رديت تاني.. وقلت.. قلت ليك مااا دااااايرة! قال لي بكل برود.. تمام.. وحطاه وراء ووواصلنا طريقنا... قريب ثلاثه ولا اربع ساعات نحنا ماشين وكل ما نجي جنب ارتكاز يوقفوه وبمجرد ما يشوفوه يبتسموا لي ويخلوه يمشي.. اكان الطريق كلو عبارة عن صقايع ومرات نمر بمناطق زراعيه واسعه.. المهم عرفت اننا طلعنا من سنار تماماً... وقلبي اتقطع على اخواتي.. وخاصه سلمى لانها كتوومه وما بتتكلم ولا بتشكي.. وحالها لايعلم به الا الله.. بس ربنا يكون معاها.. اما نور ف بتكون ميته من الخوف علينا.. ودا كلو بسبب ابوي فرقنا وقطع قلوبنا...
ما انتبهت الا ونحنا دخلنا مكان تاني وتقريبا ياها وجهتنا المهم كانت راقيه واغلبية البيوت عمارات وزحمه وعربات... فجاءة وقف قدام مكان كدا وعاين لي وقال دقائق وراجع ح اجيب هدايا لي اخواتي عاينت لي كدا وقلت في نفسي وقت عندك اخوات ليه بتعمل كدا.. هسي اخواتك بترضى يحصل ليهم كدا..
المهم نزل ورجع سرعه وشايله ثلاثه كراتين كانهن موصى عليهم ومجهزنهن لي.. المهم واصلنا طريقنا وانا ساكته...
لحدي ما وقفنا قدام عمارة كبيرة ونزل من العربيه وانا نزلت... قال لي.. خليك عاديه.. تمام.... وبالمناسبه اسمك منوو.... عشان الخطه تمشي صاح.... قلت براحه اسمي سديم... قال لي منو.. قلت لي سدددددديم قال هااه.. احم..طيب المهم.. لو سالوك قولي انك بتقري ف الجامعه وشايله اقتصاد تماما واهلك برا البلد وما عندك اخوان تماما وانتي قاعده ف سنار مع واحدة صاحبتك.. قلت لي.. هوي..داشنو..انا الثانوي ما وصلتو ولا قاريه اصلا..قال لي..ما عليك هم ما ح يشكو لانو شكلك تنشافي كبيرة واتقدم عشان يدخل وانا وراه دق الباب وبقينا متتظرين...
نور _♡_وانا قاعدة في المطبخ وابكي سمعت اصوات عربات براا.. دا شنو فاتو يعني.. طلعت من المطبخ جري.. ودخلت البرندة بس كانت فاضية ماف اي زول حسيت بقلبي بدق من الخوف.. فجاءة جاء ابوي داخل وهو ماسك ربطه قروش يعد فيها ويتبسم.. مشيت على بسرعه وقلت.. وين سديم.؟... قال لي يعني ح تكون وين يعني.. صرخت وقلت.. لالا.. ما تقول كدا.. انت مالك ما عندك رحمه البنت دي صغيرة ما عارفه حاجه ليه تعمل فيها كدا..على الاقل كنت تخلها تودعني.. اكيد منعتها ليه انت قاسي كدا ليه.؟... ما اشتغل بي كان يعد في القروش من الغضب.. مسكتهن منو بقوة وشرطت جزء كبير منهن وهو طير عيونو وبقى يعاين لي ويعاين للقروش الفي الارض..قلت بصوت عالي.. ما عشان امي غلطت لمآ اتزوجتك. تجي تتحكم فينا.. نحنا اصلا.. ما بناتك وما بشرفنا اب زيك يكون ابونا .. نحنا صبرنا عليك كتير بس الصبر عندو حد اهنتنا وزليتنا وامي ساكته لانها خايفه علينا وعايزة تكون مطمنه علينا ونحنا صابرين عشان ما نزعّل امي بس بعد كدا خلاص امي وماتت وكلو بسببك ما قدرت حتى تعالجها.. قبل اتابع كلامي اندفع علي وضربني بقوه في وشي بس انا ما سكت اتكلمت وقلت.. اصلا شغلك الضرب غيرو ما عندك حاجه مفكر نفسك راجل لمن تتستعرض عضلاتك علينا بس انت ما بتساوي نص راجل... رجع ضربني بقوة اكبر لمن وقعت وهو يسب ويشتم فيني.. بس انا كنت موجوعه شديد وحاسه بوجع قلب.. اخواتي ما قدرت احميهم جايه هسي اتكلم بعد شنو بعد فات الاوان بعد ما حياتهم ادمرت.. قعدت الوم في نفسي وما حسيت بالضرب الكان واقع علي.. قال بصوت عالي... انا وكلتك وشربتك من كان عمرك 10 سنه جايه هسي ترفعي صوتك علي ربيتكن مع انو ما ملزوم بيكن امكن وماتت كان ممكن عادي ارميكن في الشارع بس ما عملت الا الليله بوريك تاني تقلي ادبك معاي كيف.. مسكني من يدي بقوة وقال لي وعيونه زي الشرار.. تطلعي من البيت دا سريع يا عديمة الادب والحياء... وقسما بالله تدخلي هنا تاني الا اكسرك.. وخلي الناس تمسكك.. جريت يدي من يدوو بقوة وقلت بغضب.. وانا تاني ما ح ارجع هنا ودا اصلا ما بيت الزول بقدر يعيش فيو.. مشيت بسرعه ودخلت لميت هدومي وحاجاتي وواحدات حقات سلمى وسديم كلهم لميتهم في شنطة ولبست وطلعت وانا ابكي وندمانه على اهمالي لي اخواتي... كان واقف يلعن ويسب فيني بس انا ما عبرتو وطلعت من البيت بسرعه وانا ارجف من شنو تحديداً ما عارفه.. بقيت ماشه في الحله.. وانا عارفه لو مشيت اي بيت هنا م ح يدخلوني وخاصه اهلوو لانهم ما بحبونا وبكرهونا وحتى لو دخلوني ح يشمتو فيني ويسمعوني كلام يقطع القلب... قررت اطلع من هنا خالص مع اني ما عارفه مكان غير المنطقه بس اتوكلت ومشيت.. لحدي ما طلعت من المنطقه تماما ولقيت نفسي في اماكن وشوارع كاني في متاهه لاننا ما بنطلع المناطق الحولينا اصلا... المهم بقيت ماشه لحدي ما سمعت اذان الظهر اذن وقعت عيني على جامع صغير متطرف اتوجهت علي وقلت اصلي الظهر احسن.... وبعدها اواصل!
سلمى _♡_ بعد ما خلصت الاكل غسلت وشي وشلت الاكل وديتو ليها براا بتعاملني كاني خدامه وانا اصلا ماف فرق بيني وبين الخدامه هنا.. حطيتو ليها قدامها وهي تعاين لي الا الما اكلتني.. رجعت المطبخ تاني وبقيت افكر واعاين في المطبخ المبشتن والبيت كلو كدا ما عارفه المراة دي متكبرة فوق شنو لا مال ولا حسب ولا نسب وانا متاكد اي بنت ما بترضى بناس زي ديل بس الله عالم اني مجبورة وابوي هددني بانو ح يطردنا من البيت ما عارفه ليه بعمل كدا مع اننا بناتو.. انا لسه م قادرة استوعب انو في ابآء كدا.. خطرت ف بالي امي وبقيت ابكي وابتسم.. لاني اتذكرت كيف كانت بتدافع عننا قدامو وكيف كانت حياتنا لمن كانت موجوده مع انها كانت حياة صعبه بس معاها كل شئ بهون وبمجرد ما فاتت شالت اي حاجه حلوة معاها ومن بعدها ما ضقنا طعم للحياة.. الله يرحمك يا الغاليه فراقك نااااااار!.. انخلعت لما جاني صوتها العالي وهي تقول وين الشاي ي سجمانه... مسحت دموعي سرعه.. وبقيت اعمل في الشاي.. وصلت لي مرحله بقيت اكره اسمع صوتها...!. خلصت من الشاي وجبتو ليها... سمعتني كلام زي السم وانا ساكته وصابرة.. بعدها طلعت من البيت... حسيت اني رجعت اتنفس زي البشر فعلاً حياة زي الزفت قعدت في طرف السرير وحطيت يديني ف راسي من شدة الصداع... فتحت عيوني لما سمعت صوت سعد وهو يقول..