كل جرة نفس و نشدته بوجل 

:: شگالت الك 

:: كالتلي غفار يحبج و واثق بيج ما تسوين الفانية لون عرف سالفتج اجي و اطيحن عليه و غلطة وصارت و حتى لا ينفضح  بعباتج ينطيج الي 

:: الظاهر عمتك ما تعرف ابنها زين غفار لونه عرف يذبجنك من كفة بلعومك و يعلك راسك بنص السلف عبرة لكل واحد عار مثلك

:: خوش نشوف عود ياهو كلامه صح انتِ لو عمتي 

سد الخط وهي لطمت ع وجهه لا يسويها صدك طلعت تركض جن نار واجه بذيال ثوبها و شما تركض  تبقى وراي لاكتنه امي بالباب توها رادة من بيت خالي جرتها سجدة و طبگت الباب 

فضيلة :: شكو شمالج وجهج مخطون لونه 

:: هسه تتصلين ماعرف تروحين اله  بس بيناتنا العباس اذا اجه وحجه لغفار اگتنله و اگتل روحي  

طگتها ع حلگها بكفة ايدها حيل 

:: لسانج غادي شطوله گمت تسجرين حتى عليَّه كله من ذاك گوى عينج عليها 

مسحت دم شفتها و تكربت عليها حيل  

::  اذا ماتعرفيني بعدج انا سجدة اخت غفار يگتل الميت و يمشي بجنازته ان ما كفيتي ابن اخوج عني اخلي طشار اهلج بالمكابر 

:: شمالج ترجفين عليَّه شكالج وخلاج ترعدين هيج اخت غفار

:: گالي بالحل مالتج يمممه 

نزعت عبايتها و طوتها ع ايدها طبت جوه مشت سجدة وراها طبت حجرتها تخابر تحجي ع مصطفى و تحذرة ما يسوي شي هسه وهي راح تصرف 

عيوني ع سجدة بعد ما تأكدت من امي منعت مصطفى من الراد يسوي جرت نفس قوي تدك بيدها ع صدرها بوجع 

رحمة :: جلجل الليل وكلها نامت سجدة صعدت فوگ عدها غرفة وحدها بس البنية اكو حزن بداخلها خافيته بقناع القوة 

مثل جرح مغطى بضماد نظيف هو من الداخل متقرح و ملتهب كلها تشوفه وين بس يوجع صاحبه

ترفة وهذة وجع ثاني خيبة أهلها تاكل بروحها مثل الصدأ من ياكل الحديد 

اللي عنده جرح بروحه شما تحجي وياه سراب لا كلمة تطيب خاطرة و شبگة تفشي روحه 

نگلبت بفراشي صارت صورة الأمام علي القماش اللي موجودة بكل غرفة بالبيت ونفسها توكف عنبر تطلب منها كل يوم وبصفها صورة الامام العباس ع 

شي ما اشوفه يجر بيه الها صوت يهمس مو بـ اذني...لا... صوت داخل روحي يگلي انتِ هم احجي وياه 

غمضت عيوني و فاضت دموعي بعجز گمت ع حيلي تقربت لمست القماش ادقق بالملامح شي يفوق الخيال كلشي مرسوم بدقة 

ومثل تدعي عنبر اني دعيت دوم اسمعها تگله 

" انا ادري بيك ميت بس نخيتك لا تردني" 

مجرد ما حجيت وياه احس أمان غريب اجتاح صدري رجعت لفراشي مددت بين الغافية و صاحية  صوت أذان بصوت عالي صوت عذب يتخلله الإيمان بنبرة بيها شجن فتحت عيوني ظلام هندس كلشي ما اشوف بعيوني

گمت من فراشي و بقيت واگفة اريد افرزن نهار ليل ابيش الساعة هسه وليش هيج ظلمة،، عگدت جبيني مستغربة نفسي... اني خوافة،، اخاف من الظلمة شلون هيج واگفة عادي 

بدون خوف احس راحة غريبة ساكنة گلبي روحي هادئة ماكو أثر لاي خوف تنهدت و مشيت مادة اديه للأمام اتلمس الگدامي حتى لا انضرب بشي عيوني ما اشوف

بيهن من شدة الظلام بس احس روحي اشوف حافظة البيت ع ظهر قلب عبالك حاسبة الخطوات كم خطوة و اوصل

الباب... اجه سؤال براسي هذا احساسي ان اني اشوف بالظلام لان اني حافظة البيت .... لو هذة البصيرة الچانت امي تحجيلي عنها من تگول العمى الحقيقي مو عمى العيون.. لا.. العمى عمى القلب ،،عمى البصيرة

ظل هذا السؤال عليه علامة استفهام بدون جواب،، طلعت من الغرفة منها للهول و الطرمة صار

ضوه شوية ضوه الگمر مضوي ،، مثل ليله گمرية صوت

الاذان بعده كلما يخلص ينعاد استغربت بيتنه متغير ما بي سياج لا باب گبل ع منطقة طلعت امشي ماكو بيوت مساحة مفتوحة.... خيام 

شفت خيام و دخان اسود مالي المكان صاير مثل الضباب و ريحة دخان ترست خشمي،، اقشعر بدني كله من شفت شخص طلع من الخيمة لابس أخضر مثل ملابس الشخص اللي بالصورة ما اشوف ملامحة بس هيئة شكله مرسومه الخيبة عليه ينظر للناس و گال

:: خذلتونه مرة ثانية

كلامه يكزبر الجلد اول مرة اشوف هيج شخص يشع هيبة و إيمان صارت رهبة بداخلي من شوفته بقيت واگفه بمكاني تقرب عليَّه انطاني بيرغ أخضر و گال بنبرة واضحه و صوت منطوق 

:: هذا هدية من الهواشم

أخذته منه بلهفة روح دنكت راسي اشمه،، بي ريحة طيبه چنه ريحة مسك.. عنبر عطر ما شامته قبل ابد كأنه عطر من الجنة رفعت راسي اختفى الرجل و صوت مرأه تصيح بصوت يكرب الگلب

" طلع الدجال،، صارت الفتنة.. ناس گامت تاكل بناس بس هالمرة ماكو خلاص مراح يبعث الكم نبي.. لا رسالة ولا كتاب كلمن نجاة و خلاصه بأيده " 

التفتت منا منا ماكو إثر للمرأه بس صوتها واضح عبالك تذيع بسماعة بين السماء و الأرض ،، بلعت ريگي من الخوف رجعت بخطواتي للبيت صار عيني ع نخلة الي بالحديقة  هوى عالي ويا مطر وياه كل روجة هوى تميل النخلة للگاع و ترجع ترتفع اخر شي رادت توكع و شباب سانديها حتى لا توگع 

غيوم رمادية داكنه كأنها محملة بآثام البشر ترعد بصوت يدب الرعب بالقلوب و البرق يلهب عبالك سيوف من نار من بين الغيوم الحاملة ع اكتافها خطيئة غيرها 

من هول المنظر چن روحي بلغت حنجرتي 

مطرت مطر قوي مطر ينزل بكل قوة عبالك جنود من السماء نزلوا يرجمون الأرض 

فزيت من نومي مرعوبة انهج بـ انفاسي گلبي يدك ع سريع باوعت دنيا الليل بس الحلم جان عبالك حقيقة ما جان حلم لا.. چان رؤيا

طلعت بره الليل ساكن و السمه صافية حتى النجوم طالعة ماكو غيوم لا مطر كعدت ع كاشي تذكرت البيرغ شميت أيدي بيها عطر طيب نفس اللي جان بالحلم معقولة هذا الامام راح يوكف اللي بهذة المصيبة 

سمعت صوت طكطكة حديد كمت مديت راسي من الباب شفته تارسها سيوف اجه واحد ملثهم بالشماغ أخذها منه انطاه فلوس ومشه 

وهو بقى بمكانه يباوع أثر من طلع لشارع جعص الفلوس بيده و ذبها فوك النار تحترك 

صارت عينه بعيوني اجه بتجاهي طبيت اركض سويت روحي ما شفته كعدت ع كرويته اجه هو بيده سيف بعده قيد الصنع و قطعة حديد من شافني گال مستغرب 

:: خو ما رايدة شي 

:: لا 

:: جا شعندج طالعة بهل لليل بره 

:: اختنگت وطلعت اشم هوى 

:: كلما اشوفنج لو تركضين شاردة و تبجين شنهي سالفتج 

:: لعد المثل حالتي يفرح بين ليلة و ضحاها صرت متهمة و مطلوبة للقضاء و عفت اهلي و مصيري مجهول 

گعد ثبت قطعة الحديد و يحد السيف تعوذ من الشيطان و بدا يقرا ايه 

بسم الله الرحمن الرحيم 

وَلَنَبْلُوَنَّكُمْ بِشَيْءٍ مِنَ الْخَوْفِ وَالْجُوعِ وَنَقْصٍ مِنَ الْأَمْوَالِ وَالْأَنْفُسِ وَالثَّمَرَاتِ وَبَشِّرِ الصَّابِرِينَ ..

مشه حد السيف ع اصبعه حتى يشوفه حدته وگال بعد ما صدق 

:: هاي الآية تنطبق عليج بلائج و امتحانج من الله الخوف المطلوب منج  تواجهين بثنين

:: شنو هنه

:: الإيمان بالله تخلين يقين بگلبج هذا الخوف راح يجي يوم يبدله رب العالمين الج بأمان والثاني الصبر.. البجي و اللجة.. الجزع ما يحلن شي الج الله يريد الصبر من عدنه وكل ذرة صبر منج... الج حسنة

البجي و التفكير المشكله الصار تلج مراح يحلها انتي بس جاي تايذن نفسج وبالتالي لا تنحل مشكلتج ولا تحصلين اجر من الجزع التربع بصدرج 

:: بس اني ما استاهل هيج يصير بيَّه والله ما مإذية احد 

:: محد يستاهل المصيبة بس خلها ابالج الله ما يحمل غصن ثمرة أكبر من قدرته هو من نزل عليج هل البلاء يعرف طاقتج وقدرتج و يدري بيج راح تعدينها ان شاء الله 

بين اليأس و الأمل بين القنوط و الرجاء شعور متناقض بداخلي كأن أكو شخصين واحد يصرخ بالجزع والثاني بالإيمان بالله تعالى... هملت دموعي 

:: ع ليش البجي وعد مني و وعد الحر دين وبعد صرتي من اهلي و انا وياج لحد ما تجيج وراقة برائتج و وعد الزلمة مرهون برجولته يعني لو خليت وياج بالوعد البس شيلة واكعد بنص اخياتي.. واذا تبجين خوف من نزار نامي رغد طرف من ثوبج ما يلوح واذا تردين اهلج اشوفن الج الوضع و اخليج تشوفيهن 

گلبي احس صارت اله جنحان من سمعت بطاري اهلي و شوفتهم سئلته اتأكد 

:: كلهم !! 

:: كلهم بعد شتردين 

صدح صوت آذان الفجر سمعت طگة الباب طلعت سجدة عيونها حمر مورمة تقرب الها يحجي وياها ويمسح عيونها بـ ابهامه وهي لزمت كف ايده باسته 

:: تاخذني لـ ابوي 

:: هسه 

:: اي روحي متلهفة اله 

:: بين ما اصلي حضري نفسج 

براءة :: كعدت نفس كل يوم عاينت لا رحمة لا براءة بس ترفة نايمة بتعب خطية طلعت بره شفت سجدة مبدلة ولابسة عبايتها 

:: ع خير من الصبح صاير شي 

:: لا راح نمشي لنجف 

:: صدك جا اروح وياكم 

:: لا اريدن لوحدي هل مرة ع جايات عود امشي ويانه 

الف علامة استفهام صارت براسي من كلامها اجت عنبر من بيتهم هم اول ما تكعد تجي يمنه من شافتهم گالت 

عنبر :: وين رايحين اخذوني وياكم 

سجدة :: ترفة مريضة ابقى ديربالج عليها ومرة الخ عود اخذنج 

عبست ترفة غفار دك هورن لسجدة حتى تطلع راحت لديوانية سلمت ع جدة و جدي واجتنه وحدة وحدة حبتنه 

صعدت لقسيم هم سلمت عليه وكفت يم رحمة شبگتها 

:: لاتخافين من اخوي تره زلمة كلف ويصون الأمانة 

هزت رحمة راسها اي وهي حضنت عنبر هم وصلت الباب و رجعت شبگتني حسيت أخيتي بيها شي 

:: ديربالج ع عنبر و ترفة 

طلعت و خنگة صار البيت شعور ثگيل جثم ع صدري اخذت قرآني اقرا هلبت الله و ينزاح 

طلع الصبح سويت ريوك و كملت شغلي و لظهر وانا مخنوگة ما اعرف شبيه اكنس بالحوش واسمع قسيم خابر عليهم و تخربط كله وضعه 

تكربت عليه انشدنه 

:: شگالك راجعين مو 

شحب وجه غدى ورگة و مر عليها الخريف فجأة يردد الكلام 

:: يگلي جيب مستمسكات سجدة و بطانية 

يتبع 

             الفصل الحادي عشر من هنا 

لقراءة باقي الفصول اضغط هنا